|
|
 Re: أمــ(تطاول)ـــــــد...! (Re: Nasruddin Al Basheer)
|
الجميلون
القلب النابض
معااااااااذ
نصرالدين
طلتكم بالدنيا وكل يوم وانتم بألف خير
ولا أجمل من لقاء الأحباب
معاذ وود البشير
والله كان عيييييييييييييييد في الجزيرة
يؤرخ له لـ(قرون) قادمة
ولو شفت يامعاذ (كمية) الخرفان والكولا والسفن أب
تقول نحن بقينا في عالم تاني غير السودان الزمان داااااااااك
تتصور يا نصرالدين نحن من ما مرقنا من (المسيد)
العربية (تفج) في الخرفان لحدي ما وصلنا ابوعشر
والموقف دا ذكرني نكتة اخونا (الجااااااااااك) القال للبنية في (دار الاتحاد)
- هل تذكرانها- قال ليها نحن في حلتنا وقت نجي نشرك للطير ..نفجو كدي - وأشار بيديه - حتين نخت القلابة...!
ضحكت وقالت ليهو طيب ما تقبضوا بي ايديكم ساكت..؟
قال ليها وكان بنقضبو بي ايديناأكان بقى عندي موضوع هسي..!
عووووووووووك على تلك الايام
...
ود منصور..
العزازي منورة ليها فترة طويلة
والديجتالات مصبوبة فوق حيط الجالوص والطين
وروتانا سينما (شالعة للآخر) ومش حتقدر تغمض عينيك
تصدق الفيلم تبداه في الفريق القدام وتمو في الفريق الوراء
والاعلانات تسمعها وانت في الزقاقات
والناس بقت لابدة جوة البيوت ..لا حوامة ولا رحيح في الحر
المراوح تهبهب والموية بااااااااردة في الحفاظات
عشان كدا الطفرة كانت كبيرة
والبنات يا معاذ بقن سمحات جنس سماحة
ونحن لما نمشي - زي ما حصل في العيد الفات دا- تقول جايين من بلد فيها مجاعة
يعني النشاف والغبشة والخرطوم انت براك عارفها
..
نصر الدين ما قادر اعلق ليك على النكتة
لأنو الطلب ذاتو نكتة
ودي زي صاحبك دااك (مرضان الكوشتينة) الجروهو بالخمسين
قالو جاء الدغش للزول الجراهو - طبعاً الليل كلو ما نام- ووقع في الباب خبت شديد
وأول ما زولو ظهر قال ليهو:
أسمع لو اديتك "دو هارت" عليك الله بيكون خمسين..؟
صاحبنا قال ليهو : لو رميت اصبعك ذاتو خمسين يلا امشي نوم نومك ..!
....
ياقلب
كيفك والبلد البعيدة والعيد الجميل
أكيد الخروف ضبحتوهو في مستشفى خاص بعد عملية تخدير كاملة...!
والا انتظرو جماعة حقوق الانسان (اقصد الحيوان)..
كل سنة وانت طيبة
والصغير (محمود) عيد ميلادو يوم 18 يناير - الشمعة الثالثة- يعني حضري الهدية من هسي لي يوم الاربعاء
وسلام لأحلى الحلوين
وصحي البعاااااااااد صعب
|
|
 
|
|
|
|
|
| العنوان |
الكاتب |
Date |
| أمــ(تطاول)ـــــــد...! | عادل فضل المولى | 01-14-06, 03:14 PM |
| Re: أمــ(تطاول)ـــــــد...! | القلب النابض | 01-14-06, 05:39 PM |
| Re: أمــ(تطاول)ـــــــد...! | معاذ منصور | 01-15-06, 05:42 AM |
| Re: أمــ(تطاول)ـــــــد...! | Nasruddin Al Basheer | 01-15-06, 11:29 AM |
| Re: أمــ(تطاول)ـــــــد...! | عادل فضل المولى | 01-16-06, 01:56 PM |
 Re: أمــ(تطاول)ـــــــد...! | فيصل نوبي | 01-16-06, 03:11 PM |
| Re: أمــ(تطاول)ـــــــد...! | معاذ منصور | 01-17-06, 01:25 PM |
| Re: أمــ(تطاول)ـــــــد...! | عادل فضل المولى | 01-17-06, 02:04 PM |
| Re: أمــ(تطاول)ـــــــد...! | saadeldin abdelrahman | 01-17-06, 07:34 PM |
| Re: أمــ(تطاول)ـــــــد...! | حسن البشاري | 01-18-06, 07:50 AM |
|
| |
عادل فضل المولى
فيس بوك
تويتر
انستقرام
يوتيوب
بنتيريست