قبل خمسة سنوات تقريبا الوالد الله يعطيه الصحة والعافية كان عنده معرض في اروقة للثقافة والفنون المهم مسكوا فيه ناس امجد ديل قالوا ليه عاوزين نعمل معاك لقاء تلفزيوني حاول يعتذر ما قدر جاء التلفزيون بدأ " امجد هوز" في اسئلته العجيبة اللون المفضل الأسئلة بتاعت سبعينات القرن المضي ، اه بعد داك دخل علي الأسئلة الشتره قال ليه زمان كلية الفنون كانت بيطلع 3 خريجين فقط والأن بيطلع 150 طالب ، قام الوالد رد ليه يا ابني انا ما بتكلم عن الكم انا بتكلم عن ال كيف يعني في 150 طالب ديل ما بتلقي فيهم شيخ الصلحي ولأ شبرين ولأ بسطاوي ولأ علي العريفي ، قام لف ليه سؤال اشتر تاني قال ليه انت دائما بتتكلم عن الزمن الماضي في حين انو الأن كل الأشياء متوفرة في الزمن الحالي ، رد عليه الوالد زمان وانحنا طلبة كان المعهد الفني برسلنا رحلات الي جنوب السودان نتمتع بالمناظر الجميلة في الجنوب فتجد كمية مهولة من الأبقار والزرافات وحمار الوادي وينعكس علي فننا حسي حكومتك دي قامت لأ لمينا في الجنوب ولأ لمينا في الزرافات
بس بعد شوية المخرج دخل ليك دعاية اجمل عدس واطعم عدس عدس الوابل عدس الوابل ما يحتاج توابل شفت امجد ده زول فلته كيف
05-17-2016, 07:12 AM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 25092
اولن بالتبادي سلام عليكم جتوجزيل الشكر للترحيب الحارالصورة اعلاه من عمل عمنا الفنان سليمان العريفي والد زميل المنبر اسامة العريفيهدية لاسامة ..... وأصل اللوحة في حوزتي ولاتقدر قيمتها بثمن .... املا عِبَك قروش وتعالغنية وقابلتني .... ما تقول امتلكتها كيف ؟ صارت ضمن ممتلكاتي
Quote: الصورة دي عجيبة يا خي علقها فوق واحدة من لوحات الوالد اتعرضت بفرجينيا عام 2005م
وطيب اتا المقعدك مع الطير ديل شنو ؟
ياخي نحن زمان جانا الفنان صلاح ابن البادية في حلتنا بقينا نتكلم مع ناس الحلول الجنبنا بطرف نخرتنا كونو جانا الفنان ود البادية واتوا ما جاكم هههههههههه فنان من دار اللذاعة غنا في الرادي وغنا في حلتنا اذن حلتنا والرادي واحد شفت العز دا كيف ؟ انا لو منك ولا بتكلم مع زول ذاتو كلامي في دار اللذاعة فقطاً لاغير مضيع رقبتك ساكت اللوحة دي بتجيب لي كم بقرة ماخد ؟
05-17-2016, 09:28 AM
اسامه العريفي اسامه العريفي
تاريخ التسجيل: 02-28-2014
مجموع المشاركات: 754
وهذه لوحة اخرى ينقصها التصوير بالكاميرة هدية لاميرة السيد واخواتها
. . خالتي فاطنة بت حليمة تتوكأ على ضقلة جبرتا عليها الظروف ساكت كونو ما لقت عصاية خفيفة تتوكأ عليها ودخلت من باب حوشنا الذي يكاد لا تحده حدود ويضج بزوجات الاولاد وازواج البنات واحفادهم وحفيداتهم وجناهم وجنا جنا جنا جناهم وتلك نعمة نحمد الله عليها كثيرا لحظتئذن كنت بكرب في سوكري مرخي لعنقريب هباب اسجي به بعض الوقت في فائدة تعلمتها من والدي له الرحمة فياقتك عاون بيها عدوك فكيت حبل السوكري مرحبا بخالتي فاطنة ترحيبا لا ينقصه شئ غير مقابلته بوجه يحمل هما ظاهرا لخالتي فاطنة بت حليمة التي اعتادت دايما بان تقابلني اكثر بشاشة ومرحا وترحابا ولكنها هذه المرة يبدو انها اتت لامر جلل وظهر ذلك جليا حينما ناغمتها الوالدة بان تعالي جاي حصانك جراي وجبنتنا في الصفاي بعدما عدلت من جلستها وكومت توبا فوق كراع الهباب الاخر غير الذي اكرب في السوكري حقو مفسحة لها مجالا طيبا للجلوس بمهلة ففأجأتها بان لن تجلس ولن ترتشف جغمة واحدة من جبنتها البخيتة وسعيدة عليها الا ان توعدها خيرا بالاستجابة لطلبها خير يا بت امي قولي شن بتدوري ؟ ديكي الرقباني كتا خاتاهو مع جداد بخيتة بت عمي احمد .... ديكا الفروج الجابو ديكي كبر ومسكتو جابتو لي قالت لي امسكي عليك ديكك ما بدورو أها ياختي اجيبو ليك ول جبنتك تشربيها براك ؟ عاد كان كدي حاشا بديكي انا ... وديكين في دكا واحدة ما ببقن فامسكت بضقلتها وتجتا تجتين في الدلجا والتجة التالتة جنب كراع عنقريبي البكرب في سوكريهو كان جيتك تاني تقضي لي غرض امي تكوس لي ابوي النيتي لله يا خالتي فاطنة علي بالطلاق الليلة غرضك مقضي اكان تنطبق السماء على الوطا اتي ديكك دا مربياهو لشنو ؟ ببيعو لي كبران نفسي وساعة صرمطي بجيب كم ؟ كان تلاتين كان خمسة وتلاتين هاك آ خالتي دي الخمسين بيعيهو لي فعادت اليها نفس هاتيك البسمة التي كادت ان تضيع وكمان معاها ترنيمة لن تكتبها حروف كل اللغات نوناية يعجز هذا الكيبورد عن نقلها فاحتفظ بها لنفسي ولمن التقيه على نفس العنقريب الكربت سوكريهو
05-17-2016, 11:58 AM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
تحياتي ومعزتي الصادقة أخي عبدالله ودالبوش ياخ إنت زاتك زول بوش بكل مايحمل البوش من معاني وفرح ومدلول عند البوادي والريف "والبوش" عندنا يا أميرة بت السيد هو الفرج ب بالجديد"زواج" ويكونوا أهل البادية طربانين مافي حِدْ، يعني ماهم حادين علي عزيز، والحِد بكسر الحاء بالبوادي ، يعني لا فرح بالفرح، بمعني أكان عرّس أحدهم والناس حادين مهما يبلغ من العِز لا يقام فرح بزواجه أي لا (صفقة ولا سيرة ولا جراري ولا هسيس ولا توية ولا قطار...الخ)
Quote: اتي ديكك دا مربياهو لشنو ؟ ببيعو لي كبران نفسي وساعة صرمطي بجيب كم ؟ كان تلاتين كان خمسة وتلاتين هاك آ خالتي دي الخمسين بيعيهو لي فعادت اليها نفس هاتيك البسمة التي كادت ان تضيع وكمان معاها ترنيمة لن تكتبها حروف كل اللغات نوناية يعجز هذا الكيبورد عن نقلها فاحتفظ بها لنفسي ولمن التقيه على نفس العنقريب الكربت سوكريهو
بمناسبة ديكك دي إنت عارف ياعبدالله أخوي في عام 1991 كنت أدرس بمدرسة "رُحل" ببادية الكبابيش تتبع لمنظمة اليونسف،ولأني إبن بادية الكبابيش، أعرف الكثير من البدو، الذين "إتتوتلت" فرقانهم بالوديان المجاورة للمدرسة حملت بندقيتي، وقلت لزملائي ، سوف أذهب للوادي لأصطاد لكم طائر أو أرنب،وقبل بلوغي الوادي، لمحت جمال أكثر من ثلاثة، مشبول عليها القيد، ترعي علي تخوم،خيم بيضاء ممدودة طنائبها، وعرفت أنها قوافل كانت محملة بالذُّرة، من صفاحها التي عليها أثر القِراف ولأنني أعرف صاحب الخيم،توجهت لخيمته للسلام، وأن "أتحمدل" له العودة،تعانقنا عناق حارا ولا يخلو من الظرف، لأن هذا الرجل أظرف ماعرفته بالبادية، والوقت عصرا وكعادة أهل البادية،شاهي اللَّبن المقنّن أمامهم ، "أبوكتحة"، لأن الوقت درت وهو وقت المهلة والخير بالبادية، وبعدتناول الشاي، نادي البدوي لإبنه الصغير، والذي يدرس بمدرستي قائلا: أمسك ديكك المانع دي خلينا نعشي بيهو رفيقي دي سريييييع.! ليجيبه الشافع : لا لا لا ديكي مابطقُّو..تب..... ياعشايا دي مدرسك....! لا لا إنت شبعان معَّاز..أضبحلو عنز مانعي... والله بضبحلو خروف عديل، عيل أبي والمدرسين ماهُن معاهو وقال مستعجل أها ديكك ببيعو منك! بي كم ياأبوي، بي ...وفتح جُزلانه وناوله المبلغ وفي الحال الوليد طق الديك قرجه رماه وضبحو الطرفة في القصة أم ديك دي كوووولها وإنت أدري ياودالبوش "الدقيق فين" أي مايسمي بدقيق الإسترالي ، والزمن داك لا سيقا ولا.....الخ خيم البدو هي بالقرب من التُّكل، أها قلت مخاطبا للبدوي: ياخي أني مستعجل وبعدين الإسترالي ماباكلو،أعملو لي سنسن تريد ساكت"ثريد" ليضحك البدويُّ ملْ فيه، ويقول: "موخشمك الإسترالي لي رقبتي مالقيتو، أسوي ليك" معزتي
05-17-2016, 01:17 PM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
Quote: أعرف الكثير من البدو، الذين "إتتوتلت" فرقانهم بالوديان المجاورة للمدرسة
. .
Quote: لمحت جمال أكثر من ثلاثة ، مشبول عليها القيد، ترعي علي تخوم،خيم بيضاء ممدودة طنائبها
. .
Quote: وعرفت أنها قوافل كانت محملة بالذُّرة، من صفاحها التي عليها أثر القِراف
آمنت بالعتق الغزال
علي بجملة الايمان يا عبيد اخوي وحسبما اعتقد لو تم تحضير روح لبيد بن ربيعة العامري وسرى بها عصرا لهاتيك الفيافي وقيل له ان لم تجارى ناقل اللوحة اعلاه لنصفعن بالناصية لوقف حمار شعره مدحشا في اتانه
05-17-2016, 01:37 PM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
وأهديك هذه اللوحة يا عبيد الطيب وما تقول عشان شفتك اسع لا والله من قبيل مجهزة ليك في الذاكرة الباقي لي رسم حروفها وادسها ليك في خرتايتك وكت ما تجي تشيلها وتشيل اهلك توريها ليهم وتسعلم من سرها . . أفندي ساقتو ظروف عملو لمنطقة الكبابيش بكردفان وفي الطريق لمقر عمله تمباكو كمل شاف راعي هناك مشى عليهو ودار بينهما الحوار التالي عندك تمباك آي ... وناولو الحقة نظر اليها فاذا بها سفة واحدة لكن دي سفة واحدة .... اسفها ؟ كان سفيتا بنطعنك وكان ما سفيتا بنطعنك فاحتار الافندي وتلفت يمنا ويسارا وراى بدويا آخر فناداهو ودار الحوار التالي تعال حلني من الشبكة دي زولك دا انا قلت ليهو داير تمباك ناولني الحقة لقيت فيها سفة واحدة قلت ليهو اسفها ؟ قال لي كان سفيتا بنطعنك وكان ما سفيتا بنطعنك فاجابه حلال الشبك وقال ليهو سفها كان طعنك اني بنطعنو وكان ما طعنك اني بنطعنو . . لوحة رايعة لها مدلولات عظيمة ان كنتم تعلمون ......... تأملوها .... فكروا فيها جيدا .... فذلكوها ..... وكان غلبتكم بوريكم سرها العظيم
05-17-2016, 01:42 PM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
استاذنا علي عبد الوهاب عنده بوست جميل جدا وعنوانه" رفقا بناس الضواحي.. بعض العبارات لا نفهمها"".. وفي هذا البوست كتب عبيد ود الطيب مداخلة رائعة جدا .. لكن ما كل الناس بيفهموها.. ونحن فهمناها بعد طلب المساعدات الخارجية، وخاصة من الشايقية المعانا في الغرفة، وبدأ ود الطيب مداخلته بهذه العبارة:" تحياتي الجميلين عشاق الخندريس جميعا... اخي الضل الرهين استاذ علي .. نعم ضل رهين لأنك تجمع الأحباب"" ونحن نقول هنا لصاحب البوست الأستاذ خالد ود المنسي :" نعم يا خالد انك ايضا ضل رهين لأنك تجمع الأحباب".. وقد رد صاحب البوست الأستاذ علي بهذه العبارة الجزلة وقال:"-: تخيل انكم جميعا في حلقات تلفزيونية عن هذا الوطن الرائع .. بنفس الشرح والعمق...."". وهسع لمن انا قريت مداخلة حبيبنا الرجل الأصيل صاحب الأيادي البيضاء النشمي ود البوش وقرأنا لوحته التصويرية الأنيقة الرائعة عن الخالة فاطنة بت حليمة ، وكذلك قرأنا رد حبيبنا الريفي القروي عبيد ود الطيب، تأكدت من صحة كلام الأستاذ علي عبد الوهاب بانكم جميعا كان لا بد ان تجتمعوا في برامج تلفزيونية ونحكي عن هذا الوطن الجميل .. الوطن السمح .. والوطن ما سمح إلا بسماحتكم انتو ... . . بس كمان يا ود البوش وود عبيد براحة علينا شوية ... وهسع كان ما الشايقية المعانا والبتساعدنا في فهم بعض المصطلحات والعبارات مثل .. الضقلة,, والمشبول.. واثر القراف... ما كنا فهمنا القصد المقصود.. وقلنا للشايقية :" انتي شن عرفك بكلام الكبابيش والرباطاب"" فقالت : كلامنا واحد .. لان كلام اهل الريف واهل البادية والقرى كله بتشابه ...ونحن بنتأثر بجيرانا..."" . فالشكر لكم جميعا يا ناس يا سمحين .. فوالله لولاكم لكانت الأيام هنا في هذه الغربة القساية بطيئة ثقيلة... ولا ننسى في هذه العجالة ان نشكر صاحب الحوش الكبير الباشمهندس بكري الذي اتاح لنا كل هذا الفرح .. وكل هذا التواصل الأنيق .. والله يديكم الصحة والعافية
Quote: قبل خمسة سنوات تقريبا الوالد الله يعطيه الصحة والعافية كان عنده معرض في اروقة للثقافة والفنون المهم مسكوا فيه ناس امجد ديل قالوا ليه عاوزين نعمل معاك لقاء تلفزيوني حاول يعتذر ما قدر جاء التلفزيون بدأ " امجد هوز" في اسئلته العجيبة اللون المفضل الأسئلة بتاعت سبعينات القرن المضي ، اه بعد داك دخل علي الأسئلة الشتره قال ليه زمان كلية الفنون كانت بيطلع 3 خريجين فقط والأن بيطلع 150 طالب ، قام الوالد رد ليه يا ابني انا ما بتكلم عن الكم انا بتكلم عن ال كيف يعني في 150 طالب ديل ما بتلقي فيهم شيخ الصلحي ولأ شبرين ولأ بسطاوي ولأ علي العريفي ، قام لف ليه سؤال اشتر تاني قال ليه انت دائما بتتكلم عن الزمن الماضي في حين انو الأن كل الأشياء متوفرة في الزمن الحالي ، رد عليه الوالد زمان وانحنا طلبة كان المعهد الفني برسلنا رحلات الي جنوب السودان نتمتع بالمناظر الجميلة في الجنوب فتجد كمية مهولة من الأبقار والزرافات وحمار الوادي وينعكس علي فننا حسي حكومتك دي قامت لأ لمينا في الجنوب ولأ لمينا في الزرافات
بس بعد شوية المخرج دخل ليك دعاية اجمل عدس واطعم عدس عدس الوابل عدس الوابل ما يحتاج توابل شفت امجد ده زول فلته كيف
يا أسامة
تفقد أجهزة الإعلام الفضاءية المذيع المثقف التام لكلمة إعلامي وأمثال أجد كُثر وفعلاً أسئلته شترا يدخل كلمة جداً جدأ في جملة تتكون من خمسة مفردات ( يدخلها ستة مرات ) هذا زمان الفاست فود وحتى في الإعلام عندما صار معيار تقيم الإعلامي جمالها و وسامته ثم الواسطة ما مهم ما يحمل من مؤهلات حضور حسن مخارج ألفاظ وغيرها من معيار الإعلامي نفس أسلوب النقاش في المسطبة هو الأسلوب في شاشةالتلفاز تجد المذيع لا يلم بمعلومات كافية عن الشخص المستضاف وتوضع له أسئلة الحوار التي يسردها وقد تكون الإجابة للسؤال القادم قد تعرض لها المستضاف في الإجابة على السؤال الأول لكن مقدم البرنامج الإعلامي تجده في حين تحدث المستضاف هو شارد تفكيره في السؤال القادم ويطرح السؤال القادم ههههههههه قد يكون قد تطرق لهالمستضاف في عرض كلامه على السؤال الأول وهذا يحدث كثيراً
05-17-2016, 02:31 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ياخي نحن زمان جانا الفنان صلاح ابن البادية في حلتنا بقينا نتكلم مع ناس الحلول الجنبنا بطرف نخرتنا كونو جانا الفنان ود البادية واتوا ما جاكم هههههههههه فنان من دار اللذاعة غنا في الرادي وغنا في حلتنا اذن حلتنا والرادي واحد شفت العز دا كيف ؟ انا لو منك ولا بتكلم مع زول ذاتو كلامي في دار اللذاعة فقطاً لاغير مضيع رقبتك ساكت اللوحة دي بتجيب لي كم بقرة ماخد ؟
ههههههههههههههههههههههههههههه ههههههههههههههههههههههههههههههه هههههههههههههههههههههههههههههههه والله إت مسلط وحات شيخي تور الجريف أب عنقريباً طار وركا في باسبار قت لي قاعدين تغيظوا في ناس الحلَّال التانية ( جاكم ود البادية ههههههههههههه )
بمناسبة الفنان البجي من الخرتوم حكى لي مرة عازف الكمان الماهر ( إسماعيل عبد الجبار ) عندما ألتقيته في دبي وعرف أني من شندي قال لي : مرة مشينا مع الفنان مصطفى سيد أحمد شندي ... وطبعاً أهلكم ناس دلوكا وعرضة سااااكت مصطفى سيد أحمد يغني والناس هامدة في الكراسي مافي زول قام في نهاية الأمر قام واحد اخو بنات طلع المسرح هزَّ في مصطفى وقال لي في أضانو والله الشنب عندك يا اللخو لكن غنا ما عندك بتعريفة هههههههههههههههههه
05-17-2016, 02:52 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: عليك الله يا ود المنسي الفاني بمدحة الطايرة السودانية واهديها لحجاج التكلة الفكي حامد وسرحان الشيخ تاي الله اللم النفيدية راس في طاقية
والله يا ود البوش دورت عليها كاملة بصوت الفنان الكابلي لكن لم اوفق سوف انزل لك الجزء الذي نزل منالكابلي والفيديو التاني من أولاد حاج الماحي لكن الصوت ما حلو
05-17-2016, 03:04 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: وإنت أدري ياودالبوش "الدقيق فين" أي مايسمي بدقيق الإسترالي ، والزمن داك لا سيقا ولا.....الخخيم البدو هي بالقرب من التُّكل، أها قلت مخاطبا للبدوي:ياخي أني مستعجل وبعدين الإسترالي ماباكلو،أعملو لي سنسن تريد ساكت"ثريد"ليضحك البدويُّ ملْ فيه، ويقول:"موخشمك الإسترالي لي رقبتي مالقيتو، أسوي ليك"
الحبيب الرايمو ود المقدم سبحت بين مفردتك التي لا تمل النفس من تجرعها وذكرتني بمفرد الدقيق الفين الدقيق الأسترالي حبوبتن لينا عمة الوالد بتقول لي الدقيق الإنصراري والله ممنون لعودة الطيور المهاجرة ود البوش و ود المقدم
وسوف تسعد بهذه المفردة نسمة البطانة بت ابوحريرة كثيراً تحياتي ومودتي ود المقدم
نسمة البطانة دي بالذات عندي ليها لوحة تخليها تخت يديها في راسا وتتفن في الواطا وغلا تدردق عديل كدا وهذه اللوحة رسمت في خيالي الاسبوع الفات دا في الرياض في موقف يخلي شعرة الجلد تكلب مرة واحدة السودانيين ديل عندهم مواقف تجنن حرم
05-17-2016, 03:07 PM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
Quote: والله يا ود البوش دورت عليها كاملة بصوت الفنان الكابلي
. . قت لي قاليهو غنا بتعريفة ما عندك ؟ هههههههههههههههههههههههههههههه ههههههههههههههههههههههههههههه هههههههههههههههههههههههههههههه مبالغات علي الجزيمة يا ود المنسي كان باريت حكاويك وحكاوي علا نرجع اهلنا ميطي ساكت مسجل ناشونال ما نشيلو معانا . . عاين لي جاي خالي البلولة ود علوبة هو الذي تحكم في ذوقنا الفني من تبينا الرادي الوحيد في الفريق حقو وتسمع الغنا البدورو هو ولازمن من اللازم يكون فنانك المفضل واحد من ديل ود البادية خلف الله حمد ابوعبيدة حسن الكاشف احمد المصطفى محمد احمد عوض الخ الخ الباقي معروف وحسك اضانك تنقد ما تسمع كابلي ود اللمين الخ الخ الخ والباقي معروف وهكذا لليوم العلينا دا هكذا دواليك
05-17-2016, 03:18 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ستاذنا علي عبد الوهاب عنده بوست جميل جدا وعنوانه" رفقا بناس الضواحي.. بعض العبارات لا نفهمها"".. وفي هذا البوست كتب عبيد ود الطيب مداخلة رائعة جدا .. لكن ما كل الناس بيفهموها.. ونحن فهمناها بعد طلب المساعدات الخارجية، وخاصة من الشايقية المعانا في الغرفة، وبدأ ود الطيب مداخلته بهذه العبارة:" تحياتي الجميلين عشاق الخندريس جميعا... اخي الضل الرهين استاذ علي .. نعم ضل رهين لأنك تجمع الأحباب"" ونحن نقول هنا لصاحب البوست الأستاذ خالد ود المنسي :" نعم يا خالد انك ايضا ضل رهين لأنك تجمع الأحباب".. وقد رد صاحب البوست الأستاذ علي بهذه العبارة الجزلة وقال:"-: تخيل انكم جميعا في حلقات تلفزيونية عن هذا الوطن الرائع .. بنفس الشرح والعمق...."". وهسع لمن انا قريت مداخلة حبيبنا الرجل الأصيل صاحب الأيادي البيضاء النشمي ود البوش وقرأنا لوحته التصويرية الأنيقة الرائعة عن الخالة فاطنة بت حليمة ، وكذلك قرأنا رد حبيبنا الريفي القروي عبيد ود الطيب، تأكدت من صحة كلام الأستاذ علي عبد الوهاب بانكم جميعا كان لا بد ان تجتمعوا في برامج تلفزيونية ونحكي عن هذا الوطن الجميل .. الوطن السمح .. والوطن ما سمح إلا بسماحتكم انتو ... . . بس كمان يا ود البوش وود عبيد براحة علينا شوية ... وهسع كان ما الشايقية المعانا والبتساعدنا في فهم بعض المصطلحات والعبارات مثل .. الضقلة,, والمشبول.. واثر القراف... ما كنا فهمنا القصد المقصود.. وقلنا للشايقية :" انتي شن عرفك بكلام الكبابيش والرباطاب"" فقالت : كلامنا واحد .. لان كلام اهل الريف واهل البادية والقرى كله بتشابه ...ونحن بنتأثر بجيرانا..."" . فالشكر لكم جميعا يا ناس يا سمحين .. فوالله لولاكم لكانت الأيام هنا في هذه الغربة القساية بطيئة ثقيلة... ولا ننسى في هذه العجالة ان نشكر صاحب الحوش الكبير الباشمهندس بكري الذي اتاح لنا كل هذا الفرح .. وكل هذا التواصل الأنيق .. والله يديكم الصحة والعافية
الأميرة أميرة المفردة القديمة لها مدلوها من رنة لفظها هسي لما يقول لك ( أختر ) تحسي من حروف المفردة دلالة أمشي جاء جاء خليل فرح المحسي من أرض الشمال ( المحس ) قضى بعض من أيام شبابه في الجزيرة لظروف عمل لكن عندما نشد الشعر فاق شعره أبناء البادية مفردة ونافسهم في مفردتهم أنظري في شعر خليل فرح الضواحي ود مدني تجدي العجب ولك الشكر على كل حرف خطه كي بوردك يا أميرة
05-17-2016, 03:23 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: نسمة البطانة دي بالذات عندي ليها لوحة تخليها تخت يديها في راسا وتتفن في الواطا وغلا تدردق عديل كدا وهذه اللوحة رسمت في خيالي الاسبوع الفات دا في الرياض في موقف يخلي شعرة الجلد تكلب مرة واحدة السودانيين ديل عندهم مواقف تجنن حرم
منظرين قدوم نسمة البطانة بت أبوحريرة
لكن ود البلولة حاكم الناس بي رادي ههههههههههه والبقول أخ يتلخ
05-17-2016, 03:29 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
تحياتي ومعزتي لكل سمحين النافلة، وناس أم عروض وشكرا لصاحب الديوان الممهول والقدح الماهل أخوي خالد الذي جمعنا يا عبدالله أخوي زولك البدوي دخَّل اللَّفندي في وعرة اها قِرياف التُّمباك قالوا كعب، لذا قال شاعرهم الخلاَّني اسوِّي التابة ليَّا مقوت دايرك تبقي من تالا البرد كبُّوت *التابة هي التمباك، وتحديدا الرَّيش من التمباك أي قبل يُسحن ومقوت أي كأنه يتقوّت بها، والكبوت هو البالطو ، وهنا كناية علي أنه يتمني الزواج منها، ودي إشارة لأن أهل البادية، الزوج ينام في الشق الجنوبي وزوجته تنام شمالا، والبرد يأتي من الشمال ودي عادة عندهم فرضا،"راجع بوست لي قديم" تحياتي الأخت أم نفل أميرة بت السيد، ولك علينا دين ، في كل مداخلة سوف نشرح أو نعمل حاشية ولنسمة البطانة كما يقول أخونا خالد،أختنا بت أبوحريرة، وياله من إسم يملأ الفرقان والبوادي والريف، والبطانة هي سدرة الخلود لكل البوادي، شايف أختنا عفاف، أهدتنا صورة لهرع راحل، وبمناسبة الهرع الراحل، نهديها هذا المقطع من غنا الجراري ذات خريف بالبادية، توغل الأبالة جنوبا، وتأخروا قليلا في العودة،وفي صباح ممطر، حدَّقت آمنة بت صقر، للهرع الراحل من الجنوب شمالا، وقالت تخاطبه من غنا الجراري: الهرع الجيت من فجُر دقشت آتو في البزُر لقيت عبدول ودصقُر وهاد كاكليت فوق بكُر *دقشت أي من قابلت في الشباب"البزُر" وهاد أي إتخذا جملا قويا وأصيلا "كاكليت" فحلا لإبله تحياتي أخي حيدر والأخت مني عمسيب والفنان العريفي ومعزة صادقة للجميع
05-17-2016, 06:19 PM
عفاف أبو حريرة عفاف أبو حريرة
تاريخ التسجيل: 12-28-2006
مجموع المشاركات: 1818
المزكور ما منسي واهل الدار كلكم والبنوت وعلي راسهم بت عمسيب ماتنفقدي في شينه يامنى والله ياخالد الرحيل ما عز العرب الرحيل بشتنه ورقاد واطه والله جوطه ماعاديه وطبعا لازم حوادث وتلفوني كان من ضحايا الرحول والله فاقداكم اول نفاجكم ده كان زي الدكان اسي بقي زي كيس الصعوط ههههههه لا وكمان جاب ناس سمحين والوعره دخله دوده حباب ود البوش انت والوليدات ياربي تكونو طيبين خالد كان غبت عليكم والله لي هسع مهجراويه ههههههه لكن عالم الله ماغبتو من خاطري بالزات زهور وورود بت عمسيب
05-17-2016, 06:27 PM
عبدالعزيز الفاضلابى عبدالعزيز الفاضلابى
تاريخ التسجيل: 07-02-2008
مجموع المشاركات: 8199
خالد بالغتا عديل الضواحي ونانسي بتسافر بيك الي اماكن عجيبه شكرا ابا احمد
Quote: نسمة البطانة دي بالذات عندي ليها لوحة تخليها تخت يديها في راسا وتتفن في الواطا وغلا تدردق عديل كدا وهذه اللوحة رسمت في خيالي الاسبوع الفات دا في الرياض في موقف يخلي شعرة الجلد تكلب مرة واحدة السودانيين ديل عندهم مواقف تجنن حرم
عبدالله انا منتظره واكيد النفاج بي حكاويك الواحد من ضله مابقوم
05-17-2016, 06:33 PM
عفاف أبو حريرة عفاف أبو حريرة
تاريخ التسجيل: 12-28-2006
مجموع المشاركات: 1818
Quote: تحياتي ومعزتي لكل سمحين النافلة، وناس أم عروض وشكرا لصاحب الديوان الممهول والقدح الماهل أخوي خالد الذي جمعنا يا عبدالله أخوي زولك البدوي دخَّل اللَّفندي في وعرة اها قِرياف التُّمباك قالوا كعب، لذا قال شاعرهم الخلاَّني اسوِّي التابة ليَّا مقوت دايرك تبقي من تالا البرد كبُّوت *التابة هي التمباك، وتحديدا الرَّيش من التمباك أي قبل يُسحن ومقوت أي كأنه يتقوّت بها، والكبوت هو البالطو ، وهنا كناية علي أنه يتمني الزواج منها، ودي إشارة لأن أهل البادية، الزوج ينام في الشق الجنوبي وزوجته تنام شمالا، والبرد يأتي من الشمال ودي عادة عندهم فرضا،"راجع بوست لي قديم" تحياتي الأخت أم نفل أميرة بت السيد، ولك علينا دين ، في كل مداخلة سوف نشرح أو نعمل حاشية ولنسمة البطانة كما يقول أخونا خالد،أختنا بت أبوحريرة، وياله من إسم يملأ الفرقان والبوادي والريف، والبطانة هي سدرة الخلود لكل البوادي، شايف أختنا عفاف، أهدتنا صورة لهرع راحل، وبمناسبة الهرع الراحل، نهديها هذا المقطع من غنا الجراري ذات خريف بالبادية، توغل الأبالة جنوبا، وتأخروا قليلا في العودة،وفي صباح ممطر، حدَّقت آمنة بت صقر، للهرع الراحل من الجنوب شمالا، وقالت تخاطبه من غنا الجراري: الهرع الجيت من فجُر دقشت آتو في البزُر لقيت عبدول ودصقُر وهاد كاكليت فوق بكُر *دقشت أي من قابلت في الشباب"البزُر" وهاد أي إتخذا جملا قويا وأصيلا "كاكليت" فحلا لإبله تحياتي أخي حيدر والأخت مني عمسيب والفنان العريفي ومعزة صادقة للجميع
لا تعليق غير نقول سلم فاك أخوي ود المقدم في النضمي السمح
05-17-2016, 07:08 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: المزكور ما منسي واهل الدار كلكم والبنوت وعلي راسهم بت عمسيب ماتنفقدي في شينه يامنى والله ياخالد الرحيل ما عز العرب الرحيل بشتنه ورقاد واطه والله جوطه ماعاديه وطبعا لازم حوادث وتلفوني كان من ضحايا الرحول والله فاقداكم اول نفاجكم ده كان زي الدكان اسي بقي زي كيس الصعوط ههههههه لا وكمان جاب ناس سمحين والوعره دخله دوده حباب ود البوش انت والوليدات ياربي تكونو طيبين خالد كان غبت عليكم والله لي هسع مهجراويه ههههههه لكن عالم الله ماغبتو من خاطري بالزات زهور وورود بت عمسيب
نسمة البطانة حمد الله سلامـــــة وبركة بي الشوفة والله مشتاقين لي حديثك الطاعم يأنسنا يا زولة لما الأمن يستقر أبقي مهاجرية ابقي رباطية المهم شوفتك بت عمسيب أمس جات مكندكة مسوية ليها دية في بوستات الحيكومة وعمايلها الودت البلد في داهية والله لما دخلت بي النفاج وتهرج ما عرفتها من الغبرة ما تغيبي كفاية بسمات هربت مننا عديل وقاطعتنا القحوف لك التحية والمودة
05-17-2016, 07:12 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
انا اخوك اتي دي كب انقوم على لوحتك الفنية اسلمك ليها اسع تي دي صرة في خيت عايني لي جاي الاسبوع الفات محمد علي البصير ضرب الروراي وقال عووووك في مرة سودانية بين الحياة والموت في اللسبتالية بدور الدم وقلنا كدي هشنا واتلبشنا ويا اللسبتالية جوك ناس هايشين ودمهم حار في ظرف ساعتين بس علي بجملة الايمان ناس بنك الدم غلبن اشفطوا الدم من كترة الناس الناس دي يا العافية واقفين على كرعينم المرة دايرين ليها 35 كيس جوها تمانين وناس بنك الدم بعد شوية قالوا وفروا دمكم ليوم تاني خلاص كدا كفاية . . الموقف ما كان بسمح بالتصوير ولكنها لوحة ليس من راها كمن سمع بها . . تحياتي لك ولابو احمد والعيال
05-17-2016, 08:36 PM
عواطف ادريس اسماعيل عواطف ادريس اسماعيل
تاريخ التسجيل: 08-11-2006
مجموع المشاركات: 8006
ود الفاضلاب يعني معنى كلامك ده من هسع نجهز الطاطم ... ولا نقول لك... اخير نشتري لينا مزرعة ونزرع فيها طماطم .. واضحك الله سنك وجعلك دائما من الضاحكين... والله يديك الصحة والعافية .. الحبيبة الغالية عطوفي شكرا للطلة البهية..... تعالي لينا هنا من وقت لآخر,,,, لمن قريت حظر التجول.. قلت في نفسي.. عواطف تكون مشت الاجازة للسودان !!!.. ويا ربي حتصوم في السخانة البدون كهربة دي كيفن!!! والله يديك الصحة والعافية
05-17-2016, 08:57 PM
مني عمسيب مني عمسيب
تاريخ التسجيل: 08-22-2012
مجموع المشاركات: 15691
Quote: ويا ربي حتصوم في السخانة البدون كهربة دي كيفن!!!
بمناسبة الكهرباء القاطعة دى. واحد اتصل على خطيبتو: اسمعى ياروحى ممكن نتقابل؟ قالت ليهو متين؟ قال ليها بُكره. قالت ليهو بُكره كهربتنا شغالة خليها بعد بكره. قال ليها نحن بعد بكره كهربتنا شغالة حا اتصلى عليك مرة تانية نحدد مواعيد. الناس ديل لحدِّى مداخلتى دى ما اتقابلوا. وربنا يديك العافية.
05-17-2016, 10:27 PM
عواطف ادريس اسماعيل عواطف ادريس اسماعيل
تاريخ التسجيل: 08-11-2006
مجموع المشاركات: 8006
Quote: ولنسمة البطانة كما يقول أخونا خالد،أختنا بت أبوحريرة، وياله من إسم يملأ الفرقان والبوادي والريف، والبطانة هي سدرة الخلود لكل البوادي، شايف أختنا عفاف، أهدتنا صورة لهرع راحل، وبمناسبة الهرع الراحل، نهديها هذا المقطع من غنا الجراري ذات خريف بالبادية، توغل الأبالة جنوبا، وتأخروا قليلا في العودة،وفي صباح ممطر، حدَّقت آمنة بت صقر، للهرع الراحل من الجنوب شمالا، وقالت تخاطبه من غنا الجراري: الهرع الجيت من فجُر دقشت آتو في البزُر لقيت عبدول ودصقُر وهاد كاكليت فوق بكُر *دقشت أي من قابلت في الشباب"البزُر" وهاد أي إتخذا جملا قويا وأصيلا "كاكليت" فحلا لإبله تحياتي أخي حيدر والأخت مني عمسيب والفنان العريفي ومعزة صادقة للجميع
هههههههه اخوي عبيد الله يسعد مساك وشكرا علي الاهداء لكن بيني وبينك الا استعين بي المحرب لي بعض المفردات والله النفاج بقي جسر محبه عديل وجاب لينا ناس لينا منهم ذمن
05-17-2016, 11:39 PM
عفاف أبو حريرة عفاف أبو حريرة
تاريخ التسجيل: 12-28-2006
مجموع المشاركات: 1818
Quote: انا اخوك اتي دي كب انقوم على لوحتك الفنية اسلمك ليها اسع تي دي صرة في خيت عايني لي جاي الاسبوع الفات محمد علي البصير ضرب الروراي وقال عووووك في مرة سودانية بين الحياة والموت في اللسبتالية بدور الدم وقلنا كدي هشنا واتلبشنا ويا اللسبتالية جوك ناس هايشين ودمهم حار في ظرف ساعتين بس علي بجملة الايمان ناس بنك الدم غلبن اشفطوا الدم من كترة الناس الناس دي يا العافية واقفين على كرعينم المرة دايرين ليها 35 كيس جوها تمانين وناس بنك الدم بعد شوية قالوا وفروا دمكم ليوم تاني خلاص كدا كفاية . . الموقف ما كان بسمح بالتصوير ولكنها لوحة ليس من راها كمن سمع بها .
أخوي الما انذكـــر في شينـة ممــا تبّ أخوي الفي الدواس شال الضكـارة وعبّا أخوي الشخصو بين الناس حضور ماغبّ رافـع راسي ...فوق درب المكـــارم خبّ
05-18-2016, 07:40 AM
مني عمسيب مني عمسيب
تاريخ التسجيل: 08-22-2012
مجموع المشاركات: 15691
Quote: يا النفاجباب لو سمحتوا وبارغم من الجراح نفسي اسمع وحياة المحبة واشواقي وحناني .
ولكم وفرة الحب .
بت عمسيب طلباتك أمر يا سمحة الطاري وشكراً على كوم الزهور لكن كان جدعتي ليك معاهن تميرات وحلاوة طحنية كان تميتي الشكرة هههههههههههههه المجرين دلوعني سألوني مولود يوم كم وريتم رجعت من العمل لقيت البيت يقج تورتات وهنبوكات هههههههه قولوا عيد ميلاد ابو أحمد الزوجة وأمها وأختها وابوها وحت أحمد ينقز زي عتيد البرم ( الله يحفظه ) رصو الشمع الما شالتو التورتا ههههههههه طفيتو في خمسة نفخات ( مو كتير يا بت عمسيب ) وبعده الهدايا .... أخوك قال الليلة ألقى لي هِدمات وجزيمة تقي كرعي شر برد كوسوفا القاهر وحات الله فتحت الوريقات جت عليهن شي كتاب أدب واخر كرفتا وأخر وردة قلت لهم ها ناس مافي حلاوة طحنية هههههههههه في شيتكم دا ولا لِحمات
ولك ود الصحافة
هدية
05-18-2016, 01:54 PM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
Quote: أخوى أنا أخوى أنا الشَفْ المقرَّن حـَبلو أخوى أنا خٌرسِك آ آمنه السمِح فى شَبلوْ أخوىْ وارثْ القيَم من الرجال القبلو أخوى أنا بفتَح الباب المسوكَر طبلو ************************ أبواتِك قبيل برفو وبعدلو المايلة وإيدك وابِل الضحوى البسوق لا القايلة تسلم ليا يا دراج ... عصام العايله تسلم ليا يا الحوض البجــٍم الضايلة *********************** إيدك وابل النتره البتدوى رعودو وصدرك واسع البحر البعيدة حدودو أخوى كنز الرجا المــِن تبا نادر عودو وين ما يمشى يا ربى العديلة تقودو
يا سلام يا ود المقدم علي الكلام الطيب وأزيد فوق وصفك المنضوم حلي كانت حُلي المرا’ زمان عديدة الورقة ومكانها الرأس تلصق في الشعر الزمام اب رشمة والدقة والزرزور الشف كما وصفه ود المقدم تكون الذهب فيه على شكل ورقة أم جنيه ذهب او نص جنيه الخرز الفداية والحجل ويصنع من الذهب او الفضة او النحاس وأحفظ مالك غويشة في شكل سلسلة من أنصاف الجنيه الذهبي
وهنبوكات هههههههه>> (QUOTE) >>>>>>>>> الله يجازي شيطان عقلك...... كل سنة وانت طيب وهابي بيرث دي.. وتقبل تهاني وتحيات المسنوحة بسمات والتي ستشرفنا يوم الثلاثاء القادم قادمة من بلاد الانجليز ... واظنها تكون قد تأثرت بهم .. وتجينا ببرود لم نعهدها فيها من قبل لأننا بنسمع ان الانجليز يتسمون بالبرود الشديد.. ولا ندري ما صحة هذا القول...ويقولون انهم لا يتكلمون مع الغرباء وكلامهم قليل .. والجواب على قدر السؤال... أما الأمريكان فحدث ولا حرج.....ما بقيفوا من الكلام وشمشارين وكلامهم كتير ويدخلوا في الونسة بدون دعوة.... والله يديك الصحة والعافية
05-18-2016, 02:28 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ضاربين الهم بالفرح ,, الله يجازى الكان السبب
والله يا الفاضلابي الزول جميل خالص وصوتو حلو كتير ودمو خفيف أجمل أصوات كثيراً من بغال القنوات الفضائية والقصيد طبعاٌ من كلمات الفنان الشاعر ود الرضي الذي يمتاز بوصف الحسان
05-18-2016, 02:38 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: اخونا ود المنسي جايب لي ضيف عزيز علي اخونا سيف اليزل ختم " بريقع" عليك الله رش الراكوبة دي شوية من الحر ده
والله يا العريفي يوم المنى أن يكون هذا الشخص الجميل بيننا أقدم نبذة تعريفية لهذا الشخص هو من أبناء شندي الجميلة بأهلها سيف اليزل سر الختم من أسرة عريقة في شندي أسرة فنية طبعاً اسم الشهرة بريقع ومن منَّا لا يعرف بريقع ( ولد حجا في جنة الأطفال ) طبعاً ود البوش ما شاف جنة الأطفال جاري من حواشة لي حواشة في ضهر ضانو وسعيتو هي أسرة الفنان الجميل الطيب عبد الله ... حجا ... الفنان شرف الدين حسين ... الفنان الأستاذ عوض عبدالله والشعرة الكبيرة بنت شندي الملكة بت حاج أحمد وبالمناسبة بريقع هذا شاعر وله الجميل من الشعر المرهف وكما أشتهر أجداده في مدينة شندي بمنتدى أيام كان المقاهي هي منتديات الثقافة السياسة والنوادر ( قهوة التيمان ) وهي من أشهر مقاهي شندي ( منتدى المثقفين قديماً ) مع قهوة بابو وقهوة هبار وقهوة الكاظم مرحب بالأخر والصديق الجميل سيف اليزل بريقع
05-18-2016, 02:40 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: الله يجازي شيطان عقلك...... كل سنة وانت طيب وهابي بيرث دي.. وتقبل تهاني وتحيات المسنوحة بسمات والتي ستشرفنا يوم الثلاثاء القادم قادمة من بلاد الانجليز ... واظنها تكون قد تأثرت بهم .. وتجينا ببرود لم نعهدها فيها من قبل لأننا بنسمع ان الانجليز يتسمون بالبرود الشديد.. ولا ندري ما صحة هذا القول...ويقولون انهم لا يتكلمون مع الغرباء وكلامهم قليل .. والجواب على قدر السؤال... أما الأمريكان فحدث ولا حرج.....ما بقيفوا من الكلام وشمشارين وكلامهم كتير ويدخلوا في الونسة بدون دعوة.... والله يديك الصحة والعافية
ههههههههههههه والله يا الأميرة هذه حقائق عشت بين الناس ديل ( الأوروبين وكاني عايش في شندي ) كنت أعتز شديد ببدويتي وبساطتي ترجع بالسلامة بسمات وبسمة أتبرة والأتبراوي دي دهب شيبون ما بتغير وجعلية حامية لو كبوا فيها برود كل الأنجليز تكون نار مولعة في جوفها تحياتي لابتهال وامتثال و بسمات هههههههه الشايقية
05-18-2016, 03:49 PM
عفاف أبو حريرة عفاف أبو حريرة
تاريخ التسجيل: 12-28-2006
مجموع المشاركات: 1818
Quote: والله يا العريفي يوم المنى أن يكون هذا الشخص الجميل بيننا أقدم نبذة تعريفية لهذا الشخص هو من أبناء شندي الجميلة بأهلها سيف اليزل سر الختم من أسرة عريقة في شندي أسرة فنية طبعاً اسم الشهرة بريقع ومن منَّا لا يعرف بريقع ( ولد حجا في جنة الأطفال )
هههههههه بريقع يكون بيننا يامرحبا يا مرحبا نحنا نفرش الارض ورد وياسمين ياالعريفي والله النفاج شكله ح يكون لوحه جميله تسعد الروح ودي اول ضربت ريشه يا العريفي ياخ برقيع ده عندي معاي قصص محفوره في زاكرتي دائما يوم الجمعه انا بكون واحدي من اتنين ياببكي لانه فقرة جحا وبريقع والسنينه فاتتني يا دارشني مراسيل عشان ماتفوتني يالله كانت ايام جميله يوم الجمعه ده اليوم الوحيد التلفزيون بفتح فيه الساعه عشره وجنة الاطفال كانت فعلا بالنسبه لينا جنه حباب برقيع الف
05-18-2016, 04:08 PM
عفاف أبو حريرة عفاف أبو حريرة
تاريخ التسجيل: 12-28-2006
مجموع المشاركات: 1818
Quote: ههههههههههههه والله يا الأميرة هذه حقائق عشت بين الناس ديل ( الأوروبين وكاني عايش في شندي ) كنت أعتز شديد ببدويتي وبساطتي
ابو احمد دي صفات العظماء لما الانسان يكون مليان من جوه ومتصالح مع نفسه اكيد بعيش بحب كل شي حوله ولماتحب الحواليك دئما بتكون عاوز تصل ليهم عشان كده بكون البساطه شعارك في الحياه كلها
خلي ودالبوش يجي يحكي لينا عن الفلهمه 0وح 0وزي كان ههههههههه
05-18-2016, 06:01 PM
عواطف ادريس اسماعيل عواطف ادريس اسماعيل
تاريخ التسجيل: 08-11-2006
مجموع المشاركات: 8006
Quote: هههههههه بريقع يكون بيننا يامرحبا يا مرحبا نحنا نفرش الارض ورد وياسمين ياالعريفي والله النفاج شكله ح يكون لوحه جميله تسعد الروح ودي اول ضربت ريشه يا العريفي ياخ برقيع ده عندي معاي قصص محفوره في زاكرتي دائما يوم الجمعه انا بكون واحدي من اتنين ياببكي لانه فقرة جحا وبريقع والسنينه فاتتني يا دارشني مراسيل عشان ماتفوتني يالله كانت ايام جميله يوم الجمعه ده اليوم الوحيد التلفزيون بفتح فيه الساعه عشره وجنة الاطفال كانت فعلا بالنسبه لينا جنه حباب برقيع الف
يا نسمة البطانة دي حلقة أكيد فاتتك وانت جارية علي الدكان وما حايقا في المراسيل
05-18-2016, 07:09 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ابو احمد دي صفات العظماء لما الانسان يكون مليان من جوه ومتصالح مع نفسه اكيد بعيش بحب كل شي حوله ولماتحب الحواليك دئما بتكون عاوز تصل ليهم عشان كده بكون البساطه شعارك في الحياه كلها
خلي ودالبوش يجي يحكي لينا عن الفلهمه 0وح 0وزي كان ههههههههه
صدقتي يا نسمة البطانة التصالح مع النفس مهم والفات قديمو تاه من طرائف أيام الدراسة في المدينة التي كنا ندرس فيها هناك طالب عمل عيد ميلاد كنت من بين المدعوين المهم مشيت ولهطت في الحلويات زين وكان من ضمن الحضور من الحسان حور وكان معنا طالب من أصاحب المزحة عجبني الحسان وقلت لهم بعد الحفل أنا عاوز اعمل عيد ميلاد قال لي الشخص الظريف هذا يا خالد عيد ميلاد شنو البتسوي أنت أنت دق ليك ظار وأعزم الحِسان ههههههههههه
05-18-2016, 07:48 PM
عفاف أبو حريرة عفاف أبو حريرة
تاريخ التسجيل: 12-28-2006
مجموع المشاركات: 1818
حباب خالد ههههههه والله كان ماتقع علي كضبه اقول ليك شفتها والله ياخالد انا واخواني كنا بنضحك ضحك بنضحك علي شنو مابعرف بس جحا يدخل قبل يتكلم نحن نتفقع بالضحك انشاء دخلت طوفي دي تجيب لينا خالد المحرب وودشيقوق عواطف يطيب ليك وبيك المقام
05-18-2016, 08:22 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
حباب أخونا بريقع ويا مراااااحب ياخ إسم بريقع دي عندو دوي وعبق بالبوادي قصاصة قديمة بمناسبة بريقع أقبلت أم بريقع مهرولة صوب الهلالي لتسأله الخبر وكان الهلالي عند خيمة إبنته أُم شوايل جالسا بجوارها وكانت أم شوايل منتشية حيث انها في اليوم الثالث من عُرسها وكان اليوم ماطر أُعجب الهلالي بمنظر الأرض الممطورة وبعرس إبنته فصاح قائلا:- (الوطاه اليوم سمحة بِلْحيل) لترد إبنته وقد اكملت أيّام (القيلة) وتذوقت لتوها (الشّلهُوب) او بما يسمي مجازا العسل فصاحت قائلة: (الوطاه واطاها جوزها) اي وطئها زوجها وقبل ان تبدأ أُم بريقع بالكلام المباح سبقها الهلالي قائلا : (اللِّيلة بت اللِّضينة دي خبارها جات لافحة قُربابها في كتفها) كناية عن السِّناحة والدُّراب الذي يتطاير من حُفر خشمها الذي أمْحَلته السنين فصاحت قائلة: (أني ماني بت اللِّضينة) ليرد الهلالي (كان ماكي بت اللِّضينة امشي اسألي ابوكي من ) (حُلو الشَم وسمح الأتر والضُل الرَّهين ) فذهبت (العِيفة) مهرولة صوب والدها ونسيت المسكينة قصة البت العناق وكأنِّي اسمع (هبهبت) وفرقعت (قُربابها) لأنها في عجلة ولكن حِجول الفضة (المكاكي) منعنها الهرولة فصاح الهلالي منشدا: حجولها مكاكي ماهِن فاو ؤ ضرس الفيل بِهدِّل ايديها مو رَسَّاو الليلة لقيت ديفة باو والخضرة أُم لفافيح المعا الهلاَّو ووصلت والدها وبعد السلام اخبرته القصة ليرد: (حُلو الشَّم هو القرض وسمحة الأتر درب الضّيب (الذئب) في الرَّملة والضُّل الرَّهين الحُمَرْ شجر التبلدي) ومن حسن حظها قابلت إبنها (بِريقِع) في الطريق والذي يشبه بروفسير عبدالله علي ابراهيم في سرعة البديهة ومعرفة موروث البادية والهمة الكبيرة والمفردة العتيقة والمعتَّقة فأخبرت بريقع الخبر ورد جده فقال: (تمام جدي (إضينة) قول لي ابوي: (حُلو الشَم الجنا والضُّل الرَّهين الرِّجال وسمح الأتر المطرة) شفت بريقع كيف داهية يابريفع أخونا
05-19-2016, 01:47 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
ياسلام ياعبدالرحيم لاعدمناك ياخ ،، بالمناسبة ياعبدالرحيم ألمك والمنسى ده بلدياتك عبدالرحيم ده يامك ولدكم من المحمية غايتو ياعبدالرحيم أميرة السيد بعد تسمع الشريط ده حاتطلب لجوء فى المحمية غايتو هى وامتثال يكونن قايلات الشريط ده فلم اكشن صيني عبيد ولد الطيب ياخ الشوق قواسيب والبركة بالشوفة وكتر خير ودالمنسى
05-20-2016, 09:38 AM
مني عمسيب مني عمسيب
تاريخ التسجيل: 08-22-2012
مجموع المشاركات: 15691
Quote: ياسلام ياعبدالرحيم لاعدمناك ياخ ،، بالمناسبة ياعبدالرحيم ألمك والمنسى ده بلدياتك عبدالرحيم ده يامك ولدكم من المحمية غايتو ياعبدالرحيم أميرة السيد بعد تسمع الشريط ده حاتطلب لجوء فى المحمية غايتو هى وامتثال يكونن قايلات الشريط ده فلم اكشن صيني عبيد ولد الطيب ياخ الشوق قواسيب والبركة بالشوفة وكتر خير ودالمنسى
الفاضلابي مقطوع الطاري ما لقيت خبرو الزول كلامــــــو سمح بي الحيل
05-21-2016, 01:28 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
الشاعر ود الرضى من فحول شعراء الحقيبة رأى حُلم وفي حُلمه رأى أنه يتلصص على على محبوبته في غفلة الرغيب في دارها و بملابس البيت نظر من خرم في الباب فرأى ما رأى ووصف ذلك في مفردات طيبة شعراً نحدوا به الفيافي طربا لنرى مع بعض ماذا قال الشاعر ود الرضي في حُلمه هذا الذي كان في ميلاد واحدة من عيون شعره ليالي الخير جادن وأجمال ما في القصيدة وصفه لنفسه وهو يتلصص من خرم أو مكان في الدار قال كانت المحبوبة تجول في حوش دارها وقال فيها بوبح جيدو أي إلتفت ذات اليمين وذات اليسار في حركة مترغب قد تنبه أن هناك من يراغبه بوبح جِيدو وأبصر واقل وعندما نقول وَقَّل عيناه أي ركزها في مكان معين والوقلة دوماً قد يكون من حذر وقد يكون من أعجاب بشئ والله أعلم ظنَّ مُراغب صدق العاقل تلكم الحركات بوبحت الجيد ووقلة العين ظناً منها أنَّ هناك من يراغبها وهي في دارها حُرة ولم تقطع الشك باليقين لكن جدع المخضوب فوق الفاقل المخضوب الأيدي والخِضاب هو الحناء الفاقل وهو الكفل وتلَّ اليمني ومشى متاقّل لا ريث ولا جعلُ
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
اسامه العريفي
حيدر حسن ميرغني
عبدالله ود البوش
عبيد الطيب
مني عمسيب
خالد علي محجوب المنسي
عفاف أبو حريرة
عبدالعزيز الفاضلابى
عواطف ادريس اسماعيل
سيف الدولة ختم بريقع
Abdelrahim Mansour
فيس بوك
تويتر
انستقرام
يوتيوب
بنتيريست