|
|
 نريده وسيما ... مرشح رئاسة الجمهورية (ولاعزاء للشينين) هذا دلوي يابله
|
بيل كلينتون بدأ به عصر جديد ومفهوم أجد بالنسبة لامكانيات ومقدرات رؤساء البلاد في العالم أجمع ..إنتهى عهد الرؤساء التقليديين من ضخامة الجثث وكعبرة الهندام( بوريس يلتسن مثالا) وإنعدام اللون والطعم والرائحة (بوش الاب) وظهر رؤساء يتمتعون بوسامة وشباب نجوم السينما ووجاهة موديلات عارضي الازياء, فبعد فوز كليتنون قامت بريطانيا بتتبع الموضة وفصلت توني بلير حسب المواصفات الجديدة كي لا تفوتها عربة التقدم والرقي الاجتاحت العالم وكي تنافس أمريكا في شباب ووسامة رئيسها . روسيا كان الـعبء عليها أثقل فلابد من رجل تنطبق عليه شروط الوسامة ويملك القوة والبطش والعقلية الذكية لكي يدير إرث الامبراطورية الكبيرة فكان الاختيار الموفق جدا لبوتين فهو قمة الوسامة مع جسم رياضي رشيق وطول يذهل جميع نساء الارض بالاضافة لذكاء خرافي مكنه من لعب دوره بدهاء ويشهد على ذلك وظيفته في السفارة الروسية في المانيا (كجنايني وساقي ورد) بينما هو الاتاشي ورجل المحابرات الاول
نريد أن نلحق بالعالم الاول
نريد تتبع الموضة ولو بعد سبعتاشر سنة
نريد رئيسا من غير (كرش مدلدل) نريد رئيسا ذو لباقة عالية تجنبه حلفانات الطلاقات على الاثير وفي الفاضية والمليانة
مرحبا برئيس سوداني وسيم وذو لياقة بدنية عالية وجسم رياضي رشيق وبالتأكيد لباقة وذكاء
Bill Clinton
Barack Obama
Tony Blair
VladimirPutin
Dmitry Medvedev
|
|
 
|
|
|
|
|
|
|
|
Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: Raja)
|
الامير بدر
| Quote: تانى دايرة ترجعينا و تجمعى بين وسامة الايدلوجيا وبطشها طيب |
هنا أستحضر عبارة أستاذنا ومعلمنا كلنا بكري أبو بكر رودا مردة هي رودا مردة
فـروسيا هي روسيا بنفس قوتها إن لم تكن أقوى وبوتين في إعتقادي من أقوى رجال السياسة في العالم الان بالمناسبة أنا (معجبة) بل متيمة بهذه الشخصية
ورسيا تحفظ توازن القوى وتتحالف متى تشاء مع الغرب وتفرض سياستها
الروس قادمون
| |
|
|
|
|
|
|
|
|
|
Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: Rawia)
|
ملاسي
| Quote: وسيماً في العرسان خلوها. |
طبعا العرسان وإختيارهم بتدخل فيها إستراتيجيات وتكاتيك وظروف تانية
اللارجا* والوضع الاجتماعي والحيرة في ندرة الرجال بعد ماكمل نصهم في كرري والنص التاني في حرب الجنوب
_____________
*
تماشيا مع الثقافة الفرنسية الوقعت عليك من يوم مباراة الجزائر
يسرني وضع كلمة فرنسية في الرد على مداخلتك
لايفوت على فطنة القارئ ان الكلمة معناها القروش
| |
|
|
|
|
|
|
|
|
|
Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: Rawia)
|
Quote: طبعا يا راوية أنا كوووولهم كوم وبوتين كوم تاني.. سكت الكلام
* طبعا لقيت روحي كاتبة "يلتسن" الشين بدلا من "بوتين" الوسيم.. |
بوتين بالنسبة لي زي أبطال الاساطير والقصص الخيالية
بقعد أسمع في قصص عنه من الروس ولا بمل ولا أفتر
وهو بالمناسبة بالنسبة للروس بطل شعبي
وشخصية يرنوا الجميع لها ويعملوا على التشبه بها
القصة الحلوة
هو هسة لابد كرئيس وزراء وممشي الامور كالعادة لغاية مافترة ديميتري مديفيدف تنتهى ويرجع تاني رئيس لروسيا
شفتي الديمقراطية الحقة لووووول
| |
|
|
|
|
|
|
|
|
 Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: Rawia)
|
راوية
انت فتحت باب عاصي.
:).
حاولت افتش عن مرشح حالي للرئاسة..(السودانية طبعا)..بمواصفاتك دي..لكن..ممممممممممممم
لكن لو عملنا تصفية واتنازلنا عن حاجات قصاد حاجات.. اجمل مافي الموضوع انه البشير برضو حيطلع الطيشششششش.
:).
لكن ياراوية مفروض مع (الوسامة) برضو تختي الاتكيت..وطريقة الكلام..والثقافة العامة..واللبس..
ياخي موضوع لذيذ.
محبتي.
:).
| |
|
|
|
|
|
|
|
|
|
Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: Omayma Alfargony)
|
Quote: راوية
انت فتحت باب عاصي.
:).
حاولت افتش عن مرشح حالي للرئاسة..(السودانية طبعا)..بمواصفاتك دي..لكن..ممممممممممممم
لكن لو عملنا تصفية واتنازلنا عن حاجات قصاد حاجات.. اجمل مافي الموضوع انه البشير برضو حيطلع الطيشششششش.
:).
لكن ياراوية مفروض مع (الوسامة) برضو تختي الاتكيت..وطريقة الكلام..والثقافة العامة..واللبس..
ياخي موضوع لذيذ.
محبتي.
:) |
أميمة
ختينا الاتيكيت وكمان حنجيب أماني الامين بسلة الحمام بتاعتها كخبير أجنبي
لانه الحكاية دي مهمة شديد برضو
العملية فعلا عاوزة ناس متخصصين لتعليم المشي والكلام وكل فنون الاتكيت
__________
أإنتو يا أميمة ماترشحوا لينا عادل
ينفع ونص وخمسة
بس لازم يزامل مبارك الفاضل شوية في فصله
| |
|
|
|
|
|
|
|
|
|
Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: Rawia)
|
كدا يا راوية ماقصرتى خالس..
وكمان نعفى ليك النضالات الفاتتك والتى لاتحصى مثل طيارة سلفا كير وبسالة الطيار الروسى
وبونا ملوال الهشك للحركة الشعبية فى وشها...الخ الخ.
أما فى هذا الموضوع الحيوى فلازم يكون عندنا رئيس لقطة يعنى لما يجتمع سنة ألفين وتلاطاشر بسارة بلين يسيب ركبا..
بس إنتى نسيتى فى أمثلة الرؤساء الوسيمين السنيورة بتاع لبنان..
لكن أقول ليك حاجة والله والله لو شفتى الترابى أيام مثل العباسة بت هارون الرشيد والله ماتدى الجمبك..
عليك الله خلى رجاء تفتش ليك مجلة الوسط إرشيف اربعة وتسعين خمسة وتسعين, يمين تشوفى الصورة ولابس لبس العباسة تقولى جايى من بين الرصافة والجسر.
زى ماقلتى مبارك تورتة لذيذة لكن راكى فيها ضبان.
غايتو الإتحاديين لو عايزين رئيس بمواصفاتك دى عليهم بعقيل أحمد عقيل..
وناس الجبهة ينافسوهم بالشريف ودبدر..
المهم قسمتنا الوسامة عندنا ماكتيرة.
| |
|
|
|
|
|
|
|
|
Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: ندى عثمان حسن)
|
شوفى يا رايوة هالله هالله على الجد
انتى كدا تاااانى بتفتحى لينا فاتوح للقوات الهجين
والتدخل الاجنبى والاستعانه بصديق وقد نتضطر غير باغيين
للجمهور ..
المسالة دى لو عايزاها كدا
Quote: مرحبا برئيس سوداني وسيم وذو لياقة بدنية عالية وجسم رياضي رشيق وبالتأكيد لباقة وذكاء
|
اختى الساسه !! لو فتحتى خشم البقرة لباقة وذكاء دى ما بتلقيها
بس ياهو الدراب دا ..
غايتو اوصافك دى يا روويه اجدع ترزى ما يفصلها ليك ..
لكن بصراحه كلينتون دا فى شبابو كان خطييير يشبه كلب الخواجات الملون داك !
اذا فتحتى الباب للتدخل قولى لى عووك ..
الزول دا ما عندو ولد .. بى مخ جديد ؟
لكن عارفه القصة وين ؟ ماشفتى قرنق كان وسيم كيف ؟؟
ـــــــــــــــــ
دلووك مقدود يا بله !! لوووووووب .
| |
|
|
|
|
|
|
|
|
|
Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: وليد محمد المبارك)
|
Quote: وهل هي مضمونة وانا بعرضة على المستشارين
|
بمناسبة المستشارين دى ياشفت خليك مفتح وكلهم يكونو جكس(نساء)
حتضمن دقة,,,ترتيب,,,نظام,,,لبس,,,انضباط..وفاءءءء,,,واخلاص,,وكدا حتقدر تنجز كويس,
,ابعد قدرماتقدر من الرجال وخاصة الشينين لانهم ممكن يهدو فيك,,,
نرسل نجيب ندى ياريس(كخبيرة اجنبية) لانها ممكن تفيدنا,,,,
عليك الله فكرة عمل فريق نسائي دى ختها فى بالك والله حتنجح,,,
لووول حولناالبوست دعاية للشفت ياراوية,,
(عدل بواسطة Amira Elsheikh on 01-27-2010, 09:17 AM)
| |
|
|
|
|
|
|
|
|
 Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: محمد عبد الماجد الصايم)
|
رايوه ضحكتيني ببوستك اللذيذ ده ..
Quote: ختينا الاتيكيت وكمان حنجيب أماني الامين بسلة الحمام بتاعتها كخبير أجنبي
لانه الحكاية دي مهمة شديد برضو |
هههههههههه
عليييييك الله ياراويه شفتي ليك ناس بيعزّوا الشيب غيرنا؟
الشعوب دي كلّها ما بتشوفي ليك شعره بيضاء في راس راجل اطلاقا ..
لكن لو عاينتي لصورة ياسر عرمان الفوق دي الشيب ما يديك الدرب هههههه
أها زي ديل نصّوت ليهم كيف؟
عايزين شغل كتير والزمن ضيق ياراويه, الانتخابات زاتها علي وشك هههههههه
المهم جيبوا لينا صوّر مرشحي الرئاسه هنا عشان نشوف الأقرب حسب مواصفات راويه هههههه
وبعدين نبدأ معاهو مشروع التأهيل 
-----
ماما دوما أوباما وجيه والله,
وعندو كاريزما فظيعه هههههه
| |
|
|
|
|
|
|
|
|
|
Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: Rawia)
|
| Quote: غيتو يا راوية بالغتي ...مدفيديف دا أقصر رئيس يمر علي روسيا .... |
*الصادق يا أخوي ساركوزي دا أنا إتجنبته مخسوس
خفيف كدا وقزعة وعلى قول زينب يشبه البلياتشو
أصلو ما الخلف المفروض يكون لي ناس زي ديستان وميتران
*وبعدين مديفيدف دا قلنا ليك قاعد تيمبرري لما يرجع سيدها
أما سيدها بالله مابنسمغ فيهو ولا كلمة وعلى قول دومة الحكاية ماطول(يستثنى)
*طبعا أطول ناس في العالم لاقوني ناس بحر الادرياتيكي (صربيين)
*ود جيران غوردون براون كنت عاوزة أجيب صورتو لكن لقيتو حيحرجني ويقوي عين الساسة السودانيين ويفتح نفسهم
*الالمان طولهم فارع منطقة بتسبرج في امريكا او قول بنسلفانيا معروفة إن سكانها المان اديهم الطول والضخامة ....عمالقة بس
وسماحة الزول في الطول والعلا
______________
أوباما حا أكتب عنه معلقة براها نرجو الاطلاع عليها لاحقا
| |
|
|
|
|
|
|
|
|
|
Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: Tabaldina)
|
راويه والمتداخلين
سلام
بوست دمو خفيف يا راويه
Quote: حسة أنا ناوية أنزل مرشحة رئاسة اذا بقى فى بوست موازى بعنوان:
نريدها جميييييييييلة , مرشحة رئاسة الجمهورية |
دى منال ح تنافسك فيها يا ندى....ههههههههه
Quote: لوووووووووول بري يا تيسير يا بتي الراجل الشين يفرفر في سدر العدو
انا بفكر في الجنريشين البتولد عشان كدا عريس شين نهي نهي |
دى ضحكتنى لحدى ما دمعته.....
رفقاً بالشـينين....ما تجيهم نفسيات...الأيام دى النفسيات ممكن توديك التوج..
وفى روايةٍ.... أو ممكن تعالجك على حساب الدوله
فى بوست عارضين الأزياء
حالفين بالتقطعهم....واحد فيهم واحد فيهم يعمل ليهو حتة عضل مافى....
وعايزيين ينافسو دولياً قال....!!!!ههههههه
تحياتى للجميع
إقبال
| |
|
|
|
|
|
|
|
|
|
Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: Egbal Elmardi)
|
والله دا امتع بوست،،بعدين في مساحات للاماني وكدا
ولطالما ان هناك مشروعية في الاحلام :: ومن حقي كمواطنة عادية اختار الـ Look بتاع مرشحي
عايزاه يكون ممشوق وبهي الطلعة ، ويكون بيستعمل جل لشعره (كيرلي على خفيف)، عايزاه كمان يلبس نضارة شمس عشان المحافظة على جمال العيون ، وعايزاه كمان دائما شاك (اصلو ما يتأكد) واخيرا عايزاه يكون بيشاهد foxmovies ، ولا يتعاطي الصعوط ، ومهذب الشارب غير ملتحي
و
عريض المنكبين شلولخ 
بالنسبة ليك يا وليد ، اذا كنت طارح نفسك كرئيس وكدا ، انصحك بانك تنسحب ،، شوف المجالس التشريعية بتقسم معاكـ
| |
|
|
|
|
|
|
|
|
|
Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: doma)
|
لااا حولااااا.. بالله كل الناس ديل رايح ليهم رئيس سمح,,. ههههههههه
غايتو صور الأزهري والمهدي في السيتينات ممكن تنافس بالرغم من إبتسامات ملاسي..
في الستينات ما كان في زول شين.. وكل يوم قاعدة أستغرب طيب ليه وليداتهم طلعو شينين؟
ــ
يا راوية أنا الفرنسيين من زمن لوي الرابع عشر ونابليون مافي زول فيهم ملأ عيني غير "دومينيك دوفلبيان".. ساركوزي القزعة مبهدله بالمحاكم وعايز يسجنه عشان حيترشًح للرئاسة الجاية.
"كوتشينر ممكن ينافس. بس الطول برضو مشكلة.. أطنه 152 سم..
تيسير.. الكلام الجبتيهو ده ما ليهو اي تجارب تشفع ليهو:))
غايتو زي ما الرجال بيفتشو على المرة السمحة. لا نقبل بأقل من رجل سمح برضو.. هههههههه
يا دوما أنا غايتو بعرف لي الماني تاني وسيم.. خليه في سرك دلوقت:)))
الشفت.. ما تسمع كلام ناس اميرة وندى وشمايل الهدًام.. ممكن تنافس بمواصفات البوست.. بس خلي راوية تجي تقول ليك المطلوب عشان تبقى مية مية..
أماني الأمين.. وحاتك لو بس ياسر صبغ شعراية واحدة بكرة تلاقي ملاسي فتح 3 بوستات.. راجعي الأرشيف عن بوستات الصبغة:))))
| |
|
|
|
|
|
|
|
|
|
Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: Balla Musa)
|
يا بلة أنا ما قلتا الرجال الكانو بس سمحين.. وحاتك الرجال ما كانوا بيعرًسو غير النسوان السمحات.. قارن بين أمك وابوك. وتاني تعال قارن بينك وبين اي أخت من اخواتك..
عندي خالي - الله يرحمه - كان بيقول: أي أم اسمح من بتها. وكان بيدلل على كده ببنته وأمها. وبينا وبين أمنا:))))
ــــ
أدعم وسامة.. أوبس ترشيح مبارك الفاضل الوسيم. وبالمناسبة ما تتخيل بريده بس عشان فيه شبه غير طبيعي مع أبوي الله يرحمه.
| |
|
|
|
|
|
|
|
|
 Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله (Re: د.محمد حسن)
|
Quote: لا والله ياراويه فرانسواميترا دا سمح كله لظله رغم انه كبر سنا
اتخيليه دا لما كان في عز الشباب اكيد يرمي الزول فوق الشوك
غايتو ساركوزي دا بشبه مهرجين السيرك
ما بقدر انزل سقف المواصافات عشان ما تحشروا لي اوباما دا
الموضوع ما الطول وبس |
ميتران شفت ليهو صورة باليونيفورم في الحرب العالمية التانية
وسيم وسيم ورقيق جدا
من صورته إتخيلت حبيبته حتكون كيف وبيحبوا بعض قدر شنو؟
لكن لازم نشتغل معاك شديد عشان تغيري رايك في أوباما
| |
|
|
|
|
|
|
| |
Rawia
بدر الدين الأمير
Kostawi
Hussein Mallasi
Raja
Omayma Alfargony
Balla Musa
doma
وجن
الصادق عوض
محمد عبد الماجد الصايم
omer osman
دينا خالد
عمر عشاري
[/IMG]
داليا حافظ
هواري نمر
naeem ali
الخير محمد عوض
Yassir Tayfour
ALZOLZATOO
خالد عبد الله محمود
نجوان
nadus2000
mamkouna
بلدى يا حبوب
Egbal Elmardi
صديق الموج
شمائل النور
د.محمد حسن
PLAYER
JAD
فيس بوك
تويتر
انستقرام
يوتيوب
بنتيريست