Quote: ممكن أن تستمر عملية النقد، وقد تصاحبها حملة أضعاف/ السخرية من قيادات الحرية والتغيير، وتخوينها، ومتابعة عملها بتربص مفضوح أحيانا، وبالاستناد إلی أوجه الضعف البائنة عند قيادات الحرية والتغيير أحيانا أخری، فما هو الناتج المتوقع...؟هل سيؤدي هذا الأمر لتحريك الشارع ليأخذ زمام الأمر ويطرح قيادة بديلة تعيد تصحيح المسار...؟
ح ابدأ من نهاية المقتبس واقول عودة الثورة لمربعها الاول ممكن جدا. ح يتم عن طريقين الاول هو خيانة العسكر للشريك وبالتالي الشارع بتقويض الاتفاق والانقضاض علي الثورة إما بثغرات الوثيقة نفسها او بعدين لما الحبل يبدأ يضيق حوالين اي من رقاب العسكر ومحورهم ودولة الكيزان او كلهم مجتمعين. الثاني هو قوي الاعلان تحيد عن مسارها كليا والالتفاف علي مطالب الثوار سواءا كان بعدم تحقيق مطالب الشارع الآنية ممثلة في التحقيق في المجازر والمدنية او تمرير وموافقة علي قرارات تخدم مصالح حزبية متقاطعة مع مصالح العسكر ومن ورائهم. يعني الاحتمال وارد. في نقطة أفتكر مهمة واجب الوقوف عندها وهي عدم الشفافية والضبابية المغلفة بإنه ليس كل ما يعرف يقال!! قصة إنه مكون قوي الحرية كبير وعريض وبالتالي الاختلافات قد تحصل فيه لتباين المدارس والتوجهات والدوافع عند المكون دا كورس الثوار ما مفروض يشيلوا وما مشكلة الشارع.. إرتضي مكون قوي الحرية القيام بدور مقابلة العسكر لتسلم السلطة وطلع من المقابلة شريك والشارع اتقبل اول إخفاق. لما واصل في دعم ممثليه بمليونيات وقيام دولة الاعتصام وعصيان مدني شامل واضراب سياسي عريض وناجح وقدم الالاف من خيرة شبابه شهداء وجرحي , مغتصبات ومغتصبين واسري , كان ينبغي علي ممثلي التفاوض الارتفااااع لمستوي المسؤولية مش الاستكانة طالما الرصيد موجود والدفع وقتي وبدون تاخير وبشيكات علي بياض. لما ثمن الاخطاء يكون ارواح يبقي النقد ما ح يكون طبطبة. شبهت قبل إتخاذ أي قرار او خطوة من قوي الاعلان بنكتة القرد مع شجرة اللالوب. ما تبلع قبل ما تتأكد انه الشارع ح يلقي ليها مخرج ول ل ا. الليلة اللالوب كثر في بطن الشارع والانتقاد دا هو تأوهات وشهيق وصريخ علشان يطلع. من المعيب انك تبلع للمجلس وتطالب الشارع ما يتأوه ولو حصل ما يكون مسموع. الليلة ما ح نبكي علي اللبن المسكوب لكن لازم نعرِّف بمواقفنا وخيراتنا , وبرضو ماشين في السكة نمد.---- المشهد كان فيه لجنة الكيزان العسكرية ومن ورائها كل المؤسسة الامنية ودولة الكيزان بأبعادها عمق وطول قصاد قوي الحرية والتغيير ومن ورائهم شارع ثائر عريض مستعد يسقط الكيزان مليون مرة وبالسلمية. اما الليلة والحمدلله علي كل حال اضحي المشهد يعج بالنطيحة والمنخنقة والمتطفلة والأكلة حق الناس والمابتستحي ولا بتخجل والغام وخيالات مآتي عميلة قصاد قوي الاعلان والشارع وعليهم المشي بينهم وتوفيق اوضاعهم والعسكر ودولة الكيزان في فرح يرفلون.
Quote: هل هذا هو الطريق السليم، أم أن عليهم العمل علی اسقاط الاتفاق وما تنتج عنه من حكومة وأجهزة لأنها لن تستطيع أن تفعل شيئا في الواقع...؟باختصار شديد؛ ما العمل، وما هو واجب المرحلة
الطريق دا تم أختياره يا استاذ فيصل ودرب ح نمشيهوا كما رأوا. وثيقة دستورية اقنعونا بانه فيها الحل علي الاقل لاغلب السموم لو ما كلها , ومحاصصات قالوا قد تفيد. بس بعدين السؤال الجرئ مفروض يكون هل الشارع ح يكون تاني حاضنة؟ ح ينقسم؟ ح يتحد في اسقاطهم كوووولهم عسكر واحزاب وحركات وكل من شارك؟ ام ح يقبل بانه دا قضاء وقدر زي ما أتحمل 30 سنة وياخد بكيتو ويقبل بفتات (الكعكة) ويتمسح بسكرها الناعم زي الهبوط الحصل ويتناسي بيه مرارات ما أتجرع!؟ .اللالوب والله كان كبار وعريض وعليهم يتحملوا آهاتنا وصريخنا لانو حلاقيمنا كبيرة وما اظن نسوا علا هتافاتها في الشارع ـ تسقط بس , الدم قصادوا الدم ومابنقبل الدية . مدنياااااااااو - لما كانت بتشق ضلام الليل وبترجف الكيزان. اخيرا.. مجرد سؤال: كم من الشهداء والضحايا (عدد) كانوا محتاجين عشان يوقفوا التفاوض دا من اساسه ويرجعوا لمسار الثورة والمربع الاول ويقولوا لا لا لا يا التسليم الكامل يا مافيش؟. ربع الشعب نصفه تلته ام كوووله؟؟؟؟ ام لا يهم. يااخ قدمنا الالاف للكيزان من سقوط شهداء ونزوح اسر. شطر بلد ومشردين مالاقين حتي لمعسكرات نزوح في وطنهم.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Mutasim Idris
فيس بوك
تويتر
انستقرام
يوتيوب
بنتيريست