عافي منـــك يا محسن خالد ..

Quote: دحين اللهاة دي يا بشاشا مش الفي الحلق؟ الإزعاج بتاعك دا ممكن يهري طبلة الأُذن بتاعتي مش اللهاة، empty barrel’s make such noise .. بعدين أنا ذاتي رعواتي ومساواتي زيك، ما عندك أي مشكلة، خليهو كلام أسامة الخواض، ما بوفّر ليك المجانية الإنت دايرة دي، لكن لو أنا بجوز لي أمشي أغالط المعز عمر بخيت في الطب، بجوز ليك إنت تمشي تغالط أسامة الخواض في مفاهيم متعلقة بالثقافة،.... إذا كانت أي حاجة وأي أحد عندك هو "إيشو" بتاع جلابة جلب يجلب، فياخي حظكم عندكم دولة منسجمة، بتتلخص كلها في مفردة واحدة اسمها (جلابة)، عليك الله يا بشاشا ما تبطل حركات (الجلابة) بتاعتك دي،.. أنا طبعاً مارق رقبتي من الموضوع وشايفكم كلكم عديمين شغلة، لأنو المجتمع السوداني بتكون من المفرد الغالاط حتى الموت زيك كدا،.. وشايف إنو المبدع عندو موضوع في الوجود، مش السودان، أكتر من العاطل وقاباض الكلام، أولاً أمشي أقرأ إبداع الناس ديل وأمشي ناقشو في محل تاني غير البوست بتاعي دا،.. ما عندنا مانع، تعال أسألن، وجه ليهم أسئلة بشكل موضوعي، لكن إنت ما ح تعمل كدا، لأنو ما عندك قضية ولا طرح ولا تساؤلات، وإنما ونسة وقرقرابة فارغة، أطرح أسئلتك ليهم هنا، وهم ح يجاوبو، وما عليك بالصياغة أنا بجي بظبط الكلام عشان يصلح للنشر،.. لكن أبداً.. وطبعاً لا... إنت بس بتجي يا الجلابي يا القومابي يا الركابي يا الجعلي يا الطالبابي.... دي شتائم ساي وحركات جلابة زي حركات أخوك علاء الدين،.. لأنو يا بشاشا أنا ما عارفك إنت داير شنو، ولا يجاوبوك علي شنو، ولا حكايتك بالطريقة البتطرحها بيها دي قصدها شنو،.. المهم كل الممكن أقولوا إنك داير تنوم وتصحى تلقى كل الناس الناطقين بالعربية في السودان ميتين، وكل إبداعن ميت،.. في النهااااية فهمت كدا،.. بعدين الهوية الأنتجوها بعانخي وترهاقا وأركماني، اللي هم جدودنا كلنا وما جدودك إنت بس، زي ما قاعد تقول، الهوية دي المشكلة إنها راحت قبل المسيح، وإنت مستعرب حارقك الاستعراب، زي ما كلنا حارقنا، بس طووووط، ومافي حل –لكل الجلابة- في الأيام الباقيات ديل من العمر عشان يتعلموا الكوشية -الهوية و-اللغة، اللهي إنت نفسك الدنقولاوي ماك عارفة،.. دي قصتك كلها، ما تقعد تتضارى في خالد كودي وغيرو، خالد كودي فنّان موزون وغير متطرف زيك، وعارف ما يجوز وما لا يجوز في الفن، وأسألوا قوليهو هل في خطط للكتابة وألا الرسم وألا الموسيقى، أبداً، الفن دا موضوع براهو، وبالطريقة بتاعتك دي تمش تناقش فنانين تانين،.. عشان كدي يا بشاشا أسهل ليك الوقوف كشعار مع فنان تشكيلي زي أخونا الجميل خالد كودي، عشان الريشة بلغة الريشة أما القلم فمعظمنا قلمنا عربي، وحتى أبكر آدم إسماعيل صاحبي النوباوي ما بظبط معاك، لأنو كاتب عربي، مش بيعتبر، أبداً، بل هو كاتب عربي من المقدمة للخاتمة، لأنو بكتب بالعربي، (أنا قلت كاتب عربي وما قلت زول عربي -أنتبه)،... ياخي أعمل للناس دي كلها إنك شيطان، بس عليك الله محسن خالد دا على وجه الخصوص غيّر آلياتك وتعال ليهو، يعني أشوطن أكتر سطرك الزمان دا، أنا ذاتي بريد الناس الشيطانين الزيك ديل،... لأني ما مؤمن أصلاً بالهوية، ولا بالوطن، فهمت كيف؟ لا بعرب ولا حتى بأفريقيا، ولا بأي هبالة ومضيعة للزمن، هوية الكائن هي مصيرو علي الدوام، اللهو الموت، إذن مافي داعي للهوية ولا للأوطان، دي كلها أوهام وفارغة، وأنا بدعو لحاجة اسمها الإنسان (المَجَرِّي) من مَجَرَّة، إنسان تعريفو الإنسان وبس، تجدعو في المريخ برضو بعيش، فهل هناك ما يضحك أكتر من البطاقة البشيلها الزول في جيبو، ولامن يسألوه في الشارع يطلعها ويقول أنا فرجكان الفرجكاني، في كلام بضحك أكتر من كدا؟ أيوة في، ياهو كلامك إنت الفوق دا، (السطر الغلاطي) هو أصلاً مافيهو سؤال يجاوبوهو، يجاوبو شنو؟ إنت مُجَرَّد إنزيم كسول بفرزو "علاء الدين"، طبعاً دا لو كنت مش إنت المُفْرَز من قبلو هو، أما لو سبقتو للوجود، فإنت الإنزيم الما بحتمل وجود من غير "علاء الدين"، بتقوم تفرزو هو عشان يديك مبرّر وجود، وعشان كدا إنت بتطالب بإنو يدوهو فرصة، لأنو من غيرو بتبدو عاطلاً وطفيلياً، وطفّيرك في البوست دا، هو طفّير بتاع حراق روح ونظام الفار الوقع في زير المريسة، وداير يعمل فيها أين القطط أين القطط؟... يعني بالمختصر شنو، ما تفلقنا ياخي،.. إنت وعلاء الدين راكبين في ريال واحد، هو الطُرَّة وإنت الكتابة، نقوم نشيل الريال دا ونفننوا في أقرب بئر، عشان نرتاح من شنقلوتيتو المحدودة وذات الوجهين لا ثالث لهما دي،... يا بشاشا السطر الفات دا، ما بصلح لزول زي محسن خالد قاليك لا بيؤمن بالوطن ولا بالهوية ولا بالتصنيف البسيط للإنسان، الدنيا مدخلها الهوية الوجودية للكائن، مش أفريكانية ولا استعرابية، ولا أي عوارة تانية، أمشي جيب السطر التاني بتاعك يمكن يلفق معاي، وألا كمان أمشي أقرأ كتابتي بتلقى فيها حاجات حلوة، عن الكمبو وعقلية ونفسية الظلم في العموم،.. عارف يا بشاشا، أنا زول بحب اللغات جداً، اللغة الكوشية ما لاقي ليها قاموس، كان قعدت في الـواطـة دي واشتغلتلك شغل زي دا ما أحسن وأفيد من عطالتك دي؟ بعدين ياخي رجاءً خليني أركّز في الحوارات بتاعتي دي، ما تعمل لي غلاط جانبي غير مفيد،.. وكلمة في أضانك يا بشاشا، بنوع سطرك الواحد دا بتركب الانترنت لفترة بسيطة جداً، لكن تاني الناس بتزهج، وهسع إنت في خبر كان، بس ما جايب خبر، وكل المواضيع المغالية والضعيفة بتموت وأهلها بموتو، لأنو دا أخطر مكان للاستهلاك، والماعندو قدرة يكون خلاق ومتجدّد علي رأس كلو ثانية ما بستمر، أنا بقول ليك الكلام دا لأني عارفك مجرد جنازة بتنضم من سنين طويلة، لأنو الانترنت عيبو إنو ما بحرر شهادة وفاة، وياما جثامين غالاطة ولغلاغة، ما المسألة كلها حركونيات وحقوق كتيرة جدا أخدتها بدون تعب ومن العدم، عشان كدي ح تظل تشورب من العدم،... الناس الفوق دي كلها ناس تعبت، وكدحت وشقيت وناضلت، وإنسانيين مش جلابة، ومش أكياس فاضية قامت هبايب الأسافير دي وطارت عن الأرض، أتعب وكِدْ وبطّل استسهال، وبطّل حركات بتاعة جلابة،...