|
|
|
 Re: لا للعـزوبية نـعم للـزواج ....أم ... لا للـزواج نـعم للعـزوبية (Re: salma subhi)
|
من طرائف ابن عمي بعد ما اتزوج
طبعا زمان المروق والدخول من غير اي سؤال من اي زول
بعد العرس طبعا المرة بقت تسألو ماشي وين او جاي من وين
سالناهو اها الزواج كيف
فكان ردو :
العزوبية خطأ وعولج بخطأ اكبر منو
لكن برضو انا رأي نـعم للـزواج
نعم الف مرة للزواج
وخاصة خاصة للضاق ليهم المكان وهسه سافر واغترب
صراحة العزوبية في الغربة صعبة جد
والعرس اكيد ما كلو سعادة وهيام ومشاعر
وده الحاجة الطبيعية
انو الحياة فيها الفرح والطرح
وفيها الاتفاق والاحتلاف
ناصر موسى
| |
 
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: salma subhi)
|
أختنا سلمى ...
أخطر حاجة .... من دخولك باب البيت ... لغاية طلوعك تاني يوم بره البيت (ده في حالة المخلوق البيتي ) ..
إنك مربوط بشخص تاني معاك .... أي حاجة عايز تعملها .. أو تشوفها .. أو تقراها ... لازم يكون الزول المعاك في البيت عنده
إعتبار فيها ؟؟؟؟؟
طيب .... مالنا ومال القراية أم دق ... الحرية لنا ولسوانا .... وبرضه الحرية لنا ولنسوانا ...
| |
|
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: salma subhi)
|
سلمى ...
أخطر مافي الموضوع ده ... النقة ....
كل جماعة من جهة ... ناس البيت ... ناس الشغل ... زملاء الدراسة ... الشمشرجية ..الخ
كل واحد فيهم ...أها لسه ؟.. ياخي مستني شنو ؟ .. فلان داك عرس ...و....و....
يعنى ممكن تجي لحظة الواحد يعمل الكارثة دي .. بس عشان يوقف النقة الكتيييرة ..
وبرضه مابتقيف .... تستمر ... أها مابقيتو ثلاثة ,,,أربعة ,,الخ
عشان كده الحل من البداية مافي داعي للورطة
| |
|
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: salma subhi)
|
سلام تاني يا سلمى
صديقنا ( ... ) رجل أتاه الله مع حلاوة المعشر وغزارة العلم أسلوب أخاذ في عرض أفكاره بصورة تجبر الحضور على الإنصات إليه . كنا ذات يوم جلوس في جلسة أسرية أصدقاء أزواج وزوجات . تفرع الحديث لأحد أصدقائنا الذي تزوج حديثاً و ( للمرة الثانية ) . إستلم صديقنا ( ... ) الموضوع بجديته المعهودة وبأسلوبه الأخاذ
" يا أخي أنا استغرب أنو زول في كامل قواهو العقلية ، يكون متزوج يقوم يفكر مجرد تفكير أنو يتزوج للمرة التانية .........
في هذه الأثناء كانت زوجته منتشية وتنتقل بنظراتها لصديقاتها في الجلسة فهي ( secured)
لكن صاحبنا لم يشأ لنشوتها تلك أن تستمر فأضاف ( طبزته التاريخية )
" يا أخي في زول عاقل يدخل الفيلم الهندي دا ويقوم يعيدوا تاني من الأول ؟؟؟"
| |
|
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: هاشم أحمد خلف الله)
|
سلمي سلامات
والله في نكتتين في موضوع العرس في واحدة حقيقة يعني انا كنت شاهد عيان واضان ليها والتانية سمعتها من ناس قالوا وقلنا والله يكفينا شر القواله
الاولي : نحن 9 ابناء في اسرتنا ( المهم جينا قبل تظيم الاسره) ... ما علينا .... في صديق اخي اتخرج من الجامعة واتزوج ابنة عمه من البلد التي تبلغ من العمر 16 سنة ... ونحن كاولاد مثقفين بدينا ننتقد في هذا السلوك ... شئ تخلف وشئ زواج اطفال المهم واشياء اخري ... حاول ابي ان يقف مع فكره صديق اخي ( زواج البنت الصغيرة وابنة العم وما في مشكلة يعني الانسان ممكن يعرف زوجته بعد العرس) وهنا حاول ان يكسب امي الي صفه وخاصة انها في كل الحوار كانت صامته بغير العاده قائلاً : والله انا امكم دي شفتها يوم الرقيص
أمي برد جاهز ... والله انا لو شفتك قبل داك ما كان عرستك
التانية من ناس قالوا : في واحد اتزوج وبعد شهرين امه سألته اها يا ولدي ما بقيتو تلاتة
الابن : بقينا حداشر
الام في بله متسائلة كيف يعني
الابن : والله اول ما اتزوجت المره دي بقيت اشوفها عشرة عشرة
اللهم لا نسألك رد الزواج ولكنا نسألك اللطف فيه
| |
|
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: Amjed)
|
أخ أمجد
مداخلة ظريفة شديييييد 
يعني طلعنا بي 3 حكم ...الأولى:
Quote: والله انا امكم دي شفتها يوم الرقيص
أمي برد جاهز ... والله انا لو شفتك قبل داك ما كان عرستك
|
والتانية:Quote: قالوا : في واحد اتزوج وبعد شهرين امه سألته اها يا ولدي ما بقيتو تلاتة
الابن : بقينا حداشر
الام في بله متسائلة كيف يعني
الابن : والله اول ما اتزوجت المره دي بقيت اشوفها عشرة عشرة
|
والتالتة:| Quote: اللهم لا نسألك رد الزواج ولكنا نسألك اللطف فيه |
كل النقدير
| |
|
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: samual hassan)
|
مرحي بيك samual hassan ]
ديل شفّع آخر الزمن وفاهمين بقوا أحسن من الكبار...
| Quote: المهم هو مابعد الزواج وليس الزواج فى حد زاتة |
أيوه ده السؤال المهم !!!!
تكون قريت اجابات المتداخلين وحسب كلامهم بعد التأني والخبرة والأكثرها أشارت الى....لااااا للزواج ....المشكلة ما ورونا ليه؟.. بس ( لا ) قالوها بكل قوة .
خلونا نتسأءل بليييييه كتيرة خلاص !!!!
كل التقدير
| |
|
|
|
|
|
|
|
|
 Re: لا للعـزوبية نـعم للـزواج ....أم ... لا للـزواج نـعم للعـزوبية (Re: أبوبكر طه)
|
سلوم !!!
موضوع حلو جدا ,,,
بس عايزة أسأل ,, هل توجد منطقة وسطى بين الجنة والنار ؟؟
أها إذا لقيتيها كلميني وليك عليك حأختار طوالي الحب أو اللاحب فجبن أن لا أختار ,,,
تسلمي يا ست الحبايب لسة بدور ليك على التلفون ,,,,
| |
|
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: عواطف ادريس اسماعيل)
|
عطوفة ..صباحك ورد وانت عسل
تسلمي على الكلام الحلو والبجي من النايس الحلوين
Quote: بس عايزة أسأل ,, هل توجد منطقة وسطى بين الجنة والنار ؟؟
أها إذا لقيتيها كلميني وليك عليك حأختار طوالي الحب أو اللاحب فجبن أن لا أختار ,,, |
والله ما لقيتها يا عواطف لي هسي ومن اجابات المتداخلين كله ناااار جنه بتعدا بالاصابع ...لكن انت و هيثم وأحمد الشايقى اديتونا خيار الحب.... يعني بس نحب ونموت مغسة يا عطوفة!
كل الود
| |
|
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: Moawia Mohammed)
|
أخ معاوية
Quote: أنا بقول نعم للزواج
لكن عندي مشكلتين
الأولي : لميت أي حاجه بس فضل لي حق التلج
التانية : ما لاقي لي خميس فاضي أعرس فيهو
|
يا سلام بس كده وتعرس !!! ده أسهل مشاكل مرت علي....محلولين يا أستاذ معاوية
التلج ما مشكلة قول ليهم الكهرباء قطعت ؟
بالنسبة للخميس خليه ...غيرّ لأي يوم تاني انشاءالله الاتنين ما ممكن؟
المهم ما تطلع عندك ديون ونهديك كاركاتير بمناسبة ديون الزواج بس دقيقة وبا نزله ليك
كل التقدير
| |
|
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: salma subhi)
|
حوار زوجي تسلسلي عن التلزيون
جلسة زوجية على التلفزيون في الفترة من 6 أسابيع من الزواج الى 6 سنوات :
بعد 6 أسابيع : المرة بتابع في مسلسل بعنوان (زوجي الحبيب )[/U] جاها قال ليها: عفواً حبيبتي عاوز اشوف المباراة الليلة ممكن ...طوالي حبيبي وبدون نقاش الريموت تحول للمباراة؟
بعد 6 أشهر : المرة بتشوف مسلسل [U]( وتستمر الحياة )[/U] الراجل: في مباراة الليلة ...المرة: لكن أنا ممتابعة مسلسل ...الراجل : وأنا أعمل ليك شنو انت عارفة أنا بحب المباريات وعاااارفة كده أعتقد..
المرة زعلت قامت خلت المكان.
بعد 6 سنوات : نفس الموقف بس المسلسل ( قسمة ونصيب )[/U] ..الراجل : وبدون أي نقاش : شوفي يا انت يا التلفزيون والمباراة الليلة كمان النهائي ...المرة: أنا ....الراجل : خلاص يبقى المباراة وشوفي ليك محل تاني.......المرة : هئ هئ هئ ( تبكي وشالت الاولاد وعلى بيت أبوها )
حل بس من عندي: ما ممكن كان الراجل يشتري تلفزيون تاني ويحل المشكلة انشاء الله مستعمل !
الا كان عنكم انتوا حل أحسن !!!
.....
| |
|
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: salma subhi)
|
سلمى صبحي احكي ليك شوية من نوادر الاعراس
اصلو اخوك بيحب المناظر غير المرئية
بعد الحفلة انتهت
كنت ماخد لي ركن قصي في بيت العرس
اتلموا تلاتة بنات
من اهل العريس
يبدو انهم اخواته او اقارب من الدرجة الاولى الممتازة
واحدة بدت الموضوع
تتخيلي يا فلانه ناس العروس لا عشونا لاعشو ضيفنا
ترد عليها
فضيحة السجدم والله هسة انا جعانة ما شايفة
ترد اخرى
والله حقو شعيريتنا الجبناها ليهم في الشيلة يدونا ليها نحمرها هسة دي
في اللحظة دي بصراحة فكيت الضحكة وانقطع سيل القطيعة
| |
|
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: د.محمد حسن)
|
د. محمد
طيب ده موقف حصل برضه في عرس ..أول ملاحظة يلاحظها المعزوم في العرس ده بالذات انه العروس شيييينة شديد وشناه مرة بعكس العريس ( قسم ) ، المهم واحدة من المعزومات قاعدة قدام تتكلم مع صاحبتها سناء وتلوي وتعوج في خشمها ..( بيس هسي دي عروس ، العريس ده ما بشوف...والله بس المرفعين ولا اقول ليك يا سناء بس تشبه القعونجة ) قبلت تعاين في الطربيزة الجنبها لقيت واحدة تشبه العروس في خلقة الله شبه ما طبيعي ...مبالغة في الشبه، اتخلعت وقالت الليلة ما تكون من أهل العروس سألتها:انت بتقربي للعروس ...ردت عليها التانيه : آي ما أنا اخت القعونجة.
مودتي والله يبعدكم من شناة الشكل والطبع
| |
|
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: salma subhi)
|
الاستاذة سلمى
(استاذة دى للضمان عشان قبل كدة كتبت اسم استاذة
فى البورد حاف كدة اخدت فيها درس ماعايزه يتكرر تانى)
تشكرى على البوست لكن برضو صعب الواحد يقول فيه رائه بصراحة
برضو للضمان لكن هاك المشاركة دى
Quote: باد ناوهايم (ألمانيا) - قال الأخصائي النفسي الألماني البروفيسور يوخين يوردان، إن الأشخاص الذين يعيشون حياة زوجية سعيدة أقل تعرضا لمخاطر الإصابة بالذبحة الصدرية من أقرانهم العزاب أو الذين يعيشون حياة زوجية تعيسة
وأضاف يوردان، مدير مستشفى الأمراض النفسية للقلب بمدينة ناوهايم بولاية هسن الألمانية، أن معاناة القلب نتيجة التعرض للآلام النفسية الناتجة عن العلاقات الزوجية الفاشلة يمكن أن يؤدي إلى آلام حقيقية
و أشار يوردان إلى أن عدم نجاح العلاقة الزوجية لفترة طويلة يؤدي إلى الإجهاد العصبي والاستياء والحزن "و تؤثر هذه العوامل بدورها سلبا على أداء القلب مما يزيد من خطر الإصابة بالذبحة الصدرية
|
يعنى كدة كدة القلب مجهجه
| Quote: كل واحد فيهم ...أها لسه ؟.. ياخي مستني شنو ؟ .. فلان داك عرس ...و....و.... |
حاتم يوسف استحى على وجهك واطلع من الموضوع دة
قال مستنى شنو قال !!! زول دخل الجامعة من ايام جون قرنق ملازم ولسه بتقول مستنى شنو
| |
|
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: احمد التجانى احمد)
|
الأخت / سلمى صباحي
سلامات .. وتحيات ..
قالوا في واحد متزوج جديد وماسكاهو أم فريحانة .. كل يوم يجي يقعد مع جماعة متزوجين قدام .. ويلعب معاهم ضمنة .. ويشبكم ليك .. والله أنا متزوج لي مرة حلوة حلة .. لمن داير آكله .. الجماعة مابردو عليهو يعاينو ليهو ساكت .. كل يوم بالطريقة دي .. بعد شهر صاحبنا بقى ساكت ذي الجماعة .. قام واحد سألوا قال ليهـــو إنته ويييين مرتك السمحة ديك الداير تاكلــه ... رده عليهوا قال ليهو ياريتني لو أكلتها من زمان وإرتحته منهــــــا
تعرفي الإجابة على سؤالك ده يعتمد على مكان الإقامة .
فإذا كان الزوج والزوجة موجودين في السودان ... يبقى نعـم للزواج ..
لأنوا كل واحد عندو برنامجو .. المرة من الصباح هاك ياحوامه .. دي ولدت ودي عندهم عرس ودي عندهم بكي .. يعني الواحد بعد تعب يلم في زوجته عشان يتكلم معاها كلمة كلمتين .. خصوصاً إن الناس في السودان بتنوم بدري ( يبقى في الحالة دي الزواج ممتاز ).
أما لو كنته في الغربة خصوصـــــاً السعودية .. وفي السعودية خصوصاً الرياض ( ذي حالتنا دي ) يبقى ووووووووووووب علييييييييييييييييك من النقققققققققه ...
النسوان هنا عندهم فراغ .. الواحدة ساكنة في شقة 2 × 2 .. دقيقتين تنضف الشقة + دقيقتين تسخن الأكل بعد كده تحضر التلفزيون .. بس دخلتك البيت ..
1- الغاز قطع .. 2- مالك إتأخرته 3- أنا زهجانة 4- ضربت لي فلانة وقالت وقالت وقلت ( والله أنا دي أكتر حاجة بتغيظني تلفونات النسوان بتاعين الشمارات ) .
تجي طالع عشان تتونس مع أصحابك :
ماشي وين ؟ لي منوا ؟ ماتتأخر ؟ كل يوم مرقة ؟ نحنا دايرنك تقعد معانا ؟ أيه الهيافة دي ؟ أنته بقى عندك أولاد .. كل يوم حفلات ؟ نق نق نق نق نق نق نق نق نق نق نق نق نق .
تعرفوا أحسن حاجة شنو ... عرسوا وخلوهم في السودان .. وأبعدوا عن حفلات الرياض ..
وأمشوا إجازة كل 11 شهـــــر .. فبذلك تكونوا من المبســــــــــوطين ..
خالد الأرباب
متزوج مع سبق الإصرار والترصد
| |
|
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: Khalid Saeed)
|
أستاذ خالد
مداخلتك ظريفة شديد شديد والحكم الفيها يتعمل ليها كتاب
قصة الراجل الداير يآكل مرته قريتها 3 مرات من شدة ما عجبتني واجابتك مقنعة نعيدها تاني للمتداخلين نشراً للوعي الزواجي ....Quote:
تعرفي الإجابة على سؤالك ده يعتمد على مكان الإقامة .
فإذا كان الزوج والزوجة موجودين في السودان ... يبقى نعـم للزواج ..
لأنوا كل واحد عندو برنامجو .. المرة من الصباح هاك ياحوامه .. دي ولدت ودي عندهم عرس ودي عندهم بكي .. يعني الواحد بعد تعب يلم في زوجته عشان يتكلم معاها كلمة كلمتين .. خصوصاً إن الناس في السودان بتنوم بدري ( يبقى في الحالة دي الزواج ممتاز ).
أما لو كنته في الغربة خصوصـــــاً السعودية .. وفي السعودية خصوصاً الرياض ( ذي حالتنا دي ) يبقى ووووووووووووب علييييييييييييييييك من النقققققققققه ...
النسوان هنا عندهم فراغ .. الواحدة ساكنة في شقة 2 × 2 .. دقيقتين تنضف الشقة + دقيقتين تسخن الأكل بعد كده تحضر التلفزيون .. بس دخلتك البيت ..
|
Quote: تعرفوا أحسن حاجة شنو ... عرسوا وخلوهم في السودان .. وأبعدوا عن حفلات الرياض ..
وأمشوا إجازة كل 11 شهـــــر .. فبذلك تكونوا من المبســــــــــوطين ..
|
أطيب الأماني بحياة زوجية سعيدة أستاذ خالد.
سلمى صبحي
....
| |
|
|
|
|
|
|
|
|
|
Re: لا للعـزوبية نـعم للـزواج ....أم ... لا للـزواج نـعم للعـزوبية (Re: salma subhi)
|
جاء بعد الدوام التاني للمنزل مبسوط ويصفر وشايل العشا
سالته زوجته منتعش كدة مالك
قال ليها الليلة الحفلة الختامية لاختيار ملكة جمال العالم في قناة البسي
دخل الغرفة ليبدل ملابس الشغل بي ملابس البيت
اغلقت عليه الزوجة الباب من الخارج بالمفتاح
وللصباح
كيدهن ام غيرتهن ؟
على كل انا عجبتني اللعبة
عشان كدة فكيت كل الكوالين الفي البيت
| |
|
|
|
|
|
|
| |
salma subhi
Hatim Yousif
Emad Abdulla
مجدي عبدالرحيم فضل
د.محمد حسن
تيسير عووضة
mohmed khalail
عاطف عمر
معتصم دفع الله
عبد الله عقيد
انعام عبد الحفيظ
samual hassan
هاشم أحمد خلف الله
Amjed
أبوبكر طه
عواطف ادريس اسماعيل
Moawia Mohammed
احمد التجانى احمد
Khalid Saeed
ABU QUSAI
فيصل نوبي
Ashraf El Bagir
Raja
فيس بوك
تويتر
انستقرام
يوتيوب
بنتيريست