|
|
|
 Re: جـــارتنا القــديمة .... ! (Re: سلمى الشيخ سلامة)
|
الشوق الواحد يا سلوم
والله سعيد بحضور
أما الحال المايل ده يا سلمي فربك ربك الخير يرفع القدم (والقلم ليهو رافع) برضو
يا سلمي البلد دي ركبها ساحت وفترت شديد يعلم الله
أكتبي يا سلمي فالشفتيهو ما شوية برضو
انتظرك صديقتي
| |
  
|
|
|
|
|
|
|
|
Re: جـــارتنا القــديمة .... ! (Re: خضر حسين خليل)
|
وكان الوطن بستان
رويان بي أنهارو
غاباتو أديانو
من كل جنس ولون
صاح
العٍرق لا وين ؟
لمتــين يسوقنا
الدم
شعباً غلب كم جيش
يات سلطة تنفيهوا ؟
الخطوة يوم تمرق
لا بد من توصل
الممشي
بي إحساس
الخطوة مدروسة
والهبة شعبية
الثورة هي الإحساس
الثورة ختة راس
الثورة أخذ وعطاء
الثورة
دي المنهج
تغيير وما تخدير
تعمير وما هو دمار
الثورة قوت ودواء
تعليم وما تغييب
الثورة سترة حال
الغبن طاقيتو
والدم دهـ ماهيتو
.
| |
|
|
|
|
|
|
|
|
|
Re: جـــارتنا القــديمة .... ! (Re: خضر حسين خليل)
|
شوارع افتقدها
للشوارع التى عشت فيها قصص لاتنتهى كان شارع بيتنا محلا للعب ،لكن اكثر ما كان يخيفنا هو "حنينة ست الصحة " هكذا كنا نناديها بيننا ،
كنا عقب ان نخرج من المدرسة نتسكع ولاندخل البيت ، نرمى بحقائبنا المدرسية الى قعر شجرة اللالوب التى كانت تقف الى جوار بيتنا
نبدا اذن لعب "البلى" صحبة ود الجيران صلاح ، الذى كان حين نتغلب عليه ، ياخذ البلى ويجرى باتجاه بيتهم الكان قريب من بيتنا ، حينها نبدا بالصياح باسم يغيظه
ـ اب راسين
حينها يخرج الينا مدججا بالحجارة يقذفها باتجاهنا لاتخرجنا من متونه الاحاجة حنينة ست الصحة
حنينة كانت عاملة فى البلدية ، تلبس ملابس الرجال "عراقى وسروال ومركوب من الجلد" لكنها تلبس طرحة دائما بيضاء ،وتركب العجلة ،
لديها"حقة تمباك وعلبة سيجاير" الفارق الوحيد ان صوتها انثوى رخيم ،كانت تجئ من حيث لا نحتسب لحظة تلك الحرب التى يشعلها صلاح اب راسين
تبدا بمناداتنا
ـ بنات الماذون ادخلن دخلتن فى النار
لحظتها نحمل حقائبنا كما اتفق ونهرع باتجاه البيت
كانت تجئ الى امى نفيسة يوم المشاط رغم انى حسبما اذكر انها كانت لا تمشط شعرها لكنها تجئ للونسة مع اخوات امى نفيسة لهن جميعا الرحمة
وحكاية المشاط تلك يطول وصفها
كنا صباح ذاك اليوم نصحو باكرا ، والذى غالبا ما كان يصادف الجمعة ، رغم تذمر خالى فتحى من الصحيان الباكر ، الا اننا مجابهون بحرير مقولات امى نفيسة التى كانت تطلب الينا ان نمشى الى سوق الموردة بغرض السمك والعيش البلدى
تقوم باكرا باعداد طعام مدسوس فى النملية، يقع تحت طائلة الممنوع مصحوبا بتحذير"
ـ مافى زول يهبش حاجة دا اكل المشاطة
ونمشى الى سوق الموردة ، ونعود من حيث لم نمشى اولا ، حيث اغواء الدافورى الصباحى فى شارع يقع امام سرايا السيد عبد الرحمن المهدى
اعود وحدى ، لاجد المشاطة قد وصلت ، وحولها تتحلق اخوات امى نفيسة حبوبة عرفة وفاطمة والعازة ، يشربن قهوتهن ، ويتضاحكن جزلات
تبدا بعد ذلك عملية المشاط ، ولها طقسها ، حيث العنقريب مفروش فى الراكوبة عليه ملاءة من الملاءات الجديدة ،
ويتوهط اعلى العنقريب بنبرا لجلوس المشاطة ، وتجلس الى ادنى ذلك البنبر امى نفيسة ، وتنتهى موجة المشاط
يتلوها الغداء وهو غداء خاص قوامه ما تبقى من سمك الفطور وكفتة ، ومحشى وسلطة وملاحات مفروكة ومطبوخة ، وليمة كبيرة لاجل المشاطة
وعادة كانت تنتهى تلك الجلسة بخروج المشاطة بمحفظة مليئة واكياس ملاى بما تجود به عليها امى نفيسة
ذلك زمان جميل ياخدورى لم ولن يعود قط
محبتى التى لا تنتهى
| |
|
|
|
|
|
|
|
|
|
Re: جـــارتنا القــديمة .... ! (Re: خضر حسين خليل)
|
خضر سلام واحترام .......ربما رجلنا كانت حارة عليكم ........مجرد ان توهطنا لنكاتبكم ونثاقفكم كما يقولون ، خرجتم أو تخارجتم وخليتو خشمنا ملح ملح .........الله يسامحك ياخي .......حمد لله بسلامة العودة
عرفت منكم مناسبات الاسماء "سميته محمد " وسكر ونمر وأسد وعثمان دقنة ....... واسمي البنات بنضال وجهاد ولكل اسباب تسمية "وفي رواية الاسم يهبط من السماء فجاءة لحظة الولادة او الذبيحة الله اعلم "
| |
|
|
|
|
|
|
|
|
|
Re: جـــارتنا القــديمة .... ! (Re: ibrahim alnimma)
|
تعرف يا خضر
شعرت بإلفة تعود إلى هذا المكان بمجرد ما قريت اسمك
لم يفتك شيء في غيابك عن هذا المنبر الذي تعرفه كما تعرف الوطن عن باطن ضمير
لكن فاتنا تعليقك على الكثير
مثلا، توديعك لأعزاء رحلوا
بعضهم رحل دون أن يعرف مقدار حبنا له
وبعضهم -أصلا- لا يسعهم الحب
الخ الخ الخ
| |
|
|
|
|
|
|
|
|
|
Re: جـــارتنا القــديمة .... ! (Re: معاوية الزبير)
|
معاوية يا صديقي
ازيك ياخ والله ليك وحشات شديدة
قبل أيام يا معاوية كنا في سيرتك ومعاي الناس
(الذين خليتهم وراك) لساهم ينشدوا منك
نسيت أقول ليك همولا متجدع في الإمارات
ويوموا كلو قاعد في الفيس بوك بالله في مغسة أكتر من كدا
يعني الفيس بوك ولا شواطئ عجمان هسي .
عالم عجيبة يا معاوية
بالله ادينا اخبارك
| |
|
|
|
|
|
|
|
|
|
Re: جـــارتنا القــديمة .... ! (Re: ibrahim alnimma)
|
يا ابراهيم النعمة
ازيك ياخ
كراعك ما حارة والله بس تقول شنو ـ اهو ربنا يجازي الكان السبب
عجبتني خالس يا ابراهيم الاسم البهبط من السماء فجأة
ده يا هو البقول عليهو التجي من السما تتلقفها الواطة او كما قالو
مودتي ياخ
| |
|
|
|
|
|
|
|
|
|
Re: جـــارتنا القــديمة .... ! (Re: نجلاء سيد أحمد)
|
يا زول .... خضر حسين أو خضر حسين!
إنت جايب سيرتي مالك ياخ ... الجو هنا مطر والبلد دي قالوا حتغرق... دا كلام ناس الطقس نقوم الصباح نلقاها لينة بس ما غرقانا ..................... ما عارف السبب شنو؟؟؟؟؟
عندي جاره هنا قديمه ، أقدم من سيدنا ادم لكن مليانه حيويه ونشاط.....
بتسلم عليك كتير وبتقول ليك ياخ ما توقف الكتابة
بجيك راجع بمزاج ويمكن أجيبا معاي في البوست
يالله مع السلامة
وسلامي الحار لجيرانك من النساء والرجال علي حدٍ سواء
| |
|
|
|
|
|
|
| |
خضر حسين خليل
سلمى الشيخ سلامة
Deng
الفاتح ميرغني
ibrahim alnimma
معاوية الزبير
Siham Elmugammar
ادريس خليفة علم الهدي
معتصم ود الجمام
على محمد على بشير
غادة مكى محمد
أبوبكر أبوالقاسم
نجلاء سيد أحمد
ibrahim kojan
فيس بوك
تويتر
انستقرام
يوتيوب
بنتيريست