العذابة ما حقوا يشكلوا هاجس للاسر ويكتفوا بالزيارات الخفيفة الصغيرة البسيطة وفي المناسبات الهامة.. الأسر السودانية في بلاد المهجر وخاصة الخليج واجباتها كثيرة وكبيرة والزمن نفسه عندهم غالى.. والعذابة معظمهم لسه ماسكين في العادات السودانية هناك..في رمضان داير يقولوا ليهو يا اخي اصلو الفطور بيك وبلاك مسوي تعال افطر كل يوم بدل ما توقد ليك نار بي هناك.. وفي الحقيقة دا كرم زايد من الأسر السودانية مكانو المناسب السودان وليس بلاد المهجر..حتى ولو أختك أو بنت عمك.تكتفي بالزيارة ماقل ودل..لأنو حجم العمالة السودانية كبير في الخليج، يمكن الناس الفي الدول الغربية يكون ماعندهم تصور للرش الكبير وفي الغرب عادة يكون السودانيين محتاجين لأي زول سوداني يجيهم.. ما أن يحل شهر رمضان إلا الأسر السودانية في الخليج يكون عندها لستة كبيرة طويلة عريضة..في العزومات في الفطور ..وكل أسرة عزمت التانية الأسر التانية تقوم تعمل فطور أحسن مما عملته الأسرة الأولى مباراة بين ربات الأسر.ياريت الناس يكتفوا بما قل ودل..كان تكون عادة حسنة وفيها حميمية وأجر لكن الإنخراط بالهدف الأساسى والبساطة يضيع الأجر ويجعل هذه العادة مرهقة حتي فيما بين الأسر نفسها ناهيك عن العذابة... العذابي من الجزيرة داير الأسرة العازماهو تعمل العصيدة بي ملاح الشرموط..والعذابي الشايقي كمان عايز الأسرة العازماهو تعمل القراصة بالدمعة واللحم.. والعذابي المن الغرب داير الأسرة العازماهو تعمل عصيدة أم دقوقة.. والحلفاوي والمحسي عايز الأسرة العازماهو تعمل قراصة بالتركين أو الملوحة.. وكمان لازم ملوحة تكون جاية من السودان.. وهكذا تظل ربة الأسرة مرهقة رمضان كلو وهي صايمة.. وبراها واطفالا في يدها...وبعدين حكاية الأكل في الخليج موش بالحاجة المزعجة .الأكل موجود ورخيص جدا في أقرب منعطف واقرب مطعم... وياما المطاعم العربية والسودانية تعلن عن برامج في رمضان في الفطور والسحور..فهذه عادات سودانية مرهقة للأسر في ارض المهجر.. ومرهقة للأسر في بعضها البعض ومضيعة للوقت والقروش ومباهاة يكفي منها الرمزية حقو..
10-06-2005, 00:25 AM
منصوري منصوري
تاريخ التسجيل: 09-28-2003
مجموع المشاركات: 2504
المرأة السودانية بطبعها مجاملة..مكرمة الضيف.. تمامة الناقص..تدبير المعايش..تقطع من جلدا وتستر في هذا الوافع المترهل في ارض المهجر من إجتماعيات وغيرها..الواقع السوداني والعرف السوداني أكبر من طاقتها هى وإن اتهمها البعض بالتبذير.. ولكن المسألة متراكمة من واقع كبير مرير..الراجل يعزم الضيوف من غير ما يكلما في معظم الأحيان..تشارك الضيوف بيتا وراحتا.. ولعب أولادا وغرفة أولادا.. تتم من دهبا في موسم الإجازات.. ضيوف السودانيين إذا عزمتهم غدا.. يقعدوا لى عند العشا.. وإذا عزمتهم عشاء يقعدوا لى عند الساعات الأولى من الصباح..المشكلة موش في العشا ولا في الغدا.. القعدة الطويلة.. شاي جبنة شاي جبنة..مديد الرجلين في طقم الصالون والإنبطاحة على الكنبة الكبيرة في طقم الصالون الراقي وعليهو مساند ومناديل رقبة ووسادات الوسادات يستعملوها مخدة وكنبة الصالون الكبيرة يستخدموها سرير. ومافي زول يقدر ينضم..كلو في ستر الحال.. وإذا كان المعزومين معاهم اسر وأطفال.. ما يخلوا فجة في البيت ما يحوموها ويصلوها حتى الممنوع في غرفة النوم كان ما قفلتا بالمفاتيح يصلوا عندو... والهيصة البيعملوها في البيت لمان يطلعوا دا إذا ما طلعتا بي تربيزة قزاز مكسورة والله كمودينة مخلوغة.. دا إذا ما حصلت مصيبة لاقدر الله لأنو ولد المعزومين ما عارف بلكونة العازمنهم المهلهلة الولد إتكل على حديدا المصدي وانبهلت بيهو من الطابق العشرين وعاد تعال شوف لاقدر الله. الأم منهمكة في ونسة.والأبو مشغول بي عشرة كوتشينة في الصالون محدر طاقيتو ومحدر سفتو وجادع العمة بعيد. ومرة الراجل العازماهم ما قايلة ولد المعازيم بي يصل البلكونة بي غادي لأنو باب البلكونة مقفول بالمفتاح والولد فتحو.. اليوم.. القدر..وإذا كان عندهم خدامة فلبينية تكره اليوم اللماها في السودانيين.. وهاك يا غسيل عدة وصحانة وأكياس زبالة بالكوم..أول ما تشوف الخدامة كوم من السودانيين جاء داخل تشيل نفس طويل وعريض.. ورب الأسرة داك أسكت خليهو الخميس والجمعة بدل مل يرتاح من الشغل الشديد القوي البي ينافسوك فيهو جنسيات أعوذ بالله منها حمير شغل.. وانصهار ذات في رب العمل وتملق. إنتا كان ما جاريتهم أو تفوقتا عليهم تلقي نفسك برة خالص ومغضوب عليك. عشان كدة رب الأسرة بدل يعيد نشاطو في الخميس والجمعة ويشوف شؤون بيتو.. ويشرف على غيارات الأسبوع من بناطلين وقمصان.يقوم من الصباح يروح المقصف السلخانة.. يفتش اللحم أو يذبح خروف.. ما أصلو بت خالتي جات زيارة تنفس أختا وكان ما عملنا ليها كدة أو عزمناها راح ترجع السودان تكلم ناس بيتنا وناس بيتنا راح يشيلوا حالى وحال مرتي ويقولوا مرتو خارجة أو صهينت مننا أو فتحت لينا فتحا مبينا.. لأنو ناس جيرانا ساكت عزموا سوسن بت خالتي وضبحوا ليها أنا موقفي حا يكون كيف وعزموها في الحدائق.. وعملوا شية الجمر وجابوا ياسر يدقدق على العود ومعاهو بيانو وفرقة معقول انا مجرد عزيمة ما اعزما.. أصلو حا يقولوا يا حليلو كمال ماهو في ايدوا لأنو متزوج مرة غريبة مننا .. وتبقي الحكاية في مرتي.. يازول هي الفضيحة والسترة متباريات.. والأكل البيكفي واحد بيكفي اربعة والبكفي اربعة يكفي مية . والأكل البي تكتر فيهو الأيدين مبروك.. والجزار بي هناك في المقصف أدوهو بغشيش زيادة فوق سعر الحكومة.. ووصوهو على الخروف.. أسمع طلع لينا ريش. كوستليتة.. معلوم معلوم بابا أنا يعرف السودانيين شو يريد.زكلو سوداني يذبح خروف يريد هذا شكل..معلوم أنا ما يريد كلام إنتا.. و الأيادي ما تقطعهم عايزنهم بالفرن... والكمونية المصارين تمصرا.. معقول اعزم سودانيين ما اعمل ليهم كمونية.. والكبدة ما ترميها عايزنها. لأنو أهل الخليج هنا يرموها ويعتبروها هي والمصارين اجهزة الجسم والكبدة مكان تجمع السموم .لكن السودانيين عايزنها نية ومعاها عتة وليمون ودكوة.. والراس كمان شوربتو...والمسكينة في بلد الغربة براها.. والله كان عندها جارات هميمات. مافي حاجة اسمها جارات هنا مافي جار بيسأل في جار.. المهم شايلا ولدا في صفحتا وتسوط في حلة بي جاي وحلة بي جاي وتكابس هنا..وهناك. وكل الموضوع دا بس بي تلفون امس قاليهم يا جماعة ما تجوا تتغدوا معانا والمسكينة كلموها في آخر لحظة كلو في ستر الحال لأنو سوسن بسرعة أعلنت قومتا ولسه نحنا ما عزمناها...وطبعا دي عزومة كاربة.. لازم المرة تكلم قرابتا العذابة الساكنين جنبهم وفيهم ود عمة أخت بت خال زوجها وود خالة ود عمة جد خال أمها.. وود حلة الحلة المقابلة لى حلة فاطمة أختا.. كيف عاد يقولوا ما عزمونا وما ضوقونا لحم الخروف السوداني.. دي فضيحة بي جلاجل.. وبعدين واحد في العذابة معروف عندي من رمضان الفات ما بيأكل كسرة المصانع المعمولة بالرز دي... عايز كسرة بيت بي دقيق ذرة سوداني لأنو كسرة الرز البيشتروها دي تعمل ليهو حموضة.. راحت رفعت الصاج على البوتوجاز.. والخمار داك مافي ركبوا ليهو عربية تدق خمسين كيلو عشان يجيبوا خمار من فلانة لأنو صاجا ما قاعد ينطفي وراجلا بيموت في الكسرة...وهؤلاء العذابة الأباطرة لايحضرون إلا بعد يرصوا الغدا.. بعد دش حمام كارب وجلابية بيضا مكوية..جيب الشطة بي جاي جيب المرارة بي غداي حول الكمونية بي هناك.الكسرة دي خلوها آخر حاجة نحلى بيها لأنها كسرة بيت.. والسودانيين تعلموا التملق من جنسيات اخري.. والله عاد جنس كسرة ما حصل أكلتا زيها في حياتي.. ورفع صوتو عشان يسمعوهو بي غادي لأي سبب كان عزومة تاني كان غيرا.. وواحد اثني على الكمونية والعذابي التاني اثني على سليقة الراس.. والعذابي الثالث أثني على الشية وآخر أثني على الشطة.. وراحوا ومرقوا خلوا ليها بيتا زريبة غنم.. وكنبة الصالون إتمطلت وقزازة طربيزة النص كسرا ولدهم طلع عليها اصلو امو معلماهو ما قاعدة تسألوا ومعروف علوية ما قاعدة تهبش أولادا.. غدا لكن جوا قريب العصر وطلعوا قريب صلاة الصبح..خلوا المسكينة دايخة بايخة لو اعتذرت عن عدم عزومة سوسن..الوليمة كان مقدر ليها اربعة سوسن وأخوها النازلة معاهو ومرتو ووليدوا الصغير.. لكن دا كلم دا ودي كلمت دي وعرفوا فيها خروف سوداني ودا عزم دا بعد صلاة العصر لقاهو في الجامع.. لا يا خي ما تعتذر اصلوا بيك وبلاك الأكل معمول وكمال دا ياخي راجل حبوب يفرح بالضيوف..البيت اتوسخ هوفر ما يعيده سيرتو الأولي.. ريحة التحمير وريحة الكشنة وريحة السمك ملت البناية كلها وخفير وناطور البناية دق الباب خمس مرات من كثرة الدخان والخدامة الفلبينية قالت الروب وكل الهيصة دي العملوها في الأكل هي ما بتاكلا.. والمطبخ الصحانة تنطاقش من خشم الباب لى غاية آخر مساحة في المطبخ.....
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
منصوري
فيس بوك
تويتر
انستقرام
يوتيوب
بنتيريست