نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 هكذا طار العريس
|
مساء الخير
دعني أرد عليك شوية شوية وتحمل رزالتي في تمطيط المواضيع حتى تصير كساقي أخي الذي استيقظنا يوما على ركبه توازي عندنا البشر العاديين الحواجب،، رغم أنه أخي الصغير لكن ماذا نقول في انبشاكته الفجائية.
وبعد
سلام من الله عليك، لم أرد على الرسالة التي بعثت بها منذ وقت طويل،، وربما (انحمقت) مني، إلا أنني استطيع توفير عدة مبررات لك أن تختار أقربها وأفضلها بالنسبة لك،، وأول خيار هو أني زولة ثقيلة جداً،، بياعة،، ولديحة حد اللزاجة،، ولك أن تختار من القائمة أيضاً خيار قليلة أدب (تغيانة) أخلاقها ضيقة،، أخلاق وليس أخلاقيات كي لا اعوقك الحقك (جداد) طه،، وانا عندي نظرية (مع أني حوصة) ان الذي حدث لدجاج طه أكثر من الذي حدث لأماته،، وطه هذا جارنا،، خال صاحباتي في نفس الوقت،، رجل ظريف (زول نكتة وسيجارة)،، مرة رآني بالليل مع بنات أخته ونحن في أهبة الاستعداد لحضور عرس بت شينة،، بت جيرانا،، هي في الحقيقة ليست (شينة) جداً، لكنا حقدنا عليها وقررنا واقتنعنا بقرارنا بأنها (شينة رسمي) ، والكل في حينا سواسية في الشناة،، تماماً كأسنان الخلال،، لماذا هي تحظى بابن الحلال واحنا لا نحظى حتى بابن آوى؟؟؟
كان الظلام يعم الدنيا ،، وزخات المطر تترقرق بعذوبة،،، والنسيم يلعب في شعري الناعم الطويل،، وصوت البلبل والكناري يحيل صمت الليل إلى شئ أقرب للعبادة الصامتة الضاجة.
!!!!
لا تندهش فطبعا هذه مبالغات
وددت تلطيف القصة،،ولكن دعني اقولها لك بنسخة سودانية شعبية بحتة،،، كانت الكهربا قاطعة،، والمطرة شقشاقة،، وشعري يلعب دسوسية،، أو سمها (دس دس) فجأة يلتف مرعوباً لينتفش منتشياً فيتكوم متكرضماً فيتكرفس فيخشوشن،، كل سبعة سبيبات في إجتماع،، وصوت الصراصير والضفادع يملأ الخيران،، ودخان سيجارة طه في أوج شبابها لسسسسسسسة في الشفطات الأولى.
شرق خال صاحباتي طه،، ثم كحكح فتنحنح،، ثم قال (حلاااااتك يا بت أنت بت ناس منو؟؟)
فقلت أمازحه وشيطاني يلعب بمزاجه، يشجعني على الخداع ( بت ناس عم الزين،، انا ثريا يا وجيه،، انت منو)
فقال بنبرة حزينة( أنا ما انا الزمان،، انا طه الدلاهه يا دي)
فتضاحكن ثلاثتنا انا وبنات أخته ،، وذهبنا للعرس الكبير
ثم كان أن صبت المطرة شوووووووووووووو،،، فأحالت الشعر إلى شئ أشبه بمخلوق فضائي نزل لينتقم من سلفستر ستالون في فيلم امريكي عبيط،، وتلخبط الكحل وسال لليييييي الجضوم،،، وتغير المنظر ثلاثمائة سبعة وسبعون درجة،، فعدنا ثلاثتنا نجر أذيال الشناة،، وهناك شواطين صغيرة تتلاعب متضاحكة بشماتة في فركشة الحفلة (في شان شناة تلاليشها دي) كما علقت إحدانا من تحت كيس النايلون الملفوف بعناية مهملة في راسها تفادياً لضياع مكوة الفحم الجلطت بيها راسها.
في طريق العودة قابلنا طه مرة أخرى ،، وكانت السيجارة (ربما الثالثة) تلفظ أنفاسها الأخيرة كما لمحنا،، فقال عمي طه ( وووووووب عليا يا بنات أنتن مني؟؟)
فرددت والضحكة تكاد تنط إلي لغاليغي ( أنا ثريا يا وجيه،، أنت منو؟؟) فقال عمي طه دون أدنى مراعاة لشعور الجكس الشين كسيادتنا ( السيجارة دي جنت واللا مالها،، قبل السطلة سماحة وبعد السطلة شناة؟؟؟ ابليس ده يا اخوانا ما في راجل قادر عليه،،، ياكل المنجة يديني دومتها؟؟؟ هسه انا اسوي بيها شنو،، اكدها واللا اعملها مزار يعني؟؟؟)
فسموني بنات الحي من يومها (دومة عم طه)
هذا الطه فاجئنا يوماً بثلاث دجاجات،، جابهم من وين؟؟؟!! الله يعلم.
المهم أن هذا الطه أهتم بالدجاجات الثلاث اهتماماً فاق اهتمام بنت اخته سناء ببشرتها وديانتها وجلبطتها،
فما كان يراه أحد إلا وهو حامل السيجارة،، أو حامل الدجاجة.
فانتشرت في الحي شائعة مفادها أن دجاج طه يملك ظواهر خارقة للطبيعة،، أبسطها أنه ببيض بنقو،،حتى بت كل ليلة اشاهد فيها عمي طه- وانا بشاهده كل يوم والحقيقة كل الناس بتشاهده كل يوم لأنه يفترش السماء بعنقريب هبابي وسط الشارع قدام خشم الباب - بت كل ليلة احلم ب (جدادة غليدة) عيونها حمرا أجدها يوماً في المكان الذي وجد فيه طه دجاجاته،، فتبيض لي كل يوم علبة ديانا!
حبوبة تكية،، أم عمي طه،، جدة صاحباتي،، والتي مرضت في رجليها مرضاً شديد الإرهاق،، ذهبت يوما إلى طبيب الأسنان،، قائلة بأنها أكيده أن سبب أوجاع (ركبها) هو أوجاع ضروسها(هميم علامات الدهشة)
المهم أن أحد الأطباء ( ولا احد يعلم للآن ماهية تخصصه)قال أنها مصابة برطوبة شديدة في (ركبها) تسبب لها تلك الأوجاع الرهيبة عندما تمشي من بيت ناس (جعلية) في الحارة السابعة،، لبيت ناس (سعاد) في الحارة الأربعتاشر. استاءت حبوبة تكية من كلام الدكتور ال (ما عندو راس) ،، إذ كيف يقول أن بركبها الموجوعة رطوبة وهي (نااااااااشفة عدمانة الموية) ؟! وطاب لها من يومها أن تسمي مرضها العضال مرض (النشوفة)
قررت حبوبة (تكية) أم عمي طه وجدة صاحباتي ،، قررت أن ترم (نشوفتها بشوربة جداد كااااااربة)،، تكربها لنا صباحاً فتسند معدتها الشبيهه براكوبة في عز الخريف،، بأفخاذ دجاج طه الخارق،،عله يكون سبباً في العلاج
ذبحت إحدى الدجاجات في حفل بهي كنا نحن رواده الكرام،،، بعضهم يشجع وبعضهم يصفق وبعضهم يحلم وبعضهم يحاول تذكر أن كيف كان طعم الدجاج قبل أن تلحقه عاصفة الغلاء أو لتحري الدقة،، كيف كان قبل أن تصيبنا (نحن) ظاهرة الرخص.
عمي طه يقضي معظم أو (كل) نهاره نوماً واستعداداً لسيجارة الليل والسهرة. وهو في تلك الرقدة الشبيهة برقدة جنازة ، (ضربنا الجدادة ضرب صاح)،، وكل يحلم بتأثير لحم الدجاجة المبروكة الإيجابي على حياته ونفسه،، أنا اتخيلت نفسي ذات شعر طوووووويل،،، وسناء تخيلت نفسها طويلة إذ كانت تعاني من قصر في الطول يجعلها (تقعد في البرش وتدلدل رجلينها) ، وسلمى بنت أخت طه الثانية،، كانت تحلم بأن تسمن وتجيها كرش (ذي كرش الفيل) ، ويا لغرابة بعض الأماني ال(سندسية)!!!!
بعد التخمة والتجدع الذي أصابنا بعد دمعة الدجاج المحترمة جداً،،، واجهتنا الحقيقة المرة،، وهي كيف لنا أن نواجه طه بحقيقة أننا أكلنا دجاجته وهرسنا عظامها حتى صارت شبيهة بمستشهدي الإرهاب.
لحظة
هل أصبت بالملل؟؟؟؟
لا تقلق،، لأننا نكون بذلك قد أجتزنا المرحلة بمراحل.
طلبت أن تعرفني (حق المعرفة) ،،، وأنا أقول أنني هذه تلك،،، الفتاة التي طارت عصافير أحلامها في حي متواضع تحكمه المادة بكل صراحة ووقاحة وقوة،،، بكل قلة أدب،،
آمنت بحاجتي للدجاج،،، وحاجتي للتطلع،، وحاجتي للتشبه ببطلة المسلسل العربي اليومي،، التي تمثل الفقر القنوع بحلقها اللؤلي وساعتها الذهبية،، التي تستيقظ من نومها بكامل شعرهاالمسافر في كل الدنيا،،لا يوم زارها القلق،، لا يوم استيقظت بلعقات كلب الشارع.
حلمت بأن أكون قنوعة وأنا في أشد حالات الحلم بقصر كبير،،،
عندما ارتدت الجامعة صدمني الفرق بين ما كتبه أرسطو وردده الدكتور،، وبين ركب حجة تكية،،، شلني التفكير في مريولي المتواضع،، هدتني محاولة التستر على حذائي المتآكل كفضيحة علنية ،، وأنا أصفق بحماسة لمرتادي المنتديات الثقافية،، لذاك الزميل الوسيم ،، الوسيم جدا،، ابن فلان الفلاني،، الذي أقنعنا بشيوعية المال وهو يلوح بمفاتيح سيارته الفارهة.
وبعد
بعد الثالثة،، وقيل أن التالتة تابتة
هل زالت تلك البثور التي انتشرت بسبب صابون الحلاقة الفرنسي الجديد؟!
------
|
|
 
|
|
|
|
|
|
|
|
Re: هكذا طار العريس (Re: بت قضيم)
|
..
.
كلما ارتاد المنابر الالكترونية واطالع ما بها اقتنع
بان هناك اناس مبدعين ومجنترين لاقصي حد فى الفلكبة ..
فاقرائك
وابتسم
واتوه
ولااكتفي
من تلك البنت التى طارت نوافيخها
بالمناسبة ( حق المعرفة ) ايضااود ان ارتاده
دوما مشرقة ومبدعه..
ولا تدعيه يطير من تلك العنق الرفيعه
دمت
| |
|
|
|
|
|
|
|
|
|
Re: هكذا طار العريس (Re: Tabaldina)
|
تبلدينا الصديق
يعني انا رأسي مقودس خلقة تريده يتقودس زيادة تقوم أمي ترميني في الكوشة؟؟؟
يخليك
أسعدتني كلماتك حتى قربت طررررررشرق أطرشق،، وفي ذلك خطر على السودان،، إذ ربما اتهموه بأنه دولة تصنيع أسلحة دمار شامل
والبركة في العصيدة
دوما قول لي كلام حلو كده
بس أسحب مجنترة
أخير ليك
عين حمرة
| |
|
|
|
|
|
|
|
|
|
Re: هكذا طار العريس (Re: بت قضيم)
|
كلو منك يا طه
دا مسلسل ولا شنو يا بت قضيم
هسه لا عرفنا الحصل بعد ما اكلتو الجداده شنولا عرفنا العريس طار كيف
ان شاء الله بس حبوبكم دي بغت شديده
اكاد اجزم بان دجاجات طه كانت تشاطره الكروت بما فيها حتى تشبع لحمها وشحمها
فلم يجدي الطبخ فيها نفعافانتقلت اثار المزاج العالي الى لاهطيها
مما نتج عنه هذا البوست
كل التحايا
| |
|
|
|
|
|
|
|
|
|
Re: هكذا طار العريس (Re: بت قضيم)
|
..
.
سلام يا اساسي
والله بالاكتر .. ولك كثير السؤال منى ومن عمر مهدى
نشوفك بكره فى الموعد
ايهاب
الحمدلله انك عرفت السبب
الطير العريس !! هو اكل الجداد
مش كدا يا بت قضيم
تحياتى
| |
|
|
|
|
|
|
|
|
|
Re: هكذا طار العريس (Re: Hozy)
|
لووووووووووول يا هوزي
حكمة افلاطونية تقول
البباري الجداد بمشي الكوش
فكونك تباريه وتمشي مولد يبقى بركةوخير
برسل ليك مسنجر لأنو باقي الكلام سر
| |
|
|
|
|
|
|
|
|
 Re: هكذا طار العريس (Re: بت قضيم)
|
العزيزة بت قضيم
ادخل بوستاتك ، فاتذوق طعم الدقة اللذيذة بالشطة الحارة
عمي طه وسيجارته ودجاجاته التي تلقط البنقو ، والديانا ، وتلك السبايب العاملة اجتماع
سرد يفوق طعم الدقة الكثيرة جمالا
تسلمي الف يا بت قضيم ولك خالص التحية
وواصلي
| |
|
|
|
|
|
|
|
|
|
Re: هكذا طار العريس (Re: maia)
|
العزيزة مايا
والله لا ادري كيف أجاري تعبيرك المدهش
خصوصا وانني أملك نقطة ضعف رسمية تجاه الدقة والشطة والقونقليز
إنها أشياء تقودني لمحطات قديمة (ما قديمة خالص)
فاتذكر المدرسة ،، وحجة التومة،،الشطة وصحن البلاستيك الأزرق
والعوم حتى الكوع في التبش،،،
الله يرحمك يا حليمو،، هو غرق في موج عينيها الأزرق،،، ونحن (أنا وكليتي) غرقنا في موج الصحن الأزرق.
تفتكري بالمناسبة السعيدة هذه،،، الطفل السوداني ،، وأعني السوداني المتبش (من تبش) ،، وليس السوداني المنودو (من نيدو)،،، ممكن يوم يجيه فشل كلوي واللا التهاب مرارة؟؟؟
مجرد تساؤل ما ليه أي علاقة بالموضوع
اعذريني ربما لن أواصل
فنهاية القصة تشبه بداياتها
صدق كاذب لا مكان له في الدنيا الجديدة
تفتكري هوزي بعد الكلام أعلاه بتكون وصلت وين بعد المولد؟؟؟
انت زاتك ما لحقتيها؟؟؟
يخليك ويسلم عمرك انت
| |
|
|
|
|
|
|
|
|
|
Re: هكذا طار العريس (Re: بت قضيم)
|
Quote:
لحظة
هل أصبت بالملل؟؟؟؟ |
احسن ما فيك انو مؤشرك تجاه القاري لسع زي الورد..
وانو انتي عارفة انك حشرتي ما لا يفيد فيما يسعى القاري الى ما يفيد ..
لطالما اعجبني فيك احساسك بما يصيبنا ..
ايهاب
يا غالي
فهمتا شنو انتا؟؟
بت قضيم دي بتبدا ليك القصة بس..
الباقي تتمو براك....
| |
|
|
|
|
|
|
|
|
|
Re: هكذا طار العريس (Re: DKEEN)
|
| Quote: احسن ما فيك انو مؤشرك تجاه القاري لسع زي الورد.. |
Quote: وانو انتي عارفة انك حشرتي ما لا يفيد فيما يسعى القاري الى ما يفيد ..
لطالما اعجبني فيك احساسك بما يصيبنا ..
|
..... امك ... دا شنو دا ... فجأة كدا
أنا شخصيا يا دكين يا خوي اسعي الي ما لا يفيد تصدق ...
ملاسى
| |
|
|
|
|
|
|
|
|
|
Re: هكذا طار العريس (Re: Hussein Mallasi)
|
ملاسي
مرة كتب عنك الرحمابي كلام جميل جداً،، فحملت حالي وصفقت لك وكووووركت بأعلي حسي أن (إيييييييه) ينصر دينك يا رحمابي،، والله عندك حق
قمت انت جيت رديت على كل الناس وفطيتني
ليه يا حقار؟؟؟
بعدين لا تتخلع أرجوك من رد دكين،،، فأن تكون مملاً خيرا من أن تكون نعجة،،، وأيوه،، اتخيل قال لي قبل كده يا نعجة؟؟؟
واتخيل اني ما رديت عليه؟؟
يخليك ويسلم عمرك
| |
|
|
|
|
|
|
|
|
|
Re: هكذا طار العريس (Re: DKEEN)
|
دكين
عزيزي
آسفة إن جرحت شعورك ولم اراعي فروق الفهم الفردية
دي يا حبيبو (والواو راجعة للديك) ،، بعملوها في النار،، بدوروها كده،،، وبختوها في الزيت،، وبتقول طشششششششش،، وأول حرف منها طعمية
كده كيف معاك؟؟؟
| |
|
|
|
|
|
|
|
|
|
Re: هكذا طار العريس (Re: بت قضيم)
|
بت قضيم
انا غايتو حاسس اني حا ( اتفنش ) من الشغل بي سببكن
عشان كده بقسم مهاتي على اربعة وكل واحد/ة يدفع ( الربع )
وللأنثى مثل حظ الذكر هنا ( شفتي العقلية الذكورية دي )
الملا عمر ربع
دكين ربع
شيري ربع
بت قضيم ربع
والما بدفع أنا ادقو دقة انا اقطع لحمو
والله مجنترة دي زاااتا شوية
شكرا
رحمابي
| |
|
|
|
|
|
|
|
|
|
Re: هكذا طار العريس (Re: AlRa7mabi)
|
الرحمابي
دعنا إذن نضع النقاط على الحروف
لو فيها تعويضات وكده،، فأنا حاطالب بتعويض أكبر من تعويضك
قد يأخذ كل الأرباع دي مع بعض ويتجمع لي
وذلك لأسباب نفسية قوية تصيبنا جراء قراءة حروفك
فلما أقرأ (الخدود الضاربة لون الشفق) أو في ما معناه ،، فاطالع في المرآة،، لأجد (الخدود الضاربة) بس،،، يبقى هناك هميم (الكلمة دي عاجبني) يبقى هناك هميم الوجع النفسي.
فخلي الطابق مستور يرحمكم الله ويصلح أعطالنا.
هميم الود يا شفيف
إن شاء الله يخليك يا رب تلاتة مرات
| |
|
|
|
|
|
|
|
|
|
Re: هكذا طار العريس (Re: بت قضيم)
|
يوم الدواجن في البورد
انطلاقا من حيث ان الغنم قد نعمن ببوستات و بوستات يبدو ان دور الدجاج قد اتى فتازمن ديك دكين ومن خلفه جميع الديوك من حلتم لحدي حله ناس رباح و ما تشعب و تفرق وانقطع هنا وهناك و دجاجات بت قضيم او بالاحرى دجاجات طه المسطول المسطو على دجاجه منها وهو نايم يشخر حتى استقرت بما تحمل من جينات تشبعت بما التقطت من حبات مزاج طه كما قالت مايا على ما اظن فاستقرت في نافوخ بت قضيم مما نتج عنه شلل في عدادات هذا البوست و طيران العريس مفرنبا
فهمت يا دكين
بت قضيم صباحاتك
تعرفي انا والله بالجد حاسي انو المسعاله ما ممكن تكون وقفت لحدي هنا
| |
|
|
|
|
|
|
|
|
|
Re: هكذا طار العريس (Re: ايهاب)
|
كان الظلام يعم الدنيا ،، وزخات المطر تترقرق بعذوبة،،، والنسيم يلعب في شعري الناعم الطويل،، وصوت البلبل والكناري يحيل صمت الليل إلى شئ أقرب للعبادة الصامتة الضاجة.
تعبير ترجم بالسودانى والكاتب هو نفس المترجم
حقيقى قرادءه حتى الامتاع
شكرا لك بت قضيم
| |
|
|
|
|
|
|
|
|
|
Re: هكذا طار العريس (Re: HAMZA SULIMAN)
|
وحقيقي شكرا لك أنت استاذي الفاضل حمزة
قراءتك لما اكتب والتعليق عليه فوق هذا،، يسعدني جدا ويثير حماستي لأن اقدكم وابريكم دوما،، وحاجة تانية كمان،،، يجعلني اشعر بأنكم فعلا اخواني.
يخليكم لي كلكم يا رب
| |
|
|
|
|
|
|
|
|
|
Re: هكذا طار العريس (Re: ايهاب)
|
تعرفي يا بت قضيم ما رديت يوم داك لسببين
الاول ما لقيت ليكي كلام مناسب يناسب قدر الشيوخ الكبار
و التاني كنت داير البوست يغطس لانو الرحمابي دخلني فيهو مدرسة و الله
و بعدين اظنك غلطانة او تكوني قاصدة دكين تاني القال الكلام بتاع
الماعز و الضان دا ما دكين زولي الاديب الاريب الشفيف الذي ينطق
الحجر ... دا كاتب بهناك يا زولة كلام رهيب و الله
ملاسى
| |
|
|
|
|
|
|
|
|
|
Re: هكذا طار العريس (Re: Hussein Mallasi)
|
ملاسي يا حنك
ماشي نفوتها ليك
وبالنسبة لموضوع النعجة،، وحاة الله قالها
أما بخصوص ما كتبه هناك،، فانا اعلم انه بجي منه،، لكن تلبيس ابليس مرات بكون صعب شديد
يخليك
| |
|
|
|
|
|
|
|
|
|
Re: هكذا طار العريس (Re: بت قضيم)
|
ايهاب
انسى يا فردة ..
الفاهم ليها شنو..
من زماااااان وبت قضيم دي بتكب ما يحير وتقول ما لايمكن الامساك به..
ومنذ زمن طويل وضع دكين الفهم جانبا...
وقرر أن لا يجتهد في فهم ما استشكل علي فهمه...
ده موضوع مستحمي ..
البباري الدجاج بوديهو الكوش ..
ويالها من كوش ...
| |
|
|
|
|
|
|
|
|
|
Re: هكذا طار العريس (Re: بت قضيم)
|
دكين
البباري الجداد بوديهو الكوش
انتا تكتب عن الديوك
وهي تكتب عن الجداد؟؟؟؟؟
وما الدجاجة إلا انثى الديك؟؟؟؟
اها كيف الدبارة
عايزين تودونا وين؟؟
انا ( غايتو ) ملاحظ تقارب افكاركما جدا
بس كلمونا انتو ماشين وين .. عشان ما نقد نباري فيكم
ساااكت
رحمابي
| |
|
|
|
|
|
|
|
|
|
Re: هكذا طار العريس (Re: ايهاب)
|
رحمابي
ايهاب
ما بكون انا براي راكبة الفيل،، أكيد في ناس أكلت الجدادة معاي
وقالوا مسطول لابس فردة جزمة بيضا والتانية سودا
واحد ظريف بشاغل فيه قال ليه وين ياخي شنو القيافة والجزم الحلوة دي
المسطول قال ليه وحياتك،،، عندي زيها تاني في البيت
| |
|
|
|
|
|
|
|
|
|
Re: هكذا طار العريس (Re: بت قضيم)
|
العزيزة جدا بت قضيم
والله كلامك السري شديد
في الماسنجر
فهمت منه جملة واحدة ادتني كل المعاني الجميلة بشكر
عليها حتى الثمالة ،،،
ما تقولي لي اشمعنى الثمالة ؟؟؟؟؟
أوعك بحذرك
انا لقيت التعبير ده كده واستخدمته
ما لي اي يد فيه
ولم اجرب لذة هذا التعبير  اذا فيه لذة او لزة
لكن ياصديقة
ولي الشرف
ان أقول انك رهيبة بالتعبير والتلاعب بالالفاظ
ورهيبة بحبك القصص والعبور بالقاري من حارة لحارة
ومن راكوبة الى عنقريب معاه سطلة
شنو ياخي
لفيتي لي راسي
خلاص يعني قال وضحت لي في الماسنجر
ياجمااااااااااااعة
مااااااااااوضحت حاجة ، اخير اول
لووووووووووووووووووول
بس قدر فهمي برد ليك ببوست مخصوص
تمنياتي
| |
|
|
|
|
|
|
|
|
|
Re: هكذا طار العريس (Re: Hozy)
|
هوزي الصديقة
لفيت راسك برضو؟؟؟؟
يا ربي انا السبب واللا تكوني أكلت الجدادة؟؟؟
يا ستي ما مشكلة،، نرسل ليك تاني في المسنجر واوعك تقولي السر لي زول
يسلمك
| |
|
|
|
|
|
|
|
|
|
Re: هكذا طار العريس (Re: بت قضيم)
|
خطيرة لكن بالجد
قال بت قضيم قال
انتى المفروض يسموك بت كتيب
بت اللزين كتبوا ثم جضموا الكتابة
لكى الياسمين اكان لقى ليه فرقة وسط دخاخين و سيجارات طه
| |
|
|
|
|
|
|
|
|
|
Re: هكذا طار العريس (Re: اسامة الخاتم)
|
ولك كل الود عزيزي أسامة
تسلم ويسلم كل ياسمينك،، حقو تجيب لي مع الياسمين كيلو برتقال،،،
الغريبة دائماً افكر في اختلاف اجتماعيات البشر،،، واحد مريض في السودان يعاد بالبرتقال والموز،،، ومريض آخر في دولة أخرى يعاد بالياسمين والورود والشوكلاتة،،، وكل يمرض على كيساه (كيس البرتقال البني داك اقصد)
انا بقول في شنو؟؟؟ والله ما عارفة
اعذرني أسامة فكلماتك اثملتني،،، ودي ما ليها علاقة كلو كلو بالجداد.
والله
يطرح البركة فيك يا رب وسلمت كلماتك الجميلة يا رب
| |
|
|
|
|
|
|
|
|
|
Re: هكذا طار العريس (Re: بت قضيم)
|
بت قضيم اللون الخمرى والخد الزهرى والعيون العسليه،طبعا ده ماغزل فيكى لكين فى القضيم زاتو،بعدما اكلتى الجداده وخميتى البيض دايرة كما العريس؟حررررم انا لو فى مكانو ارفع عليكى قضية اعتداء على المال العام،ده طبعا لانو الجدادات بقن معروفات على نطاق عام،حسب روايتك
غايتو ربنا يعينك كان تلقى ليكى عريس زى داك لانو لقطه خاصة عندو مزرعة دواجن 
لول يابت قضيم امتعتينا وطيرتى باقى النفيسات الكانن مخزنات 
| |
|
|
|
|
|
|
|
|
|
Re: هكذا طار العريس (Re: bushra suleiman)
|
بت قضيم كرهتينا زاتو شنو ياخي الحكاية(دي بي كواريك )
كلما ظبطنا ساعه نافخونا الذي خرم و تخرم امعنت انت في الزوقان وابيت الا ان تفرطقيه حته حته
بالله تاني ما تكتبي زاتو فان عكلتي و كتبتي فعليك بالاستبشان من اجل خاطر ركب حبوبه تكية بعد ان اتضح ان خاطر دجاجة طه ما بياكل عيش
الله يحرق روحك
| |
|
|
|
|
|
|
|
|
|
Re: هكذا طار العريس (Re: ايهاب)
|
بت قضيم
تحياتي و احتراماتي
زمان قالوا الدجاجة التي تبيض ذهبا
و أظن دجاجات العم طه أهم من تلكم الدجاجة ، لأن البنقو أغلى ، و مادام الدجاجة بتبيض بنقو ، معناها البنقو بيجي مدردم جاهز لزوم إستعمال الشيشة فينافس ماركة الزغلول و ماركة القص المعسل.
ما يقوم يسمع بيهن محمد ود خالتي ، دة لما ما يلقى البنقو ، بيغلي الحب بتاع البنقو و بيشربو زى الحلبة حصا.
تسلمي يا بت قضيم.
| |
|
|
|
|
|
|
|
|
|
Re: هكذا طار العريس (Re: ابو جهينة)
|
أبو جهينة العزيز
والله مع ما تكتب هنا،، فأنا ما أظن أن ود خالتك محمد بغلي الحلبة براه
!!!!
تخيل لو أن سودانية عثرت على هذه الدجاجة التي تبيض ذهباً؟؟؟
واللا العجب لو أمي لقت واحدة تبيض ملايات،،، ابدا الجدادة تكون ما قصرت معاي وتريحني جنس راحة.
ماركة الزغلول والقص المعسل ديل ليهم علاقة بالاسبرين وجوزة الطيب؟؟؟
مجرد ملاحظة
وتسلم يا أبو جهينة
| |
|
|
|
|
|
|
|
|
|
Re: هكذا طار العريس (Re: ايهاب)
|
زوغان
زوغغغغغغغغان
كويس؟؟؟
عشان ما نتضارب
وبعد
خلاص برسلها ليك في المسنجر،، ياخي الناس تكرهنا بعدين تقول دي شنوالبت البراية دي.
يحرق روحك انت مالك داير تبوظ مفعول الديانا؟؟؟
| |
|
|
|
|
|
|
|
|
|
Re: هكذا طار العريس (Re: bushra suleiman)
|
الفاضل بشرى سليمان
بالله القضيم ده فيه أي شئ يثير حماسة الواحد أنه يتغزل فيه؟؟؟
ومع رأي (الشين) فيه،، إلا اني اعترف أن لونه فعلاً جميل ،، ذهبي لامع ناير مع ان لا طعم له.
بعدين أنا ما عايزة العريس،، ولاااااااا يهمني،،، أنا أصلوا عايزة اكمل تعليمي.
وقالوا واحد شين جدا جدا (والنكتة دي حكيتها خمسمية مرة) ما لاقي ليه عروس كلو كلو،، كل ما يتقدم لواحدة تشوف وشه تقول ليه (انا والله عايزة اكمل تعليمي)
المهم زولنا جاتو نفسيات رسمي،، قام مشى الجامع وقاعد مهموم يفكر،، الإمام سأله عرف موضوعه أداه محاضرة عن مغزى الزواج،، وقال ليه بحماسة (والله إلا اعرس ليك بتي)
صاحبنا الشين ما صدق،،، لبس تمام،، اتقيف ومشى يخطب،، طلب يشوف البت ، البت جات من هناك شناة القردة بس،، صاحبنا اتنحنح وتمتم،، قال لأبوها،، والله يا عمي بتك ما تتعيب،، لكن انا والله عايز اكمل تعليمي.
بالله عليك أمان الله،، دي نكتة والله قصة قصيرة؟؟؟
يخليك يا بشرى
ويحول نفسياتك السيئة كلها لذكريات وضحكات تسعد بأنك عشتها يوما وصقلتك
تسلم
| |
|
|
|
|
|
|
|
|
|
Re: هكذا طار العريس (Re: بت قضيم)
|
العروس التي طيرت العريس سلام
حأعتبر روحي العريس الطاير , أب شيكا طاير , أبو قميص شيك , وأرد عليك وأقول يا بت قضـــــــيم
أرد أقول شنو
حردان جد
قاعد في بلد بحر , حواطتا بحر , مافي داعي تتماسخي وتقولي أقع البحر .
فرحان جد
بت قضــــــيم رجعت تكتب
زول يا بت يا قضيم جرد روحو من حاجة إسمها خصوص , ببني في عالم حقيقي , ما إفتراضات دكين , داير يعرف زول حقيقة زول حقيقة , غتيت , سجم أو أي شي . وقف قاصد سماك فرد إيدينو , راجي سنا ضي شموسك دفي , وقف أجرد ضاحك , تلسع بدنو شموس إستواء , مرادو عافية ودفي , زول حقيقة ,
علاقة صاحباتك والزول الأجرب أجدب ده شنو ؟ ما تحاولي تنحتي راس كوجنو كتر الكلام المبرطم ده وانا أوريك العلاقة إنو رجاء الزول ده ليك لحق عضام جدادة طه .
يديك العافية يا بسيطة
وقبل ما انسى
برضي بسيط
أو
أبنوسي
| |
|
|
|
|
|
|
|
|
|
Re: هكذا طار العريس (Re: ايهاب)
|
بت قضيم
الأسبرين و جوزة الطيب لهما علاقة ( نفس ) بفتح النون و الفاء ) ، مع المعسل ماركة الزغلول و القص.
و هي حرفنة تعلمها البعض تماشيا مع روح ( الكيف ).
أما أنا يا بت قضيم العزيزة ، ينطبق علي المثل ( من جاور السعيد يسعد ، و من جالس ناس السيجارة يدوخ بالريحة )
و بس
| |
|
|
|
|
|
|
|
|
|
Re: هكذا طار العريس (Re: ابو جهينة)
|
أبو جهينة العزيز
وانا زاتي ينطبق عليا،، مش أكلت الجدادة؟؟؟
على فكرة
الاسبرين وجوزة الطيب دي صحي؟؟؟
والله السؤال برئ،، حيث اني ما اتخيلتك تفهم ردي الأول
لكن ما شاء الله ثقافات عليا
والله يخلي ود خالتك
| |
|
|
|
|
|
|
|
|
|
Re: هكذا طار العريس (Re: ترهاقا)
|
أخي ترهاقا
وعليكم السلام ورحمة الله وبركاته
خلاص ولا يهمك
أخلي امي تظبط ليك غدوة محترمة،، بس انت رسل جيب لينا جدادة مشلخة،، وحبذا لو ما كانت جعليه،، شان ما قوية.
يخليك
| |
|
|
|
|
|
|
|
|
|
Re: هكذا طار العريس (Re: Khaalaleyaal)
|
يخليك يا خال العيال
المشكلة الأساسية أنه ما شكله في نكست تايم ،، أقصد المرة الجاية،، ولو حصل اطمئن،، سنمسك خشومنا ونجلط شعورنا ونخفس حوصنا،، وننطم ونتسد حتى إذا ما الفاس وقعت في الراس،،، بنا على أصولنا وأخذ الشعر هيئته في الانبشاكة الحادة وامتدت شلاقة اللسان أميال حتى يصبح اطول من ساقين اخوي زاتم.
انت قول إن شاء الله بس.
تسلم
| |
|
|
|
|
|
|
|
|
|
Re: هكذا طار العريس (Re: Khaalaleyaal)
|
يخليك يا خال العيال
المشكلة الأساسية أنه ما شكله في نكست تايم ،، أقصد المرة الجاية،، ولو حصل اطمئن،، سنمسك خشومنا ونجلط شعورنا ونخفس حوصنا،، وننطم ونتسد حتى إذا ما الفاس وقعت في الراس،،، بنا على أصولنا وأخذ الشعر هيئته في الانبشاكة الحادة وامتدت شلاقة اللسان أميال حتى يصبح اطول من ساقين اخوي زاتم.
انت قول إن شاء الله بس.
تسلم
| |
|
|
|
|
|
|
|
|
|
Re: هكذا طار العريس (Re: ASAAD IBRAHIM)
|
يخليك يا أسد
إن شاء الله الحكاية الجاية بنكون كتلنا العريس عديل كده
على فكرة
انا شفتك قبل كده لو الصورة الوجيهة دي صورتك،،
بس وين؟؟؟ ما قادرة اتذكر،، ما بتعرف ليك واحدة حوصة؟؟!!
تسلم للطلة يا قول شيري
وذوق انت ياخي
| |
|
|
|
|
|
|
|
|
|
Re: هكذا طار العريس (Re: Khaalaleyaal)
|
بت قضيم الذيذة العزيزة
كل عام وانت وجدادك وقضيمك بخير
شايفة العريس دة طاير ليه كم يوم وازازى فيه لامن قبضتو ليك وجريتو من رقبتو وجبته ليك قبال يغطس مع 2003 النحيسة!!!!!!!!!
والبشارة ماسنجر زى ناس هوزى وايهاب!!!
تسلمى يارائعة
تحياتى
| |
|
|
|
|
|
|
|
|
|
Re: هكذا طار العريس (Re: مهيرة)
|
وكل عام وانت بألف صحة وسلامة
يخليك لينا ويخليك لعيالك ويديك الصحة والعافية آآآآآآآمين يا رب
2003 بالنسبة لي ليست سنة نحيسة،، بل هي سنة سريعة جدا ما لحقت احقق فيها ولاااااااشي من أحلامي العظيمة،، كأن اكون بيضاء بشعر طوووويل مثلاً
لا لا لا لا لا
ما تقولي عليا سطحية،، عندي برضو أماني غريقة (أماني وجندرية)
مثلا مثلا السنة الفاتت تمنيت ينصلح حال السودان ،،، وكل سنة نقول السنة الجاية لمن تجي سنة نلحق جدي السمح وزين والسودان هو هو،،وسيع ومغبش.
حاجلط الشعر (حاحاول اجلطه) ، وانتظر المسنجر، انتي بس شدي حيلك
وتسلمي لي من كل شر يا رب
| |
|
|
|
|
|
|
|
|
|
Re: هكذا طار العريس (Re: بت قضيم)
|
بت القضيم الذيذ(اللزيز)
انا العاوزة البشارة ما انتى!! عايزة تخمينى ولا شنو؟؟
المهم احكى ليك النكتة دى:قالوا فى واحد زهجان من مرتو وما عارف يتفك منها،مشى يعزى فى واحد مرته ماتت وكانت دى المرة التالتة تموت فى حباله(قالوا فى رجال نحس مما يعرسوا الواحدة تقوم تموت)
اخينا بعد ما عزى الراجل،سأله قال ليه:انتوا النسوان البموتن ديل بتلقوهن وين؟؟؟؟؟
غايتوانا قريتها فى البورد دة_عشان سيدها ما يطالبنى بحقوق الملكية العامة!!!!
تحياتى
| |
|
|
|
|
|
|
|
|
|
Re: هكذا طار العريس (Re: Rawia)
|
العزيزة راوية
خضيتينا عليك شديد
من الصباح قرأت الخبر وأصبت بحالة نفسية سيئة،، اكتئبت وقفلت البورد ولم آتي إلا الآن لتبشرنا رجاء بأنك بخير وصحة وسلامة.
حمدت الله كثيرا وشكرته ودعيت أن يكون كل الذين تعرضوا للحادث معك بسلام وصحة طيبة.
يخليك يا رب وكل عام وانت بألف خير
| |
|
|
|
|
|
|
|
|
|
Re: هكذا طار العريس (Re: بت قضيم)
|
كل سنه وانتى بخير وعافيه يابت قضيم ومعاكى عريس مامسطول،
وبالمناسبه السعيده دى فى واحد مسطول اتصل على الاذاعه وقال اهدى الاغنيه للخطيبة الغاليه بمناسبة المولود الجديد
عقبالك
| |
|
|
|
|
|
|
|
|
|
Re: هكذا طار العريس (Re: بت قضيم)
|
مهاجر
تسلم على الأغنية الحلوة،، دي ما شفتها إلا الليلة عشان تعرف الطرش الحاصل (غير الحول لاحظ أغنية وشفتها)
بعدين للناس الما فهمت ولا يهتموا ولا يزعلوا،،، انا زاتي ما فهمت.
تسلم
لووووووووول يا تبلدينا
ضحكتني مع اني صحيت الصباح ووشي كأنه امبارح، أو كما قال ما عارفة اسمو منو، دحكتني مع اني ما ليش نفس.
يخليك.
| |
|
|
|
|
|
|
|
|
|
Re: هكذا طار العريس (Re: بت قضيم)
|
بت قضيم
أحسب أن هناك أعرض ما يعرف بفايروس مرض حامد وهو ذات الوباء الفتاك الذي نقله في هذا المنتدى سعادة العضو أركان ينفع أب حراز فمنذ أن وطئ كي بورده هذا المنتدى ما أنفك يتناول مسألة العرس والعريس النفض الكيس والحفله والسيرة والمعلقه إنكسرت والمفتاح عند النجار والنجار عاوز عروس والعروس عاوزه فلوس والفلوس عند الكفيل والكفيل راجل ثقيل وأب حراز ناقل كتير ولو فكر بمشي الترحيل ومن الترحيل بمشي السودان والسودان مليان ضبان إلى آخره النشيد الوطني وبي كده يكون أب حراز تيتي تيتي زي ما رحتي زي ما جيتي ومع ذلك حا يكون في إنتظاره متأخرات الضرائب والزكاة والتجنيد الإجباري وتوته توته خلصت الحدوته.
ولمعرفة مزيد من التفاصيل حول هذا المرض معى وعلى الهواء مباشرة عبر الطرقات الترابية مراسلنا بدر الدين الشين الذي دقس وعرس ، وأيضاً معنا عبر الأقمار الإصطناعية من المنطقة الصناعية مراسلتنا بت قضيم شخصياً ، سيد بدر الدين كيف عرست وأنت يعني كنت تعاني من مرض حامد كسف تصف لنا الوضع؟ والله دقست ليك أهل العروس طبعاً والعرس كان في ليلة ظلماء وإنت ما سمعت بالشاعر الذي قال: وفي الليلة الظلماء يفتقد البدر ما هو ده أنا البدر .... يبدو أننا فقدنا الإتصال بالبدر عبر البدر الصناعي عفواً بدور القلعة عفواً الإقمار الإصطناعية إلى اللقاء
| |
|
|
|
|
|
|
|
|
|
Re: هكذا طار العريس (Re: بت قضيم)
|
يا بت قضيم
بقرا ليك في البوست واضحك ساااي ضحكات ظرايفيه علي وزن ملائكيه والمعني واضح للشناه وكده المهم
اها يا اللمنتي ليك جيبووو سيره التبش والشطه ياخي حرام عليكم/ كن لتحري الدقه الجندريه..ياخي ما في زول هنا عيان وعندو حساسيه ونزله ووجع عيون وهايم بين اكوام المناديل وتبشو كملان..
تصدقي امي ده شده ما طيبه وبتريدني قبل اسبوع رسلت لي الاتي
عدد اتنين تبش ..دقه ناعمه ونضيفه ومغربله لو سمحتي وخاليه من البتاعات البتمصيهم في اخر الصحن بحثا عن اللذه الاخيره قبل اعاده مص القونقليس المغموت بحرص شديد في يدك الشمال وتهشي بيها علي الشيطان الملاوذ للقونقليس
عموما وعليه البت الطيبه زي امي جابت لي التبش ولم تكترث لاي تهم قد توجه اليها بنقل الاسرار العسكريه والله ده كان قلت لامريكي بفجر نفسو بصدقك عادي ..اسا امي بدل التعب ده كلو اكان بس اختصرت الموضوع ورسلت لي جدادتن زي الليلت طه الدلاهه ..والباقي عشانك <<لكن تكون بتبيض تبش ولا اكياس شطه مزبطه جاهزه ..اي باكلهم انتي مالك
بغسلهم واكلهم مالو ما كيس نايلو والهواء ....ما.... شايلو
ااي ده الشغل
وتقمصتني فجأه روح البت عباسيه في المنطقه الصناعيه كدي اتخارج منها واجي ..للبورد وكده
| |
|
|
|
|
|
|
| |
بت قضيم
اساسي
ايهاب
Hussein Mallasi
AlRa7mabi
HAMZA SULIMAN
اسامة الخاتم
bushra suleiman
ابو جهينة
ترهاقا
Khaalaleyaal
ASAAD IBRAHIM
مهيرة
Rawia
مهاجر
almulaomar
توما
فيس بوك
تويتر
انستقرام
يوتيوب
بنتيريست