ثلاث كفوف قاسية في خد عبير خيري الأسيل ومليون جرح في قلبها النبيل
يوم السبت 26/2/2005م خرجت عبير خيري من مكان عملها تقصد شركة من الشركات لقضاء بعض الأمور معهم ، وهي هناك اتصلوا بها من مكان عملها يقولون أن هناك رائد أو نقيب يريدنها في أمر مهم وترك رقم هاتفه لتتصل به ، اتصلت به وسألت عن الإسم الذي تركه جاءها رد "ما عندنا زول بالإسم ده" ، عاودت الاتصال بالمكتب وطلبت إعطائها النمرة الصحيحة وكانت نفس النمرة .. بعد 5 دقائق إتصلو بها من مكان عملها وأفادوها بأنهم اتصلوا مرة أخرى فطلبت من زملاء المكتب منحهم رقم هاتفها النقّال . وقد كان إتصلوا بهاوكان هذا شكل الحوار : عبير : ألو هم : عبير خيري؟ نعم أنا عبير منو معاي يا عبير خيري تاخدي تاكسي من المكان الإنتي فيهو ده وتجي المكان الحا أوصفو ليك هسة من غير شوشرة ومن غير ما تكلمي زول يجي معاك وما تركبي عربية ملاكي تجي بي التاكسي وتنزلي في المكان الفلاني وتجي بي رجلينك للحتة الأنحنا فيها وأول ما أخلص منك المكالمة تقفلي موبايلك وما تفتحيهو إلا عندنا . إنتهي الحوار الأول إتصلت عبير بالمكتب مباشرة وأفادتهمم بمكانها . وصلت المكان .. سألت من الشخص المعني وكان الحوار : بسأل من النقيب ......... وقف شخص كان جالس على الكرسي الأول وقال : عبير خيري ؟ نعم يلا .. خرجا-عبير والنقيب المزعوم- من ذلك المكان واستقلوا عربة كانت واقفة بالباب ملاكي مظللة إلى مكان غير معلوم و أمرت عبير بعد ان ركبت العربة (دنقري راسك يا عبير وما ترفعيهو لحدي ما اقول ليك) وقد كان بعد جولة صغيرة وصلوا إلى المكان المحدد عبارة عن مقر شركة لم تستطع عبير قراءة عنوانها .. المكان طبيعي جداً أحد أفراد شركة الهدف بالخارج وبالداخل ممر قصير إلى أن وصلوا إلى مكتب استعلامات ثم انحرفوا يمينا إلى داخل مكتب أنيق يجلس خلفه رجل ما أمامه شاشة كمبيوتر وبدأ الحوار مرة أخرى ، قال الرجل الذي كان معها: -دي عبير خيري يا سعادتو بعد نظرة تأملية قصيرة قال الرجل القابع خلف المكتب -عبير خيري !!.. دي ما الصورة الراسمها ليك -عبير : بالله إنتو بتجيبو الناس هنا بي رسم الصور -عبير خيري ده إسمك (لهجة حادة بعض الشيء) -إسمي عبير بابكر خيري بابكر -شغالة وين ؟ -ممكن أقعد أول ؟ باشارة فقط من يده جلست -شغالة في مكتب عبد السلام الجزولي المحامي -الآخر : عبد السلام الجزولي ذاتو ؟ -أيوة -الآخر: عبد السلام عارف إنك بتكتبي الحاجات دي ؟ -حاجات شنو ؟ من خلف المكتب أدار الشخص شاشة الكمبيوتر في مواجهة عبير فرأت واحد من بوستات سودانيز اونلاين التي قامت بانزالها في اليوم الذي تم فيه استدعاء الشاعر محجوب شريف لسبب غير معلوم وهذا هو محتواه : عنوان البوست: إمتداد سلسلة تطاولات الجهاز الحاكم ... استدعاء شاعرنا محجوب شريف .. والبقية تأتي (9/12/2004 السـ11ـاعة صباحا للمثول أمام وكيل نيابة الجرائم الموجهة ضد الدولة التوقيع المميز والأوحد محمد فريد وكيل النيابة رجل واحد .. يعبث بكل محتويات الإنسانية آلة تتحرك في كل الاتجاهات لتنتج كتاباً أسود .. في كل المجالات .. أدب .. آداب .. شعر .. شعور .. سياسة .. دولة .. وطن والتوقيع أيضاً .. محمد فريد _____________________________________ إلى أين يأخذنا السكوت .. .... ليلاً .. ورقة مكتوبة معنونة بعنوان يجعل قلب كل إنسان يقف خوفاً في ظل الظروف الأمنية الحالية .. استهتار بقانون سائد منذ عشرات السنين حيث تنص المادة 66 الفقرة (1) من قانون الاجراءات الجنائية لسنة 1991 على الآتي : "يكون امر التكليف بالحضور محررا من صورتين ويتضمن سبب التكليف ومكان الحضور ووقته ويوقع عليه ويختمه الشرطي أو وكيل النيابة أو القاضي بحسب الحال" . ما حدث أن أمر التكليف يوضح المكان والزمان ولا يوضح السبب الأمر الذي يجعلنا نضع مئات الاستفهامات خلف إخفاء أول وأهم سبب ورد في النص . ما وراء الحقيقة الغائبة عدة أشياء .. السؤال هو : هل سنبقى دائما مدثرين بثوب قانون مرهق تهتك عرضه وسحقته أرجل العاملين عليه ورمته في قمامات الأحداث ؟ والبقية تأتي .......) إنتهى البوست ------------ -أستاذك عارف الكتبتيهو ده ؟ -لأ .. الأستاذ ما عندو أي علاقة بالنت ولا فاضي عشان يقرا مواضيع زي دي -هسه عليك الله ده كلام تكتبيهو عن رجل دولة شريف -شريف ؟ (وايتسامة استخفافية) أنا كتبت الحقيقة الشايفاها أنا ، إنتو مش يتقولو حرية رأي وصحافة ؟ -إنتي صحفية ؟ -لأ .. الصحافة هي إنك توضح وجهة نظرك في رأي واضح وصريح ونقل أخبار حقيقية لغير العالمين بها إذن أنا صحفية لكن للأسف ما عندي بطاقة . -ما دام ما عندك بطاقة بتطاولي على أسيادك مالك ؟ -أنا ما عندي سيد .. ده سيدكم إنتو (هناتلقت عبير الكف الأول) -الكلام الإنتي بتكتبي فيهو ده بيدل على إنك منظمة سياسيا نحنا وهسة عايزين نعرف التنظيم الإنتي تبعو والناس المعاك منو وهدفكم شنو بالضبط . -(ضحكة استخفافية لسذاجة الأسئلة) أنا هسة لو عندي تنظيم فعلاً حا أجاوب ليك على أسئلتك دي .. أكيد لأ (هنا الكف الثاني) -لازم تعرفي إننا قادرين نعمل أي حاجة عشان نطلع منك معلومة لكن الأحسن ليك إنك تردي على أسئلتنا ، إنتي منظمة سياسياً ده واضح -والله ما منظمة سياسياً ولو جبتو لي 30 مصحف حلفت عليهم انا ما منظمة سياسياً ولا بعرف ناس منظمين حتى . -طيب إنتي ما عارفة إنو الراجل الإنتي اتكلمتو عنو ده بيخدم الدولة ومقدم للبلد خدمات مافي ولا واحد من الطير الإنتي منظمة معاهم ديل بيقدمها . -قلت ليك أنا ما منظمة ما تقولني كلام أنا ما قلتو ، أوعا تكون كتبت الكلام ده كمان -أنا حا أكتب كلام إنتي ما قلتيهو يعني ؟ -والله إنتو ممكن تعملو أي حاجة (وكان الكف الثالث) -وقعي على أقوالك راجعيها لو ما واثقة منها كانت عبير في حالة يرثى لها ولم تلاحظ ما كتب ووقعت خرج الاثنان وأمضيا قرابة الأربعين دقيقة وعبيرا بمفردها في ذلك المكتب ثم عادا قال المحقق : -ياعبير خيري .. ما تعتبري الموضوع ده إنتهى وأنحنا لو ما لقيناك بت ناس ما كان مرقتي من هنا تنفذي الكلام الحا أقولو ليك بالنص تطلعي من هنا تركبي التاكسي الواقف جمب الباب وما تقيفي إلا في بيتكم وما تفتحي الموبايل بتاعك إلا لما تصلي البيت وأنحنا حا نستدعيك تاني لتكملة التحقيق ، اتفضلي مع السلامة وزي ما قلت ليك ما تعتبري الموضوع إنتهى لحدي هنا . خرجت عبير وأستقلت التاكسي وبدأ وجهها-النضر الجميل- في التورم وأذنهابالنزف وقبل أن تصل المنزل فتحت الموبايل لتتصل بالمكتب وتطمنهم ، في الطريق غيرت عبير التاكسي بتاكسي آخر خشية ان يكون سائق التاكسي متعاون معهم وتفادت ان يعرف منزلها . هذا ما حدث مع عبير بالتفصيل . مازالت أذن عبير تؤلمها ، أما آثار الأصابع الغليظة الظالمة فقد تحولت من خدها الأسيل إلى قلبها ، تتوجع وتئن وتندب وطن كانت تتمتع نساؤه بالطمأنينة (عدل بواسطة أبو ساندرا on 03-06-2005, 08:32 AM) (عدل بواسطة أبو ساندرا on 03-08-2005, 04:20 AM)

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]