الى روح الكافر الشهيد الجميل سليمان ميلاد حنا!

المقاتل قُتل
بت مورا بت ناس عزاز أهل جـود وكرم
قدر القول يميـن زولتن عديـله ماكى وهم
فرسـان الحيره صوتا انخرص لسانا إتلجم
دم الشهيد ما فيهو تار نار الخيانه خيارا الدم
---------------------------------
قصـة وليـد طلـع الخلا شـايل سـلاحه نزيـر
فى كتفه شـال أحزانو وبـى كفـه ضربه خطيـر
رجـف الترابى وخربط و جحظت عوينات البشـير
فى بيعه ما مفهومه كله إنتهى والسر فضل فى بير
----------------------------------
الصادق الهمام شـال عسـاكرو إنسـرق
والمرغنـى من شـرق السـودان مـرق
وأمـوم صد بعياله من الفرسـان إتـفرق
ولواهو الموحد كرت وإنحرق
-------------------------------------
قامت وفود وإتكتبت عهود وإتقبضت عقود متلتله
شـوف العجايب المنتصر دفع التمن زمته و بدّلا
زمن المصايب قبض المنهزم وحال البلد بقى بالبلا
دم العيـال ضايع هدر يا عزه دايمآ بالخيانه مكبلا
---------------------------------------
رجـع المقاتل لى قروره عرين جيش التحالف
جات المصـايب غضب (البجا) و زال التوالف
قصـة (أمل) وسـلطان (حبوش) زاد التخالف
تعزيب عسـاكر وإعتقال وشـوية سـوالف
---------------------------------------
(المقاتل قُتل) جات الإشارة من قرورة بخيط النهار
إيه الحصل غارة نفير حرب الجـهاد موت الكتار
تواتر قصص تباين صور سخافة خبرغرابة قرار
رسـى الكلام فى مجـزوب مسـلح داس الزرار
---------------------------------------
كتلك غشـيم مجنون؟ أفو عليك سـليمان
فـرغ زخيـرته تمام ميتين طلق جبخـان
مزروع مدرب زين ولد حريـص فهـمان
قنص الأسـد مو غى الدود بطيّر الرحمن
---------------------------------------
قائد مدوخ جيش شبحآ بقالو أزير يشـيل النوم فزع كابوس
"الكويـفر جاكم" رجّفت الأبدان ونعقت الغربان ظبط مدروس
"دخل من وين و طلع من وين" لخبـط الإيمان طير الناكوس
فى لحظة صبح غبيان وترك سلاح عمران و فى إيد مهووس؟!
---------------------------------------
بطن الجـب قراره بجى مافى حديد بياكلو السـوس
من تيسير مافى رجى وأبو غسان خلاس بقى محبوس
نوم فى قروره ما تشـيل هم أخوك لسه حايم إكوس
ودرب النجمه باريته و وعدك جوه القلب مدسـوس