سلامات يا أبا النور كبر، أسمع يا أخوي؛ المداخلة من ثلاث محاور مرقمة، والتي أكرمتني فيها بالتخصيص أعلاه، مع إنها مهمة للكل. فمن بعد الشكر أقول لك: إنها مداخلة مليانة بالكلام الكتُر، أي بالمعhني التي ستحتاج للتوقف والتأمل الطويل فيها، ومغرية بالتداخل على أكثر من صعيد. الكثير مما فيها متفق عليه، وهناك أمور مشتبهات تحتم الحوار الجاد وريثما تنعدل الفهوم أو تزول الاشتباهات. وكذلك وبالتأكيد، فهناك القليل ولكنه مهم جدا، مما سنختلف فيه اختلافا يحتاج لتحرير وتبيان. المشكلة:- هذه القضايا كثيرة والوكت ممحوق وأجواء البوست تنذر بمزيد توتر وتتلبد فيه عواصف انفعالية.. فشنو، يومن ما، حانقوم نسل المداخلة دي ونحدد حدود الكلام الفيها.. فقط انصح الكل لقراءتها كما فعل صديقنا عبد الرحيم محمد صالح..
بس في حاجتين ما بنفاتن، في تلك المداخلة، وفي تعليق كبّر على تعليق عبد الرحيم.. مقنطرات تجاه المرام:-
١) كتب كبّر: "الشباب الذي يقود الثورة السودانية الآن شباب له وعي متطور في الحقوق والواجبات لذلك ستكون الثقافة الدستورية تصاعدية أي من القاعدة وتنطلق نحو القمة.. فاذا اتيحت لهم الفرصة لإدارة البلد سيحدثون الفرق ، ولأول مرة سيكون السودان في طريقه الى دولة المؤسسات والقانون لأنهم يعرفون ذلك جيدا اكثر من الأجيال القديمة، ولأنهم فوق كل شئ ينطلقون من ارادة حقيقية.. شباب سيكون الضمانة لمستقبل الإستقرار في السودان.."
٢) كتب كبّر: "هذه الثورة نجحت بصورة اكبر من الثورات المسلحة وألأساليب القديمة التي فشلت في خلخلت النظام.. الآن ثلاثة اشهر يا صاحب..خلخلت كل ضروس النظام المسوسة واجبرت النظام على خطوات عديدة في محاولة يائسة للبقاء..! وبنفس السلمية دي البشير ونظامه ح يكون تاريخ.. .... شباب واعي بانه يمثل الضمانة الحقيقية لمستقبل السودان.!"
وأما الثالثة (الأثافية الإسفينية) دي، فما بفوتها ليك بتن بتا: ٣) كتب كبّر: "الناس التي اعلنت انها قيادة تجمع المهنين: بقارة ، عطاوة ..يعني بالفضيح: ناس بريمة وكبر..ماذا انتم فاعلون يا حناكيش حق الكوارك والجعير والنياصة..!!" على بجملة الإيمانات يا كبــّر، الناس الانتا قاصدهم ديل سودانيين تجمع مهنيين ؤبس.. يمين إلا تجيب شجرة عايلة مخالفة لذلك.. عندّك ولا ما عندك؟ شجرة العايلة لازم تجيب.. تقدر تجيب ولّا ما تجيب؟ غير كدا!! تجمع مهنييين ؤبس!! هسّــع نقعد نجوعر ليك هنا لمّان تعرف الكورايك زاتو!! :)
أما بخصوص دي: {"حدث تدخل في الشكل الفني لهذا الخيط الذي تتابعه اعداد كبيرة وذلك بتعديل عدد المشاهدات في الخيط.. بالأمس الخيط تجاوز اكثر من ثلاثة الف مشاهدة.. واليوم ظهرا راجعته ووجدتها ثلاثمائة مشاهدة فقط.."}
ياخي أنا برضو ملاحظ إنو عدد المداخلات البتظهر في البروفايل تبعي، كل ما عليها يوم ماشة ناقصة!! أقول لك من ألفين وتلاتة والعداد واقف في أقل من ألفين.. مرة وصل قريب الألفين قربت أطالب بكري بمكتبة هههها، وكان ما أخاف الكضب؛ الشهرين ديل براهن أنا كاتب لي نص مليون مداخلة وهســّع دي المكتوب ١٣٨٠ فقط ؤبس!! أقول لك قولة: حســـابة المنبر.. تـــسقط بس!
بخصوص إرصاد الجو المنبري: وبمناسبة البررررد والجليد يا ناس كندا، وكمان عشان ما نكون "القندول الشنقل الريكة"، أهديكم هذا المقطع من مداخلة أستاذنا علي عبدالوهاب {"ما دام ما عاشين في نفس المدينة ممكن تتجمعوا مع بعضكم في جلسة سودانية في جو سوداني زي مجلس أهلنا الترابلة ( ما تقولوا ستاربكوس ) لأن الجو والبيئة مهم بالنسبة للمزاج العام وكما معاها وجبة فول مصلح أو قراصة أوعصيدة .. وونسة وحكاوي سودانية .. ومع شلة ظريفة ما بطال لو هناك حاجات خارج السياق عشان تعدل المزاج ويزيل الحرج ( ثقافة ترابلة) زمان أهلنا الترابلة كان يعزموا المتخاصمين على ليلة (بوقانا) يأخدوا كاسين وهاك يانمة وكلقيه ( يعني دوبيت بالنوبة) وكان مخصوص يزيدوا ليهم المعدل قرعتين ثلاثة أربع .. وتصافى القلوب .. ( آه يا زمن الجميل ) أو ممكن في اي يوم عطلة واحد فيكم يفاجيء الثاني بزيارة في البيت .. بدون سابق إنذار كمان عشان الموقف يكون بدون مقدمات وتجهيزات وردود وإجابات والزول في بيتو بيتنازل حتى لو مظلوم"}
وأما بمناسبة النقطتين بالأخضر والأحمر (والأبيض والأسود) فوق.. أهديكم هذا العمل الفنان.. شباب كاربين.. رباية طين، ولاد عازة وبيوت عزّة .. قلب واحد،وشلال من نسيج الدم.. سقط واحد، بقوم من التراب ميّة!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة