|
|
 ذكـر بدسـتـة نـسـاء..
|
الأعزاء جميعا،
أعضاء وقراء..
سلام وتحية ومرحبتين..
ذكر بدستة نساء..
هل هي شتيمة أو نقيصة أم شكر في حق الرجل؟
إذا كانت شكر: ليه ما قاعدين نستخدمها لما نريد نثني على راجل؟
ولو كانت شتيمة أو نقيصة: شنو الحاجات البعملوها النساء لما يعملها الراجل بنشبهو بيهن؟
وهل هي كعبة بس للراجل ولا كعبة للمرا كمان؟
ليه الراجل لما ينقل القوالات بيقولو عليه شغل نسوان؟
هم الرجال ما بيعرفوا يقوًلوا؟
وليه لما تختلف النساء بيقولوا عليها غيرة نسوان؟
هو مافي غيرة بين الرجال؟
و..
و..
هل في غيرة بين الرجال زااتهم والنساء؟
* للمشاركة في هذا البوست يرجى ارسال رسالة من موبايلك على الأرقام أسفل الشاشة ..
|
|
 
|
|
|
|
|
|
|
 Re: ذكـر بدسـتـة نـسـاء.. (Re: Raja)
|
راجا أباسي..
وينك يا معلمة...
تحيات كتار.. يعني لازم نعمل تغطية لمعرض تشكيلي حتى نلقى لينا معاكم مداخلة؟؟ الجفا كعب والله..
المهم..
الموضوع على لذاذتو وخفة دمو.. لكن:
ذكر بدستة نساء.. عاد يطرشني.. ما سمعت بيهو في ثقافتنا السودانية..
حتى جيراننا المصريين.. بيقولوا دي ست بمية راجل..لزوم التعبير عن الجدعنة وهي عندنا الضكرنة وكدا..
| Quote: للمشاركة في هذا البوست يرجى ارسال رسالة من موبايلك على الأرقام أسفل الشاشة .. |
أول حاجة يجازي محنك..
وتاني حاجة يخليك.. يا لذيذ يا رايق إنت..
احترامات ..
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Mahmoud Mustafa Mahmoud)
|
محمود يا عزيز..
سلامات ومراحب..
Quote: ذكر بدستة نساء.. عاد يطرشني.. ما سمعت بيهو في ثقافتنا السودانية..
حتى جيراننا المصريين.. بيقولوا دي ست بمية راجل..لزوم التعبير عن الجدعنة وهي عندنا الضكرنة وكدا.. |
لو رجعنا لكلمة جدعنة نلاقيها (مؤنث)..
وهي صفة ابدا ما حقت الرجال بس.
في نساء جدعات لما يخجلوك.
السؤال ما هل سمعت بيه أم لا؟
السؤال: هي شتيمة ولا شكر؟
* تضافرت عدة عوامل لعدم الدخول بإنتظام للمنبر.. عشان كده تلاقي نص البوستات بتفوت علي.
مع التقدير
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Raja)
|
يا زولة إنتي بتاعت لُبط ..
هسع نحنا قلنا ليكم حاجة ؟ أهو ساكتين و كافين خيرنا شرنا و لابدين " نراعي " ليكم ساااااكت ..
بعدين " ستة " دي جبتيها من وين يا رجاء كان ما حركات ( ستات ) ساكت !!
أهلنا بيقولو : مره بعشرة رجال .. ما قالوا ستة .
عارفة .. أنا شايلاني الهامشية و طوالي شغال حليفة بأختي عواطف ( نظام الود أصلي كده و صليح لمفهوم الجندر و أخو البنوت و و و ) ..
و طوالي سبة بلا سبب أفك ليك : انا أخوك يا عواطف ( و هي بالجد تستحق يعتزو بيها ) ..
يوم دخلت المطبخ أشرب لقيت مدامنا المصون ظابطة أرضية المطبخ غسيل .. صابون و كلوروكس و بلاوي ..
قالت لي : ح تتزحلق لو دخلت , طبعا رديت : انا أتزحلق ؟ .. أفووو .. أنا أخوك يا عواطف ..
عينك ما تشوف إلا الدلع يا راوية ..
بنهاية حرف الفاء كنت طيران باكوورد و منسدح على قدومي في البلاط و الحالة تطلبت قنتي الليل كلو و جيزال و حرجل و غرغرة و محن عجيبات .
من يومها و تبت لله و الرسول أن أقدل تاني بإسم شقيقتنا التي كادت أن تفقهني ..
....
الرجال , و النسوان !!!
إتلم زعيط على معيط ..
و المتعوس على خايب الرجا ..
ده يلطشو بيهو داك .
( لكن نحنا شوووووية أحسن  )
مساء الخير يا رجاء .
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Emad Abdulla)
|
عماد يا عبدالله يا عزيز..
مسا النور
كلامك كان ماشي تماام لغاية ما دقيت الدلجة..
ظهرتا على أصلك ..
وكمان جايبة ليها:
| Quote: ( لكن نحنا شوووووية أحسن ) |
أها آآدي فعدة تورينا الحسونية دي في شنو؟
مش قلت لبط
التحايا
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Raja)
|
مش { مان تو مان } أحسن لمن
تبقي الحكاية كورة.
ومش { مان تو وومان } أحسن
لما يبقى الموضوع المجتمع
ومش أحسن ننسب فخيم المنجزات
لذواتها الخاصة أكثر من تحميلها
{وإن على سبيل الدعابة} على مجري
المناقرة بين الذكر والأنثى.
رجوية ... عليك الله ما تتقلي على
عماد ده فهو آخر صوفي علماني
يؤتجر للمصالحة بين الواقع والموضوع,
بين الحقيبة والحقيقة, بين الغربة والعودة,
بين التساوق مع المجتمع والتقاطع معه.
لهذا فهو ممن أتحرى كفاءتهم فى العبور
... فيما يضيق الجسر وتنتحل الفكرة.
أي هو أجملنا ... بإختصار.
طيب يا رجوية ... نحن أسوأ شوية, فهل
يكفي ذلك لتحرير عماد من هجمة محتملة
{ للستات } على { أخو عواطف }؟
مع عاطر مودتي
| |
|
|
|
|
|
|
|
|
|
Re: ذكـر بدسـتـة نـسـاء.. (Re: HAYDER GASIM)
|
العزيز الغالي حيدر..
سلامات ومحبة..
تعرف عمري ما فكرت في الموضوع (هلال مريخ) أو (أنثى وذكر)..
لكن أمبارح عندي صديقة إتصلت بي وهي بتبكي وتشتكي من زول (راجل) لأنه أذاها..
وفي نص البكا والشحتفة قالت ليها كلمة نستني الموضوع عن شنو وركًزت فيها.
قالت لي: العمايل دي ما عمايل رجال.
ده زي النسوان غير الكلام في النسوان وجيب سيرتهم ويوقًع بين فلانة وعلانة في الشغل ما عنده شغلة!!!!
زعلت شديد من الكلام ده.
طبعا زعلت كمان على صديقتي والحصل ليها من عدم الأخلاق ده (راجل ولا مرا).
وفضلت طول الليل أفكر..
ها إحنا كنسوان كعبات للدرجة دي؟
وهل القطايع والقوالات ما حقت زول غيرنا؟
طيب. ده راجل وعمل كده.. يعني الموضوع ما راجل ومرا
يبقى الموضوع شنو؟
المشكلة يا حيدر، إنو لما نجي نشبه راجل بمرا. دايما بيكون للشئ الكعب.
ونفترض على طول إنه لبس فستان أو إسكيرت أو توب.
وهنا بنخلط ما بين الشكل والهندام.
التشبيه بيكون في الأفعال.
والأفعال لا جنس لها
يعني الكرم والجود والشهامة والجدعنة والأنانية والسوء ما ممكن بأي حال ترتبط بتوب او جلابية*
عمدة ده في العيون الأربعة..
مش صوفي وعلماني ونصير للمرأة لغاية الوقعة ؟
ما تخاف عليهو.
ودي
* الجلابية بالله ما أنا..
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Emad Abdulla)
|
رجاء...
ذكر بدستةاناث..
رجل بدستة نسوان...
كدا كيف?
| Quote: عينك ما تشوف إلا الدلع يا راوية .. |
عماد ...
صحصح معانا...
الحالة لسة الموضوع دا ما سخن ورجاء دى عملت لينا تقسيمة بالاحمر والازرق
وبس ...رايك شنو فى لعبة الالوان دى..
دى رجاءءءءء.. مع تحياتنا لراوية...
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Amira Elsheikh)
|
أميرة يا عزيزة..
سلامات ومحبات..
الذكر بدستة نساء زيًها زي أنثى بدستة رجال
ما حبينا نغيًر في المقولة البقت زي الأية الناس حافظاها. ناخدها زي ما إتقالت.
طبعا عماد مشًيت ليهو "راوية" قلتا أزنقو في حتة تانية..
غايتو بعد كلام عزيزنا حيدر ينظر في أمره..
سلمتي
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Emad Abdulla)
|
| Quote: أنا شايلاني الهامشية |
اتاري يا قريبي النضم العربي دة فيهو حاجات ؟؟؟؟ هسع بالانكليزي في منبر تاني روحنا مرقت مع الهامشيةواحدين
يقولو في وواحدين ما في واتاري هي في بلدنا من زمان بس نضم عرب ؟؟
______حاشية :
يا رجااتنين وعاملا للطرفيين لخبتة وانتي ضربتيها في تلات ...العملية بسيطة البياخد اكتر من السلطة والثروة يسمي روحو زي ما عايز ...يابتي انا ابو بنات والغالبية حولي انثي وانا وولدي اقلية فبالله خلينا نعيش في امان
| |
|
|
|
|
|
|
|
|
 Re: ذكـر بدسـتـة نـسـاء.. (Re: Raja)
|
أستاذه / رجاء العباسي
مساء الخير
_____________________________________
بس ............... زعلتيني شديد
ما أظن يارجاء.....
لانوا في نسوان الواحدة منهم بمائة راجل
القياسات باعتماد النوع ( ذكر / أنثي ) قاصّرة جداً
وبتكون ظالمة للرجال والنساء معاً
_________________________________
وتقبلى التحية والتقدير
| |
|
|
|
|
|
|
|
|
|
Re: ذكـر بدسـتـة نـسـاء.. (Re: عبد الناصر الخطيب)
|
العزيز عبدالناصر الخطيب..
سلام ومحبة
على عكسك........ فرًحتني شديييد
شخصيا أجد تشبيه النساء بالرجال من اجل المدح قمة في الإهانة.
زيًها زي إحساس الرجال بالإهانة عندما يتم تشبيهم بالنساء
النساء لديهن الكثير ليفخرن بيه. ولا ينقصهن شئ من كونهن لسن رجال
لكن تقول شنو..؟؟؟
سلمت
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Raja)
|
الانسانه دي ياااااء..
فيها صفات أحسن من صفات خمسين واحد في المكتب معاها..
كده كيف؟؟
مشتاقين يا رجويه..وبيبي علي اليد اليمين وجبس علي اليد الشمال وحلل في النار..
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Ishraga Mustafa)
|
إشراقة يا غالية..
سلام وتحية ومحبة..
تعرفي في نهاية البوست الأول بقت تظهر إعلانات تشبه بتاعت التلفزيون..
بصًي حتلاقي الرقم ..
* طبعا يا جماعة لو زي إشراقة بفهم المجتمع بتاع المثل إياه. ولا كل رجال العالم يعادلوها
عشان كده مقاييسنا لازم تتعدل
تحياتي لوليداتنا واصل ومرافئ
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Muna Khugali)
|
منًوية أصغر تيتة وأحلى ماما..
ألف لا باس عليك يا غالية في إيدك (لما حصل لي شرخ في ايدي قالوا لي عين. يا ربي الكسر شنو)
ومبروك الوافد الجديد على بيتكم العامر.. إن شا الله يفضل عامر دايما
تعرفي حاجة. صديقنا عنده خالو مرة سافر برة السودان. وكانت المرة الأولى برضو يركب طيارة.
لما جا راجع مشو يحمدو ليهو السلامة. كان مبسوط لدرجة كبيرة.
وكان بيحكي ليهم من ساعة ما طلع من البيت لغاية ما جا راجع.
أها في الحكاية جاب سيرة المضيفة الساعدته وإهتمت بيهو. وكان مبسوط منها شديد.
قام قال ليهم: والله يا ولدي المضيفة الله يباركها كانت بجد Gentleman
قصًر؟!!
ودي
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Raja)
|
سلامات يا رجاء
الليلة المزاج عالي ما شاء الله
حابب اضيف بعض الأسئلة لمجموعة الأسئلة المطروحة
- تحقير الرجل بنعته بـ "يا مرة" و " يا بت " عندما يصدر من نساء أو بنات
هل يعني انهن يعتبرن نوعهن نقيصة؟
- هل من الممكن إعتبار المجتمع الأمريكي مجتمع ذكوري
- مهيرة بت عبود لما قالت لأبناء قبيلتها " أدونا السيوف و هاكم رحاطتنا " هل كانت تعتبر لبس الرحط مسبة
قد تكون في إجابة هذه الأسئلة بعض الإجابات على أسئلتك الأولى
بالمناسبة...
البوست دا لا بشبه دنزل واشنطن لا حاجة
| |
|
|
|
|
|
|
|
|
|
Re: ذكـر بدسـتـة نـسـاء.. (Re: محمد البشرى الخضر)
|
سلام بالهلالابي ابو المريخابية..
تعرف والله المزاج علًيته بأيدي وشديدي..
مافي اي شئ عندي (حاليا) يدعو إلى ذلك
حابسيننا من يوم الأربع في بيوتنا. وأدوا البلد كلها إجازة بمناسبة سقوط الجليد.. تصدق؟
يعني ناس أسكندنافية وكندا وروسيا مؤجزين طول الشتا
أها نجي على الجد..
أسئلتك في الصميم.. وده القلت عليهو في ردي على حيدر إنه مرتبط بالشكل واللبس
وطبعا كلنا بنعرف معناتها شنو لو راجل يلبس ليهو فستان أو كعب عالي
ومن هنا تجي الشتيمة.
زيها زي (الراجل الشاذ) المجتمع بيلفظه أكتر من (المرأة الليسبيان)
الناس ما بتعتبر شذوذ المرأة عيب. العيب علاقتها مع الرجال في غير المحلات المعروفة من زواج وكده.
شوف يا البشرى. المجتمعات دي من أمريكتها ولغاية باكستان مرورا بالأرجنتين والكاميرون (حافظة البلدان بتاعت الكورة )
كلها مجتمعات ذكورية.. تزيد أو تنقص النسبة حسب وعي الناس العايشين فيها
يعني في بلدان كتيرة النسوان هن الشديدات والبيشتغلن والرجال محتًرين ومبتًرين وبعد ده تلاقي الراجل خالف رجله ويشتم النسوان ويقلل من شانهن.
بالمناسبة إتخيل لي (الرحط) يمكن اعتباره (Underwear)..
قرًبت ليك القصد؟
تشكر كتير على إضافتك
_____
بالمناسبة بوست دينزل واشنطن لسة قاااعد..
راجية ردك
قبيل كتبت ليك رد في بوست صاحب أكبر عدد مداخلات.. مسحتها خفت يقولوا علي جلابية حاقدة
| |
|
|
|
|
|
|
|
|
|
Re: ذكـر بدسـتـة نـسـاء.. (Re: محمد البشرى الخضر)
|
رجاء ،، إزيّك
الكلام ده كان زمان ، لمن كانت المرأة غير مسموح لها بمغادرة المنزل
الا لضرورات متعلقة (بشغل البيت)
الآن الوضع اتغير ، تعلمت المرأة ، وخرجت للعمل ، وتثقفت
وأصبحت منافس خطير للرجل ..
المجتمع النحن عايشين فيهو رسّخ المفاهيم دي لدى المرأة والرجل
لكن الملاحظ أنو الاجيال الجديدة بدأت تتحلل من ثقافة (تميز الرجل)
ويبدو أن زمن (سي السيد) قد انتهى ..
رجاء قبلما أمشي ، بالله عليك الله أعذري عماد ده ، بيكون ما لابس النضارة
Quote: بعدين " ستة " دي جبتيها من وين يا رجاء كان ما حركات ( ستات ) ساكت !!
أهلنا بيقولو : مره بعشرة رجال .. ما قالوا ستة . |
يا عمدة رجاء قالت دستة (ما ستة) سلامة النظر يا خوي
| Quote: عينك ما تشوف إلا الدلع يا راوية .. |
دي رجاء الكتبت البوست ده يا عماد ما راوية
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Salah Abdulla)
|
العزيز صلاح..
سلامات ومحبات..
كلامك سليم مية مية.
لكن وحتى اللحظة داخل جبة المجتمع لسة قابع المفهوم بتاع إنه الراجل أحسن ومقياس للحاجات الكويسة..
ويا ويله لو عمل غلط. طوالي يرموك ليك في المرا ويشبهوه بيها؟؟!!!
* تعرف أنا مداخلة عماد موتتني من الضحك.
بداية من الستة وراوية وإنتهاء بالوقعة
مسكته في الهينة. لكنك وأميرة ما ريًحتوه في التانيين
شرفتني والبوست
| |
|
|
|
|
|
|
|
|
|
Re: ذكـر بدسـتـة نـسـاء.. (Re: الملك)
|
ناجي يا ملك..
سلامات وشوق ليك وللبلد وللمشاوير المارثونية بتاعت الكلاكلة - المك نمر - الحلفاية وود أرو
Quote: إنتى الإناث راحو وين ,,,شايف الكلمة دى
ماف
.. |
وفي رواية أخرى: الأناتي
لمزيد من التقليل.. تخيًل
الغريبة صفة الأنوثة بترتبط عند الرجال (يمكن ما كلهم - أتمنى) بالجاذبية الحسية (Sensual attraction)
طيب هي الجاذبية الحسية عيب؟
شفت التضارب ده؟
تسلم
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Raja)
|
حاشا لله ..
لاكين حرف الدال بتاع " دستة " ده سغير ياخ ..
كبروهو لينا شوية بس ..
جزاكم اللاهو خير .
....
كده كويس يا حيدر ؟؟
تفك فيني الزولة دي و هي متحنفشة كده و تكبّر اللفة ؟؟
إنت عارفني زول صاحب عيال و عيا !!
( يحلنا الحلة بله الليلة ) .
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Emad Abdulla)
|
رجوية ياصاحبتى...
كتبت كلام كتير ذات صلة بالكوتة {الذكورية} التى تبنتها {دستة} نسائية
والمهرجانات السياسية
والدراما الحيايتة
دليلى الذكر البى دستة نساء...
لقيتومالافق وكلام الطير فى الباقير، قلت اخليهو والدنيا صباح امكن تصحا الفكرة اوضح....
اها نتيجة المعادلة طلعت كم؟!! بالله ارسلى الرد على اى وسيلة تريحك!!
-------------
تصدقى الطير الفى الباقير ده بيكون مرتاح جدا، تجىء نمشى عليهم
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Raja)
|
سلام يا رجاء
تعرفى...قبل كم سنة كده قلت آخد class بتاع social issues اها فى اول حصة ولما بدا الدرس المحاضر سال سؤال
ليه لما جابو ولد للمستشفى الsurgeon طلب من طبيب تانى يعمل العملية
اخوك على شلاقتو طوالى شبكو عشان الsurgeon ابوهو او جدو و البقية ايدونى بما فيهم البنات
طبعا طلعت امو هى الجراح ولذلك رفضت اجراء العملية
عقلية خربة
و
حاجة تكسف
لكنى الآن اكثر وعيا
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Ahmed Al Bashir)
|
الفاضل العزيز أحمد البشير..
سلامات ومحبة..
تعرف في حاجات كده بناخدها كمسلًمات. وأبدا ما بنتعب للحظة في التفكير في صحتها من عدمه.
أتذكر ولمدة 4 شهور قمت بإنتاج برنامج للأطفال في دارفور.
من المواضيع الناقشتها: لو أمك حامل وحتجيب ليكم طفل جديد. عايزه ولد ولا بت وليه؟
وما هي الأعمال أو الوظائف التي تخص الرجال وتلك التي تخص النساء؟ وليه هم شايفين كده..؟
إجابات الأطفال في الأول كانت نمطية وتعكس تماما طريقة تفكير مجتمعنا.
لما ناقشتهم. طلعنا بإنه الأخ أو الأخت الجديد اي واحد فيهم عنده فايدة. وبداوا يعددوا لي الفوايد لما إندهشتا.
وتاني في موضوع الشغل.. إنتهينا لإنه أي وظيفة ممكن يعملها الزول لو إتسلح بالعلم والمعرفة والقدرة عليها.. غض النظر عن نوعه.
ولقيت الأولاد عايزين يبقوا مدرسين. والبنات عايزات يبقن طبيبات بيطريات (ودي كانت شبه معدومة في إجاباتهم قبل ما يعرفوا إنه الوظيفة بتتطلب شنو؟)..
تكرم كتير يا عزيز على مشاركتك الواعية..
ودي
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Raja)
|
العزيزة رجاء
طبعا ممكن يتقال كده لي مستر كلنتون لمن يكون زوج الرئيس ( السيد الاول )
وعندنا في السودان لمن يشكروا الزول بيقولو ليهو اخو البنات و عشا البايتات القوي و مقنع الكاشفات ا و المامون علي بنوت فريقوا
خارج النص
والدي رحمة الله عليه كان ينادي اختي بي ( ست البنات جملة و قطاعي)
| |
|
|
|
|
|
|
|
|
|
Re: ذكـر بدسـتـة نـسـاء.. (Re: ابراهيم عدلان)
|
الأخت العزيزة رجاء
تحياتي و تقديري
| Quote: هل هي شتيمة أو نقيصة أم شكر في حق الرجل؟ |
في مجتمعاتنا التي تمجد الذكورية فقط هي شتيمة.
و لكن لو راجعنا أضابير التاريخ لوجدنا نساءا يفقْن الرجال سيرة ...
هذا الصنف من النساء يمكن أن نقارن رجلا بدستة منهن إن هو كان مستحقا لهذا التصنيف
| Quote: إذا كانت شكر: ليه ما قاعدين نستخدمها لما نريد نثني على راجل؟ |
قبل كدة أنا قلت :
ليه بيقولوا : وراء كل عظيم إمرأة ؟
ليه ما نقول : إلى جانب كل عظيم إمرأة تقف إلى جانبه تشد من أزره و تزوده بوقود الصمود حتى النجاح ؟
و عشان المقولة التي تقول : أنها خلف العظيم و العظمة لله وحده ، فإن نجاحات المرأة دائماً خلف الكواليس مهضومة الحق حتى في النجاحات التي تكون سبباً فيها لذا نجد أنه حتى بوجود ( دستة نساء ناجحات ) لا يُحْدِثْن جلبة و ضوضاء رجب ( بنصف نجاح ) .. و لذا فإن الثناء على الرجل ينهال عليه بينما المرأة تقف خلفه تذرف دموع الفرح .. و فقط تنال الشكر بينها و بينه في كلمات ( تُرْضي مكامن حبها له ) ..
| Quote: ولو كانت شتيمة أو نقيصة: شنو الحاجات البعملوها النساء لما يعملها الراجل بنشبهو بيهن؟ |
لو بكى الرجل نقول له : قاعد تبكي زي النسوان ( في حين أن البكاء هبة ربانية أوْدعها في الإنسان لينفس بها عن مكنوناته) .. و لم يختص بها الأنثى .. ( بعض الرجال يرى أن بكاء الرجل يمنحه صفة الحيض و النفاس ) .. تفكير موغل في الجهل بلا شك.
لو خاف الرجل من أمر و تردد في الإقدام نقول له : بالله إتدسَّ زي النسوان... ( في حين أن الكر و الفر تكتيك لا يجيده إلا كل ذو عقل راجح ) ...
و ...
شكرا على هذا البوست
| |
|
|
|
|
|
|
|
|
|
Re: ذكـر بدسـتـة نـسـاء.. (Re: ابراهيم عدلان)
|
الفاضل العزيز إبراهيم..
سلامات ومحبة..
نعم بيشكًروا الزول بإنه اخو اخوات ومقنًع كاشفات (زي المطوًع كده )..
ويوم القيامة بينادوه بإسم امه.
إلا إنه من أكبر الكبائر أن تنادي الزول (في دنيتنا) دي بإسم امه!
يا سبحان الله!!!!
الغريبة الفهم ده نجح المجتمع في تسويقه لبعض النساء.
تصدق في سيدات لو سألتهم الأسئلة الفوق دي. يستنكرن ويشجبن ويهبًن.
ولما يهدأن وبروقان تحاججهم. يقولو ليك: إحنا إتعودنا على كده..
ما تسألي ولا تناقشي.
وكأنك بتناقش في هل القرأن صالح لكل زمان ومكان؟
تكرم لحضورك وتشريفك البوست
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Raja)
|
| Quote: وأدوا البلد كلها إجازة بمناسبة سقوط الجليد |
قُتّي لي يا رجاء بمناسبة سقوط الجليد ادوا البلد كُلها إجازة؟ ..
بالغ الجليد ومعاهو بالغت البلد ..
خلاص المرة الجاية إتاكدوا إنو ذاكر كويس ..
كيفِك يا رجاء
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Raja)
|
الغالية رجاء ..
مساء الورد .....
بصراحة لا أحبذ عقد مقارنة العطاء الإنساني بكل أوجهه وفق معيار الجندر أو الجنس. قد يكون من الصعب تطبيق ذلك في عالمنا البطركي القائم على صفوية الرجل بشكل أو بآخر ... ولكن العطاء الإنساني اشمل و وأوسع من حشرة في إطار كرافتة أو شنب.
مثلا مقولة امرأة بعشر رجال تسبغ صفة (الذكورة – الضكرنة- الرجولة) على المرأة بغية المدح مما يعني ضمنا أن أي امرأة أخرى من مجمل النساء (ما عدا الممدوحة) لا تساوي أكثر من عُشر رجل!
أما مقولة (ذكـر بدسـتـة نـسـاء) محور البوست فهي تسير في ذات السياق بمقارنة عطاء إنسان مكتمل الأبعاد بإنسان آخر مكتمل أيضاولكن الفرق ان احدهم × 6 أو بالجملة! هذه المقارنة توحي بنوع من الصفوية الغير مبررة لصالح الرجل ...
ركب الحضارة الانساني يسير لذات الجهة، بشقيه الرجل و المرأة ولن يصل أحدهما قبل الآخر مهما خلقنا من طبقات بينهما فكلاهما من نفس واحدة وكلاهما من طين وان اختلفت وظائفهما الظاهرية.
لك و لزوار البوست كل الود والاحترام،
| |
|
|
|
|
|
|
|
|
|
Re: ذكـر بدسـتـة نـسـاء.. (Re: عزاز شامي)
|
العزيزه / رجاء العباسى ...
تحيه خالصة مخلصة ...
بعدين ( ذكر بدستة نساء ..)
ده جبتيهو من وين .. ؟؟
أها رأيك شنو فى قول ( المره كان فاس ما بتقطع راس )
طبعا الكلام ده مع حريم اليوم بعمل ( طروم ) ..
لك تحياتى ...
محمد مختار جعفر
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Raja)
|
'انثى ولا دستة رجال'
الكلام للشاعر محجوب شريف
استلفتو انا وجبتو لبوستك دا لزوم التوازن وكدة...
موضوع البوست مهم والله يا رجوية..
والسبب فى ربط سلبيات المجتمع بالنساء ما غايب عليك..
والله يجازى المجتمع الذكورى..
مشوارنا طويل ...وانا والله بتغاظ زيك كدة
لما اسمع و حتى احس واحدة من التعليقات دى..
لك ودى
رباب
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Raja)
|
Quote:
للمشاركة في هذا البوست يرجى ارسال رسالة من موبايلك على الأرقام أسفل الشاشة
* ááãÔÇÑßÉ Ýí åÐÇ ÇáÈæÓÊ íÑÌì ÇÑÓÇá ÑÓÇáÉ ãä ãæÈÇíáß Úáì ÇáÃÑÞÇã ÃÓÝá ÇáÔÇÔÉ ..
|
رجاء يا رجاء
كيف انت
قلتا اقول سلااااااااام
قاسم
| |
|
|
|
|
|
|
|
|
 Re: ذكـر بدسـتـة نـسـاء.. (Re: Ashraf el-Halabi)
|
رجوية !!!
صباحك ورد ,,,
هل أصبح الذكر أحد المقاييس والمعايير للجدعنة ؟ فمثلا تجديهم يقولون ( إمرأة بعشرة رجال ) أو
( بستين راجل ) ومع ذلك يا ست البنات يقول الشاعر :
فما التأنيث لاسم الشمس عيب ..
و لا التذكير فخر للهلال
صادق ودي ..
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Raja)
|
راجا ..
كيف أخبارك
وبما أنو دع أسبوع نكيت البوستات القديمة
قلت أوريك رسالة جاتني هسسسيي ده
قالو ليك:
* عندما يجيب الرجل على سؤال يسمى (مصيب) .. أما المرأة (مصيبة)
* عندما يبقى الرجل على قيد الحياة يسمى (حي) .. أما المرأة (حية)
* عندما يحكم الرجل بين الناس يسمى (قاضي) .. أما المرأة (قاضية)
أوع تجي تديني الضربة (القاضية)
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Raja)
|
شكرا كتير استاذتى رجوية الحبيبة
هى اسئلة حقيقية ومهمة وهامة..
وانا واحد من الذين تسألؤا سرا
فى مثل هده ...
الحاجات..
وهل فى الحقيقة نحن مطالبين بالالتزامات الاخلاقية
التى اقترحناها على أنفسنا
أنا فى حيرة يا رجوية
وكل ما التزمنا به لا نستطيع ان نمارسه فى محلاتنا اقصد بيوتاتنا
فمسألة المساواة مسالة فيها ترفيه وترف اكثر من المطلوب
فى تقديرى انا الآن مشتت
لكن حريص على تساؤلاتك العميقة هذه
ولو فى جدية.. كدى خلو كلو واحد او واحدة تكتب تجربتها
فى تقديرى ح نكتشف حاجات مهمة!!وجدا
| |
|
|
|
|
|
|
|
|
|
Re: ذكـر بدسـتـة نـسـاء.. (Re: Raja)
|
العزيز الصايم..
تسلم كتير لرفع البوست..
تعرف أنا من شدة ما بوستاتي ضايعة مني بقيت أمشي في البحث أكتب اسمي عشان اعرف أرد ..
كتر خيرك..
ودي
| |
|
|
|
|
|
|
|
|
|
Re: ذكـر بدسـتـة نـسـاء.. (Re: azhary awad elkareem)
|
الأخ أزهري ...
| Quote: العطاء الإنساني اشمل و وأوسع من حشرة في إطار كرافتة أو شنب |
اعتذر عن قصور التعبير، قصدت ان أقول ان العطاء الانساني أشمل و أوسع من أن يحشر في إطار كرافتة أو شنب ..
أشكرك على التنبيه...
| |
|
|
|
|
|
|
|
|
|
Re: ذكـر بدسـتـة نـسـاء.. (Re: عزاز شامي)
|
Quote: اعتذر عن قصور التعبير، قصدت ان أقول ان العطاء الانساني أشمل و أوسع من أن يحشر في إطار كرافتة أو شنب ..
أشكرك على التنبيه... |
عزاز يا صديقة..
سلامات ..
الحقيقة هو ليس بقصور فى التعبير
بقدر ما هو خطأ مطبعى..التاء بدلاً عن الهاء فى كلمة(حشره)..
بصراحة أنا فهمتها بس قلت أشاغلك شوية..
لك الشكر على الإهتمام والعودة..
وأهى مناسبة أحى رجاء قريبتى مرة تانية..
ــــــــــــــــــــ
لكل من مر/ت من هنا محبتى
| |
|
|
|
|
|
|
| |
Raja
Mahmoud Mustafa Mahmoud
Emad Abdulla
HAYDER GASIM
abubakr
Muna Khugali
Ishraga Mustafa
محمد البشرى الخضر
الملك
Ahmed Al Bashir
ابراهيم عدلان
ابو جهينة
wd al geran
محمد مختار جعفر
Rabab Elkarib
قاسم المهداوى
Ashraf el-Halabi
عواطف ادريس اسماعيل
محمد عبد الماجد الصايم
على عمر على
فيس بوك
تويتر
انستقرام
يوتيوب
بنتيريست