|
Re: ** كورس كعك العيد** بوست مفتوح لضيوف المنبر (Re: manal eltahir)
|
Quote: واول مره يقابل سودانيات محننات لما وصل بعد كم يوم كدا قال لي في نساء سودانيات جو معنا في الطياره يدينهم فيها سكن. انا من طبعي وانا في السودان ما اتمنيت اتحنن لا اتدخن ما قادره اشوف الناحيه الجماليه الفيها |
غايتو يا ماما دومة.. وافق شن طبقة :)) .. الله يخليكم لبعض و يسعدكم يا رب..
لكن لما نجي نفرح بسوزانا و سامي، لازم نخليهم يجربوا شوية من عاداتنا.. و نعزمهم حنة في السودان ان شاء الله
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: manal eltahir)
|
Quote: Take2 hearping cups of patience2 handful of generosity dash of laughter headful of understanding sprinkle generously with kindness add plenty of faith(mix well أنا ما بفهم في المواضيع دي لكن قلت لازم أشارك ناس سنويه ديل. |
الوصفة دي اكيد بتطلع حاجة احلى من الكعك..
يسلمو يا منال و كل سنة و انت طيبة
و شكراً على المشاركة الحلوة
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: Sana Khalid)
|
ازيكم يابنات.... اول حاجه لازم اوضح ....ان السنة دى اول سنة اخبز...بعد اكتر من 8 سنوات زواج ....السنة دى حسيت على دمى و قلت اخبز للغلابة ديل. امى بتكون جاتها نفسيات من كترة التلفونات الايام دى....لكن غايتو صااابرة على لحدى هسى. بجيكم راجعة للوصفات بعدشوية... لكن عاوزه اقول حاجه لدانيا و ماما دومة و .....و ملاسى برضو: يا اخى خلو الناس فى حالها....العاوز يخت ملايات ستان بخرز....و اللى عاوز يعمل حنة للركبة او الله عاوزه تتدخن دخان *"مرة الغفير"....ما فلى مشكلة ..طوال ما الواحده مبسوطه....وزوجها مبسوط....خلوها تعمل العاوزاه. لكن على راى سناء البيغيظ بالجد موضوع المكياج. المكياج ده (خاصة الفاونديشن و البدر) ما مزاج ساى.....و مهمتة(للاسف) ما تفتيح لون البشرة. و الوان الصباح مختلفة من الون المساء و مختلفة من الوان الحفلات و بتختلف فى الصيف و الشتاء. و الله انا لى زمن بفكر افتح بوست عن الموضوع ده. الحقينا يا دانية.
___________________________________ *ما عنصرية منى تجاه زوجات الخفراء ..لكن مشهورتان بالدخان التقيل ..على الاقل اللى انا بعرفهم.
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: smart_ana2001)
|
بالنسبة لي الحنة والدخّان حاجه بستمتع بيها مرحلياً... يعني بتهف لي مرات ... لكن بعملها في الغالب عشان نفسي.. ما بهمني النسوان وبرتوكلاتهم كتير... لاني بفتكر انه لكل مقام مقال.. وفي اولويات لازم الواحد ينتبه ليها... في الحاجه دي انا دايما خاته كلام ليلى صلاح (ابنوسه) في بالي... وقبل كده قلت الكلام ده... يعني مثلا ايام العيد... بحب اتحنن، وما حنّه عادية.. وبحب افرّش وابخّر البيت ولااااااازم امشي اعمل شعري في الكوافير.... وبشوف لي توب ظريف بتاع حرير البسه.. او اشتري واحد جديد.. يعني يوم العيد لازم اغيّر لروحي عشان انا زاتي احس بالعيد... حسي بكره يوم الحنّه في عماراتنا، اتفضّلوا معانا... هههههههههههههه...
اها بعد ما العيد ينتهي، نرجع لنكوشنا... والحنه بننساها كم شهر... لكن ممكن في ويك إند كده، يهف لي امشي اعمل شعري واتحنن!... انا ضد الإلتزام بالبرنامج كعادة مستمره.. نوع يقول ليك حنتها ما بتطلع من كراعاها.. ما لي بالبعملوا كده، هنئياً ليهم... لكن انا زوله ملوله... الحاجه لو اتكررت لي كتير... بزهج منها وبتفقد حلاوتها، لكن لما اغيب منها وارجع ليها، بتكون نفسي فعلا فيها وبظبّطها...
ياخوانا خبيز البصمه الدفعه الاولى اتحرق.. عملته عجبنه تانية... ان شاء الله تزبط، وانزّل ليكم الصور... الله يستر
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: doma)
|
سلامات يا خالتي دومة و الله كلامك صاح. أنا اتعاملت بمعايير مزدوجة في الموضوع ده. مفروض اخلي الناس في حالها حتي في موضوع الميك اب ده. لكن ممكن القي لروحي مخارجه. المكياج ده ما حقنا. يعني ما سوداني نلخبتو ذي ما عاوزين. الموضوع فن و علم. و عنده أبجديات لازم مراعاتها. و ذي ما قلتي شوال الجير اللي في الوش ده ما سمح كلو كلو. اهم حاجه في الفونديشن انو الناس ما تقدر تجزم تماما انك عامله فاونديشن و لا لا. بعترف تاني باني ما لي حق في طولة اللسان دي.
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: hameem)
|
المنين (حأعمله الليله كان الله هوّن) 2 كوب سكّر ملعقتين كبار نشادر (وقية) ملعقة كبيرة باكينج بودر كبايتين ونص حليب كبايتين زيت
كيلو دقيق (يعني الكيس بتاع الكويت كامل)
الطريقة تخلطي الحاجات كلها مع بعضها خلط كويييييس، لحدي ما السكّر يذوب وبعداك تضيفي ليهم الدقيق وتعجني... في طريقتين... إما تمسكي البسكويتات واحده واحده تشكّليهم.. او تفردي العجينه كلها في الصينيه، وبعداك تقطعيها وتقلّبي البسكويت عشان يتحمّر من فوق كمان...
دي الوصفة الادتني ليها حماتي اخت نادر، لو في تصحيح بالله صححوا لي قبل ما اقعد اجوط ... برضه سؤال، موش المفروض يكون في حبّة سودا (كمّون)!!
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: Sana Khalid)
|
القرشلة (قرقروش بالسمسم و اليانسون)
المقادير:
3 اكواب دقيق 3/4 كوب زيت نباتي 1 كوب سكر 3 بيضات 6 ملاعق طعام يانسون (يانسون مركز!) 2 م صغيرة بيكينج باودر
سمسم للزينة
الطريقة
تخلظ كل المقادير مع بعض ما عدا السمسم و تفرش في صينية تفرش طبقة سخية من السمسم في الوجه و تضغط قليلاً لتثبت في العجينة تخبز في فرن 180 لمدة 35 دقيقة
تخرج من الفرن و تقطع مباشرة و هي في الصينية على شكل اصابع طويلة و ترجع للفرن مرة اخرى على باقي الحرارة الفيهو و تترك داخله حتى يبرد الفرن و تصبح القرشلة يابسة
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: Sana Khalid)
|
عملت اللانكشير... success بكره بعمله بالمربى وجوز الهند وبصوّره ليكم ان شاء الله... برضه حأجرب الشكلّمه ... والمنين بكره ان شاء الله...وبصوّرهم ليكم مع اللانكشير لو نجحوا ....
ألف شكر ليكم صديقاتي.. انا والله البوست ده ما تتصوروا استفدته منّه قدر كيف... ناويه اصوّر ليكم شيالتي يوم العيد ان شاء الله...
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: مريم بنت الحسين)
|
ازيكم يا بنات :) مريم هسه تجي تضحك
حاجاتنا و عاداتنا حلوه و اي حاجه لكن بتضيع زمن طويل يعني مثلا لو عملوا حنه اكسبرس مثلا مالوا؟ او طوروا موضوع الدخان. ذكرتوني ايام العرس خليت الشغل قبله بسته شهور عشان اجهز و ماما اصرت على موضوع الدخان و الحبسه اتخيلوا حايمه السوق و المولات و الناس كلما اقعد في مكان يقولوا في ريحة حريقه و مره في المول مع صاحبتي طلبوا المطافي, المصيبه كنت بجرب في مكياج بروفه للصبحيه, اها لمن لقيت الزوله جاده و اتصلت بالمدير في ريحة حريقه و طلبوا المطافي جريت بنص وش معمول و نص ساده خخخخخخخ والله و انا طالعه من المول شايفه عربية المطافي. لكن بصراحه بتميز المراه السودانيه من غيرها و الجيهه حلوه لكن الا الزمن مافي.
اميره الشيخ, ياخي ذكرتيني ملايات الستان و المشكوكه و المطرزه دي انا عندي معاها ذكري مؤلمه, لمن ولدت حمودي طلعت من المستشفى لقيت ماما و صابحتي مطقمين الغرفه ملايات مع شباشب مع ارواب كله لون واحد و مفروض يتغيروا كل يوم و حاجاتي الجهزتها للنفاس زحوها بعيد اها انا والده بعمليه قيصريه و ما طايقه روحي و الملايه كل شويه تزلقني و تتزلق بي اقرب اقع و الخرز يطعني في كوعي اها بتين اول كوته من النسوان يطلعوا قمت طوالي ماما و صاحبتي تحت في المطبخ طلعت ليهم ملايتهم السمحه ديك و كيس مخدتهم و فرشت ملايات قديمه بارده قرب يجيهم هارت اتاك, اها بقوا لمن يجوا نسوان, ماما تاخرهم فوق شويه و صابحتي تجي جاريه فوق تفرش الملايه مسافة انا البس, لانه بيني و بينكم لو خلوني على راحتي كنت قابلت ليهم النسوان ببجامة ميكي ماوس او هلو كيتي :) شكلي طلعت من الموضوع
ماما دوما برجع بكره او بعده ببوست التجميل و العنايه بالبشره و المكياج و ايديكم معانا. حنبداء بالعنايه و نمشي المكياج و نمر بالعادات السودانيه و الوصفات الطبيعيه و عشان خاطرك في الاول حنعمل كراش كورس في الفاونداشن
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: Dania Elmaki)
|
Quote: والحنه بننساها كم شهر... لكن ممكن في ويك إند كده، يهف لي امشي اعمل شعري واتحنن!... انا ضد الإلتزام بالبرنامج كعادة مستمره.. نوع يقول ليك حنتها ما بتطلع من كراعاها.. ما لي بالبعملوا كده، هنئياً ليهم... لكن انا زوله ملوله... الحاجه لو اتكررت لي كتير... بزهج منها وبتفقد حلاوتها، لكن لما اغيب منها وارجع ليها، بتكون نفسي فعلا فيها وبظبّطها... |
معاي في نفس الموجه يا مريم, حنتها ما بتمرق دي ما بنقدر عليها لكن لمن تهف لينا مره مره
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: Dania Elmaki)
|
Quote: ماما دوما برجع بكره او بعده ببوست التجميل و العنايه بالبشره و المكياج و ايديكم معانا. حنبداء بالعنايه و نمشي المكياج و نمر بالعادات السودانيه و الوصفات الطبيعيه و عشان خاطرك في الاول حنعمل كراش كورس في الفاونداشن |
في الانتظار علي أحر من الجمر :)
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: Amany Elamin)
|
خالتى دومة ...العفو يا اخى ..انا عارفاك ما زعلتى ....لكن الاعتراف ..... (عارفة الباقى )
مريوم...انا زيك ...الحجات دى بالمزاجات... لكن و الله ما شاء الله و عينى بارده. ده كلو خبيز؟؟؟ما شاء الله و الله اكبر. لكن انا اصلا عارفاك...لما تختى قلبك فى حاجه....بتتظبط تمام. انا من يوم الجمعة بتاع الكعك و البسكويت داك...عملت لى بتفور ما قدرت انجضوا كويس. الجماعة كانوا صاحيين. و لما قررت اخبز حاجه تانية...بعلى كان ح يجيه انهيار عصبى....(منو اللى ح ياكل ده كلو عشان تعملى زيادة؟). حاكم احنا بعيد عنكم ما بجونا ضيوف. يعنى العيد ده ح يجينا -احتمال- ضيف او اتنين بالكتير.
سناء ...اتاريك (انت و دانية ) معلمات كبار ..على راى امانى الامين.
امانى ...ده عقد منو ؟؟؟ بختكم.و ان شاء الله يكون فى حفلة!!
دانية ....سريع بالله البوست. عندى صحبتى بتضحك على و بتقول عنى انى نوع الناس اللى لما اصل 40 سنة ح ابدا اعمل عمليات تجميل!!!!
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: Dania Elmaki)
|
دوني طبعا انا بوستكم داك بدخل اتفرّج ... انا زي خالتي دومه... المكياج بالنسبة لي حاجه زايده عن الحاجه... علاقتي بالمكياج لما اكون عايزه اققققققققققققققققشر، كحل وروج او حتى lip gloss ... ولو عندي eyeliner بعمله، الايام دي ما عندي زاتو.... ولما اكون عايزه حاج على خفيف، بعمل كحل.... وغالبية الايام، من غير.. وما حصل في حياتي عملت full make up .. والfoundation ما بعرف شكله كيف... وبسمع بي الكونسيلر.. لكن برضه ما عندي معاه علاقة.... والبدره ما بعملها.. وما بستخدم كريمات في وشي خالص... لانه بتعمل لي حساسيه...
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: مريم بنت الحسين)
|
دندون ومريم واسمارت,, بفتكر المقارنه بين حاجاتنا الموروثه والبلديه المستعمله للتجميل, مع المستحدثات العالميه المستورده والمستخدمه حاليا Core كويس للموضوع,
كمان بشرتنا السمراء وما يناسبها من ألوان مكياج, وكيفية اختيار الماركات المخصصه للمناطق الحاره للعنايه بالبشره والشعر,,
وكده :)
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: Dania Elmaki)
|
Quote: حاجاتنا و عاداتنا حلوه و اي حاجه لكن بتضيع زمن طويل يعني مثلا لو عملوا حنه اكسبرس مثلا مالوا؟ او طوروا موضوع الدخان. ذكرتوني ايام العرس خليت الشغل قبله بسته شهور عشان اجهز و ماما اصرت على موضوع الدخان و الحبسه اتخيلوا حايمه السوق و المولات و الناس كلما اقعد في مكان يقولوا في ريحة حريقه و مره في المول مع صاحبتي طلبوا المطافي, المصيبه كنت بجرب في مكياج بروفه للصبحيه, اها لمن لقيت الزوله جاده و اتصلت بالمدير في ريحة حريقه و طلبوا المطافي جريت بنص وش معمول و نص ساده خخخخخخخ والله و انا طالعه من المول شايفه عربية المطافي. لكن بصراحه بتميز المراه السودانيه من غيرها و الجيهه حلوه لكن الا الزمن مافي. |
لوووول والله أنا كنت فاكر البوست بوست كعك قلت الدنيا قبايل عيد أخش أتثقف شوية أتاريكن عاملات العمايل كاااااااااك لكن أنا عارف ماما دومة دي بلدي و أول ما تجيكن بيجاي بتجوط الدنيا وتمرق ودانية تمّت الناقصة يا نسوان ما تركّزن في خبيزكن كاااااااااااااااااك
غايتو التحية للبوست دة اها بعد العيد ح تقلبوهو أمجاد؟؟
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: حبيب نورة)
|
Quote: دوني طبعا انا بوستكم داك بدخل اتفرّج ... انا زي خالتي دومه... المكياج بالنسبة لي حاجه زايده عن الحاجه... علاقتي بالمكياج لما اكون عايزه اققققققققققققققققشر، كحل وروج او حتى ليب gلوث ... ولو عندي آيآلينآر بعمله، الايام دي ما عندي زاتو.... ولما اكون عايزه حاج على خفيف، بعمل كحل.... وغالبية الايام، من غير.. وما حصل في حياتي عملت فولل ماكآ وب .. والفوونداتيون ما بعرف شكله كيف... وبسمع بي الكونسيلر.. لكن برضه ما عندي معاه علاقة.... والبدره ما بعملها.. وما بستخدم كريمات في وشي خالص... لانه بتعمل لي حساسيه... |
ده كلام زول واثق من روحو شديد ....ما شاء الله. * عارفه يا مريم الكحل ده بالزات تعويده. زمان ما كنت بتكحل نهائي. يوم اعمله اى زول بيعرفنى بيعلق انه شكلى مروقة او مبسوطة او حاجه كده. هسى لانى بتكحل كل ما اخد دش. بقيت لما اكون ما مكحلة الناس بتفتكرنى عيانة.
* بشاغل فيك انا. لكن كلامك صاح لو بشرتك صافية ما فى داعى للفاونديشن
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: Dania Elmaki)
|
ازيكم يا جماعة و مشتاقين.. نفسي ارد على كل مداخلة وحدة واحدة لكن الدنيا وقت سحور، و بصراحة داخلة من الموبايل و النت بيهو مكلف (وش دني باستحياء) عايزة ارحب بهميم و حبيب نورة، كل سنة و أنتو طيبين يا شباب.. و يا حبيب نورة بعد العيد حنقلبو كوفي شوب، نورة مزاجها قهوة و لا شاي؟ كلو موجود:)) و منور البوست ياخ!
أميرة .. فرحتيني.. :)))))
سمارت.. أنا غايتو ما معلمة لكن بهابش ساي، الوصفات دي أدتني ليها بت عم خالد قبل يمكن عشرة سنين ، لكن النصيحة بيظبطوا معاي، لما أتجلى و اقول عايزة اخبز... لكن لما امشي السودان باشوف حاجات بتبهرني اكتر! نفسي أبقى شاطرة في الخبايز.. بس بالجد قصة انو مافي التشجيع و الدافع بتاع تقديمو للناس .. زيادة لأني حينتهي بي الامر لأني آكلو براي و اردم فيني كم كيلو دي كلها بتكسل و تخلي الواحد محلك سر:((!
دانية شايفاك تلمي في طوب الأساس حق بوست التجميل و جدعتي صينية الكعك بعيد:)) اقتراحي بإنك تبدئي البوست بالأخطاء الشائعة عند السودانيات، ابتداء من كريمات تفتيح البشرة و انتهاء بتغبيش الوش بالبودرة و لا الفاونديشن و كتح الجفون بظلال احمر عشان الطرحة حمراء:((!
مريم أنا زمان ما كنت باشتغل بالفل ميك اب، لكن أعتقد للسن أحكامه ؛)))) و كنت عكس سمارت بعمل كحل من صغيرة، و بعدين أتطورت لرسم كامل للعين بالايلاينر، هسة بقى حدي ماسكرا بس، كحل نهي زندقي .. و مرات آيلاينر على الجفن العلوي فقط! دانية أخير تفتحي البوست عشان شكلو دا قلب صالون تجميل لا امجاد لا كوفي شوب:)))
ماما دومة و أماني راجعة ليكم بكرة ان شاء الله مريم الصور، سمارت الوصفات وينها ؟
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: رشا سالم)
|
بنات اصبروا شوية ارجع البيت ما عندي عربي في المكتب و داخلة من التلفون
سناء والله البوست شكلي حولت اتجاهوا. الاخطإ الشايعه عندنا كسودانيات مارضاني مرض حنناقشها و نحاربها كمان و يا مريم بما انك ما شغالة بالموضوع لازم تشاركي كالفة الفصل
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: Dania Elmaki)
|
دي عينة من اللانكشير ومن الشكلمه... طبعا اللانكشير زي ما قلت ليك يا سناء، عملت نص العجينة باللون الاصفر... وعملت كوره صفرا وكوره بيضا... طعمه جنان.. وشكله ظريف خالص
بسكويت النشادر لسه في الفرن ما انتهى... الدفعه الاولى رميتها، اتحرّقت لي.. لكن دي ماشه بي نار بي مزاج... اعتقد انها حتظبط... ده شكلها وهي في الفرن
بجيك يا رشا بوصفة بسكويت النشادر، المشلّخ... :D.... عندي الوصفة لكن ما عندي المكنة، عشان كده ما عملته...
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: doma)
|
مريم الحسين ودانية المكي عسل بس ياخ كتلتونا بالضحك
ـــــــ في الحقيقة بنات البوست كلهم عسل بما فيهم ماما دومة الركشة هههههههه بس خلي الناس في حالا يا ماما دومة ياخ الدايرة تتحنن والدايرة تتدخن والدايرة تخبز وتخت الستان البيرقش ويلمع والما دايرة برضو على كيفا وفي كلٍ خير لكن مريم ودانية فيهم براءة تفور البطن
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: تيسير عووضة)
|
لووووووووووووووولتعالي انت وينو خبيزك مع البنات عامله كدامتل دينا خالد بس معقوله يصرف نظري عنها ديل اسع حنابيك ولا اسمارتيز smarties وانا متل الرقشه داخله ومار قه بالازقه البورديه طرطرطرطرطرطر . عليك الله يا تيسير خليني اقول راي في ملايات الستان ديل يا اخي عواليق شديد واكثر من بلدي بتزلقواوالخرز بطعن والدخان ريحتو بالنسبه لغير السودانيين كال smoked pork تماما يعني بصراحه كدا ما بنفع الا في السودان لانه هناك الانوف متعلمه علي ريحته .
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: تيسير عووضة)
|
يا ماما دومة أنا في الحاجات دي بقيت محمد ولد
زمااااان من أنا في المتوسطة ولغاية ما عرست كنت بحبها وبهتم بيها وبحرص على معرفة الوصفات وطرق التقديم والعدة والقصص دي مرات كانت تهف لي عيد ما عيد تلقيني مدورة خبيز وكعك لقيتها ليك شغلة ما عندها نهاية دا غير إني إكتشفت إنو البطن بتتملي لكن العين أصلها ما بتتملي عشان كدا حسمت أمري بدري بدري مع موضوع الخبيز دا
هسي شغالة بنظرية أي حاجة ممكن أشتريها بالقروش ما بضيع فيها زمن الخبيز البشتروهو أي نعم مازي حق البيت بس برضو طعمو حلو وشكلو حلو ولا يوسّخ إيديك ولا يغلّت عليك أجي من المكتب الساعة 4 أسوي الفطور وبعداك أخبز؟؟ فوق كم؟
نو تايم حبيبة نو تايم
ــــــ بالنسبة للملايات والمفارش عن نفسي أنا برضو بكره الكرانيش والزركشة واللمعة والفصوص بحب الملايات البسيطة و"كينون" خياري الأفضل والأجود والمفارش في حاجات بتكون غاية في الجمال وفي نفس الوقت بسيطة
بس لو في واحدة بتحب البهرجة وبتنبسط بيها فدا خيارها
ـــــ الحنة والدخان أنا بتفق فيهم مع مريم بت الحسين تماماً رغم إني ما بحب الدخان لأسباب كتيرة جداً وبفضل عليهو الحنة لما كنت متزوجة ما كانوا برنامج ثابت يومي أو حتى أسبوعي وحتى لو عايزة أبقيهم كدا حيجي على حساب حاجات تانية أهم وأولى
غايتو المرأة السودانية الله يكون في عونها أحسن تبقى توم بوي زينا كدا وتقعد بس للشناف
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: Amany Elamin)
|
كل سنة و انتوا طيبين
اماني ربنا يتم ليه على خير لو لقيتي طريقه صوره الخبيز في الشيالات عشان نشوف اخر تقليعات التقديم في السودان
رشا سالم بسمكويتك المشخل شكله جميل جدا
بنات
انا ما نسيت موضوع البسوت بتاع التجميل و العنايه بالبشره بس قلت لمن البنات يفضوا من زحمة العيد, بكره او بعد بكره انشاء الله يلا حضروا الكراس و القلم
| |
|
|
|
|
|
|
Re: ** كورس كعك العيد** بوست مفتوح لضيوف المنبر (Re: Dania Elmaki)
|
سلام يا سيدات...
لقيت لي وصفة قلت اشاركم بيها... لانها حلوه وساهله شديد.. للأسف جاتني متأخره... هي وصفة بتاعت اسامة السيّد... شفتها في التلفزيون الليلة، نبهتني ليها ماماتي حبيبتي...
سهولتها انه ما ضروري يكون عندك الآلة بتاعت البيتي فور، ممكن بي كيس الحلواني تعمليها...
المقادير كوب زبدة لينة 1 كوب سكر 4/3 ملعقة صغيرة فانليا 2/1 بيضة 1 كوب دقيق 2/1 2 ملعقة صغيرة بيكينج باودر 2/1 ملعقة صغيرة كاكاو لتلوين العجين 1
الطريقة -تُخفق الزبدة جيداً حتى يبيض لونها، ثم يضاف السكر والبيضة والفانليا ويخفق الخليط جيداً. -يُخلط الدقيق والبيكنج باودر، ثم يضاف تدريجيا إلى خليط الزبد حتى تتجانس جميع المواد وتشكل على هيئة كرة وتترك لترتاح قليلا في الثلاجة. - يقسم العجين إلى جزئين، يعجن جزء ببودرة الكاكاو ويترك الآخر كما هو. -يُمد كل جزء من العجين على شكل اسطوانة. - تلصق كل اسطوانة بالأخرى بالضغط الخفيف، وتقطع إلى قطعا صغيرة. - ترص في صاج مدهون وتخبز في فرن حرارته 325 درجة فهرنهيت لمدة 15 دقيقة.
هو كاتب انه الصاج مدهون، لكن ما اعتقد انه قاصد كده... احسن انه ما يندهن الصينية، والزبده في البتي فور بتخليه ما يتلصّق...
| |
|
|
|
|
|
|
|