|
|
|
 Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بعد ما نمر قال كلامو .. هنا طه اتكيف كيف شديد من المك نمر ورجالتو كونو يحجا ويبقى بينو وبين الشكرية وهم جاين دايرين تار وددكين وطه كان يعلم أن الشكرية لا يكتفو بأخذ الثأر منه هو فقط بل سوف يتعدون على قبيلته وهذا هو الهاجس الذي كان يعشعش في رأسه ..لذا كان أنبسط شديد لامن اعطاهو نمر الامان
قام طه قال لنمر :
نمرّن يركب الكيك
البطر وتحرّن
نمرّن يقلب العوق
أب صفوفّن جرّن
خلوات صدرو
في علوم الحروب كم قرّن
سيفو بينتف
الدرع الحديد ومقرّن
مو نمر الشدر
حاضن فروعو مقيّل
دا النمر
البضاير الصف محل مايميّل
كل ما أقول شُكر
ألقاقهو فيهو قِليِل
كفْو بيخجل
العينة أم سحابّن نيل
غابة المك قبيلة
ما بتخطى إصولا
العشمان يعيش
في ضلها ومحصولا
فروعها سيوفاً
ومطارق دار جعل في إصولا
عمران جدكّم
والنسبه عباسيّه
وآيات فضلكّم
لي الليلة مي منسيّه
أهي الدنيا
بي فضلكم مكسيّه
نزيلكّم مابِهم
إن سوا ألآف سيئه
في ثابت العرب
في أصلها مأخوذّه
مثبوتّه الرجالّه
وعنكّم مأخوذّه
صغيركّم يدخل
الحارّه أم لبوس ويخودّه
مجرب من قديم
سيفكّم بياخد الخودّه
| |
 
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
هنا المك نمر قال للجعلين
وصلّو طه
للبيت المخصص ليهّو
وأفظوا كل موجودو
وجميع ما ليهّو
خِدمتّك يا حسن
تقعد معا تسليهّو
وكل يوم
نعين ناس إقفروا عليهّو
قام طه قال للمك نمر :
عاشمكّم مؤكد
مابرجع خائب
صغيركّم رايّو عند
الغير يوازن الشائب
شائبكّم مدرّب
رايّو دايمّن صائب
فارسكّم جسورّن
مابدقدق هارب
تمانية أيام قَهَر
عيني جافيه منامّه
ساكن قلبي جيش الهم
محاكرّو وكامّن
دخلتّه عريان وخائف
مرقتّه لابس وآمّن
مات نوم عدوك
الليلّه نوم مطامّن
| |
|
|
|
|
|
|
|
|
 Re: هونوو شوية.... وصلو علي النبي .... إستراحة أيها المحاربون (Re: salma subhi)
|
بسم الله الرحمن الرحيم
سلام ياهلنا...
الشاعرة الحرم عبدالله أبوسن
تمدح ابنها عبدالله إبراهيم أبوسن
الذي كان احد السياسين ذوي الشان
ايام استقلال السودان فقد كان
عبدالله ابوسن قاضيا شرعيا
ونائب رئيس البرلمان الاول..(منقول)
الصافي دهب الخزانه
..........................
الصافي دهب الخزانه
الدولة أم فوت سيد بكانة
بريدو ودشيوخ البطانة
شدو ليه البمغي الرسانة
ومرق الما بدورلو إعانة
يقيم الليل بالديانة
ويحل مفصول الضمانة
مرق ود كرسي الحكومة
وقشاش دموع الظلومة
الضايقة بفرج همومها
والواجبة بيعرف لزومها
بريدو ود شيوخ البطانة
شدو ليهو قارحو المقلد
نهم تيلادو المولد
نسف الكيس لينا جرد
وشيشك لي الدمعو برَّد
مرق ود بيت الفضالة
تيتب للهاكعة شاله
عظيم بالحيل ياأب قدارة
متل قريش في الشطارة
مرق ود بيت الدراسة
الطاهر خاتي النجاسة
شدو ليهو أم جراسة
ودخل البرطن نحاسها
مرق أب زينا مكمل
لو مسفوه لو مهمل
درعوا البي الجوخ منمر
ولبسو البي الخوخ مسمر
قاضي أوكاته وفروضه
مرق السابلات عروضه
......................
ونواصل
.
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: ماجدة عوض خوجلى)
|
Quote: الأستاذ خالد
عساك بألف خير...........وابننا بألف ألف خير
ذكرتنا بأيام الحبوبة وجدو ونصايحم....ودايماً كانوا بيقولوا لينا الماعندوا كبير
يشوف ليه كبير |
العزيزة سلمى حسن
سلام عليك وغلك طيبة وعافية
يا أحلى صبحية ( اي من عيلة عباس صبحي )
بتمرق مغرب
عين في الأرض
ويد تتناول من خالاتها
الضيق رواب
يا خلوة بتعزم
وتعزم باشة
مسرورين كتير والله بمروك ... وإن شاء الله أنجمتي من مغص البنيات البشاغلن فيالوليدات والحسرة الكاتمة قلبك من فعايلهنّ .. البوست دا عملنا لكل مغبون أجي أفرق شوية من افرازات اغدد البتسوي الغبائن والسكري والضغط
لك التحية وزي ماقلتي الماعندو كبير اسوي لو كبير
خالد محجوب
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
اها بعد داك قامو ساقو طه وبنية عمو ريا للبيت المخصص ليهم
المك نمر فضل مع بقية الجلعين... قام سأل واحد من الجعلين أسمو النصيح وهو زول نصيحة كان من مستشاري المك ودايمّن بقدم له النصُح
قام نمر قال لي :
مالك يا النصيح
متل التقول في محنّه
قول أنعشنّا
وبالصوت الجهور أفرحنّا
أبدا بالنصائح
وأخير أنصحنّا
وأختم بالحماس
وبالفينّا قول لي نحن
قام النصيح قال لي :
خلّي عجب النفس
الدنيا قيدّها قِصير
وبِشرك أطرحّو
لا تكون دوام متغير
لا يغرّك هواء الله
الضحى المديّر
كم سبق الأجل
خلا الأمل متحيّر
الروح علي اي حال
يأتيها نصيبه
أرضى بي الإتردفّت
تنصيبّه
وان لم ترضى
قد زدت المصيبة مصيبه
الليك أن قاطعّك
ان كنتَ فاضل واصل
وأعفي عن من أساء
وأجعل برّك وافر
كل مايزيد بطر
يزداد حُلمك وافل
بذلك تَكْفى شرّو
من غير درق ونوافل
ما تعاند القدر
وآت لي متألم
وصدرك بيتو فاضي
ولله أمرك سلم
ان عاقّك مِعيق
أو استرحمّك متظلم
أرجا جزاك
في يوم يُنصر المتظلم
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
قام المك نمر قال لي :
نحن من بيت مُلك وديانه
تواريخ السلف هاديانّه
نحن نفُسنّا ما معاديانّا
ترتع ديمه في وديانّه
قام النصيح قال لي في الحماسة :
نحن الما إنجمع
لفارقّه كوم لِمْتنّا
تعلُو علي مفاليد
السمات همتنّا
نحن الفي العرب
ما بتنغفر ّزِمتنّا
تيجان الملوك
تعمل حساب عِمتنّا
أهي الدنيا ذاتّه
أدوها عنا أمانّه
من وكت الصِغر
لا وكت هرمانّه
بي مر الدهور
ثم العصور وزمانّه
لو كان بي الوهم
فد يوم سهامها رمانّه
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
اها الناس في قعدتهم دي جا داخل واحد من الجعلين وكان يبدو عليه الخُلعة من هول ماجرى
قام الجعلي خاطب المك نمر قائل :
يا مك الشكرية
زاحفّه الليلة جات بي عقابّه
ختت في النصَاب
ولي كتالّنا مادّه رُقابّه
لقيت يا مك
جُمال سارحّه وخربو الغابه
وإندكّه الزرع
لا قصبه لا رُقابّه
قام المك نمر قال لي :
وإت ..مهود وين
فارقتّه عقلّك سَرّب
قام الجعلي قال لي ::
أنا ود الحروب
البي سيوفها مجرّق
أديني الإذن
يامك وسيفي مطرّق
أعصر كيكي
فوق كوش العريب إتفرّق
قام المك نمر قال لي :
الخيران كُتار
وما أطنهم وثابّه
وبي كُتال دار جعل
ما بفرحوا التسابّه
مآهم ناس كُتال
الناس معانّأ نسابه
والبيناتنّا
لابد أحسبو لا حسابّه
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ياهلنا...
.
ونواصل مع الحرم عبدالله أبوسن
في إبنها عبدالله إبراهيم أبوسن .
قاضي أوكاته وفروضه
مرق السابلات عروضه
عوق الآلاف بقودو
وحرسه وصنعة جدودو
عبد اللاه يبلغ قصودو
ومتل حاتم يحكو جودو
عبد اللاه دقر الحرايق
ونافي العيب والنقايق
بالأغراب ما هو عايق
كريم أخلاق ديمة فائق
بريدو ودشيوخ البطانة
دارس سايس الطرايق
وفارس جاب الحقايق
وراسي وفي جلوسو رايق
وبحل المسجون وضايق
شدو ليه القارح جوادو
ووافر للعامة زادو
.........................
ونواصل
.
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
بسم الله الرحمن الرحيم
سلام ياهلنا...
ونواصل مع
الشاعرة... الحرم عبدالله أبوسن
في مدح ابنها
عبدالله إبراهيم أبوسن...
دارس سايس الطرايق
وفارس جاب الحقايق
وراسي وفي جلوسو رايق
وبحل المسجون وضايق
شدو ليه القارح جوادو
ووافر للعامة زادو
عبد اللاه يبلغ مراده
علي الهايكوت ظعنو قادو
عبد اللاه الفرسان صميمن
يشلع عيقان زحيمن
جدو البيهات عظيمن
ملك ذاوات مو نديمن
شدو قارحو أب فراية
وسل أب جدلة وسقاية
عبدالله كاب الولاية
جليس ستات السراية
فروخوا نفضت بديدو
وتسمع كورو وجضيضو
قود العوق يا عقيدو
النصر والفوز إنت سيدو
شدو ليهو الصر كوروا
ونقرو نحاسو وطبولو
عوق الآلاف يجولو
وثقاة الناس بشهدولوا
بريدو ود شيوخ البطانة
شدو ليه البنسف سبيبو
ومرق الما بعيق قريبو
أمين الجار يا حسيبو
جليس للبارعين وضيعو
.........................
ونواصل
.
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
بسم الله الرحمن الرحيم
سلام ياهلنا...
ونواصل مع الصافي دهب الخزنه
والسيده الحرم عبدالله
تمدح ابنها عبدالله ابؤسن...
شدو ليه البنسف سبيبو
ومرق الما بعيق قريبو
أمين الجار يا حسيبو
جليس للبارعين وضيعو
غلق زاد مو مخاده
ومرق الخاتي البلاده
النصر والفال هيلو عاده
وبجبد ناس في الشهادة
غلق زائد مسدر
مرق اللي الروح بودر
ركب حافلو المبدر
جدو بضاري وبحدر
بريدو ود شيوخ البطانة
غلق نيل التسابه
وقائد راس الحرابة
قاطع عاقة القرابة
بكان الموت ما بهابه
بريدو ود شيوخ البطانة
يوم القيلة بنعاين
بالطاقات ما هو باين
تقيل موزون بالقباين
سد أم دور بالعساين
ومنع القش بالبطاين
.....................
ونواصل
.
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
الغالي ود المنسي...
سلامات...
إستراحة بلادي أنا...
الشاعر إسماعيل حسن...
بلدي بلد ناسا مواريثم
في أول شي ..كتاب الله
وحصان مسروج، وسيف مسنون حداه درع
كتاتيبم تسرج الليل مع الحيران
وشيخا في الخلاوي ورع
وكم نخلات تهبهب في جروفا الساق
وبقرة حلوبة تتضرّع وليها ضرع
بلدي أنا
تشيل الناس ، كل الناس وساع بي حيلا وليلا يسع
وتتدفق مياه النيل على الوديان
بياض الفضة في وهج الهجير بيشع
بلدي سهول ، بلدي حقول بلدي الجنة للعاشوها
ولي البرّة بيها سمع
بلدي بلد ناساً تكرم الضيف
وحتى الطير يجيها جعان ومن أطراف تكيها شبع
بلدي بلد الصفقة والطنبور وجاراتن تنق بالليل
وبنوتن تحاكي الخيل
يشابن زي جدي الريل
بلدي أمان ، بلدي حنان وناسا حُنان
يكفكفوا دمعة المفجوع
ويبدّوا الغير على زاتم
يقسموا اللقمة بيناتم
ويدّوا الزاد حتن كان مصيرم جوع
يحبّوا الجار
يموتوا عشان حقوق الجار
يضوقوا النار عشان فد دمعة
وكيف الحال لو شافوها سايلة دموع!
ديل أهلي .. واللــــــــــه ديل أهلي
البقيف في الدار في نص الدار
وأقول لي الدنيا. كل الدنيا ديل أهلي
عرب ممزوجة بي دم الزنوج الحارّة
ديل أهلي .. ديل قبيلتي لمّن أدور أفصل للبدور فصلي
ديل فصلي
أقول بعضي
ألاقيهم تسرّبوا في مسارب الروح
بقوا كولي
ألاقي قلبي والإحساس
وسافر في بحار شوقم زمــــان عقلي
أنا محل قبّلت ألقاهم معاي ، معاي زي ضليّ
أنا لو ما جيت من زي ديل كان وا أسافاي ، وا مأساتي وا زّلي
تصوّر كيف يكون الحال لو ما كنت سودان...
وأهل الحارّة ما أهلي تصوّر...
كميات مودتي...
أبو الحســـــــــين...
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
Quote: ونواصل مع الصافي دهب الخزنه
والسيده الحرم عبدالله
تمدح ابنها عبدالله ابؤسن... |
حاتم هاشم زيد ونم ربي يطول في ايامك يا غالي
دايرين نلمهم شكرية وبطاحين وشايقة ومحس وجعلين وبرنو ومساليت وبجة وبني عامر وفور وبقارة وابالّه ودينكا وشلك وحلفاويون ودناقلا ورباطاب وجمموعية وعبدلاب وحسانة وتماراب وجعليين وزانده وبرقو وحلنقى وفلاته ووالد ريف أبونا النيل والجنس سوداني
غرد يا عندليب وغني يا كنار واشدو يا قمري
لك التحية
خالد
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
ها هنا جو الشكرية داخلين علي المك نمر وهو جالس مع كبار الجعلين في ديوانو ... ارسلهم محمد وددكين نسيب المك نمر ابو زوجته شما .. بعد ما عرف ان طه لجا للمك في شان يحمي
كبير الشكرية قال للمك نمر :
سلام يا مك دار جعل
يا مك أنحنا رِزينّا
بي موت وددكين
كل القبيلة حزينّه
مُحمد بقول لك
بي نسبّك إتعزينّا
رسل لينا طه
قُبال تجي تعزينّا
قام المك نمر قال لي
حمد قبيل
يوم دار طه جاهو براهّو
ما دقّ الطبول
وقبيلتو جات تبراهّو
السوّاها طه
أكبر علي محراهّو
الراجل خاف جرى
تجري القبيلة وراهّو
بعيش كاتل حمد
في القول ماهو براهو
بس خانّو القدر
وأجلّو وافاهّو
الراي السديد
شيخ العرب يعفاهّو
والزي وددكين
دم طه مايفاهّو
المك طبعا حبا يواسي الموضوع ويرضي الشكرية
قام سأل كبير المبعوثين من الشكرية وقال لي :
مالك يا كبير العرب
لراسك حاني
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
قام كبير الشكرية قال للمك نمر :
الراجل حار عليك ؟
كاتل نسيبك وات حاني
الظنيناها فيك
كان تكتُل اسم بطحاني
( اي تلم في البطاحين ديل تعدمن نفاخ النار )
قام المك نمر قال لي :
الظالم...
إن كان حِملتّه أذاهّو
حقّك تآخدو تام
وكتين تقيف في حزاهّو
والبعفى المسيح
عندالله بلقى جزاهّو
قام كبير الشكرية قال لي :
محال محال نرجع
من طه دون كتلّو
نرجع نمشي وين
لقبيلتو ؟؟؟
كتالّنا ما بتثبتلّو
قام المك نمر قال لي :
طه نزيلّنا
والمك جارو
وأصبح في أمان
الما بهمل جارو
شن جاكم جديد
كنتو الفضل تُجارو
ما تعفو طه
في دربو ليه تجارو
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ياهلنا...
ونواصل مع الحرم عبدالله
وابنها عبدالله ابوسن
والصافي دهب الخزنه
سد أم دور بالعساين
ومنع القش بالبطاين
شدو ليه البعجب رسيسن
وقود الخيل يا عريسن
بنات الطيب إت جليسن
والتاج والنيشان وريثن
حفلن ولبسن لبوسن
وجنو سايقات عروسن
دوام مبسوط من خصوصن
أديب ما بواخد جلوسن
حتلن جلبن طقومن
وجنوا طالبات لزومن
دوام مبسوط من همومن
قدر ما يقولن فهومن
شدو ليهو الكورو صر
مو مسفوه مو مخلي
بدر في الحافلة سلة
والمسجون ليه حل
.................
ونواصل
.
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: فيصل محمد خليل)
|
Quote: Dear Ustaz Khalid and Ustaz AbuElhussain
Salam
One of you need to control the audio file
by changing the first "True" in the code
to " False" in order to listen to one audio file at a time
thanks |
دكتور ياسين
سلام كتير
بدءً الشكر الجزيل علي مرورك الجميل ومعك الجراب مليان
وثانياً يا أخوي أنا بعد عفار شديد قدرته نزلت الاغنية كمان بدور من اعمل جينج لترو أو فولص ها زول ها دي تب ما بقدر عليها خلي الجنى ابوالحسين اسوي الداهي دي باقي هو نجيض في الشغلانة دي
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
قصة منقولة من الرائع ابوالحسين ربنا يحفظو من كل بلى
إخوتي وأحبابي...
أهديكم بعد الغيبة الطويلة دي... قصة أخرى لصديقي اللدون الكاتب عبد العظيم الطاهر... من الله خلقني مكجِّن السفر بالعربيي!!!
من الله خلقني
من الله خلقني مكجِّن السفر بالعربيِّي ومكجِّن يومو ... إن بقيت ساااكت عِطِش تسوِّي النّاس في غلبة نامن يناولك الموية ... وإن بقيت خرمان دار تكرضم لك سفّه تشيل الهم لى مروقها .. وإن بقيت داير تنسيَّير عِلاّ يوقفوا لك العربيِّي وتزح من عيون النّاس لا غادي نامن نفسك ينقطع من المشي ... وده كلللو هيِّن ...النصيبة والهجِيمِي الكبيري إن بقيت دار تمرق لك هبوب وإنت مَشَكَّن وسط الخلق في العربيِّي .. تقعد تودِّي وتجيب .. وتبدأ وترايِي ..ياااربي أسويها ..؟ ولا لع ..؟ ياربي إن بقيت مرقتها بيعرفوني .. ؟ أهـا إن بقيت مرقتها .. إن مسك نخرتك براك كدي يااهن العرفوك .. وإن بقيت بلعت السيف متني وما إنزحزحت من مكانك .. تَشَكِكْ النّاس في بعضُن .. وينبادلوا الإتهامات بى عيونُن ..وإن بقى الزول القاعد جنبك ده , إتلفت وإبتسم لك سـااكت بى حسن نيّه تقول خلاس أنا إنكشَف ..فِشان كدي أنا مكجِّن سفر العربيات ده ..
أها ... جات الإجازي اللّتنا ..مشيت بِعت العربيِّي اللّتي القدِيمي وأخدت لِي ويحدتن جدِيدِي ماااهلِي كدي وسميحه .. جيباً سميييح كدي ...المرأة اللّتي قالت لي المرة دي نسافر بى عربيتنا للسودان ...تنفعنا هناك نحوم بها هِنِي وهِنِي بدل كل مرة نجري نكوس في الامجاد والركشات ...انا الفكرة وقعت لِي .. لكين هِي أتاريها فوق فهم ... على حِس العربيِّي الجديدي بقت تشيل وتردم لي في العفش ..وتسوِّي لِي ما دام العربيِّي أصلها ماشي أخير النشيل ده .. وأخير النَّسوِّي ده .. هِي تردُم ..وأنا أستف وأربِّط وأشيل وأعتِّل ..متل المُزَاورِي الفي الميناء ..أصلي ما هزّيت رويسي وقت لها لع ... بس أقول لها سمِح .. سمح .. نامن أكتافي ديل إترخَن لا تِحِت بتل العَرَّاقي المَعَلَّق في الحَبِل ومسكني وجع الفِقَرْ ... من كترت العفش سبت العربيِّي بقى مَتَندَل لا فوق بتل شافع العرب الحالقين لو رويسو بى تِحِت ومخلين باقي الشَّعَر الفوق ... حيلي ضمَّه إنهدَّا وأنا لى الليلي لا سافر ولا إتحركتَ من بكاني ... قُت لها عاد إن ما عجنتي لك دِلكِي وجبدتي لى أكتافي وكرعي ديل ..ياكي الماكي مسافري من هِنِي والعربيَّي أخليها واقفي في بكانها ده ..
إتوكلنا على رب العباد وركبنا الباخرة .. مرقنا بى غادي في سواكن لقينا البلد دي فايري ... جِنِس فَسَخيبة وجِنِس حَر .. تَخَت الكَفَتيره في الشمش وترمي فيها حَب الشاي ... وجِنٍس خلِق ودَفَسيبة اللّت ناس بس يوم القِيامِي .. الراكوبة اللّت القدوم ملاني .. والمظلات البرَّا ملانات .. وواحدين يجوك جارين بى هِنِي وديل يجوك جارين بى هِنِي ..وكل واحد فيهن شايل لو دفتر ويقول لك أدفع لنا كدي , وعليك كدي ..وأمشي الشبَّاك داااك آ بعرفو سَو أشنو ...قُت لهن تعالوا هِنِي .. إنتوا في زول موصيكن عَلَي ..؟ ماسكاكُن علي غبِينِي ..؟ في زول قال لكن أنا زارع لي حيضان اللاّت ريالات في الشرِق بى غادي ..؟ تريِّلُوا فوق صدوركُن .. أزحفوا من قَبَلِي ... قَبَّال يصقعنِي جِن أسع ده أقبِّل صاد بى باخرتي دي محل ما جيت ...دااابنا فتَّاح يا عليم رزاق يا كريم كُرَاعنا لى الليلي ما إتوهطت عديل وإنتوا جايين كابسِنِّي بتل نمل السُكَّر ... القريشات الجيت شايلِن معـاي قلت أقضي بِن إجازتي عليك أمان الله إتماصن بتل الظهرة الفي الطشِت ... كل مرة أمرِقِن أقرُطِ فيهِن .. نامن بقيت أدَّخِل إيدَي في جيوبي بتل البيفتش لو في عَقَاب جُرُم وأمرُقِن فاضات .. كان ما كُت مجكِّن لى شوية دولارات كدي داسَّهِن من الحيكومة اللَّتي كانوا نقروا طاري وشالوا حالي ... يشيل حالُن ... علا بقيت نجييض آ زول ..
ناس الجمارك ... الشنيطات اللاّتنـا بَحَّتُوهِن وشنتلوهِن لينا جنس شنتيلاً, باركين فيهن بى إيديهُن وكرعيهُن بس الجدادي البتبحَت في التَّرى تحت المنقايِّي .. نامن أنا شكَّيت في رقبتي , قُت يا ربي أنا جيت شايل لي معاي مخدرات وأنا ماني عارفها ..؟ من المغصة الصادتني عليهُن قرربت أصنقِر في الواطـا وأقعد أجعُر ... ربطَّنا عفيشنا من أول وجديد ومرقنا رقيباتنا من الميناء .. مرتي قالت لي نمشي نبيت في بورتسودان ونقوم باكر الصباح .. قت لها إنتي مغزلِنِي ...؟
ناس سواكن ما قصروا شي , فرضوا الحوض قبَّال يبقى للحش دايري البعوضة اللَّت بورسودان كمان تدُق النقاقير وتعرض الليلي فوقنا ...؟ أبقي عشرة على الدميمايِّي الجيتي بها دي .. الدَّرِب قدامنا لى اللَّيلي طويل ...
أول نقطة اللَّت تفتيش ونحنا مارقين من الميناء العسكري الواقف في الكُشُك وقفنا ... لى الليلي ما اتفكّينا ...قال لي: الأوراق هَقَك وين ... ؟ أدّيتو الورق ..دخل على كُشكُو وجاني مارق ... قال لي : رسوم الطريق تدينا ... رطنت معاهو قت لو ) نَاكَابْ هَرِّيوَا ..؟ ) يعني داير كم ...؟ قال لي : ( يَهَا .. برُوك بِدَاوييت ..؟) يعني إنت بجاوي ... ؟ قت لو .. لع .. ( شايقيبوا ) يعني انا شايقي إستغرب وعاين لي كدي وعاين لى مرتي وولادي .. عويناتو يقولِن ماهو مصدق ..قال لي : ( كرتوم إيبا تِنْدِيَا ..؟) يعني إنت ماشي الخرتوم ..؟ قت لو انا ماشي عطبره ... قال لي : ( تَامُنْ قال هَيمَا ) جيب حِداشر ألف ... قُت لو بركة البقن حداشر , أدَّيتو ياهِن ... كُت قايل رُطانتي بتسوي لها شي ... عِلِّي ما نفعت ...
مشينا بى عقاب يومنا داك ووقفنا في سنكات قلنا نشرب لنا شاي يا جبنة تنعوشنا شويِّي ... والطراوه الصاااقطِي اللَّت سنكات ديك ضربتنا بعَد الفسخيبة اللت سواكن الهرتنا ديك ... كان مو العفش المردوم معانا دا كنا بيّتنا قبلنا ... شفع العرب جوا إتكبسوا فوقنا الشايل لو مساويك والشايل لو فنادِك والشايل لو بسكويت .. واله يا أخوانا يحنِّنُوا الزول ... من شِدَّة ماهُن ضُعَاف ومَسُوَلِلين الواحد فيهن بتل العنقريب البلا بِرِش ... عِضيماتن ظاهراات يا حِليلُن ... جاني راجلاً عِجَيِّيز ضهيرو محني , وقف قَبَلَي وقال لي :- يَهَا ... ( إندَك مَأَجون ) عندك معجون ..؟ معجون الليل أسنان يعني ..عاينت لو كدي لقيت خشمُو جاما .. معلم الله من إسم السنينايِّي الواقفي .. بتل المحفضة اللّت حبوبتي الله يرحمها ..قَدُر ما قت لو تسوي بو شنو ..؟ أبى ما يحدسني ... في الآخر عرفت إنو يمشي يبيعو ويشيل قريشاتو ..غمَتَّ لو شي حِتَّن زَحَّ من قبلي ..
واصلنا رحلتنا نامن قلنا سلام يا درديب ... وإن بقيتوا دار تشوفوا الجدب والمحل البى الصِّح ..والنّاس المهمشين بالصح .. والمافي زول جايب خبرُن أها ياهن ديل من دريب وإنت ماشي لا كسلا ... صُوَرُن وهيئتهم تبقى مبارياك وما تمرق من عيونك نامن تقضي إجازتك وتجي صاد ... والله الموية البى نجلبغ فيها دي ماهن لاقينها .. وإن بقوا لقوها ..أها بس القطرة اللَّت العيون .. والطعميَّة الهيني دي .. يبقى لي إن لمُوا فيها الواحد فيهن يشيلها يشمِّها ويجكِّنَها تاني في جرابو متل فتيل الرِّيحِي ..يعني أفقر زول عايش في جوبا ولا ملكال بالنسبة ليهن زي واحداً من أولاد العمارات في الخرتوم ( عشان ما تقولوا لي بااالغت ) أكلُن وشرابن ياهو الجّبنة ... يعني الواحد منهن إن بقى عِرِق سااكت تشم ريحة عَرَقُو دي جبنة جبنة ..باقي لي إن مشي ينسيَّير يمرقو نِسكَافي صُرُف ...قَطِع شَك ... والجبنة الكتيري تصدم الزول من الأكل ... أسعلوني انا ... فشان كدي قللت منها ... بقيت أشربها يوم الجمعة بس وبعد الغَدِي ... (جيتي من الحج الفات دا ... مِي دَقيت الدَّلَجِي وكُت جاي ألحق الصِّح ...) أكَركِع في الجّبنة بالكُبَّايِّي أحَمَتنِي الأكل ضُمَّه0
نزلنا في درديب , العساكر قالوا لنا تبيتوا هِنِي , بالليل ده مافي سفر فشان الرَبَّاطِين بيلمُّوا فيكن يخلوا ريحتكُن طير طير ... أجَّرت لي عنيقريبات في أويضة كدي وإتكَمَدنا فيها انا ومرتي ووليداتي وعِنِيقريباتن بس الإسم عنيقريبات إن جيت دار تمد كرعيك يندَلدلِن من العنقريب في الواطا بتل الراكب لك دِحيشي من شِدَّة ماهِن قِصويرات وسُغَار ... صلينا المغرب والعِشِي ... الوليدات قالوا جعانين داي يتعشوا ... شِلت الهَم وأنا ماني جايب لي زوادة معاي ... قُت لهن يلاَّكُن ..مرقنا لقينا لنا مطيعِم كدي خَات لو طريبيزات برَّا ومَسَوِّي لو كَنَب الليل خَشَب قاطعات إسم الفوطة ولا المَشَمَّع المفرش فوقن ..إن قعدت فوقن بتل القاعد لك فوق ضِريسِي ... وإن جيت داي تقوم تنسرِح لك سَرِيحِي فوق صلبك تخليك تفنجط بتل الحمار الفوق ضهرو دَبَرَه ...علاَّ مشيت جبت المصلاية اللّتي فرشتها فوق الكنبة للوليدات ... ومشيت أطلب لهن العشِي ... أها عندك أشنو ..؟ قال لي عندنا فول وعدس ..قُت لو ما عندكُن لحيمايات مطقطقات كدي ولا جَنى جِداد ..؟ قال لي :- لَهَم ...؟ ( لَحَم ) لهم كان لِقِينا برانا ناكُل ... يعني اللَّحم إن لقوهوا ماهن جاي يبيعوهو شي ... ياكلوهو لى رَقَبتُن ... قت لو طيٍّب ... أدَّنا فول وعدس ... عامِنُّو العدس قاع يسوي لي الحيرقان والفول زااتـو عِلاَّ أشرب لي وراهو أندروس يا عطرون ... وفي النهاية أنا هيِّن الحديث في البطان الكَارَّهُن معاي ديل ... جبتو خَتيتوا قِدَامُن .. عاينوا لو وصَرصَرُوا وِشيَّاتُن ... عِرِفتَهُن ياااهن البايتين القوى ... بى فَدْ نَفَس .. قالوا لي : ده شنو يا أبوي ياخ ... ؟ قت لهن هوي ... هِنِي لا في ماكدونالد ولا في كنتاكي ... ده ياهو كنتاكي اللّيلُن يا تاكلوهو يا تخلوهو ...الكُبار غايتو خَتَّروا شويِّي مع أمّهُن لكين السُّغَار يعاينوا للصَّحَن تقول جِب لهُن فوقو قَعُويِّي ...علا طلبتلُن شاي بى لَبَن قَرَضوا معاهو الرَّغيف..
مشينا للنُّوم ...خليتُن هُن جوَّا وانا مَرَق عنيقريبي برّا جنب العربيِّي فشان أحرس العفش ... غلبني النوم ضُمَّة شايل اللَّيل نامن الواطا أصبحت ... البلد دي صِنِّي قاطعي إسم الحركة .. بلا صوت الجِّندِب والكلاب مرة مرة ياخدن لهن نبيحة آب تسمع شي ... والواطـا من شِدَّة ماهـا ضُلُمَّة كُبُس باقي لِي إن بقيت داي تَتْبِن رأسك عِلاَّ تولع لك بَطَّاريِّي , ليلي داك كلو انا موهدِب ..أرقد على ضهري أسمع حِس نَفَسِي بى وراي اقول بس في واحداً جاي يبعج لى بطني بى سكين ويشيل العفيش اللِّليل دا ... والبلد صِنِّي .. إتكفي على صَفِحتي اليمين يتخَيَّل لي في حِس نِعلين ماشات عَلَي .. أقوم أصنقِر إتلفَّت جاي وجاي وتاني أرقد ... زولاً يَشخُر جنبي ساكت فشان يطَمنِّي ماهو في ... حَسّيت من الصباح عيوني ديل حُمّمممر بتل زول المَرِيسي غالبني أفتِّحِن ... ما فَضل لي علا أرفع جُفُوني بى أصابعَي لا فوق فشان أفَتِّح .. صلاة الصبح صلّيتها يا الله يا الله .. لا أسّع ماني عارف نفسي صليتِن إتنين ولا تلاتي ..
ــــــــــــــــــــــــــــ
وتعظيم سلام الأخ عبد العظيم ولك ولكل الإخوة القراء البيمروا من هنا كميات مودتي...
أبو الحســـــــــين...
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصل مع الشكرية والبطاحين
قام كبير الشكرية قال للمك نمر :
في زولنا الكِتل
هانت مسافتو وقربّت
والكاتل كان بِخلّو
طه ما كان كربّت
غير نطلب إذن
زاملتنّا كانت شِربّت
كان دي الحالة
بدري الدنيا كانت خِربّت
أها هنا طه جا داخل لما سمع الحديث إحتدم بين المك والشكرية
وقال للمك نمر :
يا مك فِداك وديني
ما تتكتلوا ...
سلمني النسيب فوق ديني
لوطني الخراب
بي سببي مابرضيني
حقين دم العرب
بي دمي غرة عيني
قام نمر قال لي :
ماتحسب حساب
وكتين بقيت في أماني
وتسليمّك محال
في الدنيا حي عماني
الجن والإنس
إن كان تجي مِدهماني
دونّك دمي واقف
ودم قِيماني
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
قام اتلفت المك نمر علي الشكرية وقال ليهم :
ها ناس
بيناتنا النسب
كان جيتو بي الوديّه
في دم الكتيل
راضين نخت الديّه
وكان قتو لا
ودرتّو الكلام إديّه
بندق التور ضُحى
ونجرب الذندية
( الذندية هي الرجالة والقوة )
في واحد من الشكرية إتغاظ شديد من كلام المك نمر وشاف أن نمر وضعهم بين امرين اما يعفو وهو يدفع الدية واما كان بدوروا يمسو طه بي اذي هو حامي ودنو دمو ودم الجعليين
وقام الشكري قال لي
دا الشين البخلي
الزول إعضي إيديهو
المك إن خِتا
منو البقوم إهديهّو
كاتل وددكين
لا تكتلّو لا تديهّو
الشر أقصرو
الزول أخير عديهّو
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
كلمة الشر أقصرو دي زعلت مك دار جعل بالحيل وقلبته 180 درجة بعد ما كان بترجى فيهم
قال ليهم :
بعد الحد
عُقب بيناتنا حد السيف
ان ختيتوا ديّه إتّو
أنا منكم ما بقيف
راعيكم جديد
ما بعدل العِليف
عتبات الصُراط
أهون لو من القيف
جيتو تهدّدونا
الرسلوكُم شِربّوا
بكرة الديش بِجيكم
أثبتّوا أحملوا حربّو
شاردكّم مابخلي
بلحق عقابكُم أخربّو
والنازلّه البحر
عِدوها بس معقورة
قام واحد من الشكرية قال لي :
الشكرية ذاتّها
قبيلة مي محقُوره
وإن دورتوها
ياما تلاقّوا
فيها صقورّه
قُبال يثبت الفارس
إختفوا القورّه
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
قام المك نمر قال للشكرية
بقيتو رجال
وتغيروا وتصلوا لاعند وكري
يا قراضة القبائل
النص جمعكم مكرّي
قولوا للرسلوكّم
ما يجيني عُقبال شكري
البناتنا خِربت
وأرجوا عاد عوس شكري
الشكري قام قال للمك نمر
قبيل حامدين فعايلك
وبي نشراح جاينّك
ليه بتهنّا يا مك
صغرين منك
وكت أبعدتنا
وبقي طه لِيكَ ومنك
إن زليتنّا
وإن جليتنّا ما ناطينّك
ما فينا الأضينة
ومنا أقلّه كُتار
بنصلا الحارة
ونوجب البتار
صغيرنا إن جال
يعجبّك للصفوف بحتار
كبيرنا يفرتّك الحافلّه
ويجيب التار
ديل جيل
ما بخاف صياح الساقية
والحارس السرح
لابد تكورك راويه
سِمعناها عاد
والفارقه ماها ملاقيّه
عرفناها المِعاد
بنرجع وتبقى الباقية
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
اها قام المك نمر قال للشكرية:
هوي يا عرب
أحسن تراعّوا آدابكم
وواسوهو الكلام
قُبال أواسي رُقابكم
ماعندي الإضينة
الأصلو معدود دابكم
فد جعلي إن ركب
حالاً بخربو عقابكم
فلاحة العربي
إجلس فرقو وإجلب كلبو
أو يربط درب
وأجا الإضينة يسلبّو
الهيلكم حقيقة
وفيها مابتنغلبو
فالحين في القنيص
ترعوا وتعرفوا تحلبّو
رجالة وكرم
ديل بيهن إتخصينا
وكت الكوع إحر
نحجا العروض ونصينّه
حت شامخ الجُبال
ان درنا مابعاصينّا
سيوفكم في الحرب
بنكسرن بي عصينّا
كفاكم استريحو
من الكلام دا قضينّا
والدرتوها أنتو
نحن بيها رِضينّا
قُبال تمدّو
تلقوا نحن حبينّا
والحكم الحُسام
والسيف إكون قاضينّا
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ياهلنا...
معليش ياهلنا طولنا منكم شويه
نهايه قصيده الشاعره...الحرم عبدالله ابؤسن
في وصف ابنها عبدالله ابراهيم ابؤسن.
شدو ليهو الكورو صر
مو مسفوه مو مخلي
بدر في الحافلة سلة
والمسجون ليه حل
الفروخ بارياهوا بره
وحنوا ولاقو المسرة
بريدو ود شيوخ البطانة
شدو قارحو البلاوي
وشويم لي بيتو ناوي
عظيم ود عمد المقاوي
وقدر ما أقول يهو ساوي
الصافي دهب الخزانة
الدولة أم فوت سيد بكانة
بريدو .. ود شيوخ البطانة.
............................
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
Quote: بسم الله الرحمن الرحيم
سلام ياهلنا...
معليش ياهلنا طولنا منكم شويه
نهايه قصيده الشاعره...الحرم عبدالله ابؤسن
في وصف ابنها عبدالله ابراهيم ابؤسن. |
حاتم وليد هاشم سلام وينك يا المبروك والله الليلي كنت ناوي أنشد خبرك .. وبغادي في حوش الشايقية ابوالحسين قالب عليك ا ويفتش فيك ...
متعك ربي بالصحة والعافية وما تطول غيبتك يا ابن شندي من جيهة الوالدة
خالد
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: محمد المرتضى حامد)
|
Quote: خالد وحاتم..
مناغمتكم لي بعض بالحيل عجبتني.
يا خالد .. الله يخدِّر ضُراعك ،
قول آمين. |
الفاضل الكريم / محمد المرتضى حامد
السلام عليك ورحمة الله تنزل عليك بإذنه
إنبسطنا إنبساطه فايته علي القوانين بقدومك .. الدار بيكَ عامرة يا المآصل متل أسمك
محمد... نور الهدى شفيعنا في الحشُر ليلة عرقنا يخُر .. التابعو للخُتر ..والخالفو من حالو كُر
مرتضي .. المرضي عليه بإذنه سبحان وتعالى .. الكاسب رضى والديه
حامد .. الحامد وشاكر
تحياتي لك يا الكريم ... وتحياتي لابناء مولانا القاضي الصادق سليمان( ايمن واشرف وامجد ) هم زملائي في دولة المجر
ولك الاحترام والتقدير
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
بسم الله الرحمن الرحيم
سلام ياهلنا...
أنا أخو البت اللكعت
.......................
للرائع... ود بادي
........................
أنا أخو البت اللكعت
قرن الخمرة النازة
على وردان الصبوة الراكزة
الجنيات الهازة صدورن
لازة ورقّ النص
زي خيت الشلة
بالحيل آ جني إيه والله
الجنيات الحزمو الجبة
وعرق الشتوي
عليهم نايا و صب
قول ما دل رجالا
حصدوا الحبة
عيشهن هادو
انكال واتعبّ
ومنو كتير
في الواطا انكبّ
وباقي مصوبر
واقف قبة
الحمد آلاف
الشكر آلاف
الحمد آلاف
الشكر آلاف
العيش الرقد
أصناف أصناف
الولد الكال
عزام حلاف ضياف
الرزق الجانا مدلة
الحلق الجاف اتبلة
بالحيل آ جني إيه والله
........................
ونواصل
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
بسم الله الرحمن الرحيم
سلام ياهلنا...
نوصل مع ودبادي
أنا أخو البت اللكعت
......................
الوادي الجانا مترقن
مدّ جناحو الطايل
شرقا وغربا
القبلي بروقو
على القلعات يضّربن
الدكن البعدن قربن
فوق صنقور المحلة
الطالت كبن
قول للمحلة
بيوتك خربن
قول ما دلة
الحلف الجاف اتبلّ
بالحيل آ جني إيه والله
....................
ونواصل
.
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
نواصل مع الشكرية والبطاحين
المك نمر والشكرية ختُوها قرض وخربت البيناتم وبقى ما مفر من الحرب واقعه واقعه .. زوجة المك شما هي المسكينة الكان وضعها بين نارين الميت هو عمها وكاتلو حاجي زوجها المك نمر وكانت خايفه من وقوع الحرب فهي خاسرة في الحالتين إذا انتصر الجعليين فقدت ابوها واهلها وإذا بقت التانية فقدت زوجها وأولادها
وكانت بتبكي علي عمها ومنحت فيهو زين
وقالت :
غرارّه العبوس
الليله دار دولابها
ياخريف البطانه
ومرتع الجلابّه
بتعقر الركوب
وتنحر الحلابّه
كم قشيت دموع وجعّه
ونصرتّه غلابه
عمي العمى سيل إيديهو
وروا الماحل
تساب بحر المحيط
الما بضمو الساحل
يا حليل وددكين
مونة المُقيم والراحل
سند الهاقعّه
نشال التقيل الواحل
صعيب فقدك علي
وشويا فيكَ بُكاي
يا نقاح الرجال
في الشاشه والباشاي
الشكرية جو أمس
ولِحقوها حاره وباردّه
خلو المك زعل
وحالف أعقر الواردّه
ديل أهل وجعّه
كان عملوا زي مايعملّو
مالو المك
لو فوت كلامّن حِملّو
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
منحّت زين شما وبكت عمها وددكين ... وقامت كوركت لي خادمها ( ليمونة )
وقالت ليها :
يا ليمونة
لي ود النعيسان روحي
ما تجيني من دونو
فاضل لي اخنق روحي
قامت خادم الملكة راحت لود النعيسان في شان تنادي
( ود النعيسان كان راجل داهية من دواهي الجعليين وبعرف يواسي القلوب ويشفيها من الغل والحَنكة وهو الذي يحل الأمور حين تقع المشاكل )
قام جا داخل ود النعيسان علي ملكة دار جعل وقال ليها
سلام يا ملكة دار جعل
سلام يا عماره سلام
أها شما قامت حكت لي الحاصل .. ووعدته أنها سوف تدي جايزه كبيرة كان حل الامر بين نمر والشكرية .. ووعدها ود النعيسان أنو في التبادي بمشي لابوها ويعالج صدرو وأخلي أجي للمك يعتذر لو وبعدها المك بقدر علي وبعالج صدرو .
وهو ماشي كوركت لو شما
يا ود النعيسان شيل التحت الطبق مسحة شارب
فتح ود النعيسان الطبق لقا مليان دهب
وقام قال ليها
ديل شنو
الجهرّن عيني يا مكة
الشي شنو جواهر
ولا عقارب
باقي أنا ما بشوف
الدنيا باقي مغارب
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ياهلنا...
ونواصل مع ود بادي
انا اخو البت اللكعت
.....................
مرحاتنا شرابهن
يوت ماغبن
شبعانات في الشقل
أب شوك ما شبن
الحمل ولدن وربن
حلماتن تقلن جرّن
فوق سيقانن كبن
اللبن العاتم
في ضرعاتن جبّن
المغصة إن كان
ضرعاتن خربن
القرعة آ وليد
السعن آ بنية
القربة كمان
كبوها المية
المغصة إن كان
ضرعاتن خربن
شوفو النعمة السالت
فوق قيزان الرملة
ناس البندر لبن
الشاي بالعملة
......................
ونواصل.
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
بسم الله الرحمن الرحيم
سلام ياهلنا...
ونواصل مع ود بادي
انا اخو البت اللكعت
.......................
سمح الخمج
الفوق أسيادو
سمح العز
المن أجدادو
الجنيات المشو
ما عادو
كان بالردة
أكان اتنادو
غرب حامد
وشرق بلة
كانوا بحلبو
الضرع الدلة
كانوا بحضرو
الخير القدحو معلا
الجنيات ما كفرت
بنعمة الله
بالحيل آ جني
إيه والله
................
ونواصل
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
قال الفحل ود بادي العكودابي
معون الوسكي الأحمر
علب البيرة الصايدر
نحن أدونا الفاض هديه
بنقعد في شمش اللهتلات ايام
بنطهر منو السيئة
بعضاً ينفع دلو نشال
في البير ام تسعة رِجال
وبعضاً كوز معقود
فوق قلّه تنقع وراقده سبيل
للغاشي الماشي ودلا السيل
للولد الراحل ودربو طويل
عموم الناس بتشيل
وكلاب الحر وبنات النيل
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
بسم الله الرحمن الرحيم
سلام ياهلنا...
ونواصل مع ودبادي
انا اخو البت اللكعت
........................
ذات في يوم والغيمة
تهتّف مطرا نقّع
فوق نوار الطلح الفقع
ريحة البرد إن جاتك
عطرا فايت خمر
الفوق أردافا مجضع
شفنا الوادي يقشقش
في دمعات الليل
والتعل الشايل بدا يتفقع
تلب حامد فوق مخلوفة
أب زور واتربع
طلق الرسن أب زمة
وسوّا خبيبا بدّع
هوّد في رقّاب الصي
لا قوه ثلاثة زبيدية
خالفين سيقانن
فوق السنكيت ورقاب
ألبل بيناتن مرخية
محجوبات بالخرز
الفصلو السوميت
كل واحد درقة
وسيف وطبنجية وباقي
جرابن مليان دلميت
الجنيات اتقبلو وضاقو
الحارة وضاقو المرة
.....................
ونواصل
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
خالد وشيخ حاتم
سلام عليكم
والله داركم مابتنفات نحولق فوقا مصبحين ومغربين
وكمان جابت لها لكع قرون خمرة هيفا يغمر ...
زولك ودالنعسان آ خالد أخوى جهرنو عقارب الدهب
الفى الطبق داك ونام ولا خباروا قطع الحركة !؟
ليك على ياخالد أبلغ سلامك لأولاد الصادق سلمان
الناس ديل بعزونى شديد
وسلامنا وتحايانا لى شندى وناس المتمة وعقابنا
فى دار جعل بلا فرز .
ودايماعامرين يارب العالمين.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
بسم الله الرحمن الرحيم
سلام ياهلنا...
| Quote: خالد وشيخ حاتم سلام عليكم |
حبابك الف..ومنوره حوش ابواحمد...
ونواصل مع ود بادي
وانا اخو البت اللكعت
.......................
الجنيات اتقبلو وضاقو
الحارة وضاقو المرة
وكان حجازن صقر الجو
حامد كان عارفين
ضاقوه رجال قبالكن
شوفو أرزاقكم
أخير من ضو
حامد عوج الطندب آ وليدات
عوج الطندب نار
القصب الهبلت ما بتعدلو
شوفو شلوخو تلاتة
مطارق رقدن
وكل تلاتة يمين
سياف اتقبلو
حبوب القارح ما دلة
ولدا ما ختالن زلة
شن قولك فيهو عليك الله
بالحيل آ جني إيه والله
.........................
ونواصل
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
Quote: والتحية لمنصور ورفاقه والريحانة سمية الحسن طلحة وكل من نهج نهجهم
خالد محجوب |
خالد محجوب المنسى منو الغيركم بستحق الشكر ومنو الغيركم : ـ
ومن غير السيوف والدكرى المسموم
نحرقك نار ومن فوقا الحطب مردوم
غير ناس شندى أهلى العندهم مفهوم
منو الحرق البشر قبل القيامة تقوم !؟
وسلام لى خالد عريس البادرن فى الكرة
والسم المعقد ليك صلح ماضرا
ملوك الروم فناهم ومنو ضاقو المرة
بالهارى البقلم والخماسى أب غرة
ولرفاقه الأساوس أبو الحسين وحاتم هاشم
ولكل زوار الدار سلام .
سمية الحسن طلحة
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
Quote: خالد محجوب المنسى منو الغيركم بستحق الشكر ومنو الغيركم : ـ
ومن غير السيوف والدكرى المسموم
نحرقك نار ومن فوقا الحطب مردوم
غير ناس شندى أهلى العندهم مفهوم
منو الحرق البشر قبل القيامة تقوم !؟
وسلام لى خالد عريس البادرن فى الكرة
والسم المعقد ليك صلح ماضرا
ملوك الروم فناهم ومنو ضاقو المرة
بالهارى البقلم والخماسى أب غرة
ولرفاقه الأساوس أبو الحسين وحاتم هاشم
ولكل زوار الدار سلام .
سمية الحسن طلحة |
الريحانة سمية
سلام وعلك عافي دَرت
تسلمي يا الريحانة والعديل مُشهادك
من يومك قِدامية وكان ساعة الدغش ميلادك
وكت شبيتي قمتي سغيره تابعه نسل أجدادك
ما جبته من عندي شي دا القالو عَنْكِ رفاقّك
الفاضله الكريمة بت البيوت العامرة سمية الحسن طلحه ... سررت جد بتلك الأبيات التي سوف أنقشها في دفتر مذكراتي وسوف تظل محفورة في كياني مادمت حيا ولن أنساها لك يا كريمة وبت الكرام
بالمناسبة بلغي كثير تحياتي لابناء الصادق سليمان وبالذات أيمن فهو الصديق كان بعدي بدفعة في الجامعة في دولة المجر
ولك الشكر والاحترام
خالد محجوب
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ياهلنا...
ونواصل مع ودبادي
وانا اخو اللبت اللكعت
...........................
شن قولك فيهو عليك الله
بالحيل آ جني إيه والله
وينا مراتع الدرت الباسط
دايما ببكي عليهن
وين بنوت الحلة البكّر عصرا
بدري يسون في شاهيهن
بعد الليل ما يهّود ونحن نهّود
عاد أماتن ينادن ليهن
نمشي على القيزان نتقادم
أقيس الخطوة مع التاتاي ومشيهن
والله البعد الحاصل ما نساني
وحاتكن في قمراتنا بشوفو وشيهن
الا النضم أب غنة اللهج
السكر وين بلقاهو
بنات الريل الدوب ليهن
الخوف يا ناس كان يبقى الشوق
الحاصل بينا معشعش فيهن
......................
ونواصل
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
قامت شما مكة دار جعل قالت لود النعيسان :
ليك التحت الطبق مطبوق كان بقيت حليت المشكلة بين نمر والشكرية
قام ودالنعيسان قال ليها بدور لي بنية مضمونة توصلني وتساعدني
قامت شما ملكة دار جعل كوركت لي خادمها
يا ليمونة يا ليمونة
تعالي وصلي ود النعيسان
قام ودالنعيسان قال ليها
شن سميتوها دي
ميمونة ولا وليمونة
تفتحو في الشرور
وإن قنا شي تلُمونه
قامت مكة دار جعل قالت لي
شن بدور بها
ما تشيل توصل ليك
قام ودالنعيسان قال ليها
توصل لي خادم الملكة هيل دليكها
قامت ملكة دار جعل قالت لي
دفعتها ليك مع الهدية
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
كلام الرتينه بت سالم وليد عِتمان
في حنة علي الشاشوق
بنيّه ....
بنيّه لي سالم وليد عِتمان
وصلاة الزين سموها الرتينه
أمها بت علي الخمجان
خريف الرازه عِزينّه
كُبار الحلّه اباتّه
بُكار الحلّه أُماته
تمرق زينّه
تبرق زينّه
تمشي تهاتي وزينّه
بلا الربعه التحجل
شاكيه للوديان كِتافه
وفوق الجِيد علي ضهر البوادي
تغني ماخاتيه الزرافه
سلامها ضنين
بسيمها الودعّه
ألا تزيد لطافه
ملامها رصين
مُقدم زوكها قُبال الحصافه
كلامها حنين
كلامها يطمئن الهمباتي
والمجلوبه متعارض كِتافه
وقاريه وكاتبه
تحمد سِيدها
ماخده علي البنيات الشرافه
كذا البريبه تبرد عيني
لا تغشاها لا أحضر نشافه
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
كذا البريبة تبرد عيني
لا تغشاها لا أحضر نشافها
وكان في الحلّة يوم
حنة علي الشاشوق
مشينا نقدّم البنوت
علي ضو الرتاين
عيونهن هارجه تنبح في الفجر
والليل قريب واقف يعاين
خدودهن جاهرة
زي جهر الكهارب الفي المدينة
وكان الليل
ومافي الحلّة من الحفلة ألا صداها
كان زغرودة كان غناي
رقيص الشامه بت حمدين
وعرضّة حامد العولاق
وخت الحنة
لي يات من حضور ضفرين
ونمات العديل والزين
وشنق ودسعد طاقيتّو
شان في الحلّة ساوو كنتين
وشكلة عامر المسكين
وعيط ودمجمر زين
عشان الزينة رقصت زين
وفي الشعقيبة
كان بازمالو شبالين
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
سكرة وين
وسهرة وين
وبهرة وين
وجهرة وين
أقول آبنية ليش ماتهمي
ليش ماتهمي فوق زولاً
مشلهت فوق دِريبك
لا النفس مجبود
ولا لحق الغزالة
وقفت وإنبهر رماشّه
جدعت بالبسم رشاشّه
قالت ...
آ المهجوم إهجمك الله
كان داير تسي لي الخُلعه
عاد من حيني جاتني الحاله
قت لها لا لا
وحات النعمة آ بنية
البريد في الريده
ما بخبر فساله
حدرت باسمّه
قت لها ...
عايني تسلم عينك
ألا حقيقه مو ساهل كُتاله
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
Quote: وتبقى حمالتي
عند سيد الحماله |
ســيدي أنـا الرســول
سيدي أنا الرسول ...... الصلاة علي سيدي الرسول
الصلاة علي سيدي الرسول
تـلبس الخـلخـال والحجـول
في رياض العشاق تجـول
شايله قلبي البيها مبدول
الصلاة علي سيدي الرسول
البضوق طعمك في السحـور
وجهه كله يضوِّي نور
مابنوم وقت البكور
الصلاة علي سيدي الرسول
لاقـُصُـر لاشايحة الطول
ليها دقــّيـنا الطبول
لى قبولا نشاشي ونجـول
الصلاة علي سيدي الرسول
من غرامـها أنا في ذهـول
نومي شارد وجسمي منحول
بيها الطريق إنشاء الله معـدول
الصلاة علي سيدي الرسول
من ردونها تفوح العطور
خلـّتني غرقان أنا في بحور
عقلي غائب ولا ... مخمور ؟
الصلاة علي سيدي الرسول
أول شهيدة راوية القول
يبقى شملها بيكي موصول
بيني وبينك شيطان لايحول
بالصلاة علي سيدي الرسول
يبقى شـُربها صافي معسول
ديما ذنبها بيكي مغسول
بى حق حبيبنا شافع الهول
الصلاة علي سيدي الرسول
عنـِّي غـيـبـتـك لا تطول
ماعلمنا وماظلّ مجهول
قلبي بيكي يبقى مشغول
بالصلاة علي سيدي الرسول
سمية الحسن محمد طلحة
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
بسم الله الرحمن الرحيم
سلام ياهلنا...
ونواصل مع ودبادي
وانا اخو البت اللكعت
..........................
الخوف يا ناس كان يبقى
الشوق الحاصل بينا معشعش فيهن
مقنع سابل وين بلقاهو
طرفا ذابل وين بلقاهو
وعين بتدنقر من واليهن
الوجنات الشعّن بقّن
ود العين النايم زرقن
مو زايغ رسيان وميقّن
زولن كان خدران ومحقّن
من الشوفة عروقو يطقّن
كان الدنيا بصح تتخلا
كن بركن معاهن
فوق رملاة الحلة
الا كمان بنشوفا مذلة
الجنيات الغابت جابت
إنت الجيب بس قايلو
قميص افرنجي
وكرتونات كرملّة
لا لا وحاتك حاشا وكلا
ديل يوم عادوا اتلافو
الجاهل بحقوق الله
ديل كم لحقو البشهق
ضايق وداوو العلة
......................
ونواصل
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
بسم الله الرحمن الرحيم
سلام ياهلنا...
ونواصل مع ودبادي
وانا اخو البت اللكعت
..........................
ديل يوم عادوا اتلافو
الجاهل بحقوق الله
ديل كم لحقو البشهق
ضايق وداوو العلة
الولد الجايس حقايب سفرو تقال
تقال من جنس كتاب ومجلة
الحكمة النضم إياهو الكان
الحكمة الولد اتوضا وصلّ
عادة البلد الدخلت فيهم
سكنت سكنت ماب تتخلا
نحن كما طارين الحلة ودرنا الطلة
نشيلا معاهم فرح وميتة
حلاة الموت كان في عبدلة
كابي المقنع الجرجار علي
موية الوجه يا حوا كابيه
وزازي الدمعة منك بي طريف
التوب احزمي حشاك واكربيه
خيراً ولىّ مو مدخور ، رزق الليلة
داب الليلة والباكر تشابي وما بتجيبيه
ويا حوا الوكت مرواح وزمنك
راح امسكي ضرع شويهاتك احلبيه
...............................
ونواصل تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
بسم الله الرحمن الرحيم
سلام ياهلنا..
ونواصل مع ود بادي
وانا اخو البت اللكعت
.........................
ويا حوا الوكت مرواح وزمنك راح
امسكي ضرع شويهاتك احلبيه
ليش ماك حامدة ليشن جاحدة
والرزق العليك هطال شربتي
التاني فوق بكريه
محمود الغني ومشكور
غيارك فردة من نسج الكمالي
وتاني توب جاراته بنغالي
ومحمود الغني ومشكور
وعاجك فضة من دق ود تبيد الغالي
ومحمود الغني ومشكور
نارك موقدة ماعونك ملان مو خالي
ومحمود الغني ومشكور
وابو زينوبة ناهض فيها
ما هو الخملة عنقالي
ومحمود الغني ومشكور
وأحمد قلتي نور عينيك مختّر
فوق بطان الحلة خوجالي
عصاية الصبينة المكسية
بي جلد الندف والخامة سرهيتة
وسرج المرقة سناري ومسمّر
فوق سراة الباني سنكيتا
وجزلانا مجنزر وطيه رزماً
من بطون الطينة مبحوتة
ولازم الفنجرة اتبشَقت سبع خمسات
تصل حاكت حجول المارقة من بيتا
ومتلفح كساوي الساكوبيس صوبان
وظهرة تقيلة تبرق سنو سوميتة
................................
ونواصل...
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
قالت والفجر في خديدها
آ الممسوخ حِدانا العين
بعدما تسدر الضحويّه
خُت الفأس علي كتفّك
وبوّح غادي بوّح غادي
نْم فوق البعجبك زين
قُت لها زين
وداك الحين
بشوفّك يا الرتينة
مع الشمش بتلالي
مناك للسحاب
الكابي فوق حلّتنا
كان سابل ضُلاله
بشوفك فوق عوينات الصبيّن
العشق لطف ضياهم
والنهار وصف خُطاهم
والصبر زارعنّوا
فوق ضهر البوادر
فوق كتافين السِقاله
بريد ريدك كِفاح أهلي
بريد ريدك سماح أهلي
وأريد مهواك
أريد إنسانّك الجُواك
وأريدك تاني
زي آخر الحِتاله
وأدوبي لِك
وأشيلِك غِنوة للسمحات
وأنمّك في تراتيلي
وكُل ما العتمه تنزل سابله
أنسى عناي
وأتاوق لي قناديلك
وأشد حيِلي وأدوبي لِك
وإذا مغناي
يبرد في الحشا صدرك
ويرجع لي تهاليلي
بدوبيّ لِك
ولو الشوق عرف بكاك
أطري غُناي
عليك العزّه آ المريوده
دوبيّ لي
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
إذا خمش الخريف
دار اللُقت وإتلمّن السارحات
علي طرف الفريق
رتعّن بُشاريات
إذا عود الملود الدُغري
شقا حراتو
قام ضل الدرق
أمن عشا البايتات
إذا بالضيق تلحقّو لُقمه
في بِلدات
آمنه بُشارة الجايات
مع الرايحات
آمنه خُلاصة الصلوات
أُم الكُل إذا طرينا
الشطارة ثبات
كريمة إذا عصرنّا الجوع
آمنه ما بتنفات
هميمه وكريمة
وبديها ما بتدنا لي شينات
حليل آمن البتفقد في جهلنا سمات
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
خنّت روحي للصيد
ونقرّشت أوتاره
يمشي الليل فوق ريدّن
نجر مسداره
نفسّن لي
بقت بي غيهن محتاره
والتنزيل زمان
قال النفس آماره
دنيا صغيرة يا عبدالرحمان غراره
أخره كوم تراب وتحتو الجسم بنضارى
شن فايدة غُناي لي صيدها واثاره
مادام بكرة نرحل وتنقطع أخباره
أمبارح أنا وقصبة مدالق السيل
في ونسه وضحك لامن قسمنا الليل
وكتين النُعاس إتشقلبن بو الخيل
لا بِخلت ولا جادت علي بالحيل
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ياهلنا...
ونواصل مع ودبادي
انااخو البت اللكعت
.........................
ومتلفح كساوي الساكوبيس صوبان
وظهرة تقيلة تبرق سنو سوميتة
جيد ياجيت وجيدلك حوا
بي جنس الجنا القاري
وجيدلك حوا بالولد
البعوم الشبكة سداري
متلك حقو لاتنضامي
لا تنلامي لا تتضاري
وانت ولدت للبلد
البيجيب راس العشاري
عدلك هادو في كُـم الرجال
أحمد يمين مقنع ولايا
وفي دارة البنات زينوبة فرقت
منهن فرقة كتيفها من الفداية
عصاري الوردة فوق المشرع
اب مسكا دفق شرق الترايا
بنات الحلة كان عقدن تياب
المرقة فوق روسن وقايا
وسون قدلة الوز الرطن
صباحي شاقات اب شراية
تبين زينوبة حين تتوقى
شعراً كاب بعد ما انساب
على الخد المرايا
عصاري الفزعة والفازعات
يجن بكر تنايا
.........................
ونواصل
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نرجع تاني يا أحباب للشكرية والبطاحين
آها قنّا شما مرت المك النمر كانت بالحيل حزنانا علي موت عمها وددكين وتبكي علي بكاين شديد ومنحت فيهو زين وقالت
غرارّه العبُوس الليله دار دولابّه
ياخريف البطانه ومرتع الجلابّه
بتقّر الركُوب وتنحر الحلابّه
كم قشيت دموع وجعّه ونتعتا غلابّه
عمي العمى.. سيل آيدهّو
روّى الساحل
تساب بحر المِحيط
الما بضمّو الساحل
يا حليل وددكين
مونة المقيم والراحل
سند الهاقعه
نشال التقيل والواحل
صعيب فقدّك علي
وشويه فيكَ بُكاي
أنوح لامن أروح
عيني إنقطع وكايّه
قابلني الدَهر
قاصد لو فيّ نكايّه
بعد النكبة دي
بادي يلو تاني حكايه
وا وجعي الشديد
أنا جمري زاد في وقيدّو
ابوي بي قبيلتو جا
وداير إستجير في فقيدّو
الديش كلو أهلي
وراسو أخوي وعقيدّو
طه المك حمى
والشر صِعب ترقيدّو
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نادّت للمروق
أنا روحي جات مِطابقّه
صعب الحال خلاس
والعقدة مي مجاردّه
الشكرية أمس
لحقوها حاره وبارده
خلو المك زعل
وحالف يعر الواردّه
ديل ناس وجعّه
كان عملوا زي ما يعملّوا
المك مالو
لو فوت كلامّن حمِلّو
قالوا عطاشّه
والرهد بنزلوا إملوا
وكان نسلّه سيف
تاني القبلتين كِملّو
بعضي مجافي
وبعضاً لي رحيم أولادي
كان المك إفوز
أفقد أبوي وبلادي
والتانية إن بِقت
أفقد ابو أولادي
ضاق صدري الوسيع
ياهمومي وين تنجمعّي
فارقني المنام
من عيني فارق سمعي
طال اليوم بوكاك
ياعيوني جودي أهمعّي
أصبح جسمي جاف
والوحّه حرقت دمعي
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
قامت كوركت لي خادمها
ياصافيات .. صافيات
حسي في الحال
تمشي لي تناديهّو
يروح للمك سريع
من زعلو دا يهديهّو
حليل أيام هناي
أيام راحي ومروحي
عاكسني الدهر
الشفا جما جروحي
صافيات يا صافيات
قامت صافيات قالت هوي جاياك يا ملكة دار جعل
قامت شما قالت ليها:
لودالنعيسان روحي
أحي ....
فاضل لي بس أخنق روحي
قام ودالنعيسان جا داخل علي مكة دار جعل وقال ليها :
سلام يامكة الدار
يا أم عمارة سلام
عليك ما لي جسارة
وصدري فيهو كلام
وكت أنتِ
سوت بيك كدي الآلام
نايحة الدروب
مظلومة كان تتلام
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
يواصل ودالنعيسان في حديثو مع مكة دار جعل شما
لي فخر الجدود
يا مكة ليه متناسيه
تروس الحافله
أبواتك بدور الماسيه
تِلوب الحارة
وجُبال الثبات الراسيه
أنتِ تجُبري
ما بصبروك في القاسيه
من أبواتك العز
ليكي زُمه وشُوره
معروف ثباتّك
تجبري المكسوره
حليل سما العزّه
ولادك باقي ليها نسورّه
دارك عامره
والفرسان عمارة وسوره
قامت شما قالت لي :
صدقتّه صحيح
علي متلي الثبات مفروض
وكمل توب الصبر
واليوم لبسنّا عروض
عَلْي الهم كتير
وأنا صدري مملي غروض
ودا الخلاني
ماقدمتّه ليكا عروض
التحت الطبق دا
شيلّو مسحة شارب
مو قدر المقام
يختا وشويه يقارب
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ياهلنا...
ونواصل
مع ودبادي وانا اخو البت اللكعت
......................................
عصاري الفزعة والفازعات
يجن بكر تنايا
نار الهجعة نار
الوجعة نار الفزعة
لا حطب التكايا
ويات من تبقى
حازمة التوب على
النص القناية
تبين زينوبا حين تتحزم
الخصل الشرابهن صندل
الناس الغنايا
شن معنى الكسوف
يا حوا والحزن
البيجيب ليك الشماتة
وكنزك في الكنوز زينوبة
وأحمد كل يوم زايدين
قراطين فوق تلاتة
نجوم السعد فوق حجرك
تباسم وانت شارفة ترمي
في ودع البخاتة
شتول الفرحة تتفتح
قبال تتمد ليك الليد
وما لاقية التفاتة
.....................
ونواصل
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
قام ود النعيسان فتح الطبق لقى ملان خرز دهب لامن جهرت عيونو
قام قال للمكة
دول خروز دهب
يا ملكة ولا عقارب
الجهرّن عيوني
الدنياباقي مغارب
جود كفك طمح
يامكة سيل غرقنّا
خدر عُودنا راشا
بعد المحل ورقنّا
ياصاحبي الفقر
أنا وأنتَ ما تفارقنّا
أختّر ماتعود
غرب عديل شرقنّا
قامت شما قالت لي :
أنتَ فرحتي
والهم دخيل قاصيني
وللعبرات أبلّع
والدمع عاصيني
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
قام ودالنعيسان قال ليها:
يامكة العليك
مابخصك يمين خاصيني
وختّي حملْتّو فوقي
وتاني ماتوصيني
الساس الرمو
عقبان مابتقدّم
قبُل مايختوا طوف
يلقّو القديم إتهدّم
كل واحد أخلي
علي السبب إتندّم
تب ماتخافي شي
غير أقنع أبوك في محلّو
وبي شيش أدخل علي
أنا بي كلامّن حلّو
أزيل الفي الصدور
وكلامي انشر حلّو
بعدين الكلام
بعرف طريقة أحلّو
بعد مايرضى أبوك
المك بعالج صدرّو
وبقطع في الكلام
وعلي أخدّر قدرّو
قامت شما قالت لي :
نضراً فوق دكين
العالي راسو وقدرّو
التحت الطبق
ليك خمسة كيمان قدرّو
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
بسم الله الرحمن الرحيم
سلام ياهلنا...
ونواصل مع ودبادي وانااخوالبت اللكعت
......................................
شتول الفرحة تتفتح
قبال تتمد ليك الليد
وما لاقية التفاتة
اقطعي الزند البقودك
من فلاة الخير
علي بلد الدراهم
واقلبي الطوف إن كسح
بك من جروف الخير
علي جزر المراهم
ياديار حوا المراقدك
في رويس عبدلة وينك
يا المشاوير المشيتك
يا المشارع السالكة وينك
بالي فيكي إلا درب
العيشة باعد بيني بينك
يا لبينة المغربية
النازلة من أطراف سعينك
يا السرابة الحبلى كل
الناس تعاين لي جنينك
يا السبايك الساوي شيلك
ولا طويرة الجنة تسكر من مدينك
يا السواقي النايحة زيك
زي حنان اماتنا في حرقة حنينك
................................
ونواصل
تحياتي...
حاتم هاشم.
| |
|
|
|
|
|
|
| |
خالد علي محجوب المنسي
salma subhi
حاتم هاشم
ماجدة عوض خوجلى
أبو الحسين
yasiko
فيصل محمد خليل
محمد المرتضى حامد
عفاف أبو حريرة
فيس بوك
تويتر
انستقرام
يوتيوب
بنتيريست