جـــارتنا القــديمة .... !

مــــثـلاً :



جارتنا القديمة (آمنة) وجدتها اليوم وقد كبرت نحو ألف عام أو يزيد ، بصعوبة بالغة أستطعت التعرف عليها لم يبق الزمن فيها سوي صوتها ، ذاب جسدها وبالتالي ما عادت تلك الأنثي عظيمة الخطوات . شحب وجهها وغاب بريق عيناها ، إحدودب منها الظهر حتي أنها صارت تمشي علي ثلاثٍ . جرح كبير علق بجبهتها ـ ببساطة ذابت آمنة (كفص ملح ذاب) ولم يبق من جارتنا القديمة سوي صوتها الأثير .

في سنوات الخصب إلتقينا ـ وفي سنوات الجدب والكفاف إفترقنا ـ وها نحن نلتقي وعلي ذات الكفاف من جديد ـ تماماً كما تقول الأسطورة ( الفقُر بـِـلم) . إلتقينا و كلانا يحمل ما يحمل من جراح كلانا أرهقتنا البلاد ، البلاد التي صنع الصانعون بها ما لم يفعله (نجار بالخشب) .

والمغني يغني :
وتسيب بلاد
وتفوت بلاد
وإن جيت بلاد
تلقي فيها النيل
بيلمع في الظلام
زي سيف مجوهر
بالنجوم
من غير نظام
وتقول سلام
سلالالام
وتعيد سلالام

أتذكر كل ذلك وأنا أقف في صف طويل في إنتظار كوتة (السُكر) و(آمنة) تحاجج النساء وتحدثهن عن زمنٍ طيب مر علي عجل . ها هي الصفوف أمامك الآن ـ ذات الصفوف الخائبة الصفوف التي دائماً وأبداً تستجديك لتبقي داخلها رقماً يصعب وصفه ـ ها أنت تقف الآن في إنتظار كوتة (السُكر) .
أجساد أرهقها الترحال أرهقها المسير الذي لا يفضي لشئ ـ أجساد منهكة تئن من شكواها الجبال ـ جدل المواطنين والمواطنات الجدل الذي سيبقي ما بقيت الصفوف وما بقي صانعوا الأزمات الوطنية ومحتكري قوت البسطاء .

قال قائل :

يا خوانا الزول ده ما واقف في الصف !!

أضاف آخر :

الزول ده قايل روحوا أحسن من منو ؟

قال ثالث :

ياخوانا والله بالطريقة دي نحن ما حنخلص

ليضيف الزول الما واقف في الصف ذاك الزول القايل روحوا أحسن من الناس : أنا مشيت (أبول) ياخوانا أبوووول بس . ووحاة اسم الله أنا من العصر واقف في الصف .
نشبت بعدها معركة متوسطة الحجم تري ولا تري بالعين المجردة إحتواها البوليس بعزم وحسم وقوة . إقتيد الصف عن بكرة أبيه برجاله ونسائه بشيبه وشبابه تدخل بعض المارة طارحين أنفسهم كأجاويد لفض النزاع غير أنهم أيضاً إنضموا للركب الميمون ولكأن لم يكن .

صمت مريب أطل علي المكان تململ الناس صامتين إنحبست أنفس وإمتلأ الجو بصيحات آمرة للناس أن يجلسوا واضعين أياديهم علي رؤوسهم . وضعت الأيادي علي الرؤوس . سقطت إمرأة حبلي أرضاً ـ النسوة وضعنها علي فراش صنعوه من ثيابهن الفقيرة ـ ثم خلقن ستاراً من طرح البنات ـ الآن يأتيها المخاض والرجال واضعين أياديهم الطيبة علي القلوب .
طفل يخرج للحياة يعيد ترتيب الحياة ـ تعلن (آمنة) بفرح ما بعده ثان عن قدوم مولود ينتمي للأرض قهراً ومعني ـ أرتضت أمه أن تسميه (سُكر) (سُكراً وشاي تاتروسايكلين) مواليد الحوجات الأساسية والمطالب العادلة يخرجون الآن . المواليد الذين يخرجون للدنيا في أزمنة الهوان وإنعدام فرص العيش الكريم يخرجون واضعين أياديهم علي رؤسهم من هول الفجائع .

بعدها زحف الناس زحفاً حملوا مولودهم الوطني ما إستجابوا للنداءات الآمرة هتفوا بصوت واحد تسقط تسقط تسقط ـ ها توحدت الصفوف أخيراً وما بقي في الأرض شخص خايب لا يعي حقائق الأشياء ـ ستظل الأرض هكذا دائرةً لا تقف علي حال ـ تعالت الإحتجاجات وخرج الناس كجيوش (النمتي) قارضين للذي أمامهم وخلفهم ثورة الجياع تلتهم الأخضر ويابس الأوهام والأحزان .
ثم
ثم
ثم
ما كان حلماً فالأرض تخلق هكذا ـ الآن يشيع الناس أحزانهم يشيعون أوهامهم الكبيرة ومن حوجاتهم يصنعون الصفوف ـ صفوف المتاريس أعني (المتاريس التي شيدتها في ليالي الثورة الحمراء هاتيك الجموع) .

ما إنت مكانك في القلب
والجرح النازف إنت
الألم الشاهد أحوالك
وفي إيدك تبني
المستقبل
بي قدحك
تبني الإنهدا
.

في السودان يحدث هذا ـ أي والله يحدث



والله المستعان .

وهي علي كل حال دعوة لإجترار المآسي
أيوة المآسي ـ المآسي لامـــين تآمنوا
أن لا مأساة بعد الأوطان .


ـــــــــــ
أها يا كوجان جيتك بالدرب ونتلاقي المساء

خضر الندى
عافية تغطيك
شفت فيك كل ملامح الذين نعرفهم وحتى الذين لا نعرفهم من الناس
ياخ شكرا على البكاء الشجن الحلم
اكتب لينا عن الحال وميل الحال عسى تنعدل ارواحنا

العزيز خضر حسين خليل.

أنا سعيد جدا بعودتك للكتابة بالبورد مرة أخرى.

تحياتي

العزيز دينق
تحياتي وإحترامي
والله أنا أكثر سعادة بك يا صاحبي
مودتي الأكيدة

أكتب عن الصفوف
اكت عن خواء الرفوف
اكتب عن الوجع الخرافي
يا صديقي وحائط مبكاى

محبتي

صديقي بطوكيو الفاتح ميرغني
كيفنك ياصاحبي
ها نحن يا صديقي نرفل من جديد في نقمة (الصفوف)
الصفوف اتمايزت يا صاحبي
لا تحزن غداً موعدنا
غداً يا صديقي

الشوق الواحد يا سلوم
والله سعيد بحضور
أما الحال المايل ده يا سلمي فربك ربك الخير يرفع القدم (والقلم ليهو رافع) برضو
يا سلمي البلد دي ركبها ساحت وفترت شديد يعلم الله


أكتبي يا سلمي فالشفتيهو ما شوية برضو

انتظرك صديقتي

وكان الوطن بستان
رويان بي أنهارو
غاباتو أديانو
من كل جنس ولون
صاح
العٍرق لا وين ؟
لمتــين يسوقنا
الدم

شعباً غلب كم جيش
يات سلطة تنفيهوا ؟

الخطوة يوم تمرق
لا بد من توصل
الممشي
بي إحساس
الخطوة مدروسة
والهبة شعبية

الثورة هي الإحساس
الثورة ختة راس
الثورة أخذ وعطاء
الثورة
دي المنهج

تغيير وما تخدير
تعمير وما هو دمار
الثورة قوت ودواء
تعليم وما تغييب
الثورة سترة حال
الغبن طاقيتو
والدم دهـ ماهيتو


.

لـ"آمنة" أمنيات تتحقق غير عابئة لما تأتِ به الايام من صروف
ولها من بعد ذلك وافر حُبٍ وكثيرُ احترام.
خضر، والله عودتك مُميّزة ياصاحب ..

هشام يا صديقي
وينك غايب ياخ
الواحد الا يمرقها ليكم في المك نمر ولا الحاصل شنو ؟
أكتب عن آمنة وغيرها يا صديقي هن يحتجننا الآن أكثر من أي وقت مضي


مودتي التي تعلم

مسحتي شنو يا سلمي بي وراي ياخ


الليلة الخميس وما عافي ليك كان ما رجعتي الشلتيهو .

ــــــــ
انا عدلت حرف الياء عشان قلبك ما ياكلك

شوارع افتقدها
للشوارع التى عشت فيها قصص لاتنتهى كان شارع بيتنا محلا للعب ،لكن اكثر ما كان يخيفنا هو "حنينة ست الصحة " هكذا كنا نناديها بيننا ،
كنا عقب ان نخرج من المدرسة نتسكع ولاندخل البيت ، نرمى بحقائبنا المدرسية الى قعر شجرة اللالوب التى كانت تقف الى جوار بيتنا
نبدا اذن لعب "البلى" صحبة ود الجيران صلاح ، الذى كان حين نتغلب عليه ، ياخذ البلى ويجرى باتجاه بيتهم الكان قريب من بيتنا ، حينها نبدا بالصياح باسم يغيظه
ـ اب راسين
حينها يخرج الينا مدججا بالحجارة يقذفها باتجاهنا لاتخرجنا من متونه الاحاجة حنينة ست الصحة
حنينة كانت عاملة فى البلدية ، تلبس ملابس الرجال "عراقى وسروال ومركوب من الجلد" لكنها تلبس طرحة دائما بيضاء ،وتركب العجلة ،
لديها"حقة تمباك وعلبة سيجاير" الفارق الوحيد ان صوتها انثوى رخيم ،كانت تجئ من حيث لا نحتسب لحظة تلك الحرب التى يشعلها صلاح اب راسين
تبدا بمناداتنا
ـ بنات الماذون ادخلن دخلتن فى النار
لحظتها نحمل حقائبنا كما اتفق ونهرع باتجاه البيت
كانت تجئ الى امى نفيسة يوم المشاط رغم انى حسبما اذكر انها كانت لا تمشط شعرها لكنها تجئ للونسة مع اخوات امى نفيسة لهن جميعا الرحمة
وحكاية المشاط تلك يطول وصفها
كنا صباح ذاك اليوم نصحو باكرا ، والذى غالبا ما كان يصادف الجمعة ، رغم تذمر خالى فتحى من الصحيان الباكر ، الا اننا مجابهون بحرير مقولات امى نفيسة التى كانت تطلب الينا ان نمشى الى سوق الموردة بغرض السمك والعيش البلدى
تقوم باكرا باعداد طعام مدسوس فى النملية، يقع تحت طائلة الممنوع مصحوبا بتحذير"
ـ مافى زول يهبش حاجة دا اكل المشاطة
ونمشى الى سوق الموردة ، ونعود من حيث لم نمشى اولا ، حيث اغواء الدافورى الصباحى فى شارع يقع امام سرايا السيد عبد الرحمن المهدى
اعود وحدى ، لاجد المشاطة قد وصلت ، وحولها تتحلق اخوات امى نفيسة حبوبة عرفة وفاطمة والعازة ، يشربن قهوتهن ، ويتضاحكن جزلات
تبدا بعد ذلك عملية المشاط ، ولها طقسها ، حيث العنقريب مفروش فى الراكوبة عليه ملاءة من الملاءات الجديدة ،
ويتوهط اعلى العنقريب بنبرا لجلوس المشاطة ، وتجلس الى ادنى ذلك البنبر امى نفيسة ، وتنتهى موجة المشاط
يتلوها الغداء وهو غداء خاص قوامه ما تبقى من سمك الفطور وكفتة ، ومحشى وسلطة وملاحات مفروكة ومطبوخة ، وليمة كبيرة لاجل المشاطة
وعادة كانت تنتهى تلك الجلسة بخروج المشاطة بمحفظة مليئة واكياس ملاى بما تجود به عليها امى نفيسة
ذلك زمان جميل ياخدورى لم ولن يعود قط
محبتى التى لا تنتهى

خضر سلام واحترام .......ربما رجلنا كانت حارة عليكم ........مجرد ان توهطنا لنكاتبكم ونثاقفكم كما يقولون ، خرجتم أو تخارجتم وخليتو خشمنا ملح ملح .........الله يسامحك ياخي .......حمد لله بسلامة العودة
عرفت منكم مناسبات الاسماء "سميته محمد " وسكر ونمر وأسد وعثمان دقنة ....... واسمي البنات بنضال وجهاد ولكل اسباب تسمية "وفي رواية الاسم يهبط من السماء فجاءة لحظة الولادة او الذبيحة الله اعلم "

تعرف يا خضر

شعرت بإلفة تعود إلى هذا المكان بمجرد ما قريت اسمك

لم يفتك شيء في غيابك عن هذا المنبر الذي تعرفه كما تعرف الوطن عن باطن ضمير

لكن فاتنا تعليقك على الكثير

مثلا، توديعك لأعزاء رحلوا

بعضهم رحل دون أن يعرف مقدار حبنا له

وبعضهم -أصلا- لا يسعهم الحب

الخ الخ الخ

خضر حسين

وبس

تسجيل حضور لحين عودة
والسبب خميسك

ارقد عافية يازول يا نيل

هههههههههه ادريس يا بتاع النيل انت ازيك
والله الواحد مشتهي يخمس معاك
واهو مناسبة الليلة نخمس سوا




والفورة مليون

سهام يا صديقتي
ازيك
انتي يازولة في السودان ولا بلاد برة
والله مقصرين معاك يا سهام لكن يشهد الله
الزحمة حاصلة

مودتي يا زميلة

معاوية يا صديقي
ازيك ياخ والله ليك وحشات شديدة
قبل أيام يا معاوية كنا في سيرتك ومعاي الناس
(الذين خليتهم وراك) لساهم ينشدوا منك
نسيت أقول ليك همولا متجدع في الإمارات
ويوموا كلو قاعد في الفيس بوك بالله في مغسة أكتر من كدا



يعني الفيس بوك ولا شواطئ عجمان هسي .
عالم عجيبة يا معاوية

بالله ادينا اخبارك

يا ابراهيم النعمة
ازيك ياخ
كراعك ما حارة والله بس تقول شنو ـ اهو ربنا يجازي الكان السبب
عجبتني خالس يا ابراهيم الاسم البهبط من السماء فجأة



ده يا هو البقول عليهو التجي من السما تتلقفها الواطة او كما قالو


مودتي ياخ

بركة الجيت ...

يا أدروب

ازيك ياخ ازيك
لساك مساسق في الدروب ومن سفر لي سفر يا صديقي
غايتو ربنا يجبر بي خاطرك وين ما قبلت



بالمناسبة وين حسبو ومورتا ؟

مالهم يعني فاتحين لي كده

حمد الله على سلامة العوده يا خضر
وليك وحشه والله

صديقي العزيز
علي محمد علي بشير
الأشواق يا صاح وسعيد بلقائك مرةً أخري

دمت صاحبي

الجيران والحلة

سعدت بطلتك ياصديق

ودى واحترامى

عوداً حميداً مستطاب ... وتانى ما تطوِّل الغيبة ...

هل نعشم أيضاً فى أن يطل قمرنا الحارن ؟

عزيزي ابو بكر
تحياتي واحترام
أشكر لك حضورك وترحيبك
بالنسبة لقمر هو متواجد برة البلد الايام دي سأبلغه تحياتك

سلمت

Quote: الجيران والحلة

وغالي غالي علي إتدلي

ازيك ياغادة وسعيد بطلتك صديقتي
وينك ما ظهرتي في احتفالية سودانيات بإشراقة مصطفي
توقعت حضورك


مودتي ياغادة ولي قدااااااام

فرح فى زمن الحزن مرحبابك الف ياصديق

يا زول .... خضر حسين أو خضر حسين!

إنت جايب سيرتي مالك ياخ ... الجو هنا مطر والبلد دي قالوا حتغرق... دا كلام ناس الطقس نقوم الصباح نلقاها لينة بس ما غرقانا ..................... ما عارف السبب شنو؟؟؟؟؟

عندي جاره هنا قديمه ، أقدم من سيدنا ادم لكن مليانه حيويه ونشاط.....

بتسلم عليك كتير وبتقول ليك ياخ ما توقف الكتابة


بجيك راجع بمزاج ويمكن أجيبا معاي في البوست

يالله مع السلامة

وسلامي الحار لجيرانك من النساء والرجال علي حدٍ سواء