إلى الأخ علاء سيد أحمد مع عظيم المودة والاحترام

Quote: الآيات واضحة جدا ما محتاجة تأويل و باقي الآيات بتشهد بكدا ( السفينة و الغلام المقتول). القصة يا عزيزي - في تقديري - الاستاذ داير يحشر السودان و يدلل على نفسو لا أقل ولا أكثر ! ثم انك استشهدت بتأويل عبدالله بن عباس لاية تانية، و عبدالله بن عباس، تأويلو ما بناقض الآية، عكس تأويل الاستاذ البناقض الآية زي ما وضحنا ليك. الشي التاني و الاهم عبدالله بن عباس ده حبر الامة و ترجمان القران، و الرسول صلى الله عليه و سلم دعا ليه (اللهم فقهه في الدين وعلمه التأويل) و بالتالي ربنا فقهو في الدين و علمو التأويل، يعني ده زول - بشهادة الرسول صلى الله عليه و سلم نفسو - آتاه الله الفهم عنه من القرآن ، وأذن له في التأويل الصحيح، يعني ده زول الرسول صلى الله عليه و سلم وثقو بدعاءو المستجاب، الاستاذ توثيقو وينو البخليه يأول على كيفو كدا ؟!! و الكلام ده بقودنا لنقطة أهم و أشمل : الاستاذ بدعي إنو الرسول صلى الله عليه و سلم فصل الرسالة الأولى وأجمل الثانية، وانوتفصيل الاجمال ده بحتاج فهم جـديد للقـرآن اللهو الفكرة الجهمورية. و بعيدا عن الاحاديث التي لا حصر لها عن إنو الما كان زمن الرسول دين، هسي ما دين وبعيدا عن الآية الأوضح من الشمس "( اليوم أكملت لكم دينكم وأتممت عليكم نعمتي ورضيت لكم الإسلام دينا )، كيف تكون في رسالة تانية ( و الرسول ذاتو رسولها ) و ما يكلمنا عنها بوضوح ولا عن الزول الح يجي يفصلها ؟ كيف نزعم إنو الرسول ده بلغ الرسالة و أدى الأمانة وهو ما كلمنا إنو رسالتو رسالتين و التانية "مجملة"؟! ولا يكلمنا عن رسالتو الثانية المجملة ولا يكلمنا عن الح يجي يفصلها ؟! كيف نقول تركنا على المحجة البيضاء ليلها كنهارها و هو النص التاني من رسالتو قالو مجمل و ما ورانا إنو قالو مجمل و لا ورانا منو الح يفصلو ؟! عدم تبيلغ الرسول لينا عن الفكرة الجمهورية و عن صاحبها ما بتخلي غير احتمالين لا ثالث لهم : - يا إما الفكرة الجمهورية لا علاقة لها بالاسلام و رسول الاسلام. - يا إما رسول الاسلام صلى الله عليه و سلم قصر في التبليغ، فلا بلغ الرسالة ولا أدى الأمانة ولا تركنا على المحجة البيضاء ليلها كنهارها كم زعم ... و حاشاه !! ----------------