** كورس كعك العيد** بوست مفتوح لضيوف المنبر

دا فصل عدييييل...

و آنا حجزت مقعد في الصف الاول.. جنب السبورة

و مريم وصتني احجز ليها جنبي ..

كرسي المعلمة محجوز للحصة الاولى

و شوف عيني الاميرة لنا جاهزة بمنهج قوي

Quote: يا جماعة دايرين نبدأ بوست كعك العيد بعد دة(:(:

و انا مسحت ليها السبورة بموية سكر

و جهزت ليها الطباشير

و باب التعيين مفتوح لكل المعلمات..

و التسجيل لكل الطالبات .. الطلاب يمنعوا الفوضى بالله.. دا شعراً ما عندهم ليهو رقبة :)

ايميل البوست.. للمشاركة من خارج المنبر

khabeez(at)gmail.com

و مرحب بالجميع و كل سنة و انتو طيبين


ـــــــــــــــــــــــــــــــــــــــــ

لنوية .. تعالي حبيبة .. استلمي

جمممممب كرسي لنا حبيبتي بسس (:
انا كنتا ماسكه لي فصل مع هويدا بهناك ,
لكن شكلو هنا في دروس تقويه (:

سنويه ازيكـ ياخ

اماني .. سمارت.. دانيا .. اميرة.. شبكة .. راوية.. فدوى.. دلوش.. هويدا.. وجن .. رشا.. سارة .. سحر (المنتسبة)..

غايتو كلكم اسماءكم مسجلة.. معلمات و طالبات اختاروا مقاعدكم و خلونا نبدا..

و يا ريت المواهب المكنوزة في البورد و قرائه .. كلها تجي و تشارك معانا.. منتظرنكم..

سناء خالد ....سلام ومحبة شديييييدة

انا طالبة ومشاغبة جدا وبستوعب بسرعة لكن لازم اقعد قدام ...

غايتو انا ماحريفة شديد فى موضوع الخبائز مقارنة بشيفات كبار هنا

اها الحصة الاولى شنو؟؟

دلوش العروس..

كل سنة و انت و ود خالتي طيبين..

Quote: جمممممب كرسي لنا حبيبتي بسس (:

و الله انا حاسة انك معلمة ماهرة في موضوع الخبيز و فنونه.. عشان كدا طوالي مقعدك جنب لنا.. آمري.. انا جاهزة للمراسيل

اميرة.. منووووووورة البوست..

و الله يا اميرة محبتي ليك اضعاف.. و على فكرة انا البحس اني بتخذلني الفرص للتعبير عنها.. شكراً لانك هنا..

تعرفي انا مبتدئة جداً في موضوع الخبيز بكل اشكاله.. عشان كدا اكيد انت بالنسبة لي معلمة كبيرة..

Quote: لكن لازم اقعد قدام

طوالي.. غايتو غير سارة علي ما عارفة لي زول حيكون مجلي الموضوع و داير المقاعد الخلفية :))

دى صورة يجيبها زول مبتدى يا سنوية؟

أها يا سنويه ,
نبدا ولا نخلي لنا تجي ..؟؟
انا يدي اكلتني خلاص :)

اميره تعالي اقعدي جمبي عشان نعمل حركات كنبه ورا كنبه ورا

Quote: اميره تعالي اقعدي جمبي عشان نعمل حركات كنبه ورا كنبه ورا

وحنقطع فى الشيفات اهم حاجة

Quote: دى صورة يجيبها زول مبتدى يا سنوية؟

هههههههه.. لا لا يا اميرة.. الصورة ما حقتي.. جايباها من النت.. لو نزلت صورة حاجة عاملاها انا.. حآكتب عليها اسمي كالعادة

على كل عندي وصفات قديمة حانزلها .. و بذاكر في النت اليومين دي حاترجمها برضو و انزلها

لكن الحصة الاولى دي عليك الله انت او داليا زول يتبرع لينا بيها..

اسمعوا هووي ,
انا ماشه اسوي الفطور لانو معانا ضيوف ,
وبجيكم المسا ..

اميره احجزي لي كرسيني بي كراسك

Quote: أها يا سنويه , نبدا ولا نخلي لنا تجي ..؟؟ انا يدي اكلتني خلاص :) اميره تعالي اقعدي جمبي عشان نعمل حركات كنبه ورا كنبه ورا

لا آبدي طواالي.. لنوية بتلحقنا

آها عشان حركات كنبة ورا دي.. الفصل دا كللللو صف واحد.. قدام بس.. شبابيك للسرحان زاتو ما فيهو :))

لكن يا اميرة.. عليك الله شفت جمال البسكويت دا و جمال تقديمه على بساطتو.. غايتو على رايك البريزينتيشن اهم شيء..

و دائماً الاناقة في البساطة!

Quote: وحنقطع فى الشيفات اهم حاجة

انا كنت قايلة اهم حاجة روايات عبير .. و مجلة سمر..
غايتو الشاف الفصل كلو كنبة ورا مااا كضب :))

Quote: انا ماشه اسوي الفطور لانو معانا ضيوف , وبجيكم المسا

انا الحالة قلت انت تمسكي لينا الحصة الاولى.. طيب منتظرينك ..


****

على بال ما المعلمات يفطرو و يجو..

وصفة الكعك الناعم البشتغل بيها .. لما يهف لي اعمل كعك .. (الهففان دا مرة كل سنتين تقريباً :))..



4 كبايات دقيق
1و 1/4 كوب سمن
1/2 م ص ملح
1/2 كوب شاي ماء دافيء
1/3 م ص بيكنج باودر
كافور ناعم (كضباً كاضب اقول بعرف يعني شنو كافور ناعم.. !! هي مكتوبة عندي كدا لكن انا ما عارفاه.. عشان كدا لما اعملو بسحن بهاراتي براي.. بدون مقادير عين جمل و حبهان و قرنفل .. و بكب منها البيرضيني :))

الطريقة:

آخلطي الدقيق مع البهارات و البيكنج باودر و اعملي حفرة في وسطه

على النار ضعي السمن و الماء و الملح حتى يغلي..

اسكبيه في وسط الدقيق و اعجنيه .. افردي.. قطعي و اخبزي.. و بعدين سكريه بالسكر البودرة

ــــــــــــــــــــــــــــ

اميرة .. آمنت؟

سناء
اكتبيني مع الطلبة


واحجزي لاماني وفادية وانعام حيمورة كراسي جنبي هنا
لانو اماني دي مستجدة تماما
وفادية ممكن نلقى منها شي

اما انعام العروس ميييييييييييح

عشان اتوصي بيهم عليك الله في دروس التقوية دي



وعشان ما اجيكم فاضية
بسال ليكم امي من عجنة البسكويت وبجيكم طايرة بيها

Quote: سناء اكتبيني مع الطلبة

شبكة ازيك..

مكتوبة .. مكتوبة.. تب

Quote: اما انعام العروس ميييييييييييح

له له له.. انا قلت اكتب نعومي من قبيل مع المعلمات .. تكون عاملة ليكم فيها ما بتعرف عشان ما تفرط في اسرار الفن ؟ :)

غايتو اكان هي ما بتعرف اكيد خالتو حنانة بتعرف..

و انت منتظرينك.. خالتو اكيد فيها الخير و البركة :)

سنوية

Quote: غايتو اكان هي ما بتعرف اكيد خالتو حنانة بتعرف..

دا عشمنا في خالتو حنانة

لكن انعام دي ما تتكلي عليها شديد

Quote: خالتو اكيد فيها الخير و البركة :)

تسلمي لي ياغالية

Quote: لكن انعام دي ما تتكلي عليها شديد

غايتو جنس شيل حال


**********


الوصفة دي من النت.. ترجمتها و نزلتها ليكم..

عجبتني و حسيت انها قريبة لفكرة الناعم بتاعنا لو ما البيض..
عموماً في احيان كتيرة انا بتحمس للطبيخ بنكهة بهار او عشب واحد عشان نكهته تكون واضحة و مميزة.. و اتحمست للكعك دا لانو بنكهة الحبهان بس .. ناوية اجربها كبديل للناعم و انتو جربو معاي لو حبيتو.. و باذن الله حاوافيكم بالنتيجة

كعك الحبهان ..



1 كوب زبدة
3/4 كوب سكر
صفار بيضة واحدة
1م فانيليا
1/2 الى 3/4 م ص حبهان مسحون ناعم
2 كوب دقيق
1 كوب سكر بودرة


الطريقة..

نقطة اساسية و مهمة في الريسيبي دي.. انك تحرقي الزبدة شوية.. (او السمنة) .. مش تحرق مرة واحدة.. لكن تختيها في النار و تخليها شوية لما لونها يبدا يتحول للدهبي.. و قريب للبني.. المسالة دي عايزة حرص و مراقبة شديدة لانه الفرق بين الدرجة المطلوبة و بين انها تحرق شعرة بس!




على نار هادية ختي الزبدة.. في الاول طبعاً حتدوب و بعدين حتعمل رغوة




بعد شوية حتتكون فقاقيع و حيبدا لونها يتحول للدهبي




لما يبدا لونها يتحول للبني نطفي منها النار و نكبها في اناء و نختها في التلاجة عشان تبرد.. حوالي نصف ساعة! (طبعاً بنبردها عشان ما ينطبخ صفار البيض)




بعد ما بردت الزبدة نضيفها للسكر و نخفقهم مع بعض كويس

بعدين نضيف ليهم البيضة و الحبهان و الفانيليا و نضربهم كويس




نضيف الدقيق بالتدريج و نعجن لحدي ما تتكون عجينة متماسكة

نسخن الفرن لدرجة حرارة 180 درجة / 350 فهرنهايت

بعدين نقطع العجينة و نرصها في صينية و نخبزها لمدة 10 الى 12 دقيقة او حتى يصبح لونها دهبي



نطلعها و نخليها شوية و بعدين نضيف ليها السكر البودرة و هي لسة دافية..



نقلبها مرتين في السكر لحدي ما تتغطى كويس و بعدين نديها رشة خفيفة اضافية


و النتيجة النهائية




****************


غايتو بلداً ما فيهو التمساح

وبما ان بوستك مافيهو تمساح

هاك الطريقة دي للكعك واقرب لطريقتنا
لانو السمن كتير والدقيق اقل ومن غير بيض

٣ كوب سمن
١ كوب حليب دافئ
١ م-ص ملح
١ م-ص بهار الكعك (يمكن طححن قرفة وحبهان)
١ م-ك بيكنج باودر
دقيق علي حسب العجينة تكون متماسكة
نصف كوب سكر ناعم


الطريقة:

يتم وضع السمن في الثلاجة حتي تتماسك
ثم توضع في قدر عميق و يضاف اليها الحليب و تخلط جيدا
و من ثم يضاف الدقيق و الملح و البيكنج باودر
و يقطع الكعك السوداني بقطاعة البسكويت
و تدخل في فرن متوسط الحرارة و تترك حتي النضج
بعد خروج الكعك السوداني من الفرن يرش عليه قليل من السكر الناعم
و يقدم الكعك السوداني بالسكر



مامن يدي وحياة عينيا

Quote: مامن يدي وحياة عينيا

ما قصرتي كلو كلو..

انا ذاتي ما من يديا:))

والله ياسنوية رغم التعب والشرح بالصورة والصوت
جانى احساس انو دا ما ناعم .... لكن ممكن يكون عيش (رغيف) بتاع كوكتيل لو ماالسكر المشتت دا

والله ما شنافة لكن تقولى شنو؟

لا ينصح الاطباء بالكعك في العيد

فهو اكبر مصدر للاسهالات

ويكثر الذهاب لمستشفي الحوادث ايام العيد

ننصح بابعاده تماما ايام العيد

ويا ريت تشوفو حاجة خفيفة علي المعدة التي ارهقت من جراء الصيام

وكل سنة والجميع بخير

Quote: لا ينصح الاطباء بالكعك في العيد فهو اكبر مصدر للاسهالات ويكثر الذهاب لمستشفي الحوادث ايام العيد ننصح بابعاده تماما ايام العيد

اها انا براي محيلة.. و دا سبب اضافي عشان ما اخبز

كل سنة و انت طيب يا خليل

ياسناء
كل سنة وانتي طيبة
المدام بتاعتي بتتفق مع اميرة الشيخ وبتقول ليك كعكك دا مويتو زايدة شوية
وظاهر عليهو ناشف وقوي بدليل السكر رغم التحانيس الكتيرة دي ما داير يمسك

جميل انه الواحد يشوف الاخت سناء تكتب فيما (يبدو) انها تجتهد لاتقانه , وتدع عنها الكتابة فيما لا تفقه
بوست موفق يشبه امكانياتك


سناء رمضان كريم وكل سنة وانت طيبة ياخ

Quote: جميل انه الواحد يشوف الاخت سناء تكتب فيما (يبدو) انها تجتهد لاتقانه , وتدع عنها الكتابة فيما لا تفقه بوست موفق يشبه امكانياتك سناء رمضان كريم وكل سنة وانت طيبة ياخ

اجمل ما في البوست حتى الآن انه اثبت ان حولاً في القراءة يطرا على الاخ اساسي (احياناً) كحول الكتابة الذي سبق ظهور اعراضه!

فهذه هي المرة الاولى التي اكتب فيها فيما لا افقه




و رمضان كريم و كل سنة و انت طيب يا اساسي

Quote: المدام بتاعتي بتتفق مع اميرة الشيخ وبتقول ليك كعكك دا مويتو زايدة شوية وظاهر عليهو ناشف وقوي بدليل السكر رغم التحانيس الكتيرة دي ما داير يمسك

كل سنة و انت و المدام و احبابكم طيبين يا وهبة..

لكن انت و المدام و اميرة الشيخ طلعتو ناس بتحبو شمار الصور و بتجلو الكلام المكتوب.. ياخي دا ما ناعم انا قلت حسيت انو قريب للناعم.. دا(كعك افرنجي).. مكتوب بالانجليزي

لافحاه بصوره من النت.. و فيهو بيض و سكر جوة عجنتو .. و ما فيهو موية

لسة ما جربتو لكن بديكم النجيضة بعد اجربو..

سلامي الشديد للمدام و خليها تشاركنا لانها شكلها معلمة ماهرة..


********

مرفق نسخة لاميرة

سلامات كتيرات للطالبات النجيبات
لينا زمن بنجيب الكعك والحاجات دي للعيد جاهزة
ومن دون محلات مصر الكتيييرة دي بنفضل حلواني توينكي في شارع الهرم
وكمان في العمارة الساكنين فيها في حلواني
دا مرات بننزل نقول ليهو يعمل لينا كيلو كعك ناعم بالسمن البلدي ويزود رشة ملح فيهو شوية(بتاعين المحلات مابيعملوا ملح في المخبوزات)



نفسي اروق كدا وأوصف ليكم الغريبة بتاعة أمي
صراحة وبالجد مالاقتني في حتة ولا شفت مرة سوت زيها (أمي أحسن مرة بتعمل غريبة في الدوحة)
وعلى قول المصريين
ياناعمة ياغريبة

أما تجربتي في مجال عمل الحلويات والمخبوزات ففعلا محتاجة تتحكي
فيري إنتريستنق
من الروائع المتخصصة فيها
كوكنت معكروني (زي الشكلمة عند المصرين) دي الكوكي نمرة واحد في اليونان حلوى تقليدية جدا ومحبوبة عندهم
الموند كريسنت
وكعك الكرانبيري
وعندي طريقة كعك ناعم مختلفة شوية لكن حلوة وناعمة شديد

وكل أيامنا يارب أعياد
وكل سنة وإنتو طيبين وبخير وعافية

راوية.. كل سنة و انت طيبة

ياخي انا متاكدة انك حتكوني صندوق كنز لو بحتي لينا ذاكرتك..

Quote: نفسي اروق كدا وأوصف ليكم الغريبة بتاعة أمي صراحة وبالجد مالاقتني في حتة ولا شفت مرة سوت زيها (أمي أحسن مرة بتعمل غريبة في الدوحة) وعلى قول المصريين ياناعمة ياغريبة

عليك الله تروقي حسي دي و تورينا ليها.. ياخي العيد جاء و الناس الوقت ضايقها..

الحقينا بيها سريع.. بلييييز

Coconut Macaroni دي اخت الفرمالة بتاعتي.. انا فرمالتي الميرينغز..و الاتنين الوحيدات البعملهم بمناسبة و بدون مناسبة لينا برانا..
مع اني بحب الكوكونت ماكاروني اكتر... لكن ما عارفة السبب شنو انها بترطب لي شوية و ما بتفضل مقرمشة زي الميرينغز! يمكن اختلاف درجة الحرارة و زمن الخبز بيناتهم؟

عليك الله نحن منتظرينك بكل الروائع الذكرتيها دي..

و دي مداخلة عبر الايميل من سحر

Quote: ازيكم يا جماعة و كل سنة و انتو طيبين البوست فكرتو حلوة و الله .. و انا من الناس المحتاجة ليهو و بشدة .. بس رجاء ليكم كلكم .. خلو ايقاع البوست سريع شوية .. و ألحقونا بالخبايز والبسكويتات سريع .. باقي كلها كم يوم بس ودايرين نلحق الخبيز و النظافة و الحنة الليلة يا سناء عملت الكعك الناعم بتاعي .. بمشاركة صحبتي .. ودي كانت مقادير عجنتها و طلع ظريف والله ( بالنسبة لي بحب الكعك المحمر و مقرمش شوية ما بحب الناعم شديد ولونو أبيض) المقادير : 1 كوب زيت 1 كوب سمنة 1 كوب زبادي ذرة ملح ملعقة كبيرة باكنج باودر سمسم محمص كافوووور ناعم ( انا الليلة برضو اول مرة اشوفو .. ريحتو و نكهتو حلوة شديد و مهم قالو للكعك ) نخلط المكونات دي كلها مع بعض و بعدين كبي كمية الدقيق لحدي ما تتكون ليك العجينة الانتي عاوزاها لو عاوزة العجينة جامدة و قوية حبة زيدي كمية الزبادي و لو عاوزاها هشة قللي كمية الزبادي .. هكذا قيل .. دي غايتو صورة الكعك اول ما طلعتو .. و دي بعد ما سكرت جزء منو .. بالنسبة للسكر استعملت icing sugar بس ما عجبني زي السكر المسحون في البيت .. للباقي حاعملو بسكرنا العادي.. أميرة الشيخ .. يا زولة يا لزيزة .. الصور دي ساهرت بي والله .. و اجتهدت في عينة من البريزنتيشن النهائي لكن السكر خذلني .. ف بالله اقبليها مننا كدة ....درس الخبيز دة على درس التقديم بتاعك لازم يطلعو شيالة و جيهة و إلا حيبقى مافي داعي الواحد يساهر معاكم في بورديكم دة ..و حأصور ليكم الشيالة وقتها ان شاء الله.. سناء عليك الله سلمي لي على أماني و مريم و قولي لمريم ربنا بحبني .. العزومة فشنك بقدرة قادر ..هههه و انشغلت حبتين عشان كدة ما رجعت ليهم تاني بهناك.. تحياتي ليكم كلكم يا حلوين و بانتظار جديدكم لكن بسرعة عليكم الله .. عشان لو جربنا حاجة و خستكت نلحق نشتري جاهز .. سلااااام.. سحر خالد..

Quote: (الهففان دا مرة كل سنتين تقريباً :))..

غايتو لو زي هففان كتابة الروايات .... واطاتنا أصبحت.

سناء .... مشتاقين ياخ ... ويشهد الله مشتهين كتابتك (التانية)

كل عام وأنتم بخير

Quote: غايتو لو زي هففان كتابة الروايات .... واطاتنا أصبحت. سناء .... مشتاقين ياخ ... ويشهد الله مشتهين كتابتك (التانية) كل عام وأنتم بخير

ابو العزائم كل سنة و انت طيب..

كيف عرفت انو انا بتهف لي كتابة الروايات؟ مع اني ما حصل صرحت بهفة زي دي! .. الا اطمنوا دي ما جربتها لكن الخبيز جربتو..


الكتابة (التانية) خليها.. اليومين دي زعلانة لي زعلة.. اكان مشيت كتبتها بفتح نار في الجهات الاربعة.. و اول زول حيزعل سيد الكفر:))


الدنيا قبايل عيد .. اخير ننجض الكعك

معليش يا جماعة، اول يوم مدرسة... وراحت علي نومه خخخخخخخخخخخ... حاقرا الكتبتوا واجي اعلّق، انا هنا طيش الفصل، ما حأضيف حاجه، لكن بطبّق وبجيب وصفات، وبتعلم معاكم...

شكرا يا سنو

Quote: كيف عرفت انو انا بتهف لي كتابة الروايات؟

يا زولة أنا من قبيل بضحك على روحي ........... خليها في سرك .. وما تكلمي زول ... أصلي لخبطت (خالد) بي (جعفر).

لكن شكلو كدة بقى (سهم من غير رامي).

تحياتي

ازيكم يا بنات ....و يا استاذات
شكلى سبقتكم و خلصت المقرر فى الصيف.
اليوم من الصباح دورتا خبيز....الان و بعد حوالى 4 ساعات ...خلصت و نظفت المطبخ و وصليت و قلت اشوف البورد الحاص فيه شنو...لقيت بوستكم ده
يا ريت لو كنت انتظرت يوم واحد بس...كان هسى عرفت المعلمين بيعملوا شنو و حاكيتهم.
غايتو بحصلكم فى البتوفر و الحجات الظريف التانية
اصللى اليوم خلصت الفرض (الكعك و بسكويت المكنة )....بكره نشوف معاكل باقى الحجات
اها و ادى قعدة جنب سناء و مريوم و راجين المعلمة لنا

سلام و كل سنه و انتوا طيبين قبل الزحمه


الغريبه

كوبايتين سكر ناعم
كوبايتين زبده ناعمه
خمسه كوبايات دقيق
ذرة ملح


نضرب السكر الناعم و الزبده بالمضرب على حمام ثلجي لحدي ما يكونوا زي الكريمه

نضيف الدقيق تدريجيا لمن تكون عندنا عجينه ناعمه

نشكلها كور و نضع عليها لوز او فستق او قرنفل من فوق. ندخلها الفرن لمن لونها يشقر بس و تحمر من تحت ما تستنوا لمن تحمر من فوق لانها بتتشقق. نطلعها و ناكلها

الاخت سناء خالد
كل سنة وانت طيبه

والله حرم خبرتك الرهيبه دي تكون للجندريات الجدد
المهم ربنا يحقق ليك مقاصدك وأنشالله زي ما ما قالوا يكونوا سريعات أستيعاب وفهم

القصة ماالقصة ما قصة فهم لكين نكهة وطعم

نسيت الفرمالة الثانيه


بسكويت الللوز


اربعه كوبايات زبده
كوبايتين سكر ناعم
صفار بيضتين
ملعقه كبيره فانيلا
ملعقه الا ربع باكنق باودر
ملعقه روح الللوز مخففه بملعقتين ماء ورد و الما بحب ماء الورد بدلهم مويه عاديه
كوباية لوز محمص و مجروش
8 كوباية دقيق منخول لو العجبنة لينه شديد زيدي دقيق لمن تتماسك و تقدري تشكليها, انا بستعمل متعدد الاستخدامات و ناس الخليج قالوا ظبط معاهم الطحين الكويتي
سكر بودره للتغطية


نضرب بمضرب الكهرباء الزبده و السكر لمن يكونوا زي الكريمه نضيف الباكنق باودر المذوبه في ملعقتين المويه, صفار البيض, الفانيلا و اخيرا الدقيق تدريجيا لمن نضيف الدقيق نعجن باليد ما بالمضرب
نشكر دوائر او هلال حسب الرغبه
نخبز في فرن 350 لمدة عشرين دقيقه, لونهم بيكون ابيض او بيج ما بيحمروا.

بعد ما يبردوا نسكرهم بالسكر الناعم و ناكلهم و انا ما مسؤوله من زيادة الوزن

المقادير دي بتعمل كتير, قلليهوا للنص او الربع لو ما عاوزين كمية كبيره

مداخلة أساسي أغنتني من كعك هذا العيد و الأعياد القادمة

سناء خالد... اطلعي برّه البوست ده... انت وقت بتعملي الناعم وبي هففان كمان، بتعملي في شنو بي جاي!
يا جماعة انا سنة خامسة زواج، ما حصل عجنته لي دقيق ولا عندي عدّة الخبيز زاتها! غايته انا عايزه اي وصفة حايمه...

حأجرب وصفتك بتاعت الناعم بكره يا سناء، لانه شكلها ساهله.... البتي فور غايته بت خالتي جلاله الله يديها العافية رسّلت لي وصفتها.. ورسلت لي وصفة بتاعت بسكويت اليانسون... بكره بعمل مقدار بتاع بسكويت يانسون، وبوريكم النتيجة....

بسكويت اليانسون وصفة جلالة
5 بيضات مع الفانيليا. كوب زيت نظيف نباتي. كوب سكر غير بدرة. 3كوب ونص دقيق. 2ملعقة باكنج باودر.ملعقة يانسون ملعقة سمسم وأخري كمون أسود.
يخلط البيض مع الفانيليا في الخلاط جيدا مع ذرتين ملح ويصب علي خليط الزيت مع السكر ثم تخلط بقية المواد باليد .
يوضع في صينية مدهونة بالزيت جيدا ويخبز في الفرن ويقطع وهو ساخن شرائح رقيقة ويقلب بالجوانب ويدخل الفرن مرة أخرى..


عاد الله يستر نادر عبّاس ما يخش البوست ده، حيشمت فيني

سمارت، hats off ياخ.. والله اخجلتينا عديل كده وجبتي لينا الهوا... هدا نادر يضحك فيني، قال لي احنا ياتو يوم كان عندنا خبيز عيد! عليك النبي ده تشجيع ده!!! دايرني احرد.. لكن اصلي ما بحرد... بعمل، وكان ما نجح برميه قبل ما يجي يشوفه.... حاكم لسانه طوييييييييييييييل

وب علي يا دانية.. غايته منفّعه ناس الزبدة ... لو ما انت، البيزنس بتاعهم بقفّل

لقيت وصفة على قدري كده... الشكلمه، مافي واحده تجي تضحك علي...

المقادير
اربعة كبايات جوز هند
علبة واحده بتاعت حليب مركّز ومُحلّى (400 غرام)
ملعقة صغيرة فانيليا

الطريقة
كوبو الحاجات كلها سوا واخلطوها... حتطلع عجينه بتتشكّل... دخّلوها الفرن لحدي ما تتماسك.. ما بتذكر لونها بطلع كيف...

لما اعملها، اظني حأتذكر...

لقيت الوصفة الجميلة دي في الموقع بتاع المبدعة، سمسماية...

http://simsimaya.wordpress.com/2010/09/03/%D8%A7%D8%B4%...4%D8%B9%D9%8A%D8%AF/

Quote:

كوكنت معكروني (زيالشكلمة عند المصرين) ديي الكوك نمرة واحد في اليونان حلوى تقليدية جدا ومحبوبة عندهم
الموند كريسنت وكعك الكرانبيري

Quote: أميرة الشيخ .. يا زولة يا لزيزة .. الصور دي ساهرت بي والله .. و اجتهدت في عينة من البريزنتيشن النهائي لكن السكر خذلني .. ف بالله اقبليها مننا كدة ....درس الخبيز دة على درس التقديم بتاعك لازم يطلعو شيالة و جيهة و إلا حيبقى مافي داعي الواحد يساهر معاكم في بورديكم دة ..و حأصور ليكم الشيالة وقتها ان شاء الله..

سحر ..ياجميلة ...ازيك ياخ واحييك على مشاركتك نيابة سناء ورائدات البوست


ياسحر مافى اى طريقة نقبلها طالما سمارت انا موجودة بالبوست وشايلة قلمها الاحمر بتاع التصحيح ......


احى زوجة اخونا عبدالوهاب على الاتفاق معنا فيما يخص صورة الرغيف

ياحبايب ازيكم,,
وكل سنه وانتو كللللكم طيبين,,

سنويه ميرسي خالص علي فصل الخبايز,,
وأكيد معاكم في الكنبه الأخيره جنب داليا وأميره,, :)

قصتين مكررات حأحكيهم,,

الأولي: اني رغم انه ماما خطيره في الخبايز,
وعمري كله بقيف معاها يدي بيدها وهي بتعجن, وبقطع ليها الخبيز أنا بعد ما يتعجن,
لكن أتنطر لو فاهماها بتعمل في شنو
السبب طبعا أنها بتتعامل مع العجينه بالاحساس, وبتضيف الحاجات بالسينس كالعاده, ومابتتقيد بمقادير :(
وعليه فهي لاتصلح كمعلمه للزي حالاتي :)
رجاء خاص كله واحده فيكم ياحبايب تكتب وصفتها بالصور والمقاديييير وتصور لينا الشكل النهائي,,

الثانيه: انه السنه دي ما خابزين لأنه حنشتري جاهز لزوم عندنا عقد وكده,,
وعد حأصور ليكم الحنشتريه لأنه البتعمله خطيره ومجربه, ولأني بعتقد انها بتعمل أجمل كعك ناعم وكعك عجوه في الدنيا,
طعمه زي كعك الجنه كده

لكن ناويه أعمل بسكويت يانسون لناس البيت وحأوافق بين وصفة داليا ووصفة قريبة مريم وأوريكم طلع كيف :)

---
سحوره ياحبيبه, حلوه القلوب قلوب, في انتظار الشكل النهائي والشيّاله :)


أميره الشيخ طلب خاص,,
بالله في البوست ده اتخصصي لينا شيّالات وطرق تقديم, :)
خلينا نظبط البريزينتايشن والشكل الجميل :)

عليكم الله في كعك عيد أحلى منكم؟

امانى الامين يابريزينتيشن ......

صورة مكررة لكن سمحة ..يخيل لى عجبتك قبل كدا

نواصل

نواصل

نواصل

د. سناء قلب الاسد

كامل التضامن و الدعم

البوست ده مفروض يكون زي مساجد واحات أدنوك

( مصلي النساء)

لوووووووول الله يديكم العافيه يا بناتي
غايتوا كلما اشوف العده والفرش والخبائز وتعب السودانيات
بقول احمدك يا الله
المرقتني منها
اضافه للحنه والحكايات التانيه

يا بت الشيخ متأكدة الشركة دي نشطها محصور

في الكعكيات دي ؟؟ ما تجي تطلع لينا زي بتاعت جك العصير

الطلع عسلية

Quote: يا بت الشيخ متأكدة الشركة دي نشطها محصور في الكعكيات دي ؟؟ ما تجي تطلع لينا زي بتاعت جك العصير الطلع عسلية

شفت المحن دى ياعمك؟

بس ما اديناهو فرصة لحدى مايصلكم ...

ازيكم يا جماعة..
و الحضور الجدد منورين البوست.. الا ملاسي طبعاً

بجيكم واحدة.. واحد.. ان شاء الله

..

اميرة عليك الله ما تاكلينا حنك ساي..

لهسة وصفة واحدة ما اديتينا ليها.. خلينا نخبز.. بعدين اكان في كورة طلس بنقدمو..

هسة الفايدة شنو الواحدة تشتري ليها شيء سمح زي دا..




تضطر تملاه من السوق عشان لاحقاني في قصة الخبيز!


**********

يا لناااااااا... ما طولتي ياخ..!

دلوش؟.. الضيوف حبستهم المطرة عندكم و لا شنو؟

Quote: معليش يا جماعة، اول يوم مدرسة... وراحت علي نومه خخخخخخخخخخخ... حاقرا الكتبتوا واجي اعلّق، انا هنا طيش الفصل، ما حأضيف حاجه، لكن بطبّق وبجيب وصفات، وبتعلم معاكم... شكرا يا سنو

بركة الجيتي.. و ما تقلقي.. شكلها هنا المنافسة على المركز الطيش ما الاول

Quote: يا زولة أنا من قبيل بضحك على روحي ........... خليها في سرك .. وما تكلمي زول ... أصلي لخبطت (خالد) بي (جعفر). لكن شكلو كدة بقى (سهم من غير رامي).

و الله يا ابو العزائم بالغت.. هسة سهمك دا انا احتفي بيهو و ابروزه عديل.. القايلني اديبة و اريبة زي ست الجمال بت جعفر،
لكن غايتو سناء جعفر الا تدخل ليها واسطة شان ترضى.. غايتو يا سنوية اعفي لينا..

لومتنا ساي مع بكري... الله في!

Quote: ازيكم يا بنات ....و يا استاذات شكلى سبقتكم و خلصت المقرر فى الصيف. اليوم من الصباح دورتا خبيز....الان و بعد حوالى 4 ساعات ...خلصت و نظفت المطبخ و وصليت و قلت اشوف البورد الحاص فيه شنو...لقيت بوستكم ده يا ريت لو كنت انتظرت يوم واحد بس...كان هسى عرفت المعلمين بيعملوا شنو و حاكيتهم. غايتو بحصلكم فى البتوفر و الحجات الظريف التانية اصللى اليوم خلصت الفرض (الكعك و بسكويت المكنة )....بكره نشوف معاكل باقى الحجات اها و ادى قعدة جنب سناء و مريوم و راجين المعلمة لنا

ما شاء الله يا سمارت.. عيني باردة..

كدي قومي..! تقعدي جنبي انا و مريم تعملي شنو؟!

امسكي لينا الحصة الاولى الما لاقية ليها ست لهسة دي..

و ورينا عملتي الكعك و الخبيز كيف.. و عليك الله اكان في طريقة دعمي لينا بالصور..

Quote: سلام و كل سنه و انتوا طيبين قبل الزحمه

دندون.. كل سنة و انت طيبة..

تعرفي .. عاجبني فيك انك زولة عملية جداً و بتجيبي المفيد طوالي..

حاجرب الغريبة ان شاء الله و اقول ليك..

يسلموووو.. و راجين باقي الفنون.. 

Quote: الاخت سناء خالد كل سنة وانت طيبه والله حرم خبرتك الرهيبه دي تكون للجندريات الجدد المهم ربنا يحقق ليك مقاصدك وأنشالله زي ما ما قالوا يكونوا سريعات أستيعاب وفهم القصة ماالقصة ما قصة فهم لكين نكهة وطعم

مرحب يا زهير و كل سنة و انت طيب..

شكراً على كلماتك الطيبة... لكن انا و الجندريات هنا كلنا طلبة.. غايتو لحدي الخبيز و الخبرة بتتجهجه..

ربنا يحقق امنياتك

Quote: مداخلة أساسي أغنتني من كعك هذا العيد و الأعياد القادمة

-------------------------------------------------------------------------------

بالخط المسماري تكتب:

مداخلة اساسي فشتني

Quote: سناء خالد... اطلعي برّه البوست ده... انت وقت بتعملي الناعم وبي هففان كمان، بتعملي في شنو بي جاي! يا جماعة انا سنة خامسة زواج، ما حصل عجنته لي دقيق ولا عندي عدّة الخبيز زاتها! غايته انا عايزه اي وصفة حايمه...

مريم.. مرة عملت لانكشير.. بهرت ليك نسوان العرب الهنا ديل كلهم.. لكن بيني و بين نفسي ضحكت.. قلت صحي الطشاش في بلد العمي شوف!

و قلت ليهم يا ريت لو شفتو في السودان الناس بيعملو الحاجات دي كيف!

غايتو انا و انت الغربة باقية لينا سترة حال

Quote: سناء خالد... اطلعي برّه البوست ده... انت وقت بتعملي الناعم وبي هففان كمان، بتعملي في شنو بي جاي! يا جماعة انا سنة خامسة زواج، ما حصل عجنته لي دقيق ولا عندي عدّة الخبيز زاتها! غايته انا عايزه اي وصفة حايمه...

مريم.. مرة عملت لانكشير.. بهرت ليك نسوان العرب الهنا ديل كلهم.. لكن بيني و بين نفسي ضحكت.. قلت صحي الطشاش في بلد العمي شوف!

و قلت ليهم يا ريت لو شفتو في السودان الناس بيعملو الحاجات دي كيف!

غايتو انا و انت الغربة باقية لينا سترة حال

Quote: السنه دي ما خابزين لأنه حنشتري جاهز لزوم عندنا عقد وكده,, وعد حأصور ليكم الحنشتريه لأنه البتعمله خطيره ومجربه, ولأني بعتقد انها بتعمل أجمل كعك ناعم وكعك عجوه في الدنيا, طعمه زي كعك الجنه كده

امووووون...كل سنة و انت طيبة و عقبالك..

يعني يا امون يا حبيبتي في داعي للشحتفة دي؟ عايني.. دكتور كاواهارا جاي بكرة.. ما في طريقة تخنصري لي من كعك العرس دا كورية صغيييرة خالتو ما تشوفها و ترسليها معاه؟ (وش دني!)

غايتو ان شاء الله اوصيك لحق عيد الضحية.. من هسة احجزي لي عند جارتكم عشان ما تقول لي مشغولة بطلبات الحجاج

تايسا

Quote: عليكم الله في كعك عيد أحلى منكم؟

في! انت و الكعك الانت بتعمليهو..

ياخي عليك الله شاركينا البهجة.. و ورينا شيالتكم فيها شنو العيد دا..

لنوية وين؟ الكزيها لي معاك عليك الله .. انا فاتحة ليها البوست دا مخصوص!

Quote: د. سناء قلب الاسد كامل التضامن و الدعم البوست ده مفروض يكون زي مساجد واحات أدنوك ( مصلي النساء)

يا رغيم الاب.. رغيم قلب الاسد..

بركة الشفاك طيب..

انا قبيل قلت البوست دا فصل للطالبات فقط.. لكن لو كنا قفلناه مصلى ما كان لقينا شرف الطلة دي منك..

عليك الله اقنع لينا فتحية تشرفنا بزيارتها و خبرتها.. نحن محتاجين تضامن عملي.. لرفع مستوى خبرتنا في المجال دا!

Quote: لوووووووول الله يديكم العافيه يا بناتي غايتوا كلما اشوف العده والفرش والخبائز وتعب السودانيات بقول احمدك يا الله المرقتني منها اضافه للحنه والحكايات التانيه

ماما دوما ازيك.. و كل سنة و انت و حبايبك طيبين..

تعرفي انا ذاتي مرات بقول ياخي انا في نعمة.. الله ريحني

لكن و الله .. مرات اشوف الحاجات دي و ابغر.. ياخي عندها طعم خاص و بتدي اي شيء طعم! عيد عيد.. و فرح فرح!

تصدقي لو اقول ليك في سنة من السنوات لحدي الساعة واحدة ظهر.. حتى اتذكرنا انو اليوم كان عيد الاضحى!

السنة دي.. عشان نطلع الاولاد من قصة الاعجاب بزينة الكريسماس و نحسسهم انو نحن كمان عندنا حاجات اكتر من انو نوديهم تويز آر اص يشتروا هدايا العيد.. اكتر من انو يكون يوم واحد.. بالكاد يكون مختلف..

قمنا من اول يوم في رمضان زينا البيت بانوار و بالونات.. و حنخليهم ان شاء الله لحدي تالتة العيد.. ناوية اخبز و اخليهم يجوطوا الدنيا بالتلوين.. لكن شديد حنفتقد دخلة الحبان.. و لمة الجيران.. غايتو.. الحمدلله!

كعك البصمة بالمربى



1 كوب زبدة
2/3 كوب سكر
1/2 م ص فانيليا
2 كوب دقيق
1/2 كوب مربى

لسكر التزيين:

1/2 كوب سكر بودرة
1 م ص موية
1 م ص ليمون


الطريقة:
ضعي الزبدة و السكر في اناء عميق او في وعاء مضرب الكهرباء



امزجي حتى يصبح الخليط ناعم



اضيفي الفانيليا و امزجي ثم اضيفي الدقيق حتى تصبح لديك العجينة متماسكة لفيها بنايلون و ادخليها الثلاجة لمدة ساعة ثم اخرجيها للتشكيل




اصنعي كرات بقطر بوصة و نصف تقريباً و ضعيها على صينية (غير مدهونة) ثم اصنعي في منتصفها حفرة باستخدام ابهامك او ملعقة.. ممكن الاطراف تتشقق قليلاً اثناء صنع التجويف.. ما مشكلة!




املئي كل تجويف بحوالي ربع ملعقة مربى



ادخليها فرن مسبق التسخين (180) درجة 350 فهرنهايت لمدة 14-18 دقيقة او حتى يصبح لون الاطراف بني فاتح



اخرجيها و اتركيها تبرد


في وعاء اخر اعدي سكر التزيين بمزج مكوناته.. لو كان قوي شديد اضيفي نصف ملعقة الى ملعقة صغيرة ماء..

ثم زيني بها الكوكيز بسكبها في شكل خيوط رفيعة

Quote: اميرة عليك الله ما تاكلينا حنك ساي.. لهسة وصفة واحدة ما اديتينا ليها.. خلينا نخبز.. بعدين اكان في كورة طلس بنقدمو.. هسة الفايدة شنو الواحدة تشتري ليها شيء سمح زي دا..

ياهو جنس حركاتكم دى عاملة لينا مشاكل مع مسالة البرينزينتيشن .
من البداية قلت ليك انا ماحريفة فى مسالة الخبائز دى(حريفة فى الهوت كيتشين والكولد كيتشين اونلى )
ممكن نترسل ليكم .....

وبعدين امانى الامين صديقتى فى التشرد هى الادتنى مهمة البريزينتيشن دى وانا بت فالحة وبسمع الكلام

اخبزو خبيزكم ونحن بنلم ليكم العدة وبنضف الحتة
قصرنا معاكم ؟

سلامو لسناء ولكل الحلوات (البشبهن الكعك)

طبعا اناأظنى ح اكون طيش الفصل دة بلا منافس ولله الحمد , فبالله عليكم أشرحوا بالتفصيل الممل :-)


داليا - بما أنك استاذتى إلى الآن فـ أنتى أخدى كل الوصفات وتعالى أعملى لى فصل إعادة.


أميرة الشيخ , أزيك وبجرب وبرسل ليك منو غيرك ح يستحمل!!؟.

ازيكم يا حلوات

سحر، مبروك كعك العيد... وماشاء الله، عيني بارده.... والله بركه الربنا ريّحك من العزومة... انا عزومتي كانت الجمعة، واختدته فيها 10 من 10... الحمدلله... يوم السبت عملته تمرّد سلمي على الفطور في البيت، ومشينا فطرنا برّه... جاتني صدمه من الطبيخ ههههههههههههه

سنّو... عملته مقدار من الوصفة بتاعت سمسماية الجبتها... وحأزينها الليلة واوريكم الصور بتطلع كيف... برضه حأعمل مقدار بتاع كعك بي وصفتك... ومقدار بتاع بصمة الاصبع... وبوريكم النتيجة بالصور بعدين... حاكم الليلة فاطره برّه برضه، قلت استغلها فرصة اخبز، مافي وقت... بكره عندي مشوار (مهم جداً) وبعد بكره بتجيني الحنّانه... وبعداك الوقت بزانق..


انتظروا الصور

سنّويه يا حبيبه,,
دكتور كواهارا ما أظن نحصّلو, كعكنا حنستلمه للعقد, يعني لسه ما استلمناهو,,
لكن بالنسبه للموضوع ده:

Quote: غايتو ان شاء الله اوصيك لحق عيد الضحية.. من هسة احجزي لي عند جارتكم عشان ما تقول لي مشغولة بطلبات الحجاج

فـ Done ياحبيبه,,
انشاء الله حيكون عندك في عيد الضحيه اللي هو شهر 11 ;) أجمل كعك ساده + كعك عجوه حتتذوقيهو في حياتك,,


مرمر يا بريزينتايشن,
عجبتني الشيّالات خاااالص,,
واصلي ياحبيبه, طالما ما حنقدر نفتي في الفصل ده في وجود المعلمات ديل,
يبقي أقلّلاها نتفرج في العده هههههههه

والله كلام ماما دوما صاح, ياخي السودانيات ديل بيتعبوا جنس تعب في الدنيا دي

ملايات ستان و مطرزه و مزركشه و مشكوكه و بخرز و بلولي و مكرمشه و غيره
حنه و خبيز و شيالات و فوط و مفارش و ورد
تياب و شباشب و غيروا


القروش دي لو وفرناها لدراسة اولادنا مش احسن لينا :)

ازيكم يا سيدات...

دي صورة الكعك الناعم... غايته لحدي بعد الفطور يجي الذواقة بتاعي يضوقه، حاكم انا ما بحب الكعك الناعم ولا بطيقه خااااالص.....بديكم النتيجة...

غايته لاقيت صعوبة يا سناء في تشكيل الكعكات، العجينه كانت بتتفتفت... لكن في النهاية اتشكّلت كويس.. وما اتهرس لي بعد ما نضج... برضه حسيت بيه شرب اول طبقة بتاعت سكّر لما كان حار... لكن بعداك زي ما ظاهر في الصورة...




دي الوصفة بتاعت سمسماية.... والتزيين بعض الخستكه المشتركه بيني وبين محمود...طعمه لزيز اكلنا منّه امبارح... لكن اعتقد انه مفروض يكون crunshy اكتر....استمتعنا انا وحمودي بالتزيين... وكان فرصة حلوة نتونس فيها.. طبعا اصلا استفته من لعبه عشان اقطع البسكويت زاته.. لانه اصلا انا ما عندي قطّاعات... ومبتدئة في هذا المجال...






بكره يا سناء حأعمل وصفة البصمة لأنه وقتي ضايق وانا مارقه.. واحتمال لو لقيت فرقة مع الفطور وزحمته، اقوم اعمل منين...

محبتي

Quote: ملايات ستان و مطرزه و مزركشه و مشكوكه و بخرز و بلولي و مكرمشه و غيره حنه و خبيز و شيالات و فوط و مفارش

لوووووووول يا دانيا بتي انا طبعا زوله براقماتك pragmatic
اسع لو سمعتك اخلاص اختي تقو ل ليك دومه من الله خلقها ما ليها في الجيهه ولا شغلات النسوان ودايره الناس يبقوا متلها .
انا غايتوا الملايات دي ربنا ريحني منها تماما ما عندي ملايات الا في غرف النوم .وملايات قطنيه
وكبابي المويه ديل بشتري نوع عادي جدا ولما يتكسروا بفرح
لانه اولادي اي شربه بكبايه من دولاب العده بعد اليوم ينتهي وينوموا بتلقي البيت كله منثور كبابي
اسع ما عندنا ولا كبايه مويه وانا فرحانه وما ح اشتري كبابي.
طبعا اختي عندها حكايه غسيل العده عشان العيد
لانه العده في السودان بختوها معروضات
اي والله الكرستال براهو
تاني حاجات لونها دهبي دي براها
حاجات لونها بلو دي براها
واحده لونها قرمزي
وحكايات ما بعرف زاتو بعملوا بيهم شنو .
الاواني عندي ما بتشوفيها نهائي لانه ما عندي دواليب لعرض العده
وعدتنا في المطبخ لزوم الاستعمال اليومي وبس

اما الشيال دا لشنو ؟؟
اساسا الحلاوه بتجي في علبه قدميها بالعلبه واقفلي علبتك راجعه
والكعك زاتو ممكن الزول يخته في علب حلاوه فارغه يكون جمعها بمرور الزمن
لا الشيال وقع ولا التراب غبر الخبيز او دخلت نصيبه من النصائب المزعجه والتي تتكاثر في فصل الخريف بشده وحتي لو بيتك مقفل بالقزاز او نملي اول ما زول فتح الباب تتسلل احدهن خلسه وتبقي في مطاره
ولا لما يجوك زوار باطفال هابشين وغالبا اطفال السودانيين هباشين
تكوني قاعده علي اعصابك
طقشوه رموه كسروه وشتتوا الخبيز
وتبقي في نضافه ولملمه
بفتكر العلب المصنوعه من المتلز
احسن واضمن وما بتكلفك قروش .
اما الحنه دي لو بقيت الشئ الوحيد الممكن كان يخليني اكون ملكه جمال العالم
بعتبرها ضياع زمن وقروش ومليم احمر ما بضيعه فيها اسع النبي عليكن امش عشان اشخبت يديني وكرعيني بي 50 الف او تلاتين الف وفي 15 يوم تطلع ؟؟!!
والله مبالغه حقوا يختصروها علي يوم العرس بس
لانه العروسه ببهرجوها اليوم داك وتبدو متل باربي او بت ام لعباب .

ينصر دينك يا دومة.

Quote: و الله يا ابو العزائم بالغت.. هسة سهمك دا انا احتفي بيهو و ابروزه عديل.. القايلني اديبة و اريبة زي ست الجمال بت جعفر، لكن غايتو سناء جعفر الا تدخل ليها واسطة شان ترضى.. غايتو يا سنوية اعفي لينا.. لومتنا ساي مع بكري... الله في!

لا ياخ ........ كل زول عندو منطقتو .... تعفي ليك عن شنو؟ ... ما إنتي كمان سنوية.

ما تجيبي لينا الكلام.

((الكلام)) داخل الدائرة محوّل لعناية دومة للتكرم بترجمته لإحدى اللغات المطروقة.

Quote: اخبزو خبيزكم ونحن بنلم ليكم العدة وبنضف الحتة قصرنا معاكم ؟

و الله يا اميرة ما قصرتي.. لم العدة و النضافة بعد الزول ينتهي دي ابيخ حاجة في الموضوع! شلتي مننا التقيلة..

خلاص يا زولة..عليك الله الشيالات فاضيات جيبيهن.. خلينا نتنور.. طبعاً انا زيك بسلك كويس في حتة الهوت و الكولد دي يا قولك.. لكن بباصي بالتيلة في الخبيز!

الليلة زي الخبزت كدي .. انتظريني بجيك بعد شوية..

Quote: سلامو لسناء ولكل الحلوات (البشبهن الكعك) طبعا اناأظنى ح اكون طيش الفصل دة بلا منافس ولله الحمد , فبالله عليكم أشرحوا بالتفصيل الممل :-) داليا - بما أنك استاذتى إلى الآن فـ أنتى أخدى كل الوصفات وتعالى أعملى لى فصل إعادة. أميرة الشيخ , أزيك وبجرب وبرسل ليك منو غيرك ح يستحمل!!؟.

احلى سلام ..لاحلى ندى.. نورتي البوست..

ياخوانا قولوا خير .. الطيش دي بقت ما حايقة.. و انا شكلي كدا حاتسلبط ليكم في الاولى مشترك مع دانيا و ابيعكم.. خاصة في ظل غياب الاستاذات.. داليا و لنا و سمارت.. و قبيل قلنا ليكم بلداً ما فيهو التمساح

بعدين نحن كلنا بنستحمل .. رسلي لينا الصور لو ما في طريقة للاصل.. و على كل البوست دا ان شاء الله نستحضره معانا لحدي عيد الاضحى.. البيغلبنا هسة نتعلمو شوية شوية و نقشر بيهو بعد شهرين

ميمو حبيبة.. يسلمووووو ايديك.. قلتي لي النسابة انبسطوا؟ اكيد ما شاء الله..

لكن يسلمو ايديك اكتر شيء على اللعب اللذيذ اللعبتيهو مع محمود.. لانو في رايي دي اكتر بهجة الواحدة ممكن تحس بيها.. و هو اكيد حيستمتع بيهو شديد و حياكل منو اكتر مما لو كنت جبتيهو ليهو جاهز..

يوم جوني هبة و هديل شايلين ليهم كتاب اطفال من المكتبة فيهو وصفة بتاعة كوكيز بالشوكولاتة.. و قالوا عايزين يعملوه.. ما كان عندي مزاج بصراحة.. لكن ما هان علي اكسفهم.. بقيت اخت في الشروط.. انا حاطلع ليكم الحاجات المحتاجين ليها..و حادخلو و اطلعو من الفرن.. لكن تاني ما حاعمل حاجة..موافقين؟ قالوا موافقين..
الشرط التاني. ما تجوطوا لي الدنيا.. موافقين.. تغسلوا العدة و تنضفوا المكان.. موافقين.. فاسقط في يدي و قمت طلعت ليهم الحاجات..
مع اول قولة ..ماااما.. قلت ليهم اهااا.. بدينا؟ ابوهم كان متكيف منهم قام قال لي خليهم علي.. .. وفعلاً ساعدهم و طلعوا كوكيز ظريفة شديد.. ما صبحوا منها و لا فتفوتة لتاني يوم (بنزل الصورة ان شاء الله).. و طبعاً اهم شيء انهم انبسطوا.. هسة شكلنا حنبرمج باقي الاسبوع دا بالالوان زيكم كدا

على فكرة الكعك انا ما بيتفتت لي .. احتمال يكون زيادة بسيطة في كمية الدقيق تقوم تنشف ليك العجنة شوية.. لكن شكلو كويس و الله و ما دام اتماسك بعد الخبز يبقى ان شاء الله الطعم ما حيتاثر.. نادر قال شنو؟

Quote: القروش دي لو وفرناها لدراسة اولادنا مش احسن لينا :)

احسن طبعاً! .. اتفاق زول يدو في موية باردة :)**
ذكرتيني يا دندون لما كنت في تالتة متوسط.. و الفترة ديك درست في السودان.. اها كنت قاعدة مع حبوبتي.. و ما كانت بتخليني اتكحل.. و انا من سادسة ابتدائي يدي في مكحلة امي عادي...
قاموا اول ما اهلي جوا في الاجازة و يدي وقعت في المكحلة رحت جاراهو في عيني طوالي.. و حبوبتي الله يرحمها ما سالتني لانو امي و ابوي قاعدين ما قالوا لي شيء..
المهم تاني يوم مشيت المدرسة و الظاهر اثر الكحل قاااعد في عيوني .. قامت واحدة من المدرسات قالت لي بغيظ.. (هسة بدل تصحي الصباح تقولي المكحلة و ينها مش اخير تقولي كتابي وينو و قلمي وينو؟!!)
قمت طوالي قلت ليها (كتابي و قلمي بجهزهم من بالليل.. الصباح بقول المكحلة وينها!)  .. طبعاً اسقط في يدها و حدرت لي بغيظ خاصة و انو نتايجي ما كان بتديها فرقة


لكن بيني و بينك الاكيدة اني لو اتختيت في اختبار صرف على الحاجات دي و لا دراسة الاولاد باختار دراسة الاولاد ما في اتنين تلاتة.. و في الحقيقة دا شكل خيارنا هسة و ان كانت اشكال الصرف و الترف المتوفر مختلفة!


------------------------------------------
**الموية الباردة طبعاً ما توفر المادة.. لكن عدم توفر شكل الاستهلاك السوداني المعتاد.. بالاضافة للبعد عن ضغوط المجتمع و متطلباته ..او الشناف و شيل الحال:))!

والله يا سناء انا من اتزوجت موضوع الخبيز ده ما عندي موضوع معاه, الغريبه قبل الزواج كنت بساعد ماما و بعمل لي وصفه لحاجه ما تقليديه

اتزوجت مشيت الامارات الله يخلي لي بنت عمي كانت بتعمل لي معاها, بنمشي نشتري الحاجات مع بعض و هي تخبز و انا اتفرج على التلفزيون و اونسها و اشيل حقي اوديه البيت حتى الشيالات هي كانت بتشتريها بتقول لي ما تفضحينا انت عروس ههههههههه
هسه في امريكا لمن جيت راجعه الله يخلي الماما, من امس انا شامه ريحة الخبيز من بعد صلاة الصبح, اتخيلي بدت من ساعة السحور امس مشيت المطبخ لقيت الحاجات مرصوصه لكن لسه ما ضقتهالانه بصراحه انا الخبيز ما عندي فيه كبير شغله.

غايتو يا ماما دومة انا الا اتفق معاك من باب (الما بيطول العنب)

لاني حاجات النسوان من حنة و الذي منو برييييدها.. بس ساي ما عندي ليها طريقة.. بعد ما جيت عروس و حنة العرس راحت و فضل اثرها في اضافري.. مشيت الدكتور بالم في المعدة..

الدكتور الياباني.. مصر يتجاهل شكواي من الام بطني.. و مركز في الاثر الفي اضافري.. متخيل انو عرض لمرض غريب.. جايبنو الافارقة ديل من بلدهم

يشيل و يسال ظهر لي متين.. و انا جيت من السودان متين!! غايتو البركة في هرشة خالد الهرشها ليهو!

اها تاني مرة بعد جينا من السودان و لسة النقشة يا حلاتها قاعدة.. قمت مشيت اسجل في نادي رياضي ..

في الاول رفضوا انهم يقبلوني.. و فضلوا يسالوا عن التاتو الفي يدي.. قلت ليهم انو دا ما تاتو دي حنة و كلها كم يوم و تطلع.. حتى بعد داك تسجيلي في النادي مشى

ولو انو خالد نصحني ما امشي تاني لحدي ما تطلع خالص!

السبب انو التاتو هنا بمختلف اشكاله ماركة مسجلة و حصرية للمافيا اليابانية (الياكوزا) .. و ناس المافيا طبعاً ما بيتقبلوا في الاندية الرياضية و احواض السباحة هنا!

اها دا كلو طفشني من المحاولة طالما انا هنا..

لكن وقت ارجع السودان بتفشى كويس..

بعدين عاداتنا و تراثنا دا بكل تفاصيلو البلد دي علمتني احترمو .. و اقدرو شديد.. لانو هنا الناس ديل بيحتفوا بعاداتهم احتفاء ما عادي

بما فيها نظافة راس السنة البتشبه نظافة العيد عندنا..

و كيكة الرز بكل طقوسها البتشبه عواسة الحلومر بكل طقوسه..

طقوم الشيالات بتاعتنا بتشبه عدة فطور راس السنة اللي عادي جداً انو يكلف في الحد الادني 300 دولار و قد تصل للالف دولار حسب الحالة المادية للاسرة (دا فطور بس!!)

لبس الكيمونو في المناسبات .. غالبية اليابانيات ما بيعرفو يلبسوه براهم الا يمشوا لصالون او يجيبوا واحدة تلبسهم في البيت.. و دا بيكلف اكتر من حناناتنا و كوافيراتنا بكتير..!

ما عارفة اذا كان الاوروبيين في ثقافاتهم في حاجات زي دي.. لكن الاكيدة انو كل شعب عندو طقوسو البتميزو..

دا غير انو الرجال السودانيين لو الواحد مرتو بقت من دون النسوان ما محننة و مميزة.. لو بقت (سبور) شنو داك يفضل يقارنها بباقي النسوان .. ويشوفها كيف كيف.. و لا ما كدة يا نسوان؛) ؟

دندون.. دا كلام شنو؟ و انا القلت انت الاولى و انا اتسلبط في المشترك.. يا شماتة اميرة فيني.. شكلها حتطلع الاولى هي .. شيالات سااااي

**********

تسلم يا ابو العزائم.. ياخ كلو واحد و الله.. سناء جعفر صديقة عزيزة و انت برضك ما مشيت بعيد (في شكل قشرة و كدة )

**********


مرمر (عجبتني دي يا اماني.. عن اذنك)

اها دي تجربة الرغيف الفوق الما عجبك انت و وهبة دا

هو من ناحية طعمو ناعم ناعم.. و الله طعمو ناعم ناعم:))
و هو سخن السكر مسك فيهو زي العجب.. لكن ما عملت ليهو طبقة تانية لانو طعمه كان حلو بزيادة :((

قمت الباتش التانية بعد نجضت ما سكرتها.. و طلعت لذيذة جداً بدون طبقة السكر .. يكون عشان كدا ست الصورة الفوق ديك خلته بعد برد و رشته بشوية سكر!





دا اللي الله قدرني عليهو الليلة :)

سنّو، باركي لي... اخدته 10 من 10 في الناعم! ... غايته نادر ما بعجبه شي بسهوله.. أو يكون عنده low expectations واتفاجأ ههههههههههههههه...

بكره حأعمل المنين... والبصمة.. نشوف الامور بتمشي كيف....


ما تتصوري انا فرحانه كيف انك فتحتي البوست ده السنة دي... امي تضحك فيني، قالت لي شايفاك تفتشي في الخبير بي الفيس بوك وسودانيز اونلاين...

سناء,


الغريبه رغم عدم اقتناعي بكتير من عاداتنا الا اني بعملها ممن باب مجبر اخوك لا بطل هههههههههههههههههه
الا موضوع الجيهه النسوانيه دي بحبها و بتخليني اشعر اني ملكه, رغمي اني برضه مقتنعه انها مضيعة زمن و مال ازدواجية شديده, التربيه بره دي مرات بتعمل مشاكل ههههههههه, لي كم يوم بفكر في بوست نسوان درجه اولي من تدبير منزلي و تجميل.

Quote: في الاول رفضوا انهم يقبلوني.. و فضلوا يسالوا عن التاتو الفي يدي.. قلت ليهم انو دا ما تاتو دي حنة و كلها كم يوم و تطلع.. حتى بعد داك تسجيلي في النادي مشى ولو انو خالد نصحني ما امشي تاني لحدي ما تطلع خالص! السبب انو التاتو هنا بمختلف اشكاله ماركة مسجلة و حصرية للمافيا اليابانية (الياكوزا) .. و ناس المافيا طبعاً ما بيتقبلوا في الاندية الرياضية و احواض السباحة هنا! اها دا كلو طفشني من المحاولة طالما انا هنا..

لووول عاد يا سنويه بتي نبقي لي كدي؟؟!!
الذ شئ اول مره زولنا دا يزور السودان جاء عن طريق اديس ابابا
واول مره يقابل سودانيات محننات لما وصل بعد كم يوم كدا قال لي في نساء سودانيات جو معنا في الطياره يدينهم فيها سكن.
انا من طبعي وانا في السودان ما اتمنيت اتحنن لا اتدخن ما قادره اشوف الناحيه الجماليه الفيها
لاني زوله براقماتك جدا يعني ما بعمل الشئ الا اولا اقارن جدواه بالتعب المبذول فيه .
ممكن اعمل كيك علي الطريقه الالمانيه وطبعا الالمان والنسماويين ديل هم اسياد الكيك
مش الجنك كيك بتاع الانجليز والامريكان Artificial colours and butter cream
لكين بقول اسع تتعبي تعملي الكيك تاكلوه يتردم ليكم شحم ساكت
عشان كدا ما عندنا شئ اسمه حلو بعد الاكل . بس فواكه وحتي سلطه الفواكه مابريدها
يعني عايزه اكل موزه من قشرتها راسا عايزه اكل تفاحه بقشرها وباكلها طوالي عشان ما تتاكسد و هكذا .

ماما دوما كل سنه وانتي طيبه ياحبيبه,,

الشيّالات ديل بالذات أنا مابرضي فيهم لأني بحبهم خالص
بعدين العلم اتطوّر, والشيّالات بقت بغطايتها وSafe جدا,,
هسي عايني لشيالتنا دي: (صورتها ليك مخصوص)

بنخت فيها أي حاجه ونحن مطمئنين انه لا نمل ولاحشرات ممكن يدخلوا فيها,
ونفس الشئ شيّالات أميره الفوق ديل, مغطيات وشكلهم جميل,, :)

نديكم العينة دى من البوليس !!
عشان تآمنوووا

مريومه مبروك نجاح الكعك وحلوه سمكة محمود المزينه براهو دي :)

دانيه وسنويه وماما دوما نقاشكم جميل,
الاقتصاد والتدبير مهمين, وفي عادات كتيره بتاخد زمن وبتضيعه فعلا,
لكن بصراحه عاداتنا حلوه وبتميزنا,
بعدين هسي ستات البيوت خصوصا العاملات, بقوا عشره علي عشره ,,
بيهتمو بالدايت والغذاء الصحي لبيوتهم, وفي نفس الوقت شغالات أو بيقرو, ومرات الاتنين مع بعض,
وكمان بيوتهم حلوه وأنيقه, وهم في نفسهم مهتميات بمظهرهم جدا وأنيقات,
يعني مكمّلات من كلو, وقادرات ينظمو وقتهم عادي وريلاكس جدا في يومهم,,
مابتكلم عن الاهتمام الأوفر وبيكلف قروش علي حساب تعليم أولاد أو علاج لاسمح الله,
لكن في حدود المعقول ناجحات ومتمكنات من ادارة بيوتهم ودي أحلي حاجه,,
خصوصا انه المجتمع دي حاجات متوارثه فيهو ومميزه ليهو,
يعني طالما لازم حنه وفرش وخبيز و و و يبقي ليه ما نعملها بمزاج وحب واتقان وتدبير؟

دانيه في انتظار بوستك المرتقب,,
خلونا نستفيد من خبراتكم ,,

Quote: خصوصا انه المجتمع دي حاجات متوارثه فيهو ومميزه ليهو, يعني طالما لازم حنه وفرش وخبيز و و و يبقي ليه ما نعملها بمزاج وحب واتقان وتدبير؟

الفصل دا يبدو مريم بت الحسين الاولى

مريم ياخ ماشاءالله ...باين عليك زول حريفة وبتاعة كلو
متابعاك هنا وهناك ................

وعشرة على عشرة يابت

غايته يا اميره وقت طلع الناعم بتاعي ناعم، تاني ما في يتكلم معاي زاتو ههههههههههه... او يكون نجاح لحظي، نبقى في اليحلّنا...

سناء هوووووووي... وصفتك بتاعت البصمة دي فيها مشكلة... غايته عجنته العجنه، وبعداك دخلتها الفريزر لمدة ساعة زي ما قلتي... لكن قلبي ماااااكلني، ساعه حتطلع لي لوح تلج!... ما عارفه...طلعّتها وشكلها قوييييييييه... بنتظرها شوية كده... ونشوفها.... انا اعتقد انها ساعه في التلاجه! ما حصل سمعته لي بي عجنه بتخش الفريزر ساعه كامله

Quote: ما حصل سمعته لي بي عجنه بتخش الفريزر ساعه كامله

مريم.. انت صاح و مية مية.. و تستاهلي الاولى بامتياز كمان.. انا كنت بكتب بسرعة و ما ركزت.. فعلاً هي التلاجة ما الفريزر.. سامحيني و ان شاء الله ما تتاثر معاك..

مبسوطة انو الكعك طلع ليك كويس.. و عجب نادر.. و مستنينك بنتيجة البصمة..

Quote: انشاء الله حيكون عندك في عيد الضحيه اللي هو شهر 11 ;) أجمل كعك ساده + كعك عجوه حتتذوقيهو في حياتك,

امون.. ما عندي اي فكرة كيف فاتت علي مداخلتك دي امس!

يسلموو حبيبة ما بتقصري و الله.. و شوقتيني شديد.. الزولة دي لو عرفت حجم الدعاية الانت عملتيها ليها .. مفروض تخبز ليكم كعك العقد دا مجان..
غايتو انا و اميرة حنمشي نتفاوض معاها عشان نعمل فرانشايز للشغل بتاعها..
رايك شنو يا مرمر؟

Quote: نديكم العينة دى من البوليس !! عشان تآمنوووا

و آمننا و الله يا صلاح .. ما شاء الله و تبارك الله.. شغل بتاع فنانين ما بواليس.. الله يدي المدام العافية و يسلم ايديها

تحياتنا ليها و قول ليها كل سنة و كلكم طيبين و يا ريت تشاركنا بوصفتها للبتيفور دا او اي وصفات تانية

 

Quote: الغريبه رغم عدم اقتناعي بكتير من عاداتنا الا اني بعملها ممن باب مجبر اخوك لا بطل هههههههههههههههههه الا موضوع الجيهه النسوانيه دي بحبها و بتخليني اشعر اني ملكه, رغمي اني برضه مقتنعه انها مضيعة زمن و مال ازدواجية شديده, التربيه بره دي مرات بتعمل مشاكل ههههههههه, لي كم يوم بفكر في بوست نسوان درجه اولي من تدبير منزلي و تجميل.

تعرفي يا دانية دي المرة التالتة القاك كاتبة (الغريبة) بفتح الغين.. و انا اقراها (الغريبة) بضم الغين.. شفتي حالة الدناوة الانا واصلة ليها

بامانة يا دندون.. جيهتنا دي بتميزنا عن نسوان الدنيا كلهم.. و انا بالرغم من اقتناعي انها متعبة.. لكن ما بشوفها مضيعة زمن و لا مال.. لانو دي سنة الله في الكون.. و دي فطرتو في النساء ..
و برضو لانو النسوان في كل الدنيا بيصرفوا على زينتهن و مكياجهن و جمالهن.. صاح انو اشكال المكياج و الزينة دي بتختلف.. لكن كلها بتصب في خانة واحدة.. العناية بالجمال و حسن المظهر! الكلشر الانا قاعدة فيها دي بتدي الجانب دا اهتمام موازي (و في احيان يفوق ) الاهتمام بيهو في السودان.. لكن طبعاً الشكل مختلف..

مستنيين البوست.. و بصراحة انا في حتة التجميل دي مهرية و مرارتي مفقوعة من البشوفو في تلفزيون السودان و الدراما السودانية.. يعني مرات في فهم اشتر شترة للمكياج.. يحير!

اخير استنى البوست بتاعك!

Take2 hearping cups of patience2 handful of generosity dash of laughter headful of understanding sprinkle generously with kindness add plenty of faith(mix well أنا ما بفهم في المواضيع دي لكن قلت لازم أشارك ناس سنويه ديل. 

Quote: واول مره يقابل سودانيات محننات لما وصل بعد كم يوم كدا قال لي في نساء سودانيات جو معنا في الطياره يدينهم فيها سكن. انا من طبعي وانا في السودان ما اتمنيت اتحنن لا اتدخن ما قادره اشوف الناحيه الجماليه الفيها

غايتو يا ماما دومة.. وافق شن طبقة :)) .. الله يخليكم لبعض و يسعدكم يا رب..

لكن لما نجي نفرح بسوزانا و سامي، لازم نخليهم يجربوا شوية من عاداتنا.. و نعزمهم حنة في السودان ان شاء الله

Quote: Take2 hearping cups of patience2 handful of generosity dash of laughter headful of understanding sprinkle generously with kindness add plenty of faith(mix well أنا ما بفهم في المواضيع دي لكن قلت لازم أشارك ناس سنويه ديل.

الوصفة دي اكيد بتطلع حاجة احلى من الكعك..

يسلمو يا منال و كل سنة و انت طيبة

و شكراً على المشاركة الحلوة

ازيكم يابنات....
اول حاجه لازم اوضح ....ان السنة دى اول سنة اخبز...بعد اكتر من 8 سنوات زواج ....السنة دى حسيت على دمى و قلت اخبز للغلابة ديل.
امى بتكون جاتها نفسيات من كترة التلفونات الايام دى....لكن غايتو صااابرة على لحدى هسى.
بجيكم راجعة للوصفات بعدشوية...
لكن عاوزه اقول حاجه لدانيا و ماما دومة و .....و ملاسى برضو:
يا اخى خلو الناس فى حالها....العاوز يخت ملايات ستان بخرز....و اللى عاوز يعمل حنة للركبة او الله عاوزه تتدخن دخان *"مرة الغفير"....ما فلى مشكلة ..طوال ما الواحده مبسوطه....وزوجها مبسوط....خلوها تعمل العاوزاه.
لكن على راى سناء البيغيظ بالجد موضوع المكياج. المكياج ده (خاصة الفاونديشن و البدر) ما مزاج ساى.....و مهمتة(للاسف) ما تفتيح لون البشرة. و الوان الصباح مختلفة من الون المساء و مختلفة من الوان الحفلات و بتختلف فى الصيف و الشتاء. و الله انا لى زمن بفكر افتح بوست عن الموضوع ده. الحقينا يا دانية.



___________________________________
*ما عنصرية منى تجاه زوجات الخفراء ..لكن مشهورتان بالدخان التقيل ..على الاقل اللى انا بعرفهم.

بالنسبة لي الحنة والدخّان حاجه بستمتع بيها مرحلياً... يعني بتهف لي مرات ... لكن بعملها في الغالب عشان نفسي.. ما بهمني النسوان وبرتوكلاتهم كتير... لاني بفتكر انه لكل مقام مقال..
وفي اولويات لازم الواحد ينتبه ليها... في الحاجه دي انا دايما خاته كلام ليلى صلاح (ابنوسه) في بالي... وقبل كده قلت الكلام ده... يعني مثلا ايام العيد... بحب اتحنن، وما حنّه عادية.. وبحب افرّش وابخّر البيت
ولااااااازم امشي اعمل شعري في الكوافير.... وبشوف لي توب ظريف بتاع حرير البسه.. او اشتري واحد جديد.. يعني يوم العيد لازم اغيّر لروحي عشان انا زاتي احس بالعيد... حسي بكره يوم الحنّه في عماراتنا، اتفضّلوا معانا... هههههههههههههه...

اها بعد ما العيد ينتهي، نرجع لنكوشنا... والحنه بننساها كم شهر... لكن ممكن في ويك إند كده، يهف لي امشي اعمل شعري واتحنن!... انا ضد الإلتزام بالبرنامج كعادة مستمره.. نوع يقول ليك حنتها ما بتطلع من كراعاها.. ما لي بالبعملوا كده، هنئياً ليهم... لكن انا زوله ملوله... الحاجه لو اتكررت لي كتير... بزهج منها وبتفقد حلاوتها، لكن لما اغيب منها وارجع ليها، بتكون نفسي فعلا فيها وبظبّطها...

ياخوانا خبيز البصمه الدفعه الاولى اتحرق.. عملته عجبنه تانية... ان شاء الله تزبط، وانزّل ليكم الصور... الله يستر

Quote: غايتو انا و اميرة حنمشي نتفاوض معاها عشان نعمل فرانشايز للشغل بتاعها.. رايك شنو يا مرمر؟

سنوية انا ذاتى حاكون هناك(السودان) فى نفس توقيتك ...
اهو دا مشوار مهم نمشيهو سوا ونتعرف على الاسرار ...

Quote: لكن عاوزه اقول حاجه لدانيا و ماما دومة و .....و ملاسى برضو: يا اخى خلو الناس فى حالها....العاوز يخت ملايات ستان بخرز....و اللى عاوز يعمل حنة للركبة او الله عاوزه تتدخن دخان *"مرة الغفير"....ما فلى مشكلة ..طوال ما الواحده مبسوطه....وزوجها مبسوط....خلوها تعمل العاوزاه. لكن على راى سناء البيغيظ بالجد موضوع المكياج. المكياج ده (خاصة الفاونديشن و البدر) ما مزاج ساى.....و مهمتة(للاسف) ما تفتيح لون البشرة. و الوان الصباح مختلفة من الون المساء و مختلفة من الوان الحفلات و بتختلف فى الصيف و الشتاء. و الله انا لى زمن بفكر افتح بوست عن الموضوع ده. الحقينا يا دانية.

لوووووووووووووووووووووول تعالي يا اسمارتينا يابتي
شنو الخلي راينا نحن افرش وتخين( يعني كلامنا كعب وما مفروض نقوله)
ورايك انت في المكياح سمح وعديل ؟؟
ما منعنا زول بس انا قلت ما بتعجبني و دي اقل درجه من الاغاظه القلتيها انت
يعني لو لقيت زوله محننه لكيعانها ما بتعجبني
لكن ما بغتاط منها
الكيعان كيعانها وهي ستهم
لكين ما شئ بلفت نظري واقول يا سلام شئ جميل والله .
كدي افتحن بتاع المكياج د دا وورونا بالاول ما هو الفاونديش وما هي البدر وانواعها وطريقه استعمالها وبتنفع مع الجلاكين القدري ولا ما بتنفع ؟؟
لانه انا شفت زوله عامله شئ ابيض ه تقو لي ضربتيها جير ابيض ورقبتها لونها عادي فما عرفت هل دا طلع جديد ولا عدم عرفه منها

سلامات يا خالتي دومة
و الله كلامك صاح. أنا اتعاملت بمعايير مزدوجة في الموضوع ده.
مفروض اخلي الناس في حالها حتي في موضوع الميك اب ده.
لكن ممكن القي لروحي مخارجه. المكياج ده ما حقنا. يعني ما سوداني نلخبتو ذي ما عاوزين.
الموضوع فن و علم. و عنده أبجديات لازم مراعاتها. و ذي ما قلتي شوال الجير اللي في الوش ده ما سمح كلو كلو. اهم حاجه
في الفونديشن انو الناس ما تقدر تجزم تماما انك عامله فاونديشن و لا لا.
بعترف تاني باني ما لي حق في طولة اللسان دي.

تسلمي حبيبه لووووووووووووووووووووووول عسل بس يا اسمارتينا ما زعلانه انا تصدقي قلت اشاغلك بس
افتحوا لينا بوست لتعليم المكياج زمان ما كنت بحتاج لكين بعد العمر دا في اشياء غير جميله وروني كيف يمكن التقليل من اثارها
لو في علاج ليها
غايتوا مرات بشوف واحدات الوش متل العلبه البخمج الرسام فيها الوانه .
غايتوا انا الايام دي طالعه في بني الشفاه المهم لون كدي بين بني وبنفسجي ما اقول ليك عشان االلون الاحمر في البشره الداكنه ما بخارج

Quote: غايتوا مرات بشوف واحدات الوش متل العلبه البخمج الرسام فيها الوانه.

غايتوا اول مره اسمع بدخان نسوان الغفراء دا يا اسمارتينا
لكين من اشهر النساء في حكايه الدخان دي وبعتبر نوع من الجمال ويدل علي وضع المراه الاقتصادي االمريح هن نساء قبيله البطاحين.

من الخبيز دا كلو ما عجبني إلا

١) الهففان
٢) ودخان مرة الغفير

كل سنة وانتن طيبات كلكن
أنتن وبعولتكن

المنين (حأعمله الليله كان الله هوّن)
2 كوب سكّر
ملعقتين كبار نشادر (وقية)
ملعقة كبيرة باكينج بودر
كبايتين ونص حليب
كبايتين زيت

كيلو دقيق (يعني الكيس بتاع الكويت كامل)

الطريقة
تخلطي الحاجات كلها مع بعضها خلط كويييييس، لحدي ما السكّر يذوب وبعداك تضيفي ليهم الدقيق وتعجني... في طريقتين... إما تمسكي البسكويتات واحده واحده تشكّليهم.. او تفردي العجينه كلها في الصينيه، وبعداك تقطعيها وتقلّبي البسكويت عشان يتحمّر من فوق كمان...

دي الوصفة الادتني ليها حماتي اخت نادر، لو في تصحيح بالله صححوا لي قبل ما اقعد اجوط ... برضه سؤال، موش المفروض يكون في حبّة سودا (كمّون)!!

التحية لمرة الغفير يا جماعة...

ازيكم يا جماعة..

و اسمحوا لي اخت وصفة اللانكشير قبل ما ارجع للردود الفردية..

3 اكواب دقيق
1و 1/2 كوب كورن فلور
1 كوب سمن جامد
1 كوب سكر ناعم بودرة
3 بيضات
ذرة ملح
فانيليا
م ص بيكينج باودر

الطريقة؛

في البداية ننخل الدقيق و البيكنج باودر و الكورن فلور مع بعض بعدين نعمل التقسيمة التالية:

(1)
1/2 كمية السكر + البيض + ذرة الملح يضربوا جيدا مع بعض

(2)
1/2 كمية السكر + السمن الجامد يضربوا جيداَ مع بعض لحدي ما يبقى خفيف زي القشدة

(3)
نخلط (1) و (2) مع بعض جيداً

نضيف خليط الدقيق و الكورن فلور و البيكنج باودر الى الخليط (3)
اذا كانت العجينة ناشفة تلين باضافة بيضة

تقطع الى كرات صغيرة متساوية الحجم و تخبز في فرن (اقترح درجة حرارة 180 درجة و راقبي النضج.. لانو ما عندي درجة و لا زمن مكتوب في الوصفة و لي زمن ما عملتها فما متذكرة بالضبط.. لكن تقديري انك تفقديها بعد 7 دقايق) 

بعد ما تبرد الصقي كل قطعتين بالمربى او الشوكولاتة و دحرجيها في جوز هند او مكسرات مجروشة عشان تزين الاطراف

القرشلة (قرقروش بالسمسم و اليانسون)

المقادير:

3 اكواب دقيق
3/4 كوب زيت نباتي
1 كوب سكر
3 بيضات
6 ملاعق طعام يانسون (يانسون مركز!)
2 م صغيرة بيكينج باودر

سمسم للزينة

الطريقة

تخلظ كل المقادير مع بعض ما عدا السمسم و تفرش في صينية
تفرش طبقة سخية من السمسم في الوجه و تضغط قليلاً لتثبت في العجينة
تخبز في فرن 180 لمدة 35 دقيقة

تخرج من الفرن و تقطع مباشرة و هي في الصينية على شكل اصابع طويلة و ترجع للفرن مرة اخرى على باقي الحرارة الفيهو و تترك داخله حتى يبرد الفرن و تصبح القرشلة يابسة

عملت اللانكشير... success بكره بعمله بالمربى وجوز الهند وبصوّره ليكم ان شاء الله... برضه حأجرب الشكلّمه ... والمنين بكره ان شاء الله...وبصوّرهم ليكم مع اللانكشير لو نجحوا ....


ألف شكر ليكم صديقاتي.. انا والله البوست ده ما تتصوروا استفدته منّه قدر كيف... ناويه اصوّر ليكم شيالتي يوم العيد ان شاء الله...

ازيكم يا بنات :) مريم هسه تجي تضحك


حاجاتنا و عاداتنا حلوه و اي حاجه لكن بتضيع زمن طويل يعني مثلا لو عملوا حنه اكسبرس مثلا مالوا؟ او طوروا موضوع الدخان. ذكرتوني ايام العرس خليت الشغل قبله بسته شهور عشان اجهز و ماما اصرت على موضوع الدخان و الحبسه اتخيلوا حايمه السوق و المولات و الناس كلما اقعد في مكان يقولوا في ريحة حريقه و مره في المول مع صاحبتي طلبوا المطافي, المصيبه كنت بجرب في مكياج بروفه للصبحيه, اها لمن لقيت الزوله جاده و اتصلت بالمدير في ريحة حريقه و طلبوا المطافي جريت بنص وش معمول و نص ساده خخخخخخخ والله و انا طالعه من المول شايفه عربية المطافي. لكن بصراحه بتميز المراه السودانيه من غيرها و الجيهه حلوه لكن الا الزمن مافي.

اميره الشيخ, ياخي ذكرتيني ملايات الستان و المشكوكه و المطرزه دي انا عندي معاها ذكري مؤلمه, لمن ولدت حمودي طلعت من المستشفى لقيت ماما و صابحتي مطقمين الغرفه ملايات مع شباشب مع ارواب كله لون واحد و مفروض يتغيروا كل يوم و حاجاتي الجهزتها للنفاس زحوها بعيد اها انا والده بعمليه قيصريه و ما طايقه روحي و الملايه كل شويه تزلقني و تتزلق بي اقرب اقع و الخرز يطعني في كوعي اها بتين اول كوته من النسوان يطلعوا قمت طوالي ماما و صاحبتي تحت في المطبخ طلعت ليهم ملايتهم السمحه ديك و كيس مخدتهم و فرشت ملايات قديمه بارده قرب يجيهم هارت اتاك, اها بقوا لمن يجوا نسوان, ماما تاخرهم فوق شويه و صابحتي تجي جاريه فوق تفرش الملايه مسافة انا البس, لانه بيني و بينكم لو خلوني على راحتي كنت قابلت ليهم النسوان ببجامة ميكي ماوس او هلو كيتي :) شكلي طلعت من الموضوع

ماما دوما برجع بكره او بعده ببوست التجميل و العنايه بالبشره و المكياج و ايديكم معانا. حنبداء بالعنايه و نمشي المكياج و نمر بالعادات السودانيه و الوصفات الطبيعيه و عشان خاطرك في الاول حنعمل كراش كورس في الفاونداشن

Quote: والحنه بننساها كم شهر... لكن ممكن في ويك إند كده، يهف لي امشي اعمل شعري واتحنن!... انا ضد الإلتزام بالبرنامج كعادة مستمره.. نوع يقول ليك حنتها ما بتطلع من كراعاها.. ما لي بالبعملوا كده، هنئياً ليهم... لكن انا زوله ملوله... الحاجه لو اتكررت لي كتير... بزهج منها وبتفقد حلاوتها، لكن لما اغيب منها وارجع ليها، بتكون نفسي فعلا فيها وبظبّطها...

معاي في نفس الموجه يا مريم, حنتها ما بتمرق دي ما بنقدر عليها لكن لمن تهف لينا مره مره

Quote: ماما دوما برجع بكره او بعده ببوست التجميل و العنايه بالبشره و المكياج و ايديكم معانا. حنبداء بالعنايه و نمشي المكياج و نمر بالعادات السودانيه و الوصفات الطبيعيه و عشان خاطرك في الاول حنعمل كراش كورس في الفاونداشن

في الانتظار علي أحر من الجمر :)

اماني كل سنه و انت طيبه

اصبري لينا شويه, فكري عاوزه نناقش شنو اول او لو في حاجه نسيناها البوست بوستيكم :)

دانيه وانتي طيبه حبيبه,,

Quote: فكري عاوزه نناقش شنو اول او لو في حاجه نسيناها البوست بوستيكم :)

أكيد, الأفكار كتيره, ومعاك بقوه انشاء الله,,

خالتى دومة ...العفو يا اخى ..انا عارفاك ما زعلتى ....لكن الاعتراف ..... (عارفة الباقى )

مريوم...انا زيك ...الحجات دى بالمزاجات...
لكن و الله ما شاء الله و عينى بارده. ده كلو خبيز؟؟؟ما شاء الله و الله اكبر. لكن انا اصلا عارفاك...لما تختى قلبك فى حاجه....بتتظبط تمام.
انا من يوم الجمعة بتاع الكعك و البسكويت داك...عملت لى بتفور ما قدرت انجضوا كويس. الجماعة كانوا صاحيين. و لما قررت اخبز حاجه تانية...بعلى كان ح يجيه انهيار عصبى....(منو اللى ح ياكل ده كلو عشان تعملى زيادة؟). حاكم احنا بعيد عنكم ما بجونا ضيوف. يعنى العيد ده ح يجينا -احتمال- ضيف او اتنين بالكتير.


سناء ...اتاريك (انت و دانية ) معلمات كبار ..على راى امانى الامين.

امانى ...ده عقد منو ؟؟؟ بختكم.و ان شاء الله يكون فى حفلة!!

دانية ....سريع بالله البوست. عندى صحبتى بتضحك على و بتقول عنى انى نوع الناس اللى لما اصل 40 سنة ح ابدا اعمل عمليات تجميل!!!!

بناتي الحلوات والله مشتاقه ليكم بشكل
عدت من بوست حاتم الياس وانا اطرطر كالرقشه لوووووووووول والله ضحكني جنس ضحك
غالبا يكون رباطابي حاتم دا

لوووووووووول@ماما دوما ههههههههههه


أنا كنت راجعه أشاكلو ليك لقيتك تضحكي خليتو هههههههههه

Come back with ideas for the new post.

دوني طبعا انا بوستكم داك بدخل اتفرّج ... انا زي خالتي دومه... المكياج بالنسبة لي حاجه زايده عن الحاجه... علاقتي بالمكياج لما اكون عايزه اققققققققققققققققشر، كحل وروج او حتى lip gloss ... ولو عندي eyeliner بعمله، الايام دي ما عندي زاتو.... ولما اكون عايزه حاج على خفيف، بعمل كحل.... وغالبية الايام، من غير.. وما حصل في حياتي عملت full make up .. والfoundation ما بعرف شكله كيف... وبسمع بي الكونسيلر.. لكن برضه ما عندي معاه علاقة.... والبدره ما بعملها.. وما بستخدم كريمات في وشي خالص... لانه بتعمل لي حساسيه...

دندون ومريم واسمارت,,
بفتكر المقارنه بين حاجاتنا الموروثه والبلديه المستعمله للتجميل,
مع المستحدثات العالميه المستورده والمستخدمه حاليا Core كويس للموضوع,

كمان بشرتنا السمراء وما يناسبها من ألوان مكياج, وكيفية اختيار الماركات المخصصه للمناطق الحاره
للعنايه بالبشره والشعر,,

وكده :)

Quote: حاجاتنا و عاداتنا حلوه و اي حاجه لكن بتضيع زمن طويل يعني مثلا لو عملوا حنه اكسبرس مثلا مالوا؟ او طوروا موضوع الدخان. ذكرتوني ايام العرس خليت الشغل قبله بسته شهور عشان اجهز و ماما اصرت على موضوع الدخان و الحبسه اتخيلوا حايمه السوق و المولات و الناس كلما اقعد في مكان يقولوا في ريحة حريقه و مره في المول مع صاحبتي طلبوا المطافي, المصيبه كنت بجرب في مكياج بروفه للصبحيه, اها لمن لقيت الزوله جاده و اتصلت بالمدير في ريحة حريقه و طلبوا المطافي جريت بنص وش معمول و نص ساده خخخخخخخ والله و انا طالعه من المول شايفه عربية المطافي. لكن بصراحه بتميز المراه السودانيه من غيرها و الجيهه حلوه لكن الا الزمن مافي.

لوووول
والله أنا كنت فاكر البوست بوست كعك
قلت الدنيا قبايل عيد أخش أتثقف شوية
أتاريكن عاملات العمايل
كاااااااااك لكن أنا عارف ماما دومة دي بلدي و أول ما تجيكن بيجاي بتجوط الدنيا وتمرق
ودانية تمّت الناقصة
يا نسوان ما تركّزن في خبيزكن
كاااااااااااااااااك

غايتو التحية للبوست دة
اها بعد العيد ح تقلبوهو أمجاد؟؟

Quote: دوني طبعا انا بوستكم داك بدخل اتفرّج ... انا زي خالتي دومه... المكياج بالنسبة لي حاجه زايده عن الحاجه... علاقتي بالمكياج لما اكون عايزه اققققققققققققققققشر، كحل وروج او حتى ليب gلوث ... ولو عندي آيآلينآر بعمله، الايام دي ما عندي زاتو.... ولما اكون عايزه حاج على خفيف، بعمل كحل.... وغالبية الايام، من غير.. وما حصل في حياتي عملت فولل ماكآ وب .. والفوونداتيون ما بعرف شكله كيف... وبسمع بي الكونسيلر.. لكن برضه ما عندي معاه علاقة.... والبدره ما بعملها.. وما بستخدم كريمات في وشي خالص... لانه بتعمل لي حساسيه...

ده كلام زول واثق من روحو شديد ....ما شاء الله. *
عارفه يا مريم الكحل ده بالزات تعويده. زمان ما كنت بتكحل نهائي. يوم اعمله اى زول بيعرفنى بيعلق انه شكلى مروقة او مبسوطة او حاجه كده. هسى لانى بتكحل كل ما اخد دش. بقيت لما اكون ما مكحلة الناس بتفتكرنى عيانة.

* بشاغل فيك انا.
لكن كلامك صاح لو بشرتك صافية ما فى داعى للفاونديشن

Quote: لكن كلامك صاح لو بشرتك صافية ما فى داعى للفاونديشن

You are right smart :)


Mariom,

We will go over skin care first, and why it is necessary.

ازيكم يا جماعة و مشتاقين..
نفسي ارد على كل مداخلة وحدة واحدة لكن الدنيا وقت سحور، و بصراحة داخلة من الموبايل و النت بيهو مكلف (وش دني باستحياء)
عايزة ارحب بهميم و حبيب نورة، كل سنة و أنتو طيبين يا شباب..
و يا حبيب نورة بعد العيد حنقلبو كوفي شوب، نورة مزاجها قهوة و لا شاي؟ كلو موجود:)) و منور البوست ياخ!


أميرة .. فرحتيني.. :)))))

سمارت.. أنا غايتو ما معلمة لكن بهابش ساي، الوصفات دي أدتني ليها بت عم خالد قبل يمكن عشرة سنين ، لكن النصيحة بيظبطوا معاي، لما أتجلى و اقول عايزة اخبز... لكن لما امشي السودان باشوف حاجات بتبهرني اكتر! نفسي أبقى شاطرة في الخبايز.. بس بالجد قصة انو مافي التشجيع و الدافع بتاع تقديمو للناس .. زيادة لأني حينتهي بي الامر لأني آكلو براي و اردم فيني كم كيلو دي كلها بتكسل و تخلي الواحد محلك سر:((!

دانية شايفاك تلمي في طوب الأساس حق بوست التجميل و جدعتي صينية الكعك بعيد:))
اقتراحي بإنك تبدئي البوست بالأخطاء الشائعة عند السودانيات، ابتداء من كريمات تفتيح البشرة و انتهاء بتغبيش الوش بالبودرة و لا الفاونديشن و كتح الجفون بظلال احمر عشان الطرحة حمراء:((!

مريم أنا زمان ما كنت باشتغل بالفل ميك اب، لكن أعتقد للسن أحكامه ؛))))
و كنت عكس سمارت بعمل كحل من صغيرة، و بعدين أتطورت لرسم كامل للعين بالايلاينر، هسة بقى حدي ماسكرا بس، كحل نهي زندقي .. و مرات آيلاينر على الجفن العلوي فقط!
دانية أخير تفتحي البوست عشان شكلو دا قلب صالون تجميل لا امجاد لا كوفي شوب:)))


ماما دومة و أماني
راجعة ليكم بكرة ان شاء الله
مريم الصور، سمارت الوصفات وينها ؟
 

كل سنة وانتوا طيبين يا عسل..

بوست جميل جدا جدا..

انا غايتو بخبز بكرة كان الله حيانا..

حاسرق وصفة الغريبة واللانكشير..

وعايزين وصفة البسكويت المشلخ بتاع المكنة لو في طريقة..

بنات اصبروا شوية ارجع البيت ما عندي عربي في المكتب و داخلة من التلفون


سناء والله البوست شكلي حولت اتجاهوا. الاخطإ الشايعه عندنا كسودانيات مارضاني مرض حنناقشها و نحاربها كمان و يا مريم بما انك ما شغالة بالموضوع لازم تشاركي كالفة الفصل

دي عينة من اللانكشير ومن الشكلمه... طبعا اللانكشير زي ما قلت ليك يا سناء، عملت نص العجينة باللون الاصفر... وعملت كوره صفرا وكوره بيضا... طعمه جنان.. وشكله ظريف خالص





بسكويت النشادر لسه في الفرن ما انتهى... الدفعه الاولى رميتها، اتحرّقت لي.. لكن دي ماشه بي نار بي مزاج... اعتقد انها حتظبط... ده شكلها وهي في الفرن




بجيك يا رشا بوصفة بسكويت النشادر، المشلّخ... :D.... عندي الوصفة لكن ما عندي المكنة، عشان كده ما عملته...

رشا سالم كل سنه و انت طيبه


البسكويت المشلخ دي عجبتني كيف :)

Quote: أنا كنت راجعه أشاكلو ليك لقيتك تضحكي خليتو هههههههههه

لووووووول يا موني والله ضحكت لما قربت اقع من الكرسي
لكين ما انا خاتيه عليهو.

يا بنات هوي خلاص الكعك دا
الخبز خبز والما خبز السنه الجايه
يلا بعد دا الكوفير والبودي كير
وكل سنه وانتن طيبات وحلوات ومتلمات ومتونسات وموفقات .
موني انت العقد حق منو؟؟

مريم الحسين ودانية المكي عسل بس
ياخ كتلتونا بالضحك




ـــــــ
في الحقيقة بنات البوست كلهم عسل بما فيهم ماما دومة الركشة هههههههه
بس خلي الناس في حالا يا ماما دومة ياخ
الدايرة تتحنن والدايرة تتدخن والدايرة تخبز وتخت الستان البيرقش ويلمع
والما دايرة برضو على كيفا
وفي كلٍ خير
لكن مريم ودانية فيهم براءة تفور البطن

ـــــ
اللهم اصرف نظر ماما دومة عن هذه الهنابيك

لووووووووووووووولتعالي انت وينو خبيزك مع البنات عامله كدامتل دينا خالد
بس معقوله يصرف نظري عنها ديل اسع حنابيك ولا اسمارتيز smarties
وانا متل الرقشه داخله ومار قه بالازقه البورديه طرطرطرطرطرطر .
عليك الله يا تيسير خليني اقول راي في ملايات الستان ديل يا اخي عواليق شديد واكثر من بلدي بتزلقواوالخرز بطعن
والدخان ريحتو بالنسبه لغير السودانيين كال smoked pork تماما
يعني بصراحه كدا ما بنفع الا في السودان لانه هناك الانوف متعلمه علي ريحته .

يا ماما دومة أنا في الحاجات دي بقيت محمد ولد


زمااااان من أنا في المتوسطة ولغاية ما عرست كنت بحبها وبهتم بيها وبحرص على معرفة الوصفات وطرق التقديم والعدة والقصص دي
مرات كانت تهف لي عيد ما عيد تلقيني مدورة خبيز وكعك
لقيتها ليك شغلة ما عندها نهاية دا غير إني إكتشفت إنو البطن بتتملي لكن العين أصلها ما بتتملي
عشان كدا حسمت أمري بدري بدري مع موضوع الخبيز دا

هسي شغالة بنظرية أي حاجة ممكن أشتريها بالقروش ما بضيع فيها زمن
الخبيز البشتروهو أي نعم مازي حق البيت بس برضو طعمو حلو وشكلو حلو ولا يوسّخ إيديك ولا يغلّت عليك
أجي من المكتب الساعة 4 أسوي الفطور وبعداك أخبز؟؟
فوق كم؟

نو تايم حبيبة نو تايم


ــــــ
بالنسبة للملايات والمفارش
عن نفسي أنا برضو بكره الكرانيش والزركشة واللمعة والفصوص
بحب الملايات البسيطة و"كينون" خياري الأفضل والأجود
والمفارش في حاجات بتكون غاية في الجمال وفي نفس الوقت بسيطة

بس لو في واحدة بتحب البهرجة وبتنبسط بيها فدا خيارها

ـــــ
الحنة والدخان أنا بتفق فيهم مع مريم بت الحسين تماماً
رغم إني ما بحب الدخان لأسباب كتيرة جداً وبفضل عليهو الحنة
لما كنت متزوجة ما كانوا برنامج ثابت يومي أو حتى أسبوعي
وحتى لو عايزة أبقيهم كدا حيجي على حساب حاجات تانية أهم وأولى



غايتو المرأة السودانية الله يكون في عونها
أحسن تبقى توم بوي زينا كدا وتقعد بس للشناف

عارفه يا تايسه بتي انا ولدوني محمد ولد
نهائي ما بعرف حاجات النسوان ولا بشبهن
لاحنه لا دخان لا منكير ولا خبيز لا غيرو
لاني بالجد زوله كسلانه
شاي ما بشربوا عشان ما اتعب روحي بعمله
لو علي الاكل دا يشتروه كبسولات من الصيدليه ,

Quote: ملايات الستان ديل يا اخي عواليق شديد واكثر من بلدي بتزلقواوالخرز بطعن

I couldn't agree more.

يا هو دا بسكويتي..كان حرستكم واطاتي صبحت ههههههههه

Quote: بسكويتك رهيب يارشوية مرا والنسوان ورا

مافي زول يفتش الكوت دا..

اتفضلوا... اول خبيز اعمله ههههههههه... كل سنة وانتو طيبين... ودايما تامين ولامين






سنو، عرفته غلطتي في البصمة... خليني اسلّم تقرير المشرف ده، وحأعملها تاني اكيد

كل سنه وانتو طيبات يا حبيبات,,
عيدكم سعيد ودعواتكم مجابه وأمنياتكم محققه انشاء الله,,





---
سمارت وماما دوما عقد أخوي :)

كل سنة و انتوا طيبين

اماني ربنا يتم ليه على خير لو لقيتي طريقه صوره الخبيز في الشيالات عشان نشوف اخر تقليعات التقديم في السودان


رشا سالم بسمكويتك المشخل شكله جميل جدا

بنات

انا ما نسيت موضوع البسوت بتاع التجميل و العنايه بالبشره بس قلت لمن البنات يفضوا من زحمة العيد, بكره او بعد بكره انشاء الله يلا حضروا الكراس و القلم

سلام يا سيدات...

لقيت لي وصفة قلت اشاركم بيها... لانها حلوه وساهله شديد.. للأسف جاتني متأخره... هي وصفة بتاعت اسامة السيّد... شفتها في التلفزيون الليلة، نبهتني ليها ماماتي حبيبتي...

سهولتها انه ما ضروري يكون عندك الآلة بتاعت البيتي فور، ممكن بي كيس الحلواني تعمليها...

المقادير
كوب زبدة لينة 1
كوب سكر 4/3
ملعقة صغيرة فانليا 2/1
بيضة 1
كوب دقيق 2/1 2
ملعقة صغيرة بيكينج باودر 2/1
ملعقة صغيرة كاكاو لتلوين العجين 1

الطريقة
-تُخفق الزبدة جيداً حتى يبيض لونها، ثم يضاف السكر والبيضة والفانليا ويخفق الخليط جيداً.
-يُخلط الدقيق والبيكنج باودر، ثم يضاف تدريجيا إلى خليط الزبد حتى تتجانس جميع المواد وتشكل على هيئة كرة وتترك لترتاح قليلا في الثلاجة.
- يقسم العجين إلى جزئين، يعجن جزء ببودرة الكاكاو ويترك الآخر كما هو.
-يُمد كل جزء من العجين على شكل اسطوانة.
- تلصق كل اسطوانة بالأخرى بالضغط الخفيف، وتقطع إلى قطعا صغيرة.
- ترص في صاج مدهون وتخبز في فرن حرارته 325 درجة فهرنهيت لمدة 15 دقيقة.

هو كاتب انه الصاج مدهون، لكن ما اعتقد انه قاصد كده... احسن انه ما يندهن الصينية، والزبده في البتي فور بتخليه ما يتلصّق...