وحات الله امريكا مستهبلة..وحكومتنا مستهبله.... والاممة المتحدة مستهبلة .......ومجلس الامن كبير المستهبلين.....قالو ييجبو الناس ويودوهم يحاكموهم في لاهاي.....القرار يا الله ويا امين مرق من خشم ناس مجلس الامن.. امريكا قال تف......... اصلو قرار زي دا ما تسوهو...... عشان شنو؟...... عشان في ناس امريكان برضهم مجرمين حرب.....ونهارة باكر يجو الجماعة يقولو يودوهم لي لاهاي....والجقلبة تقع..... انا امريكا ست الحل والربط.....ناسي ما بيحاكموهم في لاهاي ناسي يتحاكمو عند اهلم...... بريطانيا من عامنها مطموسة قولي لي امريكا انتي ما تصويتي علي القرار.....وسوي نفسك كأنك ما سمعتي شي....والقرار اصلو نضم في ورق....ويا امريكا يا اختي النضم دا هرشة ساكت.....وانتي عارفة البئر وغتاها......حكومتنا برضو عارفة انو هرشة..... لكن بتسوي نفسها خايفة وانها مسكينية......ديل ناس السياسية ديل... حليلكم منهم........ وبعدين وحات الله البيودوهم لاهاي ديل....... ناس بخيتين.......هو في زول لاقي يودوهو اوروبا؟......الناس كلها تقابض وكايسة لي درب المرقة..... اها ديل جاتم في محلهم في حظ اكتر من كدي.....؟.....وحات الله دا كان انا..حسي كانو الناس مالين الحوش... وجاين يباركو.......وانا مكوع فوق العنقريب....وفرحان فرح شديد.....واشبك الناس هلو هلو... هاي هاي.... والزول ماشي لاهاي.......بعدين حلفو قالو السجن هناك...فُندك عديل كدي.....نوم واكل وشراب....واكان معرس كل يومين مرتك تجيك وتبيت معاك.....وان ربنا قسم وجبت جنا.. عدل الولادة...والسماية.... كلو علي ناس لاهاي.....و الولد بعدين ياخد الجنسية....ويمرق لك خواجة راسو عديل كدي....... نان انا محظوظ؟........ ساكن في بيت كلو فيران.....جنننا وعذبننا.... وفيران البلد دي تغيانات...ولا ساعلات.......الفار عندنا هناك يشوفك يقوم جاري.. ديل هنا لا... يقدل...ويضرّع قدامك....... جبت الدواء سويتو ليهن.... اول البارح تلاتة واربعين فار.... لقيتن ميتات..... الفار ورا الفار....عديتن مرتين ...وللتاكد جبت الوليدات يعدوهن تاني......شفتو النعمة دي؟......... والله حنيت علي روحي..ومن البكا جبت شي... انا زول محموووووول... تلاتة بنات وولد وامهم وتلاتة واربعين فار وجهاز المغتربين..ديل كلهم ياكلو من ضهري....... اها دي مش حالة اخير منها لاهاي؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
bayan
فيس بوك
تويتر
انستقرام
يوتيوب
بنتيريست