يا خصوم تراجي وأعدائها: تعاملوا مع تراجي مصطفي بشرف وأخلاق !

Quote: وأنا حقيقة أشهد لمن يستخدم هذا النوع من الكسير بالذكاء الحاد لأنه يصيب خصومه بالأرباك الشديد لعدم وضوح مقصده ، وعندما يفهمون الغرض من كسير تلجه ذاك يكون الوقت قد فات ويكون كاسر التلج قد ضرب ضربته ولم يعد من المجدي ملاحقته أو محاسبته على ما إقترفه !!! عارفكم هسي كلكم راسكم ضرب وبتقولو ( أبو النيز دا رمضان فرق معاهو ولا شنو !! ) لإنو كلامي دا هسي زي الدراب دراب.. لكن كدي النروق المنقة ونبدا الشرح !!! من يستخدمون (كسير التلج متحيز إلى فئة ) أناس في غاية الذكاء وهم قارئون جيدون لساحة المنبر وعلى علم بالمجموعات المنبرية المختلفة خاصة السياسية منها.. وأنه يعلم تماما أنه أن هاجم أحد أعضاء المجموعة المنبرية تلك فسيكون الأمر أشبه بالإنتحار ، وستكون المعركة في غير صالحه إذ سيتكتل ضده في الحال بقية المجموعة (ويهبروهو هبر شديد) !! لمن ما يلقى الطريقة التخارجو منهم !!! لكن هو في نفس الوكت خاتي في نفسو إنو لا زم يهاجم زولوا العايزو وما (يخليو يرقد على جنبة) لإنو لا بيهضمو ولا الزول داك بيهضموا برضو .. مع إنو بيكون ما عندو مشاكل مع باقي المجموعة أها بيقوم يحتار في التصرف !!! طبعا أول حاجة يفكر فيها إنو يحاول يسكت المجموعة أو الشلة بتاعت الزول دا أو على الأقل يختها في الحياد أها بيلجأ للتكتيك الذكي دا !!! بتبدأ الشغلة قبل إسبوع أ و أكتر من موعد الهجوم المفترض على الزول العايزو .. بقوم خلال الإسبوع دا يخش لي مجموعتو (مجموعة الزول المستهدفو) في بوستاتم ويبدأ يكسر ليهم في تلج كتيييييييير وبااااااااارد بي مناسبة وبدون مناسبة ومرات كدا يفتح ليهم بوستات مخصوووص (هو فتح البوستات بي قروش !!) وعارف إنو فتح البوست دا حا يجيب المجموعة بتاعت زولو داك أها ويستمر كسير التلج بالطريقة دي كم يوم كد ا ومرات بيكون معاها إضافة الجماعة ديل للماسنجر بتاعو .. والبوست بيكون جاري وطوالي في الصفحة الأولى لحدي ما كاسر التلج دا يطمن إنو (الحلة سبكت) !!! أها في الظروف دي بتجي ساعة الصفر اللي هي كاسر التلج راجيها يقوم كدا والبوست الفاتحو للجماعة فوووق في الصفحة الأولى( قريب الإعلانات بتاعت بكري ديك) !! يقوم صاحبنا بعد ما يكون إطمن إنو حيد الجماعة وإنو الوضع في الميدان مهيأ.... يقوم كدا يشن هجوم خاطف على زولوا داك .. هجوم عبارة عن ضربة مفاجئة أو غارة عشوائية إما في بوست منفصل أو في واحدة من البوستات البيتداخل فيها الزول المستهدف .. طبعا الضربة لازم تكون مؤثرة وقوية لإنو ليهو أكتر من إسبوع بيخطط ليها ... وبعد ما تنتهي الضربة المفاجئة دي يقوم صاحبنا يرجع مباشرة لي بوستو الأول بتاع كسير التلج لي جماعة الزول المابيهضموا ..... وطوالي يواصل في كسيرو للتلج ليهم زي الما حاصل حاجة ويتصنع البراءة وفوق راسو مدورة العصافير البنشوفا في أفلام الكرتون ديك!!! طبعا بيحصل إرتباك شديد لي جماعة الزول الأول لإنهم في الحالة دي بيكونوا مربوطين بي بوست كسير التلج الإتعمل ليهم أو بوستاتم الخاصة التي كان يتداخل فيها كاسر التلج داك بكل حسن نية مع ملاحظة إنو كاسر التلج بعد ما ضرب ضربتو وقبليها برضو .. حافظ على كل بوستات كسير التلج المعنية في الصفحة الأولى .. أها جماعة الراجل داك بيكونوا محرجين شديد لو جو ودافعوا عن زولم ضد كاسر التلج داك وبيحاولوا يبردوا الجو ويسعوا بس بين الإثنين للصلح لكن بدون ما يدافعوا عن زولم بصورة مباشرة لإنو كاسر التلج الخبيث نجح إنو يخدرهم بي الحنك الكباهو في بوستو وبوستاتم !!! الملاحظ بعد إنتهاء الأزمة ونجاح الغارة التي شنها كاسر التلج إنو بعد داك بوستات التلج ديك كلها بتتراجع نحو القاع تراجع مخيف وسريع دون أن يكلف أحدهم نفسه برفعها ولو حتى بكلمة فوق .. ليس هذا فحسب ولكني أخشى ان يصيب ال( بلوك) الماسنجرات الخاصة بينه وبين المجموعة !!! صنفرة : هذا النوع المدهش من كسير التلج يبرر تماما لماذا لا تتقدم المجموعات المنبرية المعروفة للدفاع عن أحد أعضائها إذا ما تعرض لهجوم أوا نتقاد عنيف من شخص ما والراسخون في العلم هم وحدهم من يدركون أن باقي المجموعة مشغولة تماما ببوست أخر يتذوقون فيه التلج المصنوع بعناية فائقة حسب مقاسهم من قبل كاسر الثلج والذي يكون في ذلك الوقت يضحك بكل سخرية بعد أن حقق أهدافه كاملة ..