|
|
 Re: يوسف حسين😭 (Re: عبدالمنعم الطيب حسن)
|
اعجب كيف تحتمل الضفة الاخري هذا الجمع الثلاثي؟بل اتساءل عن سعة تلك الضفة. مثلا يعني عندها أمكنة تستضيف الضحك و رنة العود و الصمت الناطق؟ الوسامة و فراشة الريح؟ مش كدا و بس بل كيف في سنوات خلت استضافت اليوليويين؟ عبد الخالق و الشفيع و نجوم اخري تهدي القمر الي بعض من وسامة بها لا يكون قمراً معشوق؟ النار تشتهي من يشعلها حتي يستقيم أوارها و لتكون ناراً تطعن سيمياء البارد الخجول و هي ، بذاك الجشع، تومة الضفة الاخري (الموت ان كان لهذه المفردة من معني!). تلك الضفة تعرف بيتمها و انقراض السلالة و رائحة الإبط و لكن لضرورة المعقول ما يجب ان يكون يلزمه ان يكون حتي نستمهل القيامة بعض وقت نري الوسامة، وسامتنا، في المراة عقب ازالة شعر الحنين أسفل الذقن!! يا للوسامة و هي تخطو فوق عتبات العمر و هو يحبو علي عتبات الغروب.
تلك الضفة لا ترتوي، ابدا لا ترتوي، لنقص فيها و لازما لها حتي تكون ضفة تعيد صدي الديالكتيك في عطشه السرمدي! و بعدين لازم يكون في عبد الخالق و مايكوفسكي و التوسير و سعاد و فاطمة و علي فضل و ناس الهبة الحاصلة في السودان و و و و بس عطش الضفة دي نعمل معاهو شنو؟ سوءال أنطولوجيا بس مفضوح الإجابة. التاريخ ما عندو نهاية و الضفة ما بتروي!!
لسنا و لا البشرية معنية بسؤال من الاول. قالها درويش:
لم نولد لنسال
كيف كان الانتقال الفذ
من ما ليس عضوياً الي العضوي
قد ولدنا كيفما اتفق
و انتشرنا كالنمال علي الحصير
يوسف حسين كان ذاك النمل المعني بجماليات العلاقة بين بلولة التربة و جفافها حتي يكون للنمل مملكة يطاءها الفيل!! يا خي دا زول عجيب! ينحاز الي النمل و هو يعشق بلولة التربة!
بعدين يوسف دا تعريفو و توصيفه بفيض علي بلادة حدود المكان و جغرافيا الخطاب با الضبط زي الأدوات الضفة الاخري شرعية الوجود كضفة لا ترتوي!! والله مانديلا و شهدي عطية و محجوب شريف و غائب طعمة فرمان ستروا عري تلك الضفة!! بس هي ضفة تحتاج اكتر من شواطيء لتكون عشان كدا يوسف حسين لازم يكمل ذاك النقصان حتي يكون الاكتمال دايما يعرف بنقصانه! دا ما الديالكتيك القال بيهو ماركس و هو ابدا ما كان ماركسي. بالله في اكتر من رحيل يوسف حسين حتي يكون للمعني معني!!
ما يوسف و رهطه دايما مهتمين بجماليات المعني قبل تاسيس اناقة السوال!
كان الصمت قبل ولادة اللغة و صوتها و لذلك كانت الالهة التي ابدا لم تنطق. و عشان تنطق جابت الرسل و ابليس فكان الأنبياء و الديانات و اللغة بصوتا و امروء الغبي و المتنبيء و ابو نواس
يوسف حسين كان ابن المبتدأ. كان اللغة لمن ما كانت بالضبط زي ماركس و درويش كلهم كانوا كار (دي كلمة ريفية جداً و تعني peers بالانجليزي) عشان كدا بلبي، زي حزبو، وعي الضرورة، من غير حياء و في كامل اناقة صمته!!!
يا زول ناس يوسف حسين ديل دايماً بكملوا الناقص حتي لو كان رحيلهم حتي يكتمل المعني ويختال!!
ما بحزن علي يوسف و لا علي عم تجاني و لا علي فضل ببساطة لانو الضفة الاخري تحتاجكم حتي تكون ضفة بمعني و خيلاء!!
الصورة بتقول الماضي و صمته و عتامة المعني و صمت القول. عشان كدا نقول ليوسف حسين في بهاء تلك الصورة ياخي سلم لينا عليهم و قول ليهم حزننا عليكم فاكهة الوجود و الحياة و حزبكم الأنيق !
طلب اخير يا زميل: انا عارف انو حموك الفقراءبماءهم الفقير كصلاة بدون وضوء و عطر الا عطر الفاقة و الكان عطرك الباذخ طول عمرك يا زميل قول لنقد و عم تجاني أتيتكم بصمتي الناطق لاستنطق صمتكم و تهمسوا من خلل سرمد تلك الضفة : تسسسقط بس و بعدين الزميل نقد لازم ارجع لينا اللافتة الكان شايلة ذات مظاهرة في السوق العربي و هو في كامل اناقة النضال: حضرنا و لم نجدكم!!!!
يا زول ودعتك لمامون الوداعة كما بتقول امي زمزم التي أهدتني دربك و هي بامية بأناقة قمر الاربعتاشر!! يا زميل زي ما انتو بتكتروا في الضفة التانية نحن بنكتر هنا عشان نقول لضفتكم نحن ضفة واحدة شيوعيين بنشبه الصباحات الما عندها مغيب!!
اسف يا زميل علي هذا الكلام الممدود فأنت سليل الكلام نمن يصمت حتي يكون كلاماً عندو معني!
يا زول ودعتك الله و سلم علي الشلة الهناك و قول ليهم بذرتكم أثمرت !
صلاح الزين
|
|
 
|
|
|
|
|
| العنوان |
الكاتب |
Date |
| يوسف حسين😭 | عبدالمنعم الطيب حسن | 07-04-19, 06:54 PM |
| Re: يوسف حسين😭 | فيصل محمد خليل | 07-04-19, 08:09 PM |
| Re: يوسف حسين😭 | عبدالمنعم الطيب حسن | 07-05-19, 10:54 PM |
| Re: يوسف حسين😭 | عبدالمنعم الطيب حسن | 07-06-19, 02:34 PM |
| Re: يوسف حسين😭 | عبدالمنعم الطيب حسن | 07-06-19, 05:47 PM |
| Re: يوسف حسين😭 | عبدالمنعم الطيب حسن | 07-06-19, 09:16 PM |
| Re: يوسف حسين😭 | عبدالمنعم الطيب حسن | 07-07-19, 09:06 AM |
| Re: يوسف حسين😭 | عبدالمنعم الطيب حسن | 07-07-19, 09:49 PM |
| Re: يوسف حسين😭 | عبدالمنعم الطيب حسن | 07-08-19, 06:26 AM |
| Re: يوسف حسين😭 | Yasir Elsharif | 07-09-19, 03:53 PM |
| Re: يوسف حسين😭 | عبدالمنعم الطيب حسن | 07-12-19, 04:21 PM |
| Re: يوسف حسين😭 | عبدالمنعم الطيب حسن | 07-21-19, 08:46 PM |
| Re: يوسف حسين😭 | عبدالمنعم الطيب حسن | 07-28-19, 05:55 PM |
|
تعليقات قراء سودانيزاونلاين دوت كم على هذا الموضوع:
at FaceBook
| |
عبدالمنعم الطيب حسن
فيس بوك
تويتر
انستقرام
يوتيوب
بنتيريست