|
|
 ...أمي بيـــكي بــهاتي حـــــالم...
|
لما أرجع من ديار الغربة سالم..
لما اقالدك يّما ..
وليكي أحضن وليك أسالم ..
ولما أرجع ليكي يما ..
والله عالم ..
يبقى داك اليوم ..
مأرخ في متاريس الفرح غنوة ..
وأقدر أقولك إني رجعت غانم ..
لأنك لو تعرفي البي..
يسكنك هم ..
يعشعش في ضلوعك غم ..
لأنو وليدك المسكين ..
بصارع موج ..
موجاً عاتي ..
يقهر حاج علي النواتي ..
ومن عذابات غربة بتزيد ..
كل يوم بيمر بدخل عوالم ..
غربة تنهش في اللحم ..
تنخر عظام .. تمسح عوالم ..
غربة فيها وماني عارف ..
إني مظلوم ولا ظالم ..
والحرام الببقى طاعم ..
توّه القيم النبيلة ..
وقيّم الناس بالدراهم ..
والوضيع خلاهو طالع في العلالي ..
والعزيز في الأرض يبحث للسلالم ..
والمهم إنك تعرفي ..
لو صحيت لو كنت نائم ..
إني بيكي بهاتي حالم ..
أمي بيكي بهاتي حالم .....
|
|
 
|
|
|
|
معتز تروتسكى
فيس بوك
تويتر
انستقرام
يوتيوب
بنتيريست