|
دعوه قضائيه ضد سودانيذ أونلاين
|
محكمه
وقف جميع من فى المحكمه بهيبه ووقار لدى دخول القاضى لقاعه المحكمه, وبعد أن جلس القاضى ومعاونيه عاد الجميع لمقاعدهم مره أخرى
لحظات مرت قبل أن يعلن الحاجب عن بدء القضيه رقم 420 الخاصه بالأحوال المدنيه..بدأت القاعه مليئه عن أخرها وسط ضجيج شديد وصراج يبدو من مديريه أنه نقاش حاد بين الحكومه والمعارضه وسط تراشق بالألفاظ وبعض الكراسى
صرخ الحاجب محكمه لتبدأ القضيه ويطلب القاضى من المدعين للحضور لبث شكواهم
القاضى للمدعى الأول ما أسمك؟
المدعى: أسمى شيرى عثمان محمد عثمان القاضى ما عمرك؟ المدعى:عايذ بعمرى شنو أنت عايذ تعرسنى؟ القاضى: يابت بطلى كلام فارغ وقولى عمرك كم المدعى: خلاص ما تشخط فينى, أنت قايلنى أنا هينه ولا لينه..ولا قالو ليك على لينه? القاضى : الله يطوللك يا روح..يا بت أنتى أتعدلى كويس وقولى ولدوك متين المدعيه..خلاص خلاص أنا ولدونى قبل بت قضيم بشهرين القاضى وتجى مين بت قضيم ده? بت قضيم طايره من هناك..مخير الله..عليك النبى فى ذول مابعرف بت قضيم..أخير ليك أمشى البس نظارات وتعال القاضى..خلاص خلاص لا نظارات ولا يحذنون ولا حتى عايذ أعرف أعماركم زاتها..أها قولى لى شكوتك شنو وخلصينا شيرى بدور أشتكى الأستاذ بكرى أبو بكر يظهر هناك رجلا يبدو عليه الوقار يرمقها بنظرات حاده يبدو من شكله أنه الرجل المذكور
ومن هو بكرى أبو بكر يسأل القاضى تجيب المدعيه شيرى وهى تبكى بدموع التماسيح, ما ده هو سبب المصايب كلها, من يوم ما دخلت على الوب سايت بتعته لا فلحت فى كتاب ولا طبيخ, بقيت يومى كله أهترش ساكت لما العرسان كلهم طاروا منى..شكيتو على الله القاضى للمدعيه أهدئى أهدئى طيب أنتى عايذه شنو الليله المدعيه شيرى عايذه تعويض عشره الف دولار فقط, أصلح بيهم نفسى واشترى لى نظارات بعد ما عيونى أتهردت من كتره الكلام فى حوش بكرى القاضى للمدعيه: سنقرر فى نهايه الجلسه بعد سماع أقوال باقى المدعين والمتهم والدفاع
الحاجب المدعى الثانى فليتفضل بالحضور
فى أنتظار المدعى الثانى
' No hard feeling pls'
وفى أمان الله
لا اله الا الله
|
|
|
|
|
|
|
|
Re: دعوه قضائيه ضد سودانيذ أونلاين (Re: bint_alahfad)
|
الاخت بت الاحفاد
كان لدي انطباع انك ازهرية التفكير وعشان كدا بقرا بوستاتك سريع بدون تعليق خوف الردة وما عارف من وين جاني انطباع الصرامة الفيك والتي لا تقبلني لتصويرك في مثل هذا الكتابة
التصويرية الرائعة
التي اضحكتني حد القهقهة
يا ربي دي تكون اجازة السودان واكل لحم العتوت يا قولك
وشيلي شيلتك من شيري
وتسلمي يا رائعة
| |
|
|
|
|
|
|
Re: دعوه قضائيه ضد سودانيذ أونلاين (Re: bint_alahfad)
|
الأخ الكريم نذار حسين
السلام عليكم ورحمه الله
لا أدرى لماذا يوصف اى من له طابع دينى بالصرامه وصره الوجه..ربما هذه غلطه بعض الملتذمين الذين يعتقدون أن الألتذام لا يتم الا مع الصرامه وصره الوجه, وهم مخطئون فى ذللك لأن ذللك يبعد الناس منهم ولا يقربهم
أنا بطبعى مرحه ولا ارى هناك تناقض بين الألتذام والمرح, صحيح ان معظم بوستاتى ذات طابع دينى لكن ذللك لا ينفى ان شخصيتى تميل للمرح والفكاهه وأجاذه السودان ما ليها أى علاقه وبالمناسبه انا ما اكلت العتوت لسه
بعدين أشيل شيلتى من شيرى بس, انا باين على لما اخلص السيناريو حأضرب من جميع اعضاء البورد واولهم صاحب البورد, الله يستر غايتو
وفى أمان الله
لا اله الا الله
| |
|
|
|
|
|
|
Re: دعوه قضائيه ضد سودانيذ أونلاين (Re: bint_alahfad)
|
ا المشهد الثانى
بعد ان نده الحاجب على المدعى الثانى للدخول, دخلت سيده فى بدايه العقد الثالث من العمر يبدو من رداءها الابيض انها طبيبه فيها لمحه جمال لا تخفى عن العين, كان ممسكا بها شافعان يشدانها بشده كل من ناحيه وهم يبكون وكانت تمسك فى يدها طفل رضيع لا يكف عن البكاء
القاضى للمدعيه أسمك منو؟
المدعيه أنا الدكتوره بيان حسيب بيان
القاضى عمرك كم سنه؟
المدعيه بيان عليك الله أنت لو زول فاهم فى واحدبيسأل المراه عن عمرها
القاضى للمدعيه, عليك الله يا وليه ما تجيبى لى المصران الأعور ما كفايه شيرتك ديك (شيرى)
المدعيه بيان وانا مالى ومال مرتك شيرى والله صحيح الغلبتو مرتو يأدب حماتو
القاضى: مرت شنو وحماه شنو يا وليه, اللهم طولك يا روح, نهايتو جيتى لشنو مجرجره عياللك كده معاكى ما كان ارحم تخليهم فى البيت مع ابوهم
هنا انفجرت المدعوه بالبكاء , ابوهم يا حليل ابوهم ما كان زمان
القاضى : يا وليه كدى أهدئ شويه وورينى الحاصل شنو؟
المدعيه وهى تجفف دموع التماسيح ويبدو الاستهبال واضحافى وجهها
من اليوم العرفت فيهو سودانيذ اون لاين راجلى طفش من البيت, كنت كل يوم بتفقد اخبارو لكن من يوم ما عرفت البورد بقيت ما بسأل فيهو لما طفش من البيت, حتى انا كنت دكتوره قد الدنيا ولكن بقا كلما يجنى مريض اقول ليهو انا حسع ما فاضيه كدى خلينى أحل مشكله أساسى وفتحى البحيرى, تعال المساء, يجى المساء أقول ليهو انت ما شايفنى مشغوله حسع كدى خلينى أتابع شمارات بنت الاحفاد وطبعا انا طوالى مشغوله بين الشمارات وحل المشاكل وحنيس لحدى ما طفشو منى الذباين كلها وبقيت حالتى ما يعلم بيها الا ربنا
القاضى : طيب حسع بكرى ده ذنبو شنو جايه تشتكيهو
المدعيه بيان: كيفن ذنبو شنو, مخير الله! يعنى لو ما كان فتح سودانيذ اون لاين ده كان حصل الحصل
القاضى : خلاص فهمت, انتى دايره شنو دلوقتى?
المدعيه بيان : انا عايذه تعويض 30 الف دولار, عشرين الف عشان اجيب بيهم زوجى فى بيت الطاعه وعشره الف امشى بيهم حالى لحدى ما اشترى لى زباين جداد
القاضى للمدعيه : تفضلى بالجلوس لحين سماع بقيه الشكاوى
يأتى الحاجب لينادى على المدعى الثالث
فى أنتظار المدعى الثالث
وفى أمان الله
لا اله الا الله
| |
|
|
|
|
|
|
Re: دعوه قضائيه ضد سودانيذ أونلاين (Re: bint_alahfad)
|
لوووووووووووووووووووووول لكن
احكى ليك قصة مرة عداد الكهربا طرشق وعمل حريقة كبيرة انا بعد مرقت العيال رجعتا تانى البيت عشان اطلع انبوبة الغاز فى اللحظة دى ناس الحريقة وصلو وسألو بناتى فى زول جوة البيت واحدة قالت ليهو امى دخلت تنقذ كمبويوترها لما جيت جراية بانبوبة الغاز لقيت جارنا يضحك وقال بتى قالت لبتاع الحريقة كدا الادمان بتاع سودانيزاون لاين ما عارفينو بيتوقف كيف
تصويرك لى عجبنى لوووووووووووووول لانك عملتينى شابة ودكتورة بشرية نحنا دكاترة الورق ساكت
| |
|
|
|
|
|
|
Re: دعوه قضائيه ضد سودانيذ أونلاين (Re: bint_alahfad)
|
العسل دكتوره بيان
أسعدنى انو تصويرى لكى أعجبك, وبينى وبينك كنت خايفه من علقه ساخنه, بعدين خليكى فى صفى لو أتأمرو على ناس البورد..خليكى قريبه عشان ما يكسرو لى يد ولا رجل
وفى أمان الله
لا اله الا الله
| |
|
|
|
|
|
|
Re: دعوه قضائيه ضد سودانيذ أونلاين (Re: bint_alahfad)
|
المشهد الثالث
يحضر رجل طويل القامه يرتدى كرفته حمراء مسرعايبحث بين الحاضرين عن شخص ما الى أن تقع عيناه على المتهم بكرى ابو بكر, يرمقه فى حده ويتوعده فى حين يرمقه المتهم بنظره ساخره هادئه
القاضى للمدعى الثالث ما أسمك؟
المدعى : أسمى أوبى يوكى عبد المطلب
القاضى للمدعى : ما عمرك؟
المدعى : عمر الزهور..عمر الغرام..عمر المنى
القاضى: ايه ده هو عائله سودانيذ اون لاين كلها مجانين ولا شنو؟ الليله ده باين عليها ما حتعدى على خير, يا أستاذ قول لى عمرك كام وخلصنى
المدعى أوبى : ما بتذكر, اصلى كنت بجيب دائما كعكه فى الرياضيات القاضى وقد بلغ به الضيق مبلغه: يعنى ممكن يكون كام تقريبا؟
المدعى : أنت تدينى كام
القاضى : يا أستاذ انا خلفتك ونسيتك, بلاش من السؤال ده البجيب لى العصبى, جيت لشنو الليله؟ المدعى وهو يرمق المتهم بنظرات ناريه فى حين جلس المتهم بدون أى اكتراث فى قفص الأتهام, لو سمحت ممكن مويه فى الاول؟
القاضى يطلب من الحاحب ان يطلب من الساعى احضار كوب ماء وقبل ان يتناوله سأل الحاجب بحده, الكبايه ده شرب فيها المتهم؟
الحاجب : لا تناول المدعى الماء مره واحده وجفف العرق الغذير المتصصب من جبهته قبل ان يبدأ الحديث المدعى أوبى : الراجل ده دمر حياتى, ما حأسيبو أنا, أنا حالف ما أسيبو القاضى للمدعى : كده اهدأ واحكى لى الحاصل شنو
المدعى : كانت عندى خطيبه عسوله ورضيه لو ختوهاعلى الجرح يبرأ, من يوم ما عرفت سودانيذ أون لاين بقى وقتها كلو هناك, وكترت المشاكل بيناتنا, انا مرات بحس أنها بتريد البورد ده أكتر منى, لكن بكرى ده بوريهو .. القاضى للمدعى طيب طلباتك شنو؟
نفسى أدقو..أنا لو ما دقيتو ما برتاح
المتهم من هناك: تدق لى شنو يا وهم, تعال لى هنا بوريك
المدعى يتجه نحو المتهم الى أن يحجذهم الحاجب وبعض انصار المتهم
القاضى للمدعى: خليك عملى وقول عايذ شنو بالضبط المدعى: داير صحن عتوت بشرط تطبخو لى خطيبتى
ورجت القاعه بالضحك, ويأمر القاضى المدعى بالجلوس لحين سماع بقيه الاقوال يعلن الحاجب عن حضور المدعى الرابع
فى أنتظار المدعى الرابع
وفى أمان الله
لا اله الا الله
| |
|
|
|
|
|
|
Re: دعوه قضائيه ضد سودانيذ أونلاين (Re: bint_alahfad)
|
المدعى : كانت عندى خطيبه عسوله ورضيه لو ختوهاعلى الجرح يبرأ, من يوم ما عرفت سودانيذ أون لاين بقى وقتها كلو هناك, وكترت المشاكل بيناتنا, انا مرات بحس أنها بتريد البورد ده أكتر منى, لكن بكرى ده بوريهو
| |
|
|
|
|
|
|
Re: دعوه قضائيه ضد سودانيذ أونلاين (Re: bint_alahfad)
|
الاخت بت الاحفاد عساك عافيه بقو ياندو فى المكتب بى سودانيزاون لاين بدل اسمى الحقيقى واحدهم قال فاتوره النت تخصم من راتبى لان بعقد فى نت اكتر من الشغل بالمناسبه كان دايرين محام هجوم انا جاهز وبجيب المرافعات عن المتهم وبجى ودعقاب
| |
|
|
|
|
|
|
Re: دعوه قضائيه ضد سودانيذ أونلاين (Re: ود عقاب)
|
لووووووووووووووول والله عسل يا بت الاحفاد انا من هئيه الدفاع عن بكري ابو بكر . لانه لولا هذا البورد شيال التقيله لانفجر الباند ودث المخي لشيري اما دكتوره بيان كان برت الراجل بري وكان يا طلقها ولا عرس فيهاعشان يكون عنده راحه نصف اسبوعيه. واكثر من انتفع من هذا البورد هو بلا ادني شك ابي يو كي والا كان لسه لايص ودايش يبحث عن خطيبه عسوله ولو ختاها في الجرح يبرا. لكل هذه الاسباب مجتمعه سيدي القاضي اري تبرئه المتهم بكري ابو بكر وان يدفع تكاليف المحكمه كل من شيري دكتوره بيان والسيد ابي كما نطالب بدفع تعويضات تبلغ قيمتها 500 الف دولار لموكلي بكري ابو بكر ولتحيا العداله
| |
|
|
|
|
|
|
Re: دعوه قضائيه ضد سودانيذ أونلاين (Re: bint_alahfad)
|
بت الاحفاد سلام ما دايرة اعيد كلام نزار حسين لكن انا تفاجأت بالبوست دة منك ...كنتى داسة الابداع دة وين طول الزمن دة؟؟ انا باقرا واضحك براى زى المجنونة .....وخاتة الحلة فى النار كدى النقوم نشوفها ما تبقى على بكرى كمان قضية جديدة
| |
|
|
|
|
|
|
Re: دعوه قضائيه ضد سودانيذ أونلاين (Re: bint_alahfad)
|
الأخ الكريم ود عقاب
الخاله العذيذه دوما
عساكم بعافيه
أشكركم للمداخلات وسنحتاج اليكم حين يحين وقت الدفاع بأذن الله, خاله دوما ستعرض عريضه دفاعك بعد سماع اقوال المتهم وسنضعها فى الحسبان بأذن الله
الأخ الكريم سودانوبس
اذا احضرت النيك نيم بتاع هذه السيده فيمكن اضافه قائمه جديده من الاتهامات لكن لن اضمن ان تكون القضيه فى صالح هذا الرجل ولا بقيه المدعين لانو يبدو المتهم لديه دفاع قوى, أتمنى ان تأخد السيده بالها فى المرات القادمه
الأخت العذيذه هاله قوتا
الله يخليكى يا ستى, ده جرد خاطره خطرت ببالى واحببت ان اضعها بشكل كوميدى واتمنى انك تكوى عرفتى اننى لست صارمه كما اعتقدتى فى البدايه أها قولى لى عايذه تكونى مدعيه ولا مرافعه وان كنتى مدعيه فماهى وظيفتك او الشئ الأضررتى منو حتى نذكره هنا أسعدتنى زيارتك
وفى أمان الله
لا اله الا الله
| |
|
|
|
|
|
|
|