|
أسعد الله صباحكم بكل خير أخواتى وأخوانى,
|
نفحات الصباح تبعث فى الروح ألأمل..وشروق الشمس يعلن ميلاد يوم جديد. يا صباح الورد وألأمنيات و الفجر الجميل
جميل أن نسمع كلام حلو وجميل من الصباح من زول تعزو أو زول تحبو أو صديق يكن ليك كثير من المودة.
|
|
|
|
|
|
|
|
Re: أسعد الله صباحكم بكل خير أخواتى وأخوانى, (Re: ismeil abbas)
|
تصحى الصباح وتقول أصبحنا وأصبح الملك لله ولا حول ولاقوة إلا بالله.قبل ما تكمل الدعاء يبتدى مؤشر مزاجك يافى الصعود يافى الهبوط بالنظر لآقرب زول ليك وللمتزوج أكيد زوجته.
إبتسامة ففطور ودعاء(حفظها الله لى)
تجى المكتب يقابلك العامل فى المكتب يا صارى يا مبتسم ويجيب الشاى حسب مزاجه ذلك اليوم.
تفتح النت وتفتح صفحتك المفضلة.وتدخل المنبر العام بعد التحايا مع زملائك ونظرة على خطة عملك اليومية.
وإنت بتتصفح مرورآ على العناوين والكتاب تاخد ليك وقفة لبعض الكتاب الذين لايقومون إلا بنبش زملائهم وتلقاهو نبش أحد من الزملاء الذين تعرفهم بصورة خاصة
ويبدأ مؤشر المزاج فى الهبوط.
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: طارق ميرغني)
|
الاخ النقي التقي اسماعيل عباس رجل النوايا الحسنة النية زاملة سيدا والله اديك قدر نيتك واكتر صحة عافية انت ومن تحب كل الاديان السماوية كل القوانين الوضعية كل التنظيمات المدنية كلها وضعت لكي يعيش الناس في سلام رب العزة والجلالة ليس بحاجة لصلاة احد ولا صيام احد او زكاة احد وكل المطلوب ان تعيش الناس في وئام وسلام لاسفك دماء لابغضاء لاشحناء كل المطلوب ان تتعامل الناس بالرفق ويسود السلام بينهم والطمأنينة كل المطلوب الاخلاق الحميدة والتعامل بالتي هي احسن اخواتي واخواني نشعل شمعة من كريم الاخلاق خير من ان نلعن ظلام الايام والزمن وهذا بوست شمعة من شمعات سمعة المضيئة وسط ظلام القهر والظلم والكبت والبغضاء اشعلوا شمعات المحبة بيننا عشان الحاجات تبقى كويسة ... سمح ؟
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: Yousif A Abusinina)
|
الكون جميل ونسيم عليل في خفة ساير ومن الخميل اصوات هديل تحمل بشاير ،،، آهو الصباح آهو لاح يا حبيب والبلبل الصداح جاء قريب وجاك يحكي ليك جاك يشكي ليك من شوقوا ليك صاح يا حبيب .... وصابحني دايماً مبتسم ،،، ربنا يجعل كل صباحتك إبتسامة يا أستاذ إسماعيل ،،،
تحياتي : ياسر العيلفون
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: ياسر السر)
|
ودالبوش ..ليك فى القلب مكان.
تربية الحبوبات وونسة الكبار دائمآ تأتى بزولآ نجيض مثلك وصاحب فراسة.
Quote: رب العزة والجلالة ليس بحاجة لصلاة احد ولا صيام احد او زكاة احد وكل المطلوب ان تعيش الناس في وئام وسلام
|
لقيتك قريت بوستى ده بصورة صحيحة... سعدت بمرورك وسماحة كلامك الكبير ده.
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: ismeil abbas)
|
ياسر أنت أحد ناثرى الجمال والفرح..
Quote: الكون جميل ونسيم عليل في خفة ساير ومن الخميل اصوات هديل تحمل بشاير ،،، آهو الصباح آهو لاح يا حبيب والبلبل الصداح جاء قريب وجاك يحكي ليك جاك يشكي ليك من شوقوا ليك صاح يا حبيب .... وصابحني دايماً مبتسم ،،، ربنا يجعل كل صباحتك إبتسامة يا أستاذ إسماعيل ،،،
|
سؤالى ليك يافنان ما هى أكثر ألأوقات التى توحى للفنان الجمال...الصباح.ألأصيل.المساء؟
تقديرى لك.
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: أبو الحسين)
|
لك التحية أستاذي إسماعيل فأنتم من تدفعونا لنثر الفرح والجمال ،،، حسب إعتقادي أن وقت الأصيل يمكن للفنان أن يستوحي من خلاله كثير من الإبداع وهذه وجة نظر خاصة ، ولكن هناك إبداع يولد نتيجة لحدث معين أو إنفعالات معينة أو إحساس معين ففي هذه الحالة يكون الناتج عن ذلك فن حقيقي وجميل ... تسلم يا راقي ويا زوق ...
تحياتي : ياسر العيلفون
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: ياسر السر)
|
لك وللاسرة نقول اسعد الله صباحكم وسائر ايامكم الراقي الحبيب اسماعيل .. فعلا نحتاج لتلك الجلسة الصباحية مع الاسرة ومن بعدها تلك الدعوة بان نسال الله ان يفتحها عليك دنيا واخرة .. وكم تشتاق النفس لكلامك اخي اسماعيل فهو مسكن للقلب وشاف للجفاف ..
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: داليا الكباشى)
|
أخى الحبيب أبو الحسين....ليك ود ماليهو حد.
Quote: صباحك هناء يا صاحبي...
مرور لتأكيد المحبة الصادقة لكم ولرواد بوستك الطاعم... |
المحبة الصادقة بينا ما داير ليها أكيدة ولا بيوت قصيدة..ما عندك حاجة جديدة؟؟
عارفك حنين وقلبك أبيض...الله يجيب الحسين وتتمطقو وتشم بطنو يارب ياكريم.
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: ismeil abbas)
|
العزيز/العوض شيخ العرب.....التقدير وألأعزاز لك.
Quote: ومن بعدها تلك الدعوة بان نسال الله ان يفتحها عليك دنيا واخرة |
ولك بمثلها ألآف يارب..ودعوات الجمعة الراتب ألأسبوعى زاد لنا فى الغربة..الله يديم المودة وألأخاء..وكل صباح وأنت بخبر وسعيد ومن حولك.
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: ismeil abbas)
|
الحبيب حمزاوى....مسكاقنى.
Quote: انت المباراة بتاعت امبارح العصر دي فتحت نفسك ولا شنو تتخيل انتهت تعادل 2/2
|
الحقيقة شوفتك هى الفتحت نفسنا وروحك الهاشة الباشة....البوست مفتوح قبل المباراة..
معنى كده ناس كرمة شالو الكأس لأنهم هناك منصرين 2صفر ,مبروك لهم يستاهلوا والله
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: ismeil abbas)
|
الزول الجميل ,, الحبيب اسماعيل عباس ,, صباحاتك بيض.
والله ليك وحشة شديدة وسامحنا علي التقصير,,
صباح جميل زي الورد لامن تلقي زول بتعزة يسطر كلام متل
نسمات الصباح يدخل قلبك ينعش روحك ويرد عافيتك ,,
تعلو الابتسامة وجهك ,,يفرح غيرك لفرحتك تبقي الدنيا
جميلة ,تسامح تصافح تعافي,, يديك الفي مرادك يا اسماعيل
وربنا يفتحا عليك دنيا واخرة.
مودتي ومحبتي
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: ismeil abbas)
|
وأنا في زحمة الشغل يا إسماعيل .. ومع كمبيوتري الضرب فجأة دا والملف المهم الما لقيتو .. قلت لي يسعدك صباحك وفي إشارة لهذا البوست .. تخيل من الصباح ما دخلت المنبر قول من تلاتة يوم ونصف .. مشيت البيت إتذكرت كلامك .. وإتذكرت الحلة والبيت الكبير .. عندنا هناك يا إسماعيل وفي الصباح .. يجن النسوان مارات غير زائرات في حالات كتيرة ومن الشارع ينادن على ست البيت .. وكنت دائماً ما أسمع كلمة بت يسن أصبحتو كيف .. نعم الناس هناك تقول أصبحتو كيف وقيلتو كيف وأمسيتو كيف .. على هذه الكلمة البسيطة الجميلة وجمال الناس وبساطتهم .. كانت تعطي إنطباع جميل وروح سمحة .. تخيل يا إسماعيل بكيت بكيت بألم شديد .. تذكرت الحاجة وكل التفاصيل الصغيرة ديك والكبيرة .. والبيت الكبير الأصبح ما فيهو نسمة تغيهو حر الهجير وتلم الجميع .. الدنيا دي فيها شنو .. غير السلام .. عايزين السلام .. عايزين نعيش في سلام .. لا حروبات لا كراهية .. لا فساد لا إغتصاب ولا تشريد .. عايزين حياة كريمة .. نتعلم فيها .. ونتعالج من أمراضها .. لا طغاة ولا دكتاتورية ..
معليش يا إسماعيل أفحمتك بكلامي الكتير دا .. ربنا يديك قدر نيتك .. عشان بتنشر السلام والمحبة بين الناس .. ولأنك أنت الطيبة تمشي على رجلين .. ربنا يعدل طريقك .. ويوفقك في كل خطوة تمشيها ..
والسلام ..
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: معتصم دفع الله)
|
Quote: وكنت دائماً ما أسمع كلمة بت يسن أصبحتو كيف .. نعم الناس هناك تقول أصبحتو كيف وقيلتو كيف وأمسيتو كيف .. على هذه الكلمة البسيطة الجميلة وجمال الناس وبساطتهم .. كانت تعطي إنطباع جميل وروح سمحة .. تخيل يا إسماعيل بكيت بكيت بألم شديد .. تذكرت الحاجة وكل التفاصيل الصغيرة ديك والكبيرة ..
|
يا سلام يا معتصم يا اخى....رحم الله أمنا ست الكل بت يسن رحمة واسعة ورحم الله كل موتانا وموتى المسلمين.
يا معتصم البكاء أحيانآ راحة.بعده بنرتاح, البكاء ضمن ألأحتياجات الطبيعية للأنسان لابد منه,وعلى ذكر الأمهات خلينى أحكى ليك عن أمى كلتوم بت الفكى إبراهيم الله يرحمه..كانت تقول لينا يا أولادى الله يجعل يومى قبال يومكم من شدة محبته لينا الله يرحمها رحمة واسعة.
بتقوم قبالنا بعد الفجر وأسمعها تتمتم بأصبحنا وأصبح الملك لله بعد صلاة الفجر بتوقد ناره أول شىء بتعملوا كان فى لبن بتسخنو لى وكان مافى من دون اخوانى لازم تكون عملت لى كباية الليمون أخوك كان مدلعنو دلع شديد .لما يصحوا أخوانى بنتسابق حول ألألتفاف حولها وهى تصبح علينا.
منها كنا بنستمد ألأمل زى ما إستمدينا من ثديها الحياة...نحن كبار كانت تقبلنا مثل الصغار ونرقد فى حضنها.كانت ملاذنا ساعة تضيق بينا الدنيا.صدرها الحانى كان بخفف لينا الكثير من صعاب الدنيا القاسية.
حاجتنا لها ألأن أكثر, زادت الدنيا قساوة وزاد ظلم الطغاة وكثر الهرج والمرج وقست قلوب أهل السلطة وزادت قساوة بأنتهاكاتهم المريرة لشرف النساء وجلدهم.
اللهم نسألك اللطف والعدل فى بلادى خاصة وسائر البلاد.
فيا أخى أعرف مدى شفافيتك وطيبتك لذا تجدنى دائمآ أنادي بأن لابد أن تخرج من جو الحزن الذى فيه أعرف أن ذلك صعب صعب ولكن من أجل عمر ومودة ومن أجلنا.
لك معزتى التى تعرفها.
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: الامين موسى البشاري)
|
[B]أخى ألأمين الزول الجميل...
الصباح أهو لاح..
Quote: اسعد الله اوقاتك برضو بس بتوقيتنا زي ما قالوا الجماعة شكلك منــداح الليلة يا ســيدي ربنا يجمل ايامك وصباحاتك خايف بعد اسبوع كدي اسمع انك سافرته السودان
|
والله ما تسبتعد وما تستبعد إنو من اسباب السعادة الثالثة تكون هنا..
زى ما عندنا مرة واحد صاحبنا جالس مع خطيبتو وعايز يشكره قال ليها والله أسباب السعادة كلها متوفرة اليوم..الماء فتش مالقى ماء قال ليها فى الماسورة والخضرة أشر لنجيلة البلاعة وأصاب مايريد وأشر عليها والوجه الحسن .
تقديرى وأحترامى .
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: ismeil abbas)
|
صباحك يا صباح الفل والورد والياسمين .... اتمني لك دوام السعادة في كل صباح ..... صباحك صباح العيد علي الاطفال ...طبعا دا اجمل صباح . وصابحني دائما مبتسم ....برضو دا صباح جميل وحلو . انت عارف انا لي فترة ما دخلت هنا الي لما شفت صباحك الجميل دا وطلتك البهية دي يديك العافية ويجمعك بي وليداتك ....
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: ismeil abbas)
|
Quote: نفحات الصباح تبعث فى الروح ألأمل..وشروق الشمس يعلن ميلاد يوم جديد. يا صباح الورد وألأمنيات و الفجر الجميل
جميل أن نسمع كلام حلو وجميل من الصباح من زول تعزو أو زول تحبو أو صديق يكن ليك كثير من المودة. |
ات عارف ياسمعه انا حاسى كدا انو الزول الخلاك تفتح البوست وابراجك 3g دا انسان غير عادى اهنيك على هذا الشعور الرومانسى
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: ASHRAF MUSTAFA)
|
أخى خالد المحرب....
Quote: ات عارف ياسمعه انا حاسى كدا انو الزول الخلاك تفتح البوست وابراجك 3g دا انسان غير عادى اهنيك على هذا الشعور الرومانسى |
3G قال....ده دى بلا حدود..دى زولة إستثنائية ربنا يسعد الجميع ويحفظهم ويحفظكم.
ليك تقدير وإحترام أنت وأم أحمد خاص.
| |
|
|
|
|
|
|
Re: أسعد الله صباحكم بكل خير أخواتى وأخوانى, (Re: ابو جهينة)
|
الزول النسمة سمعة (ما أجمل الصباح حين يحمل معه كلماتك وعبق روحك وعمق معانيك صباحك أجمل تقبل مروري المتواضع دمت بخير ...
في هذا الصباح الجميل في هذا الصباح الجميل ذرات رائعة من الأمل تهطل علينا لتضمنا ولتعانقنا ولتحتضننا صباح مفعم ....مليء بالمشاعر الجميلة يبتسم كالنور في قلوبنا وعقولنا معا في نشرح التلاقي والإنشراح
ولكم هذا الدعاء لندعوا به كل صباح
رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَى وَالِدَيَّ وَأَنْ أَعْمَلَ صَالِحَاً تَرْضَاهُ وَأَدْخِلْنِي بِرَحْمَتِكَ فِي عِبَادِكَ الصَّالِحِيِنَ (19)
اللَّهُمَّ إِنِّي أَسْأَلُكَ إِيمَانَاً يُبَاشِرُ قَلْبِي، وَيَقِيِنَاً صَادِقَاً حَتَّى أَعْلَمَ أَنَّهُ لاَ يُصِيِبُنِي إِلاَّ مَا كَتَبْتَ لِي، وَرَضِّنِي بِمَا قَسَمْتَ لِي إِنَّكَ عَلَى كُلِّ شَيْءٍ قَدِيِرٌ. اللَّهُمَّ إِنَّكَ تَعْلَمُ سِرِّي وَعَلاَنِيَتِي فَاقْبَلْ مَعْذِرَتِي، وَتَعْلَمُ حَاجَتِي فَأَعْطِنِي سُؤْلِي، وَتَعْلَمُ مَا فِي نَفْسِي فَاغْفِر لِي ذَنْبِي. اللَّهُمَّ إِنِّي أَسْأَلُكَ رِضَاكَ وَالجَنَّةَ وَأَعُوذُ بِكَ مِنْ سَخَطِكَ وَالنَّار. اللَّهُمَّ قِنِي عَذَابَكَ يَوْمَ تَبْعَثُ عِبَادَكَ.
شكرا لك يا خال علي هذا الألق الجميل
،،،،أبوقصي،،،،
| |
|
|
|
|
|
|
|