|
|
 سودانيز @ مطار أبوظبي الدولي دوت كوم !!!
|
جمعتكم مباركة إخوتي وأخواتي وكل أيام سعيدة إن شاء الله ,,,
السفر عند السودانيين له طقوس و شروط وأحكام قل أن تجدها لدى بقية الأجناس الأخرى التي فقدت حميمية العلاقات مع أهلها في الوطن الأم
يعني لا هدايا ,, لا مصاريف ,, لا وجع راس ,, أما نحن فبمجرد ما خطرت فكرة السفر على بالنا نشرع في التفكير في الهدايا من أول جار وإلى
آخر واحد ,, الشغالة ,, الخدام ,,’المكوجي قبل الأهل لأنهم أمانة في رقبتنا ثم الصديقات وصديقات الصديقات والأخوان وأصدقاء الأخوان ,
الأخوات وصديقات الأخوات .. الخالات , العمات , أولاد وبنات الخالات والعمات والأعمام وأبناءهم وجميع من يسأل عنا في حضورنا وغيابنا
وطبعا ما حننسى موظفي المطار ,,’ الحمالين ,, سواقين التكاسي والبكاسي ومن لفهم لفهم ,, باختصار شديد السفر عندنا مسرحية تبدأ فصولها
من نهاية الإجازة الفاتت وحنى الإجازة الجاية لهذا يحتاج كل فصل من فصول هذه المسرحية إلى بوست قائم بذاته عليه سنبدأ الفصل الأول
بمطار أبوظبي الدولي دوت كوم وطبعا إنتو عارفين إنه مطار الهنا والمنا لكن نحنا بي هكرنا وكرورنا خليناه زي محطة العشش يعلم الله ويشهد .
المشهد الأول :
مودعين ومودعات داخل منزل إحدى العوائل المسافرة في السادسة من صباح الغد , ناس شايلين وصايا وناس شايلين هدايا .. ناس داخلة
وناس مارقة والمسافرين من كترة الجري في الأسواق عينهم طالعة لكن ما قادرين يقولو حاجة عشان ما يكشفوا حالهم قبل ما تقلع الطيارة
يعني مقطعنه في حشاهم وساكتين ,, أقتربت الساعة من منتصف الليل والمودعين وأطفالهم المزعجين ما زال الليل طفل يحبو بالنسبة لهم
إضطرت صاحبة البيت إلى الدخول في المطبخ لعمل العشاء وكان ابنها الصغير ( سنتين ) يمسك بطرف ثوبها باكيا لأنه يريد النوم أما أبو نلات
سنوات فقاعد يتنطط مع أطفال المودعين بينما أبو أربعة وخمسةوستة وسبعة وتمنية سنة قاعدين يلعبوا بلاي استيشن والسفر كان آخر همهم .
فتحت ست البيت علب الفول وبحثث في خزانة المطبخ على كل ما تبقى لديها من مربى وحمص و غيره وما وجدته في البراد ( التلاجة )
من فلافل مجمدة , وبيض , وهوت دوغ, وهمبرجر , وجكن فليه علها تسد رمق الأفواه والأرانب سواء كانوا من الزوار أو الأبناء
الذين أنجبتهم واحدا تلو الآخر دون أن تعمل حساب لتذاكر السفر ومصاريف المدارس وبطاقات التأمين الصحي من منطلق الله ما شق حنكا
ضيعه !!
إنتهى العشا بي خيره وشره ,, طبعا ست البيت وزوجها من كتر الدوشة ما عرفو العشا دخل بي وين ومرق بي وين المهم المودعين
السغلا ديل يمشوا يخلوها تعمل سشوار لشعرها وتقعد نص ساعة في الحفرة تثبت حنتها وترصرص هدومها وتمم على دهبها الأصلي
والفالصو لزوم البوبار والكشخة ولزوم الاستعراض في المطار الدولي والمطار التاني داك السموه مجازا دولي وطبعا كل واحد حر
في مطاره يسميه زي ما عايز في حد دافع حاجة من جيبه ؟ والطيارة الماعايزة تنزل عندنا عامالات ناس الخليج بالطقاق عنها ما
نزلت , مطارنا ونحن حرين فيه ,, عاجبنا ومالي عينا وحتى سوداتيل عملت الانترنت مجان التقول بس هو الكان ناقصنا ؟
المودعين السغلا مرقوا بعدما أدوا الهدايا والوصايا وطبعا مافي واحد دفع حق وزنه عشان كدة سيد البيت كان بودع فيهم وشايفهم
عشرة عشرة عشان الوزن من كان بي عشرة درهم للكيلو بقى بي قدرة قادر 27 درهم ومن غير ولا كلمة ونحن الوحيدين طبعا
البندق الجرسة في المطار ونوقف الكاونترات على رجل واحدة ونحلف ونجزم أنه ما معانا ولا فلس في الوقت اللي بنكون فيه عارفين
كل شيء ,, عارفين أكتر ناس لؤماء في الوزن بختوهم للسودانية الله يطراها بالخير ,, حتى الحمالين بيشيلو هم يوم سفرنا بمشوا
يعملوا لياقة بدنية عشان ينزلو الشنط والهكر ولسان حالهم يقول ( عجبي ) زي ما بتقول بت حسن عباس صبحي وحالتها ما شافت
العجب العجاب في مطار أبوظبي الدولي , أنا بتخيل لي لو سلمى شافت البحصل بي عينها كان سحبت البوست داك وكتبت واحد تاني
سمته الرماد كال حماد .
عموما في قضيتين للمناقشة الأولى هل يجوز تحديد النسل في ظل الظروف الراهنة حيث الغلاء الفاحش وصعوبة التربية في بلد المهجر ؟
السؤال التاني : إلى متى نحمل كل هذا الكم من الهدايا والهكر وكل شيء في السودان متوفر وكيف نقنع الأهل بأن الأشياء نفسها موجودة
هناك بس بدل سعد قشرة هنا إسمه سوق نايف !!
إلى أن أجد إجابة على هذين السؤالين فتكم بعافية ...
خارج النص :
الليلة عندي شغل السواد والرماد عشان كدي خليكم قاعدين مع المسافرين لمن أرجع ليكم ما تقولو ختت الوصية حقتها لناس السفر وما دفعت
حق الوزن وزاغت , أنا أمك يا مجاهد بدي حق وزني قبل ما اسلم الوصية دة إذا أديت وصية وهذا أمر نادر جدا عشان المسافرين ما ناقصين
صدعة راس , وكمان أنا جربت الحكاية دي في روحي !!!
|
|
 
|
|
|
|
|
|
|
 Re: سودانيز @ مطار أبوظبي الدولي دوت كوم !!! (Re: عواطف ادريس اسماعيل)
|
| Quote: عموما في قضيتين للمناقشة الأولى هل يجوز تحديد النسل في ظل الظروف الراهنة حيث الغلاء الفاحش وصعوبة التربية في بلد المهجر ؟ |
يا عواطف ... هو الناس لسه ما حددت ؟
ما الخروج من الوطن بحد ذاته مجبر علي تحديد النسل ؟؟وبلاد المهجر والاغتراب(العربية مثلا ) لا توفر اشياء ضرورية بالمجان (صحة تعليم ..الخ) والذي لم تجبره مثل هذه الظروف علي ان يعي اهمية ان يحدد اشياء كثيرة في حياته منها نسله وصرفه العشوائي وحمله للهدايا وهو في حاجة لثمنها فالانسب له البقاء في الداخل .. فالنسل مسئولية عظيمة في الدنيا والاخرة ...
المرتين اللتين سافرت فيهما الي السودان وانا متزوج كان وزن امتعتنا اقل مما هو مسموح وكنا نحمل بعض هدايا متاحة ..ولم يلومنا احد باننا قصرنا او لم نذهب اليه بهدية وانا متاكد بانني لست الوحيد في هذا الشان فتعود السودانيين علي السفر وما يرونه من مشاق واختلاطهم باجناس اخري غير التي مثلنا -تحمل الهدايا عياقة- جعلت معظهم يعي ذلك .. ومؤخر لاحظت ما هو اسوء وهو حضور اسر ممن تيسرت امورهم المادية في الداخل -لسبب او اخر دون الغالب الاعم- فقط لتحمل اطنانا من الاشياء ومن كل المراكز التجارية والمعارض ووووو والمنظر في طاولة الدرجة الاولي او رجال الاعمال لطيران الامارات مثلا يوم سفر مثل هذه الاسر صار عجيبا...كل هذه الاسر تاتي وهي تعرف اسماء كل المحال التجارية وما لديها وتقضي وقتها واطفالهم معهم في هذه المحال يشترون فقط ....من اين ياتي هؤلاء بالمال وفي الداخل هو المهم؟؟؟ فالداخل اهله الغالب الاعم ممن يكتفون بوجبة في اليوم ويموتون علي ابواب المستشفيات من قلة الرعاية والعلاج لانهم لا يمكلكون ثمن ذلك ....
هؤلاء المغتربون الذين يفعلون كما شاهدتي اجلا او عاجلا ستضطرهم حالة الغلاء في المهجر علي التوقف من السفر كما لاحظنا في بعض الاجناس العربية والاسيوية في العاميين الماضيين الذيين قضو اجازاتهم عملا او هنا فقط وكثيرين منهم بعثو باسرهم لتستقر في بلادهم وهم يبقون هنا للعمل فقط ....اما من في الداخل الذين تيسرت امورهم واكثرو من التبذيير والمفاخرة وووو فهم المشكل ؟؟ اموال سودانية عند من لا يستحقها تصرف فيما لا يفيد ....
| |
|
|
|
|
|
|
|
|
 Re: سودانيز @ مطار أبوظبي الدولي دوت كوم !!! (Re: بابكر التوم)
|
بيبو !!!
سلامات ,,,
وتعظيم سلام لمداخلتك الرائعة التي زادت البوست ألقا ووهجا ,, فيما يتعلق بالضريبة التي دفعها
كل الأخوان والأخوات الكبار هذه لم يخل منها بيت واحد وأهلنا كانو معذورين لعدم وجود موانع ولكن
هسا الناس مالها وشايفة الحاصل بعينها ,, تصور الناس في دول الخليج اليوم ليسوا بأحسن حالا منهم
في السودان لأن الغلا خيم كالشبح في كل مناحي الحيا ومعظم الأبناء دخلوا الجامعات وطبعا أقل جامعة
بخمسين ألف درهم فما فوق فتصور كيف يكون الحال لو واحد عنده أكتر من تلاتة ؟ ولو مشوا السودان
بالعملة الصعبة أو جامعة خاصة بنفس أسعار جامعات الخارج ,, عموما ربنا يعين ؟؟ شكرا عزيزي
على هذه الطلة البهية ..
| |
|
|
|
|
|
|
|
|
 Re: سودانيز @ مطار أبوظبي الدولي دوت كوم !!! (Re: Sayed Bekab)
|
سيد !!!
أولا سعيدة جدا بمرورك من هنا ربنا يسعدك ,,,
هو أنت يا بعد عمري حتتكلم على أيه ولا على أيه ؟؟
حكاية احترام الكيو أو الطابور دي ثقافة لم تصل إلينا بعد أما اللماضة والكلام الفارغ فدي ماخدين
فيها ماجستير يعني لو جيت تنصح واحد عشان يحترم أي موقف يقول ليك إنت الحشرك شنو ؟ هسة في زول
سألك ؟ ولا في زول احتج من الناس الواقفين ديل ؟ أما فيما يتعلق بتأخير الطيارة وحكاية زول يشيلك
حاجة إنت ما عارفهاشنو فدي حكاية تانية خالص عايزة بوست تاني وبرضه نقول نحنا الكي ونحنا السي ؟؟
معليش ممكن نقول نحنا الكلفة مرفوعة وبس بدون ونحنا حلفت مدفوعة دة كان زمان زي ما بتقول أم كلثوم
شكرا سيد أبق معنا ,,
| |
|
|
|
|
|
|
|
|
 Re: سودانيز @ مطار أبوظبي الدولي دوت كوم !!! (Re: abubakr)
|
ود سيد أحمد !!!
كيفك يا سيد الكل ,,,
طبعا إنت إنسان راقي جدا وهذا ليس من باب المجاملة والله كل السودانيين بفتخروا بيك كنموذج رائع
للمغتربين على الصعيدين المهني والاجتماعي وجميل جدا إنك قدرت تتخلى عن عادة خم الهدايا أنا صراحة
لحدي هسة قاعدة أحاول آخد الضروريات فقط ومع ذلك بحس وزني بزيد شوية عن المفروض بعض الأحيان أما
ظاهرة حضور السودانيين من السودان للشوبنج دي فعلا ظاهرة عجيبة وغريبة والأغرب منها ظاهرة البنات
البجن يشترن شيلتن بألاف الدراهم بينما هناك من لايجد ما يسد الرمق ,, طبعا في الآونة الأخيرة ظهرت
طبقات من الأثرياء وهم إما أثرياء حرب أو أثرياء زمن الغفلة لذلك تجدهم يبعذقون فلوسهم عمال
على بطال أما حكاية تحديد النسل فدي يا بيبو حكايتها عجيبة بااله حوال تمشي مستشفى الكورنيش
كله سنة مرة تلقى نفس السيدات السودانيات رغم الغلاء الفاحش الذي عصف بآمال المغتربين عموما
شكرا على المداخلة الجميلة ,,,
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: عواطف ادريس اسماعيل)
|
طبعا ياعطوف اتنى بتتكلمى عن خبرة
وانا بتكلم كشاهد وعندى الدليل حاجاتك الخليتها عندى علشان تشيلى الوصايا
والله انتى لوشفتى البيحصل عندنا هنا وتحديدا فى سفرية السودان وخاصه ايام المرحومه السودانية والله هيثرو ده بيقيف
على رجل واحدة ابتداء من ناس النظام مرورا باالامن وحركه الطيران المهم انا ماعارفه مسميات الاقسام العندها علاقه بالموضوع
البعروفو اننا بنوقف الانجليز على فد كراع المسافريين والشيل المبالغ فيه وعدم الاقتناع بانو الوزن زيادة وياريتو لو كان
خمسه ولاسته ولاحتى عشرة كيلو شويه بيكون معقوله لكن والله العظيم بعض منهم الزيادة بتكون اكتر من ميه كيلو والغريبه بيكونو
هم بيكونو عارفين ويقولو ليك الله الليله بس يمرقنا الوزن حقنا كتير خلاص الله بس يعميهم منناانا ماقدرت اتخيل بس كيف ربنا يعميهم
من شنط قدر الليله وبعد بكرة ولازم لازم تمر بالميزان والاغرب من كده انهم كمان بيكونو ماعايزيين يشحنو اويدفعو للزيادة اها بعد
تعالى شوفى الحنيس بدون كلل او ملل ولاعندهم شغله بصف المسافريين النتظريين و البيكونو هم زاتم عمالين نفس العمله ان كان مااسوء منها مااقل منها
وبعد المعركه دى كلها وفى اغلب الاحيان السودانيه بتخفض ليهم شى وهم يرجعو شى لكن نظام دفع مافى اصلو وبعد التعب ده كلو تبتدى
المرحله التانيه وهى عدم وصول الطيارة وبعد يبد مسلسل اختفاء المسؤل عن الخطوط وده براهو عايز ليهو بوست منفصل ، ولو وصلت بتتعطل المهم فى كل الحالات الوضع كلو بيكون متناثق مع بعض المسافرين مع الشركه المرحله جد ربنا شاف ولمه
تســلمى يارب...
بيناتنا اتصال بعدين عايزاك ضرورى ....
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: ماجدة عوض خوجلى)
|
ماجي !!!
كم أنا سعيدة بك ياتوأم الروح ,,و
طبعا إنت ما عارفة الحصل شنو بعد ما خليت حاجاتي عندك ومشيت المطار , الوزن يا بعد عمري زاد حكاية
30 كيلو لأنه الوصايا كلها من النوع التقيل الوزن قليل السعر يعني shower jell , whiting cream
hair food , hair relaxer وما شابه ذلك لكن أضربي كله عشرة وصايا في تلاتة باوند ناينتي ناين
وشوفي حيطلعوا كم ؟ تصوري الشنطة طلعت 55 كيلو والمفروض 30 قالو لي لازم تنقصي 20 كيلو في شنطة
تانية , مشيت إشتريت شنطة ولا عليك بيها من سوق المطار بمبلغ وقدره وجيت حامدة وشاكرة عشان أدفع
150 باوند على الوزن الزايد لكن الهندي ابن الحلال مشاهم لي لأني ما اتحاججت معاه لما قال لي نقصي
الشنطة جريت جريرغم إني خسرت مكاني في الكيو اللي كنت واقفة فيه أكتر من ساعة والله يا ماجي اليوم
داك كرهت ليك كل ناس الوصايا عموما أنا مشتاقة وبي لوعة ولكن مثلي لايذاع له سر ,, شكرا على
مداخلتك الحلوة زي روحك ,, سأتصل بك اليوم إن شاء الله .
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: عواطف ادريس اسماعيل)
|
الأستاذة عواطف تحياتي وتقديري
وصف دقيق لحالة مرت علينا كثيرا إبتداءا من يوم الوداع وفلم العشاء وانتهاءا بالوزن
لابد من تغيير الكثير من الاشياء التي اعتدنا عليها ومنها موضوع الهدايا
الموضوع المهم جدا في هذه القطعة الفنية هو مسالة تحديد النسل
وانا من اشد المقتنعين بها لان المجهود والاهتمام الذي تبذله
لطفلين سيكون بلاشك أفضل واكبر اثر من ان يتوزع جهدك ومالك وفكرك علي 6 مثلا
بالاضافة لاستمتاعك بالحياة وتفرغك لاشياء اخرى بدلا عن ان تكد وتشقى العمر كله وانت مشغول بتربية بلتون اطفال ...
اتمنى ان اسمع اراء الناس في هذه النقطة
لك خالص التحايا والتقدير
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: عواطف ادريس اسماعيل)
|
عواطف ياختي
من شب علي شئ شاب عليه
وكمان كيف يعني ترجع من السفر اباطك والنجم
وكمان تشتري لي من سعد قشره ليه قالوا ليك انا محتاج ليك
انا بس كنت عائز حاجات ابوظبي لانها اصليه وكويسه وكده
وعدم اهتمام منك يعني تجيني بايديك كدي
ايد ورا وايد قدام حرام عليك
انا اختك ومشيتها ليك اها اقول لاولادي شنو
ديل منتظرنك ليهم كم زمن
يااخ والله بالغت
ولا يكون راجلك منعك "للمراه" انا عارفاه ما بريدنا
ويستمر النواح والغضب
بصراحه انا وزني دائما زائد شويه
وناس الخطوط مديننا فرصه
وناس الجمارك هنا اصحابنا
يعني بنكون شايلين حاجات ما مستاهله
يلا من يغير فهمي وفهمكم
وروني وراجع ليكم
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: sama7)
|
الاستاذة عواطف ..
هسه انا فرحت قلت تكوني وصلت مطار الخرطوم ... وما عافي ليك لو جيت السودان وما اديتني خبر ..
طبعا السرد ممتع وغاص في تفاصيل التفاصيل .. وطبعا عجبتني قصة الذهب الفالصو الذي انتشر وسط زوجات المغتربين وخصوصا (الامارات ) رغم توفر (الاصلي ) بكثرة هناك ..
ولدي قصة مشابهة ..لكنها سفرة عكسية .. من مطارنا ( الدولي ) حيث كنت مسافراً الى جدة قبيل رمضان وحضر احد اصدقائي الى المطار واندهشت عندما وجدته واستبعدت تماما ان يكون حضر لوداعي وظننته حضر لوداع شخص آخر الا انه أكد لي انه حضر للمطار من اجلي ولم تدم فرحتي طويلاً باهتمامه المفاجئ بي بعد أن اشار الى ( كرتونة ) ضخمة طلب مني ايصالها الى شقيقه في جدة وفي البيت كمان لان شقيقه لن يستطيع ان يقابلني في المطار لارتباطه بالعمل وقت هبوط الطائرة .. و( متعودة دايما ) دفعت الوزن الزائد جداً .. وفي جدة اندلقت احدى ( برطمانيات ) الفسيخ داخل الكرتونة ولسوء حظي لم يكن مطبوخاً وفاحت الروائح واصبحت محط أنظار رفقائي الركاب والبنقالا ثم عساكر المطار السعوديين وايامها كانت عمليات الارهابيين تنشط في السعودية وحجزت والكرتونة لساعات قبل ان يفرج عني دونها بعد تفتيش محتوياتها بدقة والتي احتوت بالتأكيد على ( بودرة ) الويكة وانواع أخرى من البهارات .. وطلبوا مني العودة لاحقاً لاستلامها ولم أعد ... واتصلت بشقيق صديقي وقلت له ان لديه كرتونة مرسلة له وتم حجزها في المطار واعتذرت له عن عدم عودتي لاحضارها مع وعد باحضارها حال فراغي من بعض المشغوليات .. فما كان منه الا ان طلب مني عدم العودة وقال لي ان والدته ارسلت له كرتونة مشابهة قبل حضوري بايام ووعدته بأخرى في منتصف رمضان غير التي اتت معي ( اتخيلي !!)
الطرود العكسية .. اضافة للنقاش ايضاً ..
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: معتصم محمد صالح)
|
واحد أخونا مسافر الخرطوم يعلم دائماً أني لا أحمل وزن .. وكلما أجي مسافر يحملني ما ثقل وزنه وتدنى سعره لأم الأولاد وهو عندو سبعة من الذرية ويحملني ولو على سبيل المغسة دون دفع الوزن الزايد وكأن الطيارة بتاعت ابوي .. يوم صاحبنا جا مسافر قلت للزملا أنا حأديهو درس وقلت ليهو عندي شنطة هاند باك تشيلهالي وطبعاً ما قدر يتهرب ولا يجد أي عذر لأني صاحب دين وجمايل من نفس الصنيع.. المهم جبت شنطة هاندباق قديمة وشكلها معفن وختيت فيها طوب ووزنها الله يعلم بيهو .. ما أن رفعها حتى صاح بأعلى صوت قدام الزملا قائلاً :كمان وسخة ومعفنة يا أخوانا تعالوا فكونا من لوكربي دي دي براها (30) كيلو.. وكمان شايفو مطنش ما عاوز يدفع حق الوزن؟!!.. تخيلي أنا رحلت ليهو أكتر من 200 كيلو في رحلات مختلفة وما دفع ولا مليموعاوزني أدفع ليهو حق وزن أول شحنة.. قالوا واحد جا مسافر وأهل الحي جوا يودعوه وكل واحد يوصيهو يقول ليهو بالله جيب لي زمارة( صُفارة) لي ولدي.. والراجل يقول لي كل واحد منهم انشاءالله حدي ما جا واحد أداهو خمسة قروش وقال ليهو بالله تشتري لي زمارة لي ولدي .. المسافر ضحك قدام المودعين وقال للراجل : والله العظيم إنت ولدك الوحيد الحيزمر!!.. تحياتي
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: ابوبكر يوسف إبراهيم)
|
الاستاذة الفاضلة
عواطف
| Quote: عموما في قضيتين للمناقشة الأولى هل يجوز تحديد النسل في ظل الظروف الراهنة حيث الغلاء الفاحش وصعوبة التربية في بلد المهجر ؟ |
واحد صاحبى قال عاوز يزيد العدد فى البيت اصلوا عندو اولاد
عزابه ساى ...
وبعدين الولادة بقت بى مبلغ وقدرة
دخلت ضم الضرائب السودانية
والهدايا الفارغة
عشان كدا الواحد لازم يفكر ! الولادة بيكم ؟ السماية بيكم ؟
ودا كووم وملابس الطفل (دوت كوم) ..
مبروك يا عرسان الغفله فى الزمن الاغبر دا ..
تحديد نسل ياعواطف ...
ودمتم
| |
|
|
|
|
|
|
|
|
 Re: سودانيز @ مطار أبوظبي الدولي دوت كوم !!! (Re: عيدروس حجر)
|
عيدروس !!!
والله زمان ,, وينك يا ريال ؟؟؟
عارف في ناس من شدة ما بتبدع السماية في فندق خمسة نجوم وبي فنان من السودان كمان طبعا نحنا
كله شي عندنا أشتر وكمان تلقى واحدة شغال في وظيفة ما عليك بيها وكله حول بي زول ولمن تروح
السكرة وتجي الفكرة تعال شوف الجرسة .. عندنا واحد صاحبنا كان ساكي الولد لمن عملهم عشرة
بنات وحالتو متعلم ومثقف تقول لي تحديد ؟؟
أيني هاو ثانكيو !!
| |
|
|
|
|
|
|
|
|
 Re: سودانيز @ مطار أبوظبي الدولي دوت كوم !!! (Re: ابوبكر يوسف إبراهيم)
|
بكري !!!
أماني ما ضحكتني ,, والله قصة عجيبة !! تصور زي صاحبك أبو شنط دة في مليون واحد يشيلوك حاجات ما
أنزل الله بها من سلطان وما يدوك ولا مليم ولمن تجي تديهم يدقوا الجرسة بلا خجلة بس نعمل ايه من زي
ديلة وأسفاي ,,,
شكرا لمداخلتك الطيبة ,, اسعدتني ربنا يسعدك دنيا وأخرى ويديك الصحة والعافية قادر يا كريم يارب .
| |
|
|
|
|
|
|
|
|
 Re: سودانيز @ مطار أبوظبي الدولي دوت كوم !!! (Re: معتصم محمد صالح)
|
عصومي !!!
صباحك سعيد ,,,
ياريتني كنت في مطار الخرطوم المادولي والله كنت كلمتكم كلك لكن أسوي شنو قدر ما طلبت إجازة رغم
الرصيد العندي المدير الله يسامحه حلف ستين إنه ما فيش إجازات شفت دة لو عليه نشتغل الجمعة ذاتها
بمناسبة الفسيخ والجبنة البيضاء أيام سبتمبر إليفن ديك واحدة سودانية في مطار هيثرو الكلاب
البوليسية نبحت وسبحت في كرتونتها لأنها شيالة العجب نوع فسيخ وويكة وجبنة مضفورة قاموا صادروهم
منها قربت تبكي أمبارح جارتي مشت لأولادها في استراليا بدرسوا هناك كانت شيلة شرموط ووبصلة محمرة
والذي منه غايتو صادروا منها الشرموط وخلو ليها الباقي وأه يا سودانيز في المطارات الدولية !!
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: sama7)
|
سماح !!!
ياحلوة يا ست البنات ,,,
سلامات ,,,
ياختي وكت أتطورو كدي ما يكلمونا عشان نفقل بند الهدايا وبعدين لمن الواحد يمشي أيد ورا وأيد
قدام على قولة المسلمي بزعلوا مالم وكت التطوير حصل والله يا سموحة توكني إنت براكي المتطورة
وسابقة عصرك ,, طيارتنا على قولة المصري دي ستهم تجي على كيفها وتمشي على كيفها تئبر ألبي !!!
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: عواطف ادريس اسماعيل)
|
الأستاذة / عواطف
تحية واحتراما
بوست في غاية الروعة والحبكة الأدبية الناقلة لمشاهدة حية (اكثر من الواقع ) وبخاصة في تصوير حال سيد البيت .
دائماً ارفض الذهاب مع زوجتي لوداع احد الأهل أو الأصدقاء في اليوم السابق للسفر (في الغالب الأعم) فلا ابرئ نفسي .
علشان كدا عملو لينا مطار برانا في ابوظبي .
وحتى في المطار الأصلي عملو للسودانيين المسافرين على الخطوط الثانية كاونتر براهم .
الموضوع ده داير دراسة اجتماعية وتوعية تصل الكل في البيوت بشرط ما تكون في يوم السفر لأنو الكلام حا يبقى ذي العشاء بالنسبة للراجل والمرأه .
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: محمد الواثق)
|
الأخت عواطف ..
والله صورة طبق الاصل فى أى مكان .. الحمد لله نحنا هنا ما بنسافر الا كل 5 - 7 سنوات .. ونسوانا كانوا قادننا بالملايات الكانو ...كل واحدة دائرة تشيل ليها ديشيليون دستة. الحمد لله الملايات ذاتها انعدمت لأنى أنا فى سنة 2003 وعندما بلغلت الطائرة أعلى ارتفاع لها دعوت الله سبحانه وتعالى أن يقفل مصانع الملايات فى امريكا الى الابد ...
Quote: الأخت عواطف تحية طيبة, عن تجربتي مع الوصايات, لا احمل غير أدوية او مايتعلق بالعلاج - وأموال بشرط ان تكون الأموال مصاريف فقط.
أنور أحمد |
أخى أنور كيفك ...
كلامك صح بدليل ال 15 ألف دولار المصاريف الرسلتها معاى فى نوفمير ..
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: Mamoun Zain)
|
عطوفي
اخوك قال يعمل تفتيحة ويسافر الاجازة بحقيبة يد بس ويمشى يشتري حاجيات الاهل والاولاد في الخرطوم .
شفتي لبست ليك سمح واتعطرت سمح ومشيت سمح والحقيبة جواها اللابتوب بس ويلا جيت الكاونتر بتاع الطيران ما عندى وزن . شفت يا عواطف شايف واحدة سودانية بتعاين لي ساااااااااااى من بعيد فرحت قلت حبتني . انقري كانت بتعاين ليش ؟
سريييييييييييييييع ردك
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: Mamoun Zain)
|
أستاذ مامون تحية طيبة,
Quote: الحمد لله الملايات ذاتها انعدمت لأنى أنا فى سنة 2003 وعندما بلغلت الطائرة أعلى ارتفاع لها دعوت الله سبحانه وتعالى أن يقفل مصانع الملايات فى امريكا الى الابد ...
|
وانا اقول مصانع الملايات توقفت ليه، غايتو شيل شيلتك مع نساء رتشموند
بعدين انت داير تبلعني كلامي داك  ، وكمان 15 ألف دولار، اسمع ما تخليني اصدق واقول ليك اعطيتها لمنو !
تعرفي ياعواطف تجربتي مع الوصايات تعلمتها من أستاذ مامون,
وياعواطف اعتقد هنالك صديق قاسم مشترك بيننا، وهو أكرم محمد صالح، يبلغك عاطر التحايا.
أنور أحمد
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: Anwar Ahmed)
|
شال النوار ظلل بوستنا يا أنور !!!
والله مامون دة شكله تفتيحة ,, هسة بدعوة واحدة قرض الملايات أعمل حسابك منو بكرة بقرض العملة
الصعبة كمان عموما تحياتي لصاحبك الظريف أكرم ولو عندك أي وصية من هنا ما عندك مشكلة إنشاء الله
دهب رغم إنو الأيام دي طار السماء ..
شكرا أنور على الطلة الجميلة ..
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: Mamoun Zain)
|
مامون !!!
تحية ومعزة ,,,
أتاريك إنت الدعيت على الملايات وخلصتنا منها ؟ تصدق في السودان الوصايا دائما الملايا الأمريكية
الأصلية وهي طبعا غالية نار ومع ذلك يطلبوها زي ما بطلبوا دلوقت النوكيا ووما شابه ذلك يعني
لو قلت ليهم السوني أريكسون كويس يقولو ليك لا بس نوكيا وكمان يحددو ليك النوعية ودايما بتكون
آخر موديل , وعجبي !!!
بالله أنور رسل معكاك 15 ألف دولار مصاريف أها زي ديل هم البجيبو لينا الجلا ( وش ضاحك ) ,,
شكرا مامون أبق معنا ..
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: محمد الواثق)
|
أخي العزيز الواثق !!!
منور البوست ,,,
شكرا على كلامك الأنيق والتوعية مهمة جدا ,, عارف في ناس بقت تدي تاريخ غلط عشان حكاية الوداع دي
يعني لو ومسافرين السبت يقولو قايمين الخميس عليك الله في داعي لي جنس د’ ؟
التوعية مطلوبة في عدة مناحي ,, يعني الواحد ما عارف يوعي شنو ويخلي منو ؟
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: عواطف ادريس اسماعيل)
|
عطوفة سلام كثير وأشواق بعد طول غياب من بوستاتك الظريفة
لكن يا عطوفة هناك الجزء الآخر من الصورة...
أديك عينة بسيطة..
أتيت السودان في مهمة عمل منها يومين في بورتسوان
ونأهبت للعودة.. فوجدت كرتونة كبيرة وكرتونة أصغر
تتصوري ماذا تحتويان؟؟؟؟
الكبيرة فيها شاف وطلح لبنت المرسلة
والصغيرة للبنت الثانية فيها فسيخ لزوم الوحم!!!!
دي مش عجبي..بس..دي عجبي ووجعي..
| |
|
|
|
|
|
|
|
|
 Re: سودانيز @ مطار أبوظبي الدولي دوت كوم !!! (Re: Kamal Karrar)
|
كيمو !!!
رجل والرجال قليل ,,,
طوب الأرض خليها تشتكي لحجر الأرض حتى المهم إنك ما شلتها تصور الكراتين دي بتعمل فضيحة كبيرة جدا
لما تتفتح قدام الناس وتخلي الما يشتري يتفرج !! مرة في واحدة أمها شيلتني ليها سمك مجمد في
هاند باك وتعال شوف لما وصلت المطار والتلج ساح ,, الشنطة بتخر مية وأنا محتاسة أقول دي بتاعتي
ولا أطقع ليها وأمشي أسمع لي ستين كلمة فارغة من ست الشنطة المهم خليت بعد الناس كلها طلعت قمت
مشيت براحة وختفت الشنطة وجري على العربية وعجبي !!
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: عواطف ادريس اسماعيل)
|
الأستاذة عواطف
تحياتي
يعجبني أسلوبك في طرح مثل هذه الظواهر السالبة في محاولة لإيجاد الحل..
Quote: أقتربت الساعة من منتصف الليل والمودعين وأطفالهم المزعجين ما زال الليل طفل يحبو بالنسبة لهم
إضطرت صاحبة البيت إلى الدخول في المطبخ لعمل العشاء وكان ابنها الصغير ( سنتين ) يمسك بطرف ثوبها باكيا لأنه يريد النوم أما أبو نلات
سنوات فقاعد يتنطط مع أطفال المودعين بينما أبو أربعة وخمسةوستة وسبعة وتمنية سنة قاعدين يلعبوا بلاي استيشن والسفر كان آخر همهم .
فتحت ست البيت علب الفول وبحثث في خزانة المطبخ على كل ما تبقى لديها من مربى وحمص و غيره وما وجدته في البراد ( التلاجة )
من فلافل مجمدة , وبيض , وهوت دوغ, وهمبرجر , وجكن فليه علها تسد رمق الأفواه والأرانب سواء كانوا من الزوار أو الأبناء
الذين أنجبتهم واحدا تلو الآخر دون أن تعمل حساب لتذاكر السفر ومصاريف المدارس وبطاقات التأمين الصحي من منطلق الله ما شق حنكا
ضيعه !!
إنتهى العشا بي خيره وشره , |
يعني دا واحد من المشاهد المزعجة جدا وإنت مستحيل تقدر تتحكم فيه بعكس موضوع الهدايا وشيل الوصايا... بس خليك زول حازم وجاد ودُغري وما تجامل وبعد شوية بتعودوا وما بزعلوا
ومع تحديد النسل
ولك الود
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: مهيرة)
|
د. مهيرة !!!
كيفك يا بت ملوك النيل ؟؟
أحسن حاجة عملتيها تغيير مواعيد السفر ,, لكن بعد مداخلتك دي ياهم الجوك يوم السفر ذاتو طبعا
الحاضر بكلم الغايب ,, غايتو شدي حيلك وحضري البيرقر والهوت دوغ والذي منو واعملي ليك حظيرة
للعيال والله يعينك ..
شكرا يا حبيبة على الطلة البهية .. بتصدقي طول عمري قايلاك في مسقط تتطلعي من السعودية ؟؟
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: الطيب شيقوق)
|
عواطف
سلام و تحية
| Quote: هل يجوز تحديد النسل في ظل الظروف الراهنة حيث الغلاء الفاحش وصعوبة التربية في بلد المهجر ؟ |
سؤالك هذا حمال فرضيتين :
1. الجواز من ناحية دينية بحتة ( و هو أمر فيه جدال كبير و إختلاف بين العلماء لأن البعض يرى في تحديد النسل قتْل للحياة لأن الحياة تبدأ من النطفة و العلقة و تحديد النسل به من الوسائل ما يمنع كل هذا و ذاك ) .. ما علينا إلى أن يتفق العلماء و إختلافهم فيه رحمة للعباد.
2. في حالة الغلاء و صعوبة التربية في بلاد المهجر .. فإن الغلاء يطال الآن السودان أيضاً .. أما التربية فأعتقد أنه في الغرب عموما تكمن المشكلة رغم أن دول الخليج صار الأمر فيها أخطر بالنسبة لبعض العائلات التي تسمح لبناتها و أولادها بالإنفلات دون رقيب أو حسيب ( و هذا موضوع يطول شرحه ) .
| Quote: السؤال التاني : إلى متى نحمل كل هذا الكم من الهدايا والهكر وكل شيء في السودان متوفر وكيف نقنع الأهل بأن الأشياء نفسها موجودة |
كل شيء تغير الآن يا أخت عواطف.
زمان .. حتى الجيران كانوا ضمن قائمة الهدايا العينية و النقدية.
هذا غير ( شيلة العرس ) التي يلتزم بها المغترب لأفراد أسرته و الأقربين و بعض الجيران الحميمين.
أما الآن .. و مع هذا الإنفلات السلبي للحالة المادية .. فإن مجرد المرور للسلام على الأهل تعتبر هدية .. و لا لوم علينا و لا يحزنون .. لأنه ( إذا ما كفَّى البيت فيحرم على الجامع ) ..
اللوم بدأ يتلاشى إذا ما ودينا هدايا ..
تخريمة : في واحدة مرة رجعتْ لي ( توب ) جبتو ليها هدية .. قالت ما مواكب الموضة .. تخيلي.
دمت
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: ابو جهينة)
|
أبو جهينة !!!
والخبر ليقين ,,,
سلامات ,,,
والله يا أبوجهينة الحالة في دول المهجر بقت صعبة من جميع النواحي إقتصادية وإجتماعية لذلك للضرورة
أحكام سواء اتفق العلماء أم اختلفوا ولا مش كدة ؟
فيما يتعلق بالهدايا الحمد لله أنه الناس بقت تفهم الوضع الاقتصادي للمغتربين ودي ذاتها تغيير إيجابي
إن شاء الله يشمل التغيير الإيجابي جميع النواحي الحياتية الأخرى ,
تخريمة :
حكاية رجيع الهدايا دي عاد حدث ولا حرج البتقول ليك دة ما توتال (بولستر) والبتقول ليك دة موضة
قديمةة إلخ .
شكرا على المرور الأنيق ...
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: عواطف ادريس اسماعيل)
|
العزيزة عواطف
تحية وسلام
حقيقة بوستاتك عن الشخصية السودانية بتعكس واقع معاش بصدق
ورغم إقرارنا فى قرارة نفسنا بهذه العيوب واعترافنا بأن هناك خلل ويجب معالجته .
الا أننا إما "نكابر" أو نتراجع ونقول " إمكن الناس تزعل منى "
أو " ما بعمل حاجه ما سبقونى عليها الناس "
عشان كده سنظل مكانك قف ...
بينما الاخرون يهرولون ...
بمناسبة المطار دى أحكى ليك موقف حصل فى المطار :
واحد سودانى جاى مودع صاحبو
الراجل المسافر وزنو كان زائد ، ودخل فى حجة مع موظف الكاونتر عشان يمشى ليهو عفشو .
الموظف كان راجل لطيف ، فى البداية كان برد عليهو بكل ادب وزوق إن القوانين ما بتسمح وووو
ولما صاحبنا المسافر نقتو كترت أكتر من اللازم قام الموظف قال ليهو : ياخى لو سمحت
عطلت الصف ، فى ناس وراك منتظرين ، ارجوك يا أدفع او نزل عفشك من الميزان ...
وبدون مقدمات نط صاحبنا المودع كالثور وقعد يرغى ويزبد " إنتو ناس ما عندكم زوق .
شنو يعنى زيادة عشرين والا خمسين كيلو !! حترمى الطيارة يعنى !!
هسه الراجل ده يودى عفشو وين يعنى ؟
إنتو ناس مفترين ، قعدوكم فى الكرسى ده عشان تساعدو الناس مش تفترو عليهم وووو "
المطار طبعا كلو شوش
والانظار كلها اتجهت ناحية صف السودانيين القدام الكاونتر مستغربين
وزولنا هايج والاجاويد تهدى فيهو ...
المصيبة صاحبنا الهائج كان راجل دكتور ومحاضر فى جامعة ،،،
وتسلمى كتير ، وتشوفى كتير ...
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: الفاتح الجنيد)
|
الفاتح !!!
يسعد مساك ,,,
لكن ما تقول لي من شدة ما ضحت على المودع وصاحبو أبو عقش لمن وقعت على فقاي ,, تصور النوع دة
كتير جدا وبذكرني شاهد ماشافش حاجة لمن جا واحد ناطي وقال لعادل إمام علامة مميزة يعني ضربة سيخة
خبطة شومة مشي حالك ومال !!! قام القاضي قال ليه وإنت دخلك أيه ؟؟ قام قال ليه أصلو القضية بتاعتي
بعد قضيته على طول .. أهو الزول الحشري دة عنده قضية والمودع مالو ؟؟
شكرا ياالفاتح على طلتك الجميلة وعلى كلام الطيب .
تخريمة :
عل إنت أخ أمل وأمال الجنيد بكندا ؟ ياريت أصلو ديل صاحباتي وأمال زميلتي في الجامعة !!
| |
|
|
|
|
|
|
|
|
|
Re: سودانيز @ مطار أبوظبي الدولي دوت كوم !!! (Re: عواطف ادريس اسماعيل)
|
مساء الخير
اعتقد فى ظل المتغيرات العالمية والاقتصادية والظروف التى يمر بها انسان هذا الزمان
وكم يحوش من المصارى(الجنيهات)افضل واحبز تنظيم وتحديدالنسل,من حيث المبداء
بشتى الوسائل المعروفة والمتفق عليها علميا(يمكن مراجعة الطبيب المختص بذلك).
اما اذا رجعنا شوية لسنوات نجد بعض الناس لايبالى بان ينجب اكثر من عشرة ابناء
على اساس المقولة المشهورة الخالق رازق ,هذا باختصار شديد.
الموضوع الثانى الوزن والهدايا وتوصيلاتها ,هذة فعلا معاناة كيف ؟اقولك..
انا عاوز ارسل بطانية للبلد عندما تذهب الى المطار لكى تجد مسافر عفشة شوية يوصلها لك
اول حاجة يقولة لك خارجة لى من الوزن واتا بوصلها لك ,لكن فى حالات كثيرة ينجح الواحد ويلاقى واحد
يخارجة.
فسالت نفسى اذا كان سعر الكيلو للوزن يساوى دينار مثلا كيف اشحن عدد من التلفزيونات وغسالة
وكرتونة بها عفش مطبخ واطقم شاى وقهوة وطناجر وماكينات لحام وكمبيوترو............
لكن بعد تفكير شديد وجدت بعض الحلول ,المهم فى الموضوع تكلفة الشحن العالمى اصبحت جهنم
اتمنى فى ظل عولمة التجرة المشتركة وفتح الحدودالعربيةللجمارك يسهل دخول وخروج البضائع
بين الدول العربية وان يكون مرن فى ذلك.
عودة للموضوع الاول وهو تحديد النسل
اذكر فى اسطوانة للاغانى الهندية توجد اغنية رائعة لها دلالات لمسالة كثرة الاولاد وتحديد النسل
اغنية حلوة جدا ,فى جلسة نسائية خاصة.
هذة اختصارات للموضوعين كبيرين.
| |
|
|
|
|
|
|
| |
عواطف ادريس اسماعيل
محمد مختار جعفر
abubakr
Sayed Bekab
بابكر التوم
ماجدة عوض خوجلى
الطاهر عثمان
العوض المسلمي
انعام حيمورة
sama7
معتصم محمد صالح
عمر الفاروق
الطيب شيقوق
محمد على طه الملك
محمد الواثق
Mamoun Zain
Kamal Karrar
سامي عبد الوهاب إدريس
مهيرة
ابو جهينة
الفاتح الجنيد
فيس بوك
تويتر
انستقرام
يوتيوب
بنتيريست