الأمين العام للضرائب الجديد فتح الرحمن جاويش يجبر مسيحية لإرتداء الحجاب

Quote: من امبارح بافكر اني اكتب بوست اعبر فيه عن مدي صدمتي بخبر الامس عن التعيين الجديد للامين العام للضرائب استاذ فتح الرحمن جاويش وكنت ما عارفة اكتب بوست غاضب ولا ساخر ولا متأسف ان دي نتائج التغيير بعد الثورة. بس هو الحقيقة من كتر الصدمة بالخبر قررت اني انام علي امل اصحي تاني يوم الاقيه حلم (كابوس بالاحري). المهم صحيت اليوم التاني اتأكدت ان الخبر حقيقي، وخليني اوريكم ليه مصدومة. من حوالي ٤ سنوات كنت شغالة في الشركة اللي الشخص المذكور اعلاه كان يعمل نائب مدير عام فيها ، وبعد سنتين ونصف من العمل في الشركة قرر السيد الموقر انه يوقفني مرة في الممر ويسألني بوجه جاد جدا ليه ما لابسة طرحة. الحقيقة انا افتكرته بيمزح معايا ، قمت ضحكت كده وردي كان اني انا لا البس طرحة من ما اشتغلت في الشركة (بحكم اني مسيحية ، علي اساس ان ده ما كان معلوم بالنسبة ليهو 😏) وفهمته ان ده كان اتفاقي من ما اشتغلت في الشركة مع الموارد البشرية منذ امضاء العقد وعلي اساسه انا لي اكتر من سنتين ما لبست الطرحة. المهم ان رده كان ان دي لوائح الشركة ولازم البس طرحة، قمت رديت عليه بكل احترام باني اتفقت من البداية مع الموارد البشرية علي كده وعلي الاساس ده قبلت الوظيفة، قام قال لي الكلام ده مكتوب (ذكرني عادل امام: انا اسمى مكتوب، لأ، طيب) وطبعا كنت حافرط من الضحك ومسكت نفسي بالعافية ورديت عليه ان ده كان اتفاق شفهي، بس اكيد ساري بدليل ان مافي زول سألني او وجه لي اي ملاحظات قبل كده. مشي وسابني وقلت خلاص انتهينا من القصة دي. اتفاجاء بعد كم يوم ان جاني استيضاح من الموارد البشرية بالايميل .. برضو رديت عليهم نفس الرد، قاموا ردوا ان دي تعليمات الادارة العليا .... قلنا خلصنا برضو ، بس قاموا رسلوا لي انذار لارتداء الطرحة، المهم رديت عليه زي ما موضح في الصور... قام جاني انذار تاني ورديت عليه برضو زي ما موضح في الصور...بعد كده بعت لي مرسال يقول لي البسي الطرحة لان الموضوع ما عنده علاقة بدينك لأن رهباتكم بيلبسوا طرح عادي في الكنائس وفي مسيحينين كتار بيلبسوا طرح كنوع من الاحتشام وتم تهديدي بالفصل في حال استلمت الانذار الثالث...هنا كان خلاص الموضوع فات الحد وعدي مراحل التنمر لعدم احترام كمان للثقافة والعقيدة ، قمت مشيت مكتب العمل واشتكيت...بعد جلسات كتيرة نروح ونجي ويجيبوا اللوائح ا، وانا اثبت ليهم ان حتي لوائحهم ما بتجبرني علي ارتداء الطرحة ، اخيرا جاء قرار مكتب العمل في صالحي وطبعا ماقدروا يستأنفوا لانهم كانوا حيدخلوا روحهم في متاهات تمييز وعنصرية...طبعا ما محتاجة اوصف الحياة بقت عاملة كيف في الشركة بعد ما (علي حسب كلام الادارة العليا) اني احرجتهم. القصة دي لما حصلت زمان انا شعرت بالظلم بس لما اخدت حقي شعرت بالانتصار...امبارح شعوري بالظلم والخذلان اتضاعف لما لقيت الظالم بيتكافاء. قصتي مع الشخص ده غير انها بتثبت انه تمييزي ومتعصب ومستغل للنفوذ، بتخليني اتسائل اذا كرس طاقات شركة ومواردها ومحاميها علشان يكسر موظفة واحدة، ده ممكن يعمل شنو في حتة زي الضرائب اللي اصلا معروف عنها مصائب. طيب خليني من قصة الطرحة، ده شخص تم احالته علي المعاش وطلع من الشركة القديمة بعربية هدية (غيرها قبل المعاش بكام شهر علشان متأكد انه حيدوها ليهو فجاب واحدة جديدة) وحفلة في روتانا اتكلفت ٢ مليون (مليار بالقديم) وعليه سلفيات للشركة، ولنفترض ان دي كانت قرارات الادارة العليا لتكريمه، يبقي الأسئلة التاليه محتاجة اجابة ١- هل تم تعيينه لتعففه ونزاهته؟ ٢- هل تم تعيينه لكفائته؟ بعد ٦٠/٦٥ سنة من عدم الانجاز في النظام السابق، فجأة تم اكتشاف كفاءات مدفونة يعني ولا كيف؟ ٣- لعدالته المطلقة؟ ٤- اسمه رنان مثلا ولايق علي المنصب؟ الصراحة ما عارفة رئيس الوزراء ومستشارينه ديل بيعملوا اي نوع من انواع الbackground check ولا الموضوع صاحبي وصاحبك واخوي واخوك؟ انا لسة ما ذكرت القصص التانية زي سلفيات الشركة، ولا العطاءات، ولا المحسوبيات، ولا الانذارات المتعسفة ضد الموظفين (بس علشان مزاجه كده) ، بس دي ما شغلتي وما عندي وثائق تثبت، بس المفروض الجهات اللي بترشح تعمل شغلها وتتحري مش تشوف الcv وخلاص كده (بالمناسبة كلنا بنكتب علي روحنا حاجات خطيرة في السيرة الذاتية ).