|
زكريات المسلسل
|
اها .... وقت المسلسل بين تسعه وعشره مساء في السودان .. المسلسل في بيتنا وفي بيوت سودانيه كثيره كانت لها وقع خاص .. في وقت الصيف خصوصا ..زكريات وصور من الماضي الجميل ... السراير والبنابر بره في الحوش تخلو الشوارع ويصمت المكان ويدخل المكان في خشوع غريب اثناء المسلسل وتشخص الانظار نحو التفيزيون .. اها ... تعاولو نحكي عن زكريا هذا الحدث اليومي ... .... ويجي الصوت .. يابت جيبي الريموت ياود نادي اماني تجهز الشاي تعالوا المسلسل قربت تبداء وتصعد امنيه للسماء انو اماني تقوم تجهز كوبايه شاي وماتخزلنا زي كل مره ..سجمانه لكن طيبه .. اليوم كله قدام المرايه .. وتستجيب السماء واماني تقوم تجهز الشاي وانا استغفر من شيطنتي مع اماني ... اماني دي براها مسلسل .. وتصعد امنيه اخري ان تخرص علانه اثناء المسلسل وتبطل التعليق ..نضامه جد .. اها دي مسلسل تاني وفيلم .. فتضحك السماء وتصعد امنيه اخري انو المطره ماتصب ونضطر ندخل التلفيزيون للصاله زي كل مره اها تجي ... المزيعه الرشيقه ومع ابتسامه عريضه تتمني لنا قضاء اوقات سعيده اثناء المشاهدة ..ونحن نقرقر من العربي الدراب ونحاكي المذيعه ونضحك بدون هم .. وتهب نسمه تحلنا من كتمة الجو .. وتبداء ليله من ليالي الحلميه او المال والبنون وتدخل الموسيقي التصويريه في اعماقنا مع اكواب الشاي ... وشخير الشفع مسلسل وموسيقي اخري ... ويجيك الصوت .. .. قوم ياولد دخل اخوك في الصاله وخلي الناس تقعد في السرير ..و جيب ليك كرسي .. كنا بنحب القعاد في السرير لانو ممكن يتطور لتكيه والتكيه لرقده .. اها بنرفزه ندخل الولد في الصاله ونجي راجعين بكرسي .. افتح الباب يا ولد فلانه جايه تحضر معانا المسلسل ... ونمشي علي الباب ونطنطن ...يااااااخي تاني انا ... يا امي المسلسل بدت .. ياود افتح الباب يسلسل مصارينك وراء كل دعاء عليك بتحس انو في محبه تجاهك .... وقلب ابيض .. ونفتح الباب من غير ما نعاين او نسلم علي الزول .. ونجري راجعين للمسلسل وندخل في مسلسل (ياوود سلم علي خالتك ) ( دي الفتحنا ليها الباب وماعبرناها ) .. الود من يمومو مطرطش وتعتز الوالده لفلانه وباحراج واضح .. ....
المسلسل كان حدث ولمة ودهشه وشاي وطقوس وتلفيزيون قديم .. ..واماني .. ... الز شي لما تقطع الكهربا .. فيي نص المسلسل . اها انتهت الصلاه ومضي وقت الخشوع .. . ونمشي الشارع ونرتكب اشياء تعتبرها الاجيال الكبيره ( معاصي ) ونلعن الحكومه ونشرب السيجاير بالدس ونضحك علي الاساتذه في المدرسه ...... اها في الناصيه في زكريات و..اماني اخري .. نخليها لبوست تاني .. .. لكم الود ..
|
|
|
|
|
|
|
العنوان |
الكاتب |
Date |
زكريات المسلسل | Muhib | 08-25-14, 06:55 AM |
Re: زكريات المسلسل | نعمات عماد | 08-25-14, 03:09 PM |
Re: زكريات المسلسل | Muhib | 08-25-14, 07:07 PM |
Re: زكريات المسلسل | Abu Baker Ahmed Abdel Rahman | 08-25-14, 09:25 PM |
Re: زكريات المسلسل | Muhib | 08-25-14, 10:43 PM |
Re: زكريات المسلسل | Sudany Agouz | 08-26-14, 00:42 AM |
Re: زكريات المسلسل | جلالدونا | 08-26-14, 01:25 AM |
Re: زكريات المسلسل | محمد جبره | 08-26-14, 02:13 AM |
Re: زكريات المسلسل | Muhib | 08-27-14, 01:14 AM |
Re: زكريات المسلسل | Muhib | 08-27-14, 01:20 AM |
Re: زكريات المسلسل | Muhib | 08-27-14, 01:21 AM |
Re: زكريات المسلسل | نعمات عماد | 08-27-14, 06:25 AM |
|
|
|