الرجل السوداني عادةً لمن يجي يعرس بيكون....

Quote: الرجل السوداني عادةً لمن يجي يعرس بكون عمره قريب الأربعين و صلعته أكبر من كرشه..و عادةً العروس بتكون بنت صغيرة و يادوب مخلصة جامعة...هو بكون في رأسه حاجات معينة و هي إنو يعرس و يرجع البيت يلقى طبيخ و ملاحات و أطايب،،،و إنو يجيب أولاد بسرعة،،،و إنو مرتو تمشي معاه المناسبات و تخدم الضيوف و الأهل....البنت بتكون مخلصة جامعة و إمكن تكون عايزة تقرأ و تكمل و تشتغل.....إلخ و ده سيناريو متكرر..و جزء من المشكلة الفرق في العمر و عدم الإتفاق و التخطيط بين الإتنين قبل الزواج أنا دائماً بعتبر الحياة دي هي عبارة عن مدرسة بتتعلم فيها من أخطاء الناس التانية و في الآخر هي إمتحان...أعمامي كلهم متزوجين أجنبيات و ما مبسوطين و لذلك قررت إنو مستحيل أتزوج أجنبية أو عربية...ود خالتي عرس و عمره قريب الأربعين و حسه أولاده لسه صغار و هو زول شكله كبييييير و عشان كده قررت إنو العرس المبكر مهم شديد...بت خالتي عرست واحد أكبر منها شديد بعد قصة حب و عرست بعد تخريجها بيوم و ما عملت الإمتياز لأنو ما كان عايز يستنى و حسه بقى عمرها ثلاتين سنة و عايزة تقرى تاني لكن قالوا ليها شهادتك ما معترف بيها من غير إمتياز و لازم ترجعي تعملي إمتياز تاني....قريبة زوجتي عرست قبل ما تخلص قراية و الآن ما عندها شهادة،،،يعني ضيعت أربعة سنين من عمرها و ما تمت قراية عشان قررت تعرس و الآن ندمانة إنو أخواتها كلهم معاهم شهادات و هي ما عندها أنا إتعلمت من القصص الزي دي...قررت أعرس بدري من سودانية تكون خلصت قرايتها و فرق السن بينا يكون متقارب.....أنا لمّن قررت أعرس كان عمري خمسة و عشرين سنة...ما كنت خلصت الزمالة و كان فاضل لي آخر جزء..جدي وقتها سألني ليه عايز تعرس و إنت لسه ما خلصت تخصصك، الدنيا طارت؟ و كلام كتير زي ده.....زوجتي إتعرفت عليها عن طريق ابن عمي يعني ما في بينا قصة حب في الجامعة و كلام من النوع ده.....لكن وقتها كنت نسبياً مكون نفسي و أهلي ساعدوني و قبل ما أكمل سبعة و عشرين سنة كنت عرست....زوجتي جامعية و أنا من الأول كنت واضح في إنو مستحيل أرتبط بواحدة غير جامعية أو ما عندها طموح...خلصت جامعة و كانت عايزة تعمل ماجستير لكن أمها رفضت و قالت ليها تعالي خشي معاي المطبخ أعلمك الطبيخ لأنو ده أهم ماجستير..طبعاً أمها عرست قبل ما تكمل جامعة و ده إمكن أهم العوامل في موضوع الزواج ده...الزول الأمه ما قرت جامعة أو عمرها ما إشتغلت بكون عادةً عايز يعرس واحدة ست بيت و متفرغة لخدمته...الزول الأمه شغالة بكون عايز واحدة شغالة و جامعية..بس طبعاً كل قاعدة عندها إستثنائات بعد العرس زوجتي قررت تقرأ..أمها قالت ليها ما تضيعي وقتك و حاولي جيبي أطفال بأسرع وقت..إحنا كنا إتفقنا إنو ما حنجيب أطفال في أول سنتين لحدي ما نعرف بعض كويس و نسافر و نشوف الدنيا و نمشي و نجي..في السنتين ديل أي زول سألنا ليه الحمل إتأخر و ليه ما جبتوا عيال و لازم تمشي تكشفوا قبل الوقت يتأخر..أي زول قلنا ليه إحنا متفقين ما نجيب عيال إلا بعد سنتين ما صدقنا المهم بعد ما جبنا عيال هي قررت إنها ما تشتغل لحدي ما العيال يكبروا و ده كان قرارها و أنا إحترمته فااااا شنو....المهم الإتفاق....ما عيب إنك تقول لمرتك ما عايزك تشتغلي طالما إنك فهمتها كده قبل الزواج...و برضو ما عيب إنو واحدة تقول أنا ما عايزة أشتغل و عايزة أقعد في البيت و ده ما بيعني إنها ما عندها طموح أو إنو راجلها ما بشجعها...الموضوع ده لو طلعوا منه الأهل و الأمهات و القرايب بيعمر