|
يوم المرأة العالمى ** والحبوبا هى الركازه..
|
احبتى الغاليين اخواتى بنات الحاجه وام الزين كل عام وكل يوم وانتن جميعا بالف خير وكل افراد العائله داخل وخارج البلد الحنين نحتفل بعيد المرأة عموما .. وعيد الام فى هذا الشهر من كل عام التحيه للركازه .. للساس .. الحبوبه ست الوصايا والكفايا. حليلا الحبوبا البتشيل وتخت .. حليلا البتتكل فى العصايا وتجى تصبح وتطايب. حليلا شايلا الحليلا على المراح.. حليلا تتبن وتبتب وتغطغط عز البرد وفى الضلام حليل الدعوات الحنان .. يديك الفى مراضك ويخدر ضراعك ويسهل امرك وينور دربك و و و ..... كتير وحنين اسمحوا لى ان احيى كل حبوبا وكل ام حنونه ونتمنى جميعا ان نقتدى بحبوباتنا الما اتعلمن ولا درسن لكن كلهن من طرف مدرسة شامله التحيه للجميع وكل عام وانتم بالف خير **** حبوبا .. حبوبا لولايا.. لولايا.. كلام يونسنا .. قمريه قوقايه.. حجاك يدغدغنا.. حنيه وآلايه.. لهيجك السكر .. الحان ودوبايا .. دميعتك الجاريه .. فى الرايحه والجايا .. تجبر الخاطر .. زى غيمه مطرايا .. حضنك الدافى .. شجيره ضلايا ... لقيمه تسندنا .. فى بطينه صاصايا .. جقيمه فى جوفنا .. تزيل عطيشتنا .. وتروى حرايا .. رويحتك الحلوه .. تناجى جوايا .. هديمك البارد .. يغطى بردايا .. مسيحه من ايدك .. تزيل لمرضايا .. بسيمتك السمحه .. تضوى عتمايا .. كلامك الصادق .. يا يمه يا ضنايا .. عطفك الزايد .. بحسو فى حشايا .. دخريك فى الدنيا .. ابريق ومصلايا .. سبيحه من سكسك .. ودعواتك الغاليا .. حبوبا.. حبوبا .. لولايا.. لولايا .. ربى يخليكى .. وتشوفى لهنايا .. وتشوفى لهنايا
اسماء الجنيد مسقط والامنيات لكم دعوات حبوبات
|
|
|
|
|
|
|
|
|