إلى الأخ علاء سيد أحمد مع عظيم المودة والاحترام

Quote: قلت إنو بشارة السيد المسيح عن الرسول صلى الله عليه ما جات صريحة لانها جات باسم أحمد ما محمد. منو القال ليك إنو الرسول صلى الله عليه و سلم ما اسمو أحمد ؟! الرسول صلى الله عليه و سلم في البخاري و مسلم قال : (إن لي أسماء: أنا محمد، وأنا أحمد، وأنا الماحي الذي يمحو الله به الكفر، وأنا الحاشر الذي يحشر الناس على قدمي، وأنا العاقب)، يبقى البشارة باسمو طق طرق !! السؤال، وين الرسول صلى الله عليه و سلم ذكر الاستاذ باسمو أو حتى أدانا إشارة ليهو ؟!! والاشكالية هنا إنو دعوة الاستاذ ما تجديد للدين زي ما قاليك علاء ... الاستاذ يقول إنو دعوتو هي الدين ذاتو و البموت على غيرها مات على سوء الخاتمة! تقول يا سيدي (طبعا النبي عليه السلام لم يذكر الفكرة الجمهورية صراحة، ولم يذكر مصطلح "رسالة ثانية"، لكن ما يلاحظه القارئ للقرآن أن هناك مستويان، مستوى جاء في مكة ونُسخ ومستوى نزل في المدينة.) و بعداك فصلت في المسألة. يعني يا ياسر كل المسلمين في مشارق الارض و مغاربها لو ما اتبعوا الأستاذ و الفكرة الجمهورية بموتو على سوء الخاتمة، و في نفس الوقت لا هو ولا دعوتو مذكورات لا في قرآن لا في سنة ولا الرسول صلى الله عليه و سلم جاب ليها سيرة لا تصريحا لا تلميحا و نجي نحن نصدق فهم الاستاذ و إستنباطو للاشارات و المستويات - اللي أساسا نحن شايفنو بفسر و بأول على كيفو - نجي ناخدها دلالة على صحة دعوتو ولو ما إتبعناهو نموت على سوء الخاتمة ؟!! كيف الرسول صلى الله عليه و سلم - و هو رسول الرسالتين بزعم الاستاذ - ما يكلمنا عن الرسالة التانية ولا عن الزول اللي ح يفصلها و يتركنا لفهم و إستنبطات و تأويلات شخص جاي بعدو بقرون عددا، و الشخص ده بزعم إنو دعوتو دي هي الدين و اللي ما بتبعو بموت على سوء الخاتمة و العياذ بالله، و في نفس اللحظة ما إنفك الرسول صلى الله عليه و سلم من التحذير من أي تغيير ولو طفيف عما جاء به و قال لينا إنو تركنا على المحجة البيضاء ليلها كنهارها لا يزيغ عنها إلا هالك ؟!! والله يا ياسر انتو مبتلين البلاء الواحد ده، لانو الأمر أوضح من الشمس في النهار، نسأل الله إنو يردنا جميعا لما يحب و يرضى. أما بالنسبة لموقفي من الجهاد اليوم وما يتبعه من سبي واسترقاق، فالاشكالية هنا ما موقفي أنا كأمين، لانو موقفي - بغض النظر عن ماهيتو - قابل للخطأ و الصواب، المشكلة انك عايز تستدل به و على صعوبة تحقيقو كدليل على صحة الفكرة الجمهورية، و ده لعمري مفارقة المنطق تماما، لانو القصة هنا ما رأي أمين او ياسر انما دين بناخدوا من المأذون ليه ببيانو و إلا ببقى مافي فرق بين الرسول صلى الله عليه و سلم و كونفوشيوس مثلا!! أنا و إنت مقتنعين إنو الرسول صلى الله عليه و سلم رسول من الله جاء بالقرآن من الله و وجب علينا إتباعو، و إنو من فارق درب الرسول مات على سوء الخاتمة، الاستاذ جاء بكلام الرسول ما قالو ولا كلمنا عن إنو في زول في القرن العشرين ح يجي يقول الاسلام رسالتين و إنو هو المأذون ليه بتفصيل الرسالة الثانية و بيانها و إنو لو ما اتبعناه ح نموت على سوء الخاتمة، الكلام ده كلو ما قالوا لينا الزول الأنا و إنت مقتنعيين إنو رسول من الله، و في نفس اللحظة الزول الأنا و إنت مقتنعيين إنو رسول من الله ما إنفك يحذر و يخوف و يهدد من مخالفة أي من أمره ظاهرا أو باطنا أو إدخال أي جديد في دعوتو، يبقى على أساس نتبع الاستاذ ؟! والله يا ياسر انتو مبتلين بلاء عظيما، ياخي إنت لو ما إتأكدت من الدكتور الماشي ليه ده عندو شهادة جامعية و متخصص في عملو و موثوق به ما بتمشي ليه، وين شهادة الاستاذ من الرسول و دعوة الرسول لينا عشان نتبعوا و ننجوا من سوء الخاتمة البشرنا بيها الاستاذ لو ما اتبعناه ؟!! و طبعا الكلام ده كلو بعيدا عن الوعود اللي وعد بيها الاستاذ و ما تحققت ولا ظهرت لا في القرن العشرين ولا في قرننا هذا. نسأل الله الهداية لنا جميعا.