|
|
 محمد ود حنينه قصيدة للدوش
|
دقت الدلوكه
قلنا الدنيا مازالت بخير
اهو ناس تعرس وتنبسط
تككت سروالى الطويل
سويتلو رقعات فى الوسط
فى خشمى عضيت القميص
اجرى وازبد شوق وانط
لامن وصلت الحفله زاحمت الخلق
وركزت
شان البنت سعاد
اصلى عارف جنها فى زول بيركزوينستر
لكنى عارف انها
لوكل زول فى الحله بالستره انجلد
يانى الازاها وجنها
برضى عارف اظنها
تحت تحت بتحبنى
ديمه فى صرة وشها
يلفحنى شوق نافر لبد
وركزت للحرقه المشت فوق الضلوع
تحت الجلد
ضميت قزازتى مرقت عن طرف البلد
وسكرت جد
وانا جائى راجع منتهى لاقتنى هى
قالت (تعال
كبرت كراعى من الفرح
نص فى الارض نص فى النعال
اتلخبط الشوق بالزعل
اتحاوروا الخوف والكلام
ه_يى ياسعاد
على ود سكينه وكلتى فى خشموا الرماد
على ودسكينه ومات اسى
وانا بت بلاك ملعون ابوى لو كنت ارضى اعرسها
وانا ياسعاد وكتين تصبى سحابه تنزلى زى دعاش
بفرش على روحى واجيك
زولا هلك تعبان وطاش
وانا ياسعاد وكتين اشوفك ببقى زول
فرشولوا فرش الموت وعاش
قالت سعاد بطل كلام الجرسه انجض ياولد
مزقت روحى نتف نتف
مرقت من جيب القميص
تمباك وحب
عرقى واسف
طبيت قزازتى وصلت لى طرف البلد
وسكرت جد
اذنت فى الشوق والسلم
وسرحت بالناس والغنم
وركعت للعرقى البكر
ورقدت فى الالم الحكر
وحلمت زى شالنى ومشى
فوق زحمة نبى الله الخضر
صحانى صوت العمده قال مسؤل كبير زائر البلد
قال لينا
وكت الزول يجى لازم تقيفوا صفوف صفوف
وتهيجو الخلا بالكفوف
وتقولوا عاش يحيا البطل
صلحت طاقيتى الحرير
واتنحنح الحشا بالكلام
ورميتو من حلقلى الوصل
قت ليه ياعمده اختشى
مسؤل كبير فى الدنيا غير الله انعدم
ماشفنا زول رضع صغار
ماشفنا زول نجح بهم
ما شفنا زول لملم رمم
لاصحينا عاجبنا الصباح
لانمنا غطانا العشم
والحله من كل الجهات محروسه
بالخوف والوهم
ومضينا من زمن قديم_ياعمده_مرسوم انتحار
الموت مباح
والحب نطاح
والصدق من جنس الزنا
العافيه مولودة سفاح
والرغبه مكسورة جناح
الحلم والوعد النبيل
الطفله والام النخيل
الرنه فى الوتر الاصيل
تلقاها فى قاموس نكاح
يايمه واح ياحله واح
ياسعاد تعالى ولمى من كل البيوت
عدة السفر الطويل
زخرفى الكفن الجميل
شخبطى الفجر النهار
اربطى الضحى والاصيل
المغرب
الفجر
النجوم
فى صرة وارميها البحر
خلينا فوق الشك نعوم
والعمدة فاض
العمده صار مليون عمد
العمده فيل
جبلا تقيل
لبوه واسد
حسنه وغضب
جمعه واحد
بقيت قزازتى
مرقت عن طرف البلد
وسكرت جد
وانا جايى راجع اجهجهو
لاقانى هو
سايق العساكر والكلاب
رامى بين عينى وعينو
كلب وتكشيره وحراب
ضاقت نعالى من الزعل
من تحتها اتململ تراب
الغيم سكب ضلو ومشى
والدنيا غيما سراب سراب
والحله زى بلدا بعيد
زود بعادوا قرب سعاد
اتجمعت كل البيوت فى راحتا
زى بت لعاب
مجنونه تصرخ فى الزوال
ممزوجه فى الدم واللعاب
عينى ضاقت نظرتها
والجوف يطقطق بالكلام
قبال يقولوا لى سلام
اتلموا حولى بلا نظام
شال وعمه
توب وغمه
فاس وطوريه وحزام
شالونى بكل احترام
ورمونى فى قعر السجن
حصلنى قبل اليوم يتم
جارنا المدرس ود خدوم
قال لى لازول قام هتف
لاكف مشت بتلاقى كف
والعمده زى همبول وقف
ياصمت اف
يادنيا تف
وانا ياسعاد للشوق نغم
للهم علف
|
|
 
|
|
|
|
|
|
|
 Re: محمد ود حنينه قصيدة للدوش (Re: MOHAMED ABDALLA SHERIEF)
|
Quote: الغيم سكب ضلو ومشى
والدنيا غيما سراب سراب |
ياسلام على حلتكم التى كان يسكنها وبظرافته يقارن بين بودابست وامبده بست
وتمشى معاى وتروحى
تمشى معاى وسط روحى
ولا البلقاه بيعرفنى
ولا بعرف معاك روحى
رحم الله شاعرنا الكبير الدوش.باكثر مما اعطى وقدم.
| |
|
|
|
|
|
|
|
|
|
Re: محمد ود حنينه قصيدة للدوش (Re: مطر قادم)
|
العزبز مطر
تحيات وانت تموسق هذه المساحة برائعة المقيم الاستاذ الدوش ولكانى الان فى نهار تلك الجمعة الماطرة سنة 1998 فى حضرة صاحبةالجمال والنضال
الاستاذه سعاد ابراهيم احمد والدوش يرفع حاجبيه رامقا سعاد الحاضرة نصا خارج النص وباصرا سعاد داخل النص ( وانا يا سعاد للشوق نغم * للهم علف)
بعد ايام( كان الموت مباح والحب نطاح )
والصدق من جنس الزنا * والعافية مولودة سفاح * والرغبة مكسورة جناح * فياسعاد تعالى ولمى من كل البيوت عدة السفرالطويل*( زخرفى الكفن الجميل * شخبطى الفجرالنهار) .
مزيدا من ليل المغنين يامطر ثمة اشياء قبل رحيل الدوش كنت حاضرا حينها سارويها لاحقا و ان كره مثقفاتية الانقاذ
| |
|
|
|
|
|
|
|
|
|
Re: محمد ود حنينه قصيدة للدوش (Re: MOHAMED ABDALLA SHERIEF)
|
الاخ ابوذر الماطر تحياتي
شكراً لإيراد قصيدة الدوش وقد طال عهدي بها ففد قراها الشاعر الكبير علينا حين كنا طلبة بآداب جامعة الخرطوم .
انظر للحركتين الرئيسيتين في القصيدة حركة الحب التي نجد نصها الصاعد هنا:
كبرت كراعي من الفرح
نص في الارض نص في النعال
وحركة البغض التي نجد نصها الصاعد هنا:
ضاقت نعالي من الزعل
من تحتها اتململ تراب
في الحركة الاولى نظر الشاعر لصورتهالشعرية من ناحية الكراع أي القدم .وفي الصورة الثانية نظر الشاعر للصورة نفسها من ناحية النعال وفي كلتا الحالتين تضخمت القدم لكن الدوش عدو للتكرار والصورة الشعرية عند الدوش يدخل فيها الحس مع المشاعر في توليفة آسرة .في الصورة الثانية صورة البغض نجد ان الغيم سكب ضلو ومشا.
الراحل الدوش باق فينا.
دمت ز
| |
|
|
|
|
|
|
|
|
 Re: محمد ود حنينه قصيدة للدوش (Re: Mohammed Elhaj)
|
الاخ محمد الحاج
كل التحايا
افتتح الدوش قصيدته طه المدرس ود خدوم بالاتى:
Quote: يا تلاميذى العُزاز
بسم الله
بسم المجد فى أحضان سُعاد
اكتبوا التاريخ
خمستاشر ربيع أول
والمُوافِق
موِلد الايقاع على خطوات سُعاد
والمُرافِق للصباحات ، المناحات
واخضرار الغيم وفقدان الشُعاع
ارتفاع الموجهْ لى صدر الشراع |
وختمها هكذا:
Quote: يا تلاميذى العُزاز
اكتبوا التاريخ
خمِستاشر سُعاد أوّل |
لشكرك وتعليقك ومرورك خير ما يقدم من جنس العمل بداية وخاتمة القصيدة اعلاه وآيات الشكر الكبرى.
| |
|
|
|
|
|
|
|
|
|
Re: محمد ود حنينه قصيدة للدوش (Re: مطر قادم)
|
المطر القادم حبابك آلاف
سلامي وإكرامي وإحترامي
لك الشكر والتقدير وأنت تحي فينا ذكرى هذا الشامخ العاتي
Quote: وانا ياسعاد وكتين اشوفك ببقى زول
فرشولوا فرش الموت وعاش |
ونحن والله عندما نقراك نتأكد أنك عائش بيننا وتكبر نعال حرفك يا دوشنا يا جميل لك الرحمة والمغفرة أخاً وأستاذاً وصديقاً
| |
|
|
|
|
|
|
|
|
|
Re: محمد ود حنينه قصيدة للدوش (Re: مطر قادم)
|
مطر قادم
ولو ان اكتفى الدوش بهذه الابيات لصور لنا بها واقعنا الذى نكوى به فى كلمات قليلة الحروف ولكنها غنية المعانى لك الشكر على نقل هذه القصيدة للشاعر الدوش
تحياتى
| |
|
|
|
|
|
|
| |
مطر قادم
Bushra Elfadil
Mohammed Elhaj
بدرالدين شنا
بلدى يا حبوب
فيس بوك
تويتر
انستقرام
يوتيوب
بنتيريست