أغنية عويناتك ترع لولي للفنان محمد الأمين في كل مقاطعها ما قاعدة تريحني بصوت محمد الأمين (رغم وجود بعض المقاطع تليق تماما بصوت محمد الأمين ولا أخفي هي وأغنية يا معاين من الشباك ما بقدر أكمل استماع لهما
كنت بدي أغنية عويناتك لعبد المنعم الخالدي له الرحمة
Quote: وانا بقلع شال هم فرقتك قلبي وبديها مصطفي سيد احمد
عثمان ..حبابك يا صديقنا في الجمال المخاتل..
بالعكس يا عثمان..
الغنية دي (شال هم فرقتك قلبي) اصلا حقتك مصطفى سيد احمد ، وحمدالريح قام نطا فيها جوز..!!
وعشان تحدث المفارقة ، مصطفى غناها علي الريتم بتاع الريقي ..وكتها ناس المزيكا في امسودان ، كانوا بيتريقوا على ايقاع الريقي .. بيسموهو ( الإيقاع الأعرج)..
في 1986 او 1987 ..مصطفى نزل كاسيت نادر للغاية..وكانت فيهو اربعة اغنيات (المسافة ، حسنك بديع ، شال هم فرقتك ، و بتقول لي الفراق مكتوب)..الأخيرة.. بتاعة (بتقول لي الفراق مكتوب.. اصلا بتاعة الفنان الجميل عبد التواب عبد الله).. في هذا الكاسيت.. مصطفى اشتغل ريتم بتاع ريقي ..زي الترتيب..وكان بيدي مساحة كبيرة للبيز جيتار..!!
موبالغة يا عثمان يااااااااااااااااااااااااااااااااااااخ..!!! مقولة تبكي في نفس الحتة البنجوعر فيها ...!!!
ياخي امسودان دي ضيقة بشكل..!!!!
وهو جنبك يا عيون ومشتهيك ياعيون..نحن بالريقي.. انتا بطريقتك..تختار نقارة..دليب..تمتم.. بس اختا لينا الريقي ده..!!
لا ادرى كيف كان سيلحنها الراحل وردى.. (مريا) رائعة صلاح احمد ابراهيم لكنها حتماً كانت ستكون احدى العلامات الفارقه فى تاريخ الأغنية السودانيه تماماً كما ( الطير المهاجر) ..التحية لصاحب البوست وضيوفه..
02-24-2016, 09:21 AM
Kabar Kabar
تاريخ التسجيل: 11-26-2002
مجموع المشاركات: 18537
ياجماعة.. انتو ما شايفين عصرتو على حمد الريح كتير؟
حمد كان فناني المفضل ايام المراهقة.. ولغاية الليلة عندو حاجات مافي زول بيقدر يشتغلها غير حمد الريح في ذات نفسو (شغل سليمان عبد الجليل/نحن راجعين في المغيرب ، شغل تايه الخصل، شغل الى مسافرة ، شغل الساقية ، شغل حمام الوادي..الخ)..ولكن..! غنية بفتش ليها بالسنين ، والغريبة معاي في كاسيت بصوت حمد..(ما تعودني اشوفك باسم ، وترجع تاني تداري البسمة).. بعد الليجند حمد الريح..كنت ، ولازلت ، بتمنى اسمعها بصوت فنان الشرق العظيم عادل مسلم..صحيح عادل متخصص من محمد الأمين وغادي..ولكن الغنية دي كنت بتمنى اسمعها بادائه ، وهو الذي ادى رائعة الطيب عبد الله ( الأبيض ضميرك)..!!
قال ليك : انا بتحمل هجر مواسم ، لو بتطيب خاطري بي كلمة.. يا الطليت في الزمن الحاسم.. يا الضويت بنورك ظلمة..!!
التحية لإبنتنا وصديقتنا الجميلة..رفيعة احمد عيسى وهي تنتبه لهذا الكنز العظيم...!!
ويا عادل مسلم ، والهادي الجبل..ياخي غنوا لي الغنية دي ياااااااااااااااااااااااااااااااااااااااااااااااااااخ..!!
ممكن نضيف تاني ياحمد عبد الغفار؟..
كبر
02-24-2016, 09:51 AM
Kabar Kabar
تاريخ التسجيل: 11-26-2002
مجموع المشاركات: 18537
عليك الله ، وامك ، وابوك ، وعمر البشير ذاتو..!! دي عملتها كيف يا حسن؟..
يازول اتا قايل خوجلي هاشم ده حيطة قصيرة ينطها أيتها مواطن..!!
ود الباوقة ارعى بقيدك يااااااااااااااااااااااخ..!
ياخي بايع البشير عشرة مرة ، شاتم دينق خمسطاشر مرة..!!!
الإ خوجلي ..!!
علي بالحلال يا ود الباوقة تجيب سيرة مصطفي مضوي ولا عيسى بروي..ضبح من الأضان للأضان..!!!
تحسبوا لعب ولا شنو يعني..!!
للدنيا والزمان يا ناس سودانيز اونلاين..الفنان الجميل خوجلي هاشم..ده الزول الوحيد القاموا غنوا غناهو الخاص ناس امثال مصطفى سيد احمد ، خالد الصحافة ، ومحمود عبد العزيز..والله صحي...!!
كنتو قايلو فات زمان.. رجعتو بي طعم الغنا..!!
شعوب كتيرة من دار امسودان ، بتفتكر انو الشغل ده بتاع الحوت ، ولكن هو اصلا بتاع فنان عطبرة الجميل.. اخونا الجميل خوجلي هاشم..واكتر ما نبتز بيهو رجرجة هذا المنبر وبغاث طيره.. انو حضرنا ، في عمرنا ، بعض من حفلات خوجلي هذا..!!
عليك الله يا حمد في داعي لجنس الهجايص دي يااااااااااااااااااااخ..!
التوقيع (واحد مواطن ساكت ، حاقد شديد خلاس..!!)
كبر
02-24-2016, 11:00 AM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
حمدعبدالغفار وشركاه سيبوا انا والاشواق اللحنها الراحل (حسن بابكر) اميز ناس ورشة الخرطوم جنوب والساكن حي الزهور ... دا عايز ليهو مفترع بحالو ... ببساطة شديدة محمد ميرغني من اكثر الفنانين الذين ليهم اكثر من ستة او سبعة اغاني تعتبر من اميز الغناء السوداني انسوا دا وركزو في كلام د. محمد بابكر دا كويس ..
Quote: لا ادرى كيف كان سيلحنها الراحل وردى.. (مريا) رائعة صلاح احمد ابراهيم لكنها حتماً كانت ستكون احدى العلامات الفارقه فى تاريخ الأغنية السودانيه تماماً كما ( الطير المهاجر) .
02-24-2016, 11:56 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
red]محمد ميرغني فنان قامة ولايختلف اثنان على ذلك ولكن انا استمعت الى اغنية { حنيني اليك وليل الغربة } والتي يؤديها الأستاذ محمد ميرغني استمعت اليها بالعود بصوت المتفرد { العاقب محمد حسن } عليه الرحمة كان الآداء مختلف ورائع ومدهش وعلقت هذه الأغنية في ذهني بصوت العاقب محمد حسن ومن بعد ذلك رفض عقلي الباطني تقبلها من اي كائن كان يعني لو غناها اي مطرب بشوف زي الدمعة البتكون مسبكة وقام واحد زادها موية تفقد هنا نكهتها وطعمها هناك تعقيدات كيميائية كثيرة هي التي صاحبت هذه الأغاني وشكّلت الوجدان السوداني خاصة جيلنا الذي لم يكن يسمع سوى الأغاني الذهبية وبالتالي حينما تاخذ اغنية ارتبطت في الوجدان بفنان معين يصبح من الصعب ان تنتزعها من هذا الفنان ليتملكها آخر وحتى ان أجادها الفنان البديل يظل هناك شبه رفض للجسم الدخيل على وجدان من استمعوا اليها سابقا او ربما لايحدث تطابق في الأنسجة فلا تجد الغنية القبول والكاريزما الكافية لدى المتلقي ان يغني آخر اغنية فنان آخر لاغرو في ذلك لكن ان تذهب كل الأغنية لغير الأب الشرعي فهذه معضلة هسي معقول انا اسمع اغنية الطير المهاجر بصوت القيقم ؟؟؟ هذه الأغنية بالذات ليست مرسومة على احاسيسي ومشاعري بل محفورة ومنحوتة على كل تعاريح الأحاسيس والمشاعر انا شخصيا مرة حاولت اغني اغنية بتتعلم من الأيام والله بعد شوية غنماية واحدة وقفت في الفريق مافي لهذا يصبح من الصعب ان تعيد تشكيل وجدانك وترميمها بطريقة مختلفة وبعيدا عن الأغاني فجنوب السودان كان جزءا من جيناتنا ووجداننا وانفصاله لازال يسبب جرحا غائرا في الأعماق
02-24-2016, 05:52 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
مصطفي السني فنان جميل...كنت اسعد بلقائه حين أزور صديقي المرحوم حسن ساتي باللندره....نجد مصطفي يحيط به ناس عباس حلفاية وامين ازيريق وعز الدين... وصديقي عادل مانديلا صهر المرحوم الشهيد علي الماحي السخي....بعد ان يكتمل عقد الاصدقاء وياتي صديقنا بكار ينداح مصطفي في تراتيل الغناوي المختارة بعناية لنطوي صفحة البدر اللندني بوعد قادم بلقاء أخر ...
02-25-2016, 07:23 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
Quote: سائل ربي يجهجك بالجمال والسماحة محل ما تقبل يااااااااااااااااااااااااااااااخ...
.
السماحة تفوت مداخلاتك المجلوة كالسجنجل دي تمشي وين ياخ كتر خيرك أولا على المشاركة الفعالة دي ياخ وما عدمناك وخليني أبدأ معاك بالمقدمة دي
الغناء دا سرو عجيب (معاي على الأقل) ياخ أنا زمان بكون شايل خبر بكاء وفي الشارع بكون ببكي وبغني في آن واحد فهو عندي أكسير الحياة في 2001 توفي أخي الأصغر وترك جرحا هائلا في نفسي وأصبح من الصعب علي أن أسمع الغناء ناهيك أن أغني استمرت المسألة لأكثر من أربعة سنين خلالها أصابتني التجاعيد وتكرمش جسدي وأبتليت بالكآبة فعرفت أنها من ترك الغناء فاستغفرت وتبت إلى الله وصادف أن كانت المدام قادمة من السودان قلت ليها جيبي أكثر شريطين ماسكات الجو فاحضرت هاجر كباشي ومعتز صباحي وكانت بالنسبة لي دربات ساعدتني في تسليك مشاعري وأذني وبديت ابحث عن أشرطتي القديمة لعظماء الغناء وبعد مدة شعرت بالدم جرى في عروقي وعاد إلي الشباب.
في ذكر أمسودان ياخ أمسودان الدولة دي ما قائمة على اقتصاد قوي ولا دين قامت على التسامح والطيبة فهي وسم على جباه أهل أمسودان ياخ نحن لو في بلد تاني بوست زي دا كان دخلنا بسببو السجن شغالين نقلع من دا وندي دا- ولو لا سماحتنا البورد دا نصو كان بكون في السجن برضو .ياخ زول يكون زعلان من زول يقول ليهو أنت أحلى من زهر الربيع ؟ كما في أدناه
أنا غايتو دي لا بديها لهاشم ولا حاجة بشيلا لي نفسي دي
هاشم أديهو ليالي الأنس
هل تعرف إنو بسبب الأغنية دي ومعاها جفيت ما بنت القالا عاطف عمر فوق أنا جيت أول الدورة المدرسية الخامسة في مدني وكمان قطعة سكر دي مسجلة بصوتي في إذاعة أمدرمان وتلفزيون الجزيرة ؟
الوقت داك كانت يا دوبا طالعة من الفرن بسخانتا .
طبعا هاشم خوجلي فنان مجيد وبغني بي عِرفة شديدة ومنجض شغلو تمام
غايتو جبرتوني أتكلم عن نفسي أعمل شنو مع الغناء الموت دا
02-25-2016, 08:42 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: لا ادرى كيف كان سيلحنها الراحل وردى.. (مريا) رائعة صلاح احمد ابراهيم لكنها حتماً كانت ستكون احدى العلامات الفارقه فى تاريخ الأغنية السودانيه تماماً كما ( الطير المهاجر) .
شكرا ياخ ودا ياهو السبب في فتح البوست وهو ليس تقليلا لأحد ولكن محاولة تخيل لأغاني جميلة كان يمكن أن تكون أجمل لو أداها أشخاص غير مؤديها الحقيقون أو هي قد تكون ضلت طريقها لفنانين آخرين أهو زي مريا دي كان ممكن تكون علامة فارقة في تاريخ الغناء خد مثلا أغدا ألقاك (السودانية الميلاد والمنشأ ) التي يتباهى بها المصريون بصوت أم كلثوم كان ممكن تقع في يد فنان سوداني ما يديها كل الجمال والهيبة الأدتها ليها أم كلثوم مثال تاني، أراك عصي الدمع، غناها فنانين كُثر لكن أنا بعتبر الكابلي أفضل من غناها
حمد لبد .. وكت ما عايز ترفعا نتوكل غلى الله و نرفعا
Quote: Galal E Omar من زمان يا حمد بقول لى اصحابى الاستاذ محمد الامين صوتو ما صوت غنا عاطفى .. اناشيد بس ... يقومو يشبكونى ليك .. و انتا شن عرفك بالغنا ؟ خليك فى طمبوركم و صفقتكم يا متخلف .. هسى دى مناسبة عشان اقول كل اغانيهو العاطفية نديها لى الاستاذ صديق احمد
02-27-2016, 11:01 AM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
Quote: وعلقت هذه الأغنية في ذهني بصوت العاقب محمد حسن ومن بعد ذلك رفض عقلي الباطني تقبلها من اي كائن كان يعني لو غناها اي مطرب بشوف زي الدمعة البتكون مسبكة وقام واحد زادها موية تفقد هنا نكهتها وطعمها هناك تعقيدات كيميائية كثيرة هي التي صاحبت هذه الأغاني وشكّلت الوجدان السوداني خاصة جيلنا الذي لم يكن يسمع سوى الأغاني الذهبية وبالتالي حينما تاخذ اغنية ارتبطت في الوجدان بفنان معين يصبح من الصعب ان تنتزعها من هذا الفنان ليتملكها آخر وحتى ان أجادها الفنان البديل
طبعا الأغاني بترسخ في الآذان بصوت مؤديها الأصليين
بس بمقارنة الأصوات ومقارنة أغنيات يؤديها الفنانون البدلاء ممكن تستشف ملائمة أغنية بصوت الفنان البديل والبدلاء ديل أنا بعني بيهم الفانانين من نفس المستوى والمرحلة الفنية
مثلا محمد الأمين أجاد نور العين بتاعة وردي لكن ما غناها أفضل منو لكن في نفس الوقت وردي غنى قسم بي محيك البدري بتاعة كرومة واعتقد إنو غناها أفضل من كرومة ممكن يجو ناس الحقيبة يقولوا لي اعتقادك دا ما صاح
على ذكر العاقب محمد حسن فأغنية الصخرة عصية على التقليد أمس شفت خالد الصحافة بغني فيها رغم الأداء السليم
لكنها تفتقد للدفء الذي يضفيه العاقب على أداء الأغنيات
02-27-2016, 11:23 AM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7209
هههههههه .. والله لقد فتحت لينا باب ما اظن يتسد ..
حمد "لبد" الريح .. وكأن أغانيه المجيدة وقعت تحت طائلة بيت الشعر القائل: وَلم أرَ في عُيُوبِ النّاسِ شَيْئاً كَنَقصِ القادِرِينَ على التّمَامِ..
وهكذا .. تمنيت لو غنى غيره العديد من أغنياته .. تمنيت وعلى سبيل المثال لو غنى محمود عبدالعزيز " الظروف يا حلوه دايما .. لي عيون حلوه بتجيبنا"
تخيلوا محمود عبدالعزيز وهو طالع بي " العيوووون العاجبه سيدها .. نحنا برضو بنشتهيها ..والضفااااير الحاضنه ليلنا ..شايله ضي افراحنا فيها " وذلك قبل ان ينزل بي " هاك قليبي وعزي ليلو .. والعيون .. الخ"
02-27-2016, 04:23 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: ن زمان يا حمد بقول لى اصحابى الاستاذ محمد الامين صوتو ما صوت غنا عاطفى .. اناشيد بس ... يقومو يشبكونى ليك .. و انتا شن عرفك بالغنا ؟ خليك فى طمبوركم و صفقتكم يا متخلف .. هسى دى مناسبة عشان اقول كل اغانيهو العاطفية نديها لى الاستاذ صديق احمد
ما للدرجة دي يا جلال ياخ هسه كمية العاطفة الفي بتتعلم من الأيام ووحيات ابتسامتك وشال النوار وزاد الشجون دي عاطفة نصاح
صاح في اغنيات صوت محمد الأمين زيادة عليها بطبيعة لحنها ورقة كلماتها
ثم ثانيا صديق أحمد رغم حنية الحانو لكن صوتو مرات رعد بس (ما شاء الله) أقوى من صوت محمد الأمين
(الخدود الشاربة من لون الشفق عند المغارب) زولا دا بجغمسا جغمسة الذين دخلوا المجلس الوطني؛ عليه يا حمد لبد شيلا اديها اي فنان بمعرفتك؛ ولو شفتا لينا طريقة للذكريات تكون ما قصرت مع مشاعرنا؛
شكراً حمد على البوست الظريف، المثال الجبتو لأغنية ثنائي النغم (الأصل + التقليدين) بيبين ليه نحن دايماً بنرتبط بالشئ السمعناهو في الأصل. السكتة الإتكلمت عنها بين (إتغيرت) و(أتنكرت) ما هي إلاّ اختلاف في الأداء والمتلقي العادي بدون ما يعرف ما هو الفرق، أضانو بتقول ليهو الحكاية دي ما ياها.
أكتر من التقليد، في كتير من الأحيان شخصياً بترتبط عندي الأغنية بتسجيلها الأول في الإذاعة ولما يجي نفس الفنان يؤديها بعد فترة ما بتريحني زي التسجيل الأول، الحكاية دي بتحصل معاي دايماً في أغاني وردي القديمة، لو أخدنا مثال أغنية (خاف من الله) غناها وردي في الستينات، وجاء مرة تانية أعاد تسجيلها بالتقنيات الجديدة على ما أظن في التسعينات ... صراحة ما بقدر اسمعها وبرجع لأغنية الستينات.
أما أغنية (حنيني إليك) يخيل لي لأنو لحنها العاقب بتكون بصمته واضحة فيها
شوف مثلاً الأغنية دي لإلهام الشرق، مش نفس العاقب واضح فيها؟
02-29-2016, 06:29 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
علي بالحلال يا ود الباوقة تجيب سيرة مصطفي مضوي ولا عيسى بروي..ضبح من الأضان للأضان..!!!
تحسبوا لعب ولا شنو يعني..!!
للدنيا والزمان يا ناس سودانيز اونلاين..الفنان الجميل خوجلي هاشم..ده الزول الوحيد القاموا غنوا غناهو الخاص ناس امثال مصطفى سيد احمد ، خالد الصحافة ، ومحمود عبد العزيز..والله صحي...!!
سلامات يا كبر يا خطير
ياخي خوجلي هاشم دا كلام تاني
فنان كبيــر مشكلته الكبيــرة بيحب عطبــرة شديد وما بيمرق منها
أنا اليوم الجمعه أفترعت بوست عن خوجلي هاشم
لانه فنان كبير وعنده الكثير بس يبطل كسل شوية ويبقي قريب من الخرطوم وما يغطس في عطبرة
Quote: وعشان تحدث المفارقة ، مصطفى غناها علي الريتم بتاع الريقي ..وكتها ناس المزيكا في امسودان ، كانوا بيتريقوا على ايقاع الريقي .. بيسموهو ( الإيقاع الأعرج)..
كنت عارف ده بوست ما بتغيب عنو وأهو جيت وأطربتنا
أبوالسيد ده تحسو بغني الأغنية كم سنة كده بينو وبين نفسو
ويظبط إيقاعاتا وبب كده يرميها :)
03-01-2016, 06:18 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
Quote: السكتة الإتكلمت عنها بين (إتغيرت) و(أتنكرت) ما هي إلاّ اختلاف في الأداء والمتلقي العادي بدون ما يعرف ما هو الفرق، أضانو بتقول ليهو الحكاية دي ما ياها.
أها شفت اختلاف الأداء دا ياهو محور البوست
يعني لما فنان يديك إحساس إنو عندو فرق (ولو ضئيل) بخليهوا ما يعمل اشباع لحني للكلمات هنا بتبقى مشكلة كبيرة بخليك تحس بشرخ في أضانك رغم سلامة الأداء بتاعو
لا بد الجملة الشعرية تنتهي مع الجملة اللحنية كما هو مصمم من قبل الملحن حتى لو كان الفنان نفسه
والمسائل دي بتعتمد على الايقاع الداخلي للفنان ومرونة صوتو واحيانا على الاوركسترا المصاحبة .
اغنية الهام الشرق فعلا واضح بصمة العاقب فيها اللحن الهادي المشبع تطريبا والبت دي ذاتها كانت غناية شديد وبتغني بثقة وثبات ما عارف اختفت وين
03-02-2016, 06:11 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
هو ذلك صديقنا حمد.....الايقاع الداخلي للمؤدي....بساط من روح يتمدد عليه اللحن جوابا وقرارا....وكأنه امواج تسري مسراها تحت ظل غمائم المعاني...توقظ منامها ...تعطر حسها واحساسها...تخرج منه قلائد من جمان واشجان....لتعصف بخواطرنا وتاخذها ذات اليمين وذات اليسار....نبحث عن انفسنا لنجدها في تلك اللحظة الهامسة... فيكف نكون...ومتي... وبعد ذلك....
03-02-2016, 07:08 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
Quote: الايقاع الداخلي للمؤدي....بساط من روح يتمدد عليه اللحن جوابا وقرارا.
والذي نفسه بغير إيقاع داخلي متناغم لا يمكن أن يؤدي أداء جميلا
والمسألة أيضا تنطبق على الفرقة المصاحبة لازم يكون عندهم الإحساس البخليهم يرتقوا مع الفنان كلما ارتقى اثناء الأداء
موش مجرد نص موسيقي يتم تكراره
في تسجيل لأغنية معللتي للكابلي (ما لاقيهو هسة) بتلقى فيهو الكمنجات شغالة في الخلفية شغل رهيب أثناء أداء الكابلي لأحد المقاطع لدرجة إنك بتحس بمزيج نغم يسري في جسدك
03-05-2016, 01:03 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
حسين شرف الدين طبعا أفضل من غنى لعبد الوهاب الصادق لكن عبد الوهاب الصادق دا ما بتقدر تشيل منو أغنية أبدا وتديها لزول تاني صوتو متفرد وما خلى فرقة في أغنية من أغنياتو
خد مثلا ست الريد عبد الوهاب ببالغ فيها عديل، داخل صوتو في صوت تاني مرافق بعمل هارموني ما عادي عشان كدا سحروهوا (أنا ما معاهم )
03-11-2016, 09:49 AM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
ياخي البوست دا خلانا نفصح عن صراع وجدانيات بين الأداء القديم والجديد وبين الآلات القديمة والحديثة وشغلة داخل فيها التوزيع (إذا وافق الدكتور عبد الحليم على هذه المسميات)
بالله نستمع لأداء فيصل عبد اللطيف (فيصل الصحافة) لأغنيات الطيب عبد الله وعثمان حسين وصلاح مصطفى
أنا شخصياً (وهذا رأي) أفضل سماع أغنيات هؤلاء الفنانين الثلاثة من فم فيصل عبد اللطليف
وبالله لو عندك تسجيل لفيصل الصحافة في أداء " تمد الليد ونتسالم " في حفل استقبال الطيب عبد الله العام الماضي أرجو مشكوراً إنزالها
تحياتي للجميع والفن ذوق ونسبي غير مطلق ولذلك تختلف مزاجات الناس وأفضلياتهم للمغنين والأغاني
طلب ثاني:
لو أمكن أغنية " قلت أرحل " للعملاق وردي لا لشئ إلا لأننا في المنفى الطوعي الذي يكثر فيه التأمل والنوستالجيا والأشواق والحنين لدرجة الذهول، بس الله يستر، ويا حبذا لو كان أداء الأغنية مع وردي المجموعة (أبوبكر سيد أحمد ونميري وإنصاف فتيح وآخرين). وهي طبعاً أغنية كبيرة فيها انتقالات كتيرة وشُغل وردي لا يجيده إلا وردي.
لك الشكر
03-11-2016, 11:43 AM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
Quote: في فنانين الأغنية بفصلوها على روحم تفصيل قدر ما تحاول تتخيلا بصوت تاني ما بتقدر
ما بتقدر لأنو أصواتهم متفردة ومحاولة تقليدهم أو تخيل أداؤهم مع آخرين بكون صعب لأنك بتكون عارف في حتات كدا بتكون حتات صناعة الفرق في الأداء غيرهم ما بقدر
لكن رغم ذلك بشيل من وردي أعنية شِن بتقولوا وبديها لإبراهيم حسين لافقة معاه تمام
رأيك شنو ؟
03-13-2016, 05:46 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
حمد عبد الغفار عمر
عاطف عمر
خالد عبد الله محمود
سيف النصر محي الدين
محمد الكامل عبد الحليم
حيدر حسن ميرغني
علاء سيداحمد
قلقو
Kabar
د.محمد بابكر
Ahmed Yassin
ابوحراز
MOHAMMED ELSHEIKH
يحي قباني
جلالدونا
Hafiz Bashir
محمد حيدر المشرف
عبدالمنعم الطيب حسن
محمد أبوالعزائم أبوالريش
عبدالعظيم عثمان
عثمان عووضة
HAIDER ALZAIN
خالد ابوالقاسم
فيس بوك
تويتر
انستقرام
يوتيوب
بنتيريست