|
|
 كدارة واعتذار !!
|
زمان لمن كنا شفع فى الحلة كان عندنا فريق بتاع ناشئين ، صلاح بوكو ، وجلال خميسة ، ومعليش ، وشارلس وتامر ود ناظر المدرسة - دا طبعا كان كيشة لكن بنلبسو نمرة عشرة ونلعبو فى النص ولو ضيع خمسين قوون برضو بيكون قاعد - اها نحن المساكين ناس قريعتى راحت ديل نجى ليك التمارين من الساعة تلاتة ونقعد نجك والعندو كبك بيجى لابسو وفى ناس كدا معلمة الله زينا تلعب حفيانة والزى الرياضى مرات بيكون رداء عبارة عن بنطلون قديم جزت اطرافه ومرات بيكون رداء المدرسة واتو والفنالة بتكون فى الغالب قميص يربط من المنتصف دا لو ما التقسيمة بتاعة التمرين جابتك فى الطرف بتاع الناس اللاعبين بدون قصمان !
اها يا جماعة مرت ايام وجانا ليك شافع بتاع مغتربين جاى اجازة ولا شنو ما عارف ، الود فيهو نورة المغتربين زمان - هسة طبعا النورة اتساوت والغبشة معاهم - ديك اسمو جميل وموسيقى كدا ومرة جا قال عاوز يتمرن معانا وكدا و(يدفر ) الود ما شاء الله اول شى زى رياضى كامل كدارة كدايس صواميل والكدارة مما سمحة غايتو عصومى اخو ناس ياسر بابور حلف يلطشها عشان يقشربيها مع بنطلون وقميص ، والفنلة يا لطيف قمة الروعة والشرابات والشنكارات ( واقى الساق يا جماعة ) اها صحبك من اول تمرين نقشنا ليك انو كيشة وقاعد فى السهلة وما بعرف من الكورة دى التكتح لكن نسوى شنو الكوتش بس تقول عاجباه اناقة الولد وتهذيبو طبعا لو ردمتو لمن الدم يفر من وشو ما بقول ليك حاجة زولا طيب مش زى ناس الامين باشا وعزو الرباطابى ديل الواحد فيهم لو طقشتو ساى اليوم دا داك الا يشيلك ايدك ولا رجلك فى كيس !
اها مدعوكين تمارين وجرى و(جكة ) لمن تجى التقسيمة يوزعو ليك صاحبنا المغترب دا لاعب اساى ويطلعو ليك كنين وايمن عجوز احتياطى والقصة دى مرة واتين وتلاتة لغاية ما مرة كدا كنين سخنت معاه وشعر بالظلم لمن الكوتش قال ليهو كنين انت احتياطى تعال اقعد هنا ولا امشى وراء القون جيب الكور ، كنين خلاص قفلت معاه وطوالى قام هايج وهو كان عندو (لجنة ) فى لسانو ظريفة ( سنو يا تابتن تلو يوم سابتنا احتياتى احتياتى وملعب لينا ماردونا دا ..وهو تل يوم بجى الساعة مية وانا بجى من بعد فسحة الفتور ) احيييييييى يا توتش .. احيييييييييييي انا !!!
اها سنو يا دماعة سابتننا اعتذار واعتذار ومافى زول قال نعتذر لمحمد حامد جمعه دا ... احييييييييييييى انا
|
|
 
|
|
|
|
|
| العنوان |
الكاتب |
Date |
| كدارة واعتذار !! | محمد حامد جمعه | 04-22-07, 05:07 PM |
 Re: كدارة واعتذار !! | وليد محمد المبارك | 04-22-07, 05:11 PM |
| Re: كدارة واعتذار !! | محمد حامد جمعه | 04-22-07, 05:19 PM |
| Re: كدارة واعتذار !! | ASAAD IBRAHIM | 04-22-07, 05:12 PM |
| Re: كدارة واعتذار !! | Mustafa Mahmoud | 04-22-07, 05:20 PM |
| Re: كدارة واعتذار !! | محمد حامد جمعه | 04-22-07, 05:21 PM |
| Re: كدارة واعتذار !! | Murtada Gafar | 04-22-07, 05:46 PM |
| Re: كدارة واعتذار !! | محمد حامد جمعه | 04-22-07, 05:49 PM |
| Re: كدارة واعتذار !! | Murtada Gafar | 04-22-07, 06:33 PM |
| Re: كدارة واعتذار !! | عبده عبدا لحميد جاد الله | 04-22-07, 07:24 PM |
| Re: كدارة واعتذار !! | محمد حامد جمعه | 04-22-07, 08:29 PM |
| Re: كدارة واعتذار !! | الطيب بشير | 04-22-07, 07:28 PM |
| Re: كدارة واعتذار !! | Tabaldina | 04-22-07, 08:10 PM |
| Re: كدارة واعتذار !! | عثمان حسن الزبير | 04-22-07, 08:32 PM |
| Re: كدارة واعتذار !! | Salah Abdulla | 04-22-07, 09:05 PM |
| Re: كدارة واعتذار !! | ASAAD IBRAHIM | 04-22-07, 09:13 PM |
| Re: كدارة واعتذار !! | bayan | 04-23-07, 09:45 AM |
 Re: كدارة واعتذار !! | A.Razek Althalib | 04-23-07, 09:59 AM |
| Re: كدارة واعتذار !! | محمد فرح | 04-23-07, 10:21 AM |
| Re: كدارة واعتذار !! | Murtada Gafar | 04-23-07, 12:58 PM |
| Re: كدارة واعتذار !! | د.محمد حسن | 04-23-07, 01:16 PM |
|
| |
محمد حامد جمعه
فيس بوك
تويتر
انستقرام
يوتيوب
بنتيريست