طلبات زواج......للجادين

Quote: مطلوب عربس : 1. أبيض ( مامشكلة حبة ترطيبة بنجبيها) 2. شعروا ناعم(75%) 3. وجيه بلحية محمود عبد العزيز(100%) 4. غني (وهذا مربط الفرس)

1. إذا كان البوست مقصوداً به المستمتين على تراب الخرطوم (مساكين)، فصحيح أن كثير من الشباب- بالمعنى الإطلاقي- يحتاج لمثل هذا البوست، لكن الصحيح أيضاً أن الشابات هن أكثر احتياجاً.. آخر إحصاءات مركز نسيت اسمو في الخرطوم تعلن بوضوح مؤلم أن نسبة العنوسة في الخرطوم وحدها 83.7% ناهيك عن الأقاليم.. والسبب: الحرب، الضائقة الاقتصادية ونواتجها مثل الهجرة والاغتراب (ديل نحن) وأشياء أخرى.
   
2. ولو كان المقصود به شباب الخليج وعتاة عزابته، فببساطة خُمَي وصرَي.. ليش؟ لأن أهل الخليج، حتى الكماسرة منهم، لهم وضاءة وعليهم مسوح نعماء وإن كان كاذباً لكنه جاذب.. هاك قصة قصيرة حدثت لي أنا الممعوط دا شخصياً.. زمان قبل الاغتراب كانت بنات الحلة يتحاشيننا (نحن مجموعة العزابة العاملين في مختلف دواوين وأضابير الخرطوم)، ويطنشن مننا في الحفلات. في واحدة منهم كانت ماسحاني أنا بالذات، ومرة أحرجتني لأنو طلبت من الجنبها تقوم ترقص معاي، باعتبار إنو الأحرجتني عندها موضوع مع واحد صاحبي، وأنا برة اللعبة.. وبرضو أحرجتني وحمت البنية المسكينة ترقص معاي بحالتي الصعبة ديك (كنت شغال وعندي مرتب، تخيلي؟) أها، ربك رزقني بعقد في الخليج، ورجعت أول إجازة، لقيت الحلة كلها عارفاني جاي، وأبالغ ليك كمان، البت الأحرجتني ديك جات هي وأمها البيت زيارة يتحمدلو لي أمي السلامة، وشايلين حلاوة.. وهي كانت لو لقتني في الشارع بتعمل عندها حول مستديم (المعنى إنها ما شايفاني)، ورقبتها مشموطة (عشان ما تتلفت جيهتي).. في سري قلت: ما قلتو نوبة؟؟ اللهم لا شماتة.
   لذلك، واستطراداً على ما سبق، فالجاي من الخليج، ولو بعكس مواصفاتك دي، وعندي صوفتين وربع بس في راسو اللي عامل زي تنك الموتر السوزوكي بتاع ناس الأمن داك، واضنينو زي مرايات اللوري، وعيونو زي خطرات المرسيدس، وجيبو ساكن فيهو الدود.. برضو عندو الأفضلية..
   والسبب انتو...
   
3. أها لو قاصدة ناس الخليج، والعروسات برضو في الخليج، أمانة ما وقعوا رجال.. وكان كدي لمي إعلانك ده.. أمات البنات ديل ما في أمل يوافقن ولو اتضح إنو مواصفاتك موجودة وبزيادة.. ليش؟ لأنو (....).