الكوز شاطر

Quote: أقرو الكلام دا كويس 👇🏼 تنبيه للشباب من واقع التجارب خلال الفترة الماضية في ناس يا شباب فاهمين المظاهرات والإعتصامات غلط، في ناس أول ما يتجمعوا وقبل ما يتموا مية نفر في الميدان يقوموا يطلعوا موبايلاتهم ويصوروا لايف وما عارف الهدف من كده شنو، كتير من الإعتصامات والمظاهرات ما نجحت بسبب التسرع في تصوير اللايف والنشر في قروبات آفرو ووصف لي وغيرها، حتستفيد شنو لما تحدد موقعك للشرطة وقبل الناس يصلوك تكون الشرطة سبقتهم؟ هدفك شنو لما تعمل مظاهرة وقبل ما تبقوا كتار تقوم تحرق كمية لساتك وتصور فيديو لايف وتنشر في القروبات الدروشاب مرقت الكلاكلة كتمت شمبات إنتفضت وتعزم الشرطة عشان تجي تفضك بعد ساعة؟ إنت عامل الإعتصام والمظاهرة عشان تكاوي الشرطة؟ إنت مشكلتك مع الشرطة؟ قبل سنوات عملنا إعتصام في جامعة الخرطوم سكتم بكتم خمسة ساعات ولما الشرطة عرفت الخبر الجامعة كانت إتملت عن بكرة أبيها بالطلاب المعتصمين. الهدف يا شباب من الإعتصامات والمظاهرات ليس الإحتكاك مع الشرطة أو تنبيهها أو مكاواتها وأصلاً ما عندنا مشكلة جوهرية مع الشرطة، أنحنا مشكلتنا مع الحكومة، الحكومة قاصدين بيها أصحاب الكروش الكبيرة والخدود الناعمة البكونوا نايمين في القصور تحت مكيفات الفريون وبرسلوا المساكين ديل يحموا ثرواتهم الدولارية مقابل فتافيت من الجنيهات، الهدف من الإعتصام والمظاهرة هو إنك تسجل موقف رافض للحكومة ورافض لشرعيتها وما عندنا أي مشكلة مع الشرطة وما هدفنا نحتك بيهم أو نوريهم مكاننا، هم أصلاً حيعرفوا مكان المظاهرة والإعتصام من مصادرهم بس وقتها بكون العدد بقى كبير.. وعوا الناس الما فاهمة دي يا جماعة. أنشروا وأنسخوا يومياً لحدي ما كل الناس تعرف. ( منقول )