|
Re: الحلة بصل ... والمرة كرعين !!!!! أمثال عجيبة !!!! (Re: الصادق صديق سلمان)
|
الأخت العزيزة عواطف
تحياتي
في إعتقادي أن ( الحلة ) في أيامنا هذه لا تحتاج إلى البصل كمادة لتكون ( طاعمة ) لأن فنون المطبخ صارت تأخذ مناحٍ أخرى لتجذب الذواقة .. بالتالي فإن الجزء الأول من المثل أصبح شبه ( إكسبايرد ) ..
نأتي للشق الثاني .. و بكل صراحة حيث أن الذي أطلق المثل كانت نظرته ( سفلية ) بحتة .. بمعنى أنه ينظر إلى ( كرعين ) المرأة ثم تتسلق مخيلته جسد المرأة إلى أماكن أخرى قياساً بهذه الكرعين. و هذه نظرية ذكورية معروفة و متداولة بين السودانيين و شعوب أخرى.
طبعاً أنا معك أن المثل غريب و مريب .. و لكن كما قلت من قبل .. أن بعض الرجال ما أن يرى المرأة حتى يحملها بخياله إلى ( الفراش رأساً ) .. فإن كانت بلا ( كرعين ) أو مؤهلات تلهب الحواس و تشبع نهم النفوس الأمارة بالمتعة .. فهي عجفاء لا تصلح لأن يعاشرها .. حقيقة بعض الرجال هذا هو مقياسه .. يضع متعته الجسدية فوق كل إعتبار حتى و إن كانت صاحبة ( الكرعين ) لا تحمل من مواصفات الزوجة أي درجة .. و القلة القليلة يستمتع بما تحمله في رأسها من زخم نافع أو بما يحويه قلبها من مشاعر نبيلة ..
ذات مرة .. في القاهرة أتتْني مصرية من المعارف و تربطني بأسرتها علاقة صداقة متينة .. جاءت و الدموع في عينيها تشكو خطيبها الذي كان لي فيه رأي .. لأنه كان لا يستحقها بمعنى الكلمة .. بعد نقاش مستفيض .. قلت لها : ما الذي أعجبك فيه المرة الأولى التي شاهدتيه فيه ؟ قالت مبتسمة من بين دموعها : قَزْمِتو( تقصد جزمتو ) فإنطلقنا نضحك .. فاللئيمة تقصد أنه متأنق حتى الثمالة في ملبسه حتى حذائه .. يعني وافقتني في رايي بأن نافوخه يشكو من الإتساخ بعكس ( جزمتو ) .. و لكنها تحبه ( ملعون أبو الحب ... شو بيذل ) ...
هناك ( أمثلة ) كثيرة تصب في نفس سياق ( البصل و الكرعين ) .. و هناك نظريات متداولة بين الرجال في نفس المعنى .. و آخر دعوانا أن ( اللهم لا تكرْعِن حبنا و لا تبصِّل حِللْنا) ..
دمت يا أخت عواطف
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: ابو جهينة)
|
أبو جهينة !!!
ليك وحشة ,,,
وينك يا ريال ؟؟ عسى ما شر؟؟
شكرا على عبورك العطر ومنك دوما نستفيد يانبع العلم والأدب ,, ربنا يسعدك و يجعل حلتك دايما طاعمة من غير بصل و حبك يمشي على قدم وساق مثل ساق الفيل .. أما حكاية قزمتو دي أها طلع مخه زي الجزمة شكرا مرة أخرى أبو جهينة مرورك يسعدنا .
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: عواطف ادريس اسماعيل)
|
Quote: أنا يا ود أمي ما قلت الواحدة لازم تكون شينة تقطع الخميرة من العجين |
يا عواطف واحدة قلتي سيقانه زي سيقان المعزة ومرة زي الباعوضة وتقولي لي ما تقطع الخميرة من العجين والله دي تخلي العجين في حلة براهو والخميرة تنط في حلة تانية.
Quote: بقصد إنه الجمال وحده ليس شيئا أساسيا فهناك أشياء أهم من الجمال |
ايوة ما قلنا حاجة يا تيفا لكن الجمال هو البوابة الرئيسية لاي حاجة تانية يعني ما ممكن نمر الا عن طريقو والا كمان ننط بالشباك والشبك يخربشنا والترباس يشرط القميص وتنسرح لينا سريحة من خشب الشباك المقشر وينزلط كوعناويمكن بي جوة نقع في كباية مكسورة ويبقى فيها جرح في الكراع .. والعجب كان فيها سكري .. ما قلت ليك السماحة مهمة..
Quote: وبعدين يا أمير إصرارك على إن السماحةمهمة دى خلاني أعرف ليه إنت كنت بتجي السودان وبترجع من غير عرس لمدة خمسين سنة |
لكن ما قصرتي صغرتيني جنس صغر.. والله كنت بحصحص جنس حصحصة .. مرة اقول ياخ عاين دي (كرعينا) زي حديدة الصيوان ومرة اقول شوف ضفايره زي نهاية قضيب القطر ومرة عاين اصابعينا زي سبيطة الموز .
Quote: عموما أنا سعيدة بمداخلتك وروحك المرحة ,, |
شكراً يا تيفا (روحي مرحة) ونخرتي قدر كوز الطليس .. عليك الله يطيروني وين!!
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: امير عوض الجمري)
|
بدون بصــــــل!
الأميرة عواطف
موضوع سلس ووجبة دسمه وهاك يابطاطس في الدمعه غاطس
ولو عرفت قمية الجرجير كان زرعتو تحت.......وهلمه جره
وياحليل الناس ومن ذي دايل أنا وآه آسفاي!!
والرسول الكريم صلي الله علية وسلم يقول(( أظفر بذات الدين تربة يداك.))
والنساء شقائق الرجال هن من يجملن الحياة أو العكس تمامأ وربنا يديكم
العافية بحلل بدون بصـــل.
وما أكرمن الا كريم وما أهانن الا لئم.
ونحن كلنا من أرحـــامهن خرجنا وليس من أرجلهن !1
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: محارب)
|
محارب !!!
سلامات ,,,
والله إنت فعلا زول حربي وكلامك واضح وصريح لكن بيني وبينك لو لقيت المرة الفاهمة والعاقلة ورزينة لكن رجلينا سكاكات حتختار شنو ؟؟ غايتو صحكتني براي في المكتب بقيت زي المجنونة أضحك لامن أقع على قفاي بحكاية الجدادة الكاكية والمرة الصلاية ,, تصدق عندي صاحبتي يمنية ولدها معرس بت أختها وكانت جنها صلاة وصيام قام مشى عرس واحدة من الهشك بشك والمرة ما عرفت تعمل شنو وخالتها بتحبها شديد عشان هي مهذبة جدا المهم قالت ليها حأعمل خطة أطلعو من البيت كانو ساكنين معاها وأخليه يأجر ويعرف إن الله حق لأنه حيأجر بيتين للجديدة والقديمةوفعلا نجحت الخطة صاحبنا فلس قام طلق الجديدة عشان دي بت خالتو وعندها خمسة أولاد لما رجع ليها قامت خالتها قالت ليها شوفي يا أميرة أهو أنا رجعتو ليكي لكن لو عديتيها لي كلها صلاة وصيام وطار منك تاني ما تجي تكلميني هههههه .
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: عواطف ادريس اسماعيل)
|
العزيزة عواطف .....
لي صديق معاق، وهو مشلول الساقين .... يستعين بعصايتين (تلك التي يضعها المعاقون تحت إبطهم) ويمشوا بها. رغم ذلك، فهو خفيف خفة لا يملكها معظم الأسوياء الذين لا يعانون علة في صحتهم. المهم، هذا الصديق فكه جداً، ودائما يردد (الفريق نُص .... الحلة بصل .... المرا كرعين .... والمعوّق عصايات) ثم يمشي مسرعاً تارك السامعين بين مندهش ومقهقه.
ممكن أضيف حاجة؟ المنبر عواطف
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: أبوذر بابكر)
|
غاليتى عطفطف
خلاص كان صاحبتك راضية أوكى، ما بنلومها ،، " هى أصلها خالقة روحها؟؟؟"
أسى أنا ما عارفاكى "داقسة" و لا لأ ، إلا أشوف "نصك الحلو" حتى أحكم
و القصة فعلاً نسبية زى الجمال ، فما نحن نراهو جميلاً ، يراهو غيرنا "ربربة و لظلظة" أقصد الساقين الملانات يعنى، نظرة الشرق و نظرة الغرب شتان بينهما.
ما قلت ليك النسوان بقن شديدات و ما دايرات زول يدافع عنهن، و نحن ياخى فى النهاية شقائق الرجال، بسيقان من غير سيقان " ماكو فكة"، و لا ما كدة؟؟؟؟
Quote: وكل واحد فيهم مصر على السيقان الجميلة دي مصيبة شنو يا نوسة ؟؟؟ |
((مصائب قوم عند قوم شنو؟؟؟؟))
حبى لكى
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: نوسة)
|
ننووووووسة !!!
يابت ياحلوة ,,, أيه المداخلة الجميلة دي ,,, والله شكلي كدة ما دقست رغم إنه الخنفسانة عند أمها مرجانة وفعلا إنت أخت الرجال وفوائد قوم عند قوم مصائب ,,, من غير سيقان دي ذكرتني بيت الشعر حق الفيتوري : في حضرة من أهوى ,, عبثت بي الأشواق ,, حدقت بلا وجه,, ورقصت بلا ساق ,, مملوكك لكني ,, سلطان العشاق ,,
(عدل بواسطة عواطف ادريس اسماعيل on 03-17-2007, 05:37 PM)
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: عواطف ادريس اسماعيل)
|
سلامات تانى يا عطوفة
بال"كرعين" دى الليلة ذكرتينى أمى و أبوى رحمة الله عليهم، أمى مرة "متغايظة" من أبوى و هو كان راقد و لابس عراقى ، قال ليها حاجة "غاظتها" أظنها "رباطاب بعيد عنك" ، قالت ليهو بالله أمشى كدة "كرعينك الضعاف ديل" ،، ههههههههههههه، قال ليها " زمااااان وكت عرستينى ما كنتى شايفاهن""!!!!!!!!!!!!! شفتى الروح الرياضية دى كيف ؟؟؟؟؟
الخلاصة يعنى الراجل زى ما عندو نفيسة "تصغير نفس" كمان نحن بالأكثر ....
تحياتى لى "جعرانتك" هى قصدى "مرجانتك" يا عسولة .....
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: نوسة)
|
العزيزة نووووووووسة !!!
تحياتي يا عسل ,,, والله أبوك الله يرحمه ويوسد روحو الجنة كان عسل زيك أنا تاريني بقول البت اللهلوبة العسل دي طالعة لمنو؟؟ طيب ما تقولي كدة من زمان بس أمك الله يرحمها كان تقول ليه مراية الحب عمياهههه شكرا مرة أخرى لكن جعرانتي أريتها جعرانة السرور أحلى من براد بيت بكتير شنو رايك في هاالحكي؟؟
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: yasiko)
|
Quote: عبوددددددددددي !!! سلامات !!! بركة الجيت !!! والله ما بقصد حاجة !!! |
اللذيذة ماما عواطف..سلامات كنت فاكرك قاصدانى : عبدالله..وشين وتعيس كمان ؟؟ رجيتك زول شكل ساكت..لاكن عبوددددددى دى بردت قلبى!! وهسه خلاس بقيت صاحبك. أنا ضد ناس حزب البصل ده تماما.."والمرة حنيّة" !!!
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: Abd Alla Elhabib)
|
عبوووووووووودي !!!
سلامات ,,,
والله إنت حاشاك الشنا والتعاسة تبرى وتستبرى يا ودأمي ,,,
وبعدين فعلا المرة حنية وبس ,,
معزتي ,,,
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: امير عوض الجمري)
|
السلااااام وعليكم/كن
طبعا الكلام دا عندوعلاقه بي بنيه الوعي
والمقسمه لي اتنين
بنيه الوعي التناسلي
وبنيه الوعي الخلاق
نحن بننتمي لي واحده منهم
لكن الموضوع طويل والدنيا عندنا صباح
ح ارجع ليهو بالليل
المهم داير اقول حاجه تانيه
المثل دا انتو فاهمنو غلط
لانوالرجال المهذبين ما كان بلاقو النساء المهذبات
ولمن الواحد يقابل واحده كان بسلم بي ادب شديد ويدنقر راسو في الواطه
لانو عيب يجحم فيها ودي كانت العاده زمان طبعا قبل الفديو كلبات
اها ماكن الراجل عندو طريق يشوف حاجه وهي مدنقر من شده الادب ياحبه عيني
غير الكرعين وبالتالي ينبني حكمو بناء علي هذا الجزء من العالم
شفتو كيف انتو ظالمات الرجال يا نساء يا ظلمه
ملحوظه مافي اي زول يرد علي
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: عواطف ادريس اسماعيل)
|
يا عواطف...
ايام ما كان الواحد فينا ببحث عن عروس...لاحظي حكاية ببحث دي...فتيش عديل كدي
كل مرة يرجع ويقول لقيتها حبوبتو او امو او خالتو تطلع فيها شيْ...يا ولدي دي نضامة نضم...بتملاك فقر...ويخليها...(شفتي ضعف الشخصية دا كيف)
والله يا ولدي دي كرعيها مساويك...والله دي اهلها كعبين...والله ديل ناس جعيصين وما بتكفو...والله ديل مطاليق...وحاجات زي دي كتيييرة....
يعني ابواتنا ما كانو بتدخلو في الامور دي...
يبقي عليك بحبوبتي السرة ومن لف لفها...مع العلم هي زاتا كرعيها مساويك
بس بررتها ب: مساويك زمان هن زي مساويك هسع البلاستيك ديل...الواحدة من الهينة كع تنكسر
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: عواطف ادريس اسماعيل)
|
(( لكن بيني وبينك لو لقيت المرة الفاهمة والعاقلة ورزينة لكن رجلينا سكاكات حتختار شنو ؟؟ ))
عواطف ... مساء الخيرات ،،،
والله بيني وبينك كده ... الرأس الفاضي ممكن يتملي شوية شوية لامن تفهم .... لكن السكاكات ديل أقع بيهن وين ؟؟؟
وبمناسبة السكاكات ديل ... جدنا الله يرحمو كان طويل جدا ... وسكاكاتو طوااااال ، ونومو تقييييييييل ، يوم هو راقد نايم الجماعة ختو الغدا ورسلو واحد يمشي يصحيهو للغدا .... أها عشان يصحيهو بقي يضربو في رجلينو وجدنا ناااايم وكل ما يضربو في رجلينو يحرك رجلينو ومواصل نومو...
الجماعة المنتظرين في صينية الغدا زهجو وكوركو في الراجل ياخي ما قلنا ليك صحيهو انت بتعمل في شنو ؟؟
قال ليهم والله الجزء البي هنا ده صحى ... باقي الجزء البهناك !!!!!!
أكيد شكري
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: محارب)
|
محار اللذيذ !!!
محبتي ,,
والله عاد كان كدي يا ودأمي أمات سكاكات تعبن معاكم حكايتكم شنو ؟ يعني قدر ما نقول نلقى واحد يكون غير شكل تقوموا تتفقوا كلكم علينا؟؟ أها نحنا من الليلة السلطة جرجير والراجل يورووالوسطاء يمتنعون واحد ماعنده رصيد في البنك لا يقل عن 2000 ألف يورو ما عندنا بيه شغلة ونشوف يا نحنا يا إنتو!!! وجدك دة إنشاء الله يكون صحى واتغدا وحبوبتك كيف ؟؟ سكاكات برضه ؟؟
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: عواطف ادريس اسماعيل)
|
أستاذتنا عطوفه بت أدريس
نحنا ما بنمرق من عدة المطبخ دي للصالون أو حتي الحوش!!
وكل زول ما غطأ ماعونه الليغطي والماعندو ماعون يشوف مواعين الجيران
أو ماعونا بقول عليهو الزماله سوي الدراسية أو العملية وكمان في قدر
ظروفك ود حسب المقاس وبرضو الكرعين بتحفي وراها ما قلنا هن رحمة ولا ماكده
سوي بسكاكات أو حتي بدون هو الناس ديل عالم الرجال بيبقوا بدون شقايقن النساء
محال وقال الرسول الكريم (ص): تنكح المرأة لأربع: لمالها ولحسبها ولجمالها ولدينها.
فأظفر بذات الدين تربت يـداك.،، رواه البخاري.
والسكاكات دي بتخش ضمن الجمال وهنا الجمال معنوي وحسي وأن الرجال يفضلون المعنوي أكثر
وناس الحسي ديل نترك لهم السكاكات وبرضو في مال وفي نسب وديل من الأهم بأن تكون في
المرأة ومع كل هذة المعطيات تبقي المرأة مرآة الرجل التي ينظر بها ويطل علي الدنيا من
خلال المعاشرة والبنين والبنات والنتاج الحقيقي هم الأسرة وتربيتهم تدلل علي جمال
المرأة والرجل ومن منا لاينظر للمرآته بعين كلها جمال وبرضو نقول حب الناس مذاهب وحتي
المذاهب أربع والمرأة تنكح لأربعه ودي حكمه !
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: مجدي عبدالرحيم فضل)
|
مجوووووووووودي !!!
ياسلام عليك يارايع والله قطعت قول كل خطيب ربنا يسعدك ويديك العافية وما تنسى في ناس عايزين وش وبس !! عندي صاحبتي جميلة جدا لكن سكاكات من الدرجة الأولى لما أقول ليها لمي سكاكاتك ديل تقول لي الكلام الوش !! وفعلا أول ما تمرق أي مشوار بعدها يجو عشرة عرسان لامن افترت وبقت تعزل وتتخطب وتفرتق ودي الشغلة أنا خايفة القطر يفوتها وما تلقى اللي يعاين لوشها والسكاكات يبقن سي ان ان !
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: الطيب شيقوق)
|
أستاذتنا عطوفه تحية يارائعه
صحبتك دي لو أتقدم ليها سواق بيقول مرآيات الجنب
مابتجيب الحقيقة دائما وأهم شي مراية النص ومقصود
بيها الشي الفي الداخل الروح وجمال النفس ودي بيتبعه
نفس المرأة حتي في الطبيخ بيقولوا الطبيخ نفس والحله
ماها وش وبس ولو دايره قلب الراجل تدخلي ليهو من بطنوا
يعني بعد الوش وشهر العسل بتجي حاجات تانية ست البيت
ودي مهارات لا بد من المره تعرفه مع البدر والميكاب ولوازم
التحسينات وبرضو حب الناس مذاهب ومن المذاهب الونسه ودي دايره
شوية ثقافة مع الهندام والله شنو ونعود للمذاهب ونشوف !!
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: الطيب شيقوق)
|
إن تكن أنت بعيد عن يدي ,,,
فخيالي يدرك الناي القصيا,,,
إن تكن أنت بعيد في الثرى ,,,
فخيال الشعر يرتاد الثريا ,,,
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: عواطف ادريس اسماعيل)
|
ياتوفي (حلاوة)
المره روح المره احساس المره شعور المره ادب المره ذوق المره حياة المره حشمه
يعني البصل بطعم الحله لكن المره اصلا طاعمه بانوثتها وبرقتها وبامومتها (قال ثم من قال امك (3)
بعدين جينا نحنا , يعني نحنا جينا في الاخر لذلك ربنا سبحانه وتعالي كرم الام وجعلها في القمة
الكرعين ليس دلاله علي جمال المره (ممكن الكرعين تكون نحيفه والارداف تكون .......
توفي :-
شفتي الغزاله مش جميله ولحمها حلو بس كرعينا نحاف تساعدها علي الهروله حين مهجمتها
وايضا النعامه والوزين , يتمتعان بطول الرقاب ونحافه الارجل , النعامه قداله ذي المره لمن تمشي
والوزين رقاص ذي رقيص المره لمن ترقص رقبه وتعوم في الرقيص والرجال يتسابقو عشان ياخذو منها
شبال
برضو تقولو لي المره كرعين , ياود الجمري ياود امي ورفيق دربي دحين الشينات ديل مايعرسوهم ولا
شنو ليك .
البصله ممكن تحرق والكرعين ممكن تكون مشققه ووسخانه بس جمال الروح هو الاصل
فتكم بعافيه
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: بدرالدين يعقوب)
|
سلامات و مشتاقين يا عطفطف
و تسلمى يا لذيذة
دة شنو الكاتباهو دة؟؟ Quote: لا يقل عن 2000 ألف يورو |
حاولت أقراهو بس عينى زغللت !!الفين ألف و لا 200 ألف و لا قصدك 2 مليون يا زهرة؟؟؟
ما كانن سكاكات ديل و لا قصدى طفايات القاعة البيدفعوا فيهن قدر دة !!
بركة الما عندك بنات كنتى يختى فلستى بالوليدات
أها وصلتوا وين ؟؟ شايفة أغلب الشباب مصرين على "السكاكاتية يمتنعن" .. و لا شنو يا شباب، خلونا نقول الحلة بصل و المرة "فهم" موش أحسن ؟؟
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: بدرالدين يعقوب)
|
ود يعقوب يا لكلك مفهومية وذوق !!!
معزتي ,,,
شكرا على مرورك الجميل ,, وقوفك الرائع مع المرأة يؤكد إنك أخو أخوات ,,, ولا تغرك المظاهر فالجمال جمال الروح وليس جمال الجسد ,, جمال الخلق والأدب ,, كن معنا ,, رأيك يهمنا .
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: عواطف ادريس اسماعيل)
|
والله يا عواطف (كده حاف من دون ألقاب عشان نبقى أصدقاء) منذ الغيبة الطوعية للعزيز بدر الدين شنا لم استمتع ببوست ساخر ولذيذ مثل هذا البوست.
تعرفوا أنا حا أرجع من الأول بس ما تقولوا " قام تاني جاب سيرة البحر"!!!
يعني هسه صاحبتك دي حسب وصفك ليها (عقلها يوزن بلد ,, متعلمة , مثقفة ,, واعية ,, مرحة وروحها رياضية زي زيدان وللا ماتيرازي ما عارف!!!) بي ده كلو غلبها تختار ليها واحد ينسجم مع الصفات دي كلها وما عرفت تختار إلا الزول البيحرجها في شهر العسل وقدام صاحبته كمان!! - بالطريقة دي نحن برضو بنكون معذورين لو وقعنا لينا في واحدة من نوعية صاحبنا ده ويجوز لينا على الإقل أن نقول "البركة في الكرعين دي"
أنا شايف أثنين من أعز أصدقائي اختلفوا في البوست ده (أمير الجمري وبدر الدين يعقوب) ولكن تجديني يا عواطف أقف في صف أمير الجمري (ود جيرانا) وبقول "الثقافة برضو مهمة" وللا إنت ما قلت كده يا أمير!!هههههههههها
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: صديق حمدتو)
|
الصديق العزيز صديق !!!
معزتي ,,,
وأهلا بك صديقا عزيزا وأخا كريما وتسبقنا الأشواق قبل العين ,,,
أشكرك على مرورك الجميل وعلى ثنائك على البوست ولكن بخصوص صاحبتي زي ما بقولو مراية الحب عمياء
ومن الحب ما قتل وبعدين حكاية البركة في الكرعين دي ضحكتني شديد الله يجازي محنك وربنا ما يوقعك
في أم سكاكات !!
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: عواطف ادريس اسماعيل)
|
عطوفه صباااااااااحاتك ورورد نديااااااااانه روح ذي روحك الرياضية الحلوه
وجدت مداخلات أحسبها غاية في الروعه من أبناء منطقي الأمتدادية السمحه سماحة
قامات مثل أمير الجمري ،، وصديق حمتو،،وبدرالدين يعقوب،،،وهم بانسبه لنا مدارس
تعلمنا منهم الكثير والمفيد وكل منهم له مذهبه في المرأة ومن مجمل أراءهم نعمل
حله بصله من كل روضة عينه ومن كل عينة زهرة ونجده زوجاتنا آدام الله عليهم نعمة الصحة
والعافية وهن يعطرون لنا الحياة ويذهبن عنا عنأء الغربة ويشاركننه كل ملماتنا الجميلة
منها والحزينه لهم الحب والود وعظيم التقدير ولكي عطوفه وأنت تجودين بهذة المواضيع
الجميله جمال الكلم والنغم وخيارات المواضيع السلسه والهادفه مودتـــــــــــــــى
أبوقـــ مجدى عبدالرحيم ـــــــــى،،،
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: عواطف ادريس اسماعيل)
|
Quote: Re: الحلة بصل ... والمرة كرعين !!!!! أمثال عجيبة !!!! |
غايتو أنا ما معاكم في حكاية (الحلة بصل) دي
لكن يا عواطف يا اختي (المرة كرعيييييين)
Quote: كانت تلك هي المرة الأولى التي أسمع فيها مثل الحلة بصل ولكن صدقوني فقد سمعته بعد ذلك عشرات المرات لأكتشف أن الرجل الشرقي على وجه العموم والسوداني على وجه الخصوص يهمه المظهر وليس الجوهر ولغاية اليوم دة ما سمعت واحد قال عايز واحدة مثقفة أو راسها مليان. |
يعني يا عواطف ماااا تخومينا قي الكلام ...(الراس المليان و الثقافة) ديل مكتوبات على الجبين عشان
يكونوا أساس اختيار؟؟؟
نحنا أول حاجة نشوف الظاهر لينا و بعداك الله كريم
كمال
تخريمة: وييييين الغيبة الطويلة دي؟؟؟؟؟
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: نوسة)
|
العزيزة نوسة
Quote: أسى أمانة فى زمتك فى زمنا العلينا دة بقت فى بت بتمرق "كرعينها"؟؟
|
والله صدقتى...لكن في الحريف البتحين الفرص ...و كمان في دلايل على...
يااااا نوسة ما تخلينا نقع في الغلط و يوقعوا علينا الحد البوردابي
الشغله كلها تساهيل ولا كيف؟؟؟؟؟
Quote: بس الأولاد بيتخيلوا سااااكت من "برطة" الوش إنو ما "خفى أعظم" و لا غلطانة؟؟؟ |
و برضو دي ليك حق فيها ....و هو جنس خيال ... ولا أفلام ستيفن اسبلبيرغ
دمتى
كمال
تخريمة تانية: يا عواطف "المؤتمر البيئة" دا ما خلص؟؟؟؟؟؟؟؟
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: Kamal Abdu)
|
كيمو العزيز !!!
مودتي ,,,
شكرا على عبورك اللطيف ,, وبعدين يا بعد عمري الراس المليان بتعرفوا من أول جلسة لكن أنا خايفاك تنخدع وتضيع في الرجلين وما تعرف تعمل شنو لمن تلقى الراس فاضي ,, طبعا أنا عارفاك عندك صوت وصورة عشان كدا داخل بطولك وعرضك ,, عموما أشكرك على سؤالك عني فقد كنت في عدة مؤتمرات وهذا هو السبب .
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: عواطف ادريس اسماعيل)
|
عطوفي نهارك سعيد
عزيزي مجودي كما تسميك اختنا عواطف وبحق وحقيقة انت فعلا مجدنا وفخرنا وعز امتدادنا الحبيب
لك تقديري واحترامي وانت تدافع عن امهاتنا واخواتنا .
توفي :-
اصدقائي وتوم روحي وابناء منطقتي الاساتذة الاجلاء امير الجمري وصديق حمدتو ... هما اعلم وعلي
يقين انني احب الجمال واعشق كل شي جميل ..
الجمال كلي ليس كرعين فحسب , وهنالك امثال كثيرة , امير وصديق هما شاهد عيان علي ذلك .. دعوني
اخواني ان اذكر لكم نموذج واحد انو الجمال ماجمال كرعين ( واحده صاحبتنا وانتم تعرفونها
اخواني , فيها اجمل وجه رايته في حياتي وطويلة ولونها ابيض وروحها حلوه ودمها خفيف بس
سكاكاتها تعبانه يعني دي في نظر أمير وصديق بتكون ماحلوه (انشاء الله تكونو ياحلوين عرفتوها
........................... (جيمي )
اه دحين حاتقولو شنو _ اخير تسكتو ساكت لانو ماحايكون عندهم راي تاني وخلوا استاذتنا عواطف
تتكلم عن جمال المره المخفي .
وتاني ياصديق اخير ليك ماتجيب سيرة البحر لانو الجمال الاصلي جمال الروح وانا ايضا اقول
الثقافة مهمه بس ماثقافة الكرعين والحله ام بصل
فتكم بعافية
| |
|
|
|
|
|
|
Re: الحلة بصل ... والمرة كرعين !!!!! أمثال عجيبة !!!! (Re: عواطف ادريس اسماعيل)
|
بدءً لكِ التحية .. وبالفعل هذه الحقيقة المرَّة التي تُقرُّها دواخلُنا .. كثيراً .. فتقييمنا دائماً أو تقييم بعضٍ منَّا يكونُُ بالشكل لا الدواخل .. ولكن أذكرُ أنََّّ جدتي كانت تقول لي بلسانها : يا ولدي عرِّس ليك مَرَة إنْ عِِـلْتَ تقيلك وكان هكعتََ تشيلك ..
ومع أني لم أفهم المعنى بالضبط للمثل لكن أعتقد أنَّها تقصد .. عرِّس المرة التي تنسترُ معك في مُقبلِ الأيام .. فإن جارَ بكَ الزمن وكبرتْ سنَّك ورجعتَ لمرحلة الطفولة (خرَّفتَ ) فهي لا تزال تسترك وتأخذ بيدَّك ..
وأُلاحظ أنَّ الزيجة التي تكونُ على النسقِ الأوَّل ( المرأة .. الشكل دون الفهم والراي ) لا تستمرُ كثيراً .. وإنِ استمرَّتْ فتكونُ مشوبةً بمخاطر اللا إستقرار ..
أخت / عواطف لك التحيةّ مجدداً ولك كلَّ عبق ..
أخوك / محمَّدزين ...
| |
|
|
|
|
|
|
|