|
Re: الحزب الشيوعي السوداني وخيانة القضية الوطنية (Re: اساسي)
|
أخوانا الضلاميين إزيكم.... يا كافي البلا قلت يا الله البوست دا مالو مضلم كده من بره كدى النخش فيهو كان ينور شوية....!! ها..ها...ها لا والله في مواضيع مهمة إتعرضت بس يجب التعامل معاها بموضوعية لفائدة النقاش أو الديموقراطية كما يزعم المقال... كتبت في بوستات سابقة إنو هناك تضخيم لدور الحزب الشيوعي أكثر مما هو عليه موضوعيا. يعني مثلا يحاول المقال أعلاه أن يقول لنا أن أسباب فشل الديموقراطية في السودان يتمثل بصورة كبيرة في مكائد الحزب الشيوعي.... ودا أنا بشوف فيهو إستخفاف كبير بالأحزاب السودانية وبعقلياتها وأستخفاف أيضا بالشعب السوداني.الأحزاب السودانية كان فيها رجالات على درجة كبيرة من الوعي والدهاء بحيث إنو لا رجالات الحزب الشيوعي ولا غيرو ممكن يمرروا عليهم أي مشروع ما لم يكن لهم هم أنفسهم دور أو مصلحة فيهو... محمد أحمد محجوب مبارك زروق السيد علي الميرغني الصادق المهدي مبارك الفاضل يحى الفضلي الترابي يس عمر الإمام علي عثمان محمد طه منصور خالد ديل " يروبوا اللبن عديل".....خليك من يغشوهم جماعة الحزب الشيوعي بالله سمو لي واحد بس في تاريخ الحزب الشيوعي بدهاء واحد من اللسته دي ثانيا : موضوع الإنقلابات وتفشيل الديموقراطية: ثلاثة ديموقراطيات وثلاثة إنقلابات: إنقلاب عبود : ودا اللي قامو بيهو بقو معروفين: حزب الأمة والإتحادي (الصادق إعترف بس الإتحادي لسع والدور جاي عليهو قريب) إنقلاب مايو: صحيح إنو كان للشيوعيين دور في تنفيذ ومساندة الإنقلاب في السنة الأولى لكن الدور الأساسي كان للقوميين العرب والحمد لله إنو شهادة أبو القاسم محمد إبراهيم في مذكراته اللي نشرت في ذكرى مايو الأخير كشفت دور كل تنظيم بوضوح وأبانت الدور الحقيقي للشيوعيين فيهو إنقلاب الإنقاذ: ودا علشان كلكم ظلاميين وعلشان ما تزعلو ، دا إنقلاب شيوعي 100 % الكلام دا ما معناهو إنو الحزب الشيوعي براءة ...لا...برضو فيهو زيو وزي باقي الأحزاب النظرة التآمرية دي. في إنقلاب يوليو 79 (وهو لم يكن إنقلاب ضد ديموقراطية) لم يصمد عسكر الحزب أكثر من 72 ساعة والحركة المضادة التي أفشلت الوضع العسكري قام بيها ضباط صف لا يتجاوز عددهم الخمسة ( تمت ترقيتهم لضباط بعد الإنقلاب)...!! أي "دهاء" هذا الذي يملكه الشيوعيون يهزمهم فيه خمسة من ضباط الصف..؟؟ علاقة الحزب الشيوعي بالحركة الشعبية: برضو أنا شايف الموضوع هنا فيهو إستخفاف كبير بالحركة الشعبية يا أهل الخير دي حركة مسلحة ، يعني ما عندها غير السلاح ومساندة الناس اللي معاها في الأفكار الاف المقاتلين مسلحين وفي كر وفر لأكثر من عشرة سنين وبعد كده نجاح في إبرام صفقة هي في صالحها بشهادة الكثيرين... عمل زي دا نرهنو كلو لأنو "التيجاني الطيب" كتب ليهو المانيفستو أو لأنو " الطابور الخامس الشيوعي" كان من وراهم حرب ومئات الالاف من الضحايا والأبرياء ماتو... في يوليو 71 كل اللي ماتو ما يتعدو ال20 فرد وكانت ضربة قوية للحزب الشيوعي فقد فيها القيادة وإنقسم في نفسو قسمين وأضطروا للإختباء والعمل السري الى ما بعد الإنتفاضة.... هل دي إمكانيات بتاعة حزب ممكن يقيف لأكثر من عشرة سنين في عمل مسلح بعدين وين "دهاء" الشيوعيين ديل بعد الإتفاقية ماذا جنى الحزب الشيوعي من بعد "إنتصار" الحركة..... مناصب وزارية.....؟؟ من في هؤلاء كان شيوعيا أوقريب من الشيوعيين في تاريخه السياسي والى الآن...؟؟ سلفاكير باقان أمون رياك مشار لام أكول منصور خالد الحلو كوة أكج (السفير)........؟؟ هل لدينا تصريح لاي فرد من هؤلاء خدم مصالح محددة للحزب الشيوعي.... إذن ما فائدة "عمالة" الحزب للحركة الشعبية...؟؟ يا إما هو حزب فيه من الدهاء بحيث أنه يندس في صفوف الحركة ثم يجني لاحقا ثمن عمالته... أو هم لا أذكياء و لا يحزنون بل هم أغبياء في كل مرة يطلعو من المولد بدون حمص أو أن ما يقال في حقهم هو مجرد مبالغات لا أكثر ....!! وبالعكس دعنا نرى حزب المؤتمر الوطني بتاعكم " المسكين" ماذا جنى من "عدم عمالته " للحركة الشعبية ومن بقاءه بعيدا عن التدخل في شئون الحركة: وزير الخارجية صار ملكا أكثر من الملك "الوطني" سفير السودان بواشنطن ....... بدون تعليق. أنا لا أعتبر الحركة "مخمومة" في هؤلاء كما يظن البعض ولو كان ذلك في غير خط الحركة لتم تغييرهم في أول ملف لكن للحركة أجنداتها التي تجاري بها اللعب في ميدان السياسة السوداني.. لم أنس ياسر عرمان .... وأنا أعرف أصدقاءه المقربين.. فهو لم يكن عضوا في الحزب الشيوعي وإذا أفترضنا جدلا أنه كان مدسوسا من قبل الحزب في الحركة فلبئس التفكير ويا خيبة التخطيط... حزب سياسي يخطط ويزرع واحد داخل حركة مسلحة ولمن يجي وقت حصاد "العمالة" الراجل يقول ماشي أقرأ في أمريكا....؟؟ فيا جماعة الخير أحسن تحترمو عقولنا وتحترمو تاريخ الأحزاب السودانية بخيرها وشرها وقدموا ليناالتحليل المفيد لتاريخنا وخلونا بالله من دهاء الشيوعيين ومكرهم "وريالتنا". شكرا ليك أساسي لفتح الموضوع وأتمني أن يجد عندكم النقاش المفيد.
|
|
|
|
|
|
|
العنوان |
الكاتب |
Date |
الحزب الشيوعي السوداني وخيانة القضية الوطنية | اساسي | 05-28-07, 03:35 PM |
Re: الحزب الشيوعي السوداني وخيانة القضية الوطنية | اساسي | 05-28-07, 03:41 PM |
Re: الحزب الشيوعي السوداني وخيانة القضية الوطنية | اساسي | 05-28-07, 03:42 PM |
Re: الحزب الشيوعي السوداني وخيانة القضية الوطنية | اساسي | 05-28-07, 03:43 PM |
Re: الحزب الشيوعي السوداني وخيانة القضية الوطنية | Mohamed E. Seliaman | 05-29-07, 06:54 AM |
Re: الحزب الشيوعي السوداني وخيانة القضية الوطنية | 7abib_alkul | 05-29-07, 07:25 PM |
Re: الحزب الشيوعي السوداني وخيانة القضية الوطنية | اساسي | 05-29-07, 07:30 PM |
Re: الحزب الشيوعي السوداني وخيانة القضية الوطنية | اساسي | 05-29-07, 07:32 PM |
Re: الحزب الشيوعي السوداني وخيانة القضية الوطنية | 7abib_alkul | 05-29-07, 07:38 PM |
Re: الحزب الشيوعي السوداني وخيانة القضية الوطنية | وليد محمد المبارك | 05-29-07, 07:54 PM |
Re: الحزب الشيوعي السوداني وخيانة القضية الوطنية | القلب النابض | 06-09-07, 02:06 AM |
Re: الحزب الشيوعي السوداني وخيانة القضية الوطنية | محمد حسن العمدة | 06-09-07, 03:07 AM |
Re: الحزب الشيوعي السوداني وخيانة القضية الوطنية | Mohamed E. Seliaman | 06-09-07, 07:47 AM |
Re: الحزب الشيوعي السوداني وخيانة القضية الوطنية | A.Razek Althalib | 06-09-07, 08:05 AM |
Re: الحزب الشيوعي السوداني وخيانة القضية الوطنية | معتز القريش | 06-09-07, 08:14 AM |
Re: الحزب الشيوعي السوداني وخيانة القضية الوطنية | ابو خالد | 06-09-07, 01:58 PM |
Re: الحزب الشيوعي السوداني وخيانة القضية الوطنية | فيصل نوبي | 06-09-07, 02:23 PM |
|
|
|