شيخ أبو زيد أحمد العوض

مرحبا Guest
اخر زيارك لك: 05-06-2024, 12:37 PM الصفحة الرئيسية

منتديات سودانيزاونلاين

مكتبة الفساد

ابحث

مدخل أرشيف اراء حرة و مقالات

News and Press Releases

اتصل بنا

Articles and Views

English Forum

ناس الزقازيق

مدخل أرشيف للعام 2020-2023م

نسخة قابلة للطباعة من الموضوع ارسل الموضوع لصديق اقرا المشاركات فى صورة مستقيمة

« | »
اقرا احدث مداخلة فى هذا الموضوع »

03-15-2022, 04:59 AM

أبوبكر عباس

أبوبكر عباس
تاريخ التسجيل: 03-04-2014
مجموع المشاركات: 3479

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

شيخ أبو زيد أحمد العوض
03:59 AM March, 15 2022 سودانيز اون لاين أبوبكر عباس-الإمارات مكتبتى رابط مختصر ح أعمل ليكم زي هباني وأبو الزهور كل ربع ساعة بوست!! شيخ أبو زيد أحمد أعظم عظماء ود مدني: الشيخ سيرو، والبريد أبزيد أنا يا ناس بريدو. مطلع أغنية التراث دي لازم يكون اتقال في الراحل شيخ أبزيد ولو ما اتقالت فيهو برضو اتقالت فيهو. في الغالب أبوهو سماهو على أبو زيد الهلالي، لكن سيرتو في مدني فاقت الهلالي، وخلوني الليلة أونسكم بقصة بطل خانته الفئة المتعلمة ولم تضعه ضمن منهج التاريخ أو الجغرافيا أو الأدب، أحكي ليكم قصته كما أتخيلها وهي حقيقية في مضمونها كما ونسني بها لاحقاً ولدو الوناس اليانكي صلاح أبو زيد ومعلومات من ونسات سابقة مع صديقي الوجيه حسن أحمد سليمان ود ود أخو شيخ أبزيد. أتخيله في الأربعينات قاعد في سوق مدني وهو شيخاً للجزارين، وبيل غيتس زمانو في البزينس، وأستثمر في الأراضي وأشترى معظم أراضي ود مدني، ممكن يهدي ليك واطة، لكن نهائي لا يبيع؛ واحد من أهلو قال ليهو دايرك يا الشيخ، تمشي تشهد معاي عندي واطة داير أبيعها، رد ليهو الشيخ؛ دي جريمة قتل ما بمشي أحضرها. في مجلسو سمع ليهو طرطشة كلام؛ الحكومة ناوية تبني مدارس ثانوية زي مدرسة وادي سيدنا ومدني مرشحة والشمالية أو كردفان برضو مرشحات. طنطن الشيخ؛ مدني مرشحة؟! مدني ما مرشحة، مدني موشحة أكيد بالمدرسة، ح نبنيها هنا في مدني واستنشق بأنفه هواء منعش من شرق الله البارد. ما كمل قهوتو وطوالي للمديرية عشان يقابل المفتش الإنجليزي، أدوهو مواعيد تاني يوم. اليوم داك ما نام وشغلت المدرسة الموعودة كل كيانه، كان يحلم بوطن محجوب شريف قبل ميلاد محجوب، يحلم ﺑﻴﻬﻮ ﻳﻮﻣﺎﺗﻲ ﻭﻃﻦ ﺷﺎﻣﺦ ﻭﻃﻦ ﻋﺎﺗﻲ ﻭﻃﻦ ﺧﻴﺮ ﺩﻳﻤﻘﺮﺍﻃﻲ ﻭﻃﻦ ﻣﺎﻟﻚ ﺯﻣﺎﻡ ﺃﻣﺮﻭ يملك زمام أمرو بالتعليم، تخيل وحلم في منامه تلك الليلة بأن تقوم المدرسة مكان أرضو بضفة حنتوب، بطّل شغلتو وبقى كل يوم يحاحي بالمديرية والخرطوم يحاول يقنعهم بأن تكون المدرسة الموعودة بمدني بمزارع حنتوب، وأعلن أمام الملأ بتبرعه بأرضه لصالح المدرسة وتعهد بأن يقنع الآخرين إما بالتبرع أو البيع وقد فعلوا منهم أزرق طيبة الكبير وآخرون، خواجة إلتفت للخواجة الجمبو وقال ليهو: يا أخوانا، الزول دا البفكنا منو شنو؟ رد زميلو؛ البفكنا منو؟ نبني المدرسة الثانوية الحلم، ونبنيها في أرضو الوهبها لينا في حنتوب. اليوم داك الشيخ نام قرير العين وشاف في منامو نور أضاء للشيخ عتمة فرقان وقرى البلد وأنقذ آلاف الأسر عبر السنين من الجهل والفقر. ولو تتبعنا خير المدرسة دي بنلقاهو في أي بيت سوداني عشان كدا مولانا قاضي المحكة العليا السابق محمد أبو زيد أحمد كتب في عنوان كتابو عن والده: أبو زيد أحمد العوض سيرة رجل وتاريخ وطن. الشيخ قاعد في دكان أبو العلا بمدني، جاء داخل صبي، والشيخ جنو وجن يلقى أولاد صغار بتحاوموا وقت المدارس في السوق، قال ليهو يا ولد، ما لك هنا؟ قال ليهو اشتغلت جديد مع عمي أبو العلا، ردّ الشيخ؛ وما لك ما بتمشي المدرسة، قال ليهو مجموعي ما دخلني المدارس الحكومية الوسطى، مسكو من يدو وجراهو برّة الدكان وقال ليهو من دربك دا تمشي مدرسة أبو زيد لأستاذ بحيري بقبلك. الصبي من أبو زيد الوسطى دخل حنتوب وكلية الطب وأصبح لاحقاً أخصائي كبير، ونفس الحكاية دي تكررت مع كثيرين ساهم الشيخ في تغيير مسار مستقبلهم. سنة ستة وأربعين كان ماري بالشارع لقى أطفال في سن سبعة وتمانية سنين بلعبوا في الشارع، قال ليهم ما لكم يا عيال ما مشيتوا المدرسة؟ قالوا ليهو المدرسة ما فيها خانات وقالوا لينا تعالوا السنة الجاية، قال ليهم تجوا بكرة لبيتي الفاتح في المحطة وكلموا أي واحد ما قبلوهو السنة دي يجي هناك، مشى رتب البيت وجاب ليهو مدرسين وفتح مدرسة أبو زيد الأولية وكان ود العاقب أول مدير لمدرسة أبو زيد الاولية ثم بعدو محمد الأمين حامد الماذون أبو كوارة. المفتش قال ليهو تفتح مدرسة ساكت كدا من غير تصديق؟ قال ليهو بفتحها وبكرة دي بمشي الخرطوم أجيب ليك التصديق، ابتسم المفتش وتعجب من عشق هذا الشيخ للتعليم! نرجع لتاريخ مدرسة حنتوب، معقول يا أخوانا، تتبرع بأرض على ضفاف النيل الأزرق، أرض تفتح في مواجهة مديرية أغنى مدينة بالسودان لصالح مدرسة!! أرض لو دفعوا ليك مال الدنيا لن تبيعها، لكن تتبرع بها؟! أيوة معقول وعملها شيخ أبو زيد أحمد العوض ومعه مجموعة من أعيان مدني والجزيرة، عملوا بجهد لانجاح حلمهم، وما كدا وبس، كان له القدح المعلى هو ومجموعة الأعيان في قيام المدارس الأهلية بمدني وقيام جامعة الجزيرة وجزء كبير من أراضي جامعة الجزيرة حقتو، أرض شركة مواصلات الجزيرة يقال كانت حقتو، أرض المقابر حقتو وتبرع بها وكان حافر فيها بئر قبل تصلها شبكة المياه، جزء من أراضي مدني الثانوية حقتو، تنازل منها مقابل تصديق بمدرسة وسطى وكانت ولادة مدرسة أبو زيد الوسطى وما زالت المدرسة موجودة جنب بيتنا في بانت في مربع 174 مدرسة أساس باسم؛ مدرسة أبو زيد أحمد، ولو ربنا مدّ في العمر بنعمل ليهو تمثالين واحد في مدرسته ببانت والتاني قدام مبنى الحكومة في شارع البحر في مواجهة مدرسة حنتوب الثانوية سابقاً وكلية التربية حالياً. يعني باختصار؛ الأكل في مدني من شيخ أبزيد، وعدد كبير ساكنين في بيوتو، واحدين بدفعوا واحدين مجاني وحق القفة منو، والتعليم حق أبو زيد ولو سيد الأمانة شال أمانتو؛ نومتك الأخيرة في ضيافته. موش بالله، ليها حق الفنانة تقول؛ الولادة من بعد أبزيد كفى. البوست مهدي لعميد أسرة آل أبو زيد مولانا محمد أبو زيد ولصديقي الدكتور أمير عبد الرحمن أبو زيد ولكل آل أبو زيد بمدني. * سيرة الشيخ كاملة والمعلومات بدقتها موجودة بكتاب: الشيخ أبو زيد أحمد العوض سيرة رجل وتاريخ وطن تأليف: مولانا محمّد أبوزيد أحمد

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]