Quote: سمعته كثيرا هنا في جدة ( حيث أنني صديق لوالده الاخ مرتضى صباحي وما زلت ) وانا من المعجبين بصوته بل ومنذ اكثر من 8 سنوات امتلكت له شريط كاسيت من حفلات جدة وكنت اسمعه يوميا
معتز صباحي يحتاج لمن يصقل امكانياته الصوتية ويوظفها كفنان محترف
كلم ابو عمير ده يا ياسر وشكرا كثيفا للٌاهداء
انا متآكد انو معتز تربي في جدة
07-25-2013, 01:33 PM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
شكرا استاذنا الموصلي على هذه الاضافه في حق الفنان الشاب معتز صباحي واكيد محتاج لفنان مثلك يمسك بيده ويقوده الى الطريق الصحيح ... ونحنا منتظرنك في جدة وما تحرمنا من اتصالاتك
07-25-2013, 01:53 PM
الرفاعي عبدالعاطي حجر الرفاعي عبدالعاطي حجر
تاريخ التسجيل: 04-27-2005
مجموع المشاركات: 14684
فاطمة عمر نجمة (أغاني وأغاني).. وصاحبة (فرحانة بيك أنا يا جناي)
(35) ثانية كانت بمثابة النقلة الكبيرة لي وهي قدمت صوتي للناس
(35) ثانية فقط كانت كافية لأن تثبت موهبتها العالية.. (35) ثانية فقط كانت كافية لأن تحمل المطربة الشابة "فاطمة عمر" صوتها عبر بوابة الإعلان الخلفية إلى كل بيوت السودان.. (35) ثانية فقط نقلت فيها "فاطمة" بصوت يضوع شجناً و(حنية) أمنيات أم لولدها عبر الشعار الإعلاني (فرحانة بيك أنا يا جناي) الذي تفوق على عدد كبير من الأعمال الغنائية التي بذل فيها كثير من الجهد.. (35) ثانية فقط نقلت "فاطمة" من حيز مطربة لا يعرفها أحد إلى مطربة تبكي كل أمهات السودان مع شجنها حين تقول: (والليلة يا سيد الرجال فرحت أمك وحلتك). انضمت "فاطمة عمر" إلى مجموعة (أغاني وأغاني) لهذا الموسم ضمن (جوقة) مطربيه، ورددت في اليوم الأول أغنية (من أجل حبي)، ووقتها قدمت نفسها للناس (صوت وصورة) بعد أن كان يصلهم منها (صوتها فقط).. (رياحين) التقت بـ"فاطمة" وأدارت معها حواراً صغيراً. { في البداية (رمضان كريم).. ومن هي "فاطمة عمر"؟ - الله أكرم، وتصوموا وتفطروا على خير.. أنا من مواليد أم درمان يوليو 1988 (أكتوبر)، ودرست جامعة الخرطوم قسم الإعلام.. أعمل الآن في شركة إعلانات. { ظهرتِ من وين؟ - ظهرت من خلال إعلان (فرحانة بيك) الذي قدم صوتي للناس، وقبل مشاركتي في (أغاني وأغاني) شاركت في مهرجان (أتنينا) ببورتسودان. { الشعار الإعلاني (35) ثانية غيّرت مسار حياتك؟ - فعلاً (35) ثانية كانت بمثابة النقلة الكبيرة لي وهي قدمت صوتي للناس. وبعض أقربائي وأصدقائي مذهولون من أنني صاحبة إعلان (فرحانة بيك) ولا يعرفون أنني من نفذته، والإعلان أحدث لي (خلعة) على مستوى تقبله من الناس. { في أول ظهور لك في (أغاني وأغاني) قدمت أغنية الفنان "عثمان حسين" بصورة جيدة؟ - أصلاً أنا بحب استمع إلى الأغاني القديمة.. بحب (قصتنا) وكثير من الأغاني القديمة وأغنية (من أجل حبي) أحببتها منذ أيام الثانوي بس ما كنت حافظة منها ولا كلمة، وكنت أستمع لها في (حافلة الترحيل)، وفي السنة الثانية انتقلت إلى مدرسة أخرى وبحثت عنها مجدداً وبديت بعد كده أفهم الكلمات.. وفي بعض الجمل في الأغنية كنت بحس إنو أنا الكاتباها زي (اصلي بعدك ما هويت). { ألم تتخوفي من الغناء لـ"عثمان حسين"؟ - لا.. لأني كنت بحب الأغنية وبحسها، ولو فرضت عليّ أغنية غيرها لم أكن سأجيدها. { هل (الشعار الإعلاني) أم (أغاني وأغاني) هو ما ساهم في تقديمك للناس؟ - والله الشعار الإعلانى هو اللي قدمني للناس.. وقصة الإعلان ده، أنا كنت قاعدة مع مديري في الشركة الإعلانية وطلبت منو شعر إعلاني بمقاييس محددة، إنو يكون بداية أغنية ويظهر في كل التلفزيونات السودانية وتكون كلماتو سودانية وتخاطب الأمهات.. وتفاجأت بعد ذلك بالنجاح الساحق للشعار الإعلاني.. حتى أن أحد أصدقائي المقيمين في القاهرة اتصل بي ذات ليلة وكان موجوداً في حفل زفاف لعروسين مصريين وأخبرني أن الأسرة المصرية زفت عرسانها بـ(فرحانة بيك أنا يا جناي). { الدخول من بوابة الإعلانات ألا يمثل مشكلة؟ - لا ليست مشكلة، هو نوع من الظهور.. في ناس بيظهروا في (نجوم الغد) أو مشاركة في مسرح.. وهو جزء من وظيفتي. { كيف تعاملت مع الشهرة التي أتت لك فجأة؟ - حتى الآن ليست بالأمر المخيف، وفي ناس في الشارع بينادوني (دي هي.. لا ما هي).. وحتى الآن الفئة التي تستمع لي هي فئة كبار السن. { مشاريعك الفنية؟ - لسة ما في حاجة واضحة.. وربنا يوفق. { بتعملي شنو في رمضان؟ - بروفات أغاني جديدة.. وعايزة أطلع أشياء جميلة لأنو الناس ما بتتوقع أظهر في شكل جديد أقل من (فرحانة بيك).. الوصول للقمة ساهل لكن المحافظة عليه صعبة. { أصابك الغرور؟ - لا، لأنو أعظم الناس كانوا بسيطين.
صحيفة المجهر السياسي
07-25-2013, 05:46 PM
الليندي الليندي
تاريخ التسجيل: 05-27-2002
مجموع المشاركات: 1188
Quote: ياخي انت فلته ومغني مهول والله هسع بعد سمعت الابيض ضميرك شعرة جلدي كل-بت ومسكني الظار عديل ----------
الشاب ده عندما زرت السعودية آوائل التسعينات كان طفلا عرفني به ابوه كعازف موهوب في الاورغ وافتكر الكلام ده كان في جده ومفروض يعمل معاي بروفه ويعزف معاي المهم قام شراني قد يكون لسبب وجيه ثم بعد آن كبر وارتوي من الاداء الخليجي وتعلم منه ذهب للسودان وادهش البلد " عركي كلمني عنه تحديدا" ثم آختفى فجآة وحزنت لذلك وحينما عاد في آغاني وآغاني نق نق بعض اصدقائي وقالو لي انت بتجامل ساكت فعلا معاهم حق في الآول حصلت منو شوية لخابيط ولكنه كلاعب الكره الحريف جدا حلقتين تلاته عادت له الفورمة كآحسن ما تكون فاحرز اهدافا غنائيه لا يفعلها الا بيليه وميسي ومارادونا ونيمار في كرة القدم اقولها لك ان معتز هذا لو حافظ على نفسه فهو في رآيي ياتي في مقدمة الخمسة الاحسن صوتا وغناءا في الاربعين عاما الماضية من فئة الرجال معتز في غنائه للابيض ضميرك آضاف لحنا آخرا للحنها الاصلي هنيئا حبيبنا المبدع الكبير الاستاذ الطيب عبد الله بهذه اللوحة العظيمة التي ابتدعتها فوضعها معتز صباحي في اطار من ذهب ربنا يحفظك ويحفظه ذخرا لنا
فقط استاذي علي ( معتز ) أن يتقبل النقد ويعرف قيمته الفنية والجميل أنو معتز له استايله الخاص ولم ينغمس في الاغاني التجارية ولا حاول أن يكون مقلداً ، لك التحية استاذىي الموصلي والتحية أيضاً للعم الشاعر ( مرتضى عبدالرحيم صباحي ) والد ( معتز ) صاحب ( هانت الايام عليك لزيدان ، في عذاب الحب يا ناس لعبدالرحمن عبدالله ، وخلاص مفارق كسلا للتلج مكي وأغنية لبهاء عبدالرحمن ) والكثير من أغنيات ( معتز ) .
سلمت من كل شر
،،،،،
07-26-2013, 00:26 AM
Elmosley Elmosley
تاريخ التسجيل: 03-14-2002
مجموع المشاركات: 34683
Quote: فقط استاذي علي ( معتز ) أن يتقبل النقد ويعرف قيمته الفنية والجميل أنو معتز له استايله الخاص ولم ينغمس في الاغاني التجارية ولا حاول أن يكون مقلداً ، لك التحية استاذىي الموصلي والتحية أيضاً للعم الشاعر ( مرتضى عبدالرحيم صباحي ) والد ( معتز ) صاحب ( هانت الايام عليك لزيدان ، في عذاب الحب يا ناس لعبدالرحمن عبدالله ، وخلاص مفارق كسلا للتلج مكي وأغنية لبهاء عبدالرحمن ) والكثير من أغنيات ( معتز ) .
سلمت من كل شر
والله ياليندي لا ينافس جمال صوت معتز الا بوستك العجيب ده
-------- معتز في مقام الابن ولو احتاجني في اي شيئ سيجدني طوع بنانه يامعتز حافظ على صحتك وبلادنا في مسيس الحاجة لامثالك
ليك الود كله ياليندي
07-25-2013, 05:47 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
ياسر يا خال انا ما غالطت وحتي المعلومة ما أكدتها.. لكن بناء علي كلام ناس اصحابي جدا بيحكو انهم زاملوا معتز بحي الوزارات.. صراحة انا ما صادفته ولمن جيت البلد دي هو ما كان قاعد اظنو بي صورة دائمة.. فوارد جدا يكون برضو الموصلي صاح ..
07-25-2013, 06:25 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا ليندي يا حبوب... شووف لي حل مع صوت فهيمة ده.. غلبني كلللو كلللو استحملو... مااا عارف ليي.. مع انو متأكد ناس كتااار ممكن يشوفوها ابدعت.. الحقني بي وصفة عشان ما عايز اظلم البت دي.. لكن والله غلبببني رسسسمي..
الحلقة عن الفنان الشامل عوض جبريل مواليد 1932م حي الهجرة ام درمان ، الفنان الشامل لأنه مغني وملحن وممثل وشاعر مثلا مع عثمان تور الجر في مسرحية (دامفيقا) في دور (الملك طلحة) . تغنى في بداياته للفنان عثمان حسين (كيف لا أعشق جمالك) أول أغنياته شعراً (لي حبيب شاغل بالي) وغنتها الفنانة فاطمة الحاج من ألحان أحمد زاهر ، وأول اغنية من كلماته والحانه هي (ورد الغرام) وسجلها في الاذاعة سنة 1949م.
تغنى له الكثير من الفنانين أمثال أحمد الجابري (اسمر يا اسمر يا سكر، حبيبتي بستلطفها) ورمضان حسن (الصباح الزاهي) وكمال ترباس (هلا يا هلا ،كفاك ما تبكي يا عيوني ، بقليبك تقول لي تعال وتعال) وبادي محمد الطيب (ست البنات الضوت السهلة) وخلف الله حمد (الليلة وين يا عيني) والامين عبد الغفار (بريدكم يا الما بتلاقوني) وأبوعركي البخيت (الجميل السادة). ومن المطربين الشباب وليد زاكي الدين ، جمال فرفور ، محمود عبد العزيز .
بدأت الحلقة بأغنية (ما تهتموا للأيام) كلمات وألحان عوض جبريل أداها طه جميلة .
(الأيام سجية) الأغنية الثانية كلمات وألحان عوض جبريل غناها نادر ولم تعجبني أبداً أبداً
(يا عديلة يا بيضا) كلمات وألحان عوض جبريل غنتها فهيمة ورغم أن هذا اللون من الغناء يناسبها الا انها ادتها اداء عادي رغم الفرحة الظاهرة وهي بتغني.
(أغالب دمعي واتصبر) كلمات ماضي خضر وألحان عوض جبريل اداها معتز كأسوأ ما يكون الآداء ، طلوع برة الزمن عدم وضوح للكمات ، وبعتبرها عدم احترام لينا نحنا كمستمعين ، لأنه دي حلقات مسجلة لو قي لحظتها حس انه ما بقدر عليها يحولها لي زول تاني ويكفينا شر كلام زي ده .
(الشغل بالي) كلمات عوض جبريل وألحان الجابري وأدتها نسرين الهندي ولم تكن موفقة ابدا في اختيار الأغنية ولا طريقة الآداء فهذه من الالحان الورطة للجابري وخصوصاً في التبديل.
(صدوني حراسك) كلمات وألحان عوض جبريل غناها عبد المنعم حسيب وأدتها منى مجدي باهتة ولم تمتعني ابداً
حلقة أقل من الوسط ولم تعط فناناً بقامة عوض جبريل صاحب 60% تقريباً من الأغاني المنتشرة في الساحة الفنّية خلال العشرة سنين الماضية لم تعطه حقه.
07-25-2013, 07:33 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
غايتو سمعته اغنيتين و احده حقت الجابري غنته نسرين و التانية (كل ما سالته عليك) و غنته منى مجدي الاغنيتين غنوهم بسرعة (البرق الخاطف) و اغنية منى طلعت احسن من بتاعة نسرين الف مرة نسرين اصلاً في الأغنية ما قدمت إي ملمح جمالي لصوته نهائي.
07-25-2013, 07:37 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
اتمنى من الناس البتنتقد انو معتز بيغني بي حركة المايك يشوفو الود ده كان بيغني كييف عشان يغرفو انها حركة دخيييلة وليها اسبابها اللي نتمنى انها تزول في اقرب وقت..تخريمة يا فتح الرحمن انا عندي ليها تسجييل اروووع بس للاسف صوت ساي..
عوض جبريل شاعر ملحن مطرب ممثل .. يعنى ما شاء الله تبارك كان كلو شىء !!! بالله شوف ترباس بغنى كلمات عوض جبريل كييف وشوفنا معتز صباحى غناها كيييف ؟؟ يا معتز أريتك اليوم داك كان مشيت على أهلك ناس العيلفون سلمت عليهم وغبت من الحلقة عدييييييل كده !!والله أنا كنت بعد ما سمعت التسجيل بردد معاهو يا الله صبرنى على نهاية الاغنية!!!! . نسرين هندى عملت لقطات ما بطاله فى تقليد الجابرى لكن الصوت النسائى يفرق من الرجالى !!!!. أذكر فى العام 1982م كانت عندى كوريلا موديل 1980م زرقاء بلون عشقنا الهلال وضعت فيها مسجل رهييب بسماعات خطيرة وكان زمن الشباب !!!! عندى شريط خطيير لترباس( أستريو سارة بالصافية ) يبدأ بجاى تفتش الماضى وفيهو أغانى سيرة رهيبة أبدأ الشريط وأنا طالع من السقاى وشغال ليل فى مطار الخرطوم ما ينتهى الشريط إلا وأنا داخل على موقف مطار الخرطوم !! طلب منى الاخ الاستاذ الامين الهادى وأنا فى تمرين الجمعة الكارب أن أمر عليهم لأخذ زملاء له مدرسين أوصلهم فى طريقى لبحرى وكنت أعرف عدد منهم وكانوا أربعة . مجرد أن طلعت الظلط قلت ليهم يا جماعة ممكن أشغل ليكم شريط كارب لى ترباس ؟؟ كلهم قالوا بصوت واحد جداً !! نحنا لاقيين !! ومن بداية الشريط تانى ما فى زول قال بغم حتى وصلنا سعد قشرة وقالوا لى نزلنا هنا !! فقال لى أحدهم مداعباً يا بشرى قول للأستاذ الامين الهادى نحنا تانى جاييين السقاى إذا بشرى بوصلنا بالكوريلا وشريط ترباس الكارب !!!. لماذا لا نقلد المطربيين وهم أحياء على الاقل بنسبة 60 % من أصواتهم !! الحمد لله معتز الما سجلو فى الهلال .
07-26-2013, 00:29 AM
Elmosley Elmosley
تاريخ التسجيل: 03-14-2002
مجموع المشاركات: 34683
Quote: ياسر يا خال انا ما غالطت وحتي المعلومة ما أكدتها.. لكن بناء علي كلام ناس اصحابي جدا بيحكو انهم زاملوا معتز بحي الوزارات.. صراحة انا ما صادفته ولمن جيت البلد دي هو ما كان قاعد اظنو بي صورة دائمة.. فوارد جدا يكون برضو الموصلي صاح ..
ياعمر آخوي انا بتكلم عن زمن طفولة معتز وانت بتتكلم عن زمن فحولته
اها ربنا يطول عمره وعمرنا ويحضرنا كهولته ههههههههه
07-26-2013, 00:18 AM
Elmosley Elmosley
تاريخ التسجيل: 03-14-2002
مجموع المشاركات: 34683
شكرا استاذنا الموصلي على هذه الاضافه في حق الفنان الشاب معتز صباحي واكيد محتاج لفنان مثلك يمسك بيده ويقوده الى الطريق الصحيح ... ونحنا منتظرنك في جدة وما تحرمنا من اتصالاتك
عرفت ليك الخلطة بتاعت معتز يا وليد مكونة من تعرجات استاذنا الكبير عثمان حسين عليه الرحمة ودفء صوت الاستاذ الطيب عبد الله اطال الله عمره في ايام صباهما طبعا ودي خلطة عجيبة جدا
أي عارف وشايف الناس الفوق ديل كللللهم قالوا الزول ده مبدع وأبدع اليوم في الأبيض ضميرك ... والناس القالت الكلام ده كلللهم ناس بتتمتع بأضان نضيفة ... وبعرفوا يفرزوا الغنا السمح من الغث ...
والأهم ... كمان من المشيدين أعلاه ... أستاذنا / الموصلي ... وهو من الناس " الإبريقهم مشيول " في الغناء والموسيقى ....
بررررضه غلبني
حاتم رمضان كريم كدي قول بسم الله واسمع برواقة كده تسلم
07-26-2013, 00:08 AM
Elmosley Elmosley
تاريخ التسجيل: 03-14-2002
مجموع المشاركات: 34683
Quote: يا ليندي يا حبوب... شووف لي حل مع صوت فهيمة ده.. غلبني كلللو كلللو استحملو... مااا عارف ليي.. مع انو متأكد ناس كتااار ممكن يشوفوها ابدعت.. الحقني بي وصفة عشان ما عايز اظلم البت دي.. لكن والله غلبببني رسسسمي..
وعروسو ضوووات السهلة شايله اهلهه ( غايتو قالت زي الزول العاضي اصبعو وبقول ليك احيييي منك ) سوو الصفقة والزغااارود الصفة والزغااارود الصفقة والزغااارود الصفقة والزغااارود زمان بصات الشمالية النيسانات ديك فيها علبة صلصة بعملوها عشان صوتا المكنة يطلع بقولوا ليهو كوز وفي رواية اخرى زي صوت طفلة الماعز غايتو خدعوك فقالوا هائلة ومصيبة وووو وو ولينا الله وعيشة السوق
،،،،
07-26-2013, 02:13 AM
الليندي الليندي
تاريخ التسجيل: 05-27-2002
مجموع المشاركات: 1188
Quote: غايتو سمعته اغنيتين و احده حقت الجابري غنته نسرين و التانية (كل ما سالته عليك) و غنته منى مجدي الاغنيتين غنوهم بسرعة (البرق الخاطف) و اغنية منى طلعت احسن من بتاعة نسرين الف مرة نسرين اصلاً في الأغنية ما قدمت إي ملمح جمالي لصوته نهائي.
سفيان يا صديقي غايتو نسرين سكتا سكة شديدة ( طول وطول يا ليل للمساهر ) بعدين الخطفة بتاعت للمساهر عشان تصل يانجوم الليل نفسا بتقطع غايتو ماتوفت في الاغنية دي
،،،
07-26-2013, 02:23 AM
الليندي الليندي
تاريخ التسجيل: 05-27-2002
مجموع المشاركات: 1188
اتفق معك نادر ومنى اصوات عادية وده اول ظهور ليهم في غناء منفرد لاغنية كاملة وفي انتظار فاطمة عمر ونسرين الأغنية ما بتشبها وصوت بقطع في التبديل وطه مافيهو كلام رغم أنو غنى جزء منها لكن معتز وضع بصمتو في الأغنية وده البديك احساس انو فارق زمن فقط ما زالت مشكلة تعاملو مع المايك قائمة
،،،،
07-26-2013, 02:27 AM
الليندي الليندي
تاريخ التسجيل: 05-27-2002
مجموع المشاركات: 1188
اختيار موفق وسلم غنائي موفق أراح المغنية منى مجدي والفرقة الموسيقية وأنا المستمع دا
أعتقد أنها من أجمل الأغاني الإتغنت في البرنامج
حمد يا عزيز الأغنية سهلة ولحن دائري ومافيها طلوع ونزول وسلما بريح اي زول يعني ممكن تغنيها أنت عادي وللامانة صوت ( منى مجدي سليم ) صوت عادي فقط تتملك ثقة في نفسها تشعرك بأنها مودية مابطالة
,,,,,
07-26-2013, 02:45 AM
الليندي الليندي
تاريخ التسجيل: 05-27-2002
مجموع المشاركات: 1188
ديل لا خليل اسماعيل لا صالح الضي لابهاء عبدالرحمن كل سنة حيعيدو ليك أغاني اتغنت في النسخات الماضية ويجيبو ليك 7 حلقات كده ، غايتو فاطمه عمر دي شوف شفناها لكن لحدي هسه ما ادوها فرصة عشان نقدر نحكم عليها في أغنية كاملة
07-26-2013, 03:13 AM
الليندي الليندي
تاريخ التسجيل: 05-27-2002
مجموع المشاركات: 1188
Quote: Adil Nagila · الأكثر تعليقا · يعمل لدى Executive Director أعتقد هنالك تصحيح فيما أورده الليندي .. المرحوم محمد الحويج لم يكون ثنائي مع السني و أبو إدية بل كان مع عثمان حسين ثم جاء السني بعد ذلك .. من أهم أغاني الحويج و عثمان حسين كثنائي كانت (كلمة منك حلوة) .. أما كلمات أغنية (عاد الحبيب) لصلاح مصطفى هو الأستاذ عبد الله النجيب وليس الأستاذ محجوب سراج .. ودمتم
الاخ عادل نجيلة
محمد الحويج بدأ يغني كفنان منفرد وكانت من اشهر أغنياته ( مين احلى من حبيبتي مين ) الغناها ( سيف الجامعة ) ولانو صوت ( محمد الحويج ) كان ضعيف نصحوا صديقو الفنان ( عثمان حسين ) أنو يغني في ثنائية وفعلاً انضم الحويج للسني الضوى وابودية وكونو ( ثلاثي العاصمة ) اما أغنية ( كلمة منك حلوة ) فهي من كلمات ( عبدالله حامد الامين ) ولحنا ( عثمان حسين ) واداها للحويج ومشي معاهو لتسجيلا للاذاعة وكان بردد معاهو اللحن فما كان من ( علي شمو ) إلا أن طلب منهما أن يسجلوها كثنائي بعد أن سجلها الحويج كصوت منفرد .
أغنية ( بعد الغياب ) الفيها مقطع ( عاد الحبيب المنتظر ) هي من كلمات الشاعر ( محجوب سراج ) اما عبدالله النجيب شاعر العيون فكتب 8 اغنيات للفنان صلاح مصطفى اشهرها ( صدق العيون وكلام المحنة واحب عينيك تكلمني ) وكذلك تغنى له صلاح بن البادية ( من بهاك ) وعبدالمنعم حسيب ( عيونك كانو في عيوني ) والفنان عبيد الطيب غنى له من الحان صلاح مصطفى ( سلام وكلام وغرام ) وغنى له الراحل خلف الله حمد ( من زمان )
سلمت عادل من كل شر
،،،
07-26-2013, 11:21 PM
عزالدين عباس الفحل عزالدين عباس الفحل
تاريخ التسجيل: 09-26-2009
مجموع المشاركات: 9027
من الحاجات الغريبة جدا جدا جدا في البرنامج إنو نادر ود حياة طلسم ربما أكتتتر زول غنا أغاني في البرنامج ده وربما تفوووق على فرفور .. وده بيطرح تساؤل كبييير جداً هل الواسطة والتوصيات لاعبة دور في القصة دي؟؟ يعني ما معقول مصطفى السني وفاطمة عمر يكونوا من ما بدت الحلقات غنّو ليهم بالكتير تلاتة لي اربعة أغنيات بينما نادر حياة طلسم يغني ليهو طفشطاشر اغنية !!!!!!
عارف يا ليندي وبما إنو ح يجووك ناطين أسة جمعية حقوق الإنسان لأنهم ح يخلطوا التشبيه بتاعك بالتعدي على الإنسانية لكن فعلاً صوت فهيمة أقرب لي الصوت السخلي .. وبتعمل ليها حركات كده في نهاية المقطع دمها تقيييل وبتخلي الزول يكره الغنا.. بالججججد ما فاهم مصيبة دي هل هم قاصدين بيها شكر ولا نبز !!! لأنو مااا ممكن بي أييي حال من الأحوال فهيمة دي تكون مصيبة ابداعية .. غايتو نحن الدخلا فينا ود الجبل بي قروشو الاداها للبت دي في نجوم (القد) مااا بتطلع بالساااااهل!!
07-26-2013, 02:49 AM
الخير محمد عوض الخير محمد عوض
تاريخ التسجيل: 10-25-2005
مجموع المشاركات: 3547
سلام يا الليندي و رمضان كريم عليكم جميعا سلام يا موصلي, رمضان كريم و لعلكم بخير
يا موصلي في حتة معتز دي ما اتفقنا! أولا في البرنامج دا في تخريب عديد لعدد من الأغنيات من حيث الشعر و الآداء, في مشكلة في الحفظ و بتر لأبيات شعرية إضافة إلي عدم وضوح كتير في مخارج الكلمات و بالتالي معانيها, هندسة الصوت up and down و حتى التصوير فيهو مشكلة اختيار اللقطة المناسبة في اللحظة المناسبة كمثال إخفاء المغني في لحظة تؤثر على المستمع/المشاهد في متابعته للحكي الشعري و تأثير الآداء كذلك.. هناك إخفاء للعازف المعني بآداء صولو منفرد كجزء من جمال العمل.. معتز صباحي بلكلك الغنية أكتر من اللازم و ما بيعرف (الإلتزام) و كتير جدا أشعر بأنه بوتر العازفين خاصة عند نهاية كل مقطع, تحس بالعازفين بيعاينو ليهو كأنهم خايفينه يقوم يجلي (الزمن) , بعاينو ليه زي الناس لما تكون كلها بتعاين لي شئ خايفنه يقع ينكسر! الأبيض ضميرك أغنية معتبرة و من درر الطيب عبد الله و تحتاج لي آداء فيهو إلتزام و انسيابية و حنية عتاب, .. طبعا المؤسف أنه المكان مكان مجاملة زايدة عن المفروض. الأبيض ضميرك لا تحتمل اللكلكة و العصبية, كما أداها المرهف الطيب عبد الله .. الشباب ديل خليهم يجربوا استايلاتم دي بعيدا عن الدرر ! معتز صوته جيد لكنه يحتاج لممارسة شئ من الإلتزام ما طوااااالي لكلكة! بالنسبة للأوركسترا المخضرمة فعملية الميكسنق في كتير من الأحيان ما مقنعة و تحتاج دراية موسيقية إلي جانب مهندس الصوت لأنه دي ما نشرة أخبار أو دعاية تجارية! يعني تلقى البنقز و الطبلة في السماء و صوابع سعد الطيب و ساكسفون عبد الهادي تفتش ليهم فتيش وسط (الورشة) .. البيز أحيانا بكون عالي في أغنية ما ما بتستحمل, مرة دخلت الحمام شعرت بالبيز حا يهد العمارة! فهل بيتم إستشارة العازفين في عملية الmixing ? قارن بين التزام معتز في الأبيض ضميرك تلك الأغنية الحنينة و كمثال بين آداء منى مجدي سليم الليلة ل(كل ما سألت عليك صدوني حراسك) بعدين فرفور السنة دي مادة إجبارية)? يا خوانا لا مجاملة في فن التطريب خاصة مع درر الأغاني!
(عدل بواسطة المعز ادريس on 07-26-2013, 04:08 AM) (عدل بواسطة المعز ادريس on 07-26-2013, 04:23 AM) (عدل بواسطة المعز ادريس on 07-26-2013, 05:07 AM)
07-26-2013, 08:57 AM
Elmosley Elmosley
تاريخ التسجيل: 03-14-2002
مجموع المشاركات: 34683
Quote: يا خوانا لا مجاملة في فن التطريب خاصة مع درر الأغاني!
رمضان كريم يامعز ولعلك طيب والله لو معتز غناها بطريقة الاستاذ الكبير الطيب عبد الله لما كتبت عنه حرفا واحدا لانه لايغني بطريقة الطيب عبد الله الا الطيب عبد الله نفسه ذاك البديع فما تسميه انت عدم التزام اسميه انا تنويع بعدين قفلاتو دي نفسها هي المجنناني وقد تكون جننت الاورسترا ولكنه "السينكوبيشن نفسه" اي ترحيل النبر القوي في الايقاع الى النبر الضعيف عشان مايجو يقولو تعالي وكده ياخي ده زول زمنو الايقاعي ماعادي ربنا يخليهو ويخليك تسلم
07-26-2013, 04:15 AM
Nader Abu Kadouk Nader Abu Kadouk
تاريخ التسجيل: 02-19-2007
مجموع المشاركات: 3706
هل تعرفون الة الساكسفون ، هل تعرفون الساكسفون التينور* - او كما يحب عازفي مراكز الشباب ان يسمونه (ساكسفون سي) - هذا هو صوت معتز صباحي ، يشبه تماما الطابع الصوتي للساكسفون التينور، لا بل يشبه طبيعة منطق عزفها ، عندما تسمع معتز في غليظه تسمع نوتات ساكسفون تينور من خانة الصوت(صول)الي (سي بيمول ) ، تسمع ايضا مايصعب تنفيذه علي الة الساكسفون وهو ذاك الصوت الساحر المختلط حتي ثلثيه بهواء (ثلث نبر وثلثين هواء) . عندما تسمع معتز صباحي وهو يستهل مقطعا تري هواءا اندفع باتجاه بالوظة *تينور وخرج من جرسه(نهايته) .
ساكسفون معتز صباحي الأدمي هذا يستحيل بفعل موهبته وخياله الجامح الي كمان *، تخيل ان يغني ساكسفون بمنطق كمان ، تخيل هذا الثنائي البديع ، تخيل ان يئن كمان عبر ساكسفون مشجون .
انظر كيف هو قريب الهواء الصادر من الرئة الي حباله الصوتية ، انظر مدي استجابة الحبال للهواء ، تكاد تنعدم المسافة بين الرئة والحلق ، انظر كيف ينغم تجويف الجمجمة الصوت الصادر في النوتات العليا ، وانظر كيف يكر الصدر النوتات السفلي ، انظر كيف تتوافق الجمجمة مع الصدر في الحليات والعرب *(بضم العين) وفي القفزات بين الجواب والقرار ، انظر هذا الصفاء في التنقل ، انظر كيف يتحرك الصوت من النبر الخافت الي القوي انظر كيف يترقي صاعدا الي القوي (كرشيندو*) في قيمة زمنية لاتتعدي الكروش *، انظر كيف يتلون في هذه الرحلة من الخافت الي القوي ، انظر الي صحة النوتات والي دقتها والي جلائها في هذا الصعود ، انظر كيف يجلس الصوت اذا طالت النغمة انظر كيف يتململ كتململ الساكسفون التينور في النوتات الطويلة في قيمتها الزمنية ، انظر كيف ينقبض الصوت لحظة امساكه انظر كيف يسكت تماما ولا يسيل منه شي ، انظر كيف تبدو الموسيقا شاحبة بعد سكوته ، انظر الي الجهرة الا تشبه الساكسفون؟ ، انظر كيف يحاصر صحة الصوت وثباته وقوته بحركة فكه هي بالضبط كما تحاصر بالشفتين صحة وثبات وقوة الصوت في ريشة* الساكسفون ، انظر الي حزمة الألق الصادرة في المزامنة الهارمونية بين صوته و موسيقا فرقته ، انظر الي الهارموني المختار .
دعكم من هذا هذا مجرد ظل تابعته ان اصابك شي معتز صباحي اعلم اني هاانا ذا اكتب (ماشاء الله ) واخلي ذمتي لديكم . ------------------------------------------------------------------------------ هامش
•الساكسفون التينور : هو تصنيف من تصنيفات الة الساكسفون المعروفة متوسط الحجم يحمل بحامل علي الرقبة •البالوظة : جسم مصنوع من الابنوس او البلاستيك او المعدن ، يضع عليه العازف فمه لاصدار صوت بواسطة ريشة مثبت عليه . •الكمان : هو الة موسيقية وترية معروفة ومنتشرة جدا (كمنجة) •الحليات والعرب : هي جماليات في الاداء. •الكرشيندو : هو حركة الصوت المتصل من الخافت الي القوي . •الكروش : هو قيمة زمنية موسيقية . •الريشة : هى قطعة خشبية مستطيلة الشكل رفيعة جدا في احد طرفيها ، تثبت علي البالوظ لاصدار الصوت .
-------------------------------------------
تحياتي
07-26-2013, 09:56 AM
المعز ادريس المعز ادريس
تاريخ التسجيل: 05-18-2009
مجموع المشاركات: 1569
(انه لايغني بطريقة الطيب عبد الله الا الطيب عبد الله نفسه ذاك البديع فما تسميه انت عدم التزام اسميه انا تنويع) ======== شكرا على توضيحك يا موصلي, أنا لا أقصد أن يغنيها بطريقة الطيب عبد الله, و لو انت نفسك غنيتها حا تؤديها بقدر كبير مما أعنيه أنا بالإلتزام مع تنويع ذو طابع موصلي, لو راجعت الحلقات من الأول حا تلاحظ صراع معتز مع الأغنيات و مع المايك بطريقة أجدها موترة و فيها خروج غير مريح عن المألوف بعكس ما اتبعه محمود عبد العزيز مثلا وجدت طريقته في (التنويع) قبول واسع, فهو كان يزاوج بين الإتنين, تنويع و التزام!
07-26-2013, 12:48 PM
ودالعباسية ودالعباسية
تاريخ التسجيل: 10-28-2002
مجموع المشاركات: 2442
تخريمة غايتو لحدى ماتجينا ديمقراطية معتز صباحى دى يكون احمد المأمون ود رفاعة دخل القصر الجمهورى وذاع البيان الاول ..... ههههه . استاذنا احمد ساطور - ترهاقا- اول المعتقلين وكان القرشى شهيدنا الاول لوووول.
07-26-2013, 05:33 PM
الليندي الليندي
تاريخ التسجيل: 05-27-2002
مجموع المشاركات: 1188
حلقة اليوم عن الليل وشجونه وبدأت بأغنية (يا ليل ابقالي شاهد) كلمات الشاعر الرائع صالح عبد السيد (أبو صلاح) وألحان عبد الكريم عبد الله مختار (كرومة) ، غناها مصطفى السنّي جميلة وأبدع فيها .
(يا عين بتخافي مالك) كلمات والحان عبيد عبد الرحمن ، ذكر السر قدور ان المجاراة أن تأخذ اللحن وتضع عليه الكلمات ، المجاراة هنا كانت في الكلمات وهنالك اختلاف واضح في اللحن. كانت الأغنية من نصيب فرفور وأداها أداء عادي ..
(ليالي الخير جادن) كلمات الشاعر محمد ود الرضي وألحان كرومة أداها معتز صباحي واستمتعت ببداية الأغنية جداً بس اول ما دخل في المنطقة الما حافظ الكلمات فيها ضاعت متعتي وضاعت الفرقة وضاع اللحن.
(في الليل الهاجع) كلمات الشاعر عمر البنّا وألحان كرومة غنى منها طه سليمان فأبدع فيما غناه.
(الليلة وين يا عينيا مساهرة الليل والنوم أبا ليّ) كلمات وألحان عوض جبريل أدتها فهيمة آداء باهت ولم تعجبني أبداً .
(أنا سهران يا ليل أتعبني الضنا) كلمات عبد الرحمن الريح وألحان عوض شمبات(السر قدور قال كلمات ود الرضي وألحان سرور) وهو مخطيء ، أدتها فاطمة اداء جميل .
حلقة اقل من الوسط واوسكار هذه الحلقة لـ(مصطفى السنّي وفاطمة) وبكرة أحلى ..
التعديل لتصحيح المعلومة من اللندي .
(عدل بواسطة عبير خيرى on 07-26-2013, 08:28 PM) (عدل بواسطة عبير خيرى on 07-27-2013, 02:10 AM)
07-26-2013, 09:13 PM
الليندي الليندي
تاريخ التسجيل: 05-27-2002
مجموع المشاركات: 1188
السني متعني غايتو وبرضو صباحي جضم بداية الاغنية لكن زي ما قالت اختنا عبير شكله ما حافظ نهائي وكنت متمني يدوا فاطمة اغنية كاملة عشان نشوف نفستنا شايتين وين
07-27-2013, 01:50 AM
الليندي الليندي
تاريخ التسجيل: 05-27-2002
مجموع المشاركات: 1188
Quote: أنا سهران يا ليل أتعبني الضنا) كلمات وألحان عبيد عبد الرحمن (السر قدور قال كلمات ود الرضي وألحان سرور) وهو مخطيء ، أدتها فاطمة اداء جميل .
اعبير ( انا سهران يا ليل أتعبني الضنا ) من كلمات ( عبدالرحن الريح ) والحان وغناء ( عوض شمبات ) و سجلها في اسطوانه عام 1939 ثم تغنى بها ذلك ( حسن عطيه ) منتصف الاربعينات
,,,,,
07-27-2013, 02:57 AM
الليندي الليندي
تاريخ التسجيل: 05-27-2002
مجموع المشاركات: 1188
عمنا السر قدور قال كلام غريب الليلة وما معناه الآتي :
( كرومه عمل زميل مع عوض يعني غنوا مع بعض كثنائي واختلفوا بعد ذلك فذهب كرومه لعبدالريح واخذ منها مجموعة اغاني من ضمنهم ( انت حياتي وانا سهران يا ليل ) )
الجزئية الاولى أنو ( كرومه وعوض شمبات ) غنوا مع بعض كثنائي كلام صحيح ولمدة ( اربعة سنوات ) وايضاً انهم اختلفوا برضو صحيح وده لانو ( كرومه ) سمع نصيحة ( عمر البنا القال ليهو أنو ( عوض شمبات ) صوتو قوي وبيغطي علي صوتك ، الجزئية الثانية أنو ( كرومه ) مشى ( لعبدالرحمن الريح ) واخد منو مجموعة من الأغاني دي ما صحيحة فكرومه غنى لعبدالرحمن الريح ( 7 أغاني ) لم تكن من ضمنهم ( انت حياتي وانا سهران يا ليل ) والمبالغة في حديث عمنا ( السر قدور ) أنو أغنية ( انا سهران يا ليل اتعبني الضنى ) من الحان ( كرومه ) وهذا غير صحيح فأ غنية ( انا سهران يا ليل ) هي من الحان وغناء ( عوض شمبات ) وسجلها عوض شمبات في اسطوانه عام 1939 م اما المبالغة الغير منطقية أنو ( كرومه ) لحن وغنى ( أنت حياتي )
أنت حياتي وما لي غيرك حياة يا اسمر يا خمر الضياء
فأغنية ( أنت حياتي ) هي من كلمات والحان ( عبدالرحمن الريح ) وهي من الأغاني ( الوترية ) التى كتبها ( عبدالرحمن الريح ) لحسن عطية بعد وفاة ( كرومة ) وواضح ذلك من معاني كلمات الأغنية التى كانت بمثابة محاربة الشلوخ والتجمل بالمساحيق و القبول و القناعة باللون الاسمر وجماله
ما شوهوك بفصادة على الخدود السادة طبيعى خلقة ربك ما داير أي زيادة مع لونك الاسمر وردي الخدود محمر لا بدرة لا احمر ألوان محاسنك زي ماهي
الواحد فى البداية يثمن على المجهود الجبار فى نقاش وتوثيق الأغنية السودانية. وانا من الناس المتابعين للبرنامج والبوست ده..
انت قلت:
الجزئية الثانية أنو ( كرومه ) مشى ( لعبدالرحمن الريح ) واخد منو مجموعة من الأغاني دي ما صحيحة فكرومه غنى لعبدالرحمن الريح ( 7 أغاني ) لم تكن من ضمنهم ( انت حياتي وانا سهران يا ليل ) والمبالغة في حديث عمنا ( السر قدور ) أنو أغنية ( انا سهران يا ليل اتعبني الضنى ) من الحان ( كرومه ) وهذا غير صحيح
انت والسر قدور دخلتونا فى ورطة كبيرة جدا جدا.. السر قدور بقول كلامو ده فى التلفزيون كان صاح كانت غلت والناس اهو بتسمع ....
وانت هنا بتصحح معلومة السر قدور ، ودي حاجة كويس جدا..
بس انا داير اسأل شنو المرجع للتأكد من كلامك او كلام السر قدور؟؟؟
سـلام يا دكـتور، برضـو شاتت برة بعـد ما بشـتنت الأغنية بشتنة شديدة بالأداء الباهت زي ما قالت عبير وسـوء الحفظ.. دي من الأغاني العاجـبناني جداً لجمال وحلاوة وطرافة كلماتها كما كل أغاني عوض جبريل، لكـن فهيمة أفسدت علي متعة الإستماع ناهيك عن الإستمتاع ، ففي المقطع الأول (ألفت) ليها كلام من راسها يخل حتى بالقافية والوزن وقالت: حبيبي القمرا الضواية بينما عـوض جبريل قال: يا أم خداً كأنو مـراية.. نساني العقاب بورايا .. وشتان بين الإتنين.. بينما المقطع التاني غنتو ناقص ما دفعها لتكرار: لي شوفتك رويحتي لهـوفة.. بينما يقول الشطر التاني: ريدتك كيّة ليْ مخلوفة وأصلو القسمة ما معروفة.. غايتو قربت أقتنع بكلام الفاروق بتاع محاولات فهمية لتقمص دور بت الخرطوم.. عشان كدة ما عايزة تقول الكلام القروي دا: ريدتك كية لي مخلوفة... ونساني العَـقاب !
07-27-2013, 07:14 PM
الليندي الليندي
تاريخ التسجيل: 05-27-2002
مجموع المشاركات: 1188
الواحد فى البداية يثمن على المجهود الجبار فى نقاش وتوثيق الأغنية السودانية. وانا من الناس المتابعين للبرنامج والبوست ده..
انت قلت:
الجزئية الثانية أنو ( كرومه ) مشى ( لعبدالرحمن الريح ) واخد منو مجموعة من الأغاني دي ما صحيحة فكرومه غنى لعبدالرحمن الريح ( 7 أغاني ) لم تكن من ضمنهم ( انت حياتي وانا سهران يا ليل ) والمبالغة في حديث عمنا ( السر قدور ) أنو أغنية ( انا سهران يا ليل اتعبني الضنى ) من الحان ( كرومه ) وهذا غير صحيح
انت والسر قدور دخلتونا فى ورطة كبيرة جدا جدا.. السر قدور بقول كلامو ده فى التلفزيون كان صاح كانت غلت والناس اهو بتسمع ....
وانت هنا بتصحح معلومة السر قدور ، ودي حاجة كويس جدا..
بس انا داير اسأل شنو المرجع للتأكد من كلامك او كلام السر قدور؟؟؟
تحياتى
عزيزي سيف لدي لقاء إذاعي مع الشاعر والملحن ( عبدالرحمن الريح ) ذكر فيه ما ذكرته عن أغنية ( انا سهران يا ليل ) وكذلك نفس الكلام موجود في كتاب الراحل ( عبدالوهاب ابورامه ) الاغاني وكذلك في كتاب ( تاريخ الغناء والموسيقى في السودان - الجزء الاول ) لمعاوية حسن يس وكذلك كتاب ( عبدالرحمن الريح انت حياتي ) لبروفسور ( احمد محمد علي اسماعيل ) ولأنو الكلام ما فيهو خلاف ما كتبت المصدر لكن مثلاً أغنية ( فلق الصباح ) فيها أختلاف في اللحن هل هو ( لسرور ) أم ( كرومه ) ام ( خليل فرح ) ولأن الخلاف كبير فاتيت بالمصدر ( لقاء مع عوض شمبات ) وكتبت تاريخ الحلقة التى بث فيه حديث ( عوض شمبات ) وكذلك كتبت شهادة الفنان ( علي مصطفى الدكشنري ) واسم الصحيفة والصحفي الذى اجرأ اللقاء ، لكن تبقى هناك نقاط لاخلاف عليها لاتحتاج لأن تكتب المصدر والللية لو جيت قلت لعمنا ( السر قدور ) كلامك ده ما صحيح حيقول ليك ياخي أنا بتكلم من راسي .
سلمت من كل شر
،،،،،
07-27-2013, 07:16 PM
الليندي الليندي
تاريخ التسجيل: 05-27-2002
مجموع المشاركات: 1188
الحلقة اليوم عن أغنيات الشاعر والملحن التجاني حاج موسى وفي حضوره ، التجاني حاج موسى من مواليد مدينة الدويم عام 1949 ، انتقل بعد المتوسطة لمدينة أمدرمان حي العباسية حيث استقر مع جده خال والدته وشقيق الحاجة دار السلام رحمها الله وهي جدته لوالدته والتي كان لها عميق الأثر في نفسه وكتب فيها بعض اشعاره. أول تعامل فني له كان مع الفنان زيدان إبراهيم بقصيدته (قصر الشوق) ألحان عمر الشاعر وكانت بداية طريق الشهرة للشاعر الجميل التجاني حاج موسى.
(كلمني يا حلو العيون) من كلمات وألحان التجاني حاج موسى أدتها في بداية غير موفقة منى مجدي سليم أداء مجرد من اي احساس ولم تعجبني أبداً .
(أمي الله يسلمك) من كلمات وألحان التجاني حاج موسى وهي من الابيات الأخيرة لقصيدته الشهيرة (جواب للبلد) أو (ضل الضحى الرامي) وكان أداء جماعي باهت لا يخلو من بعض نشاز (ولا أبدعتم ولا حاجة) .
(حبايبنا) من كلمات التجاني حاج موسى وألحان بشير عباس أداها نادر أداء اظهر بعض من امكانياته التي لم تظهر في الحلقات الماضية وكانت جميلة.
(جاي تفتش الماضي) كلمات وألحان التجاني حاج موسى وأداها فرفور جميلة غير بعض اصوات المجموعة المزعجة .
(بعد ما فات الأوان) كلمات وألحان التجاني حاج موسى أدتها فيهمة لا إحساس ولا جمال ولا اي حاجة .
(تباريح الهوى) كلمات التجاني حاج موسى وألحان محمد سراج الدين وأدتها كأسوأ ما يكون الأداء زحل آدم ، ولم أسمع في حياتي شيئاً كالذي سمعته اليوم.
حلقة دون الوسط في رأي كمستمعة وأوسكار هذه الحلقة للفرقة الموسيقية ..
07-27-2013, 08:53 PM
Nader Abu Kadouk Nader Abu Kadouk
تاريخ التسجيل: 02-19-2007
مجموع المشاركات: 3706
الحلقة كانت مع التجاني الحاج موسى و صراحة التجاني دا انا ما بهضمو ولا بحبو لانو عامل فيها بتاع كلو (شاعر - ملحن - مذيع - صحفي) و بتاع مصنفات و عييييك المهم دا رآي رغم انو صراحة عندو شعر سمح .
غايتو اغنية محمد ميرغني هجموها كورالياً هجوم فظييييع و منى مجدي غايتو غنته بشكل ما بطال. هاهاهاهاها الراجل شال ليك حال ترباس :- ترباس جاء و قعد لينا هنا و بكى اوعه تبكي لووووول اما امي الله يسلمك فصراحة طلعت كعبه ... بقت عقاب عديل كدا . (حبايبنا و قرايبنا) و د البلابل ذبحها من الأضان للاضان ، غايتو لما زاد خصامكم لينا دي انا جهجهني فيها اما لما و صل جِدو غلبني عديييييل كدا ... وعمل حركة كدا في (خصامكم لما زاد طوال) كعبه شديد... الود دا الله يهديهو من الغنى دا غايتو كمل الاغنية بشكل كعب و عمك قدور يقول هائل هائل هائل اصلا هائل زين !!!!؟ فرفور (جاي تفتش الماضي) آداء جيد و متزن من فرفور (صباحي لعب ليهو خطوط بتاعة زول حريف) - التجاني الحاج موسى اصرار شديد على الغناء. فهيمة (بعد ما فات الأوان) آداء بذات السوء المواصلة فيهو فهيمة دي و صراحة كدا بقت تذكرني طريقة عصام محمد نور في مشاركتو الاخيرة باغاني و اغاني (بغني بصوت جيد بس بدون نفس و بدون أي تعابير) فهيمة عندها صوت ما كعب بس الزولة دي ما عندها روح فنان نهائي و صراحة كتلة اعنية من اجمل الاغاني في الغناء الشعبي و صاحبه عبد الوهاب الصادق صداح طروب . تباريح الهوي وزحل صراحة ادت الأغنية بشكل جميل جداً و واضح انها متعوده عليها - مليجي و زرياب و اسماعيل وعمكم اكرد وراء هناك اخر انبساط) - عمكم التجاني ما بقعد سااااي و قال ليها عيدي بشكي ليكم يا مظاليم الهوى - معتز صباحي سرح مع الاغنية و اشتغل ايقاع و اشتغل كيبورد و اشتغل هارمونكا
و انتهت
07-27-2013, 08:51 PM
عبدالمنعم الطيب حسن عبدالمنعم الطيب حسن
تاريخ التسجيل: 11-15-2012
مجموع المشاركات: 4488
فرفور هذا الاجش، جهجه جاي تفتش الماضي جهجهة السنين، ترباس ليهو حق، فرفور دا كرهني في الاغنية دي مع اني بحبها جدا، فرفور تبا لك... وكمان فهيمة دي برضو جهجهة عبد الوهاب الصادق وكرهتنا الغنوة، واكان ما اخاف الكضب اقول ما حافظة كويس، والبلابل اتجهجهو، ومحمد ميرغني برضك اتجهجه... حلقة 2 من 10 تبا لهم كلهم الغنوا، وبالمرة تبا لمعتز الصباحي باعتبار ما يغني،
07-27-2013, 09:26 PM
Abuzar Omer Abuzar Omer
تاريخ التسجيل: 07-26-2008
مجموع المشاركات: 2109
فى حضرة الشاعر الفخيم، المرهف صاحب المفردة الزاهية، المتبرجة التى تلامس شغاف القلب و تنفذ إلى الدواخل مليكة متوجة و آسرة لا تغادر الذات؛ كانت إتكاءة هذا المساء. وجود التجانى كضيف كافي لحشد المشاعر و تحريك شعيرات الحس فتتفتح مأخوذة بلهفة التوقع. سابدأ بزحل و التى كان لها شرف الغناء بإحدى علامات الفن السودانى البارزة (تباريح الهوى). لقد أعجبنى الأداء - و فى الخاطر أن مصطفى سيد أحمد سبق و تغنى بالأغنية- و لكن يظل أداءها متميز و مفعم بالحس العالى و ما أدل على ذلك سوى طلب الشاعر من المؤدية أعادة المقطع (بشكى ليكم يا مظاليم الهوى) يا لها من شكوى أضفت عليها زحل بعداً رومانسياً خلاب.
المأخذ على الأداء و الفرقة فى المقطع (يبقى أسمك هو الغناء) و الذى أخطأت فيه الفرقة و تدارك الخطأ أصحاب الكمان.. و كذلك تشالقت إحدى المؤديات فى مقطع (ممكن ألقى وصفة تنفع)...
على العموم الأداء أكثر من جيد رغم الصعوبات التى واجهت زحل فى مناطق العالي و قد لاحظت محاولاتها لمس الحنجرة (و لى رفعها إلى أعلى ما عارف!!!)...
أداء نادر لأغنية أمه و خالاته كان ممتازاً و ينبئ بأن هذا الشاب قادم و لو بعد حين...
أما الأغنيات الأخرى لا تعليق على الإطلاق..
07-27-2013, 09:39 PM
Abuzar Omer Abuzar Omer
تاريخ التسجيل: 07-26-2008
مجموع المشاركات: 2109
الليندي كتب الكلام المرتب ده : عزيزي سيف لدي لقاء إذاعي مع الشاعر والملحن ( عبدالرحمن الريح ) ذكر فيه ما ذكرته عن أغنية ( انا سهران يا ليل ) وكذلك نفس الكلام موجود في كتاب الراحل ( عبدالوهاب ابورامه ) الاغاني وكذلك في كتاب ( تاريخ الغناء والموسيقى في السودان - الجزء الاول ) لمعاوية حسن يس وكذلك كتاب ( عبدالرحمن الريح انت حياتي ) لبروفسور ( احمد محمد علي اسماعيل ) ولأنو الكلام ما فيهو خلاف ما كتبت المصدر لكن مثلاً أغنية ( فلق الصباح ) فيها أختلاف في اللحن هل هو ( لسرور ) أم ( كرومه ) ام ( خليل فرح ) ولأن الخلاف كبير فاتيت بالمصدر ( لقاء مع عوض شمبات ) وكتبت تاريخ الحلقة التى بث فيه حديث ( عوض شمبات ) وكذلك كتبت شهادة الفنان ( علي مصطفى الدكشنري ) واسم الصحيفة والصحفي الذى اجرأ اللقاء ، لكن تبقى هناك نقاط لاخلاف عليها لاتحتاج لأن تكتب المصدر والللية لو جيت قلت لعمنا ( السر قدور ) كلامك ده ما صحيح حيقول ليك ياخي أنا بتكلم من راسي .
والله ريحتنى تب يا الليندي، انشاء الله الله يديك الفى مرادك. ياخى ما كل الناس بيعرفوا تاريخ الغناء فى السودان وشعراء وفنانين الأغنية السودانية، وانا واحد منهم.
اها كلامك ده حسم الموضوع تماماً وكده عرفنا انو السر قدور محتاج يركز معانا شوية وحقو يقول تانى على ما اذكر قبل ما يبداء يحكى لينا قصة غنيه
تحياتى
07-28-2013, 00:14 AM
الخير محمد عوض الخير محمد عوض
تاريخ التسجيل: 10-25-2005
مجموع المشاركات: 3547
الغريبة انا كنت مفتكر الليلة تحديدا الناس تتفق علي فهيمة .... فهيمة الليلة ما بطالة باي حال من الاحوال لانها وببساطة وفي تقديري انها ما لولوت الكلام كتير وما حاولت تتعوصم بل ثبتت علي ذات اللونية التي ظهرت بها في ايام ظهورها في نجوم الغد... ودا كلوووووووووووووو كوم والرقصة العملتها في بداية الغنية دي بصراحة ريحتني شديد وادتني احساس انها مقبلة علي عمل هي عارفاهو ومجضماهو كويس .... الليلة انا بصراحة البرافو بتاعي بديهو لفهيمة ومقارنة باداءها في الحلقات السابقة الليلة انا بصرف ليها برافو كبييييير
الحاجة التانية ياخ عندي ملاحظة ازعجتني جدا .... تباريح الهوى للاسف الفرقة الموسيقية ما حافظة لحنها او ما عارف الحاصل شنو لكن في الحتة بتاعة يبقى اسمك هو الغناء والله لو اييييييييي زول عارف وبعرف لحن الاغنية دي حا يعرف انه الفرقة الموسيقية ادتها غلط غلط وشترتها شترة السنين... خطا اصلو ما بتوقعو من موسيقين كبار زي ديل في اغنية اكتر من مسموعة.... ياخ علي بالحلال الغنية دي الموسيقي المفروض تدخل بعد ( يبقى اسمك هو الغناء ) علي بالحلال ما كدا ..... غايتو ازعجتني جدا وما عارف لاحظتو ليها وللا لا
تنويه : فلنترحم جميعا علي والد اخانا ناذر الخليفة الذي وافته المنية صباح اليوم ... ناذر كان من اشراقات البوست دا ... ندعو الله ان يرحم والده رحمة تدخله بها جنات الفردوس مع الشهداء والصديقين وحسن اولئك رفيقا ببركة هذا الشهر الفضيل وانا لله وانا اليه راجعون .
Quote: تنويه : فلنترحم جميعا علي والد اخانا ناذر الخليفة الذي وافته المنية صباح اليوم ... ناذر كان من اشراقات البوست دا ... ندعو الله ان يرحم والده رحمة تدخله بها جنات الفردوس مع الشهداء والصديقين وحسن اولئك رفيقا ببركة هذا الشهر الفضيل وانا لله وانا اليه راجعون .
لا حول ولا قوة إلا بالله تقبله الله قبولاً حسناً وأسكنه مساكن الصديقين وجعل الجنة مثواه صادق التعازي لناذر وأسرته الكريمة ونسأل الله أن يصبرهم ويجبر كسرهم إنا لله وإنا إليه راجعون
شكراً العزيز الخير محمد عوض علي هذه التنبيه
07-30-2013, 01:21 AM
بشرى مبارك ود السقاى بشرى مبارك ود السقاى
تاريخ التسجيل: 08-21-2012
مجموع المشاركات: 1028
نترحم على والد الاخ ناذر الخليفة ونقول اللهم أغفرله وأرحمة وعافه وأعف عنه وأدخله الجنة وأعذه من عذاب النار . العزاء موصول للأخ ناذر فقد بحثت عن بوست للعزاء فلم أجده وتعازينا للأسرة الكريمة .
07-28-2013, 00:52 AM
بشرى مبارك ود السقاى بشرى مبارك ود السقاى
تاريخ التسجيل: 08-21-2012
مجموع المشاركات: 1028
الليندى سلام وتحياتى !! والله يا اللندى الكرة فى ملعب الشباب ( ما شايف دفعتى صلاح محمد آدم عيسى مدرب الهلال ) ؟؟ يا أخى أمشى لى عمك السر ده (بصصو شوية ما فيها حاجة ).
07-28-2013, 01:52 AM
الليندي الليندي
تاريخ التسجيل: 05-27-2002
مجموع المشاركات: 1188
Quote: (كلمني يا حلو العيون) من كلمات وألحان التجاني حاج موسى أدتها في بداية غير موفقة منى مجدي سليم أداء مجرد من اي احساس ولم تعجبني أبداً .
(أمي الله يسلمك) من كلمات وألحان التجاني حاج موسى وهي من الابيات الأخيرة لقصيدته الشهيرة (جواب للبلد) أو (ضل الضحى الرامي) وكان أداء جماعي باهت لا يخلو من بعض نشاز (ولا أبدعتم ولا حاجة) .
(حبايبنا) من كلمات التجاني حاج موسى وألحان بشير عباس أداها نادر أداء اظهر بعض من امكانياته التي لم تظهر في الحلقات الماضية وكانت جميلة.
(جاي تفتش الماضي) كلمات وألحان التجاني حاج موسى وأداها فرفور جميلة غير بعض اصوات المجموعة المزعجة .
(بعد ما فات الأوان) كلمات وألحان التجاني حاج موسى أدتها فيهمة لا إحساس ولا جمال ولا اي حاجة .
(تباريح الهوى) كلمات التجاني حاج موسى وألحان محمد سراج الدين وأدتها كأسوأ ما يكون الأداء زحل آدم ، ولم أسمع في حياتي شيئاً كالذي سمعته اليوم.
بتفق مع عبير خيري في معظم الكلام الكتبتو عدا ( حبايبنا ) فنادر لم يؤديها بشكل جميل ولم يحسن التعامل مع المايك إضافة لأنو المايك ذاتو في عضمو فيهو مشكلة وواضح أنو البرنامج بعاني من عدم وجود تقني صوت ممتاز فمرات الصوت يعلى براهو ومرات ينخفض
اول مرة أسمع الحتة دي بتتغنى بالطريقة دي ياخي دي من الأغاني البتجرح وبتداوي اهم حاجة أنك تكون عارف انت بتقول في شنو ودي ملاحظة ( زحل ادم ) دي ما حافظة معظم الأغاني الغنتا وبتغير في الكلمات تغيير يؤدي الي اختلال المعنى والحتة دي الصاح ( يا منى الروح يا انا ) الحتة التانية الكان فيها أداء باهت للغاية أخل بالأغنية من وجهة نظري وخلاها زي المبتورة كان الاداء في البيتين ادناهم
ضاق جراح الحب ومتعذب سنييييييييييييين تخفف الجرح القدييييييييييم مستحيييييل
البيتين الفوق ديل كلمة ( سنين ) في مد طويل في الياء ( سنيييييييييين ) ياخي في عذاب ليهو مدة طويلة فلازم يكون في مد في الياء وبرضو تخفف الجرح ( القديم ) في مد ( القدييييييم ) ده جرح أعمق من حدود الاحتمال و ( مستحيييييل ) دي استحالة حاصلة غايتو ( زحل ادم ) ما خلتنا نحس بعمق الكلمتين ديل ادتم وكأنها عايزة تخلص من الأغنية فقط ما عملت أي مد فجرحتنا بالأغنية دي وما داوتنا ، ما عايز اعمل مقارنة بين أداء ( زحل ) و( مصطفى سيد احمد ) او ( محمود عبدالعزيز ) او ( عمار السنوسي ) لكن فقط عايز انو الناس تسمع كيف ديل كلهم بعالجو الكلمات دي وحاختار ( مصطفى كنموذج ) لانو في تجريد لكلمات الأغنية بتخليك تحس بعمق معنى الكلمات
تباريح الهوى - مصطفى سيد احمد كلمات - التجاني حاج موسى الحان - محمد سراج الدين غناء - محمد ميرغني أداء - مصطفى سيد احمد
حلقة اليوم اتغني فيها غناء جميل وكان فيها أداء مميز جداً من ( مصطفى السني وطه سليمان ) غايتو انا استمتعت بالبرهة القلية وزمان الناس وبصولات بتاع الساكس في زمني الخاين وصولات محمدية في زمان الناس وبأداء الفرقة الموسيقة في البرهة القليلة وزمان الناس حقيقي الفرقة الليلة كان تمام
الاوسكار مناصفة بين مصطفى السني وطه سليمانا
،،،،،
07-28-2013, 07:51 PM
الليندي الليندي
تاريخ التسجيل: 05-27-2002
مجموع المشاركات: 1188
الحلقة تناولت (الأزمان في الغناء) وبدأت بأغنية (زمني الخائن) كلمات وألحان علي المساح وسجلها في اسطوانات إبراهيم عبد الجليل، أداها فرفور أداء باهت ومعاه عدم حفظ للكلمات ولم تمتعني أبداً .
(زمانك والهوى أعوانك) كلمات علي المساح وألحان شبلي أداها دويتو (نادر وزحل) أداء أقل ما يقال عنه رديء.
(لا زمني ابتسم) كلمات بشير ثروت وألحان عبد المنعم الخالدي أداها دويتو (نسرين وفهيمة) (وكان عرفت ديل لموهم مع بعض على اي اساس كان ارتحت ) ، أداء غير متزن وضاعت بينهما الأغنية ولو تركت لنسرين وحدها ربما كانت ستكون أحسن.
(آلفني في البرهة القليلة) كلمات الشاعر عبيد عبد الرحمن وألحان زنقار أداها مصطفى السني كأروع ما يكون الأداء ، زمن مظبوط وحرفنة وامتاع .
(زمان الناس) كلمات وألحان عبد الكريم الكابلي أداها طه سليمان فأبدع وأبدعت الفرقة الموسيقية في المقدمة وأستمتعت جداً بالأغنية.
الحلقة في رأي كمستمعة أفضل من حلقة الأمس والأوسكار لـ(مصطفى السنّي وطه سليمان) ..
07-28-2013, 09:26 PM
عاطف عمر عاطف عمر
تاريخ التسجيل: 11-26-2004
مجموع المشاركات: 11152
ونحن في الحلقة التاسعة عشر أقول أن نسخة برنامج أغاني وأغاني لهذا العام قد
- زادت مسافة إبتعاد الناس عن فهيمة عبدالله ، ربما وأجهزت على الإلتفاف الذي حظيت به أبان مشاركتها في برنامج نجوم الغد... فهيمة نفسها قادت الناس لهذه النتيجة بتكلفها المبالغ فيه و ( الجرجرة ) في ما لا جرجرة فيه... باختصار إبتعدت عن شخصيتها الحقيقية فابتعد الناس عنها
- مصطفى السنى ورغم القبول الذي حظى به والأداء الطيب إلا أنه قد ظلم نفسه أو ظلمه البرنامج في حبسه داخل جلباب أبو داوود... أقنعني - حتى الآن - كـ مقلد ممتاز لأبي داوود ولم يقدم نفسه كفنان صاحب ( بصمة ) تخصه كـ ( مصطفى السني )
- معتز صباحي يحمد له أنه صاحب شخصية فنية وصاحب بصمة تخصه إلا أنه يؤخذ عليه ( كوجانه ) لأغنيات عاشت في وجدان الناس بألحان معينة... محاولة تغيير اللحن فيه تجني على وجدان الملايين التي صاغها ذاك اللحن
- نسرين هندي ، فاطمة عمر ، أحمد مأمون .... لديهم ما يمكن إنتظاره
- معاذ بن البادية ، نادر ( ود البلابل ) - أعجبني إسم ود البلابل.. شكراً طارق جبرين - من الواضح أن الغناء من خلال المجموعات الفنية ربما كان أفضل لهما
- زحل ، منى لم تتضح لي معالم شخصياتهم الفنية... أصواتهن عادية جداً
- جمال فرفور ، طه سليمان فنانين كبار قطعا مشوار طويل في إطار شخصياتهم الفنية ... وذاك غض النظر عن كيفية مشاركتهما في هذه النسخة من البرنامج... أتفهم أن غنائهما ( بدون حماس ) ربما يكون مرده لاحساسهما بوجودهما وسط ( براعم ) بعد أن كانا في النسخ السابقة من البرنامج وسط ( أنداد ) لهما
ولهم جميعاً أقول أن تغير مفردة أو حتى ( تنوين ) في كلمات أغنيات عاشت في وجدان الملايين أمر مؤذي ومؤذي جداً
07-28-2013, 10:01 PM
ودالعباسية ودالعباسية
تاريخ التسجيل: 10-28-2002
مجموع المشاركات: 2442
حلقة الامس مع التجانى حاج موسى اشعلت اللواعج. التجانى يمتاز بمفردة السهل الممتنع وبالاخص اشعاره للاطفال. تعرفت عليه ايام اجازتى للصوت بالمصنفات وهو قد سمع اغنيتى للاطفال وابدى اعجابه بلحنى ووعدنى بنص للاطفال لازلت منتظره والتجانى كثير النسيان وجارى طوالى.
احمد الله اننى قدمت قبل ايام قلائل اغنيتين جديدتين للاطفال وبمشاركة من فرقة اطفال بحرى من كلمات مدنى النخلى بعنوان بابا يا ماما- الوطن غالى وروضتنا الفى حلتنا اختهم ليكم هنا يمكن يعجبوا نفرين تلاتة منكم.
Quote: الحلقة تناولت (الأزمان في الغناء) وبدأت بأغنية (زمني الخائن) كلمات وألحان علي المساح وسجلها في اسطوانات إبراهيم عبد الجليل، أداها فرفور أداء باهت ومعاه عدم حفظ للكلمات ولم تمتعني أبداً .
(زمانك والهوى أعوانك) كلمات علي المساح وألحان شبلي أداها دويتو (نادر وزحل) أداء أقل ما يقال عنه رديء.
(لا زمني ابتسم) كلمات بشير ثروت وألحان عبد المنعم الخالدي أداها دويتو (نسرين وفهيمة) (وكان عرفت ديل لموهم مع بعض على اي اساس كان ارتحت ) ، أداء غير متزن وضاعت بينهما الأغنية ولو تركت لنسرين وحدها ربما كانت ستكون أحسن.
(آلفني في البرهة القليلة) كلمات الشاعر عبيد عبد الرحمن وألحان زنقار أداها مصطفى السني كأروع ما يكون الأداء ، زمن مظبوط وحرفنة وامتاع .
(زمان الناس) كلمات وألحان عبد الكريم الكابلي أداها طه سليمان فأبدع وأبدعت الفرقة الموسيقية في المقدمة وأستمتعت جداً بالأغنية.
الحلقة في رأي كمستمعة أفضل من حلقة الأمس والأوسكار لـ(مصطفى السنّي وطه سليمان) ..
عبير خيري الليلة بتفق معاك في كل الكلام القلتيهو
،،،،،
07-29-2013, 00:28 AM
الليندي الليندي
تاريخ التسجيل: 05-27-2002
مجموع المشاركات: 1188
Quote: ونحن في الحلقة التاسعة عشر أقول أن نسخة برنامج أغاني وأغاني لهذا العام قد
- زادت مسافة إبتعاد الناس عن فهيمة عبدالله ، ربما وأجهزت على الإلتفاف الذي حظيت به أبان مشاركتها في برنامج نجوم الغد... فهيمة نفسها قادت الناس لهذه النتيجة بتكلفها المبالغ فيه و ( الجرجرة ) في ما لا جرجرة فيه... باختصار إبتعدت عن شخصيتها الحقيقية فابتعد الناس عنها
- مصطفى السنى ورغم القبول الذي حظى به والأداء الطيب إلا أنه قد ظلم نفسه أو ظلمه البرنامج في حبسه داخل جلباب أبو داوود... أقنعني - حتى الآن - كـ مقلد ممتاز لأبي داوود ولم يقدم نفسه كفنان صاحب ( بصمة ) تخصه كـ ( مصطفى السني )
- معتز صباحي يحمد له أنه صاحب شخصية فنية وصاحب بصمة تخصه إلا أنه يؤخذ عليه ( كوجانه ) لأغنيات عاشت في وجدان الناس بألحان معينة... محاولة تغيير اللحن فيه تجني على وجدان الملايين التي صاغها ذاك اللحن
- نسرين هندي ، فاطمة عمر ، أحمد مأمون .... لديهم ما يمكن إنتظاره
- معاذ بن البادية ، نادر ( ود البلابل ) - أعجبني إسم ود البلابل.. شكراً طارق جبرين - من الواضح أن الغناء من خلال المجموعات الفنية ربما كان أفضل لهما
- زحل ، منى لم تتضح لي معالم شخصياتهم الفنية... أصواتهن عادية جداً
- جمال فرفور ، طه سليمان فنانين كبار قطعا مشوار طويل في إطار شخصياتهم الفنية ... وذاك غض النظر عن كيفية مشاركتهما في هذه النسخة من البرنامج... أتفهم أن غنائهما ( بدون حماس ) ربما يكون مرده لاحساسهما بوجودهما وسط ( براعم ) بعد أن كانا في النسخ السابقة من البرنامج وسط ( أنداد ) لهما
ولهم جميعاً أقول أن تغير مفردة أو حتى ( تنوين ) في كلمات أغنيات عاشت في وجدان الملايين أمر مؤذي ومؤذي جداً
اعاطف عمر تحليل جميل للحلقات الفاتت كلها ( دي نتلاقى في الاحساس ولاشنو ) اتفق معاك في كل كلمة كتبتها فقط اختلف معك في ( فروفور ) عارف نفس الكلام القلتو عن فهيمة بنطبق علي ( بفرفور اصابعو ) أكثر زول بغير مفردات الأغاني هو وزحل وبعدين جعان غنا ياخي بقى مقرر عديل أي حلقة لازم يغني وكمان لازم يبدأ الحلقة هو لقد سئمنا من فرفور خليهو يدي الشباب فرصة .
،،،،
07-29-2013, 00:36 AM
الليندي الليندي
تاريخ التسجيل: 05-27-2002
مجموع المشاركات: 1188
حلقة الامس مع التجانى حاج موسى اشعلت اللواعج. التجانى يمتاز بمفردة السهل الممتنع وبالاخص اشعاره للاطفال. تعرفت عليه ايام اجازتى للصوت بالمصنفات وهو قد سمع اغنيتى للاطفال وابدى اعجابه بلحنى ووعدنى بنص للاطفال لازلت منتظره والتجانى كثير النسيان وجارى طوالى.
احمد الله اننى قدمت قبل ايام قلائل اغنيتين جديدتين للاطفال وبمشاركة من فرقة اطفال بحرى من كلمات مدنى النخلى بعنوان بابا يا ماما- الوطن غالى وروضتنا الفى حلتنا اختهم ليكم هنا يمكن يعجبوا نفرين تلاتة منكم.
عارف يا ابراهيم اصعب غني في الدنيا دي غناء الاطفال من حيث المفردة واللحن وفعلا ( التجاني ) كتب أغنية للأطفال ما زالت ندية ( متشكرين ومقدرين يا مدرسات يا مدرسين ) وطبعاً في زول الناس ما مديهو حقو رغم أنو لحن اجمل أغاني الاطفال ملحن خطييييير ( يوسف حسن الصديق ) ياسلام ده مدرسة براها ،، واصل ياصديق يبدو تاني حنرجع للريادة في غناء الاطفال الألحان جميلة فعلاً يا ابرا
،،،،،
07-29-2013, 00:39 AM
الليندي الليندي
تاريخ التسجيل: 05-27-2002
مجموع المشاركات: 1188
Quote: الحلقة تناولت (الأزمان في الغناء) وبدأت بأغنية (زمني الخائن) كلمات وألحان علي المساح وسجلها في اسطوانات إبراهيم عبد الجليل، أداها فرفور أداء باهت ومعاه عدم حفظ للكلمات ولم تمتعني أبداً .
(زمانك والهوى أعوانك) كلمات علي المساح وألحان شبلي أداها دويتو (نادر وزحل) أداء أقل ما يقال عنه رديء.
(لا زمني ابتسم) كلمات بشير ثروت وألحان عبد المنعم الخالدي أداها دويتو (نسرين وفهيمة) (وكان عرفت ديل لموهم مع بعض على اي اساس كان ارتحت ) ، أداء غير متزن وضاعت بينهما الأغنية ولو تركت لنسرين وحدها ربما كانت ستكون أحسن.
(آلفني في البرهة القليلة) كلمات الشاعر عبيد عبد الرحمن وألحان زنقار أداها مصطفى السني كأروع ما يكون الأداء ، زمن مظبوط وحرفنة وامتاع .
(زمان الناس) كلمات وألحان عبد الكريم الكابلي أداها طه سليمان فأبدع وأبدعت الفرقة الموسيقية في المقدمة وأستمتعت جداً بالأغنية.
الحلقة في رأي كمستمعة أفضل من حلقة الأمس والأوسكار لـ(مصطفى السنّي وطه سليمان) ..
مش قلت ليكم عبير خيري هي فنانتي المفضلة الموسم ده من أغاني وأغاني؟؟ :-)
وبعديها طــه سليمان... ثم مصطفى السني.... (راجعو أنا الكلام ده كاااااااااااااتبو هنا)...
المهم.. أتفق معك جدددا أستاذة عبير...
ويا سيد البيت... الليلة برضو متفق معاك تماااااااااااما في تحليلك الفي الصميم ده ^_^
زمان الناس... كانت تستحق وقفة السر قدور بعدها وكل المجموعة من ما إنطربنا له.... ومن أداء للفرقة الموسيقية... ولكن, أعذرني يا السر قدور.. هذه الفرقة وفي هذه السنة ليست بقيادة محمدية (لما هو فيه من عبوس وجه وشغل تحس بيهو من غير نفس).. ولكن قائد الفرقة إما إسماعيل عبد الجبار (إذا لاحظتو هو الذي يعطي التعليمات وشفال (كوندكتور) أو زرياب كمان... أو سعد الدين الطيب)..
تخريمة:
عليييييييييييييييييييييييكم الله شفتوا سعد الدين الطيب ده كان طربااان كيف في زمان الناس دي؟؟ ياخ تم لي باقي الموود عديل لمن بقيت بسمع وأتبسَم براي ^_^
تعرف يا هايل من خطورة انه فنان يشارك في برنامج مسموع ومشاهد زي دا انه الفنان بخت نفسه في حتة صعبة جدا لانه من البرنامج دا يا اشتهرت ومشيت لقدام يا كمان غطس حجرك .... فهيمة مافي زول وراها امكانياتها الممكن تخلق منها زولة قريبة لقلب المستمع السوداني وهي بشلاقتها حاولت تتعوصم بينما انه الناس اسااااااااااسا حبتها لنكهتها الريفية البسيطة وسوطها المعطون في جمال قرانا وخلاوينا وقباببنا وصوفيتنا.... فهيمة تماما بتنطبق عليها مقولة ( الشلاقة الكتلت اشراقة ) فهيمة مشكلتها بتعمل في حاجات ما تشبه المسحة اللطيفة او البصمة الاليقة الظهرت بيها عشان كدا شوهت حاجاتا السمحة واخشى ان يكون هذا البرنامج قاصمة الظهر لها
Quote: تعرف يا هايل من خطورة انه فنان يشارك في برنامج مسموع ومشاهد زي دا انه الفنان بخت نفسه في حتة صعبة جدا لانه من البرنامج دا يا اشتهرت ومشيت لقدام يا كمان غطس حجرك .... فهيمة مافي زول وراها امكانياتها الممكن تخلق منها زولة قريبة لقلب المستمع السوداني وهي بشلاقتها حاولت تتعوصم بينما انه الناس اسااااااااااسا حبتها لنكهتها الريفية البسيطة وسوطها المعطون في جمال قرانا وخلاوينا وقباببنا وصوفيتنا.... فهيمة تماما بتنطبق عليها مقولة ( الشلاقة الكتلت اشراقة ) فهيمة مشكلتها بتعمل في حاجات ما تشبه المسحة اللطيفة او البصمة الاليقة الظهرت بيها عشان كدا شوهت حاجاتا السمحة واخشى ان يكون هذا البرنامج قاصمة الظهر لها
كلامك عين العقل يا الخير... فعلا فهيمة السنة دي فقدت نكهتها كبنت جات نجوم الغد وأدتنا إحساس إنو هي ممكن تكون خليفة حنان النيل من حيث الصوت الدافئ والتطريب السودااااااني حقنا داك.. البخليك تكون مغمض وإنت بتبتسم براك كده... حتى لو نايم... لكن أصبحت تحاول مجاراة بنات المدينة... والتمدن لأهل القرى لمصيبة...
حاجة تانية... أصبحت تحاول إصطناع التطريب.. ودي حاجة خطرة شديد... هي صوتها ساكت كده سممممممممممح... لو تدري.
07-29-2013, 04:42 PM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
ياخي اصعب شيء تكون راجي شيء من شخص ويخزلك مصطفى السني لازم يبتعد من هذا البرنامج لان يعتبر خصم له صراحه
الاخت عبير خيري
Quote: الحلقة تناولت (الأزمان في الغناء) وبدأت بأغنية (زمني الخائن) كلمات وألحان علي المساح وسجلها في اسطوانات إبراهيم عبد الجليل، أداها فرفور أداء باهت ومعاه عدم حفظ للكلمات ولم تمتعني أبداً .
يريت تنزلي لينا بعض الملاحظات في الكلمات التي اخطا فيها فرفور عشان نعرفها وبالمره نرسلها له في رابط حتى يستفيد ياربي اكون كمان بقيت اسمع غلط ولا شنو الغريبه طلعت بعد سماع هذه الاغنيه منه بانها كانت رائعة الاداء افضل من الاداء السابق له في هذا البرنامج وتشكري جدا على هذه الملاحظات ... . . كنت من اكثر المعجبين بصوت فهيمه حتى سبق وعلقت بان صوتها بارد وهادي كالنسمه وجميل وشبهتها بصوت احمد المصطفى ولكن من الافضل ايضا ان تترك هذا البرنامج كمان سامها الايام دي داخله في جلباب الاحباش وعايزه تغني غناها
07-29-2013, 06:35 PM
ودالعباسية ودالعباسية
تاريخ التسجيل: 10-28-2002
مجموع المشاركات: 2442
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Elmosley
وليد عبد اللطيف
الرفاعي عبدالعاطي حجر
إبراهيم عبد الحليم
الليندي
عمر الفاروق
عاطف عمر
عبير خيرى
حمد عبد الغفار عمر
سفيان بشير نابرى
عزالدين عباس الفحل
Nader Abu Kadouk
بشرى مبارك ود السقاى
ودالعباسية
الخير محمد عوض
المعز ادريس
طارق جبريل
سيف اليزل سعد عمر
عبدالمنعم الطيب حسن
Abuzar Omer
khaleel
فيس بوك
تويتر
انستقرام
يوتيوب
بنتيريست