|
نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 Re: بعد أن خُدِعنا زمناً طويلاً نتفاجأ : المرأ (Re: محمد عبد الله الحسين)
|
واشنطن - توصلت دراسة أميركية حديثة إلى أن المرأة إذا خيرت بين رجلين أحدهما هادئ الطباع وواثق من نفسه، وآخر مُتقلب وعصبي المزاج، كما يميل إلى العبوس، فإنها قد تميل لأول وهلة إلى صاحب الصفات الهادئة، لكن بعد الدراسة العميقة والتفكير المنطقي سوف تختار الرجل صاحب المزاج العصبي والمتقلب.
وأوضحت الدراسة أن هذا الاختيار الذي يبدو غريبا نوعا ما، هو ناتج عن عدة أسباب نفسية قد لا يدركها الرجل،
أما المرأة فتدركها بالغريزة، كما أشار أساتذة علم النفس إلى أن عدة أبحاث كشفت أن الرجل العصبي وصاحب الوجه العابس يسهل على المرأة التعامل معه.
وقالت الدراسة إن ما جاء على لسان الآلاف من النساء المشاركات فيها أثبت أن هذا النوع من الرجال يشبه الصفحة البيضاء، التي تستطيع أن تكتب عليها أو ترسم ما تشاء،
أما الرجل هادئ الطبع والمرح في معظم الأحيان فهو صاحب شخصية مستقرة جدا ونمطية، تكون معالمها واضحة في أغلب الأحيان.
وبينت أن هذه الطباع من الصعب تبديلها أو إضافة شيء عليها من جانب المرأة بصفة عامة،
حيث اتفق علماء النفس على أن الزوج صاحب المزاج المتقلب والوجه العابس يعتقد أنه يفرض بذلك شخصيته ومواقفه على المرأة، بينما في حقيقة الأمر هذا الزوج يكشف عما بداخله من متناقضات.
وخلصت إلى أن هذا الصنف من الرجال يقدم للزوجة مفاتيح الشخصية ونقاط الضعف لاشعوريا،
مما يتيح للزوجة وخاصة الذكية ترويضه بكل بساطة.
المصدر: صحيفة العرب في 16/02/2016، العدد: 10187
| |
 
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: محمد عبد الله الحسين)
|
يا محمد عبدالله السلام عليكم ورحمة الله
أسمح لي أقول ليك الأمريكان ديل فاكنها في نفسم زمبة وبحبوا
التنظير وخم الناس بالهراء والكلام الفارغ زي الفوق دا ..
ياخ العصبي والمزاجو دائما متقلب الناس في الشارع قاعدين
يتجنبوا ويزوغوا منو يجوا بتوع الدراسة الأميركية ديل يقول ليك
المرأة تفضل وتختار ومفتاح وكنز ؟ على الطلاق الناس ديل قاعدين
يرموا فينا دليب وقنابل غير مكتشفة حتي الآن .
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: منتصر صلاح)
|
الأخ طلحة:
كلامك صاح (....ياخ العصبي والمزاجو دائما متقلب الناس في الشارع قاعدين
يتجنبوا ويزوغوا منو....)
أما في البيت بيكون ( مرن حبتين) زائدا إنه المرة بتعرف تمسكوا من قرونو. و مرات لما تفهموا بتحب فيه الجانب ده. طبعا مش قصدي داك اللؤم البغيض أو العصبية المجنونة و لا داك الزول الكعب.و لكن زي ما يكون عندك أخوك أو صاحبك إنت عارف البزعلوا و البنرفزو شنو و متين بيزعل. و إنت بتكون فاهمه و كما بتعمل حاجات عشان تنرفزوا و انت تضحك و هكذا.
بعدين المرأة الغربية مرات بتكون مختلفة عن المرأة الشرقية لأنه احتمال ما تكون مرت برجل داخل أسرتها مصاب بجنون العصبية و النرفزة زي الشايع عندنا(زماان) فدي تجربة جديدة تمر بيها. و بتكون عايزة راجل حمش. مش واحد مايص.
أما الشرقية فهي شبعانة من العصبية و النرفزة. زايد أعمال البيت و زحمة الضيوف و زعل الأخ و شخطة الأب . عشان كدة ما بتكون عايزة حياتها الزوجية تكون امتداد لحياتها المنزلية قبل الزواج. طبعا ده للمرأة الشرقية زمااان.
ده مجلد رأي.
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: طلحة عبدالله)
|
=
| Quote: عدة أبحاث تكشف أن الرجل العصبي وصاحب الوجه العابس يسهّل على المرأة التعامل معه. |
وهل العكس أيضاً صحيح؟
بمعنى بالمقابل هل أشارت هذه الأبحاث المهببة
إلى أن المرأة النكدية وصاحبة الوجه القمطرير يسهل على الرجل التعامل معها؟
هؤلاء يا محمد ما يزالون يخدعوننا وقد أدمنوا التلاعب بعقولنا والتحكم فيها وقولبتها على مدى قرون.
سادة المجتمعات الرأسمالية يا محمد ظلوا يتلاعبون بلا أخلاقية بأجساد النساء
يضعون للمرأة وللرجل معايير الجمال وفق حاجة السوق.. ويجبرونها على التخسيس حد الهزال
ثم يعودون ليحشوا لها وجناتها بالبوتكس وشفايفها وصدرها ومؤخرها بالسيليكون
ومواد خطرة لم تكف مصانعهم لحظة عن إنتاجها بهدف تحقيق الأرباح.
هم ما يزالون يواصلون في دور عرض الأزياء، وفي أنديتهم الليلية
وخلف زجاج الفترينات عرض المرأة وجس جسدها كما تُجس الخراف أمام الجزار.
إن كان في مثل أبحاثهم هذه نفع – وكما أشار الأخ "الرومانسي" طلحة- فهم أولى به منا.
وأياً كانت نتيجة أبحاثهم .. فما هو ملاحظ أن استقرار الحياة الأسرية
والدفء الاجتماعي أفضل بعشرات المرات في الدول الفقيرة البائسة
مقارنة بشقيقاتها المترفات في شمال الكرة الأرضية.
تحياتي لكم أخي محمد عبد الله الحسين وضيوفكم
...
..
.
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: طلحة عبدالله)
|
الأخ الصادق
لك التقدير على وجهة نظرك . و اختلاف الرأي لا يفسد للود قضية.
و اهو طلحة لقى نصير .
احترم وجهة نظركم و لكن اعتقد الدراسات دي ما معمولة لينا نحن . و ما اعتقد إنه يكون من وراها هدف خبيث. هذه الدراسة لهم هم.و نحن لما نطلع عليها (شمارات و كده) بنعلق عليها من بعيد لبعيد.و إن كان في النهاية الإنسان هو الإنسان من حيث المشاعر و الاحاسيس في كل أركان الدنيا ،يفرحه ما يفرح الإنسان في اقصى الكون و يحزنه ما يحزنه.
احترامي للجميع
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: طلحة عبدالله)
|
اذا كانت الدراسة دي صحيحة...فانا ضامنة حالقى لي عريس
جاهز هنا في المنبر العام...(وجه ضاحك)..
يا جماعة الخير...كلام طلحة عبد الله اقروهو مرة ثانية...
..معقولة انا اقبل بزوج مزاجه متقلب وعصبي وكل صباح
يفتعل ليه شكلة من مافي..ويقلب حياتنا هم وغم...
...الامريكان العملو الدراسة البحثية دي ليه ما جو سالوني!!
ودمتم بالف خير وصحة وعافية
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: مني عمسيب)
|
سلام اخى محمد عبد الله الحسين
الامريكان ديل بتاعين محن والله دا الفضل ليهم عاوزين يتعسونا
من وجهة نظري الدراسة دي مضروبة او على الاقل ما بتتناسب مع ثقافتنا ودينا
معقول في واحده تكون بتحب الانسان العصبي النكدي !!!!؟؟
انسان كل يوم بي حالة المتقلب المزاج دا بخليها عايشه عمرها كلو متوجسه ومتخوفة من اي تصرف تتصرفو او كلمة تقولها ممكن تغير مزاجو
ودا كوم والعبوس وصرة الوجه كوم تاني معقول اصحى الصباح اصطبح بي واحد صاري وجهو ولامي كل قبح الدنيا فيهو
يا اخوي الواحدة بتكون عاوزة راجل يملاها حب وحنية ورومانسية
تصحى تصطبح بي وجه بسام صبوح ومنور راجل يديها احساس بي انها ملكة واميرة قلبوا وبيتوا وحياتوا
هل في اميرة اوملكة بتحب الشخص البشاكله ويعصب عليها ويتلام معاها ويهينها ؟ اكيد لا
مستحيل راجل يدللـه ويدلعه راجل يديها احساس بالامان فهل المتقلب عندو امان ؟
اكيد لا شوف مقاصد الزواج زي ماقال الله تعالى ﴿ وَمِنْ آَيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآَيَاتٍ لِقَوْمٍ يَتَفَكَّرُونَ) سكن ومودة ورحمة ..
مش فظاظة وعبوس وخوف وكسر شخصيتها وهنا كمان شوف ربنا قال شنو (فبما رحمة من الله لنت لهم ولو كنت فظا غليظ القلب لانفضوا من حولك ) يعني اللين والكلمة هي البتقرب منك الناس
مش العبوس والشدة ورسولنا الكريم صلى الله عليه وسلم قال (إن أحبكم إلي أحاسنكم أخلاقا الموطؤون أكنافا الذين يألفون ويؤلفون )..
الموطؤون اكنافا هم الذين جوانبهم وطيئة لينة يتمكن فيها من يصاحبهم ولا يتأذى بهم ،
فهم يفرحون بالحسنة ويتجاوزون عن السيئة ويعفو ويصفحون . ( الذين يألفون ويؤلفون ) يعني يأنسون بالناس ويأنس الناس بهم ويحبون صحبتهم ويتقربون منهم .
والعصبيي النكدي كل الناس بتتجنبو وتتحاشاهو لانو ممكن في اي لحظة ياذيك بي كلماتو ممكن يديك كلمة جارحة و مرة وحامضة تفضل في حلقك سنة كامل ما تنساها
ويكشر فيك بي وجهو العابس من الصباح تكشيرة تخرب مزاج اسبوعين لا يعجبو العجب ولا يفرحو الفرح مهما تحاولي ترضيهو
العصبي دا زي نافخ الكير كلو اذى تعيس
انا غايتو ابراء من العصبي النكدي الله لا صبحني بيهو ولا ختاهو في طريقي ويحفظنى من النوع دا
تحياتى ا
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: مني عمسيب)
|
الدراسة تتوقف على المراة......المراة النقناقة وعروق عصيباتها مارقة برة.....بتفتش فى الراجل الهادى مسكين.....عشان تخلق منه فيلسوف ذى سقراط.....اما المراة الهادية ورضية غالبا ما تكون متعلمة و واثقة من نفسها.....تحاول تجرب كل اسلحتها الناعمة والخشنة.....لذا تختار الرجل العصبى متقلب المزاج.....عشان تلعب بيهو لعبتها المفضلة مصارعة الثيران.....تظهر قطعة القماش الاحمر يهيج الثور.....ويجرى نحو القطعة الحمراء......ترفع القطعة وهو يمر مر السحاب....وهى تبتسم لنشوة الاتنصار.....وتتكرر اللعبة .....وهذه الحلات هى الشائعة....بدليل الدراسة الامريكية وقلة الفلاسفة فى هذا العصر.
الا ان الدراسة الامريكية ناقصة.....لاتشمل الكذب وهذه الحالة عامة عند جميع النساء تحب الرجل الكذاب....واثبتها رجال الدين جواز كذب الرجل لزوجتة....لان المراة بى طبيعتها تحب الرجل الكذاب.....وهذا يودى للاستقرار الاسرى....لذلك اجازها العلماء........ونحن مبسوطين نقشر ليها قصب العنكوليب.....لانها مبسوطة......وهى مبسوطة خلتنا شغالين قشارة قصب.....وكل حزب بما لديه فرحون.
اما علماء هالحب شطحو......وقالو تجوز النظرة للواحدة وعشانك انتى يا السمحة يجوز تمتدة لى سبعة
عاين جاى وعاين جاى وقفل وان اي
وعامل فيها نظام الود عتود بكاي.
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: أيمن نواى على)
|
العزيزات الغاليات:
وضاحة ومنى
جبتو لينا النجيضة....والكلام المنطقي المقبول عقلا وعاطفة
..و يا عزيزي الفاضل محمد عبد الله اقرا كلام وضاحة ومنى
مرة ثانية...عشان تصدق ان الدراسة البحثية الامريكية
دي ما بتعبر عن الواقع المعاش والحقيقة..
ودمتم بالف خير وصحة وعافية
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: Basamat Alsheikh)
|
اخونا الاستاذ محمد عبد الله الحسين حسب راي الدراسة تتوافق مع النساء الامريكان وليس مع النساء السودانيات لان السناء السودانيات اخي يختلفن عن كل نساء العالم والله وتقريبا هذه الدراسة لا تتماشى مع مزاجهن وميولاتهن ورغباتهن ولا شنو يا دكتورة وضاحة ...
ويا وضاحة انتي تبري من الالم والالم ما لينا نحن ،، غايتو ياوضاحة كان ما لميتي في الراجل العايزاه بالمواصافات العايزاها دي على الدنيا السلام ، وربنا يرزقك بيهو ان شا ء الله ...
الاخت الشفيفة بسمات اوع تكوني انتي اتاثرتي بالنساء الامريكيات ديل بحكم من عاشر قوم 40 يوما ً ؟
غايتو يا ود الحسين انا بعترف اني ما نكدي وما بحب النكد ابدا وبحب الهدؤ جدا جدا ... كان أعجب النساء ولا ما أعجبهن ومحل رهيفة اتنقد ...
تحياتي : ياسر العيلفون ......
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: ياسر السر)
|
سلام للجميع
افة الصحف العربية هي عدم ايرادهم لمعلومات حول الدراسات المزعومة التي يستعرضون
نتائجها او وضع رابط الدراسة حتى يعود لها القارئ و يقوم باستخلاص النتائج منها بنفسه
بحثت عن هذه الدراسة و وجدت أن اقرب واحدة هي دراسة اجريت في اسرائيل في معهد
له صلة بجامعة الينوي و الدراسة اجريت على طلاب جامعيين و على عينة صغيرة 118
طالبا و طالبة مناصفة. الدراسة بحثت المواعدة dating و ليس الزواج.
في ويكبيديا هناك صفحة كاملة عن "الرجل الظريف" nice guy و فيها روابط جميع الدراسات
التي اجريت على ميول النساء اليه او نفهورهن منه. المسألة تختلف بحسب الفئات العمرية
للنساء و بحسب الهدف من العلاقة (عابرة او طويلة المدى) و قد وجد أن هناك تأثير للدورة الشهرية
في الموضوع فقد وجد أن فترة التبويض تحس المرأة بحاجتها لذكر مسيطر dominant و بقية الايام
لا تفرق معها المسألة كثيرا.
المهم لمن اراد الاستزادة
https://en.wikipedia.org/wiki/Nice_guy
| |
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: سيف النصر محي الدين)
|
فى دراسات سودانية من الواقع.......اشهرها ناس الحلة والديامة......ناس متجاوزة العقد والامراض و واضحين الى درجة قف تامل......واحد راجل وقور ومحترم ومدين اتقدم لى طلب زواجها........قابل والد البنت وفاتحو فى امرالزواج.......قال الوالد انت فى مقام ولدى ومحترم كل واحد يتمنى ان تكون زوج ابنته.......لكن لابد ان نشوف رايها فى الاول.......من ناحتي انا موافق لكن الرائ رايها فى الاول والاخير.......اثناء الحديث هى جاءت داخلة......ابوها ناداها تعالى جاءت.....انتى يا بتى طبعا بتعرفى فلان الفلانى اتربيتو سواء......وهو هسى قاعد قدامك وطلب يدك منى......دايرين رايك......قالت انا ما دايراهو.....ليه يابتى راجل مدين ومحترم ومقتدر......عيبو شنو....والله يا ابوى هو محترم لكن لا بسجر ولا بسف صعود ولا بيدق دا راجل يعملو بيهو شنو.......ابوها قال ليها الله يهديكى يابتى خلاص امشى.
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: سيف النصر محي الدين)
|
يبدو ان هناك مشكلة تعريفات و مفاهيم في هذا البوست
و لو وجد اصل البحث لساهم في فك بعض التناقضات
هل تعريف الرجل العصبي هو الزهجي/الشكلي/ الصاري وشو 24/7/ النكدي/الباحث عن المشاكل: ان كان
بهذه التوصيفات فما اظن هناك عاقل يقترب منه ناهيك عن الزواج منه: فمن تتزوج مثل هذا؟
لكن يبدو ان المقصود هو الرجل القلق (بالمعنى الايجابي) و ما يتبع هذا القلق من شخصية طموحة/باحثة عن الجديد
يكون دائما في حالة تغيير
هذا الرجل فعلا (لقطة) للعديد من الفتيات. حتى الخلاف مع مثل هذا الرجل لا يخلو من المتعة
و هذه الشخصية اقرب لشخصيات الفنانين و لهذا يكون الفنانون محط انظار و اعجاب البنات في كل العصور
و لو كانوا (شينين)
الرجل (الهادي) قد يكون مشكلة ان ارتبط (الهدؤ) هذا بالملل القاتل/الجمود/التوافق على طول الخط
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: عوض محمد احمد)
|
عزيزي الفاضل عوض محمد احمد
اذا كان فعلا الرجل الزهجي والمتقلب المزاج كما وصفته انت هنا وله كل هذه الايجابيات فمرحبا
به....لكن النوع الثاني النكدي البفتش للمشاكل وصاري وجهه ليل نهار ويخلق من الحبة قبة..فالله
بينا وبينه..بس ان شاء الله وصفك ده هو القاصدنه ناس البحث الامريكي..
ودمت بالف خير وصحة وعافية
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: Basamat Alsheikh)
|
سلام صاحب البوست د الحسين ولضيوفك الكرام، في اعتقادي المراة تحب الرجل الحنون ذو الحنك السنيين، ومااالي مركزوا ان حكي وان صمت، هناك الكثير من النساء زهجييات فان كان الرجل زهجنجي والمراة كذلك فهذا يعني ببساطة خراب بيوت، اضف الي ذلك القوانيين في الغرب وفي امريكا تعطي المراة حقوقا كاملة تتناسب مع بيئة المراة الاجتماعية لديهم مثل حرية السفر وسفر حرية المبيت خارج البيت وحرية الذهاب الاندية الليلية في عطلة نهاية الاسبوع، لكن المجتمعات السودانية ان تاخرت الزوجة خارج البيت حتي الساعة الثامنة مساء ممكن ما ترجع الي بيت الزوجية مرة اخري حتي تشرق الشمس من مغربها، لذلك امام القيود الي تواجه الرجل الغربي المسنونة قانونا، تفضل المراة الغربية الرجل الزهيج العصبي، بينما المراة السودانية العصبي يقلب حياتها حجيم وهي لم تترك بيت ابيها كي تعيش في جحيم بقدر ما هي تريد حب وحنان وقوة شخصية ورجل حمش يدافع عنها في البتسوي والما بتسوي لك شكري.
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: Basamat Alsheikh)
|
بدون تعميم طبعاً ..
عادة عصبيو المزاج ومتقلبوه ..
بيحوزوا على صفات تعجب النساء أو الزوجات بصورة أدق ..
مثلاً ..
الجدية والحرص على توفير مستلزمات الأسرة ..
اغلبهم بيتوتيون .. أي كثيري التواجد بالبيت ..
غير مسرفين في العلاقات الاجتماعية ..
وقليلي المعارف والاصدقاء والاصحاب ..
ودي بتعطي الزوجة مساحة أكثر للتمدد في حياة الزوج ..
وبتحسسها بأنها الكل في الكل ..
أكثر انحيازا وحباً للجو الاسري .. وان بدا غير مشاركاً فيه ..
لكنه حاضر ومراقب لكل حركات وسكنات البيت ..
بحكم تواجده الكثير في البيت ..
مهما كان الزوج متقلب وعصبي المزاج ..
لكنه في الغالب ما بينقص من بيته ولازوجته واولاده شيء ..
ده لو ماجاب الطاق طاقين ومنح الضعف لكل آل بيته ..
أغلبهم بيتصف بالصدق والوضوح والجدية ..
وبيحاسب نفسه على تقصيره .. ومابيرضى يكون ناقص ..
غالباً بيكون منصف وحقاني ..
بيكون شديد العناية والمحبة والاهتمام ..
بزوجته وصغاره وإن بدت قسوته مزعجة ..
غيور ودي صفة بتحبها الزوجة ..
بيحاول يؤدي كل الواجبات المنزلية ..
المطلوبة منه كزوج وبحرص شديد ..
حتى يتسنى له محاسبة الزوجة ان بدر منها تقصير ..
عموماً بيكون زوج منضبط ومسئول في كثير من المناحي الحياتية ..
أما حكاية العصبية وتقلب المزاج ..
دي شغلة غالباً بتكون ساهلة على الزوجات ..
ولن يعدمن حيلة في السيطرة عليها ..
وبيعرفن كيف يضعنها في حجمها الغير مضر ..
لكن الاهم بالنسبة لهن الزوج المسئول المنضبط ..
الذي يوفر لهن ولصغارهن حياة ومعيشة بالقدر الملائم ..
ويضمن استمرار واستقرار الاسرة ..
غايتو ده تحليلي الخاص ولا ارى ضرورة موافقته لواقع الحال ...
لكن شفته وعايشته ..
بعدين ما بالضرورة الزوج يكون عصبي خارج البيت وداخله ..
مرات بيلجم عصبيته داخل البيت ..
ويطلق العنان لنفسه خارج نطاق الاسرة ..
فتبدو الصورة مختلة ومختلفة ..
الناس يقولوا للزوجة راجلك كعب واخلاقه زي الطين ..
تقول ليهم الما عارف يقول عدس ..
الزول ده جوه البيت نسمه بس ..
قليل الطلبات والاوامر.. قنوع جداً ..
وغير متأفف ولا متازمت ..
لكن من يمرق بره البيت ينجض أمة محمد ..
أسد أذا خرج .. فهد إذا دخل ...
أوافق على الدراسة دي وارى بانها صحيحة ..
ده من وجهة نظري الشخصية طبعاً ..
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: عوض محمد احمد)
|
الإخوة و الأخوات المتداخلين
أولاً اعتذر لعدم تمكني من الرد بسبب نفاذ رصيدي من المداخلات الشكر للأخ بكري أبوبكر
الأخوات و الأخوات الذين أدلوا بارائهم القيّمة لهم الشكر و هم دون ترتيب إلا حسب ترتيب مداخلاتهم:
منتصر
الصادق
محمد حمزة
بسمات
وضاحة
أيمن نواي
ياسر السر
سيف النصر
عوض محمد أحمد
محمود الدقم
جمال ود القوز
و كنت أتمنى أن أعلق على مداخلة كل واحد و لكن .... سوف أعلق تعليقاً عاماً يكون فيه تلخيص على ما ورد في مداخلاتكم القيّمة.
لكم شكري و احترامي
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: محمد عبد الله الحسين)
|
بعد أن خدعنا زمناً طويلا نتفاجأ:
طبعا طرحي للموضوع كان بسبب غرابة نتائج الدراسة التي جاءت عكس ما نعرف و نسمع. لذلك أضفت للعنوان (بعد أن خدعنا زمناً طويلا نتفاجأ:)
لذلك أحببت أن يُطرح الموضوع للنقاش خاصة من أخواتنا من الضفة الأخرى للنوع الإجتماعي( جندريات و كده).
طبعا الدراسة كما هي منشورة في عدة صحف منذ أمس و أول أمس بدون تفاصيل.
و برغم غياب المعلومات عن عدد و نوعية المبحوثات( من النساء) و التي كانت ستعطي مصداقية و إحاطة بالموضوع.
و لكن كيفما كان الأمر فإن ىالنتيجة هي كما نشرت.و هي صادقة و حقيقية بدليل أن علماء النفس بدأوا في تفسير تلك النتائج و محاولة فهمها.
قد يكون الأمر كما ذكر البعض بأن الذين شاركوا في الدراسة ذوي مواصفات محدودة و لكن أيضا النتيجة تستحق التعليق و التحليل.
و في النهاية هذا الموضوع قد يكون مخالف لما عندنا في مجتمعنا الشرقي السوداني.لأننا بحكم الثقافة و الدين و المجتمع ننفر من العصبية و التحكم و النرفزة.و..إلخ.
نسيت أن أقول و كما ذكر أحد الأعضاء أن تعريف الشخص العصبي المقصود لم يتضح أو لم يتم تعريفه حتى نلم بكامل الموضوع.
ملاحظة أن أخواتنا وضاحة و بت عمسيب و بسمات أظهرن بجدية رفضا باتاً لهذا النوع من الرجال( طبعاً ..متوقع من بناتنا الله يديهن العافية).
أما إجابات الإخوة من الرجال أو الذكور فقد تراوح بين الرفض (طلحة و و) و بين الموقف الوسط و بين التردد.
طبعا القصد في النهاية أن نظهر و نعبّر عن ارائنا بصراحة في مواضيع اجتماعية متنوعة تهمنا جميعاً، دون خوف أو وجل و دون(عصبية) أو (تعصب) أو (نرفزة).
لكم شكري جميعا و أتمنى أن يكون الموضع قد أثرى فكرنا و رؤيتنا.
و أعتذر عن أي سوء فهم أو خروج عن النص أو غير ذلك (غير مقصود بالطبع)
لكم شكري جميعا
و نرحب باستمرار التعليق لمن شاء
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: محمد عبد الله الحسين)
|
الاخ محمد
اعتقد القلق والتوتر حالة صحية للطرفين قبل الزواج....والزواج هواستقرار وسكن للاطراب النفسى كما اشير فى القران الكريم.
وايضا وصفوها الشعراء .....ساعة شفتك شعرت الرعشة من صوف راسى لى كرعى.
وفى اخرى.....وقفت قدامها داير اقول ليها احكيلها عن ريدى طار الكلام منى.....حالة الربكة والتلعثم والحيرة.
وابو العركى البخيت ...بخاف.
اما من الناحية العلمية ....اجري علماء السايكولجى ....دراسات على الحيوانات اثبتت ازالة التوتر بالموانسة.
قد يكون الوصف الدقيق نوصفو بالهميم الباحث عن الامن والحياة السعيدة للاسرة قد تتفاوت من شخص لى اخر.....وايضا قد تعلو درجة الهمه وتنخفض.. ...عند الرجال..... هنا يلعب الطرف الاخر دور مهم للتنفيس والشحن....كما يحدث فى اغانى الحماسة او الحكامات.....قوة المراة يمكن ان ترفع من قدر الرجل...وتحط من قدره....اعملو حسابكم.
زمان اهلنا فى السودان يخافون من مكر المراة...كان لهم اسلوبهم الخاص.....فى بعض المناطق يضبحو ليها الكديسة.....يكونو الاثنين فى لحظة صفاء......الجماعة يزلو الكديسة......عمك طوالى يمسك الكديسة.....انتى الدخلك بين نفرين شنو......يسل السكينة من ضراعو ويضبح الكديسة يرميها برة.....تكون الرسالة وصلت.
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: أيمن نواى على)
|
غايتو يا محمد يا اخوى فى الحتة دى انا عندى نموذج
واحد صاحبنا من يجى داخل البيت العجاجة تقوم
يبداها بالبيت ده بارد شديد قللو التكييف
و ياولية وين الغدا
و طبيخك الليلة مسيخ واكلك ده بارد و هلم جرا
و عندو طلعة واحدة قبل المغرب و المدام لو عندها مشوار ياخدا معاهو فى سكتو
و يغشى بيها بيت السنة ما شغال بى ناس الهيئة و الامر بالمعروف يقيف و بس تلفون الفلبينى يجيهو بالراتب اليومى
و يجى راجع و يخش المطبخ يضرب فى مويتو دى و يسوى فى مززو و يجهز فى عشاهو و يجوط ليها العدة جواطة جد
اها يوم جا راجع و طوالى على الاوضة و رقد نام
صحوه للغدا اكل من سكات و رجع تانى الاوضة و نام و كمان جاب عليها قراية جرايد
البيت ده يقع و يقوم ما شغال بيهم الشغلة و التلفزيون الما كان شغال بيهو بقى يتحكر فيهو من المغرب و هاك يا قنوات اخبار
اليوم الخامس قالت ليهو عندى مشوار قاليها جدا لما تجهزى قول لى قالت ليهو انا جاهزة
و لف بى جار و امش بى جاى و خش الشارع القدامك ده و اقيف هنا و جيب تلفونك و طلعت من العربية و جات راجعة
بعد شوية الفلبينى جا نازل بالراتب وفتحت مطبقتا و حاسبتو
صاحبى فتّح عيونو قدر الريال و قال ليها ده شنو ده انا تبتا
قالت ليهو شوف
يا تسكر يا تطلقنى
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: جلالدونا)
|
الأخ ايمن نواي:
( زمان اهلنا فى السودان يخافون من مكر المراة...كان لهم اسلوبهم الخاص.....فى بعض المناطق يضبحو ليها الكديسة.....يكونو الاثنين فى لحظة صفاء......الجماعة يزلو الكديسة......عمك طوالى يمسك الكديسة.....انتى الدخلك بين نفرين شنو......يسل السكينة من ضراعو ويضبح الكديسة يرميها برة.....)
. ضبح الكديسة زمان يا خوي كان بيقوم بيه الراجل لكن المرأة الآن هي البتضبح مش الكديسة و لكن ...الرجل.
الأخ جلالدونا....قصتك ممتعة ...لكن النهاية فجأتنا يعني القصة سدة بي سدة.
لكما الشكر فقد كفيتو و وفيتوا.
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: محمد عبد الله الحسين)
|
الاخ محمد عبدالله
فعلا يا محمد ظاهرة النساء البيضربو الرجال فى مصر ذادت الى٤٧٪.....وبعض الرجال بقو نصف راجل....خوفا من بطش النساء.....زمان زمن سطوة الرجال.....الواحدة يتقدم ليها راجل.....تقول عايزة تقراء.....هسى بعد النساء ملكو زمام الامر.....عزف الشباب عن الزواج......الواحد تسالو مالك ماداير تعرس يقول ليك داير احضر الدكتوراة.....هسى المتزوجين ضنبهم بين رجلينهم.
قالو واحد كل ما يوم يطبخ وينضف البيت ويحمى الشفع.....مبسوط قاعد.....يوم نحس جوهم ضيوف......الزول قاعد متململ ما ينكشف حالو قدم الضيوف.......جاءهو الصوت من المطبخ فلان تعال ورق الخضرة......بى صوت مرتبك وخافض اذا ورقتها ما بفركها.
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: عوض محمد احمد)
|
الاخ محمد عبدالله
بعد المزاح الثقيل والخفيف......ندخل فى الجدية
موضوع الزواج حقيقة يجب الوقوف عندها.......رجالا ونساء فى السودان عامة.....الطامة عامة......لقد استفحل عزوف الشباب والشابات عن الزواج .....بى اعداد مخيفة افرزت سلوكيات وظواهر غريبة عن المجتمع السودانى..... لغياب نظام الاحصائيات فى الدولة لم تظهر الحقائق الكاملة المرعبة....ولكن هناك اشارات تشير الى ذلك.....يجب توسيع النقاش حولها لاقاء الضوء عليها......اذا عملنا احصائية عشوائية قد تساعد على توضيح الملامح العامة......اذا قدرنا عدد سكان السودان من قبل بعدد ٤٥ مليون نسمة......وقسمنا الفئات العمرية الى ثلاث....اذا قدرنا عدد الشباب والشابات المستحقين للزواج بعدد١٥ مليون......اذا قدرنا عدد الشابات ب ٨ مليون....وعدد الشباب بى ٧ مليون اخصم منهم ٢ مليون ماتو فى الحرب......تبقى ٥ مليون شاب.......اخصم منهم ٢مليون مهاجر بحثا عن العمل .....تبقى ٣ مليون.......اخصم ١ مليون عاطل يبحث عن عمل او الاغتراب.......تبقى ٢ مليون شاب قصاد ٨ مليون شابة......سوف تكون هناك ٦ مليون شابة تقريبا بدون زواج.......وسوف يذداد العدد مع وجود الاسباب.
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: أيمن نواى على)
|
ستة مليون شابة بدون زواج.....قول رجع الاثنين مليون مغترب واتزوجو......الباقى اربعة مليون شابة......قول مليون انفصلو مع الجنوب.....الباقى ثلاث مليون شابة سودانية من غير زواج......على من تقع المسؤلية......اولا الحكومة وكل سودانى وسودانية.......امانة على اعناق الجميع....... الحكومة شغالة بى نفسها.......ان شاءالله تموت الناس كلها......لا يمها مادام هى جالسة على كرسى الحكم......هذه هى اعراضنا كلنا كسودانين.....اذا كانت من الشرق ولا الغرب او الشمال او الجنوب.......هذه اعراض سودانية......ما يحدث من اهانة فى دبى ولا السعودية ولا اى مكان فى العالم........ما بيقولو هى من قبيلة كدا او كدا......بيقولو سودانية فقط.....الامر يهم الجميع......رقم مثل ثلاث مليون دا رقم مخيف حقيقة.......هل يرضى احد ان تكون اخته او بنته من غير زواج مستقبلا.
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: أيمن نواى على)
|
ليس الحرب وحده السبب فى هذا الرقم الخرافى......هناك عدة عوامل اخرى.....ناخذ رؤس العوامل دون التفصيل.....فى الماضى عدم تعليم البنات.....يتيح فرصة اختيار البنت من خطوبة لى زواج من سن ١٤ سنة الى ٣٠ سنة.....يعنى عندها فترة ١٦ سنة لتقديم الطلبات......لكن انفتاح التعليم قلل من الفترة المتاحة .......اصبحت الاسرتفضل الزواج بعد الشهادة الجامعية.....اى من عمر ٢٤ الى ٣٠ سنة......انحصرت الفترة الى ستة سنوات بدلا من ١٦ سنة.......بعد عمر ٣٠ سنة ينعدم الخيار.....يصبح الهم ركوب قطار الزواج قبل ان يفوت......التعليم بدلا من ان يكون نعمة يصبح نقمة على البنت.....حصر زواج البنت بعد التخرج جريمة تشارك فيها الاسرة والمجتمع.
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: أيمن نواى على)
|
| Quote: ويا وضاحة انتي تبري من الالم والالم ما لينا نحن ،، غايتو ياوضاحة كان ما لميتي في الراجل العايزاه بالمواصافات العايزاها دي على الدنيا السلام ، وربنا يرزقك بيهو ان شا ء الله ... |
ود العيلفون تحياتى يا زوق
أكيد كل شي مكتوب ومقسوم وانا ثقتى فى ربنا كبيرة الحمد لله
واكيد حا يقسم لى الزول البستحقنى ويكون بشبهنى
وبحترمنى ويحترم اسرتى
والطيبون للطيبات
الألم الحمد لله فارقنى الله لا عادو
ورجعت اكثر بريق وجمال ونشاط
وزى ما بتقول لى حبوبتى مهرة وفي رقبة تميمة
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: أيمن نواى على)
|
كثرت الاشعات بى فشل الخطوبة.....وكثرة الطلاق.....زرع الخوف فى نفوس الشباب والشابات......سلبيات الاسرة والمجتمع......تداول الخصوصيات وسؤ الفهم على اوسع نطاق.....بدلا من حصرها وحلها بين الطرفين......ترك خيار الاختيار للشاب والشابة لعدم تحمل مسؤلية الفشل مستقبلا......تكتفى الاسرة بالنقد.....اذا حصل لاقدر الله فشل او الخلافات العادية.....تتملص الاسرة.....انحنا ما قلنا ليكم وما سمعتو كلامنا.....دى اخرتها يرمو اللوم على الولد والبنت.......وايضا من الاسباب ترك البنت لى وحدها تخوض حرب الاختيار .....تدخل الحرب وفى بندقيتها طلقة واحدة.....لازم تنشن جيد لتصيب الهدف ليعش معها العمر كله.....واذا فشلت يهرب الخطاب.....واذا اطلقت تانى مافى زول بيعرسها.....والمجتمع يلوك فى سيرتها فلانه مطلقة.....او لاقدر الله ارملة......مفروض تغير نظرة المجتمع للخطوبة الفاشلة وللمطلقة والارملة......مفروض تدخل المعترك وهى مسلحة بى خذنة كلاشن كوف بدلا من طلقة واحدة وترك الشمارات ضررها اكبر على المجتمع..... لذ نهى الرسول (ص) تتبع العورات.....وقذف المحصنات .....وسؤ الظن افة المجتمع......هذه الاسباب دفعت الشباب والشابات للخوف من الزواج.
كثرة الشابات للاسباب المزكورة انفا......وتقدم المغتربين المؤهلين للزواج من اى شابة جميلة دون ان يسال ان كانت مخطوبة ام لا لتزوجها.....نهى الرسول (ص) ان يتقدم شاب الى بنت مخطوبة سلفا.....لذا بعض الشباب يختار عدة بنات واحدة فى الجامعة....واحدة فى الحلة و واحدة بنت اهلو ويدخل فى علاقات غرامية متعددة.....ثم يختار واحدة دون مراعاة لشعور الاخريات.
زمان مافى خطوبة لابنت تشوف الولد ولا الولد يشوف البنت.....الاسرة متحملة الاختيار.....لا طلاق ولا يحزنون.....يعصرو الولد والبنت ويسمعو كلام ولديهم.....يجب مراجعة مسولياتنا وفهمنا للزواج.
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: أيمن نواى على)
|
افة الفقر.....الضلع الكبير الحكومة.....لانسهب فى الحديث....يكفى قول سيدنا عمر بن الخطاب رضى الله عنه......لو كان الفقر رجلا لقتله......الفساد.....طال الكان قصير والعالى اتواطئ....الصولات حليلهم ملكتهم راحت.
تفشى ظاهرة الزواج العرفى بين الطالبات.....المخدرات....اللواط.....هروب كافى الولية....استقبال دار المايقوما.....سفر الشبات خلف الشباب......والديوس.....عطالة الخرجين......وحرب هنا وهناك.....وغرق وطوفان و مرض.....خياران ياغرقنا يا جينا حازمنها.....والسلام.
شكرا الاخ محمد عبدالله وبوليس المنبر ابوبكر.
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: أيمن نواى على)
|
الحرب اهون قد يموت الانسان وتنتهى المشكلة.....لكن اخطر المشاكل موت قيم الانسان بالبطئ.....مايحدث فى اعراض السودانين من شرخ فى المجتمع مستقبلا يصعب علاجه......اذا ذهبت قيم المرؤة والشهامة نقول على السودان السلام.....لافرق بيننا وبين الحيوان.
اذا ذهبت القيم نبكى ونتحسر عليها كما تبكى النساء.....وما ذهب لن يعود.
ذات مرة اوقفتنى احدى الاخوات الجنوبيات.....وصلنى البيت.....ماليك وين عربيتك......فى ورشة الماكسيكى تلات اسبوع يماطلنى.....ودافعه ليهو القروش كاملة....طيب اقيفى هنا.....مشيت لى شلة السودانين.....لقيت الشاقى لابس رسمى لبس الحراث....معروفين جنهم وجن العسكرية....حتى فى امريكا....اسمع اختنا الجنوبية عندها مشكلة مع الماكسكن ديل......اخونا اتنفخ ويناه.....ياها ديك.....من فرط الحماسة ما سلم عليها......ورينى ليهم مسكها من يدها.....وهى ذى الطفلة وراهو.....قرب يقلب المحل فى راس الجماعة.....طبعا الماكسكان بيخافو من اللبس الرسمى.....خمس دقائق ....جو مارقين .....عدى القروش....حقيقتا المبلغ كبير......... و واحد اتبرع وصلها البيت.....اخوانا الجنوبين دنقرو راسهم احتراما لهذا الرجل......قلت فى سرى ياهو دا السودان.
كنا فى مناسبة عامة بتاعة سودانين.....واحدة من الخرطوميات بتحكى.......انا ما كنت قايله الجنوبين ديل ذى دا.......مشكلة صغيرة حصلت لى فى الشغل......ما عندى معاهو غير السلام......اتولى المشكلة والله مستعد يموت فيها......سالهو البت دى تبقى ليك شنو.....طوالى قال ليهم اختى......انا لمن اتهجمت ليه انحنا بنتعامل فى السودان كعب وبرة طيبين.
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: أيمن نواى على)
|
الأخ أيمن نواي
ياخي أولا أعتذر لتأخير الرد و إن كنت بقراه على الطاير لأني من يوم الخميس مشغول شديد.
و تاني كتذر خيرك أثريت النقاش بدرجة كبيرة وأوردتافكار و ملاحظات قيّمة جداً. حتى أنا ما كنت متخيل غنه الموضوع ممكن يتطرق لكل هذه الجوانب.
بعدين ما شاء الله خبرة كبيرة و معلومات إجتماعية و تحليل قيّم.
زادك الله علماً و رفعةز
مع خالص شكري و تقديري
| |
|
|
|
|
|
|
|
|
|
Re: بعد أن خُدِعنا زمناً طويلاً نتفاجأ : المرأ (Re: محمد عبد الله الحسين)
|
شكرا ليك محمد عبدالله
الموضوع فعلا مشعب......شكرا ليك فتحت لينا نافذة نتنفس من خلالها الهواء الساخن فى الصدور.
لايخفى حب الاسر السودانية للبنت......ومن الحب ما قتل....خصوصا الولدين والاخوان يتحاججون بى اعزاز وهية لحفظ البنت فى البيت.....قد تتفهم عنصرية....لكن المدرك لى بواطن الامور .....يفهمها غريزة سلبية فى المواطن السودانى......هناك من وجد لها حلول.....مثل اهلنا البطاحين.....يزوجوك البنت بى شرط تسكن معاهم فى البيت.....وقعت فى الجرح لى بعض الشباب مع الظروف الاقتصادية........هسى من الصعب تلقى ليك بنت من البطاحين.
عندنا قبيلة من اهلنا فى الغرب مشهورة.....بناتهم سمحات بالحيل.....اذا عاوز تتزوج منهم تتخن جلدك.....تسمع كلام عمرك ما سمعتو.....من يوم ولدوك لمن بقيت راجل تاريخ حياتك كلو......عشان تخلى البنت.....اذا صبرت تنال مرادك.......بعد العرس تشوف الطيبة ويرقدو ليك فى الواطة......واذا انجبت اطفال يشلوك فى راسهم ذى الملك.
حلفاوى اتزوج مصرية.....انجب بنات سمحات.....تسر الناظرين......ود اخوه خاتى عينو على واحدة......من الشفقة خايف يجى واحد يخطفها منه......مشى لى عمو على ضمان انو عمو ما حا يخذلو......طلب يد البنت......ياخى انحنا نمشى ننضف .....انت جاى توسخ.....عمك داير يتخارج منه.....ما لقى ليهو طريقة غير النضافة.
كنا بنحب اخواتنا......لكن احيانا تكون عقبة فى سعادتهم.....نبحث عن اعزار وهية فى سبيل بقائهم فى البيت.....اذا البنت ما بقت شديدة وقوية وخوفت ناس البيت ما بتعرس......بعد ما تخوف ناس البيت.....يقولو اصلو البت دى شقية من يومها.....خلوها تعرس ما تجيب لينا الفضائح.
الزواج فى السودان اصبح قلع......اذا الشاب ما بقى قوى ما بيقلع البنت.....واذا البنت ما بقت شديدة ما بتمرق من بيت ابوها.
ومن الحب ما قتل.
| |
|
|
|
|
|
|
| |
محمد عبد الله الحسين
طلحة عبدالله
نادر الفضلى
الصادق عبدالله الحسن
محمد حمزة الحسين
مني عمسيب
وضاحة
أيمن نواى على
ياسر السر
سيف النصر محي الدين
محمود الدقم
جمال ود القوز
جلالدونا
فيس بوك
تويتر
انستقرام
يوتيوب
بنتيريست