|
|
 قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ...
|
أخواتي .. أخوتي قراء و أعضاء سودانيون على الخط ترجمة حرفية مية في المية .. جمعتكم مباركة وخطوطكم
ساخنة .. غايتو الليلة أعذروني اتأخرت من كتابة موضوعي الصباحي اللي ماعارفاه عاجبكم ولا ما
عاجبكم عموما الواحد مرات بجيه احساس كدة أنه دمه تقيل ولصقة زي ما قال واحد من شعراء حلمنتيش
لو قلتي ولا ما قلتي ياني اللصقة ودالكلب - عذرا _ للجوء الى الثقافة الكلابية .. عموما ياجماعة الخير
الليلة كان معاي ضيوف الله يعزكم - ما أنزل الله بهم من سلطان و مش الموضوع العايزة اكتبو طار وبس
شباشبي ذاتن طارن أمسك الحلة و أفك الطوة أمسك الفرن وأفك الميكرويف يااخواني دي حالة شنو دي قلت
وين البنات الفالحات في المنبر ناس نهلة بت عمر وغادة بت عبدالعزيز وإيمان بت صالح , وبنات خوجلي وسومة
وكل الأخوات الليلة يوم حوبتكم لكن لاحياة لمن تنادي علاقات اسفيرية ساكت _ كيس نايلو والهوا شايلو _
الحمد لله هسة خلاص أكلو الحلو وشربو الشاي واطلبو الله بعد دة قمت اتذكرتكم وقعدت أحك في راسي المافيه
شعرة واحدة ولا طايوق أكتب شنو يا ربي كل ما أقترح على روحي موضوع ألقاه مثير للجدل الاسفيري ويقود الى
اشعال حرب البسوس في المنبر أقول لي روحي ما في داعي لسة داحس والغبراء ما وضعت أوزارها يا بت الناس
خليك عاقلة و أسمعي كلام أبوبكر سيد أحمد الراجل المسالم وشوفي ليك موضوع غير مثير أو ليس من الأهمية بمكان
وأثناء هذا التفكير أتذكرت موضوع ثقافة التعبير عن المشاعر في المجتمع السوداني الل اقترحه لي أحد أعضاء
المنبر قلت خلاص والله دة موضوع مهم وما بشعل حرب كيماوية ولا يحتاج لزيارة مكوكية من البرادعي الماعنده
شغلة دة .. المهم يا اخواني نحنا فعلا زي ما قال أخونا عضو المنبر ما قاعد نعبر عن مشاعرنا للناس اللي
بنحبهم الا في حالات نادرة و بالرغم من أن التعبير دايما بكون ضمني أو من خلال تصرف معين لكن علماء النفس
قالو وأنا خايفة بكرة يقوموا يقولو لا قلنا ولا حاجة ويطلعوني كضابة _ الجماعة ديل بقولوا التعبير
عن المشاعر شفهيا له دور إيجابي كبير على حاسة السمع التي تقوم بترجمة هذه المشاعر وتحويلها الى سلوك أو
رد فعل ايجابي مثلما تفعل الموسيقى تماما ولكن نحنا في السودان لم نتعود على سماع موسيقى صرفة ولم نتعود
على سماع كلمات الحب من أهلنا الكبار يعني أنا مثلا لم أسمع أبوي مرة واحدة عبر عن شعوره لأمي بالكلام ومع
ذلك كان يحبها ويدللها ولما اتوفى كان عمرها خمسة وعشرين سنة ومع ذلك رفضت كل من تقدم للزواج منها
وكان تعليلها دايما - أبو فاطنة ما فيش زيو في الدنيا _ وما بربط الحمار في قفى الحصان _ معليش يا ناس
جاردن سيتي سامحونا البيئة بتلعب دور حتى في الأمثال . بالطبع رفض أمي المطلق يؤكد حبها لأبي ولكن ياترى
ماذا كانت ستقول عنه لو كان يعبر فعليا وشفهيا أكيد كانت كتبت فيه شعر لم يكتبه قيس في ليلى ولا جميل في
بثينة ولا الشاعرة الرقيقة تماضر الخنساء في من تحب .
نلاحظ أيضا في مجتمعنا السوداني أنه يندر أيضا أن يعبر الأب أو الأم شفهيا أو لفظيا عن حبه لأبنائه
بعكس المجتمعات الأخرى التي تنمي ثقافة الحب في أبنائها منذ الطفولة وعندما يكبروا يصبحون أكثر قدرة على
الافصاح عن مشاعرهم و بكل سهولة ويسر سواء كانت هذه المشاعر سلبية أو إيجابية ولكن نحن لا نستطيع أبدا
التعبير عن هذه المشاعر يعني لو أنا زعلانة من حد ما أقدر أقول ليه أنا زعلانة منك وافضل شايلة منه
وساكتة ولو ولدي نجح في الامتحان أفرح بابتسامة الرضا ولكن ليس هناك أي نوع من التعبير عن هذا الفرح
بصورة عملية أما الأزواج والزوجات فديل مشكلتهم مشكلة ما قعدت في جلسة حريم إلا وأسمع قصص كثيرة عن
عجزهم في التعبير عن حبهم لزوجاتهم لفظيا وإذا قلنا يا جماعة دة طبع الرجل السوداني ولا يعني عدم تعبيره
أنه يكره زوجته يقولن لا - لا طبع لا حاجة اشمعنى لما كنت جكس كان قادي أضاني بكلمات الحب والغزل _ ليل
نهار _ صباح _ مساء هسة الجد شنو ولا خلاص عشان ضمني في يده طبعا نفس الكلام بقولوه الرجال يعني أخونا
الاقترح الموضوع دة قال عنده صاحبه سوداني متزوج مغربية عزمه غدا ولمن ضرب الجرس عشان تفتح ليه الباب
جات جارية يمكن حفيانة الله العليم وهاك يا كلام في الحب وداك يالشوق الماخمج وصاحبنا واقف منتظر نفس
الملامح والشبه وما صدق عيونو ولا أضنيه قال يا ربي أنا في حلم ولا علم ولمن دخل جوة وقعد قال لصاحبو
أيه البيحصل دة ؟ قام صاحبو رد عليه قال ليه دة السبب البي يخلي السودانيين يتزوجو أجنبيات طبعا دة
ما سبب ولو إنه صحيح إلى حد ما ولكن هل ينكر الرجل السوداني أنه أيضا لا يستطيع التعبير عن شعوره
لزوجنه وإن كان يحبها ؟ مع أننا ناقشنا الموضوع دة كتير ولكن لا بأس من السماع إلى آراء جديدة حول هذه
الظاهرة تختلف عن الآراء السابقة التي تقول الكلام بالعمل فقد يكون الكلام الشفهي في بعض المواقف أجمل من
ألف موقف تطبيقي نحن يا أخواني بشر وبنحتاج للكلمة الحلوة يعني لو في واحد شكلو ما حلو أبدا لكن
زوجته بتقول ليه كل يوم أنت في نظري أحلى إنسان في الدنيا أكيد سوف يشعر بأنه في نظر الكل أحلى واحد
أو أذكى إنسان في الدنيا زي ما بتقول شريكة عمره لأنه بيكون واثق في نفسه ولو زوج بقول يوميا لحبيته
زوجته وشريكة عمره او خطيبته كل يوم مهما كانت أنت الأجمل و الأشيك أو أنا أحبك لأنك شريكة حياتي
وأم أولادي الجميلة التي تقف معي في السراء والضراء هل ستكلف نفسها يوما لكي تتسول الحب او تطلب منه
أن يسمعهاولو كذبا كلاما ناعما .. عايزين آراء صريحة إذا سمحتم وفتكم بعافية ..
ملحوظة : قد ترى بعض االعقول المستنيرة أن هذا الموضوع لا يرقى لمستوى النشر ولكن لا تنسوا أن أكثر
القراء بحاجة لمناقشة الأمور الاجتماعية التي لا تقل أهمية عن المواضيع السياسية و الدليل آلولو ...
تخريمة : حقوق النشر محفوظة.
|
|
 
|
|
|
|
|
|
|
 Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: حافظ العشا)
|
Quote: السودانيات عندهن برود عاطفي
ومابعرفوا يكسبوا ازواجهم في صفهم
عشان كده تلقي الحياة الزوجية عندنا
كانها دوام عمل كل واحد في الطرفين
عارف حايعمل شنو مافي تجديد في شكل
الحياة وكسر للروتين عرفتي كيف الجنسيات
التانية نسوانهم بعرفوا يملكوا ازواجهم. |
ست الكل عواطف بت إدريس
لك التحية
كنا دائما نقول رأينا وتأتينا النيران المضادة منهن لذلك نكتفي
بإقتباس مداخلة أخونا حافظ الموجزة والمفيدة وناخد ساتر ونقول :
just don't get mad and face it
التحية ليكم ولهن بعد ما يروقن
صلاح واسبه
| |
|
|
|
|
|
|
|
|
 Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
استاذة عواطف سلامات و كل الاشواق
ولله يا حليلك و ان شاء الله ما نفقدك فى شينة و يا ريتنا لو قراب ما كنا بنقصر تب
الموضوع جميل و عايز رواقة و مهلة
لكن بصورة مبدئية اذا كان الرجل يرى ان الزوجة لا تجيد التعبير عن مشاعرهافماذا يفعل هو بالمقابل؟
انا لست بمتزوجة و لكن التجارب امامنا كثيرة و كلها بتتحدث عن حياة باردة و عملية و روتينية او عبارة عن فروض طاعة
تقدم و حسب ثم ماذا بعد ؟
و لا ننسى ان ثقافة العيب فى مجتعنا السودانى التربية و اليبئة تلعب دور كبير فى عدم مقدرتنا عن التعبير عما يجول بداخلنا من
مشاعر
لى عودة فالموضوع يحتاج المزيد
| |
|
|
|
|
|
|
|
|
 Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: نهلة عمر)
|
نهولة !!!
سلامات يا حبيبة الكل ,,,
شكرا على طلتك الجميلة .. وطبعا كلك نظر إذا لم تكن المشاعر وبنفس الأسلوب تتحول الحياة إلى روتين زي
ما تفضلت ونحنا كسودانيين لدينا الكثير من السلبيات الناتجة عن اللامبالاة يعني خلاص طالما جبت كل حاجة
و ما قصرت يبقى هي عارفة إني بحبها ولو الزوج عمل اي مشكلة والزوجة زعلت و مشت البيت اهلها اول
كلام يقولوه ليها اها مقصر معاك في شنو و طبعا المسكينة تستحي وتسكت يقومو يرجعوها صرة في خيت لي
بيتها وهم لا يفقهون ان هناك أشياء أهم من الأكل واشراب والدهب والتياب .. في انتظارك ...
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
توفي الجميلة
أشواقي وتحياتي ،،
موضوع جميل وشيق والآراء فية تجمع
بإحصائية تثبت الكثير من الحقائق
وبالتالي تحدد إلى أين تنسب ،،،
Quote: هل ينكر الرجل السوداني أنه أيضا لا يستطيع التعبير عن شعوره
لزوجنه وإن كان يحبها ؟ |
لا مجال للنكران لأنها الحقيقة والزوجة
تحسب مليون حساب لتبادر..
حتى لا يقول الزوج شنو البنت الما متربية دي
كلام أنا الراجل ما قدرت أقوله ناسي أنه
الزوجة دي أنسانه ومن حقها تعبر لفظياً
بما تحسه ،،
كما أن الرجل الشرقي عموماً والسوداني خاصة
يفتكر أنه كونه يعبر عما يكنه من حب ينقص من
رجولته ولكن العكس الرجل الذي يعبر عما بدواخله
رجل مكتمل الرجوله وبتعبيرة يثبت أنه رجل ،،،
لا ننكر أن للزوجة دور في تراجع الرجل في هذة
الناحية حيث يجب عليها التعبير دون تردد لتتيح
للزوج معرفة ما توده هي وهذا حق من حقوقها التي
يجب أن تنتزعها انتزاعاً طلما لم تحصل عليه بشكل
عادي ،،
وفعلا التعبير الشفهي أو اللفظي له دور كبير في
التأثير على تحريك مشاعر جميلة تكون كامنه ،،
حتى على نطاق الاسرة الضيق أو المجتمع الكبير
لها دور كبير ،، تبادل الالقاب الجميلة مع الاولاد
أو الاصدقاء مثل حبيبي/تي ، حياتي / عيني / روحي
قلبي ...
أو التصغير في الاسم أوالدلال..
الكثير من التعبير الجميل عن الحب يكمن في في
هذة التعابير البسيطة والتي لا تكلف شياء ،،
مودتي ،،
| |
|
|
|
|
|
|
|
|
 Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: EMU إيمو)
|
إيمو !!!
والله زعلانة منك ,, كيفن يا ولدي 99 دقيقة نضمي وما فيهن كلمة حب واحدة أمانة ياولدي ما اتلومت لوم
السواد والرماد !! كنت بتقول في شنو ؟ أوعى تكون نايم في الخط عشان أنا شفت في البروفايل بتاعك أنه
هوايتك النوم ؟ غايتو خطيبتك بتكون سمعتك لغاية العشرة دقايق الأولى وبعد داك تكون مشت تعمل حاجة
تانية وأنت قاعد تنضم براك 89 دقيقة ,, عشان مافي حوافز تخليها قاعدة القعدة دي كلها ,, وبعدين
معقول يا إيمو تصرف ليك مكالمات قدر دة على الفاضي ؟ يا زول هيييي غير السياسة دي طوالي قبل ما
يركبوك التونسية ,, اخير ليك اسمع كلامي دة بنفعك ...
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
بعد التحية,
كلامك كله صاح يا عواطف ..
و الموضوع حيوي جدا مع أنه صعب جدا أنه الواحد يقرر ما إذا كنا كسودانيين/ت ناس ناشفين/ت , جحودين/ت , قاسين/ت .. إلخ ..
فربما يرجع أو يعود الأمر لمسألة المجتمع الذكوري و ما أدراك ما الذكوري , و انتقال الداء من جيل إلي جيل ..
لكني بسأل , جادي جدا , ليه الأنثى تحديدا يصعب عليها العيش مالم تسمع (شفاهيا) ما يؤكد حب زوجها ليها
(( حتى و لو كانت متأكدة و واثقة تماما من حبه لها ))?!! ..
أنا هنا ببحث عميقا داخل سايكلوجية الأنثى السودانية في مرآة نمط الحياة السوداني , الشمالي تحديدا, بكل أزماته المتعلقة
و في بالي حديث (سمعته) من لسان الأستاذة فاطمة أ. إبراهيم حين ذكرت بأن الرجل السوداني (في المتوسط) .. زوج راقي .. !
كما ولا ا أعتقد بأن الأزواج (الرجال ) ملحاحين أو منشغلين بي مسألة تعبير زوجاتهم عن حبهن ليهم .. (شفاهيا) ..!
الكلام ده إطلاقا لا يحمل أدنى هجوم على الأنثى ولا أدنى دفاع عن الذكر .. حتى و لو بدأ كذلك , و إنما ...
ملاحظة عامة !! .. لاحظي الشطر الأول من عنوان البوست قل لي و لو كذبا كلاما ناعما ...)!
.
.
هل لأنه ثقافة الزواج عندنا مرتبطة بمفهوم إعادة الإنتاج , Reproduction , أم نتيجة لضعف الحس الرومانسي في حياتنا
و إتكائنا على منتوج الشعر الرومانسي لشعراءنا الغنائيين مثلا .. مع ملاحظة كتر الشكية و الشكاوي بين أغنياتنا
إلا من رحم ربي !
(عدل بواسطة Elmuez on 12-14-2007, 04:00 PM)
| |
|
|
|
|
|
|
|
|
 Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: Elmuez)
|
عزو !!!
سلامات .. ومداخلتك جيدة جدا ولكن يا بعد عمري التعبير عن العواطف مسألة مهمة للزوجة يعني ربنا خلقها
كدة رغم إنها بتعرف إنه زوجها بحبها و لكن ماذا يضره لو اسمعها ما تريد أن تسمع طالما أن النتائج
بتكون ايجابية عموما حكاية النشاف فينا كسودانيين دي حقيقة يعني الواحد يخجل يطلع مع اخته أي مكان
عام الا للضرورة طبعا ما كلهم ويخجل يعرف زوجته للآخرين ويخجل يعبر عن شعوره لها سواء كان لوحده معها
أو أمام الآخري ولو هي قامت وعبرت عن أي شعور إيجابي تجاه زوجها يفتكر إنها أحرجته قدام الناس وطبعا
الناس بفتكروها قليلة ادب وعينها بيضاء .. زمان يا معز الواحدة لو اتكلمت مع عريسها في الكوشة
عاد يشيلو حالها ويعتبروها عروس قاهر وفاجر .. شكرا معز أبقى معنا ..
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: Elmuez)
|
عواطف
سلااامااااات ....
زي ما ذكرتي في صلب موضوعـكـ اننـاخريجيين
بيئة الابـاء بامتياز والموضوع اصبح متوارث
ومرات كده الواحد يفكر انه جيني ..
قرات قديما كتاب تحفة العروس وجدت فيه العجب
العجاب وكيف كانت العلاقة العاطفية بين سيد البشرية
ونساءه لاسيما السيدة عائشة وطريقة الملاطفة الشفاهية
بينهما ...كلام عسل...نحن ما بنقول نصه,,,,
لكن يا عواطف حقوا تعفونا من كلام العواطف ده شفاهة
لاسباب كتيرة اولها وبدون تكابر على الواقع السوداني
هو مجتمعنا الذكوري و ثانيا الـ فينا مكفينا من ضنكـ
الحياة وقهر الحكام ,.. ده كلو ما بكتل القلب يا عواطف ??
لكن كدي النسالكـ ....
احسن ليكـ راجلكـ يجي شايل ليكـ معاهو هدية (غويشة)مثلا
يديكـ ليها من سكات ولى يفرغع اضنيكـ بالكلام الحلو من شاكلة
انتي حلوة وانتي شنو ما عارف واديهوا فاضية يعني ياكلكـ حنكـ
سنيين .. راجل مقشط ...
عواطف ..
نحن العلينا كتيييييييير وما شوية و ما هين !!!
لو قلناالكلام الحلو يبقى زيادة خير و لو صمتنا انتن ما تنقن
ونحن محتاجين نسمع منكن تشجيع و تطمين و تثمين لدورنا
والقاسموا ليكن الله بتلقنو مننا سواء كلام حلو ولى غيرو
عواطف ياختي
الكلام الناعم مهم ما قلنا حاجة ,, لكنه ما كفاية ...
| |
|
|
|
|
|
|
|
|
 Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: Ahmed Abdallah)
|
حمودي !!!
سلامات ,,,
عاد ما بنعفيكم أبدا من التعبير اللفظي لأنه مهم وإنت يا أحمد لمن قدرت مشيت لغاية محل المجوهرات و جبت
الغويشة وجيت بس غلبك تقول كلمة حلوة وانت بتديها الغويشة .. اها لو كان ما عندك حقف الغويشة كنت
حتسوي شنو ؟ ما اخير ليك تتعلم الكلام السمح للوقت الزي دة ؟ وبعدين ما تقولو ابواتنا ولا ثقافتنا
السودانية انتو المفروض تغيرو هذه الثقافة للأحسن عشان الجيل الجديد يكون حاجة مختلفة وبعدين انت بي
روجك قلت الرسول الكريم كان علاقته العاطفية بزوجاته رهيبة وبالذات السيدة عائشة عشان كدة قال
اللهم لا تحاسبني فيما لا أملك أي ان مشاعره ليست ملك له وةلا يستطيع التحكم فيها ليبرر حبه الزايد
لعائشة .. وبعدين يا حمادة وقت الحياة عندنا نشاف وضنك نقوم ننشفها زيادة على العليها ؟؟؟
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
أختي عواطف
يديك العافية...
تعرفي..أنا ما بسمع الغناء كثير.. لكن بحب أغنية السمحة أم ولدي.. لأنها فيها بوح بمعزة الرجل السوداني للزوجة..لكن حتى المتأمل لكلمات الأغنية يجد أن الحب الذي يكنه الشاعر لمحبوبته.. عبارة عن (Criteria) لما يتمناه الرجل في الزوجة..فهو يريدها" ملساء ما غبشاء.. ماها الخبوب روشاء"..وما إلى ذلك من مواصفات.. وأرى الشاعر رغم تمجيده البائن للزوجة إلا أنه أشترط هذا التمجيد بمحددات جمالية وسلوكية معينة.. كماأنه فشل فشلا ذريعا في أن يبثها كلمات الحب والهيام.. فهذا هو حال معظمنا (تحتها خطين)..فنحن نتسابق في أن نحوز لمثل تلكم الزوجة..دون أن ننبس ببنت شفه فيما يتعلق بكلمات المحبة والتي لها فعل السحر في إستمرارية العلاقة وديمومة شباب العلاقة والإستقواء على نوازل ومصائب الدهر..
هناك جانب تربوي في المسألة..فقد ربت كثير من الأسر أبناءها على أن بث الحب والهيام للزوجة هو ضعف لا يليق بالرجل ويعتبرون من يفعل ذلك (أضينة).. وأضحوكة..والعجيب حتى بعض الرجال يجابهون بحالة عداء من شقيقاتهم إن هم أبدوا حبهم لزوجاتهم.. لذلك الكثير من الرجال واللذين يحتفظون بعلاقة متقدمة مع زوجاتهم يخفون هذا أمام شقيقاتهم مخافة أن يتم تصنيفهم في خانة الضعف..أردت أن أقول أن للمسالة جانب آخر متعلق بالتربية ومواقف بعض الشقيقات (طبعا هذا تخصيص وليس تعميم) من علاقة إخوانهم اللذين يجرؤون على بث كلمات الحب لزوجاتهم..
ربما لم أفصح بما هو كاف..ولكني أرجو أكون قد ألقيت بعض الضوء..
وأنتهز منبرك العامر لأبث زوجتي ما أعتدت أن أبثها من كلمات تعني وتؤكد حبي لها..
| |
|
|
|
|
|
|
|
|
 Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: Kamal Karrar)
|
كيمو !!!
سلاات يا ذوق ,,,
نبدا من الآخر يعني من بث كلمات ليست كالكلمات والله يااخي انت اول واحد في المنبر دة يجاهر بحبه لزوجته
بس ذكرتني شرويدر لمن اعتذر لزوجته على الملأ من مغازلته لأحدى النساء وقد أصرت زوجته أن يكون الاعتذار
علنيا وليس ضمنيا وعلى وسائل الاعلام ولأنه يحبها لم يتردد في ذلك ,, شكرا لك وتحية خاصة لزوجتك الحبيبة ..
ثانيا كل ما ذكرته يا أخي صحيحا أصله أخوات الزوج ديل قصتهن قصة بالذات لو كانن غير متزوجات غيرة
شديدة ومشاكل لا أول لها ولا آخر ومع ذلك هذا لا يمنع ان يعبر الزوج عن حبه لزوجته في أي زمان ومكان لأنه
الناس المعارضين أو بيفتكروا أنه الزوج اضينة بعد شوية حيتعودوا ويسكتوا لكن لو ظل يعمل ليهم حساب
حيتعب .. المهم إنه يكون مقتنع بسلوكه وبس ... شكرا كيمو مرورك أسعدني ..
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: bent-elassied)
|
يا مي .. أين مي !!!
مشتاءة ,,, تئبري ألبي ..
كيفك يا ست الحسان .. سعيدة بمداخلتك الظريفة رغم مشغولياتك الكتيرة ربنا يوفقك يا ست الكل ..
أنا كمان ضحكت لامن وقعت على قفاي من هؤلاء الناس بالمناسبة قالو في عريس عايش في أمريكا رسلو ليه
العروس طرد وقاعد في الكوشة ما عارف يقول للعروس شنو المهم عشان يكسر حاجز الصمت قال ليها :
- إنشاء الله تكوني سعيدة !!
- نطت وقالت ليه البخيتي _ البخيتي _ سعيدة دي منو كمان ؟ ها ها ها !!
أما حكاية ليه سموها كوشة دي فيبدو إنه دة استشراف للمستقبل حلوة مو هيك ؟ تئبريني !!
واحدة سودانية كانت شغالة معانا صحفية أول يوم داومت قعدت جنب واحد عراقي بعد شوية طلبت منو قلم
قال ليها تتدللي عيوني راحت ناطة فيه شكل وشتايم يا قليل الحياء ويا عديم التربية أتدلل ؟
بتعرفني من وين ؟ وكمان عيوني ؟ عيونك بالتقددن ليك !!! ها ها ها آل عيوني آل ؟
| |
|
|
|
|
|
|
|
|
 Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
عزيزتي عواطف
كــــــــــــــــل سنة وانتي طيبة .... و انشاء الله سنة سعيدة ليكم كلكم
اعجبني موضوع البوست وقد وفقتي في اختيار الموضوع .. قل ولو كذبا كلاماً ناعما.هل دة فعلا دة تجسيد للمقولة انوا النسوان ديل راسهم خفيفة كلمة توديهم و كلمة تجيبهم ...
وفي ظني انوة موضوع التعبير عن المشاعر هو الموضوع القديم الجديد للنقاش و قد اعجبني و استمتعت جدا بالطرح منك ومن الزملاء الكرام
بس عطوف
كتير من الاحيان بيحاولوا يقنعونا انوا شئ طبيعي ان الرجل ما يعبر عن مشاعره و البعض يعزي دة لثقافة الصحراء الجافة حيث انها تعلمهم الاقتصاد في الموارد  بالجد هي بتعلمهم الجفاف ووجع القلب
في نظري انواالزواج مؤسسة و شراكة قامت ما بين اتنين و لكن ... المجتمع السوداني لا يستوعب انوا الزوجة تحتاج الي بعض الحنان و الحب و الاهتمام (يعني هي ما بتطلبوا 24 ساعة  و لكن ان يبذل القليل من المجهود عشان الحياة تبقي احلي )
بس مجتمعنا السوداني متضارب رسميا،لا يحترم تعبير الزوج البيظهر عواطفو لزوجتو الا انوا حالة ضعف وعدم وجود موضوع .. لكن نحنا البنغير حياتنا جيلنا ما ذي الاجيال الكانت من قبلناو لا شنو
و فعلا انا اتفق في ماذكر سابق بانوا السوداني لما يتزوج واحدة اجنبية بيكون متفان وان زدنا بيحرص علي انوا يسعد شريكة حياتو
ومن ناحية تانية انواالزوج السوداني البيتزوج السودانية (وطبعا البيتنحس بعد الزاوج)... قبل الزواج بيعمل السبع و زمتها للخطيبوتو .. الاتغير شنو طيب ...و بالجد دة سؤال محيرني شديد
و عجــــــــــــــبي
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: Sahar Yousif)
|
الاستاذة عواطف المحترمة
تعرفى الموضوع دا وراثى بحت بمعني لقد قمنا فى بيوت وحيشان كبيرة وفتحنا عيونا ولقينا جدودنا بقولو لحبوباتنا وبنادوهم يا أمنة ويا زينب
ويا بت الشيخ لم نسمع جد وأحد قال يا حبيبتي عليك الله ولو تسمحي ا دينى كوز مؤيه ديمآ ألآمر ياوليه جيبى مؤية نأشفين خالص مع حبوباتنا وأفتكر لو كان فى جد ولا أبو كان بنادي مرتو يقول ليها يا حبي ويا عيوني وحياتي
حيكون فى نظر الأخرين خايب وباطل .يعنى بصرأحة الحب وكلامو دا الناس أتعلمتو من المسلسلات والأفلام ويرجع لنشاف وجفاف العلاقة الزوجية التى ورثناها من زمان ياأخي حبوبتك تكون مسافرة شهرين ويوم تصل دا جدك يسلم عليها ذي لما يسلم على بت الجيران لا عناق لا وحشتينى ولا وحشتينا ولاأي حاجة سلام التقول مابتعارفو نشاف وجفوة وهى بلا شك يتوارثها الأبناء عن الأباء ونجد حتى الأن هنالك شباب وشابات لا يتبادلون كلمات الحب والمغازلة
بعد الزواج..
تسلمى ..
| |
|
|
|
|
|
|
|
|
 Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: احمد معتصم الطيب)
|
حمودي !!!
صباحك سعيد ,,,
والله فطستني من الضحك .. طيب يا ود أمي نحنا ما نرث منهم إلا الحاجات العبة الناشفة دي .. ريقنا
زاتو نشف من نشاف الحال .. التغيير واجب وهما خليهم يقولو راجل ضعيف ولا إضينة ما مشكلة الواحد
مش عارف روحو ؟ ما مهم .. المهم يتغير هذا الجفاف والتصحر والله يا أحمد لو شفت الناس هنا زي ما
قالت بت الاسيد الشوام وغيرهم تكره روحك وتقول هسة أنا الخلاني سوداني شنو ؟ الزوج كلما يتصل بزوجته
أول حاجة يقول ليها كيفك أم فلان أو يا حبي أو يا عيوني وبعدين طوالي مشتاء وغيره ومن الكلمات
الجميلة عشان كدة تلقاها مبسوطة طول اليوم ومؤدية شغلها على أحسن ما يكون لكن تعال شوف السوداني
لمايتصل على طول بدون صباح خير ولا مساء خير و وتوش داخل شمال .. أسمعي الغدا شنو الليلة ؟
بامية ؟؟ إنت مجنونة ولا شنو ؟ قٌبل يومين مش أكلناها ؟ خلاص أمشي جيبي معاك العيال من المدرسة وطاخ
قفل الخط . طبعا صاحبتنا بتكون صار وشيها اليوم كله ولو الفراش اتاخر ما جاب ليها القهوة بسرعة
تقوم القيامة والفراش المسكين ما عارفها فاقدة حنان وكلمة حلوة ؟؟ و عجبي ع!!عاملات سلمى صبحي !!
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: Sahar Yousif)
|
الحبيبة سحر يا صاحبة السحر الجميل !!!
يسعد صباحك والله مداخلتك سحرتني عديل كدة يا سحر وقبلي ما أمشي معاك في الموضوع هل أنت سحر
بت د. يوسف الصادق استشاري أمراض الدم اللي معانا في أبو ظبي ولا لآ .. إنصرافية مش ؟
والله يا سحر معاك ألف حق الزوجة تحتاج مش إلى ( بعض) الحنان والحب ولكن إلى الكثير منه لأن حياتها
كلها تعب وشقاوة ولما تشعر بشوية إنشاء الله من الاتنين ديل طبعا هم ببلاش يعني ما بكلفوا شيء بتكون
سعيدة وعندها طاقة زايدة للإخلاص والسهر والتفاني من أجل راحة عائلتها وكمان في حاجة خطيرة جدا بعض
الزوجات راسهن خفيف زي الأزواج بالظبط لمن تسمع ليها كلمتين حلوين وناعمين من شخص بصطاد في الماء
العكر طوالي تعمل u turn وصاحبنا المتصحر الخلوي حقو راح وبعدين يجوا يرموا اللوم عليها الخاينة
عديمة التربية وما عارفنها فاقدة حنان .. يا رجال السودان إصحوا !!!
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
عزيزتي عواطف
Quote: هل أنت سحر
بت د. يوسف الصادق استشاري أمراض الدم اللي معانا في أبو ظبي ولا لآ .. إنصرافية مش |
لا ياعزيزتي .. انا سحر عبد الناصر يوسف .. حالية مقيمة في القاهرة /مصر و ابدا ما تقولي علي نفسك انصرافية .. تعجبني تلقائيتك في السرد
عارفة ياعواطف .. انه لشئ غريب ان اليوم كنا نتكلم علي موضوع العلاقات و الحب ووو الخ .. و صادف الحديث في الناس البيتزوجو من غير ما يشوفوا بعض ( صور ، تلفونات ) من غير انهم يعرفوا بعض بشكل حقيقي .. و ليه بيقولوا زواجات هؤلاء اكثر استقراراً من غيرهم دي تخريمة برة الموضوع انا عارفة .. بس بتصب في الحته حقت المشاعر و العواطف بمعني ليه البت بتقبل و ليه الولد يسمح لامو او اختو او حتي اصحابو انهم يخطبوا ليه بالطريقة دي .. اظن ان الحب عبارة عن مشاعر ايجابية يعني ما زر نضغط عليهو بجئ طالع
نواصـــــــــــــــــــــــل
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: Alsa7afa_30)
|
أهلا بالصحافة .. بركة الجيت !! عسل إنت وبسكويت !! بالله دة غنا دة ؟ أتقول الأغنية دي ألفوهافي
بقالة علي اليماني !!
والله معاك حق نحنا حتى المجاملات العادية ما بنعرف ليها يا ربي دة من شنو مع إنه ناس الخليج عايشين
في قلب الصحراء يعني المفروض يكون العكس لكن زي ما بقولو لله في خلقه شئون ,, أها قعدت ولا مشيت ؟
عشان راجعين التحت دي بتقول إنك ركبت الركشة بتاعة الصحافة بالظلط ؟؟ في انتظارك .. غيب وتعال
تلقانا ناشفين زي الحطب .. زمان عندنا واحد في الجامعة مزودها حبتين سموه حامد العود ما عارفين
الدنيا كلها حطب !!!
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
عواطف حبابك
أصل الحب
عندما نكره شخص لا نتردد في ابداء العداء والكراهيه له حتى يعلم من حولنا اننا نكرهه
اما مشاعر الحب فهي التي تظل مكنونه صامته في قلوبنا ربما الخوف عليها من الإستهلاك
الذي يقلل من قيمتها . ولكن حتمامشاعر الحب القوية يلمسهاالطرف الآخر في محسوسات
تحمل القيمة الحقيقة للحب .
Quote: احبك
لا! لاتنطق الكلمه
دعها بجوف الصدر منبهمه
دعها مغمغمة على الحلق
دعها ممزقة على الشدق
دعها مقطعة الاوصال مرميه
لاتجمع الكلمه
دعها رماديه
فاللون فى الكلمات ضيعنا
دعها غماميه
فالخصب شردنا وجوعنا
دعها سديميه
فالشكل فى الكلمات توهنا
دعها ترابيه
لا تلق نبض الروح فى كلمه
******
كم مرة جاشت بى الكلمه
وبدت لعينى وهى تستأنى
فوق الشفاه رقيقة .. تحنى
جيدا وتستدنى
خدين مضمومين فى بسمه
وتكاد تغلبنى على قصدى
لأقول ما أعنى
وأفك طلسمى ... وأجمع من حلقى الشباك
لتفلت الكلمه
وأعود أذكر مرة سلفت
عامين من بأسائها أغترفت
روحى الكتوم لأنها أعترفت
وسقطت تحت سنابك الكلمه
******
لا ! لا تنطق الكلمه
حتى ولو ماجت بوجه النيل
أنسام ليلة صيف
حتى ولو رنت على أرغول
محرورة نغمه
حتى ولو فى الرمل خط الالف
حرفين ملويين
حتى ولو أبصرت فى عينيه .. فى العمقين
قسماتك المحمومة الشفتين
حتى ولو جاشت بك الكلمه
وتساءلت شفتاك .. ماكلمه ؟
تهدى لخد باسم .. نعمه
وتنام فى كفين ممدودين
وتطوف أنفاسا على نهدين
ما أجمل الكلمه
******
ها قد نسيت حياتك الاولى
والجرح والذله
ها قد جمعت الحرف جنب الحرف والحرفين
لمحت بشيىء دافىء مقله
وتمدد الأعياء فى الشفتين
وعدا جسورا كان مغلولا |
وسقطت تحت سنابك الكلمه
صلاح عبد الصبور
سوف أعمل بالنصية ان استطعت
حيث طول المكالمة سببه غداً سوف أتوشّح بالمخيط
والإفساد قد يأتي في كلمة حب
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: EMU إيمو)
|
عواطف العاطفة النبيلة
ست البنات لي حدهن
موضوع جميل
لكن معذرة
لن اقدر على المشاركة فيه
اعذريني
فأنا كل يوم لي
كلمة ـ مفردة ابتكرها
للتعبير عن حالتي تجاه زوجتي ـ حبيبوو ـ
ولكن لن اقدر اقولها
ليه
لانو اولاد الــ ....
الموجودين ديل كلهم بقلبوا على
وكان رحموني بطلعوني ــ كونش ـ
عارفة كونش ـ يعني شنو
يعني بخاف من مرتو
لمن ارجعو الماسنجر بكلمك
وانت اكتبيها بي طريقتك
لكن احكي ليك دي
قالو ليك واحد مشى لي صديقو
لقاه يقول لي زوجتو :
ياعزيزة ما تعملي الشاي
يالطيفة ما تجيبي البسكويت
ياعاطفة وحنان نقصي السكر لانو عندو سكري
ياسكر زيادة ما دخلي اصبعك في الشاي بتاعي
صاحبو بعد ماشت قال ليهو :
شنو الرقة والحنان ده كلو ؟؟
رد عليهو :
عشرين سنة ناسي اسمه
فاي اسم من ديل امكن الفق
مودتي
الكنش
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: محمد سنى دفع الله)
|
الكونش إزيك !!!
يعني إنت بالذات لو ما كنت رقيق وحنون مع زوجتك على الدنيا السلام أنا لو كنت في محلها بركبك
التونسية وبما أنك حتى الآن قاعد وما ركبت التونسية معناه أنك مؤدي دورك على أكمل وجه حب وحنان
و كله ,, يديك العافية ويخلي ليك الوليدات .. وبعدين يا اخوي ما تبقى كونش طالماأم الأولاد سعيدة
بالكلام البتقولو ليها .. يا أخوانا نحن لازم نسقط الآخر من حساباتنا في حالة عدم وجود نتائج إيجابية
بسبب هذا الآخر ,, أما صاحبك داك بتاع السكر والشاي غايتو ما بسألو الله يكون في عون زوجته ..
سعيدة بهذه المداخلة الجميلة يا كونش وباالله خليك كونش على طول المهم أم العيال تكون مبسوطة
و مقتنعة بالجمال اللي بتعمل فيه و عشان لو في زول شكرك ليها ما تقول ليه إشاعة سسسسسسسساكت !!
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
لا أجد مسافة بين إسمك والحقيقة
والحقيقة سامية
عيدك سعيد
............
المسافة بين الاعدادية ومقر الادارة لجامعة الجزيرة
تستوجب القصر بالاضافة لزحمة مكتب الصراف المتزمت والضيق وطوابير التوقيع الطويلة
لصرف القريشات
لذا يلزم ذلك الخروج مبكرا
مر أحد أرباب المعاشات من قداما المحاضرين (المحاربين) فلمح أثنينيهم يرتدون ظل شجرة خلف كلية الطب تختبي بما يكفي من المارة والفضوليين
لم يكترث بذلك فهي تجري مجرى العادة
لكنه فوجي عند رجوعه غانما في نهاية اليوم(المرهق) أن ذات المشهد لايزال
لم يتورع
فداهم سرهم جهرا
وقال بصوته المتهدج الجهور الآمر
يللا قوموا قوموا علي حيلكم قام فيكم صومطري
من الصباح بتقولوا في شنوء
بتسـمعوا في معلقة أمرئ القيس
أما كلام فاضي!!
الضل لهوجتوه نامن كمل
علي الطلاق أنا وأم العيال من ماعرسنا لي ساعتي وساعتكم دي
ماقلنا جملتين علي بعض
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: nourelhadi awad)
|
الأخ العزيز نور الهادي !!!
الله ينور عليك دنيا وأخرى ,,,
أنا برضو لا أرى أي مسافة ولو سم واحد بين هذا الإسم وبين أناقة ما تكتب .مع أني افتقدتك كثيرا خلال
الفترة الماضية لكن سررت بوجودك بيننا اليوم و لعل المانع خير !! بخصوص صاحبك المشى وجا بالله رايك
شنو في جنس الكلام دة ؟؟ والله أنا قربت أنتحر من غيظي الحمد لله إني ما كنت موجودة .. تعال شوف الزول
الرقيق د. عبدالله الطيب لما يلقى اتنين واقفين على عربيته لفترة طويلة يستحي إنه يفرق الجماعات
فيقوم بأدب شديد يقول ليهم عن إذنكم آخد العربية خمس دقايق وأجيبها ليكم راجعة ,عجبي .. عليك الله
ما تقطع أخبارك ,,, شكرا على الطلة الجميلة ...
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
أستاذة عواطف (ست الجمال)
Quote: وأنا خايفة بكرة يقوموا يقولو لا قلنا ولا حاجة ويطلعوني كضابة _ الجماعة ديل بقولوا التعبير
عن المشاعر شفهيا له دور إيجابي كبير على حاسة السمع التي تقوم بترجمة هذه المشاعر وتحويلها الى سلوك أو
رد فعل ايجابي مثلما تفعل الموسيقى تماما |
والله يا عواطف بقيتى خوافة خوف لكن كويس ما شايفاهم جو ناوشوك
أستاذ محمد سنى سبقنى بالنكتة
يلا نجى للموضوع
الكلام الحلو والتعبير عن المشاعر شئ مطلوب وبغير كتير وفعلا الكلام المقتبس دا (عن تجربة) لووووووووووول
بس
إذا جينا لعنوان البوست
قل لى واو كذبا كلاما ناعما*** قد كاد يقتانى بك التمثال
فهى من طلبت منه وليس فقط لأنها تريد سماعه منه ولكن كى تستطيع هى أيضا أن تبوح
(الرجال قوامون على النساء) دى فى أى حاجة حتى أن الواحدة بتنتظر فارسها أن يبدأ البوح بعد كدا يوقفها الله
وهو يرد
ما زلت فى فن المحبة طفلة***بينى وبينك أبحر وجبال
لأن الحب كان لديه بمعان أخرى خلقتها الظروف والواقع الذى عاشه
لم تستطعى بعد أن تتفهمى***أن الرجال جميعهم أطفال
نحن نصيحتنا بنديها للستات وبعد كدا النتيجة قصة تانية
(أعط كل ما عندك فالخجل من البوح بالمشاعر دى بتفقدك كتير وتخليك ورااااااااا)
كلماتنا فى الحب تقتل حبنا*** إن الحروف تموت حين تقال
لا يقتل الكلام الحب بأى شكل من الأشكال إلا إذا الواحد شايف أن أى تعبير لا يعطى الموقف حقه (وبتحصل) بس نزار راح ليه الكلام ساى لما قال كدا
فأذا وقفت أمام حسنك صامتا***فالصمت فى حرم الجمال جمال (أو كمال ما متأكدة)
أها التقيل ورا شفتو
وزى ما بقولو كلمة تودى وكلمة تجيب
طيب مش أحسن الودى والجية ديل بدل الوقفة فى نفس الحتة
تخريمة
الكلام دا كان زمان والله حسا المعرسين بقو يكسروناويعقدونا أكتر من الجكس هاهاها
وتانى
(التغيير من الروتين مهم زى ما قلنا فى ينتهى الحب بإنتهاء مراسم الزواج
مودتى
سماح
| |
|
|
|
|
|
|
|
|
 Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: sama7)
|
سماح السمحة !!!
يسعد صباحك الحلو ,,,
مداخلتك لطيفة .. خفيفة الظل وفي الوقت نفسه دسمة جدا .. طبعا يا بتي الخاف ربى عياله في شعر
كدة ما عندنا ليه رقبة ولا شنو رايك ؟؟
قصيدة نزار تؤكد أن الرجل الشرقي حتى ولو كان شاعر لا يجرؤ على البوح اللفظي رغم أهميته في رفع
الوح المعنوية وتجربتك الحلوة ( لووووووووول ) تؤكد ذلك ..
قل ولو كذبا كلاما ناعما ** قد كاد يقتلني بك التمثال ...
فعلا هي من طلبت لأنها شعرت أنها ستموت من عدم الكلام الناعم بل شعرت أنه كالتمثال تماما وبعدين
لما قال ليها ما زلت في فن المحبة طفلة بيني وبينك أبحر وجبال دة كلام كبير وخطير يعني المحبة
ليست مشاعر فقط بل هي فن من الفنون ويعتبر التعبير عنها أحد هذه الفنون .. أما حكاية أن الرجال
جميعهم أطفال دي الحاجة الوحيدة الطلعوا بيها من القصيدة .. كلهم بقوا أطفال ولو قلتي بغم بيقولو
ليك كمان عندك راي في كلام نزار الشاعر بتاعكم ( يعني شاعر الحريم ) أما حكاية إن الحروف تموت
حين تقال دي غايتو دقس فيها دقسة شديدة .. سموحة مسرورة بوجودك هنا فابقي معنا ..
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
الموضوع جميل لكن دة حالنا نعمل شنو ما تقولو لي لازم نتغير ونبد ثقافة التعبير اللفظي لاننا فعلا تربينا علي كدة وزي ما قال واحد اخونا في البورد قبل كدة ابوي كان بيجي داخل من الشغل يكورك القشرانة دي وين، يا ولد امك مشت وين وما بيهدا لية بال الا يشوفها جاية علية دة نوع من الحب وما سمعنا ابهاتنا يوم قالوا لامهاتنا كلمة غزل عشان نقلدهم والحب ما بالكلام .
انا مثلا متزوج من اكثر من خمسة عشر عاما ولم اتزوج زواج تقليدي بالمعني المتعارف علية ووعندي ثلاث بنات رائعات وامهم اكثر روعة منهم لم اتعود علي صريح عبارات الحب معهم ولكني متاكد انهم يدركون كم احبهم واعشقهم الموضوع يا سيدتي ليس التصريح بل وجود ثقافة الحب من الاساس وانا بفتكر انو الزوج السوداني كما قالت فاطمة احمد ابراهيم تماما ازواج مثاليين لكن(بدون صوت ) دي ثقافتنا لية عاوزين تبقوا زي الشوام وما جاوروهم في الافصاح ديل ناس جوهم بارد وعيشتهم متوفر فيها الاساسيات ما زينا حياتنا كلها جري عشان بتاع اللبن الصباح ما يفوت بيتنا وعشان بتاع الدكان الجنبنا ما يحرجنا لو جينا طالعين نقدم لينا ضيف ويسالنا وينا القروش يا زول.انا متاكد ان من احبهم يدركون كم احبهم دون افصاح وهذا منعكس في سلوكهم تجاهي مثلي تماما وهذا يكفيني.
يعني لو يوجد في مجتمعات الشخص بيعبر عن حبة بانة بيصطاد ويصارع الاسود فهل المطلوب مننا نعمل زية .ما اريد قولة لكل مجتمع ثقافتة وخصوصيتة وطبيعتة ولكننا فعلا بنحبكم يا من تهموننا.
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: الزبير صالح الزبير)
|
الزبير بن صالح الزبير !!!
سلامات ,,,
أيه الكلام دة يا سمي جده ؟ والله نحنا مصدقينك وعارفينك بتحب أسرتك كلها وزوجتك على وجه الخصوص
بصورة غير عادية ولكن ما المانع إنك تقول ليك كل يوم كلمتين حلوين على الطاير ؟ بعدين ما تقول
لي أبو ولا أمي هسة إنت عايش زمنهم ولا زمنك ؟ ياخ صحصح معانا شوية وخليك في الخط ما تطلع برة
الشبكة .. و كمان خليك من الحليب والزيت والبصل قول للولية كلمتين حلوين وما تجيب أي حاجة لو ما
قالت ليك ليس بالخبز وحده يحيا الأنسان تعال لي راجع .. آل أبوي آل !!
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
نحن في السودان نتاج مجتمع ذكوري ممعن في ذكوريته والان بدء تدريجيا وبجهد المراة "فقط" في ان تقتطع هي شيئا من صرامة ذلك المجتمع وتلونه بالوان انثوية وتلينه ببوح انثوي ولكن رغم ذلك مازال البون شاسع حيث ان هذا المجتمع الذكوري ما زال يرفع ضد المراة اشارت "الوقوف" باسم العيب و هذا يصح او لا يصح.. هذا المجتمع ضنين في تعبيره عن الحب بقدرما هو كريم في التعبير عن الحماسة والفحولة وما تحتاجه ساحات الوغي ..ولولا جهد شعراء ومغنيين عبروا عن الحب ووصفوه وغنو له شكلا ومضمونا لما وجدنا للحب اثرا في قولنا...حتي اطفالنا نضن عليهم بتعابير حب فالحب يجب ان يسمع ويحس ولا يكفي ان يكون احساسا ابكما فقط ..يجب ان نعبر عن الحب بانواعه ليس كما يفعل غيرنا وانما باسلوب وشكل يوافق ما نحن فيه حتي لا يبدو غريبايثير الدهشة كحال زوج المغربية المذكور اعلاه وتجميليا فقط ....صديقتي كل صباح تبادرني بصباح الفل والياسميين وانا في صحراء تكثر فيها اشجار الغاف ( نوع من الاكاسيا) والسواك فاصيح معترضا بانها يجب ان تصبح علي بما في واقعي وهو جميل طالما هو الموجود ونافع وابن البيئة .. اي اننا يجب الا نهرب من تعبير عن الحب بانواعه الي ما هو ليس لدينا الي تعابير موجودة لدينا فلا يصير غريبا نحتاج ان نستعيين عليه بما هو ليس من بيئتنا وغريب علي انظارنا ومسامعنا ... ليس بالضرورة ان اقول لزوجتي تقديرا لعمل ما في سبيل راحتي " انا احبك واموت فيك " ولكن " تسلمي .. انك تريحنني كثيرا وتجعلي حياتي سهلة ممتعة معك ".. ليس بالضرورة تكرار المفردات التي نقرؤها في قصص احسان عبد القدوس والافلام والمسسسلات التي هي ليست من مجتمعنا ولكن فلناخد مما هو موجود في قواميس كلامنا اليومي ولغة مجتمعاتنا من كلمات طيبة رقيقة انسانية ونكثر من استعمالها تعبيرا عن حب وعرفان ...
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: abubakr)
|
أبوبكر الجميل !!!
يسعد نهارك يا باشمهندس ,,,
أنت دائما كجهينة عندك الخبر القين ولكن يا أبوبكر ما تنسى في ناس ما عندها أي شكل من أشكال
التعبير يعني الزوجة أو الزوج لو أضاء أصابعه شموع ما فارق معاهم وفي ناس تانين لا بعجبهم العجب
ولا الصيا في رجب مش كلمة حلوة وبس ديل هايجين على طول ياربي دة من شنو الواحد لو ما صرخ وكورك
ما بعرفوه أنو أخو البنات ومقنع الكشافات وإنه ممشي البيت زي الترتيب أها جنس ديل بعرفوا يقولو
ولو كذبا كلاما ناعما .. والله ديل أخير منهم التماثيل ذاتها.. شكرا أبوالبنات الحلوات وشاطرات ..
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
كيفك يا عواطف
موضوعك القطعتيوهو من راسك ده من وحى الطوة والبوتجاز قطعتو لينا بيهو عديييل ..
ده جدل عندى هنا مستمر وأنا عندى تلاته نسوان .. البنات تربية خواجات وأمهم باقى لى إتأقلمت مع البرد وإستوطنت ..
فى جملة قلتيها فى الموضوع "طبيعة الرجل السودانى" ودى الحقيقة .. فى الشارع الوجوه متجهمة والكلام فى المفيد المختصر والحدة السريعة .. ما أظنها من الشمس .. ولا من قساوة الحياة .. ولا من التربية الجادة .. ولكن مع بعض مجتمعين .
نغضب للخطأ ولا نمدح الجيد ونتغزل فى الجميل . يعنى أنا أنتقد مثلآ لباس زوجتى وبناتى عند "البشتنة" لكن عند الأناقة والقيافة رغم الرضا بدون تعليق .. وده البجنن النسوان ..
لكن فى المكان الصحيح الواحد بشيد بزوجتو وبناتو .. لكن كلام يا حبيبتى والقمر شنو ما بعرف داك بنعتبروا خفة .. وعندنا كلمة يا زول أتقل وما تبقى خفيف .. حكمة .
طالما إنتن عارفننا ناس كويسين دايرننا ليه ننكفى على وشنا . وبصراحة الواحد لما يتلفت حولو فى الشعوب التانية بشعر بيهم مرائيين . الواحد ياخد زوجتو بالأحضان فى نص الشارع وزى ما قلتى تجيهو جارية حفيانة .. بعد يومين تلقاهم إطلقوا ..
وإنتى منو القال ليك أبوك الله يرحمو ما كان بدلل والدتك ؟ .. عشان ما شفتيهم يعنى ؟
المظاهر " الشويية" دى من show كذابة ونحن الحقيقة ..
قبال يومين قدامى قدااام الكاشير فى السوبر ماركت ألمانى مع صحبتو قطع فيها قدوم سنة .. ودنقر دفع حسابو .. ووقف زى الما بعرفا تدفع حسابا براها .. أهى دى حالة ..
فكيتا فيكى .. لكن والله ما قاصدك .. قاصد البقرو ليكى معاى هنا
| |
|
|
|
|
|
|
|
|
 Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: رأفت ميلاد)
|
ود ميلاد !!!
سلامات ,,,
يا هادم اللذات ومفرق الجماعات نحن نبني وإنت تهدم أمانة ما اتلومت يا ريري بكلامك الأخير دة هسة
الألمانية ذاتها أكدت كلامي يعني الحب ولو على الطاير أهم ليها من قروش الكاشيير و كان ما مصدقني أسأل
أم البنات قول ليها أسمعك كلام حلو ولا أدفع ليك في الكاشيير لو ما قالت ليك سمعني كلامك الحلو وما تدفع
الله يلعني إنتو ما جايبين خبر مضيعين قروشكم على الفاضي أخير لموا قريشاتكم عليكم وأطلعوا من جو الجفاف
والتصحر دة وشوفو النسوان يبقن كيف .. وهسة إنت بي ذات نفسك قلت ما بتقول للسمح سمح لكن تنقد
الماسمح أها دي البتجنن النسوان الواحدة تقول أنا لابسة عشانو وهو ما جايب خبر لو دي واحدة معاه في
المكتب كان نطة وقال ليها الله فستانك جميل ذوقك بيجنن .. حتى لو كان فستانها شين وقبيح وبعدين إنت
قاعدفي جو ولا أجمل المفروض تكتب شعر مش تقول كلام جميل وبس بالله أديني ايميل المدام وخلي الباقي علي .
| |
|
|
|
|
|
|
|
|
 Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: محمد على طه الملك)
|
الملك !!!
تحياتي ,,,
معقولة بس واحد يكتب كلام جميل زي البتكتبو في المنبر دة وما يقدر يعبر عن نفسه شفهيا ؟ أما حكاية
الله لا جاب يوم شكرك دي ياها الزوقة بذاتها وصفاتها بعدين إذا إنتو لم تسهمو في رياح أو تعصفوا في
الحقيقة لأن الرياح بدها عاصفة وليست مساهمة إذا لم تشاركوا منذ هذه اللحظة الجيل الجديد نفسه
حيكون زيكم وحيقولو نفس الكلام إنهم ما شافوا أبواتهم يعبرون عن شعورهم لذلك يتركوا هذه المهمة
الصعبة للجيل القادم وهكذا دواليك .. شكرا على الشجاعة وعلى هالطلة ...
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
صباح الخير يا عطوفةQuote: لو دي واحدة معاه في
المكتب كان نطة وقال ليها الله فستانك جميل ذوقك بيجنن .. حتى لو كان فستانها شين وقبيح |
ده إسمو نفاق إجتماعى وضرورى أحيانآ لإبداء حسن العلاقات و مجاملة الزمالة بدل "التكشيرة" .. وكل واحد بروح لى حاله .. أما زوجتك أو زوجك مكشوف بينكم الحجاب ويستحيل أنافقها جوة البيت .. يعنى كانت جابت نفس الفستان ما رايح أقول نفس الكلام .. بقول الحقيقة .. ودى البتولع النيران .. خاصة كان كانت عارفة تعليقى للزميلة | Quote: إنت قاعدفي جو ولا أجمل المفروض تكتب شعر مش تقول كلام جميل وبس |
"يموت السنجاب حتى إذا حبسته فى قفص مليئ بأشجار الدنيا" .. مثل سويسرى
خلاصة الكلام كان دايارننا نغشكن ... نغشكن مافى مشكلة ...
بس دايرين ضمانات كافية وعقد مكتوب
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
تحياتى أ/ عواطف
تحت عنوان الحب فقد الاحترام ادرنا نقاشا نحن مجموعة طلاب حينها، وكان ملخص النقاش ان الحب فقد الاحترام .
خاصه وان اى شاب يرتبط بانثى داخل الجامعه يعرف وتعرف ان هذه العلاقه مرهونه بايام الدراسه ورغم ذلك يكون العطاء غير محدودا بينهما(ولك ان تفهمى ما اعنيه)
وبالمقابل سياتى يوم يتزوج فيه الاثنين كل من شخص اخر!!!
وبالتالى تخيلى على ماذا بنيت فكرة الزواج وما هى المشتركات بينهم وماذا عن المعطيات؟
وهذه المجموعه شريحه من عينات متعدده .
حينها تكون دواخلهم مستهلكه وتجاربهم فاتره ........ ولا اعتقد باى حال من الاحوال بان مفردة حب سيكون لها وقع جيد للناطق او السامع منهم.
الحب قيمه حتى نشعر بها ونحسها يجب ان نحترمها وذلك من خلال تادبنا مع ذاتنا واحترام علاقاتنا وتقدير زوجاتنا والتدرب على ذلك بمحاولة الالتزام داخل الاسره.
عفوا اذا جاء التعبير مرتبكا والفكره ناقصه ولكن الاحوال فى السودان غير هادئه والقلق فى اعلى حالاته.
الى جديد لقاء
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
السلام عليكم
والله البوست بقى مضحك خلاص يا عطوفة والله يجازى جماعتك وتعليقاتم
د.محمد حسن
| Quote: بكرة سماية بت خالتي عليك الله اشتري لي توب جديد |
فى دى نحن معاك فا دا تصرف مبتزل ما مفروض الواحدة دائما تطلب مقابل أنها خلت زوجها يحس إحساس جميل
دى ما وظيفة المفروض يتدفع ليها بالمقابل فيها... دا البجننكم زاااااااااااااتو لول
أو على قول عطوفة ما متعودة وقالت أحسن تغير الموضوع
عطوفة
| Quote: بين وبينك الحياء مطلوب لكن ما للدرجة كمان ؟؟ |
أهو برضو تعبير ما مشكلة الكلام بس السودانيين غير قلة الكلام عندهم نقص فى توصيل الأحساس أساسا
ودى صراحة مشكلة كبيرة ...
الجميل أستاذ رأفت
Quote: طالما إنتن عارفننا ناس كويسين دايرننا ليه ننكفى على وشنا . وبصراحة الواحد لما يتلفت حولو فى الشعوب التانية بشعر بيهم مرائيين . الواحد ياخد زوجتو بالأحضان فى نص الشارع وزى ما قلتى تجيهو جارية حفيانة .. بعد يومين تلقاهم إطلقوا ..
|
لا مرائيين ولا حاجة دا فعلا بكون احساسهم فى اللحظة ديك
بس فى رأيي مشكلة الجماعة ديل أن الظروف الحولهم بتلعب دور كبير جدا فى حياتهم ومن ضمنها العلاقات العاطفية
تلقى اتنين حيموتو من الحب لكن ظروف عمل واحد منهم نقلته حتة تانية والتانى شغال كويس فى حتته يبقى الحل فى باى باى
ديل حتى طلاقاتهم لسبابها مختلفة جدا مننا (مثلا الواحد ما متحمل طفل فى البيت) دى مسألة ضغوط نفسية تانية
بس لما حس عبر ودا الطلوب
| Quote: قبال يومين قدامى قدااام الكاشير فى السوبر ماركت ألمانى مع صحبتو قطع فيها قدوم سنة .. ودنقر دفع حسابو .. ووقف زى الما بعرفا تدفع حسابا براها .. أهى دى حالة |
يا زول ما مشكلة هى دايرة تدفع مدام هابى معاه الدفع براه والحب براه
محمد الملك
Quote: أنا لما عايز اشكرها بقول ليها (الله لا يجيب يوم شكرك )
شفتي الزوغه دي كيف ؟
انا شخصيا بستحي في الحالتين ..
إذا قالوها لي وللا قلتها .. |
عاد نقول ليك شنو غير نبرا من جنس دا
حسى لو واحدة تانية حنكتك تلقاك تتبسم ساى
مودتى
سماح
-----------------------
مشتاقين يا عطوفة
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: sama7)
|
ست البنات سماح !!!
والله بجد إنت متعة للروح والنظر ,,,
عارفة يا سموحة ضحكتيني جنس ضحك لأنك كاشفة الجماعة كلهم ابتداء من رأفت وأنتهاء بالملك اللي آل
بستحي آل !! طيب قبل الزواج أيام الحب والمشي بالرجلين مئات الأميال في الساعة بلا كلل أو ملل
الحياء دة كان وين ؟ عاد مافي كلمة في قاموس الحب ما خلوها جابو موية السكر عشان الحمام ما يطير
و كان شفتي رأفت ميلاد والقشرة مرة قميص من أخوه ومرة من صاحبو ومرة من الجيران لزوم الأناقة
وتعالي شوفي الكبكبة والعزايم وين وين كل يوم مكان جديد وراقي وأول ما حبيبتي وقعت في الفخ قال
ما تعودنا نقول كلام زي دة ,, غايتو الله يكفينا شركم ويدينا خيركم ..
شكرا سماح على المداخلة اللطيفة . ما تمشي بعيد خليك قاعدة بالمرصاد الجماعة ديل عايزين واحدة
تفتيحة زيك !!!
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
تحياتي عواطف موضوع لطيف ومهم ..
كنت قد كتبت سابقا شيئا قريب من هذا الخيط ..
عمك تنقـو: هل أتاك حـديث الشمـس ؟
Quote: هل تعلم معني ان تكون معلقا بين السماء والارض ؟
دعني احدثك عن هذا ...
قلت لها وانا اتكئ علي بقايا شجاعتي : مشتاقين ..
ليت الفتاة ( الشمس ... القمر ... الارض ) منهن تعلم ان ( مشتاقين ) بصيغتة الجمع ليست للتحيه وليست تعبير عن شوق وليست كلمة تمر عبر اسلاك الهاتف لاستهلاك فاتوره مسبقة الدفع .. عندما يقولها ( الرجل ) منا يا صلاح يكون قطع فيافي عظيمة في دواخله ليزفرها ... ليتها تعلم ان ( مشتاقين ) ليست هي مشتاقين التي ينطقها ( الرجل ) علي عجاله وسط جمله ( مشتاقين ياخ ) ... ليت الفتاة منهن تعلم ان ( الرجل ) فينا يكون قد جلس ساعات طوال يتمتم بها لتخرج بلا تعثر .. وينتظر الرد مثل رضيع يسعي الي صدر امه الحنون ... وان مشتاقين مغلفة بصيغة الجمع مثل قطعة حلوى مغلفة بطعم العشق .... ننتظرها نحن ( الرجال ) الاطفال يوم عيد اللقاء .. ونلبس لها اجمل الثياب نهلل ونكبر .. ثم نقول ( مشتاقين ) ...
ليتها تاملت اسماعيل حسن :
الخدود الشاربه من لون الشفق عند المغارب ..
ديل خدودك سيدي وسيد الناس يا سيد الحبايب
العيون طرتني زول من اهلو غائب ...
والشعر في كتيفو يتهادل سبايب ..
ثم ..
والله مشتاقين ...
....
هل يحتاج الرجل فينا يا شتات ان يبرر شوقه بمقدمه مثل اسماعيل حسن بهذا الوصف ــ عندها سيصبح نصف سكان الكرة الارضية صم بكم .. ببساطه لانه يوجد اسماعيل حسن واحد وشوق متعدد ..
هل الشوق فينا يحتاج الي تبرير .... اذا كان العشق من فضة فالشوق من ذهب
قالت وهي تهذأ بما لا تعي : مالك الليلة ما طبيعي ولا شنو ؟
هنا يا صلاح .. وهنا تحديدا تكون معلقا بين السماء والارض |
...
اها نبقي لي زي دا ؟؟؟
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
سلامى الى الجميع
جيتكم تانى
يا استاذة عواطف نحن فى مجتمع بيعتبر تصريح البنت بحبها لشخص عيب كبير هذا فى اطار الفترة ما قبل الزواج -حتى الرجل نفسه يتغير تعامله تجاه البنت بمجرد ضمان انها احبته
| Quote: الواحد مرات بجيه احساس كدة أنه دمه تقيل ولصقة |
هذا هو الواقع للاسف عليك ان تظهرى عدم اهتمامك و تكتمى عواطفك لتضمنى بقاء من تحبين بجوارك!!!!!!!!!!!!
و امكن لو مرق من الارشفة امكن تانى اجيكم
و كل سنه و انتو طيبين و تامين و لامين مع احبابكم و ربنا ما يحرمكم من الكلمة الطيبة و يجمع كل زول مع من يحب
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: AMNA MUKHTAR)
|
أمونة .. الدرة المصونة !!!
كل سنة وأنت أكثر تألقا وأبلغ صمتافقد قالو إن في الصمت كلام ...
بالمناسبة فعلا الشعب السوداني مصاب بالجفاف والتصحر لو لاحظتي على جميع المستويات ومش الأحبة وبس
يعني لو مشيتي تنجزي أي معاملة الموظف أو الموظفة تلقيها صارة وشيها وتقول ليك عايزة شنو ؟أتقول
كتلتي ليها كتيل ولمن تناوليها الورق تقلعو منك وترزعو على الطربيزة التقول زعلانة منك زعل السنين
لا ابتسامة لا كلمة حلوة لا غيره يا ربي دة من شنو ؟
قصيدتك حلوة لكن مالك يا بت أمي لا بتسالمي لا بتكالمي لا بتجيبي لا بتودي ياربي القصيدة دي كتبوها
فيك ولا شنو ؟ زي ما قلتي الكتير مسيخ لكن كمان ما يكون ما في بالمرة والله يا آمنة بعرف نسوان كتار
بتونسن مع أصحاب أزواجن بالساعات ولمن تسألي تقول ليك على الاقل بسمع منو كلمة حلوة شفتي يا بت أمي
عدم الكلام الحلو بسوي شنو ؟ كمان نفس الشي الرجال يتونسو مع زوجات أصحابهم بالساعات ولمن تسألي
يقول ليك مرتي دمها تقيل و ما بتعرف تنضم أها دي يحلوها كيف ! على فكرة موضوعك الخطيييير جدا داك
جاياه بالمهلة لأني كنت الأيامات ديك قايدة لي معركة في المنبر المهم جاية عشان أضيف ليك حركات بعض
المسئولين السودانيين لمن تجيهم واحدة مكسورة جناح وعايزة وظيفة ,, تسلمي وكل سنة وإنت طيبة ,,
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: عواطف ادريس اسماعيل)
|
هل فى حب سودانى ؟
وهل الحب الا مشاعر انسانية ؟
اينما كان ؟
المهم يا صديقتى
تربيتنا السودانية كما تفضل بعض المتداخلين المبنية على الصوفية والزهد فى كل شئ
لكنها ايضا قائمة فى بعض الاحيان على الحب
واقول الحب
فكلمة حبيبى مثلا
كنا نسمعها من امى وكثيرا
كل شخص فى هذا العالم حبيبها
حتى زوجها (والدنا ) كان حبيبها تقولها له فى غلاف من الحياء
لكنها لاتجاهر به بالقطع لما تحدثنا عنه من زهد هو احد مفاصل حياتنا
(حتى الحلوى لانكثر من اكلها لانها تجلب الحزن ، كانت جداتى يقلن كيف ناكل الحلاوة والنبى تحت التراب ؟)
المهم يا صديقتى
ان كلام الحب هو ناتج تربية وفاقد الشئ لا يعطيه
نحن تربينا على ان الرجل الذى يضحك راجل (ساكت )
والمراة التى تبوح عن عواطفها (قليلة ادب )
الانثى التى تبوح عن انوثتها (لامؤاخذة يعنى )
وهكذا
تجديننا فى مجتمع لا ينظر للمراة قط الا كوعاء
ولا تجذبه اليها الا انها ستلد ابناء
ولا يحدثها الا فى الاكل والشرب والعيش باختصار
وان هى طلبت فلها الثبور
حدثتنى شابة تعيش فى السودان وزوجها يعيش فى الخليج
انها ذات يوم كما قالت (طلعت من علبى )
وقالت له
ـ مشتاقة ليك
خمنى ماذا كان رد الفعل ؟
ان طلب من اهله ان يطلقوها منه لانه (قليلة ادب بتقول كلام قلة الادب ، وهو رجل جامعى فوق كل ذلك )
| |
|
|
|
|
|
|
|
|
|
Re: قل لي و لو كذبا كلاما ناعما ... التعبير عن المشاعر المخفية ... في ثقافة الحب السودانية ... (Re: سلمى الشيخ سلامة)
|
آآآه يا سلوم !!!
فقد قلبت المواجع وفتحت الجراح حد الوجع فعلا تربيتنا غلط ْْفْْي غلط وقد أدت هذه التربية إلى الكثير
من الانتكاسات والاحباطات والانكسارت والفشل في الحياة العامة والخاصة لو لاحظتي يا سلمى أن نسبة
الطلاق في السودان عالية جدا بسبب الفشل في التربية السليمة منذ البداية بتصدقي في واحد جامعي
طلق مرتو القاعدة ليه وحارسة ليه شغله عشان جارها في المحل الجنبها من جنسية تانية جاب ليها معاه
ساندوتش فلافل ساعةالفطور ولما لجأت لزملائه عشان يرجعوها كرمانا لأولاده الستة قال ليهم دي مرة ...
تصوري الجهل الفاضح .. وزي قصتك الحكيتيهاكتير جدا حصلت بصور مختلفة تقول لي نحنا ونحنا الله يعين
يا سوسو مداخلتك عجبتني شديد والله رغم كمية الوجع اللي فيها وطبعا كمان ما تنسي لأنه البت مقطمنها
للآخر لو أي واحد من جنسية تانية اتكلم معاها بذوق وأدب تفتكره بشاغلها وهاك يا شكل ويا قيامة
قايمة والطرف التاني مندهش الحاصل شنو يا ربي ؟ تسلمي من كله بلا وكل عام وأنت بخير يا أم عزة .
| |
|
|
|
|
|
|
| |
عواطف ادريس اسماعيل
Salah Waspa
Alsa7afa_30
انعام حيمورة
دينا خالد
نهلة عمر
خالدة البدوي
EMU إيمو
Ahmed Abdallah
Amir Omer
Kamal Karrar
bent-elassied
Sahar Yousif
احمد معتصم الطيب
محمد سنى دفع الله
sama7
الزبير صالح الزبير
د.محمد حسن
abubakr
رأفت ميلاد
محمد على طه الملك
..
عبدالله الشقليني
Tragie Mustafa
Mustafa Mahmoud
سلمى الشيخ سلامة
فيس بوك
تويتر
انستقرام
يوتيوب
بنتيريست