ما عارف ليه الاسم دا اصبح يلح علي كثيرا في الاونة الاخيرة .. حتي اظن اني ملخبط ما بين محجوب ومحمود .. تلك الشخصية الرمزية .. لا ادري اين التقيتها .. هل في مناهج الابتدائي .. ام حكايا الحبوبات .. الا انها الان تفرض وجودها بكل قوة ( كشخصية نمطية ).. رغم تزمرنا قديما .. من حصص الجدول .. وطابور الصباح .. وحتي فسحة الفطور التي قد تتحول الي امر جماعي لتنظيف حوش المدرسة .. الا ان الامر كما يبدو .. جاب نتيجة .. فشخصية محمود الكضاب .. سهلت علي فهم الكثيرين .. وتحول الامر عندي .. الي مقارنة مضحكة بينها وبين واقع الحال .. فالامر عندها( اي شخصية محمود) .. هو تكنيك فني .. لخلط الحقائق واستغلال الفرص .. جهل الجمهور المستمع من اهم ركائز الاستراتيجة المتبعة لدي محمود الكضاب .. فلا بأس في الحديث مع حاجة عشة عن الجو الاوروبي في مدغشقر .. وكيف أن شيخ القبيلة هناك يتزوج واحد وتلاتين مرة في الشهر .. وان .. وان .. وان .. أمية حاجة عشة .. لم تسمح لها حتي بقراءة مطوية سياحية عن الجزر .. وهو ما يرتكز عليه .. صاحبنا .. وزكر زواج شيخ القبيلة ( لاحظ لم يزكر لها شباب القبيلة ) .. في خبطة زكية لمداعبة احلام طارت ليها في راسها .. الا ان الامر لا يتعدي لديها .. ( أي حاجة عشة ) .. واحدة من القصص الوهمية بتاعت ( محمود الكضاب ) .. .. ونظام ( ونس ونس ) يا معلم .. الفورة ألف ..
شخصية ( محمودالنمطية) موجودة في جميع قطاعات المجتمع .. المدنية والعسكرية .. في التجمعات والكيانات .. وحتي في ناصية الشارع .. وعند دكان البرقاوي ( برلمان الحارة ) ..
كل واحد فينا .. لديه محمود الكضاب الخاص بيهو .. تعالوا نحكي عن تجاربنا ..
03-02-2006, 11:55 AM
humida humida
تاريخ التسجيل: 11-06-2003
مجموع المشاركات: 9806
من تجاربي .. في قطاع النقل المكانيكي .. فرع الكوامر و السكند هاند .. تفتح الكتالوج في المعرض .. تشوف صورة الكومر تقول يا موديل سبعة وسبعين يا بالكتير تمنين .. تمشي للفحص والمعاينة .. تلقاهو تريلة موسكوزفت موديل حملة الدفتردار الانتقامية.. !!
03-02-2006, 12:30 PM
humida humida
تاريخ التسجيل: 11-06-2003
مجموع المشاركات: 9806
من القصص الطريفة .. التي لعبت فيها ( شخصية محمود الكضاب ) .. الشخصية المحورية .. قصة ملكية منزل مريم حريقة ( انداية ) .. كانت بتقع على الطرف الغربي من احد احياء الطبقة المتوسطة .. عبارة عن منزل كان مهجورا لم يكتمل بناءه (اوضتين وبرنده).. حيطة زباله قصيرة و مشرتمة تزينها بعض شظايا ( قزاز) المشروبات الغازية .. كالبيبسي والكولا واستيم تفاح وخلافه .. يعني بالمختصر المفيد كده( حيطة تتمطى وتفلًق في قفا الزول البناها) كما تقول اغنية عقد الجلاد.. او كما يقول الشاعر هاشم صديق .. ( بينتا طين واقع مشرم ولما حال الكون يحنن نشقى شان يلفى الزبالة ) .. وتحكي ( شخصية محمود الكضاب ) .. ان منزل حريقة ست العرقي .. ترجع ملكيته لـ( صلاح كباشي ) .. الذي مات مقتولا في معركة سقوط مدينة ( كاجي كاجو) الدامية بجنوب السودان .. حيث كان المرحوم حينها يعمل بسلاح المدفعيه برتبة ملازم اول بسلاح التوجيه المعنوي .. وهو فرقة في الجيش لا يحمل من يعمل بها سلاحا.. وينحصر عملها فقط في شحذ الروح المعنويه للجنود .. يعني بالعربي كده فرقة ( لا بطًقع لا بتجيب الحٌجار ) .. ويقول ( محمود الكضاب ) ان منزل صلاح اعطته الحكومة للمرحوم .. نتيجة تفانيه في خدمته العسكريه بالجنوب .. الذي قضي صلاح به كل زهرة شبابه حتى دخوله سن الاربعين .. او ربما اعطته له لانه احد كوادرها..!! ورث المنزل عن المرحوم بعد وفاته شقيقه الاكبر ( طه) .. وقام بتأجيره لمريم قبل هجرته لدولة ماليزيا..!!! ولكن( تحت تحت كده) مريم حريقه زاتها لم يجيبها الدرب لهذا المنزل بمحض الصدفة .. وحكاية انها مؤجرة البيت دي ( مكنة ساي ) .. ومريم جات البيت عشان تسكن في بيت المرحوم ( صلاح ) راجلها ..!! الذي تزوجها ( علي حد زعم محمود الكضاب ) .. ولكنه لا يعلم .. هل جميع الابناء ابناء ( المرحوم ) أم البنتين الكبار فقط ..!!
04-23-2006, 02:38 AM
Al-Shaygi Al-Shaygi
تاريخ التسجيل: 11-16-2002
مجموع المشاركات: 7904
حميده يا وليدي استيم تفاح ده ما من عهد ناس مريم حريقه، الزمن داك كان فيه مخلفات قزاز
Quote: وخلافه
وبس وكان داير تعرف وخلافه دي أسأل منها أعمامك ناس أبوجهينة وودقاسم (أوعك تسأل تمبس لأنه وليدات أمدرمان ديل كلامن براه وبودرك ساكت) وكان ما جاوبوك في الرجعة من مركز الـبطاقات أغشاني أشرب معاي الشاي وأنا بفصل ليك (الحكاية مش جلابية) أصله أنا عارف صلبتة جيلكم ده وباكر تطبع لي كلامي ده وتقول لي طالبك تفصيل جلابية سكروته وكما معاها عمه وشال..؟
الشايقي ________________ فاوضني بلا زعـــل
03-02-2006, 12:03 PM
معتصم الطاهر معتصم الطاهر
تاريخ التسجيل: 11-26-2004
مجموع المشاركات: 3995
Quote: فى المهن يصر الفنى على أنه مهندس حتى يصدق والتمرجى .. أنه طبيب
عزيزي معتصم الطاهر .. في حاجات احرف من كدا .. تبرع شخصية ( محمود الكضاب ) في خلط المفاهيم .. يعني كمثال ( حي ) الخلط بين المهن الطبية .. بالدارجي بنقول للطبيب ( دكتور ) .. ولكنها صفة لا تنطبق علي اصحاب التخصصات الطبية الاخرى .. كالصيدلي .. والفحيص .. وصف الجنود ( التمرجية وبتاعين التخدير ) .. نجد ان شخصية ( محمود الكضاب ) في محيط هزه التخصصات تستخدم التعريف الرسمي .. أما خارج نطاق محيطهم ( الناس الماعارفين ) يستخدموا لقب دكتور .. ولا يخجل ( محمود الكضاب ) من اضافة حرف الدال متبوعا باسمه .. عند كتابة مزكرة او خطاب .. او للكتابة في ( المنتديات ) .. !!!
03-02-2006, 01:10 PM
humida humida
تاريخ التسجيل: 11-06-2003
مجموع المشاركات: 9806
من الحالات المعتادة لـ ( شخصية محمود الكضاب ) .. شخصية ( الفشخرة والبوبار ) .. والشخصية دي بتطلب من الشخص ألمام بكثير من ( الامور الفنية ) .. عشان يدعم بيها قصته .. بتلقى ( محمود الكضاب ) في الشخصية دي زول مطلع .. وعالم ببواطن الأمور .. ويمتاز بسرعة البديهة .. تسأله تقول ليهو كنت وين يا ( محمود ) مختفي ليك مدة .. يقول ليك كنت في ( بورتسودان ) بخلص في ( المرسيدس ) .. ويجيب ليك اسم كم تاجر ( ألماني ) كدا لقطهم من الدليل التجاري .. ويقول ليك ديل الناس ( البتعامل ) معاهم .. ياخي ناس ( مرض ) .. تصدق رسلوها بدون ( شهادة المنشأة ) .. !! ويدخل ليك في تفاصيل لا تملكه حينها الا ان ( تفتح خشمك وتقهي ) .. و انت عارف اللداحة بتاعت ناس ( الجمارك ) .. والعكلته بتاعتهم .. امشي جيب ( اقرار جمركي ) .. امشي اشتري ( دمغة ) .. امشي جيب ( بوليصة تأمين ) .. امش لناس ( ضبط الجودة ) خليهم يمضوا ليك الورقه دي وامشي وامشي .. تصدق انا كنت لايص ( اسبوع كامل ) في الدوامه دي .. مع انو في ( اوروبا ) الشغلانه ما اخدت معاي اكتر من ( تلاتة دقايق ) ..!!!!
03-02-2006, 01:35 PM
humida humida
تاريخ التسجيل: 11-06-2003
مجموع المشاركات: 9806
شخصية ( محمود الكضاب ) السياسية .. دايما معارضة .. وبتيح ليه الصفة دي التحرك في ( المعسكرين ) .. مع ناس المعارضة .. كـ( معارض ) .. ومع ناس الحكومة .. كـ( كغواصة ) .. ودايما لديه تبرير جاهز لوجوده في أحد ( المعسكرين ) .. مشيت المسيرة دي ليه يا ( محمود ) .. مشيت عشان ( أعد ) الناس .. تعد شنو يا ( محمود ) ياخي .. شايفنك مكوع وبتشرب في ( الشاي ) .. ( شاي ) شنو يا جماعة .. حتي زاتو ماكان في ( كبابي ) .. انتو ما عارفين الناس ديل ( شرفانيين ) .. وبشربوا بـ(الترمسة ) .. وانا ( حركات ) زي دي ما بعملها .. رأيك شنو يا ( محمود ) في نظرية ( الجازبية الارضية ) .. شنو .. دا كلامك .. طبعا ( ما كويسة ) .. ( انتهازية ) و ( باعت دم الشعب ) .. وانا ( كتبت ) في الموضوع .. من موقعي كـ ( صحفي ) .. !!! ولونك السياسي شنو .. انا طبعا ( مريخابي ) .. علي ( السكينة ).. !!!!
03-02-2006, 01:49 PM
humida humida
تاريخ التسجيل: 11-06-2003
مجموع المشاركات: 9806
من شخصيات ( محمود الكضاب ) .. المعاصرة .. كتب الاستاز ( عمر حسن غلام الله ) .. في حديثه عن ( شخصيات ظريفة من ودمدني ) .. كتب عن ( كضاب مدني ) .. ( في فراش البكاء جلس كضاب مدني يحكي قصصه الخرافية وحكاويه اللاواقعية كالمعتاد، فقال: - زمان في صباي كان جنًي صيد، وفي يوم لقيت لي صيدة في غابة ام بارونه، طبعا الزمن داك ما كان فيه بنادق، وكنت صبي متعافي وجراي جري، يا زول سكيت الغزالة دي في الغابة ، هي تجري وانا وراها ، هي تجري وانا وراها، لغاية ما فترتها تب، قبضتها في حنتوب، فقاطعه الجماعة: - لكن البحر يا مولانا!! - والله راح من بالي! )
03-02-2006, 02:08 PM
humida humida
تاريخ التسجيل: 11-06-2003
مجموع المشاركات: 9806
من أسهل ( المهن ) التي يمكن لـ( محمود الكضاب ) ان يمتهنها.. مهنة ( الصحافة ) .. ولنا في (جمعية الصحفيين السودانيين بالرياض ) .. مثال ( حي ) .. لا أريد الخوض في التفاصيل .. وضرب ( الأمثلة ) .. لكن حسب ( اعتقادي ) .. هي أكبر تجمع سوداني لـ ( محمود الكضاب ) .. يتبعها كثير من ( التجمعات ) زات العضوية الهاشمية ( عضوين او ثلاثة ) .. كـ (رابطة محبي او مشجعي الفضائية السودانية بالرياض ) .. و ( رابطة ونس ونس يا معلم ) ودي فيها ( عضو ) واحد بس هو ( انا ) ..!!
03-02-2006, 01:53 PM
KOSTA KOSTA
تاريخ التسجيل: 02-05-2002
مجموع المشاركات: 3138
تعرف يا حميدة فتحت لينا درب " المحاميد " ديل و ما اكثرهم خاصة فى زماننا هذا انا عندى منهم الكثير و حأقول ليك عنهم امانة ما مالينى " غبينة ".... لانهم : انتهازيين و برغماتيين من الطراز الفريد و الأدهى استغلالهم " الوقح " لبعض السذج فى المجتمع .
جاييك بنماذج ما حصلت من قبيلة " المحاميد " .
03-02-2006, 02:09 PM
KOSTA KOSTA
تاريخ التسجيل: 02-05-2002
مجموع المشاركات: 3138
"ابو منتصر" عاش فى المملكة فى الزمن الجميل و كان يعمل فى شركة الزيت .... انتهى عمله هناك ... و ظل متأبطآ شر " البوبار " ... ز ما زال سكن بجوارى فترة فى مدينة الخبر .... و لم يمر زمن قليل حتى عرفت انه " محمود" كبير يسكن فى فيلا ايجارها الشهرى حوالى 35000 ( خمسة و ثلاثين ) و هو لا عمل لديه .... اضطر صاحب الشقة لاخلائه بواسطة البوليس .... اذا لم تكن تعرفه يأتيك بحكم انك سودانى و يرمى لك " مكنات " خطيرة بانه يعمل مدير شركة كبيرة و ان الراتب تأأخر لسفر صاحب الشقة للخارج دون ان يوقع على شيكات الرواتب و عليه اريد سلفة الفين ريال لحدى ما يجئ الكفيل فى الاسبوع القادم.. و يقع الكثير من الطيبين فى مثل هيك " شرك " .
بتاعين البقالات فى حى الحزام الاخضر كلهم لديهم مطالبات بمبالغ اقلها خمسة الف على الرجل و يشكون لطوب الارض . الغريبة زوجته الفاضلة كلما جاءت سيرة زوجها المحترم تذكر انه لديه عمل فى " لندن " و مرة فى " دبى " ..... و العالمين ببواطن الامور يقولون انه مرمى فى السجون من القضايا المرفوعة عليه.
و لا حول و لا قوة الا بالله العلى العظيم
03-02-2006, 02:25 PM
humida humida
تاريخ التسجيل: 11-06-2003
مجموع المشاركات: 9806
عمنا ( كوستا ) .. لو كنت أعلم ان هؤلاء ( المحاميد ) بجيبوك .. كان كتبت ليك عنهم من زمان .. فقط كنت انتظر لحظة ( انفقاع المرارة ) .. لأكتب .. و للأسف الشديد .. انا بـ( الرياض ) .. افتقد كثيرا حميمية ناس ( جدة ) وجلساتنا في ( الشرقية ) .. لو لا عمنا ( ابو جهينة ) وصديقي ( تمبس ) .. ومن ( رحم ربي ) .. لكنت غادرتها غير مأسوف علي ..
مازلت افتقد لصديقي ( اساسي ) .. تحية لمن بـ ( طرفكم ) ..
03-02-2006, 02:44 PM
khaleel khaleel
تاريخ التسجيل: 02-16-2002
مجموع المشاركات: 30134
نعم يا عزيزي ( خليل ) .. مررت بنظرية ( المناهج ) دي من قبل .. ولم اتثبت منها .. وكانت الرواية ان ( الشيوعيين ) من وضع المنهج .. وليس ( الانجليز ) .. فالمنهج القديم كما اتزكر كان لمؤلفين ( سودانيين ) .. الا بعض الكتب الاضافية لمؤلفين من من ( مصر ) علي ما اعتقد .. هي فقط .. الشخصية النمطية ( التي تستهويني ) واعقد لها ( المقارنة ) .. لا بأس بالاسم الاول .. يمكن ان يكون اي اسم ( للابتعاد عن الشبهات ) .. فقط ما يعنيني الصفة .. ( يمكن ان البسها لك ثوب من أعني ) .. بعض الحياء وقوانين المنبر .. ( تمنعني ) .. ولك جزيل الشكر علي المعلومة .. اتمني ان تكون ( محور نقاش ) .. فقد تداولها الناس كثيرا بدون الوصول الي ( أمر جازم )
مازلت اردد .. اغنية الرائع ( مصطفي ) .. الفات الفات بي ديلو ... سبعه لفات .. والجبة وقعت في البير .. وصاحبها واحد خنزير .. والهون ضرب التلفون .. والعسكر واقف طابور .. شليل وين راح اكلو التمساح .. شليل وينو اكلو الدودو .. وهو لبلب كم في الخت .. مو سته.. ( كضبا كاضب ) .. موسبعه ..( كضبا كاضب ) مو عشره .. ( شد واركب )
03-02-2006, 02:50 PM
طيفور طيفور
تاريخ التسجيل: 08-17-2002
مجموع المشاركات: 1666
صدقنى لم ازل " مشدوه " منذ وطأت قدماى ارض امنا جده يبدأ اليوم و ينتهى و انا لا ادرى اين البداية و اين النهاية و عشان تمشى مشوار عمل من شمال جده و حتى جنوبها او ابعد تكون قد وصلت قمة التأفف و لما ترجع البيت تكون منحنيات التوافق النفسى قد آلت الى ما لا نهاية .... و غدآ تبدأ الطاحونة من جديد
المشكلة فى الوقت الغير متوافر و اذا توفر بعض الوقت يكون " امبير " القرفه فى اقصاه اها نحلها كيف دى يا طيفو و بث
03-03-2006, 05:22 PM
humida humida
تاريخ التسجيل: 11-06-2003
مجموع المشاركات: 9806
اتبع سياسة ( محمود الكضاب ) .. عنده باب واسع في ( الحنك البيش ) وعبارات مثل ( غيرت الجهاز رقمك ضاع ) .. ( وياخي يوم داك كنت في بالي ) .. ( تصدق كنت غاشيكم بس الشافع الصغير وقع في السلم ) .. ( وبعدها سافرت السودان عزاء ) ( ياخي انت معانا في جدة .. !! )
Quote: فشخصية محمود الكضاب .. سهلت علي فهم الكثيرين .. وتحول الامر عندي .. الي مقارنة مضحكة بينها وبين واقع الحال .. فالامر عندها( اي شخصية محمود) .. هو تكنيك فني .. لخلط الحقائق واستغلال الفرص .. جهل الجمهور المستمع من اهم ركائز الاستراتيجة المتبعة لدي محمود الكضاب ..
خد الليمونه دى كان باريت محمود تبقى عاوز ليك شوال ليمون
03-04-2006, 01:38 AM
bayan bayan
تاريخ التسجيل: 06-13-2003
مجموع المشاركات: 15417
عمري كلو مصدقة الحكاية دي.. لغاية ما جيت بعمل في الماجستير درست مناهج وكيف بتتعمل... اها الاسماء دي لأنها شائعة.. في تعليم اللغة وعمل النصوص لازم تتخير الاسماء الشائعة في المنطقة.. يعني المعيار الوحيد هو الشيوع( ما من شيوعية ولذا لزم التنويه ) ومافي اي تحاميل دينية او سياسية.. فقط ثقافية.. واي خبير مناهج يمكنه تأكيد ذلك..
بس نحنا خيالنا خصب وبرنويد.. معزتي كاملة الدس
03-04-2006, 01:48 AM
bayan bayan
تاريخ التسجيل: 06-13-2003
مجموع المشاركات: 15417
عمري كلو مصدقة الحكاية دي.. لغاية ما جيت بعمل في الماجستير درست مناهج وكيف بتتعمل... اها الاسماء دي لأنها شائعة.. في تعليم اللغة وعمل النصوص لازم تتخير الاسماء الشائعة في المنطقة.. يعني المعيار الوحيد هو الشيوع( ما من شيوعية ولذا لزم التنويه ) ومافي اي تحاميل دينية او سياسية.. فقط ثقافية.. واي خبير مناهج يمكنه تأكيد ذلك..
بس نحنا خيالنا خصب وبرنويد.. معزتي كاملة الدس
03-07-2006, 05:26 AM
humida humida
تاريخ التسجيل: 11-06-2003
مجموع المشاركات: 9806
بيبو ( النسيبة الافتراضية ) .. والله كلام ناس ( العلم ) ما عليهو تعقيب .. وفعلا استفسرت من دكتورة ( مناهج وطرق تدريس ) تعمل في جامعة السلطان قابوس .. وتحدثت ايضا عن مسألة ( الشيوع ) .. و ذكرتني بالشخصية الجميلة ( حمزة ) في مقرر ( النايل كورس ) للغة الانجليزية ..
كلامك علي كلامها .. يكفيني تسلمي ..!!
03-05-2006, 06:18 AM
humida humida
تاريخ التسجيل: 11-06-2003
مجموع المشاركات: 9806
نادية الغالية .. نحن كلنا عندنا من شخصية ( محمود الكضاب ) .. في جزئية صغيرة كدا اسمها ( مركب التضخيم ) .. بنحب دايما نعمل للحاجة ( توم وشمار ) .. ونحمل الامور فوق طاقتها .. يعني ما عندنا حاجة ممكن تمر مرور الكرام .. لانه شخصية ( محمود الكضاب ) الجوانا .. بتقول لينا انتو افهم ناس .. واحرف ناس .. تبدا بعدها .. عبارات ( فهمت قصدك ) .. وتأويل الاحاديث .. الذي يؤدي الي سوء النية ( المبالغ فيه ) .. عندك هنا مثال ( حي ) في المنبر .. مشكلة ( دارفور المنبرية ) .. وليس أزمة ( دارفور الواقعية ) .. بينهما فرق كبير ..!! يمكنك تعلم دروس كافية .. في سوء الفهم وسوء الطرح .. والتوم والشمار .. وطبخ الاكاذيب .. وحاجات تانية حامياني .. المسالة كلها ان شخصية ( محمود الكضاب ) .. تخلط بين الجادي والما جادي .. لمن ( محمود ) يصدق نفسه علي انه جادي ..
03-04-2006, 10:43 AM
Tabaldina Tabaldina
تاريخ التسجيل: 02-12-2002
مجموع المشاركات: 11844
تبلدينا .. عارف يا عمك .. انا وانت .. اول مرة ( نتقاطع ) في بوست .. وانت ( علي ما أظن ) كنت من ناس ( الجمرة بتحرق الواطيها ) .. وعشت ( المناظر ) .. وبتكون شفت ( الفلم ) .. او بالميت تكون شفت ( المكشن بلا بصل ) .. غايتو يا حبة .. ألف ألف مبروك .. فرارك بجلدك ( سالما غانما ) .. من ( عرب السعودية ) .. و ( عرب المحاميد ) ..!!
03-04-2006, 10:58 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا زول يا زول .. عارف يا سيدي حتة ( المؤمن صديق ) دي .. من أهم ( العوامل ) لأنتشار شخصية ( محمود الكضاب ) .. ومعاها اعتقادات تانية بتكون عندنا منظومة ( الصدق ) .. نظام الزول دا ( راجل كبير ) .. أو ياخي دا ( متدين ) او ( بعرفو ) .. الحاجات دي في زمنا الخرافي دا ( جيلنا ) .. اصبحت ( معايير بالية ) .. لانه لقينا .. ( الكبير ) كضاب .. و ( المتدين ) .. بتاجر بالدين .. و ( الثوري ) .. انتهازي واستغلالي .. وحتي ( محمد أحمد ) .. طلع اي كلام يا راجل .. وحتي ( مبررات الكضب ) .. اختلفت .. زمان ( علي ما اعتقد ) الناس بتكضب ( مزنوقة ) او ( بتهظر ) او ( لف ودوران ونصب واحتيال ) .. هسع .. في ( الكضب المرضي ) .. تكضب وتكضب لمن تصدق روحك .. تعاين في المراية ما تعرف نفسك .. تكضب عشان انت ( مناضل ) و ( ما جبهة ) و ( اتحادي ) .. تكضب عشان انت ما ( كبير ) والشيب وقار يا ( جكس ) .. تكضب تكضب تكضب لمن تبقى الصادق الصدوق زاتو .. بمبدا انه اي حاجة كان زادت عن حدها .. انقلبت لضدها ..!!
03-05-2006, 06:50 AM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
تعرف يا حميدة .. كلام عمك معتصم الطاهر دة كلام كلو حكم :
Quote: فى المهن
يصر الفنى على أنه مهندس حتى يصدق
والتمرجى .. أنه طبيب
وهكذا
لماذا لا نفخر بأننا مجيدون حتى فى مستوى حرفتنا
فكم من فنى أو فورمان أفضل فى مهنته الفورمانية من مهندس بشهادة
ولكنه لن يصل لعلمه
هؤلاء كذابون
يخادون الناس وأنفسهم ..
و هذه العادة نجدها عند المصريين .. تلقى السباك ينادوه : يا باشمهندس العسكري ينادوه : يا بيه .. ال عندو كشك سجاير : يا حاج فلان
المهم أن تُرْضي هذه التسميات أصحابها و الأهم من ذلك أن يجودوا أعمالهم. في شركة كبيرة بالرياض .. صاحب الشركة كان بيقول للموظفين : ال Business Cards كل واحد يكتب الوظيفة ال هو بيحس إنو بيمارسها في العمل. فتلقى المحاسب كاتب : مراقب مالي و السكرتير : كاتب مدير مكتب المدير و الشغل ماشي زى الترتيب ..
أها نجي للكذب الضار جدا بصاحبه و بمن حوله :
قالوا في عسكري وقف زول سايق بسرعة جنونية و دار هذا الحديث بين السائق و العسكري : العسكري : رخصتك السائق : ما عندي العسكري : الإستمارة السائق : العربية ما حقتي العسكري : عندك تفويض بقيادة العربية ؟ السائق : لا ثم يلمح العسكري مسدسا على الكرسي بجانب السائق العسكري : دة شنو دة ؟ السائق : دة مسدس .. كتلت بيهو صاحب العربية دي و ختيتو في الضهرية و سرقت عربيتو هنا أخرج العسكري مسدسه و ( هنضب ) السائق و إتصل طلبا للدعم أتى الضابط و سأل السائق : حكايتك شنو ؟ لا رخصة و سارق العربية و شايل مسدس كاتل بيهو زول؟ فأخرج السائق رخصته و إستمارة تثبت ملكيته للسيارة و إتضح أن المسدس لعبة أطفال ثم فتح ضهرية السيارة و كانت خالية إلا من اللستك الإسبير . فنظر الضابط إلى العسكري ( شذراً ) و الشرر يتطاير من عينيه فقال السائق للضابط : يا جنابك .. حسع العسكري دة حيقول ليك كمان كنت سايق بسرعة شديدة .. عشان ما لقى حاجة يختها فيني ...
***
لو ما عجبتك القصة تبقى كضاب بشهادة
و لو موضوعك دة قاصد بيهو زول .. أقول ليك : من كان منكم بلا كضبات .. فليرجمه الحجيج مع الشيطان الأكبر بحجارة من مزدلفة.
03-12-2006, 04:26 AM
humida humida
تاريخ التسجيل: 11-06-2003
مجموع المشاركات: 9806
Quote: و هذه العادة نجدها عند المصريين .. تلقى السباك ينادوه : يا باشمهندس العسكري ينادوه : يا بيه .. ال عندو كشك سجاير : يا حاج فلان
ابا جهينة .. أها ( نحن ) عندنا العادة دي ( مركبة ) .. دبل ( دفرنش ) يعني .. في المقام الاول ( صاحب ) اللقب هو البطلقو علي نفسه .. وبعدين يصدقه .. وعادة ما بكون في تناسق بين ( اللقب ) و ( الشماعة ) .. يعني ( السكرطير ) يقول ليك انا ( مهندس ) .. و ( بتاع السنترال ) يقول ليك انا ( صحفي ) .. وتغلب عليها نكهة ( الشتارة ) السودانية ..
هاك الـ( فاصل الغنائي ) دا ..
تم تم .. ترررم يا يمة .. يا يابا .. اغترابنا بالتاية .. دبي دولار مقدم .. في الرياض ناس كضابة .. ( حجى .. وحكي )
03-12-2006, 03:35 AM
humida humida
تاريخ التسجيل: 11-06-2003
مجموع المشاركات: 9806
Quote: فلم ندخل هنا شامتين.. أو معيبين شماتة أخونا.. عشان يعفيه الله ويبتليني....
أبا رزقة .. كنت داير اقول ليك ( الشماتة ) بتاعت ( نسوان ) .. ما عارف ليه بنرجع دايما الامور ( السيئة ) للنسوان .. رغم علمنا يقينا انه ( نسوان الزمن دا ) أرجل من ( رجال الزمن دا ) .. وعلي ضوء تجربتي ( البسيطة ) .. لقيت ليك المجتمع ( الرجالي ) أكثر ( صواطة ) من المجتمع ( النسائي ) خصوصا في بلاد الاغتراب .. بتنمو امراض ( الحسد ) و ( الأوهام ) و ( الغبينة ) و ( هكذا ) .. ناس كتيرة بتحس انه العمل سرق منها اجمل سنوات العمر .. وبحاولوا بطرق شتى ( التشبث ) بالحياة .. وبصراحة كدا الواحد فيهم بكون شكله ولا أجدع ( ارقوز ) في سيرك .. !!
03-06-2006, 01:57 AM
سيد محمد احمد سيدنا سيد محمد احمد سيدنا
تاريخ التسجيل: 11-21-2005
مجموع المشاركات: 1252
جاد ( اللايوق ) .. ما حابي موضوع ( البوست ) .. يدخل في متاهات ( المنبر ) .. اتكلم عن شخصية ( نمطية ) يمكن أن تكون ( محمود ) أو ( عيسى ) او ( عماد ) .. الخ .. الخ .. الخ .. مسألة ( المقررات ) .. ومن وضعها .. ونفسيات ذلك الشخص .. ( لا تعنيني في هذا الموضع ) طلبت من ( خليل ) الذي أثار هذا الامر .. ان يفسح لها ( باب النقاش ) في موضع آخر .. لأني لا اعلم من هذا الامر .. غير ( احاديث غير موثقة ) من هنا وهناك .. وانا من النوع ( والحمد لله ) الما بقتنع بأخوي وأخوك .. يعني لازم تعمل لي ( دراسة ) .. وتجيب لي ( حقائق موثقة ) .. حتي أصدق .. اما انك ( تعتقد ) و ( أظن ) .. فا يا عزيزي النوعية دي ما بشترى منها بـ( تعريفة )
مرة آخري .. هنافي هذا ( البوست ) لا تعنيني ( المسميات ) .. انما ( الفعل ) .. وهو ( قائم ) و ( موجود ) .. بغض النظر عن ( الاسماء ) ..
03-08-2006, 08:52 AM
JAD JAD
تاريخ التسجيل: 02-05-2002
مجموع المشاركات: 4768
حميدة بوست جميل وخفيف الروح يعالج معضلة انسانية ارتبطت بحياتنا... فما كان من الرعيل الاول توثيق ذالك فى منهج الصف الاول للدراسة سابقا. اتفق معك شخصية محمود الكذاب الرمزية والتى كما علمناها بدأت بالقصة المشهورة... ولكن الان اصبحت شخصية محورية استطاعت ان تفرض نفسها فى دولاب الحياة وللاسف قديما كان هنالك الشر ممثل فى محمود الكذاب وفى الجانب الاخر الخير ممثل فى الكثيرين من الناس . اما الان فأصبح محمود الكذاب وجهان لعملة واحدة الا انها تجردت من الخير وسبحت فى الشر . شكرا على البوست تحياتى
03-08-2006, 09:56 AM
humida humida
تاريخ التسجيل: 11-06-2003
مجموع المشاركات: 9806
علي ( الهواء ) مباشرة .. وصلني ( ماسنجر ) داخلي .. من الاستاذ ( عبد الله عقيد ) .. يزف لي خبر انضمام الاستاذ الصحفي ( طارق محمد الخضر ) .. الي كوكبة ( أعضاء المنبر ) .. طوالي أتذكرت .. المهندس ( بكري أبوبكر ) .. البمثل في ( تصنيفاتي ) .. شخصية نمطية آخرى .. ألا وهي شخصية ( عزو طناش ) .. وهي طبعا اي ( شخصية عزو طناش ) .. ليست بشهرة ( شخصية محمود الكضاب ) .. وتعتبر شخصية ( Local ) .. ( ينحصر الامر في حلتنا ونطاق ضيق من الحلل المجاورة ) .. ألا أن ( عزو طناش ) .. طبع في ذاكرتنا ( نمط سلوكي ) معين .. وجدته في شخصية المهندس ( بكري أبوبكر ) .. نضحك .. نهظر .. سجل لي الزول دا ( أضان جلد ) ..!! ألا انه خيب أملي هذه المرة .. وعملها .. وسجل الراجل ..
03-13-2006, 04:37 AM
humida humida
تاريخ التسجيل: 11-06-2003
مجموع المشاركات: 9806
الاستاذ ( بلدي يا حبوب ) .. اشكرك يا سيدي علي مرورك الكريم .. واتفق معك علي ( محورية ) شخصية ( محمود الكضاب ) .. وأصبح الامر ( خبرة ) لمعرفة ( الناس ) .. حسن النية لا يجدي .. كثيرا ..!!
03-13-2006, 05:02 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
انا يا حميد احكي ليك موقف لي محمد الكضاب أقصد (محمود الكضاب)...
في امسية من الاسيات وهو واقف في واحد من (المراكز التعليمية الشهيرة)... وهو كان أساسا بمشي هناك كنوع امن (البرستيج)... وكانت تداعب خياله فكرة انو ممكن يهاجر لدولة غربية (كندا)...قابل هناك صديق قديم ... و طبعاً ادعى انو بعرف اسمو .. او قابلو وين ... و بالتأكيد هو لا متذكر دي لا ديك ,,,, يادوب متأكد انو قابلوا في يوم الايام ... فسأل الصديق صاحبنا محمود (وين ليك زمن ما شايفنك) ... طبعاً (محمود الكضاب) ما بقصر ... عندو الكثير من المشاغل و المشاوير و الاهتمامات السياسية السيادية اتعذر بيها ...
أها و قلتلي عامل كيف ... سأل صاحبنا محمود ... دي طبعاً من الفرص الما بتتفوت ( فرصة المناسبة من غير مناسبة) ...
محمود: و الله احتمال كبير امشي (كندا) .... صاحبنا: ياخ و الله كويس ... اها و ماشي (امقريشن) ... بمعنى هجرة بالانجليزية...
وصاحبنا ما عارف انو محمود ضعيف في هذه المادة و بقية المواد الاساسية ... محمود: بكل حرفنة و بدون تلعثم .... و الله لا أبداً لكن حتة كدة في شمال كندا ... صاحبنا .. اندهش من الاجابة ... لكن مشى الموضوع طبعاً ... ما في داعي يحرجو .... لكن بالتأكيد في ناس كان متابعين الحوار و قاعدين قريب ... و انفقعو بالضحك الهستيري على محمود الكضاب ... الذي تلقى السخرية بكل برود ... معللا ان الجماعة ديل اصلا ما بعرفو حاجة في الجغرافية ...
و تسلم يا حميدة ...
03-15-2006, 07:00 AM
humida humida
تاريخ التسجيل: 11-06-2003
مجموع المشاركات: 9806
نظرية ( التطور ) .. تأخذ بتلابيب ( الاشياء ) .. والفايروس ( يتطور ) .. ويقاوم العلاج .. و شخصية ( محمود الكضاب ) .. أيضا ( تطور ) كما الاشياء .. فأصبح لدينا نوع جديد ( لنج ) .. شخصية نمطية جديدة .. من واقع الحال .. تسمى ( محمود حاشاي يا مولانا ) .. ترتكز في مقوماتها الاساسية .. ( البيز منت ) .. علي ( تكتيكات ) شخصية ( محمود الكضاب ) .. مع تطور في ( ناقل الحركة ) .. يعني ممكن يجر ( واطي ) في اي لحظة ..
04-21-2006, 04:26 PM
humida humida
تاريخ التسجيل: 11-06-2003
مجموع المشاركات: 9806
صديقي ( محمود الكضاب المتطور ) .. أصابته ( أنفلونزا الطيور ) .. وأصبح يخبط في ( الحلل ) .. نظريتي عن ( محمود الكضاب ) عموما .. ترتكز علي مبدا ( ان هذا الشخص يضحك علي الآخرين ) .. لكن كون أنه ( يضحك علي نفسه ) فهي من البدع الجديدة التي دخلت علي شخصية ( محمود ) .. ولم نجد لها مثيل في ( المراجع ) القديمة وحكايات ( الأقدمين ) .. ربما يدخل هذا ( البيشن ) الجديد من باب ( أرضاء الغرور ) .. وصديقي هذا ( محمود الكضاب المتطور ) .. يجمع عدة صفات آخرى .. منها ( قلة الأدب ) و ( سوء التغذية ) و ( ارتفاع حاد في البولينا ) .. مما يأهله بجانب لقب ( محمود الكضاب المتطور ) الي نيل جائزة ( كركعوبة ) الدولية للأسكواش .. او المنافسة الي آحدى الحسنيين ( الخور أو الليق ) ..!!
في أتجاهات الكضب الحديث ( مدرسة الكضابين التجديدية ) .. تدخل العولمة كمؤثر مباشر في بناء شخصية ( محمود الكضاب المتطور ) .. واصبح الكضب لا ( سقف ) له .. ربما لا يرتقى الي مصاف ( الكضب الخيالي ) .. بتاع ( كنت ماشي ناس حليمة لقيت ليك أسد داير يأكل شافع الجيران مسكتو طقطقتو ) ..!! لكن يندرج تحت باب جديد يسمى ( المتناقضات ) .. من فروع ذلك .. مهاجمة القيم والتقاليد .. الخوض في التشريعات الدينية .. بما تجلبه من صخب أعلامي .. ادعاء مناصرة القضايا القومية ( بالكلام فقط ) .. تبني خط مواجهة ( كلامية ) مع من لا يسمعك .. وكان سمعك ممكن تقول ( حاشاي ) .. يذكرني ذلك بالاحتفالات في في القرى الاسكتلندية ( شاهدت ذلك في التلفزيون ) .. وما يصاحبها من سيرك .. تقوم شخصية احد ( المهرجين ) بمتابعتك كظلك .. وعندما تلتفت إليه ( يعمل فيها رايح ) .. يعني ( حاشاي ) .. بلغة المهرجين .. لكن الأمر لا يعدو عند ( المهرج ) سوى لحظات مرح .. وتعني عند ( المناضلين ) لحظات من ( الكضب علي النفس ) ..!!
زمن البلاي استيشن والرسيفر أطلق عليه علما الرندوك(كبتن مـــــــــــــــــــــــــــــــــــــــــــــاجد) .................................................................................... تحياتي أخي حميدة
04-23-2006, 01:50 AM
humida humida
تاريخ التسجيل: 11-06-2003
مجموع المشاركات: 9806
نعم نعم .. يا باشمهندس .. وقد قيل ( الكابتن ماجد .. نجم الملعب ) .. سأعود اليك ..
* لا أستطيع الكتابة بأرتياح وانا في المكتب .. كما يبدو لي .. لم أتقن بعد ثقافة ( الملح ) .. أجود ما كتب هنا .. كتب في ساعات العمل الرسمية .. جميع المناضلين والهتيفة وأكياس النايلون .. ينتهي نضالهم أو نفاقهم .. بأنتهاء ساعات الدوام الرسمية ..
04-23-2006, 02:09 AM
Ahmed Abdallah Ahmed Abdallah
تاريخ التسجيل: 08-12-2005
مجموع المشاركات: 5193
الكفيل قبل او بعد دخول دول الخليج في منظومة ( التجارة الدولية ) ..؟!! أردد عبارتك هذه كثيرا .. لم أحظى بكفيل الي الآن .. ربما تتيح لي المعاهدات التجارية .. اختيار كفيل ( لقطة ) .. هناك في الغرب كما تدعي ( او في الدمام كما كتبت في البروفايل ) .. اشياء مثل النت وومباهج الحياة .. تكون فعلا في متناول اليد .. فقط هل تكون ( اليد فاضية ) عشان تشتغل في النت .. أم أن العمل ( المضني ) في الدلفيري وسواقة التكاسي .. يترك متسع من الوقت ( للنت ) والنضال .. و كسير التلج .. في دول الغرب يمكنك ان تتمتع بـ( النت ) الشبه مجاني .. لكن ستموت بالجوع في آخر المطاف ..!!
ما يعجبني في ( الغرب ) اكثر من أعجابك بـ( النت ) المجانية .. ان شخصية مثل ( شخصية محمود الكضاب ) سواء كانت المتطور أو ( قير عادي ) .. لا تستطيع ان ( تأكل عيش ) .. الحنك البيش لا يجدي نفعا ..
دم كما انت ..!!
04-23-2006, 02:19 PM
Ahmed Abdallah Ahmed Abdallah
تاريخ التسجيل: 08-12-2005
مجموع المشاركات: 5193
إنت بتحصحص في البروفيلات مالك عملا بالمثل شايف في بروفايلك كاتب الجنس female
Quote: او في الدمام
ما...علينا.إختيارنا للدمام نابع من قربها للأمريكان
Quote: فقط هل تكون ( اليد فاضية ) عشان تشتغل في النت
Quote: أم أن العمل ( المضني ) في الدلفيري وسواقة التكاسي
أكيد الناس هنا أيدها ما فاضية زي ما قلت من الـ Delivery والـ Cab driving لكن تعرف ياحميدة سواقين التاكسي ديل فجأة كده تسأل من أي واحد فيهم بعد ثلاثة أو أربعة سنين كده يقولوا ليك الزول ده سافر السعودية أوألأمارات اتعاقدوا معاهو من هنا بمرتب ومزايا وبيدفعوا ليه زي 40000 ريال سعودي شهريا غيرالحاجات الثانية حيث أن 80% من سواقين التاكسي ديل يا حميده are post graduate students (طلاب دراسات عليا) تقوم تقول ياكافي البلاء من فصاحة مغتربين السعودية (فارغة ومقدودة)
Quote: والنضال
النضال ده يا حميده مشكلة كبيرة وكل حسب هواه
Quote: و كسير التلج ..
كسير التلج ده أظن أن لا أحد يستطيع منافسة بورداب الرياض فيه يعني ماركة مسجلة لبورداب نجد
Quote: لكن ستموت بالجوع في آخر المطاف ..!!
عارف يا حميده اجمل ميزة هنا انه ما ممكن تموت بالجوع أبدا وبالمناسبة يا حميدة والله العظيم كثييييير جدا من سواقين التاكسي ديل وناس الـ Delivery ديل بيرسلو مصاريف لبعض معارفهم من مغتربين السعودية....
حميدة الله يديك العايزه ..!! ويفرج همكـــ ..!!!
04-24-2006, 05:54 AM
humida humida
تاريخ التسجيل: 11-06-2003
مجموع المشاركات: 9806
قر قر قر قر يا ابو حميد .. والله صحي الاختشو ماتو .. تصدق يا عزيزي وانا بقرا في ردك دا .. أكتشفت ليك انه نحن ناس ( مقطعين ) .. هسع بدل ما نقول فلان داك في ( مدني ) .. ولا فلان داك في ( القضارف ) .. قاعدين نتفشخر بحق الناس .. وبلدنا المغتربين فيها احسن من بلدكم الانتو مغتربين فيها .. ذي الزول البقول ليك ( راجل أمي جاب لينا لحمة انتو راجل أمكم جاب ليكم شنو ) ..
Quote: كسير التلج ده أظن أن لا أحد يستطيع منافسة بورداب الرياض فيه
لا دي بالغت فيها .. والله لو لا اني في المكتب .. كان ادردقت ليك بالارض من الضحك .. أوكي يا عزيزي .. صدقت في دي .. جنس دردقة وبشتنة .. علي الحرام تشوف الزول ( كبييييييييير ) وكت يدردق يبقى قدر ( السمسمية ) .. اتصالات وتلفونات بس من الرياض .. تسد الفجوة الغذائية في افريقيا كلها .. بس انت الكلمك منو .. أوع تقول لي .. عاملينها ظاهرة .. قرقرقرقرقرقرقرقرقرقرقرقرقرقرقرقرقرقر
Quote: ديل بيرسلو مصاريف لبعض معارفهم من مغتربين السعودية....
طيب ياخي .. ما تختشي علي دمك .. وتعمل ذي أخوانك ديل .. و ترسل مية ضورار ..
الله يجازي محنك يا ابو حميد .. لكن ما قلت لي .. نمرة التكسي بتاعك كم .. !!
04-24-2006, 12:33 PM
Ahmed Abdallah Ahmed Abdallah
تاريخ التسجيل: 08-12-2005
مجموع المشاركات: 5193
حبابك عشرة يا زول .. عارفك ( محمود الكضاب ) .. بس في اتجاه ( اقضوا حوائجكم بالكتمان ) ..!! أما عن باكورة أنتاجي .. ( المكتب وكدا ) .. فعليك قراءة عنوان البوست .. وبعدها يمكنك أن تقرر ..!!
04-29-2006, 09:48 AM
humida humida
تاريخ التسجيل: 11-06-2003
مجموع المشاركات: 9806
Quote: ترتكز علي مبدا ( ان هذا الشخص يضحك علي الآخرين ) .. لكن كون أنه ( يضحك علي نفسه ) فهي من البدع الجديدة التي دخلت علي شخصية ( محمود ) .. ولم نجد لها مثيل في ( المراجع ) القديمة وحكايات ( الأقدمين ) ..
قرقرقرقرقرقرقرر يا حميدة..
حكايات الاقدمين دي كثيرة بس عايزة زول يكوسها
في صديق حكى لي عن شخصية.. اها مشو ليها ناس عايزين منها مساعدة قامت قالت ليهم اسع قاطعين الدرب دا كلللو عشاني انا الفطيس دا هلاهلا هلا امانة ما رفعتوني انا الماعندي فايدة.. فالشخصية دي شخصية أنتي لمحمود الكضاب.. محمود الكضاب نافخ روحو بالحركات ... وشايف روحو في مراية روحو ذي يكون كديسة يشوف نفسو اسد. اها آن ميعاد فتح الحلة وخت البهارات والتوم الصلصة ربة المنزل في زوغة يوم الاحد..
04-23-2006, 11:16 AM
humida humida
تاريخ التسجيل: 11-06-2003
مجموع المشاركات: 9806
Quote: اسع قاطعين الدرب دا كلللو عشاني انا الفطيس دا هلاهلا هلا امانة ما رفعتوني انا الماعندي فايدة..
الله يجازي محنك يا دكتورة .. حكاية ( رفعتوني ) دي هي سبب البلاء .. في مجتمعات ( لا يكون الحكم فيها صواب ) مثل مجتمعات الانترنت .. نرفع من به ( صمم ) الي مرتبة ( مستمع جيد ) .. ولا بأس ببعض ( الويكاب ) والمغالطة التي نصفها ( كلمة حق يراد بها باطل ) .. وفي مجتمع مثل سودانيزأونلاين مثلا .. يجد ( محمود الكضاب ) مرتع خصب .. لممارسة ذلك بكل ( حرفنة ) .. اضرب ليك مثال .. يخاطب ( محمود ) عبر الماسنجر أو المنبر عدد من الأشخاص .. يقول ( والله أمبارح بالليل لاقيت ليك حميده دا مركب ليهو جناحين ) .. لو فسرنا العبارة .. نلقاها خمسين في المية صاح وخمسين في المية كضب .. وجوده في ( واقع جغرافي ) واحد مع ( حميده ) .. بتيح ليهو ينسج بقية الكضبة .. ودا اخطر نوع من ( الكضب ) .. وانا تحديدا مريت بمثل هذا مع ( عضوين ) من بورداب الرياض .. وكان أصريتي علي شوية ( بقول ليك اساميهم ) .. لكن ما في داعي .. برضو ( السن ) ليهو حكمه ..!!
04-23-2006, 12:16 PM
bayan bayan
تاريخ التسجيل: 06-13-2003
مجموع المشاركات: 15417
Quote: وجوده في ( واقع جغرافي ) واحد مع ( حميده ) .. بتيح ليهو ينسج بقية الكضبة .. ودا اخطر نوع من ( الكضب ) ..
اخطر انواع الكضب زول ما شافك في حياتو يدعي انه بيعرفك ويغير الاماكن مرة من مدينتك تاني من محل قريت بدون خجلة قدام المشاهدين بعداك يقعد يقص ويرص ويعمل صاحباتك اي معلومة بيكتبها غلط 100% وهو عارف الناس ما مصدقة.. لكن يصر يقص القصص الغبيانة الما لافقة.. دي نوع من الكضب ظهر مع النت.. كضب وهمة عجيبة.. بعديت يتكلم عن مواضيع من جنس الكبائر ويصل لنتائج براهو كدا وكل مرة يخترع شخصية جديدة لما تبقى المسرحية ذي دفتر التلفونات مليون اسم.. وتستمر القصة والرص والقص اها دا كضب مجنون.. زمان اهلنا قالو لا تناضم المجنون ولا تخلي يناضمك.. بعدين برضو يقولو ليك المجنون في يد العاقل وتاني يقولو ما مؤاخذ.. انت بالجد عندك جنحين ؟
04-23-2006, 05:54 AM
فيصل محمد الطيب فيصل محمد الطيب
تاريخ التسجيل: 12-15-2003
مجموع المشاركات: 123
عجاج يا صديقي .. لدي بوست طويل عريض .. عن عموم الشخصيات النمطية السودانية .. بما فيها علوية بوبار وفاطمة شمار وأماني تايوتا وحمادة بت و آخرين .. فقط انتظر الارشفة .. لك التحية ..
قرقرقرقرقرقر يا ندوش .. انا شغال ( باي ديفولت ) وبعتبر الجميع اصدقاء ( الي ان يثبت العكس ) .. واستخدم دايما صيغة ( المذكر ) مع الجميع .. من باب انه نحن نسوانا أرجل من رجالنا .. ( وكدا ) .. بعدين ياخي والله هي بتبالغ ( اي عجاج ) .. بت وفي الزمن دا .. حيث اصبح الجكس وكانه ( واقع من مجلة سيدتي ) .. وتجي تسمي نفسها ( عجاج ) .. لقد مضى زمن ( الكتاحة ) يا عزيزتي .. و ( العتبة قزاز والسلم نايلو نايلو ) ..
04-30-2006, 00:32 AM
فيصل محمد الطيب فيصل محمد الطيب
تاريخ التسجيل: 12-15-2003
مجموع المشاركات: 123
زمان قلنا ليهو .. الحياة في السعودية .. عبارة عن ( نفر رز بخاري ونصف دجاج شواية ) .. ما صدقنا .. وقال ( القرد الاعمش والنضارة ) .. حيجي ينقذني .. بس بيني وبينك الموضوع .. طلع ( كمين ) .. حتي ( المحاميد ) .. عندما ذهبوا بـ( زعيقهم وطبولهم ) .. رجعوا وطعم ( الملح ) في خشومهم .. أحس ( الفيل ) بأنه بالجد جد طلع ( خفيف ) .. لكنه استمتع بفقرة ( سجمي القرد ) التي قام بها ( محمود الكضاب المتطور ) ..!!!!
04-30-2006, 08:02 AM
almulaomar almulaomar
تاريخ التسجيل: 07-08-2002
مجموع المشاركات: 6485
محمود الكضاب لقي عقابه حتى قبل أن يتخرج من المرحلةالأولية أو الإبتدائية ونال أكثر من مجرد العقوبة التي تقرها وتفرضها القوانين السماوية والوضعية لقد إفترسه النمر وما أبشعها من ميته لم يترك فيه حتى العظام فما بال العقوبة تتوقف عند محمود دون غيره والكل يكضب كذباً أبيض وآخر في أبريل وكضب بألوان الطيف وكذب أسود زي النسكافيه وكذب سياسي حكومي. قديماً قالوا "خليك مع الكضاب لحدي الباب" وقد وصلنا لجميع الأبواب ولم يتبقى لنا لا باب الريد ولا بوابة عبد القيوم إلا ولجناها في معية الكضاب ولكن برغم ما أنفك يكذب ويواصل كذبه دون رادع أو وازع حتى أصبح الكضاب محموداً بعد أن كان محمود الكضاب.
05-01-2006, 04:20 AM
ajaj ajaj
تاريخ التسجيل: 07-27-2002
مجموع المشاركات: 971
اعلن انا بصفتي ملكة جمال جزر البطيخ بخلع صفة الكذب من محمود والباسها لحميضة.... قال سيدتي قال ... لما تجي تقارني بالجمال تخت الممثلة حيزبون اجمل مرة في التاريخ (لو ما عارفها ارجع لبوست حاقد الجمال اساسي) وبعدين انت اسمك حميدة يعني ممكن اقراها بالفتحة وارجع لبروفايلك القاك مرة.. وانا اطلقت علي نفسي العجاج درءا للعين....
بيني بينك انا بت عجاج الفنان....لا لا ما بدرالدين عمي بت محمد ابو صلعة لو ما بتعرفو... واطلقت الاسم عشان اكون مشهورة وكدة لكن جاء بالعكس
05-02-2006, 02:36 PM
humida humida
تاريخ التسجيل: 11-06-2003
مجموع المشاركات: 9806
Quote: محمود الكضاب لقي عقابه حتى قبل أن يتخرج من المرحلةالأولية أو الإبتدائية ونال أكثر من مجرد العقوبة التي تقرها وتفرضها القوانين السماوية والوضعية لقد إفترسه النمر وما أبشعها من ميته
عزيزي ( الملا ) .. شكرا للـ( المحاميد ) الجابوك في حلتنا زائر .. كما يبدو لي ان ( النمر ) الذي افترس ( محمود الكضاب ) .. طلع ( اشاعة ) .. رغم ( حقارته ) بـ( محمود ) الا أنه طلع في النهاية ( محمود آخر ) .. وبما أن ( الاقطاب ) المتشابهة ( تتنافر ) .. فقد ( كره ) محمود و ( افترسه ) .. وعندما دارت دورة الايام اصبح ( مركوب ) يرمز أليه بـ( مركوب جلد نمر ) .. كناية ان صاحب ( المركوب ) شجاع ..!! وان ( النمر ) كضاب ساي .. لو أحترم ( النمر ) ( محمود ) .. بمبدأ ان ( مبروم علي مبروم ما بلف ) .. لكان في ( تضامنهم ) .. قوة دفع للـ( محاميد ) عموما ..!!
05-03-2006, 01:53 AM
almulaomar almulaomar
تاريخ التسجيل: 07-08-2002
مجموع المشاركات: 6485
يقولون أن الكضب أنواع أخطرها اليمين الكاذبة ثم شهادة الزور فخلف الوعد وأخيراً الكذب الساخر وكلها شر. وما يعنينا هنا هو الكذب الساخر أو إزعاج السلطات وهو بلا شك ضرب من ضروب الكذب كأن تتصل بالمطافي وتقول ليهم يا ناس المطافي ألحقو حريقة يقوم الرقيب بتاع المطافي وبي بطن طامه بعد ما التلفون يرن أكثر من مرة يقول ليك ألو تقول ليهو المطافي يقول لا نادي الموردة بعد مساخه وقرف يقوم يفتح ليهو دفتر ويفتش القلم ويكورك للعسكري وإنت بتسمع في السماعة يا عباس شفت القلم حقي يا أخي شوف لي أى قلم أسجل بيهو البلاغ ده وبعد فترة من الزمن يقول ليك قلت لي الحريقة وين يا أخينا تقول ليهو في قلبي يا رقيب أركان حرب مطافي ، يا أخي إن شاء الله تحرق في الكوتشينه وتحرق بنطلونك وقميصك وتتحرق لمبة المطبخ بتاعكم ده كان عندكم مطبخ دي حريقه ولا عزومة غدا حا تنتظرك يعني دي نار يا سيادتك يعني لمن بس ناديت على عباس كانت النار قد أتت على كافة أنواع الأثاث قال 911 . أها ده نوع خطير من الإشاعة لأنو بتعلق بالسلطات وإزعاجها لكين ناس الحلة عادي والمواطنين يعني يجيك سيد الجردقه والحرجل ينادي على بضاعته في عز الحر ونص النهار وما في أى مانع يتبعه بتاع البتيخ وبتاع الترمس وبتاع الطلح والشاف والما شاف وكل أولئك يسببون إزعجاجاً للمواطن المغلوب على أمره لكين برضو بيقولو ليك دي حقيقة وما إشاعة يعني محمود الكضاب قال هجم النمر وما كان في أى نمر ولا مرتزقه يعني نظام ضحكت عليكم لكين لمن بتاع الجردقه يكورك مناديا على سلعته وما أن تخرج من با بيتكم إلا وتشوف جمل الجردقه الما بغباك ماشي يعني حقيقة هنا وإن كانت مؤلمة.
(عدل بواسطة almulaomar on 05-03-2006, 03:41 AM) (عدل بواسطة almulaomar on 05-03-2006, 05:34 AM)
05-03-2006, 07:46 AM
humida humida
تاريخ التسجيل: 11-06-2003
مجموع المشاركات: 9806
نقطة نظام .. او( نقطة وسطر جديد ) .. للجميع ( قراء ومتداخلين ) .. لكل ( بني آدم ) حق النظر .. النظرة الاولى ( ليك ) والتانية ( عليك ) .. في الاولى .. برضو ليك حق ( النظر من اي زواية ) .. منفرجة .. ولا حادة او حتي ( مقعرة ) .. لك أن تُلبس الاشياء بما يتفق و حدود ( فهمك ) .. لكل شخص يقرأ هذا ( البوست ) .. شخصية ( عالقة في الذهن ) .. يمكن أن يلبسها شخصية ( محمود الكضاب ) .. بشرط أن تتمتع هذا الشخصية بالحد الأدني لـ( مواصفات المحاميد ) .. لا شئ يأتي من ( فراغ ) .. والبوست عبارة عن ( قطعة قماش ) يمكنك تفصيلها علي ( مقاس ) من تشاء .. بدون أدني مسئولية قانونية علي ( كاتب البوست ) .. فمن يعتقد اني اقصد فلان او علان .. يجب أولا ان يرى اذا كان هذا ( الفلان أو العلان ) يتمتع بالحد الأدني للشروط الواردة في كراسة المواصفات .. اذا اجتاز المعاينة ( يبقى انا قاصده ) .. اذا لم يجتاز ( يبقى كلامك فارغ وانت زول ما عندك موضوع بس داير تعمل زلزال ) ..
05-03-2006, 08:23 AM
humida humida
تاريخ التسجيل: 11-06-2003
مجموع المشاركات: 9806
وانا عمي ( جميس لاست ) .. يعني هسع دايرة توريني انه بيتكم ( عمارة ) .. ولا افهم شنو انا .. دا نوع من ( الكضب الايحائي ) .. تلاقي الزول .. تمسك بطنك .. تقول ليهو ( الاسكلوب باني ) دا .. ما بنفع معاي .. ولا تربط رجلك بـ( فاول ) .. وتجي تقول للناس وقعت من ( سلم الطيارة ) .. الشنطة ( عترت ) لي ..!! وهكذا ..
Quote: وانا اطلقت علي نفسي العجاج درءا للعين....
دا مثال للـ( الكضب الدُراب ) .. قريب من ناس ( لاقيت ليك الاسد وقعت بيهو واطة ) .. وينتشر في عموم ( الجامعات والمعاهد العليا السودانية وحلة ناس رباب والمربوع تمنية واربعين أركويت ) ..!!
05-04-2006, 03:02 PM
humida humida
تاريخ التسجيل: 11-06-2003
مجموع المشاركات: 9806
للعالم .. يوم للإحتفال بـ( الكضب ) .. او ما يعرف ( استعباطاً ) بـ( كذبة أبريل ) .. والمثل المسرحي بيقول ( الحياة مسرح كبير وكلنا ممثلين ) .. يعني .. كلنا ( كضابين ) علي حد زعم ( المثل المسرحي ) .. في الصحافة السودانية .. يدور الجدل دوما .. منو ( الأكضب ) من التاني .. اصحاب الأعمدة ( السياسية ) .. ام أصحاب الأعمدة ( الرياضية ) .. ( الهلالاب ) قالوا .. الكضب نوعين .. الكضبة ( البيضا ) .. وهي الكضبة الما بتسبب اذى .. والكضبة ( الحمرا ) .. لون ( المريخ ) لأن ( المريخ ) ما هو ألا ( كذبة كبرى ) .. !! وبرضو علي حد زعم ( الهلالاب ) .. يقول أنيس منصور " إذا قالت المرأة انها صادقة فهذه كذبة كبرى " .. المكياج .. كضب .. المشاعر العاطفية ( الزمن دا ) .. كضب .. يعني .. الواحدة تكون شغالة ( مولينكس ) تلتاشر سنة .. تلاقي ليها واحد ( طاقاهو صفيحة ) .. تقول ليهو أنت ( أول ) زول في حياتي .. الموبايل .. ( محفز جيد ) .. للكضب .. يعني ( برضو ) .. تكون مواعد واحد في ( السوق العربي ) .. وانت قاعد قدام دكان ( البرقاوي ) جنب بيتكم .. تقول ليهو .. ( انا في الكبري بس الزحمة شديدة ياخي ) .. طبعا في ناس ( حريفيين ) في الكضب .. يعني الواحد لو ما كضب عليك .. أنت زاتك ما بتتكيف .. ذي واحد قال ( لمرتو ) ماشي القضارف .. عرس ( صاحبي ) .. قعد تلاتة يوم .. ورجع ( متحنن )..!! وهكذا .. أما عن أصل ( كذبة أبريل ) .. او ( All Fools Day )
Quote: إن شهر إبريل (نيسان ) هو الشهر الرابع من السنة الإفرنجية وإبريل اسم مشتق من الأصل اللاتيني "ابريليس " APRILIS في التقويم الروماني القديم . وقد يكون مشتقا من الفعل الللاتيني " فتح " ARERIRE ...دلالة على ابتداء موسم الربيع ، وظهور البراعم وتفتح الأزهار . وكان شهر ابريل هو مبتدأ للسنة بدلا من شهر يناير (كانون الثاني ) في فرنسا . وفي عام 1654م أمر شارل التاسع ملك فرنسا بجعل أول السنة يناير بدل ابريل . وهناك تعليلات أخرى يعود بعضها إلى الإغريق لأن شهر ابريل يمثل مطلع الربيع فكان الرومان قد خصصوا اليوم الأول من شهر إبريل لاحتفالات "فينوس " وهي رمز الحب والجمال والمرح والضحك والسعادة عندهم . وقد كانت الأرامل والعذارى يجتمعن في روما وفي معبد فينوس ويكشفن لها عن عاهاتهم الجسمية والنفسية ، ويبتهلن إليها لتخفيها عن أنظار أزواجهن . وأما الأقوام الساكسونية فكانت تحتفل في هذا الشهر بعيد آلهتهم "ايستر " وهي إحدى آلهتهم القديمة وهو الإسم الذي يطلق عليه الآن عيد الفصح عند النصارى في اللغة الانجليزية . وبعد ما تقدم يظهر لنا ما لشهر ابريل من أهمية خاصة عند الاقوام الأوروبية في العصور القديمة . وأما الأصل التاريخي لكذبة إبريل فلم يعرف أصل هذه الكذبة على وجه التحديد وهناك آراء بذلك , فذكر بعضهم أنها نشأت مع احتفالات الربيع ، عند تعادل الليل والنهار في 21آذار (مارس ) . ويرى بعضهم أن هذه البدعة بدأت في فرنسا عام 1564م بعد فرض التقويم الجديد كما سبق ، إذ كان الشخص الذي يرفض بهذا التقويم الجديد يصبح في اليوم الأول من شهر ابريل ضحية لبعض الناس الذين كانوا يعرضونه لمواقف محرجة ، ويسخرون منه فيصبح محل سخرية للآخرين . ويرى بعضهم أن هذه البدعة تمتد إلى عصور قديمة واحتفالات وثنية . لارتباطها بتاريخ معين في بداية فصل الربيع ، إذ هي بقايا طقوس وثنية . ويقال أن الصيد في بعض البلاد يكون قليلاً في أول أيام الصيد في الغالب ، فكان هذا قاعدة لهذه الأكاذيب التي تختلق في أول شهر ابريل . يطلق الإنجليز على اليوم الأول من شهر ابريل اسم "يوم جميع المغفلين والحمقى : ALL FOOLS DAY لما يفعلونه من أكاذيب حيث قد يصدقهم من يسمع فيصبح ضحية لذلك فيسخرون منه . وأول كذبة ابريل ورد ذكرها في اللغة الإنجليزية في مجلة كانت تعرف بـ" مجلة دريك " DRAKES NEWSLETTERS ففي اليوم الثاني من ابريل عام 1698م ذكرت هذه المجلة أن عددا من الناس استلموا دعوة لمشاهدة عملية غسل الأسود في برج لندن في صباح اليوم الأول من شهر ابريل . ومن أشهر ما حدث في أوروبا في أول ابريل أن جريدة " ايفننج ستار " الانجليزية أعلنت في 31مارس (آذار ) سنة 1846أن غدا- أول ابريل - سيقام معرض حمير عام في غرفة الزراعة لمدينة اسلنجتون من البلاد الانجليزية فهرع الناس لمشاهدة تلك الحيوانات واحتشدوا احتشادا عظيمًـا , وظلوا ينتظرون ، فلما أعياهم الانتظار سألوا عن وقت عرض الحمير فلم يجدوا شيئـًا عن وقت عرض الحمير فلم يجدوا شيئا فعلموا أنهم أنما جاؤا يستعرضون أنفسهم فكأنهم هم الحمير .
05-07-2006, 08:10 AM
humida humida
تاريخ التسجيل: 11-06-2003
مجموع المشاركات: 9806
قالوا ودي في حد ذاتها كضبه لأن الذي قال سمع من فلان الذي نقل عن فلان وعن فلان أن فلانه سمعت فلانه تتحدث إلى راجلها فلان في حوش بيتهم الكائن وهي في طريق عودتها من الجزارة في شارع الظلط الرئيسي إلى حيث يكون مكان بيتها أبطأت الخطو لتسترق السمع مستغلة كثرة الحفر في الشارع وحالة كونها مسروفه عن آخرها بمياه البالوعات ذات الروائح التي لا تغباكم وقصر حيطة حوش المتحدثين وإرتفاع صوتيهما وعدم مرور ركشة أو بائع جائل ساعتئذ وسؤ حال سفنجتها التي تنتعلها ناهيك عن إنشغالها عنوة بترتيب توب الجارات خاصتها ولكن برغم أغترفت إثماً أكبر من مجرد الكذب فهي تتجسس في لغة السي آي إيه وتتحس أو تشمشر في لغات أخرى كثيرة دون لغات المخابرات. المهم قالوا أن حبل الكضب قصير لكنهم لم يحددوا لنا قياس الحبل بل تركوهو مبهما وفي رواية أخرى على الغارب فالقصير في قوم ربما يكون عملاقاً في أقوام غير قومه لذلك أدمنا مسك حبال الصبر برغم خشونتها لسؤ صناعتها وبخاصة الـ finishing وربما ينصلح حالها وتصبح أكثر نعومة ومتانة لو تم خصخصتها المهم برضو قالوا في شأن محمود أنه لم يكن يقصد إزعاج ناس الحلة بل أرد لهم أن يضحكوا وهم الذين أدمنوا الوجوم والعبس وصرة الوش صراراً لا تستطيع معه أبرع سخلة على الرضاعة ، فقد خطرت هذه الفكرة لمحمود بعد أن ملأ رئتيه هواء نقياً ورأي مدى المرح والسرور الذي عليه جميع بهيمة الأغنام وهي ترعي في ألفة ومحبة تتقاسم كل شئ دون تدخل أو ضغوط دولية أو محلية فقال ربما يكضب على القوم فيفرحوا وينعدل مزاجهم المعككن ولكن هيهات فباقي القصة المأسوية معروف لكم جميعاً. وقد يكون كضب محمود بهجوم النمر أو هجوم فريق الـ ..... العاصمي متساويان لا بل متعادلان وإن كان محمود في كضبه يمارس نوع من التجمل بينما فريق الـ ... يمثلنا في بطولة الكونكاكاف أو الكوكا كولا أو يصعد مباشرة للأدوار النهائية في بطولة الكيتي كولا
05-10-2006, 09:45 AM
ajaj ajaj
تاريخ التسجيل: 07-27-2002
مجموع المشاركات: 971
ما درسني .. ما قلنا ليك ( محمودة الكضابة ) .. ونعم دي صورتي .. لكن النسألك .. انتي كل ما تكتبي رد .. بترجعي للبروفايل ولا شنو .. وما فهمتها .. حكاية اصغر منك دي .. يعني انتي من مواليد .. السبيعينات .. طيب ياخي .. 82 .. اصغر منك .. ولا قصدك .. فوق 82 .. ما فهمتها والله ..
05-17-2006, 06:30 AM
ajaj ajaj
تاريخ التسجيل: 07-27-2002
مجموع المشاركات: 971
الكذب احجام واحد صغير والتاني كبير علي حسب مدمنين الكذب فمثلا تجي المانيا لتاخد اللجؤ وتزور كل معلوماتك ...وتجيب جرحة قديمة قدم بعناخي وتقول ناس الامن عملوها ليك ... وتبدأ تاكل من اموال الخدمة الاجتماعية اللامنها من ضرائب الناس التعبايين في الشغل دي كذبة صغيرة طيب الكبيرة كيف
علي فكرة: انا دفعة الفاروق درسنا سوا في السودان....ورجعت لبروفايلك مرتين.. زمان وبعد ما عدلتو
05-20-2006, 05:03 AM
ajaj ajaj
تاريخ التسجيل: 07-27-2002
مجموع المشاركات: 971
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
humida
Al-Shaygi
معتصم الطاهر
KOSTA
khaleel
طيفور
صلاح الدين عبدالله محمد
bayan
عمر الفاروق
يازولyazoalيازول
A.Razek Althalib
ابو جهينة
سيد محمد احمد سيدنا
JAD
بلدى يا حبوب
Sobajo
Ahmed Abdallah
فيصل محمد الطيب
ajaj
فيس بوك
تويتر
انستقرام
يوتيوب
بنتيريست