جرائم الانقاذ قضية الاعدام في حق ٩ سودانين ابرياء عزل في العام ٢٠١٠ م وتلفيق تهم مصنوعة ومفبركة بقتل الصحفي محمد طه محمد احمد
هذه القضية تعد من اسوء الجرائم العنصريه التي قام بها الانقاذ بغرض تصفية حسابات سياسية من ابناء دارفور بتهمة مساندتهم الحركات المسلحه ،، هذه الجريمة كلما اتذكره يعود بي الذاكرة الي عهد الوحشية والظلم والاستبداد الذي لحق بشعبنا علي امتداد السودان وداخل العاصمه الخرطوم،،،
تم اعتقال هولا ال ٩ اشخاص من منازلهم في العام ٢٠٠٦ بعد موت الصحفي محمد طه محمد احمد واراد الانقاذ عبره ان يستهدف ابناء دارفور النشطين والمثقفين باعتبارهم سند للمعارضة (حركات الكفاح المسلح) واتذكر اثنين منهم ادم ابراهيم واستاذ جمال من افضل اعيان الحي وكانو جيراننا ادم ابراهيم كان يعمل في السفاره الامريكية واستاذ جمال من اميز وافهم رجال الحي وانبلهم اخلاقا وكرما.
هولا جميعهم لا يعرفون الصحفي محمد طه وليس لهم ادني علاقة به والذين اقتادوا محمد طه وقتلوه حسب اقوال اسرته وابنائه ولا واحد من هولاء ٩ يشبه المجرمين الذين اختطفوا محمد طه ، الاولاد قالو نحن شفنا اشكال الناس الساقو ابونا وديل ما منهم ولا بيشبهوهم نهائي عشان كده الكيزان رفضو يجيبوا الولد عشان يشهد .. علي الاسف ده كان ملف امني بامتياز استخدم فيه الانقاذ كل الوسائل اللاخلاقيه في التعذيب والضرب والاهانه لرسم المسرحيه الهزيله تحت الضغط والويل من العزاب عشان يعترفوا،، هل عارفين انو تم اعتقال كل زوجات ال٧شخص وزوجة استاذ ادم كانت حامله ب ٨شهور تم تعزيبها ومنعوها من الاكل والشراب وهي في المعتقل عشان يكسروا شوكة زوجه ويعترف بالجريمة واصغر ولد الما كان متزوج اسمو صابر جابو ليه امه عشان يعزبوه قدامه عشان يعترف تخيل والله هذا ما حصل..قلعو ليهم اضافر الارجل والايدي وقطعوهم في ظهورهم ..
اتذكرتي شهر اكتوبر من العام ٢٠٠٩ كنا معتقلين في معتقل دبك وجابونا راجعين كوبر وهم كانو جنبنا في قسم الاعدامات ومره كنت مريض ناس الامن عايزين يودوني الدكتور قابلت زول نحيف في الباب مكلبش في رجلينه ويدينه للوراء وانا كنت مكلبش في اليدين ناداني ي عبدالمنعم ابو طويله ،،بصوت عالي شفتو لكن ما عرفتوامن التشويه الحصل ليه في وشو وجسموا حتي قربت جنبو وقلت ليه استاذ جمال قال نعم كبستو ونحن الاتنين مكلبشين بالحديد وناس الامن وقعوا فينا دق يلا اتحرق ي زول ،امشي من الزول ده تعرفو من وين؟ لكن صمدنا الاثنين فتره قصيره تحت الردم والعكاكيس قال لي كلام مهم جدا ي اخوي منعم نحن كده كده ميتين والوضع النحن قاعدين فيه احسن الموت والله والله احسن الموت ولكن العزاب ده كلو عشان القضية ،كل تحرياتنا عن الحركات ،وقضية دارفور وعلاقتنا بالمنظمات .. وقالي ناس الامن قالو ليهم نحن نعدمكم عشان تكونو عزه وعبره لبقيه اهلكم مافي زول يفكر يدعم قضية دارفور ولا يقيف مع الحركات.
استاذ جمال وشو كان جروح واثار ضرب واذانه فيه دم ويده الايسر وارم ولسه مكلبش عندو اسنان اتنين مافيشات منظر اذا شاهدته لشخص كان تعرفه من زمان ينفطر قلبك . تاني ما شفته لمن طلعنا من المعتقل في العام ٢٠١٠ م سمعنا انهم اعدموهم جميعا لهم الرحمة والمغفرة تركو زوجاتهم ارامل واولادهم يتامي،،
بينا وبين الانقاذ دماء ودموع لن تتنسي بطول الزمان ما دمنا حيين .
وطن قادم
مساء اليوم التاسعة مساءا بتوقيت السودان ستحكي /عاشة محمد زوجة /ادم ابراهيم (الملقب غربتشوف ) احد الشهداء هذه القصه الحزينه عبر صفحه المحاميه الامريكية سودانيه الاصل
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
فيس بوك
تويتر
انستقرام
يوتيوب
بنتيريست