|
|
 Re: لو سمح مولانات المنبر العام والبنقو والكم (Re: muntasir)
|
سلامات منتصر ..
الانصاب والازلام دي دي ياها الكرتلة واليانصيب والحريق المطعم..
ودي على وزن سؤال الباشمهندس محمد الشيخ مافي ليها قانون عقوبة..
فزيها وزي اكل الميتة والدم ولحم الخنزيـر ..
لكن ناس جنابو محمد عبدالكريم شرعوا ليها الجلد والمصادرة ..
حصل يا منتصر شف ليك كشة بدعوى الانصاب والأزلام ؟!
انا شفت :؛(
بعد صلاة العيد جنب مقابر عبدالمعروف كنا مباشرة بنطلع نقعد في قضيب السكة حديد الشاقي الحلة..
تحت السكة حديد كان بيقوم سوق عيد مؤقت محدود بالساعة 10 يلعب فيهو الاطفال المراجيح ويشتروا الحلاوة والصفافير وغيرو ..
وفوق السكة وعلى مساحة كان يتجمع الأكبر سناً قليلاً ويقيموا نادي قمار مؤقت..
تخطط فيهو السيجة على الكراتين وألواح الابلكاش البيجيبها العروب معاهم
ويفرش فيهو الليدو ويُرمى فيها الزهر بعلبة الصلصة .. وتُقد فيهو الكرتيلات وتُجمع فيها الطراريد والريالات وابوقرشين ...
وهو سوق محدود لغاية عشرة برضو..
وبعده ويتصيد الخاسرون المشاكل والعراك ..
ويلوذ الرابحون بحماية المشاهدين والمتفرجين وينعم الجميع بالداندورمة والبسكويت والزبادي البارد..
وينقضي الغيد في سعادة وهناء ..
في جو زي دا
جات جماعة كدة مسمية نفسها شرطة شعبية صباح العيد ..
خمت ليك كم بدوي كدة وكمين شافع ابتدائي ومتوسطة..
ومحصلة الامر
عساكر الشرطة الشعبية نالوا من الشفع عيدية عبارة عن كم طرادة وجنيه وعشرة جلدات تاديبية حنينة ..
ولاس فيجاس تطهرت من الأنصاب ..
شكراً حمدوك
|
|
 
|
|
|
|
|
| |
HAIDER ALZAIN
فيس بوك
تويتر
انستقرام
يوتيوب
بنتيريست