|
|
 استودعكم الله الذي لا تضيع ودائعه والى اللقاء في ساحات أرحب
|
سوف أغيب عن المنبر وربما لن اعود اليه مرة اخرى
ولزاما علي ان أودعكم
ناذر ( ابو النذيذ الحبيب شقيق الحببيب ابن الحبيب) اكيد سوف نلتقي
عسكوري ( قريبي اللحم دم المناضل الراقي ) اكيد وكما تعرفني منذ الصغر
تمبس ( الفنان في كل شي ياخي كلامك بهون علي غربتي ) اكيد اكيد ح نتقابل طبعا في الليل
ميادة ( قريبتي الذكية اللماحة واللميضة ) اكيد ح نتقابل
نجود ( بت الخال العسللي ) اكيد طبعا
ابو السعود ( الحبيب كميات ) سنظل متواصلين ولن ننقطع ابدا بإذن الله
ابو جهينة ( الرجل المهذب الراقي ) اتمنى لقاك
فيصل نوبي ( الموثقاتي بلا منازع ) سأفتقدك واتمنى لقاك
بيان (فيك ريحة اهلي وشكل اهلي ولون اهلي واحس انك مني وفيني ) اتمنى لقاك يا كمين زول
سجيمان (ود العم يا لذيذ يارايق ) بنجيك انا ونجود
القلب النابض ( القلب الطاهر وكل القلوب اجتمعوا فيك ) اتمنى لقاك
بت الاحفاد ( الله يوفقك وعقبال الدكتوارة ) اذا قابلت القلب اكيد سوف القاك
حميدة (الجدع البدي في السوداه ) تمبس بلمني فيك
منير ( لم نتلقي كتير ) اتمنى لقاك
الباشمهندس محمد السيد ( من ديك وتاني خلاص ) اتمنى لقاك
ايمان صالح ( البت الحديقة افتقدك المنبر وافتقدناك جميعا ) طمئنينا عنك
صديق الموج ( الظرافة والمعجم الذي يمشي على قدمين ) اتمنى لقاك
نادية مختار ( احسن الله عزاكم والهمك الصبر ) كوني كما نود
ود الباوقة ( الريس الذي لا يقل عن الموج ظرفا ) ياخي قالوا انحنا جيران وين انت لي سلطانة
تراجي ( كنت عايز اختك في قائمة الذين اختلفت معهم لكن رغم المناوشات تظلي بنت شرقنا الجسورة ) اتمنى لقاك
امنة مختار (الله يوفقك ويديك الفي نيتك ونشوفك مفخرة لي شرقنا الحبيب ) اتمنى لقاك
صديق رحمة النور ( ياخي يكفي انت من كسلا ياخي) اكيد ونص
اسامة سعيد ( رفيق المنبت اقول ليك شنو انت عارف كل حاجة واي حاجة ياخي يكفي بيني وبينك بيت واحد ) طبعا ونص وخمسة
عبد المنعم ابراهيم الحاج (يا دفعة ويا نديدي وياصديقي الزمن فرقنا) قالوا البشرب من موية توتيل اكيد برجع ليها تاني فما بالك بالشربوا من زير واحد وخمسوا كباية الشاي
والذين اختلفت معهم
خدر وعادل ومعتصم الطاهر وبشاشا
قد يكون هم غربة انفجر في لحظة غضب صادف ساعة مروركم امامي
اكيد حزين لكن لا احمل لكم أي بغضاء
اعفو لي وعافي منكم
وللكل دوام التوفيق
رمضان على الابواب
كل سنة وانتو طيبين وتصوموا وتفطروا على خير
لا تنسوني من صالح الدعاء ولن انساكم
والى القاء
|
|
 
|
|
|
|
|
|
|
 Re: استودعكم الله الذي لا تضيع ودائعه والى اللقاء في ساحات أرحب (Re: أحمد الشايقي)
|
Quote: إلى ِأين يا قريبي,
على أية حال دم بخيـر ولا تبعـد كثيراً |
أحمد الشايقي
اسمك دا ساكت كدا براهو بجيب لينا الهواء 
هسه يقولوا واحد من كيان الشمال هرب وقريبه يقول لي قرب تعال ما تبتعد
انا شمالي الجذور و ادوربي الميلاد والمنشأ والثقافة و أفاخر
| Quote: فالتواصل الانساني هنا لا يقدر بثمن |
صدقت ، التواصل الانساني هنا لا يقدر بثمن مع هم من امثالك يا احمد
دمت بالف بخير يا قريبي
| |
|
|
|
|
|
|
|
|
 Re: استودعكم الله الذي لا تضيع ودائعه والى اللقاء في ساحات أرحب (Re: saadeldin abdelrahman)
|
| Quote: ياخي كلامك بهون علي غربتي |
أخـــوي الأمين..
لا احب المرور على سرادق العزاء إلا مجبر .. لما تتركه من نفسي من مرارات ، لكن برغم مراراتي لا ابخل بكلمة ربما تكون ترياق ولا ابخل بها في لحظة حوجة ..
فكرت كثيرا قبلك في الرحيل لا سباب موضوعية وأخرى خاصة جدا ..
عدلت عن الفكرة مرات ومرات .. هنا وجدت الكثير من اضاف لي في لحظة ود أو لحظة خصام لم اسقط اي منهم من ذاكرتي ..
كم تزعجني فكرة الرحيل .. يا الأمين
لكن
يقيني اننــا سنلتقي في مساحة واقع اوسع محبة .. ويقيني انك ستعود قريباً..
كما تعلم .. وكما اتفقنا
أحمل لك الكثير الكثير .. الكثير ..
تصحبك السلامة في اي مكان كنت فيهو ...
| |
|
|
|
|
|
|
|
|
|
Re: استودعكم الله الذي لا تضيع ودائعه والى اللقاء في ساحات أرحب (Re: bayan)
|
بيان يا ثروة قومية
عارفة صادرات السودان للعالم الخارجي عندي هي شنو ؟
الصمغ العربي والبترول والذهب وبيان
| Quote: اتلومـــــــــــــــــــــــــــــــــــــــــــــت |
الكلمة واحدة لكن توجع عارف نفسي قصرت معاك وما سمعت كلامك
لكن والله ما ندمان !!! ليه ؟ اقول ليك
عندي جدتي من جهة امي اسمها مزار محمد المقبول عبد الرحمن وراق ود حاج
كانت تعتز بي اخوها اسمه الشريف وجدها ود حاج (ود حاج البروب الموية اكيد سمعتي بيه )
سمعتي بي مدحه اولاد حاج الماحي يا ود حاج ديل حوباتك في التمساح بين آياتك
كانت حكمه ورأيها سديد يوزن بلد وما بتخاف تقول الحق في عين اتخن تخين
لمن اشوف بعض مداخلاتك في المنبر هنا اقول حبوبتي بت ودحاج لسه عايشه
عارفة وصلت التسعينات وما خرفت ودائما كانت نضيفة ومحتشمة حتى وهي براها في بيتها
الله اداني بت ود حاج تاني والله يديك عمرها يا بيان
| |
|
|
|
|
|
|
|
|
|
Re: استودعكم الله الذي لا تضيع ودائعه والى اللقاء في ساحات أرحب (Re: على محمد على بشير)
|
علي
كيف حالك يا اخوي
عارف يا علي وقت اشوف اسمك دا كامل كدا طوالي تقفز من الذاكرة صورة عمك خضر على بشير
الوجهة بي تقاسميه ، الشنب ، الضحكة ، اللاندروفر بتاع الجيش بي سواقة ، الميري
اللبس الرسمي البدلة التوينك ، الدبابير تلمع في الكتوف ، النشيان بارزة على الصدر
هيبا وكلام موزون
كنت اشوفه اولى بالحكم من جعفر نميري في الوقت داك
كان صديق للوالد عليهم رحمة الله وكان دائما ما يزورنا وانحنا صغار كنت الاكتر فرحا بي قدومه
اجري اجيب الموية والعصائر لزوم الضيافة واستمع بإنصات لحديثة مع الوالد
عمك دا كان رمز بالنسبة لي ولمن دخلت الثانوي اتعرفت علي صلاح (رحمه الله وعوضه شبابه الجنة )
فرحت جدا لمن عرفت خضر خاله وبقينا أصدقاء وحزنت جد والله لفراقهما الاتنين
الهم ارحمهم ووسع مدخلهم واجمعنا بهم في جنتك يا رب العالمين
يا علي انا ما شفتك 00 فيك شبه من عمك خضر ؟
انا ماشي والرجوع يعلم به الله
تسلم كتير يا ود الملوك
| |
|
|
|
|
|
|
|
|
|
Re: استودعكم الله الذي لا تضيع ودائعه والى اللقاء في ساحات أرحب (Re: tmbis)
|
Quote: يقيني اننــا سنلتقي في مساحة واقع اوسع محبة .. ويقيني انك ستعود قريباً..
كما تعلم .. وكما اتفقنا
أحمل لك الكثير الكثير .. الكثير .. |
علاء الدين يا ود منصور
انت عارف لو استنسخوا منك كم نسخة كدا و وزعوها على اركان الدنيا دي
كان يبقى شكل الدنيا اخضر ويبقى انضر
| Quote: أحمل لك الكثير الكثير .. الكثير .. |
وانا احمل ليك من محبة ما تنؤ بحمله الراسيات من الجبال
انت حبيب وتتحب يا تمبس اخوي
| |
|
|
|
|
|
|
|
|
|
Re: استودعكم الله الذي لا تضيع ودائعه والى اللقاء في ساحات أرحب (Re: ناذر محمد الخليفة)
|
Quote: ليه كدة يا الامين ياخ !!
أها وهسي لو احتجنا لي كجامة نشرك بيها ، حا نلقى احرف منك وين !!
|
ناذر يا صانع الفرح
اذا جيت بجي المرة الجاية بي فراري برا
بس اسمع يا ابو مروا وبي فراري انط من جوا
ابادر ليك من تاخير
سمعت بي ابو الفرار حايم والجو َسموُم وهو حايم
اسمع
اذا ما جيت لي أي سبب من الاسباب برسل ليك كتالوج الكجامة
انا دافنها في واحد من بوستاتك
| |
|
|
|
|
|
|
|
|
|
Re: استودعكم الله الذي لا تضيع ودائعه والى اللقاء في ساحات أرحب (Re: الأمين عثمان صديق محمد)
|
أخوى الأمين
ياقول أختنا نجود (إنزيك)
جنس سبب يخليك تفوتنا ماف
أنا معاك علي الدوام لكن للأسف لم اكن أشارك بمداخلات
تمش وين وانت لسه ماتميت معانا السنة
قرب تعال ماتبتعد
وخلي نفسك طويييييييييييييييييييل للماراثون
وإن كنا لانتداخل خلينا نواكب الناس وكتاباتها
نظهر في لحظة فرح أو لحظة حزن
وايه الدنيا غير لمة ناس في خير أو لحظة حزن
صديقي الأمين
قرار مغادرتك للمنبر لا أجد له أسباب سوى إنه قرار ويمكن العدول عنه
لو ماعشانا عشان الناس الفوق وكلماتها الجميلة في حقك
غيب وتعال تلقانا نحنا يانا نحنا
ولو ربنا مد في الآجال
بنتلاقا فى لحظات فرح
وأريتك تبقى طيب إنت
| |
|
|
|
|
|
|
|
|
|
Re: استودعكم الله الذي لا تضيع ودائعه والى اللقاء في ساحات أرحب (Re: Eng. Mohammed al sayed)
|
الباشمهندس صاحبي من زمان
Quote: أخوى الأمين
ياقول أختنا نجود (إنزيك) |
عارف نجود دي كان يسموها براءة الطيبة حسن عبد الرحمن
والله اطيب مخلوق قابلني في الكرة الارضية دي والبراءة تمشي على قدمين ودمها شربات
| Quote: تمش وين وانت لسه ماتميت معانا السنة |
انا ما انسى انك اوئل المرحبين بي هنا
بالله انا لسه ما تميت سنة ؟ !!!!!!!!!! والله كانها سنين وسنون بارزة اجعصها طبيب اسنان ما يواسيها
Quote: وايه الدنيا غير لمة ناس في خير أو لحظة حزن
صديقي الأمين
قرار مغادرتك للمنبر لا أجد له أسباب سوى إنه قرار ويمكن العدول عنه
لو ماعشانا عشان الناس الفوق وكلماتها الجميلة في حقك
غيب وتعال تلقانا نحنا يانا نحنا
ولو ربنا مد في الآجال
بنتلاقا فى لحظات فرح
وأريتك تبقى طيب إنت |
كلامك صادق و مؤثر وطالع من قلب صافي
اسوي شنو يا باشمهندس
وراي كوم لحم وكان باريت المنبر دا بروحوا شمار في مرقه بعدين الله بسالني منهم
اوعدك اذا لقيت وقت بجي عشانك وعشان الناس الحلوين ديل
وسلم لي كتير على حمد فتح الرحمن ، مرة جاء هنا يجدد الجواز وكلمني من السفارة
الراجل دا باين عليه ارباب وضوء
| |
|
|
|
|
|
|
|
|
|
Re: استودعكم الله الذي لا تضيع ودائعه والى اللقاء في ساحات أرحب (Re: عبد المنعم ابراهيم الحاج)
|
منعم ياخي كيفنك
| Quote: رمضان وصايموا في كسلا ..اها في شنو تاني |
ياخي ما كان تكلمني من بدري على الاقل كان عملت حسابي
غايتو لو قاعد لحدي بعد رمضان باذن واحد احد بنتقابل ويبقى الكلام مباشرة
وكان ما تقابلنا بتلقاني معاك يوم ما في البلد الطير وعجم ديك باذن الله
| Quote: بس اعمل حسابك من بتاع التنكر |
انا ماعندي شغلة هنا غير مطاردة التناكر
شفت الجنون القاعدين نعملها في كبري الحلنقة ديك هنا بالزيادة
تسلم يا منعم
| |
|
|
|
|
|
|
|
|
|
Re: استودعكم الله الذي لا تضيع ودائعه والى اللقاء في ساحات أرحب (Re: محمد المرتضى حامد)
|
Quote: يا أمبن
كراعنا حاره ياود عثمان؟
شوف ، أنا ماقريت ليك لكن بالكتبتو فوق ده وكتبوه ليك الشباب أعلاه ممكن تاخد هدنه وتجي .
لك الود |
محمد المرتضى حامد
والله كراعك ما حارة ولا شي
بس قطري قام وقطرك دخل المحطة
اجمل حاجة تجيك مداخلة زي بتاعتك دي
من زول ما تعرفه ويريد ليك الخير
مالك عايز تذكرنا زمن كنا نعمل فيه خرم في السماء دا
تسلم لي يا ذوق
| |
|
|
|
|
|
|
|
|
|
Re: استودعكم الله الذي لا تضيع ودائعه والى اللقاء في ساحات أرحب (Re: ajaj)
|
| Quote: لا لا ما تمشي....بس قضي اغراضك وتعال تاني |
لو عليك اجيك والجمال شادة للرحيل
يا بت عجاج
يا حربيه
يا بيان بكرة
ويا بت ود حاج بعد بكرة
شفتك مرة انتي وبيان دي لعبتوا ون تو كدا في السلك 
من انا الى انا
عملتوها كيف دي !!! محترفي بايرن ميونخ ما يقدورا عليها دي
وقت اشوفكم اطمئن وانوم قفى
| |
|
|
|
|
|
|
|
|
|
Re: استودعكم الله الذي لا تضيع ودائعه والى اللقاء في ساحات أرحب (Re: Tragie Mustafa)
|
الله اكرم
تراجي عمر ابوطالب مصطفى
تراجينا
بورسودان سنكات طوكر وبالعكس
الهبباي في العيتبيت
الحباب والارتيقاء
حوليه ستي مريم
هسه الحاجات دي ناس حازم و سند بعرفوها
وريهم اي حاجة من سيتيت وبركة وخور قرورة وعدوبنا ودرهيب حتى خور الكراي
معاي مصرين هنا قاعد اقرقرهم تاريخ طوكر دا قرقرة واوريهم ودور طوكر في حرب اكتوبر
| Quote: واقول لك انتم السابقون ونحن اللاحقون ان شاء الله. |
اوعا تمشي يا تراجي انتي ركيزة من ركائز المنبر دا ان اختلفوا الناس او اتفقوا معاك ودي حقيقة والله
كان مشيتي المنبر دا بميل
ركزي يا تراجي بالله
مرتك دي شنو ؟ مالك عايزا تبوريني ؟ انت نسيتي وللّ شنو ؟
كوم اللحم القلته فوق دا ما فيهم مرا ديل اخواني واخواتي وانا اكبر الاولاد
يا تراجي انتي بي عضمة لسانك ما قلتي في المنبر دا والناس دي كلها شاهدة
ما قلتي بتشوفي لي عروس من خواجيات كندا حتى كمان قلتي دايرا من البيض وللّ السود ؟ دايرا ظلامية وللّ مستنيرة ؟ وانا قلت ليك دايرا ظلامية سوداء ومن الاحجام الخرافية ابعديني من العصعصات اخوك جهامه
صحي المنبر دا اثر عليك
اخد ليك اجازة بس ما تطولي
تسلمي يا تراجينا يا بت الاصول
| |
|
|
|
|
|
|
|
|
|
Re: استودعكم الله الذي لا تضيع ودائعه والى اللقاء في ساحات أرحب (Re: إسحاق بله الأمين)
|
Quote: يا أخوي اللمين ود عثمان ود حاج الصديق ود أمحمد
سلام آ زول سلام |
سلام عروب سلام
كيفنك يا اسحق اخوي
والله كلامك البلزرق دا والخط الكبير من قبل ما اقراه اقول ليك كلام دا كلام رجال ويرحمن
| Quote: والله إسمك دا براهو إكيف، |
كتر خيرك لكن اسمي دا مكتفني يا ود بلة
هسه كان اسمي طندباوي او جن احمر ما كان تلقى الكلام المطلق راقد هنا حبطرش
الاسم ذو الدفع الرباعي دا يخليك تعمل حساب أي اسم فيهم يعني لو عايز تكتبت أي كلمة تقول الكلمة دي يا ربي الامين برضى بيها وكان الامين رضى بيها ياربي عثمان برضى بيها وكان عثمان رضى الصديق برضى بيها وبعد تعرفهم كلهم راضين وترضيهم تب الوقت داك يادوب تكتبها
شوفت وكرة الاسم ذو الدفع الرباعي كيفنها لكن بيني بينك انا ذاتي متكيف منو
وانت اسمك ذاتو ما سمح اسحق نبي وبلة سوداني صميم والامين انا دا
| Quote: ترى نحن عرب جزيرة ساكت، |
افو انا اخوك
يا ود بلة ما تسمع كلام الناس البقولوا عليكم اهل العوض
انتو اهل الكرم انتو البتقيفوا في الدرب للناس تفطروهم غصب قبل ما الناس تعرف موائد الرحمن والجمعيات الخيرية
ما سمعت بي القصيدة دي ما اتقالت في واحد منكم
اللا كلّ ملّ
لا قال إنحمل
إنت يا الحبوب
خيرك كَاب شَبوبَ
ما بتدي الرَبوبَ
وماك البَوُ عَبوبَ
| Quote: عليك الله كان ما قعدت وجبرت بخاطرنا |
والله يا اسحق قفاي اعوج وكان قعدت اكتر من كدا البلد وراي تخرب
لكن اوعدك عشان كلامك السمح دا كان لقيت فرصة بجي واصلا تاني ما بنساك
تسلم يا ود القبائل
| |
|
|
|
|
|
|
|
|
|
Re: استودعكم الله الذي لا تضيع ودائعه والى اللقاء في ساحات أرحب (Re: Mayada)
|
| Quote: لا بالله.............. |
انتي يا يمه القطامه دي بتشتريها وللّ بوروك دربها وين
بدل ما تجيبي ليك كم قصيدة من قصائد الخنساء فوق اخوها صخر
ودميعاتك تملا البوست دا وانا اجيك من فيافي نجد شايل الكيلنكس
هسه دا بالله وداعك لي اللمين اخوك
لكن عزاي اني عارفك وعارف قلبك ابيض من فستان البنية الفي برفايلك دا
يا ستهم
تسلمي لي انتي يا اللميضه
| |
|
|
|
|
|
|
|
|
|
Re: استودعكم الله الذي لا تضيع ودائعه والى اللقاء في ساحات أرحب (Re: الأمين عثمان صديق محمد)
|
اللمين ازيك...
Quote: انتي يا يمه القطامه دي بتشتريها وللّ بوروك دربها وين
بدل ما تجيبي ليك كم قصيدة من قصائد الخنساء فوق اخوها صخر
ودميعاتك تملا البوست دا وانا اجيك من فيافي نجد شايل الكيلنكس
هسه دا بالله وداعك لي اللمين اخوك
لكن عزاي اني عارفك وعارف قلبك ابيض من فستان البنية الفي برفايلك دا
يا ستهم
تسلمي لي انتي يا اللميضه |
شفتني الليلة لقيت لي فرصة اعمل زي فطاحلة البورد، طواااالي علمت كوتيشن للنضم بتاعك وكمان في حاجات تحتها خطوط، عشان لو يوم تاورتني كدي ولا كدي اجر اجيب نضميك دة واقول ان البادي اظلم واجو اصحابك طايرين لحميش النيران و...، كفاك ولا ازيد؟؟؟
ست البنيـــــــــات
| |
|
|
|
|
|
|
| |
saadeldin abdelrahman
..
.. انك تفارقهم.. ولا كيف ?
أحمد الشايقي
tmbis
على محمد على بشير
bayan
ناذر محمد الخليفة
ajaj
محمد المرتضى حامد
إسحاق بله الأمين
Tragie Mustafa
Mayada
فيصل نوبي
فيس بوك
تويتر
انستقرام
يوتيوب
بنتيريست