|
|
 ***** عواطــــف وعواصــــف سنــة أولـــى زوااااااااااج *****
|
 
__ من القلب نرفع أسمى آيات التهاني بمناسبة المقبلين على الزواج لهذا العام وأتأكدوا من مواعيد العرس متين بالضبط......ربنا يتم ليهم على خير
___ وإلى الذين ما زالوا في طريق الحياة.. ولم يرسى تفكيرهم بعد في سفينة الحياة الزوجية لظروف
ما....الشيلة لسة ما تمت....ما متأكد من مشاعره لسه من ناحيته أو من ناحية البت.....القروش
قطعت....بيفكر في بتين يختار منو فيهم؟
__ والى الذين يعيشون في ظل الحياة الزوجية وأتمموا عامهم الأول........وهنا جينا للكلاااااااام
يلا خليكم معاي
تفضل الأخ طارق نقد من قبل بطرح موضوع الحب بعد الزواج ووجدت نفسي أنتقل لمرحلة أخرى من أهم وأخطر المراحل في الحياة الزوجية آلا وهي.......
سنة أولى زواج 
فيها العواطف وفيها العواصف...وكشف النقاب عن حقيقة شخصية كل اتنين متزوجين..(( وان كان لسه الواحد بيكتشف في كل سنة حاجات أكتر عن التاني)).
في تلك السنة قد تنجح أوتفشل زيجات عديدة أو حتى يكتب لها البقاء لكن بجروح وعيش من أجل البقاء فقط........نعم فقط.
قبل الزفاف يهتم العروسان بكل تفاصيل الزفاف ورحلة شهر العسل،التي تبدأ بعدها محاولات الاكتشاف الحقيقية ومعارك فرض النفوذ والسيطرة أو حتى الرضا والقناعة والحب.
ياريت أكترنا يشارك في الموضوع ده لأنه بيساعد المقبلين على الزواج على تفهم بعض الأمور ....والعرسوا واتورطوا خلاص نعمل ليهم شنو؟؟؟؟ بس يشاركونا بي نصايحهم المفيدة لتخطي عقبات أول سنة زواج.
منتظرين
|
|
 
|
|
|
|
|
|
|
 Re: ***** عواطــــف وعواصــــف سنــة أولـــى زوااااااااااج ***** (Re: salma subhi)
|
هناك بعض المفاهيم التي تدخل بها العروس على العريس وقد تؤثر سلباً بالذات في السنة الأولى اوالبعدها
مرة في بنات ما متتزوجات قلنا ليهم تتمنوا شنو في زوج المستقبل؟؟؟
كانت الاجابة سريعة وبدون تردد... يا رب أتزوج راجل مقطوع من شجرة...والتانية يارب أنا وهو نكون في بلد وأهله في بلد...!!!!
وبيني وبينكم أتساءلت للدرجة وصل الرعب عند البنات عن اهل الراجل حتى قبل أن تعرف منهم وماهي طباعهم؟!
فهناك إعتقاد فيروسي تفشى بصورة رهيبة بين البنات وقد تكون غرسته المسلسلات و قصص الأقارب والصديقات.....الخ. فنجد الواحدة عندما تتزوج تأتي بمفهوم زوجها ليها براها وبس...
وقد تبدأ العواصف بموضوع بسييييييييييط جداً ما بيستاهل لأن العروس راسها مليان بحاجات ما في داعي ليها.
مواصلين
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: salma subhi)
|
تبدأ سنة أولى زواج بعش صغير واحساس جميل وملك وملكة وخياااااااااااال خصب لا ليه أول ولا آخر.... اخيرا انتهت الترتيبات والمشاوير والسهر والمشاكل ذي نعزم منو؟؟؟
ودي مادايراها تجي عرسي !!!
وأهل العروس طلباتهم كتيرة!!( ديل ناس العريس ).....وووووووو الخ
وأخيراً فلانة وفلان زوجاااان
ويبدأ مسلسل العواطف
وتبدأ حياتهم بالكلمات الجميلة....ويسترجعوا الذكريات ... متذكر ؟ متذكر ايام الخطوبه لما كنت تعمل المستحيل عشان تشوفني ...
وكمان لو غاب دقيقة تتصل بيه وتقول ليه حبيت اسمع صوتك بس ياعمري
والابتسامات التي تتوزع من هنا وهناك...ولو طلبت أي شي...مثلاً :يعنى لو بتقدر توديني شويه لبيت اهلي....زولك يدورالعربية من الكلمة بس.
ويوديها لاهلها ولو هم ساكنين ويييييييين كانوا!!
بداية وردية جميلة حالمة يعيشها الكثير
ونواصل
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: DKEEN)
|
والله يا دكين شفت صورة البروفيل للأستاذ رأفت ميلاد....جيت أكتب تحياتي أستاذ رأفت ميلاد
ما أشوف الأ حروف انجليزية بالكابيتال ليتر تخلع الزول...DKEEN
آي والله نعمل ليهم شنو؟؟؟؟....بس دايرين منهم النصيحة لي المقبلين على الزواج لتفادي ولو القليل من المخاطر.
انت مش عريس جديد يا دكين؟؟؟
خلاص خليك متابع معانا ولا عندك نصيحة؟؟؟؟ 
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: اساسي)
|
الأخت الحبيبة
سلمى
تعرفي, أول سنة هي أصعب سنة
ما بين إكتشافات جديدة
و ما بين معيشات يومية
يتعلم الزوجين الكثير عن بعضهم البعض
في حاجات ممكن تكوني بتعرفيها
عن زوجك أو زوجتك المقبلة
لكن او ما عشتيها ما بتعرفيها
صديقة, عارفة إنو خطيبها (نومو) خفيف
و بصحى بسرعة,,
بعد الزواج بدت تشتكي
"يا زولة,إنت مش عارفة, و مش من الأول
قلتا ليك"
قالت ليهو "ما كنت قايله للدرجة دي"
حقيقة, كل ما يهم هو تمسك الزوجان ببعضهم البعض
مادام الإختلاف حول أمور غير جوهرية
و لا يتضمن معصية لله أو عقوق للوالدين
حاشية,
أحمد الله أن جعل لي زوجا,
كل ما عرفته و عاشرته أكثر,
كلما شكرت ربي على أن جعله يختارني
كل الود يا سلمى
و يا رب تفرح كل قلب
غادة
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: DKEEN)
|
نصائـــــــــــــــح دكين
Quote: لو حسيت بانك قاعد تشتاق لي زوجتك شديد وهي غايبة
فتذكر انو غيرك مامتزوج من اصلو..
لو حسيت بانو زوجتك فرحانة بيك شديد ذكرها بانو غيرها ما متزوج..
ولو حسيت بانك شبعان فتذكر انو جارك جعان
ولو حسيت بانك جعان فذكر جارك الشبعان ..
|
هو كلام بيتوه شوية لكن قصده يقول ليكم راعوا شعور الآخرين
تحياتنا أخ دكين
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: salma subhi)
|
| Quote: ياريت أكترنا يشارك في الموضوع ده لأنه بيساعد المقبلين على الزواج على تفهم بعض الأمور |
تصدقى يا سلمى داير اشارك بما ان خبرتى 25 سنة تقريبا...ولكن
لان الزواج تجربة شخصيا جدا لا اظنك تفيدى من من تجربتى
لانى مهما حكيت ليك عنى وعن انعام زوجتى لا استطيع ان اقول شىء
لانك ماممكن تكونى انعام ولا زوجك حا يكون صديق الموج..
لكن بقول ليكم اتوكلو على الله ....واعملو طريقة حمام الشتاء
للزول البخاف من الموية البارده...توش تلقوا روحكم جو الموية
اى شوية لسعة تلقى روحك بتندعك بالصابون وعادى وبتغنى كمان
وخلينى احكى ليك تجربة بنت عمتى تزوجت اوائل السبعينات وكان
عمرها لايتجاوز الستة عشر عاما وقالت لى ما كنت خايفة من شىء
الا من قطع الرحط لانها كانت متوهمة انهم سوف يقطعون منها جزء
وقالت لما الحريم زغردن وقالن الرحط قطعوه...ما كان منى الا ان
فتحت عيونى وقلت لصاحباتى والتى هن فى عمرى :وحاة الله بارد.
هسع وحاتكم العرس بارد شوية تنازلات من جاى تقابلها تنازلات
من الجانب الثانى وبيت مال وعيال،،،،،
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: سيف الدين مصطفى كرار)
|
سلمي يا صبحي..
انا غايتو بتفق مع دكين للمرة الاولي والاخيرة
اجمل حاجة انو الناس ما تتغير عشان خاطر بعض..
يعني جنك الكان عاجبه زمان مافي شي بيخليهو ما يعجبه بعد العرس..
وشخصيته القوية الكانت عاجباك لازم تشجعيها..مش تحاولي تخليهو
خاتم في صباعك يا قول المصريين..
وكان ختيتو مشكلة العشا والبجهزه منو..ما بتجيكم عوجة..
Quote: وخلينى احكى ليك تجربة بنت عمتى تزوجت اوائل السبعينات وكان
عمرها لايتجاوز الستة عشر عاما وقالت لى ما كنت خايفة من شىء
الا من قطع الرحط لانها كانت متوهمة انهم سوف يقطعون منها جزء
وقالت لما الحريم زغردن وقالن الرحط قطعوه...ما كان منى الا ان
فتحت عيونى وقلت لصاحباتى والتى هن فى عمرى :وحاة الله بارد.
|
والله يا صديق الموج فقعتني بالضحك..
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: عواطف ادريس اسماعيل)
|
عواطف والله وجودك بيفرحني
استعرت اسمك في عنوان البوست...
Quote: فعلا عواصف سنة أولى قد تنتهي بنهاية الصف
الأول ولكن ماذا تقولين عن العواصف التي تمتد حتى أرزل العمر ؟؟؟ |
دي يا ساتر منها يا عواطف أخير الواحد يا يعمل فيها نايم ومطنش يسد دي بطين ودي بعجين عشان
يبعد من المشاكل، لكن معناها دفن نفسه للأبد........أو حل آخر يعـــرس تاني !!!!!
ولا شنو يا عطّوفة؟؟؟
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: رشا سالم)
|
رشا سالم اذيك
Quote: يعني جنك الكان عاجبه زمان مافي شي بيخليهو ما يعجبه بعد العرس..
|
المشكلة يارشا هو جن ويقوم يتجنن ...عوجة البيهديه شنوذي ده...لكن بيحصل والله يا رشا في كتير من الزيجات فجأة الواحد يعمل U-TERN.[/B وتلقيه عرس مرة تانية  ]
Quote: وكان ختيتو مشكلة العشا والبجهزه منو..ما بتجيكم عوجة..
|
بالله النصيحة دي مهمة كمان تشكري عليها ألف مرة حأعيدا تاني
Quote: وكان ختيتو مشكلة العشا والبجهزه منو..ما بتجيكم عوجة..
|
مودتي
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: salma subhi)
|
منزل خطيبته قرب منزلهم في وقت مبكر للغاية ذهب إليهم ولا يزال يرتدي ثياب النوم وطرق على الباب فتح له أبوها وكلاهما يتثاءب فقال له عايز أشوف فلانة؟ نظر إليه أبوها بدهشة ونادى عليها فجاءته وهي مستغربة في حضوره المبكر وبثياب النوم فنظر إليها وقال لها خلاص قالت في شنو؟ قال كنت عايز أشوفك لما تصحى من النوم بتكوني كيف؟
سلمى صباحك زين
كثيراً لا ينتبه الشاب والشابة المقبلين على الزواج لما بعد الزواج كل الهم أن يتم الزواج وقبلها يتبادلان المحبة والود وفي الذهن والخاطر إبن الملوح وليلاه والعشق النبيل ... كأنما الزواج هو كلمات حب ونظرات عشق ...
الزواج مؤسسة تحتاج إلى إدارة حكيمة وهي المؤسسة الوحيدة التي يديرها شخصان وليس مدير واحد (ولن تنقلب مركبهما) ... وللعاطفة دور ولكن للعقل دور أكبر ...
تبدأ العلاقة بالعاطفة وبعد الزواج تحتاج إلى شمار عقل يوزنها حتى لا تنقلب الأمور ...
حكى لي صديق أن الشاب والشابة تزوجا عن حب ولم يكونا ييمتلكان غير سريرين فقط في البيت أسسا بيتهما بعد الزواج بحكمة وكانا حينما تواجههما مشكلة مثلاً ليلاً يخرج الزوج ويعود مثلاً وهو يحمل (الفول) ويأخذ سريره على جنب وينام ولا يفتحا موضوع الخلاف في اليوم الثاني أحدهما يدخل إلى المطبخ ويجهز كوبي شاي أو عصير ويجلسان لمناقشة الموضوع بهدوء ويكون كل شئ على ما يرام ... منهج لتلافي المشكلات ... والمشاكل الزوجية أصل في مؤسسة الزواج ولكن العبرة بالكيفية التي تتم بها معالجتها ...
وأكبر إشكال يمكن أن يواجه المؤسسة الزوجية في حال وجود مشكلة بين الإثنين هو إدخال طرف ثالث .. تأكد أنكما إذا واجهتكما مشكلة وأدخلتم شخصاً ثالثاً فيها (من طرف الزوج أو طرف الزوجة) أن الأمر سيتفاقم ... كلما كانت المشاكل الزوجية داخل غرفة النوم فلن يتأزم ألأمر ...
الحديث عن المشاكل الزوجية والخلافات داخل البيت هو ليس للتخويف ولكنه هو أمر طبيعي لابد من حصول إختلافات ولو بسيطة على أساس أنهما شخصين مختلفين ولا شك أن الزواج سيآلف بينهما مودة ورحمة وهو الأمر الذي يساعد في تلافي المشاكل بطريقة واعية ...
أي شخص مقبل على الزواج كنت ولا زلت أقول له/ا المشاكل بعد الزواج عادية فلا تخافوا منها هي شمار وملح الحياة الزوجية وبدونها الزواج يكون بلا طعم لكن العبرة في كيفية حلها ... كلما كان الزوج أو الزوجة متعنتاً سيقودهما الطريق نحو ما لا تحمد عقباه الشد من كلا الطرفين يقطع خيط الحياة الزوجية وهو خيط رفيع لأنه يقوم على معايير حب ومودة إن لم يدعم بعقلانية حميمية ينقطع ...
هناك مشكلة أخرى أعتقد مهم مناقشتها هنا وهي أن النساء كثيراً ما يتحدثن مع البنت المقبلة على الزواج بطريقة فيها (تحريش) ضد الزوج ... كذلك الرجال ... (ثقافة قتل الكديسة) ... حكى لي صديق إن صديق له يوم الدخلة فور دخولهما الغرفة خلعت العروس الثوب وقالت لزوجها: طبق التوب ده، فلم يعرها الزوج إنتباهاً وعدت الليلة وبعد أيام وكان قد لطف الأجواء حتى لا يؤثر ذلك الموقف وفي لحظة حالمة سألها عن سر أمرها له بـ (طبّيق التوب) فقالت له وبصراحة فائقة النسوان حرشني وقالن لي الراجل ده أضفريهو من اليوم الأول ...
لكل تجربة زواج مناخها وتفاصيلها التي تختلف عن الأخرى ...
صحيح هناك أسس مشتركة تتلخص في العقلانية في حل المشكلات وعدم إشراك طرف ثالث فيها ...
سأعود
إحتراماتي
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: عبد الله إبراهيم الطاهر)
|
مداخلة جميلة جداً أستاذ عبدالله فيها الفكاهة والحكمة وحسن التصرف
| Quote: وأكبر إشكال يمكن أن يواجه المؤسسة الزوجية في حال وجود مشكلة بين الإثنين هو إدخال طرف ثالث .. تأكد أنكما إذا واجهتكما مشكلة وأدخلتم شخصاً ثالثاً فيها (من طرف الزوج أو طرف الزوجة) أن الأمر سيتفاقم |
دي مهمة
Quote: والمشاكل الزوجية أصل في مؤسسة الزواج ولكن العبرة بالكيفية التي تتم بها معالجتها ...
|
ودي كمان مهمة
| Quote: هناك مشكلة أخرى أعتقد مهم مناقشتها هنا وهي أن النساء كثيراً ما يتحدثن مع البنت المقبلة على الزواج بطريقة فيها (تحريش) ضد الزوج ... كذلك الرجال ... (ثقافة قتل الكديسة) |
موضوع فعلاً يجب أن يثار ويناقش بيننا
شكراً مر أخرى
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: salma subhi)
|
مشكورة سلمى صباحي
تعرفي إن كثير من حالات الطلاق السبب فيها أتفه مما يمكن أن يتصور الإنسان ولكن هذا السبب التافه يتطور ويتطور حتى يصبح أكبر وأكبر ...
موضوع ثقافة (كتل الكديسة) هو أساس كثير من المشكلات التي تواجه الأزواج فهو يضع أساس فلسفة خطيرة للغاية ...
لنفتح النقاش حولها ...
لكل المتداخلين
أفتحوا هذا الباب المهم وناقشوه بروية ...
إحتراماتي
سأعود
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: salma subhi)
|
قريت قصة لذيذة جداً ......ركزوا فيها بالله عروسات سنة أولى زواج
بعد 60 سنة زواج اكتشف السر
ظلا متزوجين ستين سنة كانا خلالها يتصارحان حول كل شيء
ويسعدان بقضاء كل الوقت في الكلام أو خدمة أحدهما الآخر، ولم تكن بينهما أسرار
ولكن الزوجة العجوز كانت تحتفظ بصندوق فوق أحد الأرفف
وحذرت زوجها مرارا من فتحه أو سؤالها عن محتواه ولأن الزوج كان يحترم رغبات زوجته فإنه لم يأبه بأمر الصندوق
إلى أن كان يوم أنهك فيه المرض الزوجة وقال الطبيب أن أيامها باتت معدودة وبدأ الزوجالحزين يتأهب لمرحلة الترمل ويضع حاجيات زوجته في حقائب ليحتفظ بها كتذكارات
ثم وقعت عينه على الصندوق فحمله وتوجه به إلى السرير حيث ترقد زوجته المريضة
التي ما ان رأت الصندوق حتى ابتسمت في حنو وقالت له:لا بأس .. بإمكانك فتح الصندوق
فتح الرجل الصندوق ووجد بداخله دميتين من القماش وإبرالنسج المعروفة بالكروشيه
وتحت كل ذلك مبلغ 25 ألف دولار، فسألها عن تلك الأشياء
فقالت العجوز هامسة عندما تزوجتك أبلغتني جدتي
أن سر الزواج الناجح يكمن في تفادي الجدل والنق (النقنقة)
ونصحتني بأنه كلما غضبت منك أكتم غضبي وأقوم بصنع دمية من القماش مستخدمة الإبر
هنا كاد الرجل أن يشرق بدموعه : دميتان فقط؟ !!
يعني لم تغضب مني طوال ستين سنة سوى مرتين
حزنه على كون زوجته في فراش الموت فقد أحس بالسعادة لأنه فهم انه لم يغضبها سوى مرتين
ثم سألها حسنا عرفنا سر الدميتين ولكن ماذا عن الخمسة والعشرين ألف دولار!!
أجابته زوجته هذا هو المبلغ الذي جمعته من بيع الدمــى
ومواصلين
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: salma subhi)
|
شوفى سلمى جيتك صاد اتذكرت شىء...انا متزوج بالظبط الان 23 سنه
ولم تفارقنى ام حيدر (الله يديم عليها نعمة التلصق) غير مرة واحده
ذهبت فى اجازة وتركتنى وحيدا...اول ايام اكتشفت ان النزول من جانبى
السرير نعمة ظللت افتقدها والعجب لما ادور وانقلب للكومدينه التانيه
واتناول لى بندول او اى شى وارجع بنفس السرعة افتح الدولاب عشان اجدع
القميص جواهو ..يا الله حاجة سمحة خلاص....قلت بالله تاريها المرة قاعده
لى زى الحصحاصه فى المركوب وانا زمان الا ادور غرفة النوم كلها وامشى
هناك اجيب ولاعة والا بندول...لكن وحاتك لما الكتب والجرائداتكومت على
وضايقتنى فى نفسى والهدوم بقت بس غسال يوم الوقفة، اتذكرت ام حيدر قربت
ابكى اواعرس تانى يعنى اسبير لمثل تلك اكوام..المهم دى من النعم الحاتفقدوها
يوم تنزل يسار السرير ويوم من اليمين..والكتاب البتقراه تجدعو على شمالك
ويقاسمك سريرك....وبعدين جنس ثقاله مستحيل تقول ليك سريرنا...طوالى
سريرى..سريرى..تقول انت ما بتدفع ايجار..والعجب الدولاب الشهور الاولى كل زول
تلاته ضلف حلال بلال..بالله من ما تعرف درب السوق والملايات يبقى عندك
طوالى ضلفة ونص (وحاتكم قسمه اخير منها قسمة المؤتمر الوطنى مع الاحزاب الشماليه)
يعنى تلاته شهور 50% طوالى...بعد عشرة شهور كان الله رزقك بى حماده والا سارة
طوالى بكون نصيبك ضلفة الا ربع يعنى بدلتين بس معلقات فى ربع ضلفة ونص ضلفة
بى جاى فى الجلاليب والقمصان..اها قول كدى السنة تمت وحماده بدا يحبا وحملت بى عزة طوالى بكون
نصيبك تحول الى ربع فقط.. بعد وصول عزة تتحول ملابسك الى مسامير خلف الباب
وكان مالحقت روحك بزمجرة اسديه وحاتك كان تلقاهن فى مسامير باب الحمام
لووووووووول....شفتوا ليكم جنس انانية...بعدين بدلك الا يفتشن ليك بتاع
مباحث ..تلقاهن مردومات بـ ابتداءا من فستان الزفاف البقى قدر عزة
طبعا هى بتبقى لبخة او جميزة ولكن يظل فستان زفافها قاعد وبلوفرات وفنايل
برد وروبات وجيبات من زمن عرسك القبال عرس امك داك ومخالى وشنط يد
وواحدات حقات راس وعوووك غايتو تطلع البدلة من تحت تلقى المسكينة
نفسها يتقابض من الزحمة...ده كان ما لقيت معاهن مضرب بيض وخلاطة
وشواية تركيا....اها ودعتكم الله زاكرو لامن اجيكم يا معشر العذاب
يا اولاد الكـ......فتكم عايه ..خلوا بالكم لسه انتو فى سنه اولى
لانو سنة تانيه الكلام شويه بسخن وبتكونو اخذتو حصة العلوم ولا حياء
فى الدين ولا فى العلم لوووول،،،
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: صديق الموج)
|
عارف يا صديق ود الموج,,
صديق كان يعتاد أن يقول
قبل العرس كان عندو ستاشر درج
و دولابين,,
بعد داك بقى عندو دولاب و تمانية أدراج
و كل شهر بينقصو,,
لحدي ما جابو ليهو ولد
بقى بيخت الهدوم في أكياس بلاستيك
تحت السرير,,
غايتو,, المدام داخلة الجنة بإذن الله
قلت لي 23 سنة؟
كيفيك يا سلمى
غادة
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: صديق الموج)
|
صديق الموج
والله والله باضحك لمن شرقت من الضحك....
لكن كلام زول خبير ونصيحة واقعية ومفيدة لطلاب سنة أولى...وفقهم الله لاجتياز الامتحانQuote:
خلوا بالكم لسه انتو فى سنه اولى
لانو سنة تانيه الكلام شويه بسخن وبتكونو اخذتو حصة العلوم ولا حياء
فى الدين ولا فى العلم لوووول،،، |
ما تبخل علي العرسان الجدد بنصايحك الجميلة
وكلنا آذان صايغة
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: salma subhi)
|
نتكلم شوية على حكاية الإتيكيت
مواقف
يتميز أو يفتقر البعض الى حكاية الإتيكيت يعني بيحصل سوء تفاهم بسب انوا العريس مثلاً طلب أكل والعروسة مشت تعدل مكياجها تفاجأ عند العودة بان العريس قد التهم الطعام عن بكرة أبيه....وأصبحت الصحون تلمع من النظافة.
(العريس ما ممكن بينتظر)
شي تاني أكترية الاخوة وبالذات السودانيين بدون زعل يا جماعة لما يطلعوا مكان...تلقى الأسد ماشي قدام والعروسه بي وراه مسافة مترين....يعني ما ممكن تنتظر تمشوا مع بعض.
في حاجة تانية مهمة ...بعض الرجال بنلقاهم يفتقدوا الاسلوب و الكلمات الرومانسية تماماً....والمرأه كائن لطيف يعني أذكر واحدة جارتنا لسه متزوجة ليها شهرين ...العريس الديسنت بيدلعا بي طريقته مرة وبناديها.......هوووووووي أمرقي.وزعلت كيييييف قوليها هوي قدام الناس.
وتتوالى المواقف....
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: salma subhi)
|
ماضي الزوج أو الزوجة
لاشك في أن لكل منا ماضياً.... أيا كان لون الماضي, ماض ليه خصوصيته ممكن نستطيع المجاهرة ببعض فصوله لكن بنخلي شق منه مدسوس في أرشيف الأعماق ونكون حريصين على أن لا يكتشفه أو ينقب عنه الآخرون خصوصا إذا كانوا شركاء لحياتنا خوفا من التأثيرات السلبية ولكن البحصل شنو لو اكتشفت المرأة مساحة من تلك المنطقة المحرمة لدى الرجل أو العكس.
المعروف انه مع بداية أي حياة زوجية لابد من نسيان الماضي....يعني الماضي ولى وراح.....لكن الملاحظ ان الرجل لا يغفر للمرأة ماضيها بسهولة بينما المرأة تتناسى ما فعل الرجل.
طبعاً الرجل أو المرأة من شدة هيامهم ببعض بالذات في أول سنة....يقوم واحد منهم يفضفض ويطلع الورا كله لكن...!!!
سرد الحكايات دي حتى لو كان ماضي صعب نوعاً ما وممكن يكون شوكة خفية بتتغرز في قلب التاني كل شوية ويقعد يتصور في خياله الكان حاصل والتاني كان بيعمل شنو في الماضي بتاعه...ولو ذكر اسم بت ولا راجل!!!!اللـــــــه دي هنا العوجة..
ممكن الراجل أو المرة لو قابلوا سيد ولا ست الاسم بالغلط في يوم ياهو الكراهيييييية اللي يوم الدين حتى لو كان العلاقة اعجاب فقط.
والكلام طبعاً لا ينطبق على الكل
رأيكم شنو في الموضوع ده.....
وين ذوي الخبرة؟؟؟؟؟
| |
|
|
|
|
|
|
|
|
 Re: ***** عواطــــف وعواصــــف سنــة أولـــى زوااااااااااج ***** (Re: salma subhi)
|
حرررم كلامك ما يقع واطـة يا سلمى ..
أها جينا راجعين ..
يمكن الهاجس أو الشغل الشاغل هو موضوع الزواج قبل أو بعد ..
وهناك آراء كثيرة حوله تختلف وجهة نظر كل واحد حسب معايشته للزواج نفسه ..
يمكن صديق الموج لخص المسألة دي في نقاط بسيطة وهو المتزوج من 23 سنة ما شاء الله عليه ومن خلال بوست طارق نقد وجلسات كثيرة تمت هنا ناقشنا الموضوع دا ولا يزال ..
يبقى الزواج مودة ورحمة بين اتنين إرتضياء العيش مع بعضهما البعض ومحاولة بناء أسرة بالتفاهم والمشاركة ..
مودتي ..
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: salma subhi)
|
وصية الاعرابية لابنتها يوم زفافها
Quote: أي بنية انك فارقت الجو الذي منه خرجت وخلفت العش الذي فيه درجت ، إلى وكر لم تعرفيه وقرين لم تألفيه ، فاحملي عني عشر خصال تكن لك ذخراً :
- اصحبيه بالقناعة
- وعاشريه بحسن السمع والطاعة
- وتعهدي موقع عينه ، فلا يرى منك قبيحا
- واعرفي وقت طعامه
- واهدئي عند منامه ، فان حرارة الجو ملهبة ، وتنغيص النوم مغضبة
- واتقي الفرح أمامه إذا كان ترحا ( أي حزينا )
- والاكتئاب عنده إن كان فرحا
- وكوني اشد الناس له إعظاما يكن أشدهم لك إكراما
- واعلمي انك لا تصلين إلى ما تحبين حتى تؤثري رضاه وهواه على هواك فيما أحببت وكرهت والله يخير لك . |
| |
|
|
|
|
|
|
|
|
|
Re: ***** عواطــــف وعواصــــف سنــة أولـــى زوااااااااااج ***** (Re: Haitham El Galal)
|
هيثم....تحيات كتيرة
إنت يا قلبي الحزين تلقى السعادة
تبقى هاني وابتساماتك معادة
والسرور يملأ حياتي ويبقى زاده
وعيني تشبع نوم بعد ما طال سهاده
انسى غلبي والرياحين تملى دربي
وامسح الدمع البسيل يسقي الوسادة
| Quote: تعلمين ان الانهزاميه لم تجد سبيلا لدينا بعد لذا لا بد من المثابره..... |
طيب ....الى الأمام سر 
| Quote: انفع يابتى اكون من الهيئه الاستشاريه حتى لو ما زكتنى عواطف |
كدي نرجع نسأل عواطف؟؟؟؟.....لكن عجبتني كلجنة استشارية في تقديم النصيحة بالمثابرة ...المهم ورينا النتيجة!!!! عشان تكون قدوة....
الله يوفقك
مودتي....وما تبخل علينا بنصحك المفيد
| |
|
|
|
|
|
|
| |
salma subhi
فيصل نوبي
عبدالرحمن الحلاوي
Hisham Amin
اساسي
غادة عبدالعزيز خالد
صديق الموج
رشا سالم
عواطف ادريس اسماعيل
عبد الله إبراهيم الطاهر
tariq
ادريس خليفة علم الهدي
معتصم دفع الله
هاشم أحمد خلف الله
فيس بوك
تويتر
انستقرام
يوتيوب
بنتيريست