احزاب المركز اتهموا الجبهة الثورية بالمحاصصة وهم غارقون فيها حتى النخاع

Quote: السبب واضح يا محجوب اسي لو اختاروهم كلهم من القبائل العربية حتشوف المنبر ده والانترنت كلو عجاجتو واقفة في السما والعكس .. اصلا البوستات الاستباقية للموضوع ده بالذات في المنبر ما وقفت كلو كلو في بقية الاقاليم درجة الحساسية اقل بكتير عدا مناطق الحرب وهو شيء مفهوم كون الحرب نتجت بالاساس عن ظلامات من هذا النوع فكيف تقوم ثورة وفي اول الطريق تغلط نفس الغلط الوقعو فيهو الناس القبلها؟ الجبهة الثورية والحركات المسلحة موضوعهم مختلف تماما من الاحزاب المدنية ، مفروض هدفهم الاول حاليا يكون ايقاف الحرب وحل مشاكل النازحين وتفكيك المعسكرات وفق حلول معقولة ومنطقية تراعي جميع الاطراف ، بعد داك يلتفتوا لممارسة السياسة طالما في ناس من مناطقهم او مجتمعاتهم ممثلين تمثيل عادل في الحكومة ، اي انتفاء التهميش السياسي وهو احد انماط التهميش وليس كلها ، بعدداك يقعدوا مع الحكومة ويشوفو يزيلو بقية الانماط والظلامات المتراكمة دي كيف وكيف تكون الترتيبات الامنية ووضع المليشيات والتمييز الايجابي وكل ما من شأنه ازالة اثار الماضي. بالطريقة دي الحركات ليست معترفة بأي شخص من مناطقها سوى نافذيها فقط هم من يجب ان يشاركوا وده الشي السيء الخلا الناس تقيف ضدها. ما ممكن تكون عسكري ومدني في نفس الوقت !