|
(مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :)
|
السؤال اليومي المرهق في رمضان: الليله حنعمل شنو؟ !!! .... :) محتاجين أفكار تساعدنا في تمضية 30 يوم رمضان انشاء الله بدون تفكير طويل كل يوم في محتوي ومكونات المائده اليومي,,
فطور رمضان بيختلف عن الطبخ في الأيام العاديه من حيث محتوي الوجبه وطريقة اعدادها ,, وفطور رمضان نفسه بيختلف من بيت لتاني ومن ثقافه لأخري,, حابه من خلال البوست نتعلم طريقة عمل أطباق جديده, أو أطباق قديمه بطرق جديده,, طريقة عمل عصائر تقليديه أو حديثه ,,
بتمني مشاركة خبيرات الطبخ الشهيرات في البورد مريم بت الحسين وسمارت وسناء خالد وماما دوما وكلللل البقيه,, خلونا نستفيد من خبرات بعض ونتعلم نجدد في المائده اليوميه وطريقة التقديم,ونصور اطباق مع طريقة تقديمها,,
برضو نسعد باستضافة زوجات الأعضاء لو يحبو يشاركونا بخبراتهم :) وكل من يأنس في نفسه الخبره المطبخيه :)
تصومو وتفطرو علي خير :)
|
|
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: عفاف الصادق بابكر)
|
سلام ورمضان كريم وتصومو وتفطروا علي خير ، الفطور بالإضافه إلي العصائر والبليله والبلح ملاح نعيميه بالعصيده المقادير: ٢ معلقه كبيره لحم بقري مجفف ومطحون ( أو لحمه مفرومه) ٤ معلقه كبيره بصل مقلي ومهروس ناعم ١ كوب عصير طماطم ١ معلقه كبيره معجون طماطم ملح حسب الرغبة 1 معلقه صغيره كسبرة مطحونة ربع معلقه صغيره قرفة مطحونة نصف معلقه صغيره فلفل أسود مطحون ١ مكعب مرقة دجاج ماجي ثلث كوب زيت نباتي ٦ كوب زبادي او روب ١ معلقه كبيره كريمه فول سوداني ٢ معلقه كبيره دقيق ٢ معلقه كبيره ويكة مقادير العصيدة ٦ معلقه كبيره نشا ذرة ملح ٣ كوب زبادي (أو يفضل الروب الحامض)
الطريقة:
طريقه تحضير النعيمية يسخن الزيت ثم يضاف إليه اللحم المجفف و يقلب سريعا لمدة دقيقة ثم يضاف إليه البصل المطحون يقلب البصل و اللحم معا سريعا ثم يضاف عصير الطماطم ثم تضاف البهارات ( الملح والكسبرة والفلفل والقرفة ومرقة الدجاج ) ثم يترك الخليط على النار لمدة 5 دقائق يخلط الزبادي بالخلاط الكهربائي مع إضافة كريمه الفول السوداني + الدقيق أثناء عملية الخلط يضاف خليط الزبادي و الدقيق والفول إلى خليط الطماطم على النار ثم يقلب جيدا حتى لا يلتصق الخليط بالإناء و يضاف الثوم ثم الويكة تدريجيا مع التقليب المستمر أثناء إضافة الويكة يترك الخليط على نار هادئة لمدة 5 دقائق ثم يقدم بعد ذلك ساخنا مع العصيدة طريقة تحضير العصيدة يغلى الزبادي على نار متوسطه الحراره ثم تذاب النشا في ربع كوب ماء و يضاف إليها الملح يضاف الخليط إلى الزبادي عند الغليان مع استمرار التقليب يصب بعض من الزيت النباتي أو السمن في إناء العصيدة تترك العصيدة حتى تبرد قليلاً لتتماسك و تقدم العصيدة بالنعيمية و بالهناء و الشفاء
طبعا لو عنكم بصل مجفف ومحمر ومسحون من بدري دا بخفف الزمن وبساعد كتير
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: عبد الدائم سيد أحمد)
|
أهلا أخونا عبد الدائم,,
Quote: علينا مسك الشفع بس |
بس؟؟؟ بالغت والله,,, طيب عصير مابتعمل؟ سلطه كيف؟
لا لا لا,, تستاهل نحرّش عليك المدام والله
كل سنه وانت وهي والعيال بألف خير :)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: خدر)
|
ياطارق أبوعبيده ..
Quote: انا غايتو : - صحن الفول - اللقمة - قراصة واحد من ديل ثابت يوميا مع العصائر و البلح و المكسرات فطائر اللحمة المفرومة و الجبنة و السلطة البيضا و السوداء (يوميا) بعد داك اي حاجة تجيبوها مافي مانع ___ خلط العصير علي انا .. قصرت ؟ |
يعني هسي انت : 1- بتعمل ديل كلهم يوميا؟ 2- بتعمل العصير بس والباقي عندك ثوابت مفضله في المائده؟
لو أجبت بنعم علي الخيار الأول فما قصرت اطلاااااقا وعندك جايزة زوج مثالي عديل لو أجبت بنعم علي الخيار التاني فأحسن شووووويه من مسك العيال بتاع أخونا عبد الدئم وفي كل خير :)
تعال اختار اجابه صحيحه عشان نقرر نديك الجايزه وللا نستني بيها مشارك تاني؟
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: SHIBKA)
|
SHIBKA العروس دي خليها جديده مع الحاجات دي هاكي دا ملاح الروب الابيض بالكرون فلور بدون ويكه : نصب الروب او الزبادى فى الحلة وناتى ببصلة كبيرة نقطعها على اربع قطع ونرميها فى الروب ونبدا (نسوطه) بالمفراكه لحدى ماينضج ويتماسك (يبقى تقيل) ناتى بدقيق فينو ابيض (أو كورن فلور) ونضيفه للروب بجانب فول سودانى مدروش يكون مسحون ناعم ونبدا بخلطهم مع الروب وشوية ملح وبهارات. دا روب ابيض بدون ويكه
اما لو عاوزه روب ابيض بالويكه نصب الروب او الزبادى فى الحلة وناتى ببصلة كبيرة نقطعها على اربع قطع ونرميها فى الروب ونبدا (نسوطه) بالمفراكه لحدى ماينضج ويتماسك (يبقى تقيل) ناتى بي فول سوداني مدروش وتكبيهو فيهو وبعد داك حبة ويكه وشوية ملح وبهارات وبالهناء والشفاء
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: othman mohmmadien)
|
الأخ عثمان
لا شكر علي واجب ، وربنا يردك من الغربه وتصوم وتفطر علي خير
المقادير 1| كبكبي أو فول مصرى 2| نصف فنجان سمسم 3|بصلتين 4| عيش ناشف مدروش 5|5 فصوص توم 6|شمار أخضر أو كزبره خضراء حسب الذوق 7|ملح حسب الذوق 8| فلفل حسب الذوق برضك
الطريقه
يُنقع الكبكبي أو الفول المصرى فى الماء مده كافيه يُحمص السمسم تقطع البصلتين إلى شرائح يسهُل فرمها تُفرم البصلتين والحمص أو الفول المصرى والشمار الأخضر والتوم والعيش المدروش جيداً يُضاف بعد ذلك السمسم والملح والبهارات حسب الذوق يُضاف الباكنج باودر فى النهايه وتتشكل إلى أقراص أو أى شكل اخر وتُحمر بالزيت وبالهنا والشفا
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: SHIBKA)
|
ياهويدا وانعام وشبكه,, ملاح النعيميه اتعلمتو الاسبوع الفات وصفته لي صحبتي بمقادير ونفذته طلع بتاع معلّمين
لأني قدر ما أسأل ماما عليهو توصف لي بطريقتها البـ Sense ديك,, ولو باريت ماما كان عمري كله ما اتعلمته لوووووول
هويدا شكرا علي المداخلات المليانه,, ومتفائله جدا بمشاركاتك في البوست,, أيوه كده عايزين وصفات دقيقه وبالمقادير أهم حاجه :)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: انعام حيمورة)
|
شبكه ازيك,,
Quote: بصراحة بوست السنة الفاتت كان مفيد جدا بالنسبة لي يا اماني |
انشاء الله البوست السنه دي يكون مفيد لينا كلنا,, والله الوصفات البالمقادير دي أهم حاجه,, مشكلتي ماما بتطبخ بال Sense بتاعها, يعني ما بتوصف لي بمقادير,, تقعد تقول لي كبّي شوية (...) وحبة (...) ولما تشوفيهو حصل ليهو شنو !!!!! أنا كان بعرف كده ما كان بقيت زيها واحد,, أنا عايزه زول يوصف لي كده: تكبي ملعقه (...), وكباية (...) وهكذا ,,
مرحلة ال Sense دي لسه ما وصلناها لووووول
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Ashraf el-Halabi)
|
أخونا عثمان محمدين,, كل سنه وانت طيب,,
Quote: رمضان كريم يا الأخوات .... عذابي ومعذب في بلاد الغربة ... وساكن براي والهم عصف ... |
جربت صيام رمضان في الغربه,, وعارفه صعوبة الموضوع ده,,
تابع معانا وأكيد حتلقي انشاء الله وصفات سريعه ولذيذه تريحك من عناء التفكير ,, :)
يا أشرف يا أخوي,, رمضان اتسلّحتو ليهو بالحجه شخصيا؟ ماشاء الله,, ربنا يديمها نعمه,, وتصومو وتفطرو علي خير :)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: عفاف الصادق بابكر)
|
ياعفاف كل سنه وانتي طيبه,,
Quote: هسه لو قالوا النسوان ديل عندهم اجازة مدفوعة فى رمضان مالوا ...؟ |
غايتو انا اجازتي ما باخدها الا في رمضان, لأني عارفه اتنين ما ببقو علي الواحده,, صيام وعمل فطور وشغل
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Amany Elamin)
|
Quote: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :)
|
يعني الرجال ما يقدموا اقتراحات حتي لو كانوا طباخين مهره؟؟؟؟؟؟؟؟؟؟؟
تصوموا و تفطروا علي خير ورمضان كريم
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Rawia)
|
طيب عشان نكون عمليين والبوست يكون مفيد للجميع ,, خلونا نعمل لست بالأصناف الرئيسيه في مائدة رمضان,, ونحاول نغطي كل النقاط :
1- العصيده بأنواعها,, 2- التقليه والنعيميه وبقية أنواع ملاح العصيده اليومي,, 3- السلطات, 4- الشوربات, 5- الفطائر 6- المشويات 7- الحلو
في حاجه تانيه؟
خلونا نبدأ بالعصيده وطرق عملها بالمقادير لو سمحتوا
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Amany Elamin)
|
Quote: طيب عشان نكون عمليين والبوست يكون مفيد للجميع ,, خلونا نعمل لست بالأصناف الرئيسيه في مائدة رمضان,, ونحاول نغطي كل النقاط :
1- العصيده بأنواعها,, 2- التقليه والنعيميه وبقية أنواع ملاح العصيده اليومي,, 3- السلطات, 4- الشوربات, 5- الفطائر 6- المشويات 7- الحلو
في حاجه تانيه؟
|
عاد الله بيسألك دي الاصناف الرئيسية ؟؟؟؟
وين القراصة ؟؟؟؟
بوست بدون القراصة غير موفق
و ملحات هويدا مسااااااااااخ و مكرضمات
اختنا الغالية اماني تقبل الله الصيام والقيام مع تمنياتنا بالتوفيق
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Amany Elamin)
|
أخونا الصادق,, وانت بألف خير ,,
Quote: يعني الرجال ما يقدموا اقتراحات حتي لو كانوا طباخين مهره |
نحن رحبنا بيكم من أول مداخله, حتي شوف:
Quote: وكل من يأنس في نفسه الخبره المطبخيه :) |
نرحب بمشاركات كل ذوي الخبره :) مرحب بيك,,
رايوه ازيك ورمضان كريم :)
Quote: أنا أحب أندرو ميتشل وجيمي أوليفر |
ناسك ديل غير مطابقين لمعايير المطبخ السوداني ياراويه لكن ! وبيني وبينك رمضان التراديشينال فيهو يكسب
غايتو كان جبتي لينا ريسيبي خطيره مجربه للرز بأي شكل أو صوره, بنحبهم معاك لاعبين مانشستر ديل
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Rawia)
|
موني و ستات و بنوتات البورد كل سنة و انتن طيبات و تصوموا و تفطروا على خير و ربنا يتقبل منا و منكم صالح الأعمال
موني و بما انك سألتي عن الأطباق السريعة اليكي بعض النصائح من سن سن :
جيبي لحمة مفرومة بكمية كبيرة و بهريها كويس و ابشري فيها البصل و التوم و اعمليها( قيمة) و قسميها على كميات في اكياس و ختيها في الفريز
المهم لحمتك المفرومة بتكون جاهزة بس ما عليكي إلا انك تنوعي .. يوم اعمليها مع خضار مشكل و لا مع بطاطس او مع قلاش او مع صينية مكرونة بالبشميل المهم انها سريعة و ما بتاخد منك زمن
و برضو ممكن تجيبي صدور بتاعت فراخ بانيه ( تكون مقطعة قطع كبيرة و مفلطحة ) و برضو تبهريها و تتبليها بالبصل و التوم و الخل و تقسميها على اكياس و تختيها في الفريزر و الصباح قبلي ما تمشي الشغل طلعي ليكي كيس عشان يتفكا و في الإفطار ما عليكي إلا انك تتبلي الجيكن في البقسماط المسحون و البيض و تحمري بجيكي بعدين للوصفات دي بالتفاصيل
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: سناء عبد السيد)
|
الأخوات أماني الأمين وشبكه والباقيات تحيات طيبات ورمضان كريم طبعا السؤال المرهق بتاع نعمل شنو الليله ده مرهقنا أنحن برضو لأنه يوميا بيسألونا نعمل شنو ومفروض نفكر معاهم في البيت في حل للمعضله دي بالرغم من إني واحد من الناس (باكل أي حاجه) ومسهلها علي المدام تماما.
لكن لو بوستيكم ده دايرين تخلو فايدتو عمليه علينا هنا في الغربه دي، ورونا (الرقاق) وصفتو شنو ؟ وهل ممكن يتعاس في طوة البيتزا ؟ والله يفتح الله؟
كمان لو ما جبتو لينا الوصفه علي الأقل واحده فيكن تقوم ترسلو لينا بارسل لي رمضان ده ، وأبحثوا وصفتو لغاية رمضان الجايي
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: كمال حسن)
|
موني ازيك... والله احرجتي تواضعنا ياخ...
كل سنة وانت طيبة ونصوم ونفطر كلنا على خير ان شاء الله
انا كنت حابه اعمل لي بوست اكتب فيه كل يوم عن فطورنا حيكون شنو... وعشان انا بكره التفكير في اعمل شنو، عادة من قبل رمضان بعمل لي جدول فيه menu بتاعت كل يوم.... وبناءا عليها بشتري الحاجات بتاعتي من السوق... بستمتع بالطبيخ جدا في رمضان.. ويمكن عشان طبيخ زول جعان، بطلع الاكل مظبّط... ههههههههههه
خليني اشارك بتجهيزات ما قبل رمضان، انا بحب اجهّز حاجات في الفريزر تساعدني وتختصر الوقت.. للأسف السنة دي بسبب عارض صحّي، ما قدرته اعمل كده.. لكن كنت مخططة...
بشتري كمية من الاسود، وبقطّعه وبحمّره، وبقسّمه واخته في الفريزر... يوم اكون عايزه اعمل سلطة اسود، بنزله.. احنا بنحب سلطة الاسود مع الصوص الابيض، المهروسه بنحبها برضه.. المهم الاسود بالطريقتين ديل ممكن يتعمل.... برضه بنفع لمصقّعه ولا صينية خضار في الفرن... المهم الاسود يكون محمّر وجاهز... في نفس الزيت، بحمّر لي بطاطس... بنفع برضه في صينية الخضار .. او ممكن بطاطس باللحمة المفرومة... في باقي الزيت، بكون مقطّعة بصل كتييييييييييير... بقلبها في الزيت (لو الزيت كتير، بدفق منّه شويه)... وبعداك بكب في البصله ديك مويه وملح عشان تموت شويه، وبختها في باغات في التلاجه... زي دي بتنفعني كأساس لسليقة ولا ملاح ام رقيقه وحاجات كتيرة.. بحاول اقلل من المحمّر... لكن بجهّز لي لفة بتاعت سامبوكسه ملفوفه، ممكن احمرها في الزيت داك (بعد البطاطس) او اعملها في الفرن... برضه ممكن الواحد يعمل ليه كم محشي كده يحمّرهم ويختهم في الفريزر... كرات اللحمة او الكفته برضه...
بالمناسبة، انا الزيت بحمّر بيه مره واحده وبعد ما يبرد برميه، عشان كده بحمر كل حاجه في يوم واحد... إعادة تسخين الزيت ما كويسه صحيّاً
بالنسبة للشوربات، في السنوات الفاتت ما كنا بنهتم بيها كتير... لكن السنة دي ناويين... انا بحب الشوربات الكريمي، بس هي تقيله وممكن تحميك تاكل، وصحياً صعبة شوية على البطن... مخططه السنة دي شوربات خضار وعدس ودجاج وشوفان... ان شاء الله بحاول اجيب الوصفات في الفترة الجاية..
العصائر، انا بحب كوكتيل الفواكه جداً... لكن برضه تقيل.. في مشروبات اخف، لقيتها في موقع وعجبتني، بجيبها ليكم، خاصة انه السنة دي ما عندنا آبري ههههههههههه
أول وصفة احب اشارك بيها، هي اعادة اختراع لأم علي.. وصفة بسيطة وساهله وبتسمّن هههههههههه ورهيبه جداً، خاصة ايام عزومات رمضان
المقادير علبة بتاعت عجيبة البف باستري الجاهزه، انا بستخدم زي دي
لتر حليب كامل الدسم علبتين قشطة ربع كباية سكّر نص كوب زبيب كوب مكسّرات مهروسه (فول سوداني، جوز، عين جمل) كوب جوز هند الطريقة نرص العجينة بتاعت البف باستري في الفرن ونشغّله لمدة تلت ساعة... لحدي ما تبقى لونها ذهبي، وتتنفخ... بعداك نطلعها، ونرصد نصها في الصحن بتاع التقديم... نهرسها شويه كده... بعداك نكب طبقة بتاعت مكسرات وزبيب وجوز هند (نص الكمية)، بعداك نكب النص التاني من البف باستري والمكسرات والزبيب وجوز الهند... كده التحلية جاهزه 80%...... لما يقرب الفطور... كبي الحليب والقشطة في وعاء ومعاهم السكّر... وصوتي كويس... بعداك كبيهم في البف باستري... ممكن تدخليها الفرن لمدة ثلث ساعة، او الما يكروويف...
وصحتين وهنا...
برجع تاني يا اماني... شكرا على البوست الظريف
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: مريم بنت الحسين)
|
كيفية ملاح التقليه
أولاً المقادير: 4 بصلات متوسطات الحجم - ربع كيلو لحمة مفرومة - ويكه ناشفه - طماطم أو صلصه - زيت - بهارات مشكلة: (توم، كسبره, فلفل) ملح. ثانياً الطريقة:- 1/ يحمر البصل في الزيت حتى يصبح لونه ذهبي (يصفر) 2/ يفصل البصل عن الزيت، نخليهو ينشف (يجف) 2/ بعد داك ندق البصل (بالفندك) أو أي وسيلة تانية.. 3/ نضع الصلصة أو الطماطم المخلوطة مع البصل المدقق في باثي الزيت مع إضافة قليل من الملح. 4/ نترك المقادير على نار هادئة: مع ملاحظة: ** إذا استخدمنا طماطم يجب أن نزيد مدة الطهي علي النارحتى ينضج. 5/ يضاف الماء حسب الرغبة ويترك حتى يغلي.. (ملاحظة هامة: لو عايزنها مع الكسرة نزيد الموية شويه والعكس لو بي قراصة أو لقمة) 6/ تفرك الويكة بالمفراك جيداً (مع ملاحظة تفتيت الكرضمات الخاصة بالويكة - والتي يسببها الغلي) 7/ توضع البهارات وتترك حتى تغلي ليكتمل النضج.
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: SHIBKA)
|
أخونا كمال حسن,, ياهلا ومرحبا ,,
Quote: لكن لو بوستيكم ده دايرين تخلو فايدتو عمليه علينا هنا في الغربه دي، ورونا (الرقاق) وصفتو شنو ؟ وهل ممكن يتعاس في طوة البيتزا ؟ والله يفتح الله؟ |
عندي صحبتي والدتها بتعمل الرقاق بالفرن !!!!! بحاول أسألها ليك من الريسيبي,, وانشاء الله خبيراتنا الهنا برضو يفتونا في الموضوع :)
Quote: كمان لو ما جبتو لينا الوصفه علي الأقل واحده فيكن تقوم ترسلو لينا بارسل لي رمضان ده ، وأبحثوا وصفتو لغاية رمضان الجايي |
لعناية داليا الكبّاشي
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: SHIBKA)
|
عمو رغيم كل سنه وانتو بخير :)
Quote: وين القراصة ؟؟؟؟ بوست بدون القراصة غير موفق |
طيب ننتظر فتحيه شامي تجي تحكي لينا عن قراصة رمضان وتوصفها لينا !
نحن في ثقافتنا مافي قرّاصه خالص, لافي رمضان ولافي غيره :)
شبكه,, الله يعينك في موضوع اللست,, مستنينك :)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Amany Elamin)
|
الليله الفطور عصيده بي تقليه تم وصف العصيده أعلاه مع صحن كفته وطريقته كالآتي: عمل قطع كفته المقادير نصف كيلو لحم مفروم- 4 بيضات- بقسماط (العيش الجاف مدقوق)- بهارات -ملح -نصف كوب صغير زيت -ملعقه ونصف صلصه -2كوب متوسط ماء -طماطم وفلفليه للتزين طريقه العمل فى اناء واسع نضع اللحمه ونضع بها البهارات كسبره وشمار وفلفل وتوم وملح حسب الرغبه تخلط تماما ونضع بها بعد ذلك البيض ويخلط تماما وبعد ذلك نضع البقسماط ونعجن الى ان تتماسك عجينه الكفته البقسماط مقدارو حسب تماسك العجينه بعد ذلك نلف قطع الكفته نسخن الزيت ونحمر به قطع الكفته جيدا بعد التحمير نضيف فى الزيت كوب من الماء ونضيف الصلصه ثم قطع الكفته وتترك على النار الى ان تتشرب كل الماء بعد ذلك ترص ساخنه على طبق التقديم وتزين بحلقات الطماطم وقطع الفلفليه
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Amany Elamin)
|
هويدا صباح الخير,, وشكرا علي الوصفات المهمه وهي الأساس ومهمه جدا,, واصلي فيها وأفيدينا,,
علي فكره أنا عندي وصفه أسهل لملاح النعيميه الجبتيهو, وصفته لي صحبتي وطلع خطير,, بس بدون لحمه لأني بحبو كده:
الريسيبي: تحمر تلاته بصلات متوسطة الحجم,, بعد التحمير تضعيهم في الخلاط ومعاهم عدد كاسات زبادي حسب الكميه النهائيه المطلوبه,, يعني ممكن تلاته كاسات مثلا,, مقابل كل كاس زبادي تضيفي ملعقه كبيره دقيق وملعقه كبيره صلصة طماطم, تخلطيهم في الخلاط ,, تضعيهم في الحله وتضيفي الملح والبهار وباقي زيت تحمير البصل, وعلي نار هاديه تسيبيهو يغلي شويه وخلاص :)
بيطلع مسبك وتقيل ولذيذ
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: SHIBKA)
|
أمون سلام ليك و لكل ضيوفك
كل سنة و انتو كلللللللكم و كللللللل حبايبكم طيبين و بألف خير و عافية
و يا أمون إن شاء الله السنة الجاية تعملي لينا بث حي و مباشر من مطبخك الخاص.. و نفرح بيك و بكل الحبايب يا رب
نحن فاطرين بالزي الموحد.. عصيدة بتقلية معاها شوربة عدس و سلطة روب و بليلة استبدلنا فيها العدسي و الحمص.. باللوبا السوداء الBlack Beans
لأنها الموضة بتاعة الريجيم هنا.. بعد ما اتكلم برنامج تلفزيوني عن انو إذا أكلت 70 جم من اللوبا دي كل يوم مطبوخة بأي طريقة.. و أكلت باقي وجباتك عادي بينزل وزنك.. بالإضافة لفوائد غذائية أخرى.. و عينكم ما تشوف إلا النور.. الرفوف في المحلات فضت منها.. وأصدقاءنا بيقولوا انها فعلاً بتشتغل!!
أها قلنا نجربها.. و على امتداد الشهر الفضيل إن شاء الله .. حأوريكم إذا الكلام طلع صاح :)
____________________________________
العنوان دا ناقص لنا مهدي ياخ.. :)))
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Sana Khalid)
|
Quote: مريومة الف الف لاباس عليك وبرسل ليك آبري رايك شنو العنوان بس ..
وكل سنة وانتي طيبة ورمضان كريم |
تسلمي يا نعوّمة، والابري حقك بتكون الملايكه حايمه فيه لحدي حسي... غايته كان في زول جاي الدمام، رسلي لينا حبّة آبري معاه خمسة ستة ملايكه ... نبل بيهم الريق... ههههههههههه
سناء خالد، مالك علينا بكلام الريجيم ده يا بتّي... بعدين اblack beans دي عندي معاها ضد، ما حبيت طعمها خالص... ادينا وصفة تساعد على البلع، وبمشي بعدين اجيبها... وورينا ال70 ديل قبل ولا بعد الطبخ هههههههههههههههههههههه، راجعي الايميل
بجيكم بكره، اشد حيلي شوية... وكل يوم بكتب ليكم ناوية اعمل شنو في الفطور
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: مريم بنت الحسين)
|
رمضان كريم يا بنات يا حلوات... كتر خيرك يا امانى حسبانى مع الناس الخطرين ديل.
انا ذى مريومة....بحاول اجهز لمضان من بدرى. بعمل شوربة العدس (من غير بهار و ملح ) و اختها فى الفريزر. بلف كفته و اجمدها. بنظف سمك بلطى (كميات) و اطعمه و اقسمه فى اكياس و اجمده (ايوه بناكل سمك فى رمضان) . بفرم الكبكبى و مع البصل و الشمار الاخضر و اجهز الطعمية. بنجض لحمة فى بصلة و بهارات و اقسمها و اجمدها (عشان الدمعة للقراصة)...و هكذا.
قبل فترة كنت عاملة lab بتاع باسطة(Baklava). بفتش على the best وصفة بتاعة باسطة. و الان عندى وصفة مبالغة. بجيكم بيها المساء من البيت بى الكى بورد العربى. __________________________________________________ سناء...متزكرة كلامنا عن الشمار الاخظر و انه غالى و ما بيتلقى بالساهل ? السنة دى اتفالحت فى الصيف ده و عملت حديقة خظار فى الحوش. و اهم حاجه كانت الشمار الاخظر. كل ما يقوم كفاية بقطعه و اجمده freash . هسى عندى كمية ح تكفينى -ان شاء الله- لحدى الربيع الجاى. زرعتا- برضو -كوسة و خيار و فلفلية حمراء و خضراء و نعناع و طماطم. ما تستغربوا لو حشرت ليكم الحجات دى فى اى وصفة.
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: SHIBKA)
|
فطور بكره
صينية بطاطس بصدور الدجاج والبشاميل(الوصفة تحت) ملاح نعيمية مع عصيدة سلطة روب مع جزر وخيار
الحلو كسترد مع كاكاو ومكسّرات(الوصفة تحت)
___________________________________________________ الوصفة بتاعت الصينية لقيتها في موقع وعجبتي ولقيت كل المكونات عندي.. قلت لازم اعملها 4 صدر دجاج مسحّب 2 بصل, مقطع شرائح 2 بطاطا حجم كبير, مقطع حلقات 2 فص ثوم, مفروم 3 ملعقة كبيرة زيت زيتون 2 ملعقة كبيرة زبدة 2 ورقة غار 1 ملعقة صغيره فلفل أسود ملح مقدار بتاع صوص بشاميل بأي طريقة انتو تفضّلوها، واضيفوا ليها بقدونس مفروم
تسلقي الصدور مع ورق الغار وملح، ممكن تستخدمي بهارات تانية المهم انه الزفرة بتاعت الصدور تتشال، بعد تتسلق نقطعها لمكعبات... نشوّح البصل والتوم في الزبدة مع زيت الزيتون ونكب ملح وفلفل ونقلب لحدي ما البصل يدبل، وبعداك نكب فيها الصدور في صحن بدخل الفرن، نكب شوية من الباشميل، وبعداك نرص طبقة بتاعت بطاطس، بعداك طبقة من خليط الدجاج، وبعداك تاني طبقة من البطاطس، بعداك باشميل تاني...وندخلها الفرن..
دي الوصفة الاصلية، لكن انا غالبا حأعدّل عليها، يعني سلق الدجاج في الاول ممكن يخلي الصدور تبقى ناشفه شويه، انا بفضّل اقطعهم وهو نيين وانجّضهم مع البصله.. ما نجاض كامل لانه البطاطس نيّة...
الحلو ظريفة وبارده... بس انا مشكلتي بشتغل بالاحساس عشان كده ما حأعرف اقول المقادير، لكن الطريقة انه نعمل الكسترد عااااادي... بعداك نكب ملعقة كاكاو، ممكن كاكاو مُر او شوكولاته، بس لو مر زيدوا السكر شويه... وبعداك نكبه في كوريات للتقديم، وهو حار نرش فيه مكسّرات مهروسه هرس خشن... ونخليها في التلاجة.. ظريفة وخفيفة لكن اكلوها بعد ساعتين من الفطور
بحاول بكره انزّل صور للأكلتين....
بعد بكره (كان الله أيانا، فطورنا سمك زي ناس سمارت ، ومعاها شبس وسلطة طحينة...ملاح التقلية مع قرّاصة، الحلو اسمه سوبيا بكتب وصفته بكره)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: مريم بنت الحسين)
|
Quote: غايتو كان جبتي لينا ريسيبي خطيره مجربه للرز بأي شكل أو صوره, بنحبهم معاك لاعبين مانشستر ديل |
بس كدا ؟؟؟؟ إنت تؤمر ياجميل
وصفة رز على الطريقة الافغانية من صديقتي وزميلة السكن في فترة من الفترات المكونات كيلو أرز بسمتي طويل ماء وعاء (حلة ماهلة وكبيرة) طوة حوالي معلقتين سكر زبيب كميته حسب الرغبة ملح حبة زيت زيتون (على قول جيمي إكسترا أولف أويل)
الطريقة تغسلي الرز وتختيهو في الحلة على النار مع رشة ملح وماء تغطيهو كلو (كمية الماء مامهمة لاننا حنصفيهو منها بعد شوية) الخطوة الجاية دي مهمة جداً جداً تختبري رزاية واحدة بالضغط عليها بين أصابعك لو الرزاية نصها بقى لين وإتهرس معاك ونصها التاني الجواني لسة قوي وصعب معناتو إنت كدا صاح وتمام التمام تقومي تصفي الموية من الرز وتخليهو شوية في المصفى في الفترة دي تختي شوية زيت زيتون في طاسة على نار متوسطة ولما يسخن تختي ليهو معلقتين السكر السكر لما يبقى كراميل تكوني رجعتي الرز في حلتو وعلى النار ترشي الزيت واالسكر على الرز على شكل دائري اللي بيها يكون في حبات رز لونا بقى قولدن وفي واحدات لونهم لسة أبيض (لاحظي ماقلت ليك قلبيهو مع بعضو) المهم بقعر الكمشة الخشبية سوي ليك فتحات في الرز وضيفي كمية موية قليلة جداً والبناتي خليهو في النار لغاية ماتنشف الموية وبعد دا ممكن تخلطيهو مع بعضو بيبقى عندك رز طعمو جميل جداً (بالمناسبة مافيهو طعم سكر ولا حاجة) وليهو لونين جميلين جداً
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Rawia)
|
.. . سلام يا انسات وسيدات والله انا البوست دا بهمنى جدا.. وحقيقة رمضان من جاء الواحد فعلا تأكد انه يتيم .. فقد كانت الوالدة رحمها الله تأتى فى رمضان عشان تصوم ولدها العايش وحدانى دا .. اها حسي .. عارفين براكم .. والواحد صراحه فتر افطارات بيوت نسابته وكثره دعوات الاهل والاصدقاء حتى قبل وفاة الوالدة .. بقت ما مريحه الواحد عايز يفطر ويتجدع مع السر قدور بدل يفكر فى المخارجة ورمضان دا قلت المساسكة ما بتنفع .. احسي الواحد يقعد فى بيتو ومع اخوهو ويظبط حالو بس مشكلة الاخو خبرتو تعبانه لا يجد الا غسيل العدة .. ودا اهم شئ .. المهم .. حسي يوم الليلة دا عدا بمزاج الواحد قام سلق كم بيضة ووجاب كفته القوصى جاهزة قلبها فى الطوة وادناها شوية صلصه طلعت كفته بالصلصة .. وظبطنا صحن فول .. وقطعت شوية لحمة سلقتها طلعت منها الشوربة ونشلت الحمه حمرتها ... وبهناك صلطة زبادى ( روب ) وكما ن صحن صلطة حمرا ءاساسا دى اهم حاجة عندى مع الشوربة مع 3 جك عصير 2 مخلوط وواحد ابرى احمر .. بالله لقيتونى كيف .. تانى المهم البوست دا اعملو لينا فيهو وصفات خفيفة يعنى شبكة كلفتتنا هى وهويدا فى العصيدة مره بالزبادى ومره بشنو ؟. ياخى عندنا دقيق سيقا للعصيدة قولو لينا المقادير لكوريتين عصيدة كيف .. !! وشوفوا لينا ملاح خفيف سهل الوصف والتذوق .. ملاح نعيمية ولا ان شاء الله ام بقبق ووجبات خفيفة كدا .. ما تخشوا لينا فى الغريق .. وتقعدوا تتبادلو لينا الخبرات الصعبة .. ومناظرات وكدا .. ونظام وسمك نظفوهو وقطعوهو شرائح وفى الديب فريزر ياخى دا انا لمن اجى من المكتب عشان يفك من التلج الاذان بأذن .. شنو شغل الناس الماجزة ولا متعطله دى .. وفى حد يأكل سمك فى رمضان ..
فبالله ساعدونا واهم شئ الوصفة تكون هنا قبل الساعة 4 بتوقيت امدرمان
------------
بالمناسبة اشك انو دانيا وراوية يعرفن يسوا سلطة روب ولا حتى يسلقن بيض
قرقر قرقر قرقر
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Tabaldina)
|
تبلدينا
Quote: البوست دا اعملو لينا فيهو وصفات خفيفة يعنى شبكة كلفتتنا هى وهويدا فى العصيدة مره بالزبادى ومره بشنو ؟. ياخى عندنا دقيق سيقا للعصيدة قولو لينا المقادير لكوريتين عصيدة كيف .. !! وشوفوا لينا ملاح خفيف سهل الوصف والتذوق .. ملاح نعيمية ولا ان شاء الله ام بقبق
|
اول شي رمضان كريم وصفتي للعصيدة مختلفة عن بتاعة هويدا لاني بعملها بدقيق طاحونة اب راس عارف محلها ولي اوصف ليك
المهم ياسيدي من جارتكم ولي من نسيبتكم ولي من واحدة من اخواتك تجيب خمار
من اليوم القبلو تكب معاهو(مع الخمار) دقيق الطاحونة ولي سيقا وموية وتعجنهم ويكون اقرب للسايل ما حاجة جامدة يعني ما تكتر الدقيق
المهم لما تبقى عليها(قبل 3 ساعات من مواعيد الافطار) تجيب حلة فيها موية بالمقدر الانتو عايزو سواء كورتين ولي اكتر وتختها في النار تغلي بعد ما غلت وهي في النار تبدا تكب في العجين العملتو قبيل داك شوية شوية وتصوط لغاية ما تتخن
قول من 5-10 دقايق انت بتصوط بلتقاها ابتدت تتقل تكبها في كورية فيها شوية موية في القعر وتختها بالجنب لغاية ما تبرد
واعمل التقلية بعد دا من الوصفات الفوق ديل
وبالهناء والشفاء
اقتراح انعام حلو اكتب انت نفسك في شنو وهنا بنجتهد نوصل الوصفة الى عند شاشتكم الموقرة
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Amira Elsheikh)
|
اها ننقل ليكم طريقة عمل البسبوسه وهي طريقه سهله ومجربه لانو الليله الفطور جهزتو مريم كتر خيرها وعملت تحليه لكن ممكن دي تساعدكم في التحليه برضو المقادير: - كوبان من الدقيق وملعقتا طعام من جوز الهند.
- ثلاثة أرباع الكوب من السكر.
- ملعقة طعام من الباكينغ باودر.
- ربع قالب من الزبدة المذوبة وكوب من القشدة.
- كوب من اللبن الزبادي.
- القليل من الطحينة لدهن الصينية.
- القليل من اللوز أو الفول السوداني للزينة.
قطر السكر:
- كوبان من السكر.
- كوبان من الماء. - فانيلا.
- ملعقة طعام من عصير الليمون.
- ملعقة طعام من السمن البلدي.
الطريقة:
- تخلط المكونات الجافة أي الدقيق وجوز الهند والسكر والباكينغ باودر مع بعضها، ثم تضاف إليها الزبدة والقشدة.
- يدعك هذا المزيج باللبن الزبادي للحصول على عجينة، تدهن الصينية بالطحينة ويسكب فيها الخليط ويترك حتى يختمر.
- يقطع محتوى الصينية إلى أشكال مربعة منتظمة وتوضع حبة لوز في كل مربع، تخبز الصينية في الفرن حتى تحمر.
- يحضر القطر بغلي السكر مع الماء، وقبل انتهاء الغلي يضاف عصير الليمون والفانيلا والسمن المذوبة.
- يصب القطر الساخن فوق البسبوسة وتخبز مجدداً في الفرن لمدة 5 دقائق.
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: هويدا شرف الدين)
|
السيدات والآنسات الكريمات ....
عندي ملاحظة صغيرة.
شايف المقادير فيها حاجات بتبعدنا عن (مطبخ رمضان التقليدي) .... يعني مثلاً في واحدة من الوصفات شفت (مكعّب ماجي). ياخ بصراحة ماجي دي عندي معاها حاجز نفسي .. أكلنا من أُمّاتنا ومن حبّوباتنا أصناف لا تزال أبخرتها في الذاكرة، وده جيل لا كان بيعرف المعلّب ولا المجفّف (عدا الآبري بألوانو).
القاصد أقولو، إني تمنيت يكون البوست إحياء للأصناف الإتعودنا نشوفها في المائدة (البِرِش) الرمضاني ... وإلا حتندثر الأشياء دي، وبدل لقيمات في يوم حنلقى (الكرواسون).
بعدين يا شِبكة:
Quote: صحي دي شنو الشبك المن الصباح دي انا رديت وشفت الصورة قايلة انعام القالت |
يعني قياساً على كدة .. ممكن تردّي على هويدا على أساس إنها ود الصايم؟ ... شفتي يا هويدا الصورة (المحوِّصة) دي بتعمل فيك شنو؟
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: أحمد ابن عوف)
|
أحمد
القراصه طبعا انواع ، في قراصة تقيله وفي قراصه خفيفه ، في قراصه بالخميره والتانيه بدون خميره
المهم لو عاوز القراصه التقيله ( خمسه بوصه) تجيب الدقيق بتاع القمح أو سيقا وتكب فيهو حبة ملحه قدر معلقه صغيره وبعدين تبدا تكب المويه في العجين ، بس ما تكترتها يعني العجين يكون تخين وبعد داك تتم العواسه بالطريقه المعروفه ، والقراصه الخفيفه تكتر المويه يعني العجينه تبقي لينه ، ودي تتعاس مباشرة في قراصه تانيه تضع خميره مع العجين وتترك لي فتره حتي تتخمر وبعد ذلك تتم العواسه في الصاج أو الطوه (بس دي ما سمحه).
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: محمد علي شقدي)
|
الاخ هويدا
شكرا ليك والف تحية كده
Quote: المهم لو عاوز القراصه التقيله ( خمسه بوصه) تجيب الدقيق بتاع القمح أو سيقا وتكب فيهو حبة ملحه قدر معلقه صغيره وبعدين تبدا تكب المويه في العجين ، بس ما تكترتها يعني العجين يكون تخين وبعد داك تتم العواسه بالطريقه المعروفه ، والقراصه الخفيفه تكتر المويه يعني العجينه تبقي لينه ، ودي تتعاس مباشرة |
النار عاليه وللا منخفضة؟؟
في العين الكبيرة وللا الصغيرة؟؟
عادة بستعمل الطوه، امسحها بزيت وللا سمن؟؟
جيبت صاج كهربائي لكن لسه ما استعملته؟؟ لو عندك خبرة فيهو افيدينا، والفرق بينو وبين الطوه شنو؟؟
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: SHIBKA)
|
.. . عارفه يا شبكبك صورة أميرة وهويدا ليها شهر مجهجانى .. طوال بفتكر دى انعام وود الصايم ..
بعدين تعالى هنا دى شنو الشبك دى
Quote: من جارتكم ولي من نسيبتكم ولي من واحدة من اخواتك تجيب خمار من اليوم القبلو تكب معاهو(مع الخمار) دقيق الطاحونة ولي سيقا وموية وتعجنهم ويكون اقرب للسايل ما حاجة جامدة يعني ما تكتر الدقيق |
جارتنا عندها خمار ..؟؟ ووين الجارة والنسيبة العندها خمار .. يمين حسي لو سالت دانيا ولا سمارت ذات نفسها عنو ما يعرفوها وكمان جابت ليها شحدة وتحضيرات من 24 ساعة ما تصعبيها .. خمار شنو ؟؟ عايزنها عصيدة فطيرة ..
اقول ليكم كلام العصيدة دى خليناها بنجيبها جاهزة ..
كدى بالله انت واميرة جيبو وصفت كفته البطاطس .. وسليقة الفته .. والمعكرونة بالبشملى .. والمحشى بورق العنب .. ديل كفاية بوصلونى اخر الشهر بأذن الله الباقى نكملو هبوط مظلى من بيت العوض فى اقصى بحرى الى بيت ملاسي فى فيافى و خيران امدرمان ..
--------------------
حسي يمين الحناكيش يفتكروا الخمار دا هو الخمار بتاع المنقبات داك ساعدونا بالترجمه ياخ .. ناس الساحل الغربي ونواحى كاليفورنيا صعبه عليهم قرقر قرقر قرقر
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Rawia)
|
ياراويه شكرا علي الريسيبي بتاعت الرز بالطريقه الأفغانيه ,, شكلها تيستي,, وفيها حركات معلمين واضحه
ومعليش حأجننك بالرز شويه,, كان في بالي رز بالخضار (رز أصفر)
وبرضو المقلوبه بتاعت الفراخ بالرز (زي الكبسه كده) رز أصفر برضو ,,
ممكن ياحبيبه تفتي لينا في أمر الوصفتين ديل؟ في انتظارك :)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: مريم بنت الحسين)
|
يامريومه وصفتك بتاعت الفراخ بالباشاميل دي لو كتبتيها أمبارح مالو؟
امبارح ياستي عملت فراخ بالطريقه التقليديه, سلقت الفراخ وبعد ما اتسلق صفيت الشوربه وسلقت عليها خضار, دي حركه مهمه لأنه الخضار سلقه ما بيحتاج وقت زي الفراخ وعشان ما يفقد قيمته الغذائيه بسلقه في الشوربه براهو, بعد داك خلطتهم في الخلاط ورجعته النار خمسه دقايق وخلاص, طلعت شوربه خطيره,,
يللا هنا عندي سؤال, في أي اضافات بتفتكريها مناسبه, يعني نوع خضار معين أضيفه, أو أي حاجه أضيفها للخليط؟
المهم الفراخ كنت عايزه أحمره في الفرن, تاني قلته علي شنو, حمرته بالزيت عادي وخلاص, صدقيني لو كان عندي وصفتك دي كنت دخلته الفرن وهو مسلوق مع الباشاميل والبصل, فعلا شكلها كان حتطلع حاجه لذيذه :)
المهم المره الجايه حأجربها انشاء الله,,
بالنسبه للحلو
Quote: بس انا مشكلتي بشتغل بالاحساس عشان كده ما حأعرف اقول المقادير |
حركات ماما دي ولاظريفه
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: SHIBKA)
|
ياهلا بالعزيزه سمارت وكمان الحبيبه دانيه المكي,, البوست نوّر وفي انتظار خبراتكم,,
سمارت
Quote: السنة دى اتفالحت فى الصيف ده و عملت حديقة خظار فى الحوش |
زرعتي عديل كده؟ يعني حتاكلي خضار من عمل ايديكي؟ مبااالغه, ماشاء الله, دي تجربه خطيره وتستحق الاشاده
في انتظاركم :)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Sana Khalid)
|
سناء خالد نورتي البوست,, وكل سنه وانتي طيبه وكل أسرتك الصغيره والكبيره بخير ,,
بعدين عارفاكي شايله حالي في بوستات الكوره هههههه وكل مره هارشاني يابت أمشي علي المطبخ .. يابت أمي علي المطبخ,,, فقلنا نستفيد من خبراتكم وجدعاتكم دي,, خصوصا اني رمضان بصومو من منازلهم ! قرايه بالصباح وبتفرغ للمطبخ بعد العصر,,
أنا ماعندي مشكله في الأساسيات,, ماما فنّانه في الطبيخ واتعلمت منّها كل أساسيات المطبخ السوداني,, يعني كل الكلام بتاع عصيده وتقليه وكفته وفراخ وسمك وطعميه وسلطات وطبيخ كلللل الأساسيات دي بظبطها خالص, لكن حابه أتعلم وصفات مجربه جديده, يعني مثلا حركه جديده للفراخ بالفرن, صينية سمك بطريقه مبتكره, حلو خطير مجرّب, سلطات بالذات لأني بحبها وبحب الخضار المسلوق ووصفاته جدا,,
وعارفه انتي والمعلمين مريم ووجن وسمارت أحسن من يفيدنا بوصفات جديده ومبتكره, ده غير طرق مبتكره أو مختصره لعمل الوصفات الترادييشينال المعروفه,,
في انتظارك ياحبيبه وانتظار وصفاتك,, وتصومي وتفطري علي خير :)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: هويدا شرف الدين)
|
الاخت الكريمة أماني و كل الاخوات والاخوة رمضان كريم,تصومو وتفطرو بألف خير,وتقبل الله .
يا أماني متابع معاك البوست من الآول, بوست جميل جداً,بس يا ريت وزي ما قلته في بوست (مريم بت الحسين) قبل كده الصور الصور الصور..الآكل هو (منظر) ولو تمكنت كل واحدة من تصوير (الوجبة) او (الطبق) ح يكون أجمل و أفيد...والاخت سناء خالد,كانت أنزلت صور عن الاطباق العملتها,وكانت حاجة روعة! عندي تعليقات عن بعض الوصفات اعلاه و كمان عندنا وصفات بتاعة عذابة رهيبة تنفع معاكم..ههههههههه
بس كترو لينا من وصفات (الشوربات) بمختلف انواعهها وبالله ياخي الشرح بسطوهو لينا,في اسماء حاجات ما بنعرفها ,بنشوفها في المحلات,لكن ما بنعرف لي شنو؟؟واستخدامها كيف؟؟
(الزول الطباخ موش البعمل كل شئ! ولكي هو الزول البعمل من اللاشئ ,شئ)...ولا رايكن شنو؟؟ __ ياخي انا فاطر لي بي بامية طبيخ وسلطة روب وجوافة بالحليب شفتو جنس البهدلة دي كيف؟؟؟ ـــ لكن طباخين ونحمد الله,عزابة محترمين..هههههههه
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: هويدا شرف الدين)
|
البسبوسة المظبوطه
3 كوبايات سميد, ممكت اثنين ناعم و واحده خشن لو بتحب البسبوسه شويه خشنه كوبايه سكر علبة قشطه و نفس العلبه مويه ملعقه صغيره باكنق باودر ملعقه صغيره فانيليا حسب الرغبه
للتسقيه ممكن علبة نستله الحليب المحلي المكثف او الشيره العاديه لو ما عندك حليب مكثف لكن جربوها بيه بتلطع رهيبه
الشربات او الشيره كوبايه و نص سكر ثلاثه ارباع كوبايه مويه عود قرفه و حبتين حبهان و ذرة ملح او عصرة ليمون (انا ما بحب اللليلمون في الشيره) و ملعقه صغيره فانيليا
الطريقه اخلطي الدقيق و الباكنبق باودر و السكر كويس و اضيفي القشطه و المويه و الفايليا و حركيهم شديد و لو عندك مضرب ما بطال
ادهني الصينيه بشويه طحينه و صبي عليها العجينه بتاعتك و على فرن مسخن لمدة 45 دقيقه لكن راغبوها لانه الافران بتختلف (ما تحرقوها و تجوا تقول دانيه قالت خهمسه و اربعين دقيقه )
اول ما تطلع من الفرن نصب عليها الشربات الساخن (ما يكون بيغلي لكن لسه سخن) و نغطيها بفويل شويه و نفتحها. لو اضفنا الحليب المكثف بدل الشيره بتكون شويه ناششفه. ممكن برضه تعملي نص كمية الشيره و تلخبطيها بالحليب المكثف بتدي نكهه. ممكن برضه نصب نص العجينه في الصينيه و عليها مكسرات مبروشه و بعدها نصب النص الثاني و نواصل عادي. كده بقت بسبوسه محشيه.
| |
|
|
|
|
|
|