الفرح القادم،،،
ليل الهجر مهما طال .. واْرْخَى ظلامه القاتِم
أكيد بُكرة الصباح حَيَبِين .. مادام الفرح قادم..
.............................................
تعالوا نَغَنِّي يا أحباب .. ننسى الماضي ما أمْكَنْ
نسوِّي من الفرح مرفأ .. للحُب والغرام مسكن
الآهات بعييييييييد لِبَعيد .. ما تَغَشانا تِتوطَّن
ونعيش باقي العُمُر أفراح .. لا أحقاد لا مظالم...
.............................................
السر مهما قُتْ تخْفيهو .. لابُدْ يوم يكون واضح
والزول ماب يعيبو زمانو .. مهما قِسى وصِبِح جارح
التَّزرعو أخوي تجنيهو .. كان بي عيشو كان طارح!!!
والبَّاري السراب مخْدوع .. حارم لي نفْسو ظالم...
.............................................
فتِّش عن سعادة الرُّوح .. ترضي ضميرك الحاير
تلقاها في صفا الحِبَّان .. في جلسة قمر ناير
في النيل والجروف والخُضْرة .. في زفَّة عريس ساير
في همسة حبيب لحبيبتو .. والمستقبل القادم...
.............................................
المُخلص محال بيعادي .. مهما حبيبو جافاهو
وأصيل التِبرِ رغم النار .. يزداد لمعو ونقاهو
قالوا النية زامْلة سِيده .. خير كان شر هي تبراهو
والقلِب السليم بالفطرة .. طيِّب طبعو ومسالم...
.............................................
لا تهتم بالأيام مهما .. تجور عليك تقسى
دولاب الزمن دوَّار .. بكرة علي النعيم ترسى
واجِه قَدَرك المكتوب .. لا تِنْضارى تِنْدَسَّة
والزول ماب يفوتة قِسِمتو .. راضِينْبَها والله عالم...
ولاحدي ما ألاقيكم بكرة...
قواسيب مودتي...
أبو الحســـــــــــين....