|
|
 نكتة شديدة أهديها لكابتن المريخ حامد بريمة!
|
قالوا صاحبنا مهاجر ما مقصر في أهلو قامت مرة من المرات ( مسكلت) لبهو الوالدة ولمن رجع ليها طلبت منو ارسل مبلغ لصيانة حيطة البيت القربت تقع في الجيران طوالي صاحبنا رسل الضحاكات بعد اسبوع اتصلت الوالدة تاني عاوزة قريشات للحيطة علي طول صاحبنا قال ليها يا والدة انا مارسلت ليك المرة الفاتت قروش الحيطة قالت ليهو الوالدة اتصرفوا فيها وأشتروا بيها دوا لود أختك عيان قام صاحبنا رسل المعلوم وبعد ايام الوالدة مسكلت كالعادة عاوزة قروش للحيطة زعل صاحبنا وقال للوالدة يا والدة ما رسلت ليك قروش الحيطة الاسبوع الفات علي طول قالت ليهو اتصرفنا فيها ودفعنا فيها قسط الجامعة لسعاد بت اختك. علي طول الفنجري رسل قروش الحيطة تروح بعد اسبوع الوالدة تمسكل للفنجري تاني ورفع صاحبنا التلفون وقال: سلام يا والدة ان شاء الله خير.......ردت الوالدة: الحمد لله خير يا وليدي بدورك ترسل لي قريشات بدور لي (دش) أتفرج فوقو
علي طول صاحبنا وافق ووعدها بالمطلوب وقبل ان تنهي الوالدة المكالمة صاحت فيهو يا وليدي ما تنسي حق الحيطة الحيطة الحيطة قام علي طول صاحبنا قفل الخط وجنبو صاحبو قاعد قال ليهو : والله يا صاحب الوالدة قدتنا وقدت جيبنا قد كل ما تضرب تروح تقول ليك الحيطة الحيطةالحيطة قلت يا ربي دي امي ولا حامد بريمة!
|
|
  
|
|
|
|
|
|
|
|
Re: نكتة شديدة أهديها لكابتن المريخ حامد بريمة! (Re: nazar hussien)
|
سلامات يا نزار
أخوك طبعا مريخابي قديم وكنا ما بنفوت تمرين للمريخ وكنت بتذكر حامد بريمة ده يا دوب سجلو وجابوهو تقريبا من عطبرة اللي منها اعتقد الحارس
الطيب سند والذي في اعتقادي من افضل حراس السودالمن كان المريخ مريخ وكانت افضل تشكيلة مريخ بتجهجه الرشاشات تتكون من الطيب سند للمرمي وسليمان ظهير تالت وباكات طاهر هواري وفيصل كوري واستوبر فتحي فرج الله واجنحة عبده الشيخ وحموري او الجيلي وجاد الله ووسط بشارة وعمر وسامي وهجوم كمال وسانتو واحتياطي عمار ومازدا وبشري وهبة
ولاعبي المفضل جدا جدا. كمال عبد الوهاب وبعدو بشارة والمرحوم سامي!
معليش قلنا نمرقكم شوية من ساس يسوس وحكاية الكيزان الجراقيس لعنة الله عليهم في الدنيا الاخرة...... معفولة الود الحرامي الفاسد جمال الوالي بجي جنب ناس ابو العايلة وحاج حسن عثمان عليهما الرحمة ديلك كانوا رجال بدفعوا للمريخ من جيوبهم بالحلال والبلال عشان كده كان المريخ في السماء لكن مما دخل مال الحرام بواسطة الحرامي ده. المريخ دق الدلجة بسبب مال الحرام المسروق من شعبنا عشان كده غتس حجر المريخ.......
ما بطال لقينا نفسنا عندنا حبة ثقافة كورة نجادع بيها معاكم ولدي معلومة من صديق درس معي بمدرسة حي الوابورات الابتدائية ببحري ذكرني بان عصام ابو الجاز كان دفعتنا في الوابورات وعبده الشيخ كان دفعتنا في بحري الشعبية الوسطي اللي كانت شمال غرب حديقة عبود وشرق بحري الثانوية الحكومية. تحياتي لكل لعببة المريخ من الزمن الجميل بدون فرز.
| |
|
|
|
|
|
|
|
|
|
Re: نكتة شديدة أهديها لكابتن المريخ حامد بريمة! (Re: هشام هباني)
|
لدي اعتقاد جازم ان المريخ والهلال افضل من كل احزاب السودان لانهما مؤسستان قوميتان راسختان بالجد بالجد ساهما في تمتين النسيج الاجتماعي وبلورة الوعي القومي والتسامح الاجتماعي ومؤهلان ان يلعبا دورا وحدويا في المستفبل في تمتين عري الاخوة بين الاشقاء في طرفي الوطن الشمالي والآخر الجنوبي اذا رغب من يدير الامر فيهما هذا المسعي الوطني النبيل حيث اقترح عليهم ان يفتحوا ناديين للمريخ والهلال في جوبا باعتبار
ان اهلنا في الجنوب بالتأكيد لديهم ولاء لأندية كانوا من لعيبتها ومشجعيها انسجموا في اجوائها العفوية المشبعة بروح الاخاء والتسامح بل عليهم ان يقودوا حملة وطنية بواسطة جماهير المريخ والهلال في كل انحاء الوطن وخارجه لتشييد طريق كوستي جوبا لربط الاهل في الشطرين بطريق واحد سيجعل من التواصل الشعبي امرا ميسورا وايضا ان نسعي لانشاء إستاد جوبا الدولي علي نفقة ابناء الشمال من جماهير المريخ والهلال وبقية الاندية الشمالية تعبيرا عن روح الاخاء بلا اجندة سياسية وهو السبيل الوحيد لتهيئة الاوضاع مستقبلا لاستعادة وحدة علي اساس شعبي هو الارسخ والابقي.
| |
|
|
|
|
|
|
|
|
|
Re: نكتة شديدة أهديها لكابتن المريخ حامد بريمة! (Re: هشام هباني)
|
أخي العزيز ود هباني ،
تحياتي وتقديري ،
شكراً على النكتة الظريفة وشديدة ، ورغم أنني هلالابي إلا أنني من أشد المعجبين بالكابتن
الطيب سند ، فقد كان حارساً عملاقاً بحق وحقيقة .. وياحليل ذاك الزمن الجميل ، زمن الكورة الصاح .
| Quote: بحري الشعبية الوسطي اللي كانت شمال غرب حديقة عبود وشرق بحري الثانوية الحكومية |
هل تقصد مدرسة بحري الأهلية الحكومية اللي كانوا بسموها (السكة حديد) ؟ والتي هي
في حي الأملاك ؟ لقد كان لي الشرف ودرست فيها المرحلة الوسطى ، وعندما طبق السلم
التعليمي بتاع الراحل د. محي الدين صابر ، كنا في ثالثة أوسطى وبقينا في ثانية
ثانوي عام ؟! الكلام ده في بدايات السبعينات .. يعني لساتنا صغار ما زيكم ؟! ههههه .
مودتي ،
( ليمو )
| |
|
|
|
|
|
|
|
|
|
Re: نكتة شديدة أهديها لكابتن المريخ حامد بريمة! (Re: abdulhalim altilib)
|
العزيز التلب
تحياتي
يااااخي الطيب سند في رايي كان اسطورة عديل....بس هاجر بدري
واما المدرسة تقريبا ياها لاني قريت فيها نص عام فقط وانتقلت بعدها خارج الخرطوم وكنت بتدكر استاد عربي قصيروني اسمو حمدي زول كده بلبس نضارات وجنو تمباك وشابل سوطو طوالي واتدكر كان دفعتنا واحد شاطرمن اولاد قشلاق كوبر اسمو محمد جابر وواحد صاحبي حلبي اسمو مصدق محمد علي ويبدوان له علاقة بالفنانة الراحلة اماني مراد وايضا كان دفعتي (عبد المنعم بتي) قريب الحاجة بت بتي المشهورة بتجبير الكسور ومعانا واحد من اولاد الشعبية ادكراسمو احمد ده زول فنان بلحن الاناشيد في الفصل وبتدكر وليد قصيروني اسموفيصل خوجلي كان قدامنا في تالتة وده كان واحد من المجموعة بتاعة الاطفال حقين نشيد امة الامجاد بالتلفزيون زمن ابيض واسود....................شفت الفضايح كيفن خليتونا نكشف العمر ونطلع جلاكين من زمن التلفزيون ابيض واسود....... والا رحم الله زميلي بمدرسة حي الوابورات الابتدايئة الشاعر الشهيد ابو در الغفاري وبرغم اعاقته التي كانت في يديه الاثنين لكنه كان خطاط جريدة الفصل يعني احسن زول بخط في المدرسة!
مودتي
| |
|
|
|
|
|
|
| |
هشام هباني
nazar hussien
abdulhalim altilib
مجدي كنة
فيس بوك
تويتر
انستقرام
يوتيوب
بنتيريست